Ta 10
Mawu Ƒe Fiaɖuƒea Le Dzi Ðum
1, 2. Aleke amegbetɔwo ƒe dziɖuɖuwo do kpo nui?
ÐEWOHĨ edzɔ ɖe dziwò kpɔ be èƒle mɔ̃ aɖe eye kaka nàkpɔ la, mɔ̃a mele dɔ wɔm o. Mítsɔe be èyɔ mɔ̃dzraɖola aɖe be wòava dzrae ɖo na ye. Esi “wòdzrae ɖo” vɔ la, mexɔ ɣeyiɣi aɖeke o ko wògagblẽ ake. Ate ɖe dziwò lo!
2 Alea tɔgbe wòle le amegbetɔwo ƒe dziɖuɖuwo gome. Ameƒomea dia dziɖuɖu si ahe ŋutifafa kple dzidzɔkpɔkpɔ vɛ ɣesiaɣi. Gake togbɔ be wodze agbagba kpem be woaɖɔ nusiwo gblẽ ɖo le ameƒomea me hã la, medze edzi o. Wobla ŋutifafanu gbogbo aɖewo kpɔ—gake ɖeko wogatu wo. Gakpe ɖe eŋu la, dziɖuɖu kae te ŋu ɖe ahedada, susu vɔ̃ bubu ɖe ameƒomevi aɖewo ŋu, nuvlowɔwɔ, dɔléle kple nugbegblẽ le míaƒe anyigba kple edzinuwo ŋu ɖa? Amegbetɔ ƒe dziɖuɖu gbɔ dzadzraɖo me yi. Israel Fia nyanu Salomo gɔ̃ hã bia be: “Ðe amegbetɔ se eƒe mɔ gɔmea?”—Lododowo 20:24.
3. (a) Nukae nye Yesu ƒe gbeƒãɖeɖe ƒe tanya? (b) Nukae ame aɖewo gblɔna be Mawu ƒe Fiaɖuƒea nye?
3 Mègabu mɔkpɔkpɔ o! Menye drɔ̃e dzro koe wònye be xexemedziɖuɖu si ali ke ava o. Eyae nye Yesu ƒe gbeƒãɖeɖe ƒe tanya. Eyɔe be ‘Mawu fiaɖuƒe,’ eye efia eƒe nusrɔ̃lawo be woado gbe ɖa abiae. (Luka 11:2; 21:31) Wonya ƒoa nu tso Mawu ƒe Fiaɖuƒea ŋu le subɔsubɔhawo me ɣeaɖewoɣi ya. Le nyateƒe me la, ame miliɔn geɖe doa gbe ɖa bianɛ gbesiagbe ne wole Aƒetɔ ƒe Gbedodoɖa (si wogayɔna be Mía Fofo si Le Dziƒowo, alo kpɔɖeŋugbedodoɖa) la dom ɖa. Gake ne èbia amewo be “Nukae nye Mawu ƒe Fiaɖuƒea?” hã la, ŋuɖoɖo vovovoe nàse. Ame aɖewo gblɔna be, “Ele wò dzi me.” Ame bubuwo yɔnɛ be eyae nye dziƒo. Abe alesi míele ekpɔ ge ene la, Biblia na ŋuɖoɖo si me kɔ la mí.
FIAÐUƑE SI ŊU TAMEÐOÐO LE
4, 5. Nukatae Yehowa ɖoe be yeaɖe yeƒe dziɖulanyenye afia le mɔ bubu nu, eye nukae wòava wɔ?
4 Yehowa Mawu nye xexeame katã ƒe Fia alo Edziɖula Gãtɔ ɣesiaɣi. Esi wònye eyae wɔ nuwo katã ta la, ena wòle nɔƒe kɔkɔ ma. (Kronika I, 29:11; Psalmo 103:19; Dɔwɔwɔwo 4:24) Gake Fiaɖuƒe si Yesu ɖe gbeƒãe la nye esi le Mawu ƒe xexeame katã ƒe dziɖulanyenye te. Tameɖoɖo aɖe koŋ le Mesia Fiaɖuƒe ma ŋu, gake eyae nye tameɖoɖo ka?
5 Abe alesi míeɖe eme le Ta 6 lia mee ene la, ame eve gbãtɔwo dze aglã ɖe Mawu ƒe dziɖuɖu ŋu. Le nya siwo fɔ ɖe te ta la, Yehowa ɖoe be yeaɖe yeƒe dziɖulanyenye afia le mɔ bubu nu. Mawu gblɔ eƒe tameɖoɖo si nye be yeana ‘dzidzimevi’ aɖe natsrɔ̃ Satana, Da la, eye wòaɖe nusiwo nuvɔ̃ gblẽ le ameƒomea ŋu ɖa. Yesu Kristoe nye ‘dzidzimevi’ ma ƒe ame vevitɔ eye ‘Mawu Fiaɖuƒe’ lae nye dɔwɔnu si atsrɔ̃ Satana ɖa keŋkeŋ. To Fiaɖuƒe sia dzi la, Yesu Kristo agaɖo dziɖuɖu si aɖu anyigba dzi ake le Yehowa ƒe ŋkɔ me la anyi eye wòaʋli Mawu ƒe dziɖulanyenye si dze la ta keŋkeŋ.—Mose I, 3:15; Psalmo 2:2-9.
6, 7. (a) Afikae Fiaɖuƒea le, eye amekae nye Fia la kple eƒe hatidziɖulawo? (b) Amekawoe nye Fiaɖuƒea teviwo?
6 Biblia gɔmeɖeɖe aɖe ɖe Yesu ƒe nya siwo wògblɔ na Farisitɔwo la gɔme be: “Mawu fiaɖuƒe la le mia me.” (Luka 17:21, King James Version) Ðe Yesu le gbɔgblɔm be Fiaɖuƒea le ame gbegblẽ mawo ƒe dzi vɔ̃ɖiwo mea? Ao. Helagbe si me woŋlɔ nya siawo ɖo gbã la ƒe gɔmeɖeɖe si sɔ wu xlẽ be: “Mawufiaɖuƒe la le mia dome.” Eyata Yesu si nɔ wo dome la ɖe eɖokui fia be yee ava nye Fia sia. Dziɖuɖu ŋutɔŋutɔ si le dɔ wɔm, si si fia kple teviwo le ye Mawu ƒe Fiaɖuƒea nye, menye nane si le ame ƒe dzi mee wònye o. Dziƒodziɖuɖue wònye, elabena woyɔnɛ be “dziƒofiaɖuƒe” kple “mawufiaɖuƒe.” (Mateo 13:11; Luka 8:10) Nyagblɔɖila Daniel kpɔ eƒe Dziɖula le ŋutega me be ele ‘abe amegbetɔvi ene’ eye wokplɔe yi ɖe Mawu Ŋusẽkatãtɔ la gbɔe eye wotsɔ “ŋusẽ, bubu kple dziɖuɖu [mavɔ] nɛ, eye dukɔwo katã, anyigba dzi dukɔwo kple gbegbɔgblɔwo subɔe.” (Daniel 7:13, 14) Amekae nye Fia sia? Biblia yɔ Yesu Kristo be “Amegbetɔvi.” (Mateo 12:40; Luka 17:26) Yehowa ɖo Via, Yesu Kristo, be wòanye Fia.
7 Menye Yesu ɖeɖekoe aɖu fia o. Ame 144,000 siwo “woƒle tso anyigba dzi” la kpe ɖe eŋu be woanye hati dziɖulawo kple nunɔlawo kpakplii. (Nyaɖeɖefia 5:9, 10; 14:1, 3; Luka 22:28-30) Mawu ƒe Fiaɖuƒea teviwo anye amegbetɔwo ƒe xexeame katã ƒe ƒome ɖeka si bɔbɔ ɖe Kristo ƒe kpɔkplɔ te. (Psalmo 72:7, 8) Gake aleke míate ŋu aka ɖe edzi be Fiaɖuƒea aʋli Mawu ƒe dziɖulanyenye ta nyateƒe eye wòagbugbɔ anyigba la awɔ paradisoe?
MAWU ƑE FIAÐUƑEA ƑE NU ŊUTƆŊUTƆ NYENYE
8, 9. (a) Kpɔɖeŋu kae míate ŋu awɔ atsɔ afia alesi kakaɖedzi le Mawu ƒe Fiaɖuƒea ƒe ŋugbedodowo ŋui? (b) Nukatae míate ŋu aka ɖe Fiaɖuƒea ƒe nu ŋutɔŋutɔ nyenye dzi?
8 Tsɔe be dzo va fiã aƒe na wò. Xɔ̃wò aɖe si si alɔme le la do ŋugbe be yeagatso aƒea na wò eye yeakpɔ wò ƒomea dzi. Ne xɔ̃wò ma toa nyateƒe na wò ɣesiaɣi la, ɖe màxɔ edzi ase oa? Tsɔe be esi nègbɔ tso dɔ me le ŋkeke eveagbe la, èkpɔ be dɔwɔlawo dze nusiwo dzoa fiã la lɔlɔ gɔme eye wotsɔ nuɖuɖu vɛ na wò ƒomea. Ðikekemanɔmee la, àka ɖe edzi bliboe be ne ɣeyiɣiawo va le yiyim la, menye ɖeko wòadzra nuwo ɖo ko evɔ o, ke boŋ nuwo aganyo kura wu alesi wonɔ tsã.
9 Nenema ke Yehowa na kakaɖedzi mí be nu ŋutɔŋutɔe Fiaɖuƒea nye. Abe alesi woɖee fia le Biblia-gbalẽ si nye Hebritɔwo mee ene la, Sea ƒe akpa vovovowo nye vɔvɔli na Fiaɖuƒea ƒe ɖoɖoa. (Hebritɔwo 10:1) Nusiwo ɖe alesi Mawu ƒe Fiaɖuƒe ava nɔ fia la dze le Israel-fiaɖuƒe si nɔ anyigba dzi kpɔ la hã me. Menye dziɖuɖu dzro koe wònye o, elabena eƒe fiawo bɔbɔ nɔ “Yehowa ƒe fiazikpui” dzi. (Kronika I, 29:23) Hekpe ɖe eŋu la, wogblɔe ɖi be: “Atamkayi magbe Yuda si nɔnɔ o, eye womaɖe fiatikplɔ ɖa le ekɔme o, vaseɖe esime [Silo,] amesi tɔ wònye la nava; amesi dukɔwo ana tae.” (Mose I, 49:10)a Ẽ, Yuda ƒe fiaƒomea mee wogblɔ be woadzi Yesu, Mawu ƒe dziɖuɖua ƒe Fia mavɔ la ɖo.—Luka 1:32, 33.
10. (a) Ɣekaɣie woɖo Mawu ƒe Mesia Fiaɖuƒea gɔme anyi? (b) Dɔ vevi kae amesiwo ava ɖu fia kple Yesu axɔ ŋgɔ na le anyigba dzi?
10 Woɖo Mawu ƒe Mesia Fiaɖuƒea ƒe gɔmeɖoanyi esi wotia Yesu ƒe apostoloawo. (Efesotɔwo 2:19, 20; Nyaɖeɖefia 21:14) Woawoe nye ame 144,000 siwo anye hatidziɖulawo kple Yesu Kristo le dziƒo la ƒe ame gbãtɔwo. Le amesiwo ava nye hatidziɖula siawo ƒe anyigbadzinɔɣi la, woaxɔ ŋgɔ le ɖaseɖiɖidɔ aɖe wɔwɔ me, abe alesi Yesu de see ene be: “Miheyi ɖawɔ dukɔwo katã me nɔlawo ne woanye nusrɔ̃lawo, mianyrɔ̃ wo ɖe Fofo la kple Vi la kpakple gbɔgbɔ kɔkɔe la ƒe ŋkɔa me.”—Mateo 28:19, NW.
11. Aleke wole Fiaɖuƒe gbeƒãɖeɖedɔa wɔmee egbea, eye vi ka ɖem wòle?
11 Wole wɔwɔm ɖe se si wode be woawɔ nusrɔ̃lawo la dzi le mɔ aɖe si ɖeke mesɔ kple o nu. Yehowa Ðasefowo le gbeƒã ɖem Fiaɖuƒe ŋuti nyanyuia le xexeame katã abe alesi Yesu ƒe nyagblɔɖinyawo gblɔe ene be: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.” (Mateo 24:14) Fiaɖuƒe gbeƒãɖeɖedɔa ƒe akpa aɖee nye nufiafiadɔ gã si wɔm wole. Amesiwo bɔbɔa wo ɖokui ɖe Mawu ƒe Fiaɖuƒea ƒe sewo kple gɔmeɖosewo te la le ŋutifafa kple ɖekawɔwɔ si amegbetɔwo ƒe dziɖuɖuwo mate ŋu ahe vɛ o la me. Esiawo katã nye kpeɖodzi si dze ƒã be nu ŋutɔŋutɔe Mawu ƒe Fiaɖuƒea nye!
12. (a) Nukatae wòsɔ be woayɔ Fiaɖuƒe gbeƒãɖelawo be Yehowa Ðasefowo? (b) Aleke Mawu ƒe Fiaɖuƒea to vovo tso amegbetɔwo ƒe dziɖuɖuwo gbɔe?
12 Yehowa gblɔ na Israel-viwo be: “Miawoe nye nye ɖasefowo kple nye dɔla, si metia.” (Yesaya 43:10-12) Yesu, “ɖaseɖila nyateƒetɔ” la ɖe gbeƒã Fiaɖuƒea ŋuti nyanyuia dzonɔamemetɔe. (Nyaɖeɖefia 1:5; Mateo 4:17) Eyata esɔ be egbegbe Fiaɖuƒe gbeƒãɖelawo natsɔ ŋkɔ si Mawu ŋutɔ tsɔ na wo si nye Yehowa Ðasefowo. Gake nukatae Ðasefowo zãa ɣeyiɣi gbogbo aɖe eye wodzea agbagba geɖe be yewoaƒo nu tso Mawu ƒe Fiaɖuƒea ŋu na ame bubuwo? Esi Fiaɖuƒeae nye ameƒomea ƒe mɔkpɔkpɔ ɖeka kolia tae. Amegbetɔwo ƒe dziɖuɖuwo nu va yina, gake Mawu ƒe Fiaɖuƒe ya nu mayi akpɔ gbeɖe o. Yesaya 9:5, 6 yɔ eƒe Dziɖula Yesu be ‘Ŋutifafafia’ eye wògagblɔ le eŋu be: “Eƒe dziɖuɖu nakeke ta, eye seƒeɖo manɔe na ŋutifafa . . . o.” Mawu ƒe Fiaɖuƒe mele abe amegbetɔwo ƒe dziɖuɖuwo—siwo anɔ anyi egbe etsɔ ko woamu wo—ene o. Le nyateƒe me la, Daniel 2:44 gblɔ be: “Dziƒo ƒe Mawu la aɖo fiaɖuƒe aɖe anyi, si matsrɔ̃ gbeɖegbeɖe o, eye eƒe fiaɖuƒe mayi ɖe dukɔ bubu aɖeke si me o; . . . eya ŋutɔ anɔ anyi tegbee.”
13. (a) Kuxi kawoe nye esiwo gbɔ Mawu ƒe Fiaɖuƒea akpɔ bliboe la dometɔ aɖewo? (b) Nukatae míate ŋu aka ɖe edzi be Mawu ƒe ŋugbedodowo ava eme?
13 Amegbetɔwo ƒe dziɖuɖu kae ate ŋu aɖe aʋawɔwɔ, nuvlowɔwɔ, dɔléle, dɔwuame, kple aƒemanɔamesi ɖa? Hekpe ɖe eŋu la, anyigbadzifia kae ate ŋu afɔ ame kukuwo ɖe tsitre? Mawu ƒe Fiaɖuƒea kple eƒe Fia akpɔ nusiawo gbɔ. Manye Fiaɖuƒe si ado kpo nu abe mɔ̃ si mete ŋu wɔa dɔ nyuie o si wòhiã be woanɔ dzadzram ɖo ɣesiaɣi ene o. Ke boŋ Mawu ƒe Fiaɖuƒea akpɔ dzidzedze, elabena Yehowa do ŋugbe be: “Nye nya, si do tso nye nu me la . . . magbugbɔ va gbɔnye ƒuƒlu o, negbe ɖeko wòawɔ nye lɔlɔ̃nu, eye wòawɔ nusi gbe meɖoe ɖo la hafi.” (Yesaya 55:11) Mawu ƒe tameɖoɖo mado kpo emevava o, gake ɣekaɣie Fiaɖuƒea ƒe dziɖuɖu adze egɔme?
FIAÐUƑEA ƑE DZIÐUÐU—ƔEKAƔIE?
14. Nuka gɔmee Yesu ƒe nusrɔ̃lawo mese le Fiaɖuƒea ŋu o, gake nukae Yesu nya le alesi wòava zu fiae ŋu?
14 “Aƒetɔ, ɖe nègale fiaɖuƒe la ɖɔ ge ɖo na Israel le ɣeyiɣi sia mea?” Nya sia si Yesu ƒe nusrɔ̃lawo biae la fia be womenya Mawu ƒe tameɖoɖo si le Fiaɖuƒea ŋu kple ɣeyiɣi ɖoɖi si wòadze dziɖuɖu gɔme ɣemaɣi o. Yesu gblɔ tsɔ xlɔ̃ nu wo be womegake ɖi le nya sia ŋu o be: “Miawo la mele na mi be, mianya ɣeyiɣi alo azãgbe, siwo Fofo la ɖo le ye ŋutɔ ƒe ŋusẽ nu o.” Yesu nya be yeƒe dziɖuɖu ɖe anyigba dzi la le etsɔme gbɔna, ɣeyiɣi didi aɖe le yeƒe tsitretsitsi kple dziƒoyiyi megbe. (Dɔwɔwɔwo 1:6-11; Luka 19:11, 12, 15) Ŋɔŋlɔawo gblɔ esia ɖi. Alekee?
15. Aleke Psalmo 110:1 kɔ nu mee le ɣeyiɣi si me Yesu ƒe fiaɖuɖu adze egɔme ŋu?
15 Fia Dawid yɔ Yesu le nyagblɔɖi me be “Aƒetɔ,” eye wògblɔ be: “Yehowa gblɔ na nye Aƒetɔ be: Bɔbɔ nɔ nye nuɖusi me, vaseɖe esime matsɔ wò futɔwo awɔ wò afɔɖodzinui!” (Psalmo 110:1; tsɔe sɔ kple Dɔwɔwɔwo 2:34-36.) Nyagblɔɖi sia fia be Yesu madze fiaɖuɖu gɔme le eƒe dziƒoyiyi vɔ megbe teti o. Ke boŋ alala le Mawu ƒe nuɖusime. (Hebritɔwo 10:12, 13) Ɣeyiɣi didi kae wòalala ase ɖo? Ɣekaɣie eƒe dziɖuɖua adze egɔme? Biblia kpe ɖe mía ŋu be míakpɔ nyabiase siawo ƒe ŋuɖoɖo.
16. Nukae dzɔ le ƒe 607 D.M.Ŋ. me, eye aleke nusia ku ɖe Mawu ƒe Fiaɖuƒea ŋui?
16 Le anyigba la katã dzi la, du si ko ŋu Yehowa yɔ eƒe ŋkɔ ɖoe nye Yerusalem. (Fiawo I, 11:36) Eyae nye anyigba dzi fiaɖuƒe si dzi Mawu da asi ɖo, si nye kpɔɖeŋu na Mawu ƒe dziƒo Fiaɖuƒe la ƒe fiadu. Eyata gɔmesese vevi aɖe nɔ Babilontɔwo ƒe Yerusalem tsɔtsrɔ̃ le ƒe 607 D.M.Ŋ. me ŋu. Nudzɔdzɔ sia na ɣeyiɣi didi aɖe va tso Mawu ƒe dziɖuɖu ɖe eƒe amewo dzi le anyigba dzi la dome. Anye ƒe alafa ade megbe la, nya siwo Yesu gblɔ fia be dometsotso ma gali kokoko, elabena egblɔ be: “Trɔ̃subɔlawo latu afɔ Yerusalem dzi, halase esime woawu trɔ̃subɔlawo ƒe ɣeyiɣi la nu.”—Luka 21:24.
17. (a) Nukae nye ‘dukɔwo ƒe ɣeyiɣi ɖoɖiawo,’ eye ɣeyiɣi didime kae wòxɔ? (b) Ɣekaɣie ‘dukɔwo ƒe ɣeyiɣi ɖoɖiawo’ dze egɔme eye ɣekaɣie wowu enu?
17 Le “trɔ̃subɔlawo ƒe ɣeyiɣi la” (“dukɔwo ƒe ɣeyiɣi ɖoɖiwo,” NW) me la, woaɖe mɔ na xexemedziɖuɖuwo be woatso dziɖuɖu si dzi Mawu da asi ɖo la ƒe fiaɖuɖu me. Ɣeyiɣi ma dze egɔme tso Yerusalem ƒe tsɔtsrɔ̃ le ƒe 607 D.M.Ŋ. me dzi, eye Daniel gblɔ be anɔ anyi “azã adre.” (Daniel 4:20-22) Ɣeyiɣi didi kae nye ma? Biblia ɖee fia be azã alo “ɣeyiɣi” etɔ̃ kple afã le ŋkeke 1,260. (Nyaɖeɖefia 12:6, 14) Ɣeyiɣi ma ƒe teƒe eve, alo ɣeyiɣi adre, anye ŋkeke 2,520. Gake nu ɖedzesi aɖeke medzɔ le ɣeyiɣi kpui ma ƒe nuwuwu o. Gake ne míebu “ŋkeke ɖeka nanye ƒe ɖeka” na Daniel ƒe nyagblɔɖia eye míexlẽ ƒe 2,520 tso ƒe 607 D.M.Ŋ. dzi la, míava ɖo ƒe 1914 M.Ŋ. me.—Mose IV, 14:34; Xezekiel 4:6.
18. Nukae Yesu wɔ le eƒe Fiaɖuƒeŋusẽ xɔxɔ vɔ megbe teti, eye dɔ kae nusia wɔ ɖe anyigba dzi?
18 Ðe Yesu dze dziɖuɖu gɔme le dziƒo ɣemaɣia? Míadzro nusiwo ta míate ŋu atsɔ Ŋɔŋlɔawo aɖo eŋu be edze egɔme la me le ta si kplɔe ɖo me. Gake ŋutifafa mava zi ɖeka le Yesu ƒe dziɖuɖu ƒe gɔmedzedze o. Nyaɖeɖefia 12:7-12 fia be ne Yesu xɔ Fiaɖuƒea teti ko la, anyã Satana kple eƒe dɔla gbɔgbɔ vɔ̃wo tso dziƒo. Esia anye xaxaɣi na anyigba, gake enye dzideƒonya be míaxlẽe be “vovoɣi vi aɖe” koe susɔ na Abosam. Eteƒe madidi o la, míate ŋu akpɔ dzidzɔ, menye le esi Mawu ƒe Fiaɖuƒe le dzi ɖum ɖeɖeko ta o ke boŋ le esi wòahe yayrawo ava anyigba dzi na ameƒomea me tɔ siwo nye toɖolawo hã ta. (Psalmo 72:7, 8) Aleke míewɔ nya be nusia adzɔ kpuie?
[Etenuŋɔŋlɔwo]
a Ŋkɔ Silo gɔmee nye “Amesi Tɔ Wònye.” Esi ɣeyiɣiawo va nɔ yiyim la, eva dze kɔte be Yesu Kristoe nye “Silo” la, “Dzata, si tso Yuda ƒe to la me.” (Nyaɖeɖefia 5:5) Yudatɔwo ƒe Targum aɖewo tsɔ “Mesia” alo “fia Mesia” ɖo nya “Silo” teƒe.
DO WÒ SIDZEDZE KPƆ
Nukae nye Mawu ƒe Fiaɖuƒe, eye afika wòaɖu dzi atsoe?
Amekawoe aɖu fia le Fiaɖuƒea me, eye amekawoe nye eteviwo?
Aleke Yehowa ka ɖe edzi na mí be nu ŋutɔŋutɔe yeƒe Fiaɖuƒea nye?
Ɣekaɣie ‘dukɔwo ƒe ɣeyiɣi ɖoɖiawo’ dze egɔme eye ɣekaɣie wowu enu?
[Aɖaka si le axa 94]
NUDZƆDZƆ VEVI AÐEWO SIWO KU ÐE MAWU ƑE FIAÐUƑEA ŊU
• Yehowa gblɔ tame si wòɖo be yeana ‘dzidzimevi’ aɖe nagbã ta na Satana Abosam, Da la.—Mose I, 3:15.
• Le ƒe 1943 D.M.Ŋ. me la, Yehowa ɖee fia be ‘dzidzimevi’ sia anye amegbetɔ si anye Abraham ƒe dzidzimevi.—Mose I, 12:1-3, 7; 22:18. • Se ƒe nubabla si wotsɔ na Israel le ƒe 1513 D.M.Ŋ. la nye “nu nyui, siwo le vava ge la, ƒe vɔvɔli.”—Mose II, 24:6-8; Hebritɔwo 10:1.
• Israel ƒe anyigba dzi fiaɖuƒea dze egɔme le ƒe 1117 D.M.Ŋ., eye wòyi edzi emegbe le Dawid ƒe dzidzimea me.—Samuel I, 11:15; Samuel II, 7:8, 16.
• Wotsrɔ̃ Yerusalem le ƒe 607 D.M.Ŋ. me, eye ‘dukɔwo ƒe ɣeyiɣi ɖoɖiwo’ dze egɔme.—Fiawo II, 25:8-10, 25, 26; Luka 21:24.
• Le ƒe 29 M.Ŋ. me la, wosi ami na Yesu wòzu Amesi woava ɖo fiae eye wòdze eƒe anyigba dzi subɔsubɔdɔa gɔme.—Mateo 3:16, 17; 4:17; 21:9-11.
• Le ƒe 33 M.Ŋ. me la, Yesu yi dziƒo, eye wònɔ lalam le Mawu ƒe nuɖusime vaseɖe esime eƒe dziɖuɖua nadze egɔme.—Dɔwɔwɔwo 5:30, 31; Hebritɔwo 10:12, 13.
• Woɖo Yesu fiae le Dziƒofiaɖuƒea me le ƒe 1914 M.Ŋ. me le ‘dukɔwo ƒe ɣeyiɣi ɖoɖiawo’ ƒe nuwuwu.—Nyaɖeɖefia 11:15.
• Wonyã Satana kple eƒe gbɔgbɔ vɔ̃wo ɖo ɖe anyigba ƒe nutowo me eye esia dzi xaxawo ɖe edzi na ameƒomea.—Nyaɖeɖefia 12:9-12.
• Yesu le gbeƒãɖeɖe Mawu ƒe Fiaɖuƒe ŋuti nyanyuia le xexeame katã ƒe dɔ dzi kpɔm.—Mateo 24:14; 28:19, 20.