Tɔtrɔ Kpɔ Yesu ƒe Anyigbadzinɔɣi ƒe Ŋkeke Mamlɛwo

YUDATƆWO ƒe ɣleti si nye Nisan ƒe ŋkeke adrelia dzie, le ƒe 33 M.Ŋ. me. Tsɔe be yele nusiwo le dzɔdzɔm le Yudea si nye Romatɔwo ƒe nutome teƒe kpɔm. Yesu Kristo kple eƒe nusrɔ̃lawo dzo le Yerixo kple eƒe gbe damawo gbɔ eye wole afɔ zɔm to mɔ gɔdɔ̃gɔdɔ̃e si dzi ʋuʋudedi sɔ gbɔ le dzi. Mɔzɔla bubu geɖewo hã le mɔa dzi yina Yerusalem hena ƒe sia ƒe ƒe Ŋutitotoa ɖuɖu. Gake nu bubu aɖe hã gale susu me na Kristo ƒe nusrɔ̃lawo wu mɔ teɖeɖiameŋu sia zɔzɔ.

Yudatɔwo nɔ mɔ kpɔm vevie na Mesia si ana woavo tso Romatɔwo ƒe kɔkuti te. Ame geɖe xɔe se be Yesu Nazaretetɔ lae nye Ðela ma si wonɔ mɔ kpɔm na xoxoxo. Enɔ nu ƒom tso Mawu ƒe Fiaɖuƒea ŋu ƒe etɔ̃ kple afã sɔŋ. Eda gbe le dɔnɔwo ŋu eye ena nu dɔwuitɔwo. Ẽ, eva fa akɔ na ameawo. Gake Yesu ƒe fɔbunya tɔame siwo wògblɔ ɖe subɔsubɔhakplɔlawo ŋu na dzi le wo kum vevie eye woɖoe kplikpaa be yewoawui. Gake eyae nye ema le zɔ ɖem moveviɖoɖotɔe le mɔ ƒuƒu kplala ma dzi le eƒe nusrɔ̃lawo ŋgɔ.—Marko 10:32.

Esi ɣea nɔ to ɖom le Amitoa megbe ɖaa le wo ŋgɔ la, Yesu kple eƒe zɔhɛwo ɖo Betania kɔƒe me, afisi woanɔ le ŋkeke ade siwo akplɔe ɖo me. Wo xɔlɔ̃ lɔlɔ̃awo, Lazaro, Maria, kple Marta xɔ wo. Fiẽ na woɖi ɖe eme bɔkɔɔ tso mɔ kplala zɔzɔ me eye wònye Nisan 8 lia ƒe Sabat gɔmedzedze.—Yohanes 12:1, 2.

Nisan 9

Le Sabat la megbe la, hloloetsotso gadze egɔme le Yerusalem. Amedzro akpe geɖe va ƒo ɖe dua me hena Ŋutitotoa ɖuɖu. Gake hoowɔwɔ si le ɖiɖim le ƒea ƒe ɣeyiɣi sia me la le etɔxɛ. Ame gbogbo aɖewo siwo di be yewoakpɔ nusianu tsitotsito la le ʋaʋlam to ablɔ xaxɛwo dzi yina dua ƒe agbowo nu. Esi woʋli to amesiwo ƒo ƒu ɖe dua ƒe agbowo nu dome do go la, nuka gbegbee nye esi wokpɔ! Aseyetsola geɖe le Amitoa ƒe aga ɖim le mɔ si tso Betfage dzi. (Luka 19:37) Nusiawo katã gɔme ɖe?

Kpɔ ɖa! Yesu Nazaretetɔ la do tedzivi gbɔna. Amewo keke avɔwo ɖe mɔ si dzi wòava to la dzi. Ame bubuwo nɔ deʋaya mumu siwo wotso la ʋuʋum nɔ ɣli dom dzidzɔtɔe be: “Woayra amesi gbɔna le Aƒetɔ ƒe ŋkɔa me, amesi nye Israel ƒe fia la.”—Yohanes 12:12-15.

Esi ameha la gogo Yerusalem vɔ la, Yesu kpɔ dua eye wòxa nu vevie. Ete avifafa, eye míesee be ele gbɔgblɔm ɖi be woatsrɔ̃ dua. Esi Yesu va ɖo gbedoxɔa me eteƒe medidi o la, efia nu amehaawo eye wòyɔ dɔ ŋkuagbãtɔwo kple lãmetututɔ siwo va egbɔ.—Mateo 21:14; Luka 19:41-44, 47.

Nunɔlagãwo kple agbalẽfialawo kpɔ nusia teƒe. Aleke gbegbe nukunu siwo Yesu wɔ wokpɔ kple alesi amehaawo le dzidzɔ kpɔm la ve dɔme na woe nye si! Esi dzikua glo Farisitɔwo la, wogblɔ be: “Nufiala, gbe nya na wò nusrɔ̃lawo.” Yesu ɖo eŋu na wo be: “Mele egblɔm na mi bena: Ne amesiawo zi kpi la, kpewo ado ɣli.” Hafi Yesu nadzo la, ekpɔ alesi wonɔ asi tsam le gbedoxɔa mee.—Luka 19:39, 40; Mateo 21:15, 16; Marko 11:11.

Nisan 10

Yesu va ɖo gbedoxɔa me kaba. Etsɔ si va yi la, dzi kui vevie ɖe alesi wotsɔ Fofoa, Yehowa Mawu, ƒe subɔsubɔ le asi tsamii ta. Eyata eƒe dziku fla ale gbegbe be wòdze amesiwo le nu dzram hele nu ƒlem le gbedoxɔa me la nyanyã gɔme. Emegbe etu asi gaɖuɖɔla ŋuklẽlawo ƒe kplɔ̃wo kple amesiwo nɔ akpakpawo dzram la ƒe zikpuiwo ƒu anyi. Yesu gblɔ kple ɣli be: “Woŋlɔ ɖi bena: ‘Nye aƒe la, woayɔe be gbedoxɔ; ke miawo mietsɔe wɔ adzodalawo ƒe doe.’”—Mateo 21:12, 13.

Yesu ƒe nuwɔnawo kple nufiafiawo nyɔ ŋu na nunɔlagãwo, agbalẽfialawo, kple dumegãwo. Aleke gbegbe wodi vevie be yewoawui enye esi! Gake menya wɔ na wo o le amehaawo ta, elabena Yesu ƒe nufiafia wɔ nuku na wo eye “woku ɖe eŋu hele to ɖomii.” (Luka 19:47, 48) Esi fiẽ ɖo vɔ la, Yesu kple eƒe zɔhɛwo zɔ mɔ dzidzɔtɔe gbɔ va Betania heɖi ɖe eme nyuie zã ma.

Nisan 11

Ŋdikanya, Yesu kple eƒe nusrɔ̃lawo dze mɔ xoxo lia Amitoa yina Yerusalem. Esi wova ɖo gbedoxɔa me la, nunɔlagãwo kple ame tsitsiawo te ɖe Yesu ŋu enumake. Nusi wòtu kple gagbãlaawo kple asitsalaawo le gbedoxɔa me ganɔ susu me na wo nyuie. Eƒe futɔwo do adã hebia be: “Ŋusẽ ka nètsɔ wɔ esiawoe, eye amekae tsɔ nenem ŋusẽ sia na wò mahã?” Yesu hã gblɔ be: “Nye hã mabia nya ɖeka mi, eye ne miegblɔe nam la, ekema nye hã magblɔ ŋusẽ, si metsɔ wɔ esiawo la, na mi: Yohanes ƒe [amenyɔnyrɔɖetsime] la ɖe, afika wòtso? Tso dziƒo loo, alo tso amewo gbɔ mahã?” Amesiwo tsi tre ɖe eŋu la ƒo takpli de aɖaŋu be: “Ne míegblɔ bena, dziƒo wòtso la, agblɔ na mí bena: Ekema nukaŋuti miexɔ edzi se o? Ke ne míegblɔ bena, amewo gbɔ wòtso la, ekema míevɔ̃ ameha la; elabena wo katã wobu Yohanes abe nyagblɔɖila ene.” Wotɔtɔ, eye woɖo eŋu kakaɖedzimanɔamesitɔe be: “Míenyɛ o.” Yesu tsɔ gbe bɔbɔe gblɔ be: “Ekema nye hã nyemagblɔ ŋusẽ, si metsɔ wɔ esiawoe la, na mi o.”—Mateo 21:23-27.

Azɔ Yesu ƒe futɔwo dze agbagba be yewoatre mɔ̃ nɛ ale be wòagblɔ nya aɖe si ta woalée ɖo. Wobiae be: “Woɖe mɔ bena, woadzɔ nu na kaisaro loo, alo womeɖe mɔ o mahã?” Yesu ɖo ŋu be: “Mifia nudzɔsika lam.” Ebia wo be: “Ameka ƒe nɔnɔme kple ŋɔŋlɔ enye esia mahã?” Wogblɔ be: “Kaisaro tɔe.” Esi Yesu na wotɔtɔ vɔ la, egblɔ kɔte be amesiame nase be: “Ekema mitsɔ nusi enye kaisaro tɔ la, na kaisaro, eye nusi nye Mawu tɔ la, na Mawu.”—Mateo 22:15-22.

Esi Yesu tsɔ numeɖeɖe si ŋu ɖikeke mele o de ga nu na eƒe futɔwo vɔ la, etrɔ ɖe wo ŋu azɔ hebu fɔ wo le amehaawo kple eƒe nusrɔ̃lawo ŋkume. Se alesi wòle fɔ bum agbalẽfialawo kple Farisitɔwo vɔvɔ̃manɔmee ɖa. Egblɔ be: “Migawɔ nu ɖe woƒe nuwɔnawo nu o, elabena wogblɔnɛ, ke womewɔnɛ o.” Edudu fɔbunya gbogbo aɖewo ɖe wo dzi kalẽtɔe, heyɔ wo be wonye mɔfiala ŋkuagbãtɔwo kple alakpatɔwo. Yesu gblɔ be: “Dawo, ƒliwo ƒe dzidzimewo! Aleke miawɔ asi atso [Gehenna] ƒe ʋɔnudɔdrɔ̃ la nu mahã?”—Mateo 23:1-33.

Yesu ƒe fɔbunya tɔame siawo mefia be mekpɔa nu nyui siwo amewo wɔna la dzea sii o. Emegbe ekpɔ be amewo nɔ nu dzɔm de gbedoxɔa me nudzɔɖakawo me. Awɔ dɔ ɖe dziwò ale gbegbe ne èkpɔ esime ahosi dahe aɖe va dzɔ eƒe agbemega katã—gaku sue eve siwo meɖi naneke o! Yesu kpɔ ŋudzedze ɖe eŋu ale gbegbe be egblɔ be ne woagblɔe la, nyɔnua dzɔ nu wu amesiwo katã va dzɔ nu gagãwo wònye “woƒe nukpɔkpɔ vivivo la ƒe ɖe” la tɔ. Le Yesu ƒe dɔmetɔtrɔ ta la, ekpɔa ŋudzedze deto ɖe nusianu si ame aɖe te ŋu wɔ ŋu.—Luka 21:1-4.

Yesu le dzodzom le gbedoxɔa me zi mamlɛtɔ azɔ. Eƒe nusrɔ̃lawo dometɔ aɖewo ƒo nu le alesi wònya kpɔe ŋu, be “woɖo atsyɔ̃ nɛ kple kpe nyuiwo kpakple nunana, siwo ŋuti wokɔ.” Ewɔ nuku na wo be Yesu gblɔ be: “Ŋkekewo gbɔna, le esiwo me womele kpe gblẽ ge ɖe kpe dzi, si womatu asii aƒu anyi o.” (Luka 21:5, 6) Esi apostoloawo dze Yesu yome wodo go le dua si me amewo yɔ fũ la, wonɔ tame bum le nusi eƒe nya la fia ŋu.

Ke eteƒe medidi o Yesu kple eƒe apostoloawo va nɔ anyi ɖe Amitoa dzi afisi ŋutifafa kple tomefafa le. Esi wonɔ alesi Yerusalem kple gbedoxɔa dze anii kpɔm ɖa la, Petro, Yakobo, Yohanes, kple Andrea va bia be yewoase Yesu ƒe nyagblɔɖi dovoɖinamea me. Wogblɔ be: “Gblɔe na mí, ɣekaɣie nusiawo ava? Eye ka enye wò vava la kple xexeame ƒe nuwuwu la ƒe dzesii?”—Mateo 24:3; Marko 13:3, 4.

Nufiala Gã la gblɔ nya ɖedzesi ŋutɔŋutɔ aɖe ɖi tsɔ ɖo nyaa ŋui. Egblɔ aʋawɔwɔ sesẽwo, anyigbaʋuʋuwo, nuɖuɖu ƒe veve, kple dɔvɔ̃wo ɖi. Yesu gblɔ ɖi hã be woaɖe gbeƒã Fiaɖuƒea ŋuti nyanyui le xexeame katã. Exlɔ̃ nu be: “Le ɣemaɣi me xaxa gã lava, esi meva kpɔ tso xexeame ƒe gɔmedzedze vaseɖe egbegbe o, eye megale vava ge akpɔ o.”—Mateo 24:7, 14, 21; Luka 21:10, 11.

Esi Yesu nɔ nu ƒom tso ‘eƒe anyinɔnɔ ƒe dzesia’ ƒe akpa bubuwo ŋu la, apostolo eneawo ke to nyuie. Ete gbe ɖe alesi wòhiã be ‘woanɔ ŋudzɔ’ dzi. Nukatae? Egblɔ be: “Elabena mienya ŋkeke ka dzi mia Aƒetɔ la ava o.”—Mateo 24:42; Marko 13:33, 35, 37.

Ŋkeke sia nye esi Yesu kple eƒe apostolowo maŋlɔ be akpɔ o. Le nyateƒe me la, enye Yesu ƒe gaglãgbe subɔsubɔdɔwɔwɔ mamlɛtɔ hafi woava alée, adrɔ̃ ʋɔnui, eye woawui. Esi zã nɔ dodom ta la, wozɔ mɔ kpui si to toa dzi ɖo ta Betania.

Nisan 12 Kple 13

Yesu ɖu Nisan 12 lia kple eƒe nusrɔ̃lawo ɖeɖe dzaa. Ekpɔe dze sii be subɔsubɔhakplɔlawo le didim vevie be yewoawu ye, eye medi be woaxe mɔ ɖe yeƒe Ŋutitotoa ɖuɖu nu le fiẽ si kplɔe ɖo o. (Marko 14:1, 2) Le ŋufɔke si nye Nisan 13 lia la, amewo ƒe ŋku biã wonɔ dzadzraɖo mamlɛwo wɔm hena Ŋutitotoa ɖuɖu. Esi ŋdɔme ɖo teti ko la, Yesu dɔ Petro kple Yohanes be woaɖadzra teƒe aɖe ɖo na wo le dziƒoxɔ aɖe dzi le Yerusalem hena Ŋutitotoa ɖuɖu. (Marko 14:12-16; Luka 22:8) Esi wòsusɔ vie ɣe naɖo to la, Yesu kple apostolo ewo bubuawo va do go wo hena woƒe Ŋutitoto mamlɛa ɖuɖu.

Nisan 14, le Ɣeɖoto Megbe

Esi ɣleti si sɔ tegblẽe nɔ dodom ɖe Amitoa dzi la, Yerusalem meganɔ dzedzem tututu o le esi viviti te dodo ta. Yesu kple ame 12 la le kplɔ̃ ŋu le xɔ gã aɖe si me wodzra ɖo me. Egblɔ be: “Medi vevie ŋutɔ bena, maɖu ŋutitotolẽvi sia kpli mi, hafi ne makpe fu.” (Luka 22:14, 15) Le ɣeyiɣi aɖe megbe la, ewɔ nuku na apostoloawo be Yesu tso heɖe eƒe awudziwui da ɖi. Etsɔ tsiletse kple agba si me tsi nɔ, eye wòdze woƒe afɔwo ŋuti kɔklɔ gɔme. Ðokuibɔbɔdɔ si nye nufiame si womaŋlɔ be gbeɖe o ka gbegbee nye esi!—Yohanes 13:2-15.

Gake Yesu nya be ŋutsu siawo dometɔ ɖeka—Yuda Iskariot—wɔ ɖoɖo xoxo be yeade ye asi na subɔsubɔhakplɔlawo. Eyata eme kɔ be elé blanui. Eʋu go nya la gblɔ be: “Mia dometɔ ɖeka adem asi.” Nusia na apostoloawo xa nu vevie. (Mateo 26:21, 22) Esi woɖu Ŋutitotoa vɔ la, Yesu gblɔ na Yuda be: “Nusi wɔ ge nala la, wɔe kaba.”—Yohanes 13:27.

Esi Yuda dzo ko la, Yesu na woɖu nane bene woatsɔ aɖo ŋku ku si wògbɔna kuku ge dzii. Etsɔ abolo maʋãmaʋã la ƒe ɖe, edo gbe ɖa da akpe ɖe eta, eŋe eme, eye wògblɔ na ame 11 la be woaɖui. Egblɔ be: “Esiae nye nye ŋutilã, si wona le mia ta; miwɔ esia hena ŋkuɖoɖo dzinye.” Emegbe etsɔ kplu si me wein dzĩ le. Esi wòda akpe ɖe eta vɔ la, etsɔ kplua na wo gblɔ be woano le enu. Yesu gagblɔ be: “Esiae nye nye ʋu, si nye nubabla yeye la tɔ, si wokɔ ɖe anyi le ame geɖewo ŋuti hena nuvɔ̃keke la.”—Luka 22:19, 20; Mateo 26:26-28.

Le fiẽ vevi ma la, Yesu fia nu xɔasi geɖewo eƒe apostolo siwo wɔ nuteƒe, eye efia nu le nɔvilɔlɔ̃ ƒe vevienyenye hã ŋu. (Yohanes 13:34, 35) Ena kakaɖedzi wo be ‘kpeɖeŋutɔ’ aɖe ava na wo, si nye gbɔgbɔ kɔkɔe la. Aɖo ŋku nusiwo katã wògblɔ na wo la dzi na wo. (Yohanes 14:26) Emegbe le fiẽ ma me la, ede dzi ƒo na wo ŋutɔ esi wosee Yesu nɔ gbe dom ɖa vevie ɖe wo ta. (Yohanes, ta 17) Esi wodzi kafukafuhawo vɔ la, wodo go le dziƒoxɔa me dze Yesu yome woge ɖe zã tsitsi ƒe ya fafɛ la me.

Esi Yesu kple eƒe apostolowo tso Kidron-tɔʋua la, woɖo ta teƒe siwo wolɔ̃a nɔnɔ la dometɔ ɖeka, si nye Getsemane-bɔ me. (Yohanes 18:1, 2) Esi eƒe apostoloawo nɔ lalam la, Yesu dzo le wo gbɔ vie be yeado gbe ɖa. Esime wònɔ koko ƒom na Mawu nɔ kpekpeɖeŋu biam la, alesi wòxaxa le eɖokui mee la wu gbɔgblɔ. (Luka 22:44) Ne wòva susu me nɛ be yeƒe kpododonu anye vlododo Fofoa lɔlɔ̃a si le dziƒo la, evenɛ kaɖikaɖi.

Yesu mekpɔ do gbe ɖa vɔ hafi Yuda Iskariot kple ameha aɖe va do kple yiwo, kpowo, kple akakatiwo o. Yuda gbugbɔ nu na Yesu bɔkɔɔ gblɔ be: “Rabi, fiẽ na wò loo!” Nusia nye dzesi na ameawo be woalé Yesu. Kasia, Petro da eƒe yi wòkpa nunɔlagã ƒe subɔvi ƒe to. Esi Yesu nɔ gbe dam le ŋutsua ƒe toa ŋu la, egblɔ be: “Gbugbɔ wò yi la ɖo eteƒe; elabena amesiwo katã dia yi la, yi kee woatsɔ awu woe.”—Mateo 26:47-52.

Nuawo dzɔ kabakaba ale gbegbe! Wolé Yesu heblae. Vɔvɔ̃ ɖo apostoloawo eye wotɔtɔ ale gbegbe be wogblẽ woƒe Aƒetɔ ɖi hesi dzo. Wokplɔ Yesu yi Hana, amesi nye nunɔlagã tsã la gbɔ. Emegbe wogakplɔe yi Kayafa, amesi nɔ nunɔlagã ɖum ɣemaɣi gbɔ be woadrɔ̃ ʋɔnui. Le ŋdikanya la, Sanhedrin la da alakpa ɖe Yesu si be ebɔ busu. Emegbe Kayafa na wokplɔe yi na Roma-mɔ̃mefia Pontio Pilato. Eɖo Yesu ɖa Herodes Antipa, amesi nye Galilea dziɖula. Herodes kple eƒe asrafowo ɖu fewu le Yesu ŋu. Emegbe wogakplɔe yi na Pilato. Pilato ɖo kpe edzi be Yesu meɖi fɔ o. Gake Yudatɔ subɔsubɔhakplɔlawo ƒoe ɖe enu be wòana woawu Yesu. Le Yesu dzudzu kple eƒoƒo geɖe megbe la, wokplɔe yi Golgata afisi woklãe ɖe fuwɔameti ŋuti nublanuimakpɔmakpɔtɔe le eye wòse veve helĩhelĩ hafi ku.—Marko 14:50–15:39; Luka 23:4-25.

Ne ɖe Yesu ƒe agbe nu tso eye fɔfɔ meganɔ eŋu o la, anye ne enye afɔku gãtɔ kekeake si dzɔ kpɔ le ŋutinya me. Dzidzɔtɔe la, menɔ nenema o. Le Nisan 16, 33 M.Ŋ. la, ewɔ nuku na eƒe nusrɔ̃lawo esi wokpɔ be efɔ tso ame kukuwo dome. Le ɣeyiɣi aɖe megbe la, ame 500 kple edzivɔ te ŋu ɖi ɖase le eŋu be Yesu gale agbe. Eye le eƒe tsitretsitsi ŋkeke 40 megbe la, eyomedzela wɔnuteƒe aɖewo ƒe ƒuƒoƒo kpɔe wòdzo yi dziƒo.—Dɔwɔwɔwo 1:9-11; Korintotɔwo I, 15:3-8.

Yesu ƒe Agbenɔnɔ Kple Wò

Aleke nya sia ka wòe—le nyateƒe me, mí katãe? Yesu ƒe subɔsubɔdɔ, eƒe ku, kple tsitretsitsi do gã Yehowa Mawu eye wole vevie hafi Eƒe tameɖoɖo gã la nava eme. (Kolosetɔwo 1:18-20) Wole vevie ŋutɔ na mí le susua nu be woate ŋu anɔ te ɖe Yesu ƒe vɔsa dzi atsɔ míaƒe nuvɔ̃wo ake mí ale be ƒomedodo nava nɔ mía kple Yehowa Mawu dome.—Yohanes 14:6; Yohanes I, 2:1, 2.

Ekpɔ ŋusẽ ɖe ameƒomea me tɔ siwo ku gɔ̃ ha dzi. Yesu ƒe tsitretsitsi ʋu mɔ ɖi be woagbɔ agbe ava nɔ Paradisonyigba si ƒe ŋugbe Mawu do la dzi. (Luka 23:39-43; Korintotɔwo I, 15:20-22) Ne èdi be yeanya nu geɖe tso nya siawo ŋu la, ke míele kpewòm be nàde Kristo ƒe ku ƒe Ŋkuɖodzia ɖuƒe le April 11, 1998, le Yehowa Ðasefowo ƒe Fiaɖuƒe Akpata si le miaƒe nuto me.

[Aɖaka si le axa 6]

‘Adzodalawo Ƒe Do’

SUSU geɖewo tae Yesu gblɔ be asitsala ŋuklẽlawo tsɔ Mawu ƒe gbedoxɔ wɔ “adzodalawo ƒe doe.” (Mateo 21:12, 13) Hafi Yudatɔwo kple trɔ̃subɔla zu Yudatɔ siwo tso dukɔ bubuwo me va naxe gbedoxɔ me ƒe adzɔ la, ele be woaɖɔli woƒe dutagawo axɔ ga si woɖuna. Alfred Edersheim ɖe nu me le eƒe agbalẽ si nye The Life and Times of Jesus the Messiah me be, gagbãlaawo dzea woƒe gadidɔa gɔme le Roma-dziɖuƒewo le Adar 15 lia dzi, si nye dzinu ɖeka do ŋgɔ na Ŋutitotoa. Tso Adar 25 lia dzi la, wotena ɖe gbedoxɔa ŋu le Yerusalem hezãa mɔnukpɔkpɔa tsɔ wɔa gae ne Yudatɔwo kple trɔ̃subɔla zu Yudatɔwo le vavam le agbɔsɔsɔ gã me. Gakpɔdɔ ŋutɔŋutɔ aɖee wònye gagbãlaawo nɔ wɔwɔm, eye woxɔa adzɔ ɖe ga sue ɖesiaɖe si woɖɔli ta. Alesi Yesu yɔ wo be wonye adzodalwo la fia be woƒe adzɔa xɔa asi ale gbegbe be ne míagblɔe la, wonɔ ame dahewo tafam.

Ame aɖewo mete ŋu tsɔa woawo ŋutɔ ƒe vɔsalãwo vanɛ o. Ele be nudokpɔla aɖe si le gbedoxɔa me nado amesiame si tsɔ lã vɛ ƒe lã akpɔ—axɔ ga ɖe eta. Esi ame geɖe medi be wòava dzɔ be woagbe lã si yetsɔ zɔ mɔ didi vɛ o ta la, woƒlea esi ‘dzi Lewi-viwo da asi ɖo’ tso edzrala amebalawo gbɔ le gbedoxɔa me. Agbalẽnyala aɖe gblɔ be: “Wobaa ame tsɛ geɖe le afima ŋutɔ.”

Kpeɖodzi li be ɖuƒe tɔxɛ nɔ Hana si nye nunɔlagã kpɔ kple eƒe ƒometɔwo si le gbedoxɔ me sitsalawo gbɔ. Rabiwo ƒe nuŋlɔɖiwo ƒo nu tso “Hana-viwo ƒe [gbedoxɔ me] Nudzraƒewo” ŋu. Ga si wokpɔna tsoa gagbãlawo gbɔ kple tso lãwo dzadzra le gbedoxɔa me nye woƒe gakpɔmɔnu vevi aɖe. Agbalẽnyala aɖe gblɔ be “menye bubu si le nunɔlaawo ŋu me koe” afɔ si Yesu ɖe henyã asitsalawo do goe la “gblẽ o ke egblẽ woƒe gakpɔmɔnu hã me.” Susu ka ke tae o, eƒe futɔwo di be yewoabu mo nɛ.—Luka 19:45-48.

[Nyaɖoɖo si le axa 4]

Yesu Ƒe Amegbetɔgbenɔɣi Ƒe Ŋkeke Mamlɛwo

Nisan 33 M.Ŋ. Nyadzɔdzɔwo Ame Vevitɔ*

Memleɖa Sabat (Dzoɖa, April 6, 1998) 101, mm. 4

15 Memleɖa Sabat; Pilato na dzɔlawo dzɔ Yesu ƒe yɔdo ŋu 127, mm. 8-10

16 Kwasiɖa Wofɔ Yesu ɖe tsitre 128

* Agbalẽ si nye Ame Vevitɔ Kekeake Si Nɔ Anyi Kpɔ ƒe tawo ƒe xexlẽdzesiwoe míeɖo ɖe afisia. Ne èdi afisi woɖo Ŋɔŋlɔ siwo woyɔ siwo ƒo nu le Yesu ƒe subɔsubɔdɔ mamlɛa ŋu tsitotsito la, ke kpɔ “All Scripture Is Inspired of God and Beneficial,” axa 290. Watch Tower Bible and Tract Society of New York Inc. ye ta agbalẽ siawo.