Mawu me Ŋutifafa ƒe Dɔlawo Nyenye
“Nyagblɔla, siwo gblɔa ŋutifafanya . . . ƒe afɔwo nyo le towo dzi loo!”—YESAYA 52:7, NW.
1, 2. (a) Abe alesi wogblɔe ɖi le Yesaya 52:7 ene la, nyanyui kae wogblɔ be woaɖe gbeƒãe? (b) Nukae Yesaya ƒe nyagblɔɖinyawo fia le blema Israel gome?
NYANYUI aɖe li wòle be míaɖe gbeƒãe! Ŋutifafanyae—ŋutifafa vavãtɔ. Xɔname ƒe gbedasie, eye Mawu ƒe Fiaɖuƒea ŋue wòku ɖo. Nyagblɔɖila Yesaya ŋlɔ nu tso eŋu gbaɖegbe ke, eye wokpɔ eƒe nyawo ta na mí le Yesaya 52:7, afisi xlẽ be: “Du nyui xɔla ƒe afɔwo nyo le towo dzi loo! Eya, amesi ɖea gbeƒã ŋutifafa, eye wòtoa gbe nyui, eɖea gbeƒã xɔname, eye wòle gbɔgblɔm na Zion be: Wò Mawu enye fia!”
2 Yehowa tsɔ gbɔgbɔ ʋã eƒe nyagblɔɖila Yesaya wòŋlɔ nya ma bene wòaɖe vi na blema Israel kple míawo hã egbea. Egɔme ɖe? Esime Yesaya ŋlɔ nya mawo la, anye be Asiriatɔwo ɖe aboyo Israel ƒe dziehefiaɖuƒea xoxo. Emegbe woaɖe aboyo Yuda ƒe anyiehefiaɖuƒea me nɔlawo hã ayi Babilon. Nuxaxa kple tɔtɔ nɔ dukɔa me ɣemaɣi elabena womeɖo to Yehowa o eye esia ta womenɔ ŋutifafa me kple Mawu o. Abe alesi Yehowa gblɔ na wo ene la, woƒe nuvɔ̃wɔwɔ nɔ woawo kple woƒe Mawu dome gblẽm. (Yesaya 42:24; 59:2-4) Gake Yehowa to nyagblɔɖila Yesaya dzi gblɔe ɖi be le ɣeyiɣi si sɔ me la, Babilon-gbowo aʋu. Mawu ƒe dukɔa akpɔ mɔ atrɔ yi wo denyigba dzi agbugbɔ Yehowa ƒe gbedoxɔ atu ɖe afima. Woagaɖo Zion te eye woagade ta agu na Mawu vavã la le Yerusalem.—Yesaya 44:28; 52:1, 2.
3. Aleke Israel gbugbɔɖoanyi ƒe ŋugbedodoa nye ŋutifafa nyagblɔɖi hãe?
3 Xɔname ƒe ŋugbedodo sia nye ŋutifafanyagblɔɖi hã. Ne wogaɖo Israel-viwo te ɖe anyigba si Yehowa na wo dzi la, anye Mawu ƒe nublanuikpɔkpɔ kple woƒe dzimetɔtrɔ ƒe kpeɖodzi. Afia be wole ŋutifafa me kple Mawu.—Yesaya 14:1; 48:17, 18.
“Wò Mawu Enye Fia!”
4. (a) Susu ka nue woate ŋu agblɔ le ƒe 537 D.M.Ŋ. me be ‘Yehowa zu fia’? (b) Aleke Yehowa kpɔ nyawo gbɔe be wòava ɖe vi na eƒe amewo le ƒeawo me emegbe?
4 Esi Yehowa xɔ na wo alea le ƒe 537 D.M.Ŋ. me la, wote ŋu ɖe gbeƒãe na Zion wòsɔ be: “Wò Mawu enye fia!” Yehowae nye ‘Fia mavɔmavɔtɔ’ nyateƒe. (Nyaɖeɖefia 15:3) Gake eƒe dukɔa ƒe ɖeɖekpɔkpɔ sia nye eƒe dziɖulanyenye ɖeɖefia bubu. Eɖe eƒe ŋusẽkatãtɔnyenye kple alesi wòɖu amegbetɔ ƒe fiaɖuƒe sesẽtɔ kekeake dzii vaseɖe ɣemaɣi la fia le mɔ ɖedzesi aɖe nu. (Yeremya 51:56, 57) Yehowa ƒe gbɔgbɔ ƒe dɔwɔwɔ gblẽ nugbe bubu siwo woɖo ɖe eƒe dukɔa ŋu me. (Ester 9:24, 25) Yehowa de asi eme zi geɖe to mɔ vovovowo dzi na Medo-Persia fiawo wɔ nusi eya ŋutɔ ƒe dziɖulanyenye di. (Zaxarya 4:6) Woŋlɔ nu wɔnuku siwo dzɔ le ŋkeke mawo me ɖi na mí le Biblia-gbalẽ siwo nye Ezra, Nexemya, Ester, Xagai, kple Zaxarya me. Eye aleke gbegbe wo me dzodzro doa ŋusẽ míaƒe xɔse enye si!
5. Nudzɔdzɔ ɖedzesi kawoe wofia asii le Yesaya 52:13–53:12?
5 Gake nusi dzɔ le ƒe 537 D.M.Ŋ. me kple emegbe nye gɔmedzedze ko. Le gbugbɔgaɖoanyi ƒe nyagblɔɖi si le ta 52 megbe teti la, Yesaya ŋlɔ nu tso Mesia ƒe vava ŋu. (Yesaya 52:13–53:12) Yehowa ato Mesia si nye Yesu Kristo dzi agblɔ xɔname kple ŋutifafanya si ŋu gɔmesese anɔ wu nusi dzɔ le ƒe 537 D.M.Ŋ. me.
Yehowa ƒe Ŋutifafa ƒe Dɔla Gãtɔ Kekeake
6. Amekae nye Yehowa ƒe ŋutifafa ƒe dɔla gãtɔ kekeake, eye dɔ kae wòbe wode ye si?
6 Yesu Kristoe nye Yehowa ƒe ŋutifafa ƒe dɔla gãtɔ kekeake. Eyae nye Mawu ƒe Nya, Yehowa ŋutɔ ƒe Nyanuɖela. (Yohanes 1:14) Esia ta ɣeaɖeɣi esi Yesu xɔ nyɔnyrɔ le Yordan-tɔsisia me vɔ megbe la, eyi ƒuƒoƒe le Nazaret eye wòxlẽ dɔ si wɔƒe wòva tso Yesaya ta 61 me sesĩe. Dɔdasi ma na eme kɔ ƒã be “ɖokuisinɔnɔ” kple ‘dɔyɔyɔ,’ kpakple Yehowa ƒe ŋudzedzekpɔɖeameŋu ƒe mɔnukpɔkpɔ ŋutie wòva gbeƒã ɖe ge le. Gake menye ŋutifafanya koe Yesu ɖe gbeƒãe o. Mawu dɔe hã be wòaɖo ŋutifafa si anɔ anyi ɖaa gɔme anyi.—Luka 4:16-21.
7. Nukae dona tso ŋutifafa me nɔnɔ kple Mawu to Yesu Kristo dzi me?
7 Le Yesu dziɣi la, mawudɔlawo ɖe wo ɖokui fia alẽkplɔlawo le Betlexem gbɔ eye wonɔ Mawu kafum nɔ gbɔgblɔm be: “Ŋutikɔkɔe woana Mawu le dziƒo boo, eye ŋutifafa ava anyigba dzi; amegbetɔwo ŋu woakpɔ ŋudzedze nyui le.” (Luka 2:8, 13, 14, míawoe te gbe ɖe edzi) Ẽ, amesiwo ŋu Mawu kpɔ ŋudzedze nyui le la akpɔ ŋutifafa elabena woxɔ mɔnuɖoɖo si wòwɔ to Via dzi la dzi se. Nukae wòafia? Afia be togbɔ be nuvɔ̃ mee wodzi amegbetɔwo ɖo hã la, tenɔnɔ dzadzɛ, ƒomedodo si adze Mawu ŋu la ate ŋu asu wo si le egbɔ. (Romatɔwo 5:1) Woate ŋu aɖe dzi ɖi bɔkɔɔ, wòanye tomefafa si womakpɔ le mɔ bubu aɖeke nu o. Le Mawu ƒe ɣeyiɣi ɖoɖi dzi la, woaɖe mí tso Adam ƒe nuvɔ̃ ƒe ŋusẽkpɔɖeamedziwo katã me, eye míavo tso dɔléle kple ku hã si me. Amewo maganye ŋkuagbãtɔwo alo tokunɔwo alo xɔdrɔ̃wo azɔ o. Woaɖe gbɔdzɔgbɔdzɔwo kple tagbɔdɔléle sesẽwo ɖa keŋkeŋ kura. Míate ŋu anɔ agbe le blibodede me tegbee azɔ.—Yesaya 33:24; Mateo 9:35; Yohanes 3:16.
8. Amekawoe wonaa Mawu me ŋutifafae?
8 Amekawoe wonaa Mawu me ŋutifafae? Amesiwo katã xɔ Yesu Kristo dzi se ye wotsɔe na. Apostolo Paulo ŋlɔe be ‘edze Mawu ŋu be wòato Kristo dzi alé avu le nuwo katã kple eɖokui dome, esi wòto ʋu si Yesu kɔ ɖi le fuwɔametia ŋuti me wɔ ŋutifafa.’ Apostoloa gagblɔ be “nusiwo le dziƒowo” anɔ avuléle sia me—si nye amesiwo anye hatidziɖulawo kple Kristo le dziƒo. “Nusiwo le anyigba dzi” hã anɔ eme—si nye amesiwo nu woave ahana mɔnukpɔkpɔ wo be woanɔ agbe mavɔ le anyigba sia dzi ne wotrɔe keŋkeŋ wòzu Paradiso. (Kolosetɔwo 1:19, 20) Esi amesiawo katã wɔ Yesu ƒe vɔsa ƒe asixɔxɔ ŋudɔ, kple esi woɖo to Mawu tso dzime ta la, xɔlɔ̃wɔwɔ nyui anɔ woa kple Mawu dome.—Tsɔe sɔ kple Yakobo 2:22, 23.
9. (a) Ƒomedodo bubu kawo dzie ŋutifafa me nɔnɔ kple Mawu kpɔa ŋusẽ ɖo? (b) Esi Yehowa di be yeahe ŋutifafa si anɔ anyi ɖaa va afisiafi ta la, ŋusẽ kae wòna Via?
9 Aleke gbegbe ŋutifafa sia me nɔnɔ kple Mawu le vevie enye si! Ne womele ŋutifafa me kple Mawu o la, ke ŋutifafa akuaku si anɔ anyi ɖaa mate ŋu anɔ ƒomedodo bubu aɖeke me o. Ŋutifafa me nɔnɔ kple Yehowa ye ana ŋutifafa vavãtɔ nanɔ anyigba dzi. (Yesaya 57:19-21) Esɔ be Yesu Kristoe nye Ŋutifafafia la. (Yesaya 9:5) Yehowa tsɔ dziɖuŋusẽ hã de asi na amesia si dzi woato ate ŋu alé avu le amegbetɔwo kple Mawu dome la. (Daniel 7:13, 14) Eye Yehowa do ŋugbe le nusiwo ado tso Yesu ƒe ameƒomea dzi ɖuɖu me ŋu be: “Seƒeɖo manɔe na ŋutifafa . . . o.”—Yesaya 9:6; Psalmo 72:7.
10. Aleke Yesu ɖo kpɔɖeŋu ɖi le Mawu ƒe ŋutifafanya gbɔgblɔ me?
10 Mawu ƒe ŋutifafanya la hiã amegbetɔƒomea katã. Yesu ŋutɔ ɖe gbeƒãe dzonɔamemetɔe tsɔ ɖo kpɔɖeŋui. Eɖe gbeƒãe le gbedoxɔa gbɔ le Yerusalem, le towo dzi, le mɔ dzi, na Samaria-nyɔnu aɖe le vudo to, kple le amewo ƒe aƒewo hã me. Afisiafi si amewo nɔ ko la, Yesu zã mɔnukpɔkpɔa tsɔ ɖe gbeƒã ŋutifafa kple Mawu ƒe Fiaɖuƒe lae.—Mateo 4:18, 19; 5:1, 2; 9:9; 26:55; Marko 6:34; Luka 19:1-10; Yohanes 4:5-26.
Wona Hehe Wo be Woato Kristo ƒe Afɔtoƒewo
11. Dɔ ka ŋue Yesu na hehe eƒe nusrɔ̃lawo ɖo?
11 Yesu fia eƒe nusrɔ̃lawo be woaɖe gbeƒã Mawu ƒe ŋutifafanya la. Wokpɔe dze sii be esi Yesu nye Yehowa ƒe “ɖaseɖila nuteƒewɔla kple nyateƒetɔ” ta la, agba le yewo hã dzi be yewoaɖi ɖase. (Nyaɖeɖefia 3:14; Yesaya 43:10-12) Wokpɔ Kristo sinu be eyae nye yewo Kplɔla.
12. Aleke Paulo ɖe gbeƒãɖeɖedɔa ƒe vevienyenye fiae?
12 Apostolo Paulo dzro gbeƒãɖeɖedɔa ƒe vevienyenye me be: “Ŋɔŋlɔ la gblɔ be: ‘Amesiame, si xɔa edzi sena la, womado ŋukpee o.’ ” Efia be amesiame si xɔa Yesu Kristo dzi sena be enye Yehowa ƒe Dɔnunɔla Gãtɔ hena agbexɔxɔ la, womado ŋukpee o. Eye ame aɖeke medo le eme le to si me wòtso ta o, elabena Paulo gagblɔ be: “Vovototo aɖeke mele Yudatɔ kple Helatɔ dome o, elabena Aƒetɔ ma kee nye wo katã tɔ, eyae nye kesinɔtɔ na amesiwo katã yɔnɛ la. Elabena amesiame, si ayɔ [Yehowa, NW] ƒe ŋkɔa dzi la, woaɖee.” (Romatɔwo 10:11-13) Gake aleke amewo awɔ anya be mɔnukpɔkpɔ ma li?
13. Nukae hiã ɣemaɣi hafi amewo nase nyanyuia, eye aleke ƒe alafa gbãtɔ me Kristotɔwo kpɔ hiahiã ma gbɔe?
13 Paulo ɖo nya ma ŋu esi wòbia nya aɖewo siwo ŋu wòle be Yehowa subɔla ɖesiaɖe nabu. Apostolo la bia be: “Aleke woayɔ amesi dzi womexɔ se o la mahã? Ke aleke woaxɔ amesi ŋutinya womese kpɔ o la dzi ase mahã? Ke aleke woase nya, ne nyanyui gbeƒãɖela aɖeke mele wo si o mahã? Ke aleke woaɖe gbeƒã, ne womedɔ wo ɖa hafi o mahã?” (Romatɔwo 10:14, 15) Ƒe alafa gbãtɔ me Kristotɔnyenye ƒe ŋutinya ɖee fia kɔte be ŋutsuwo kple nyɔnuwo, ɖeviwo kple tsitsiawo siaa, zɔ ɖe afɔɖoƒe si Kristo kple eƒe apostolowo gblẽ ɖi na wo la dzi. Wozu nyanyuigbeƒãɖela siwo me dzo nɔ. Wosrɔ̃ Yesu eye woɖe gbeƒã na amewo le afisiafi si wokpɔ wo le. Esi womedi be yewoatso ame aɖeke ɖi o ta la, wowɔ woƒe subɔsubɔdɔa le dutoƒo kple tso aƒeme yi aƒeme.—Dɔwɔwɔwo 17:17; 20:20.
14. Aleke wònye nyateƒee be amesiwo gblɔa nyanyuia ƒe “afɔwo nyo” ŋutɔ?
14 Gake menye amewo katãe xɔ Kristotɔ gbeƒãɖelawo nyuie o. Ke hã la, nya si Paulo yɔ tso Yesaya 52:7 la va eme. Esi wòbia be, “Aleke woaɖe gbeƒã, ne womedɔ wo ɖa hafi o mahã?” la, egagblɔ be: “Abe alesi woŋlɔ ɖi ene bena: ‘Nyagblɔla, siwo gblɔa ŋutifafanya kple nyanyui la ƒe afɔwo nyo loo!’ ” Mí ame akpa gãtɔ míebunɛ be míaƒe afɔwo nyo alo wonya kpɔ o. Ekema nya sia gɔme ɖe? Afɔ ŋutɔ dzie ame zɔna ɖaɖea gbeƒã na ame bubuwo. Afɔ sia tsi tre ɖi na amea ŋutɔ. Eye míate ŋu aka ɖe edzi be Kristotɔ gbãtɔwo kpɔkpɔ dzɔa dzi na ame geɖe siwo se nyanyuia tso apostoloawo kple Yesu Kristo ƒe ƒe alafa gbãtɔ me nusrɔ̃la bubuwo gbɔ vavã. (Dɔwɔwɔwo 16:13-15) Gawu la, woxɔ asi le Mawu ŋkume.
15, 16. (a) Aleke Kristotɔ gbãtɔwo ɖee fiae be nyateƒee ŋutifafa ƒe dɔlawoe yewonye? (b) Nukae ate ŋu akpe ɖe mía ŋu be míayi míaƒe subɔsubɔdɔa dzi abe alesi ƒe alafa gbãtɔ me Kristotɔwo wɔe ene?
15 Ŋutifafanyae nɔ Yesu yomedzelawo si eye wogblɔe le ŋutifafa me. Yesu na mɔfiame sia eƒe nusrɔ̃lawo be: “Aƒe, si ke me miayi ɖo la, gbã migblɔ bena: Ŋutifafa na aƒe sia! Eye ne ŋutifafame aɖe le afima la, miaƒe ŋutifafa anɔ edzi; ke ne menye nenem o la, agagbugbɔ ava mia dzi.” (Luka 10:5, 6) Sha·lohmʹ alo “ŋutifafa” nye alesi Yudatɔwo doa gbe na ame tso blema ke. Gake Yesu ƒe mɔfiamea bia nu geɖe wu ema. Esi eƒe nusrɔ̃la amesiaminawo nye ‘amedɔdɔwo le Kristo teƒe’ ta la, woxlɔ̃ nu amewo be: “Mina woalé avu le mia kple Mawu dome!” (Korintotɔwo II, 5:20) Le ɖekawɔwɔ me kple Yesu ƒe mɔfiamea la, woƒo nu tso Mawu ƒe Fiaɖuƒea ŋu na amewo heɖe nusi wòafia na wo dometɔ ɖesiaɖe la me na wo. Amesiwo see la xɔ yayra; eto amesiwo gbe gbedasia ya ŋu.
16 Nenema ke Yehowa Ðasefowo wɔa woƒe subɔsubɔdɔ lae egbea. Nyanyui si wogblɔna na amewo menye wo tɔ o; Amesi dɔ wo ɖa tɔe. Woƒe dɔdasie nye be woagblɔe. Ne amewo see la, ke wodze axɔ yayra wɔnukuwo. Ne wogbe esese la, ke wogbe be yewomanɔ ŋutifafa me kple Yehowa Mawu kpakple Via Yesu Kristo o.—Luka 10:16.
Ŋutifafamewo le Xexe si Tɔtɔ Me
17. Ne amewo dzu mí hã la, aleke wòle be míawɔ nui, eye nukatae?
17 Aleke amewo ɖawɔ nui o, ehiã be wòanɔ susu me na Yehowa subɔlawo be Mawu me ŋutifafa ƒe dɔlawoe yewonye. Ðewohĩ xexemetɔwo ahe nya vevie eye woaɖe woƒe dziku afia to nya tɔamewo gbɔgblɔ alo amesiwo doa dziku na wo dzudzu me. Ðewohĩ mía dometɔ aɖewo wɔ nu mawo kpɔ. Gake ne míedo amenyenye yeye, eye míeganye xexeame ƒe akpa aɖeke o la, ke míasrɔ̃ eƒe mɔwo o. (Efesotɔwo 4:23, 24, 31; Yakobo 1:19, 20) Aleke ame bubuwo ɖawɔ nui o, míawɔ ɖe aɖaŋuɖoɖo sia dzi be: “Ne ate ŋu anye, nusi ke atso mia gome la, minɔ anyi kple amewo katã le ŋutifafa me!”—Romatɔwo 12:18.
18. Aleke wòle be míawɔ nui ne dumegã aɖe do nu ɖe mía gbɔ, eye nukatae?
18 Míaƒe subɔsubɔdɔa ate ŋu ana míado ɖe dumegãwo ŋkume ɣeaɖewoɣi. Woazã woƒe ŋusẽ ‘abia mí’ be míaɖe nusitae míewɔa nanewo alo nusitae míegbea dɔ aɖewo wɔwɔ me. Ðewohĩ woadi be yewoanya nusitae míeɖea gbeƒã gbedasi si le mía si—gbedasi si kloa nu le alakpasubɔsubɔ dzi eye wògblɔa nuɖoanyi sia ƒe nuwuwu. Kpɔɖeŋu si Kristo ɖo ɖi sɔsrɔ̃ aʋã mí be míaɖe tufafa kple bubu deto afia. (Petro I, 2:23; 3:15) Enuenu la, subɔsubɔhakplɔlawo alo dumegã mawo ŋutɔ ƒe tatɔwoe ƒoa nya ɖe wo nu. Nyaŋuɖoɖo fafɛ ate ŋu akpe ɖe wo ŋu woakpɔe be míaƒe dɔwɔna menye ŋɔdzi na yewo alo na ŋutifafa le nutoa me o. Nyaŋuɖoɖo ma dea bubu, ɖekawɔwɔ, kple ŋutifafa ƒe gbɔgbɔ amesiwo xɔnɛ la me.—Tito 3:1, 2.
19. Nukawo mee Yehowa Ðasefowo meƒoa wo ɖokui ɖo gbeɖe o?
19 Wonya Yehowa Ðasefowo le xexeame katã be womedea nu xexeame ƒe dzrewɔwɔ me o. Womedea nu xexeame ƒe ameƒomevinyenye, subɔsubɔhawo, alo dunyahehe ƒe aʋawɔwɔwo me o. (Yohanes 17:14) Esi Mawu ƒe Nya fia mɔ mí be ‘míabɔbɔ mía ɖokui na dziɖuɖu siwo ŋusẽ li na’ ta la, mevaa susu me na mí gɔ̃ hã be míakpɔ gome le dumeviwo ƒe zitɔtɔ me adze aglã ɖe dziɖuɖu ƒe ɖoɖowo ŋu o. (Romatɔwo 13:1) Medzɔ kpɔ be Yehowa Ðasefowo naɖo aglãdzeha aɖe me be yewoamu dziɖuɖu aƒu anyi o. Dzidzenu siwo Yehowa ɖo na esubɔla Kristotɔwo ta susu manɔ eme be míakpɔ gome le ʋukɔkɔɖi alo ŋutasẽnuwɔwɔ ƒomevi aɖeke me o! Menye ɖeko Kristotɔ vavãwo ƒoa nu tso ŋutifafa ŋu o; wonɔa agbe ɖe gbedasi si woɖea gbeƒãe nu.
20. Ŋkɔ kae Babilon Gã la wɔ le ŋutifafa gome?
20 Gake Kristodukɔa ƒe sɔlemeviwo meɖenɛ fiana be yewonye ŋutifafa ƒe dɔlawo abe alesi Kristotɔ vavãwo wɔnɛ ene o. Babilon Gã la ƒe subɔsubɔhawo—Kristodukɔa ƒe sɔlemehawo kple subɔsubɔha siwo menye Kristotɔwo o siaa—de dukɔwo ƒe aʋawɔwɔwo dzi, woɖe mɔ ɖe wo ŋu, eye woxɔ ŋgɔ le wo me. Woƒlɔ dzo ɖe amewo te woti Yehowa subɔla nuteƒewɔlawo yome eye wowu wo gɔ̃ hã. Eyata Nyaɖeɖefia 18:24 gblɔ le Babilon Gã la ŋu be: “Wokpɔ nyagblɔɖilawo kple ame kɔkɔewo kpakple amesiwo katã wowu le anyigba dzi la, ƒe ʋu le eme.”
21. Aleke dzianukwaretɔ geɖewo wɔa nui ne wokpɔ vovototo si le Yehowa ƒe amewo kple alakpasubɔsubɔha me tɔwo ƒe agbenɔnɔ dome?
21 Gake subɔsubɔha vavãtɔ mele abe Kristodukɔa ƒe sɔlemehawo kple Babilon Gã la ƒe akpa mamlɛa ene o, eya nye ŋusẽ nyui si hea ɖekawɔwɔ vɛ. Yesu Kristo gblɔ na eyomedzela vavãwo be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Ema nye lɔlɔ̃ si ɖua dukɔmevinyenye, hadomenɔnɔme, ganyawo, kple ameƒomevinyenye ƒe vovototo si le amegbetɔƒome susɔea dome mãm fifia la dzi. Esi ame miliɔn geɖe siwo le anyigba katã dzi kpɔ esia ta la, wole gbɔgblɔm na Yehowa subɔla amesiaminawo be: “Míayi kpli mi, elabena míese be, Mawu li kpli mi.”—Zaxarya 8:23.
22. Aleke míebua ɖaseɖiɖidɔ si susɔ míawɔ lae?
22 Mí Yehowa ƒe amewo míekpɔa dzidzɔ geɖe le dɔ si míewɔ ta, gake dɔa mewu enu haɖe o. Ne agbledela ƒã nuku eye wòga eme la, medzudzɔa dɔwɔwɔ o. Eyia edzi wɔa dɔ, vevietɔ ne nuŋeŋe ɖo eme ŋutɔŋutɔ. Ne nuŋeɣi ɖo la, ebia agbagbadzedze vevie ɣesiaɣi. Eye fifi laa la, wole Mawu vavã la subɔlawo ƒe ha si lolo wu ɖesiaɖe nu ƒom ƒu. Aseyetsoɣie wònye. (Yesaya 9:2) Ele eme be míedoa go yometiti kple ɖekematsɔleme. Ðewohĩ mí ame ɖekaɖekawo míanɔ agbagba dzem vevie hã be míanɔ te ɖe dɔléle sesẽwo, ƒomekuxi sesẽwo, alo gakuxiwo nu. Gake lɔlɔ̃ na Yehowa ʋãa mí be míado dzi. Ehiã be amewo nase gbedasi si Mawu de mía si. Ŋutifafanyae wònye. Le nyateƒe me la, enye gbedasi si Yesu ŋutɔ ɖe gbeƒãe—Mawu ƒe Fiaɖuƒe ŋuti nyanyui la.
Nukae Nye Wò Ŋuɖoɖo?
◻ Aleke Yesaya 52:7 va eme ɖe blema Israel dzii?
◻ Aleke Yesu ɖee fia be yenye ŋutifafa ƒe dɔla gãtɔ kekeake?
◻ Aleke apostolo Paulo tsɔ Yesaya 52:7 ku ɖe dɔ si Kristotɔwo wɔna ŋui?
◻ Nukae ŋutifafa ƒe dɔlawo nyenye le míaƒe ŋkekea me bia?
[Nɔnɔmetata si le axa 13]
Yehowa Ðasefowo nye Mawu me ŋutifafa ƒe dɔlawo abe Yesu ene
[Nɔnɔmetata siwo le axa 15]
Aleke amewo ɖaxɔ Fiaɖuƒegbedasi lae o, Yehowa Ðasefowo kpɔtɔ léa ŋutifafa me ɖe asi