Ta 9
Tsitretsitsi ƒe Mɔkpɔkpɔ la ƒe Ŋusẽ
1. Mɔkpɔkpɔ wɔnuku kawoe tsitretsitsia na woate ŋu akpɔ?
TSITRETSITSIA manɔmee la, agbe si woanɔ le etsɔ me ƒe mɔkpɔkpɔ aɖeke meli na amegbetɔ siwo ku la o. Gake le amenuveve me la Yehowa na mɔnukpɔkpɔ xɔasi ame miliɔn akpe geɖe siwo ku la be woase vivi le agbe mavɔ me. Abe emetsonu ene la, mɔkpɔkpɔ ʋãdziname le míawo hã si be míagawɔ ɖeka kple lɔlɔ̃tɔ siwo dɔ alɔ̃ le ku me la.—Tsɔe sɔ kple Marko 5:35, 41, 42; Dɔwɔwɔwo 9:36-41.
2. (a) Mɔ kawo nue tsitretsitsia va le vevie le Yehowa ƒe tameɖoɖowo ƒe emevava mee? (b) Ɣekaɣi koŋ ye tsitretsitsi ƒe mɔkpɔkpɔa nye ŋusẽkpɔƒe vevi aɖe na mí?
2 Le tsitretsitsia ta la Yehowa ate ŋu aɖe mɔ Satana nawɔ nusianu adze agbagba be wòaɖo kpe eƒe nutsotso vɔ̃ɖi be “Amegbetɔ atsɔ nusiwo katã le esi la, ana ɖe eƒe agbe ta” la dzi, eye magblẽ nu le Eƒe subɔla nuteƒewɔlawo ŋu tegbee o. (Hiob 2:4) Le esi wofɔ Yesu ɖe tsitre tso ku me ta la ete ŋu tsɔ eƒe amegbetɔ ƒe vɔsa la ƒe asixɔxɔ yi Fofoa ƒe dziƒofiazikpui la ŋgɔ eye agbeɖeɖe ƒe viɖe do tso eme na mí. To tsitretsitsia dzi la, amesiwo nye Kristo ƒe hadomenyilawo la wɔa ɖeka kplii le Dziƒofiaɖuƒea me. Eye tsitretsitsi la nye ŋusẽ si wu dzɔdzɔme tɔ la tsoƒe na mí amesiwo katã si xɔse le la ne míeto dodokpɔ siwo nana ku dzea ŋgɔ mí la me.
Nusita Wòle Vevie Le Kristotɔwo Ƒe Xɔse Me
3. (a) Gɔmesese ka nue tsitretsitsi la nye “nufiafia ƒe gɔmedzedze”? (b) Nukae tsitretsitsi la fia na xexeametɔwo gbadzaa?
3 Abe alesi wogblɔe ɖe Hebritɔwo 6:1, 2 ene la, tsitretsitsi la nye “nufiafia ƒe gɔmedzedze,” xɔse ƒe gomeɖoɖoanyia ƒe akpa aɖe si ne mele eme o la míate ŋu azu Kristotɔ bibiwo gbeɖe o. Gake enye nusi to vovo kura na alesi xexeame bua tamee. Esi gbɔgbɔmemenyenye mele wo si o ta la, amesiwo le agbɔ sɔm ɖe edzi la va le agbe hena modzakaɖeɖe yome titi. Agbe si wole fifia koe nye nu ŋutɔŋutɔ na wo. (Kor. I, 15:32) Amesiwo le subɔsubɔhawo me le Kristodukɔa me kple egodo siaa la susuna be luʋɔ makumaku le yewo si, esi awɔe be tsitretsitsi mahiã o. Amesiwo dzea agbagba be yewoakpɔ ɖekawɔwɔ si le nufiafia eve siawo domee la kpɔna be enana yewotɔtɔna ɖe edzi tsɔ wu be wòana mɔkpɔkpɔ yewo. Aleke míate ŋu akpe ɖe amesiwo lɔ̃ faa be yewoaɖo to la ŋue?—Dɔw. 17:32.
4. (a) Hafi ame aɖe nate ŋu akpɔ ŋudzedze ɖe tsitretsitsia ŋu la, nuka mee wòahiã be míadzro kplii? (b) Ŋɔŋlɔ kawo ŋudɔe nawɔ atsɔ aɖe nusi luʋɔ la nye la me? Nɔnɔme si me ame kukuwo le la me? (d) Ke ne ame aɖe zãna Biblia gɔmeɖeɖe aɖe si le nu tsyɔm nyateƒe siwo le kpukpui mawo me dzi ya ɖe?
4 Hafi ame mawo nate ŋu akpɔ ŋudzedze ɖe nunana wɔnuku si tsitretsitsia nye ŋuti la, ehiã be woase nusi luʋɔa nye kple nɔnɔme si me ame kukuwo le la gɔme. Zi geɖe la ŋɔŋlɔ ʋee aɖewo ɖeɖe dzaa sɔ gbɔ be woana nya siawo me nakɔ na amesi nyateƒea ƒe dɔ le wuwum. (Mose I, 2:7; Xez. 18:4; Ps. 146:3, 4) Gake Biblia ƒe egbegbe gɔmeɖeɖe aɖewo kple esiwo me nyawo wotrɔ gblɔ kpuie la tsyɔa nu nyateƒe siawo dzi. Eyata ɖewohi̇̃ ahiã be woade ŋugble tso nyagbɔgblɔ siwo wozã le Biblia ƒe gbegbɔgblɔ gbãtɔwo me la ŋu.
5. Aleke nakpe ɖe ame ma ŋu be wòase nusi luʋɔ la nye gɔmee?
5 New World Translation la ɖea vi vevie ŋutɔ le esia wɔwɔ me, elabena eɖea Hebri-nyagbe neʹphesh kple Hela-nyagbe psy·kheʹ si sɔ kplii la gɔme ɣesiaɣi be “luʋɔ,” eye woŋlɔ mawunyakpukpui geɖe siwo me nyagbɔgblɔ siawo dze le la ɖe eƒe megbenyawo me. Egbegbe gɔmeɖeɖe bubuwo meɖea nyagbe gbãtɔ mawo gɔme be “luʋɔ” ɖeɖeko o, ke boŋ woɖea wo gɔme hã be “nuwɔwɔ,” “ame” kple “agbe”; wote ŋu ɖea “nye neʹphesh” gɔme be “nye,” kple “wò neʹphesh” gɔme be “wò.” Biblia siawo tsɔtsɔ sɔ kple gɔmeɖeɖe xoxo aɖewo alo New World Translation la akpe ɖe nusrɔ̃vi anukwaretɔ ŋu be wòase egɔme be gbegbɔgblɔ gbãtɔ ƒe nyagbe siwo gɔme woɖe be “luʋɔ” la ku ɖe (1) amewo, (2) lãwo, kple (3) agbe si wonɔna abe nu mawo ene, la ŋu. Gake womefiana gbeɖegbeɖe be luʋɔ la nye nu makpɔmakpɔ si ŋu womate ŋu aka asii o eye wòdzona le ŋutilãa me le ku me eye wòate ŋu ayi edzi anɔ agbe anya nu le afi bubu o.
6. (a) Nukatae egbegbe gɔmeɖeɖe aɖewo nana wo xlẽlawo tɔtɔna le nusi Sheol, Hades kple Gehenna fia la ŋuti? (b) Aleke naɖe nɔnɔme si me amesiwo le Sheol alo Hades le la mee tso Biblia me? Amesiwo le Gehenna ya ɖe?
6 New World Translation la zãna “Sheol” tsɔna ɖea Hebri-nyagbe sheōlʹ gɔme ɣesiaɣi nenema ke, eye wòzãna “Hades” hena Hela-nyagbe haʹdes, kple Gehenna hena geʹen·na. Gake Biblia ƒe egbegbe gɔmeɖeɖe bubu aɖewo kple esiwo wotrɔ ŋlɔ kpuie la nana nuxlẽla tɔtɔna to haʹdes kple geʹen·na SIAA gɔme ɖeɖe be “hell,” hekpe ɖe “yɔdo” kple “kukuawo de” zazã abe sheōlʹ kple haʹdes ƒe gɔmeɖeɖe bubuwo ene ŋu la dzi. Le afisi wòhiã le la, ne mietsɔ gɔmeɖeɖe bubuwo sɔ kple wo nɔewo la miate ŋu aɖee afia be “Sheol” kple “Hades” nye nu ɖeka. (Ps. 16:10; Dɔw. 2:27) Biblia na eme kɔ ƒã be Sheol alo Hades si nye ameƒomea ƒe yɔdo la ku ɖe ku ŋu ke menye agbe ŋu o. (Ps. 89:49; Nyaɖ. 20:13) Efia asi mɔkpɔkpɔ si li hã be woatrɔ agbɔ tso afima to tsitretsitsi dzi. (Hiob 14:13; Dɔw. 2:31) Nusi to vovo na emae nye be womeɖo agbe nɔnɔ le etsɔ me ƒe mɔkpɔkpɔ aɖeke ɖi na amesiwo yina Gehenna la o, eye womeƒo nu tso luʋɔ la ŋu be enɔa agbe henyaa nu le afima o.—Mat. 18:9; 10:28.
7. Ne ame aɖe se tsitretsitsia gɔme nyuie la, aleke wòate ŋu akpɔ ŋusẽ ɖe eƒe nɔnɔme kple nuwɔnawo dzie?
7 Esi nya mawo me kɔ azɔ la, gɔmesese ŋutɔŋutɔ va le Kristo ƒe ku kple tsitretsitsia ŋu. Woate ŋu akpe ɖe ame ŋu azɔ be wòase nusi tsitretsitsia ate ŋu anye na eyama la gɔme eye wòate ŋu ava nɔ ŋudzedze kpɔm ɖe Yehowa ƒe lɔlɔ̃ le ɖoɖo wɔnuku ma wɔwɔ me la ŋu. Azɔ la dzidzɔ ƒe mɔkpɔkpɔ na ɖekawɔwɔ ake le Mawu ƒe Nuɖoanyi Yeyea me la ate ŋu axɔ ɖe amesiwo ƒe lɔlɔ̃tɔwo ku ƒe nuxaxa la teƒe. Ƒe alafa gbãtɔ me Kristotɔwo kpɔe dze sii be Yesu Kristo ƒe tsitretsitsi la nye Kristotɔwo ƒe xɔse la ƒe dzogoedzikpe. Woɖi ɖase le ema kple mɔkpɔkpɔ si ƒe kakaɖedzi wòna la ŋu na ame bubuwo veviedodotɔe. Nenema kee amesiwo kpɔa ŋudzedze ɖe eŋu egbea hã dina vevie be yewoagblɔ nyateƒe xɔasi sia na ame bubuwo.—Dɔw. 5:30-32; 10:40-43; 13:32-39; 17:31.
‘Tsiẽƒe Ƒe Safui’ La Ŋudɔwɔwɔ
8. Nukae “ku kple tsiẽƒe safuiwo” ŋudɔ si Yesu awɔ la fia na eyomedzela siwo wotsɔ gbɔgbɔ si ami na?
8 Ele be amesiwo katã awɔ ɖeka kple Kristo le eƒe Dziƒofiaɖuƒea me la naku mlɔeba. Gake wonya kakaɖedzi si wòna wo la nyuie, esime wògblɔ na apostolo Yohanes be: “Meku, eye kpɔ ɖa, mele agbe tso mavɔ me yi ɖe mavɔ me, eye ku kple tsiẽƒe safuiwo le asinye.” (Nyaɖ. 1:18) Nuka gblɔm wòle? Enɔ susu hem yi eya ŋutɔ ƒe nuteƒekpɔkpɔ dzi. Eya hã ku. Gake Mawu megblẽe ɖe Hades (tsiẽƒe) o. Le ŋkeke etɔ̃agbe la Yehowa ŋutɔ fɔe ɖe tsitre yi gbɔgbɔmegbenɔnɔ me eye wòna makumaku ƒe agbenɔnɔ eyama. Menye ema ɖeɖeko o, ke boŋ Mawu tsɔ “ku kple tsiẽƒe safuiwo” nɛ be wòatsɔ aɖe ame bubuwo tso ameƒomea ƒe yɔdo kple Adam ƒe nuvɔ̃a ƒe ŋusẽkpɔɖeamedziwo me. Esi safui mawo le Yesu si ta la, ate ŋu afɔ eyomedzela nuteƒewɔlawo ɖe tsitre tso ku me. Ne ewɔ ema la, enana eƒe hamea me tɔ siwo wotsɔ gbɔgbɔ si ami na la makumakugbenɔnɔ le dziƒo ƒe nunana tɔxɛ la abe alesi Fofoa tsɔe na eya hã ene.—Rom. 6:5; Fil. 3:20, 21.
9. Ɣekaɣie Kristotɔ amesiamina nuteƒewɔlawo ƒe tsitretsitsia ava?
9 Ɣekaɣie Kristotɔ amesiamina nuteƒewɔlawo akpɔ tsitretsitsi ma? Edze egɔme xoxo. Apostolo Paulo ɖe eme be woafɔ wo ɖe tsitre ‘le Kristo ƒe anyinɔɣi la me,’ eye anyinɔɣi ma dze egɔme le ƒe 1914 M.Ŋ. me. (Kor. I, 15:23) Azɔ ne amesiawo wu woƒe anyigba dzi dɔa nu la, mehiã be woaganɔ ku me alala woƒe Aƒetɔ la ƒe tɔtrɔgbɔ o. Ne woku teti ko la wofɔa wo ɖe tsitre le gbɔgbɔ me le esime “woatrɔ . . . [woƒe] nɔnɔme, kasia le aɖabaƒoƒo ɖeka me.” Dzidzɔ ka gbegbee nye si wokpɔna, elabena “woƒe dɔwɔwɔwo dze wo yome”!—Kor. I, 15:51, 52; Nyaɖ. 14:13.
10. Tsitretsitsi bubu kae ava, eye ɣekaɣie wòadze egɔme?
10 Gake menye wo tɔ la koe nye tsitretsitsi si li o. Nyateƒe si wònye be woyɔe be “tsitretsitsi gbãtɔ” la fia be ele be bubu nava ɖe eyome. (Nyaɖ. 20:6) Agbe mavɔ kpɔkpɔ le Paradisonyigba dzi ƒe mɔkpɔkpɔ dodzidzɔname anɔ amesiwo kpɔa viɖe tso tsitretsitsi evelia sia me la si. Ɣekaɣie ema ava? Nyaɖeɖefia ƒe agbalẽa ɖee fia be ava le fifi nuɖoanyi vɔ̃ɖiawo ƒe “anyigba kple dziƒo” ɖeɖe ɖa megbe. Nuɖoanyi xoxoa ƒe nuwuwu ma gogo ŋutɔ. Emegbe le Mawu ƒe ɣeyiɣi ɖoɖi dzi la, anyigba dzi tsitretsitsia adze egɔme.—Nyaɖ. 20:11, 12.
11. Amekawoe anɔ nuteƒewɔla siwo woafɔ ɖe tsitre be woanɔ agbe le anyigba dzi la dome, eye nukatae ema nye mɔkpɔkpɔ dodzidzɔname?
11 Amekawoe akpɔ gome le eme? Yehowa subɔla nuteƒewɔla siwo nɔ anyi tso blemaɣeyiɣiwo mee. Amesiwo le tsitretsitsia ƒe xɔse sesẽ si le wo si ta “wogbe xɔxɔ” si anye be woana ta le woƒe nuteƒewɔwɔ na Mawu me ale be woasi le ŋutasẽku nu la anɔ wo dome. (Heb. 11:35) Dzidzɔ kae nye si wòanye be mía ŋutɔwo míadze si wo eye míase nudzɔdzɔ siwo ŋu woka nya ta le kpuie ko le Biblia me la ŋuti nya tsitotsito tso wo nu! Habel si nye Yehowa ƒe ɖasefo nuteƒewɔla gbãtɔ la anɔ ameawo dome. Henox kple Noa, amesiwo ɖe gbe ƒã Mawu ƒe nuxlɔ̃megbedasia vɔvɔ̃manɔmee do ŋgɔ na Tsiɖɔɖɔa hã anɔ wo dome. Abraham, amesi wɔ amedzro na mawudɔlawo la anɔ wo dome. Kple Mose, amesi dzi woto tsɔ Se la na le Sinai-toa dzi. Nyagblɔɖila kalẽtɔwo abe Yeremya ene, amesi kpɔ Yerusalem ƒe tsɔtsrɔ̃ le ƒe 607 D.M.Ŋ. la hã anɔ wo dome. Eye Yohanes Amenyrɔ̃ɖetsimela si se Mawu ŋutɔ gblɔ be Yesu nye ye Vi la anɔ wo dome. Nuteƒewɔla siwo ku le fifi nuɖoanyia ƒe ŋkeke mamleawo me la hã ava.—Heb. 11:4-38; Mat. 11:11.
12. (a) Ame kuku siwo le Hades la dometɔ nenie woafɔ ɖe tsitre? (b) Eyata amekawoe anɔ wo dome, eye nukatae?
12 Le ɣeyiɣi aɖe megbe la woafɔ ame bubuwo hã ɖe tsitre. Woɖe alesi gbegbe Yesu awɔ ‘tsiẽƒe ƒe safui’ la ŋudɔ ɖe ameƒomea ta la fia le ŋutega aɖe si wona apostolo Yohanes kpɔ la me esi me wòkpɔ wotsɔ tsiẽƒe “ƒu gbe ɖe dzota la me” le. Nukae ema fia? Efia be wotsrɔ̃e; megali o elabena wona amewo vɔ le eme keŋkeŋ. Eyata hekpe ɖe Yehowa ƒe tadeagula nuteƒewɔlawo fɔfɔ ɖe tsitre ŋu la, Yesu agbɔ agbe ame madzɔmadzɔwo kura gɔ̃ hã tso Hades alo Sheol nublanuikpɔkpɔtɔe. Womafɔ amesiawo dometɔ aɖeke ɖe tsitre be woagadrɔ̃ ʋɔnui ko be edze na ku o. Le dzɔdzɔenyenye ƒe nɔnɔme si anɔ Mawu ƒe Fiaɖuƒea te me la, woakpe ɖe wo ŋu be woatrɔ woƒe agbenɔnɔ wòawɔ ɖeka kple Yehowa ƒe mɔwo. Ŋutega la ɖee fia be woaʋu “agbegbalẽ” la, eye mɔkpɔkpɔ asu wo si be woana woaŋlɔ woƒe ŋkɔwo ɖe eme. Woadrɔ̃ “ʋɔnu ame kukuawo ɖe . . . woƒe dɔwɔwɔwo,” siwo wowɔ le woƒe tsitretsitsia megbe la nu. (Nyaɖ. 20:12-14; Dɔw. 24:15) Eyata ne míebui tso nusi ado tso eme mlɔeba nu la, woƒe tsitretsitsia ate ŋu anye “agbe ƒe tsitretsitsi” eye manye “[fɔbubu ƒe] ʋɔnudɔdrɔ̃ ƒe tsitretsitsi” kokoko o.—Yoh. 5:28, 29.
13. (a) Amekawoe womafɔ ɖe tsitre o? (b) Aleke wòle be tsitretsitsi ƒe nyateƒea ŋuti sidzedze nawɔ dɔ ɖe míaƒe agbe dzie?
13 Nyateƒee, menye amesiwo katã nɔ agbe kpɔe woafɔ ɖe tsitre o. Ame aɖewo wɔ nuvɔ̃ siwo womate ŋu atsɔ ake wo o. Amesiwo woatsrɔ̃ le “xaxa gã” si tu aƒe fifia me la anɔ amesiwo akpɔ tsɔtsrɔ̃ mavɔ la dome. (Mat. 12:31, 32; 23:33; 24:21, 22; 25:41, 46; Tes. II, 1:6-9) Eyata togbɔ be woaɖe nublanuikpɔkpɔ si to vovo afia le amesiwo katã le Hades la ɖeɖe me hã la, tsitretsitsi la mena nusi dzi míanɔ te ɖo anɔ agbe ɖekematsɔlemetɔe fifia la mí o. Ke boŋ ele be wòaʋã mí be míaɖe alesi míekpɔ ŋudzedze vevie ɖe Mawu ƒe amenuveve ŋutɔŋutɔ sia ŋue la afia.
Tsitretsitsi Ƒe Mɔkpɔkpɔa DOA ŊUSẼ WO
14. Aleke tsitretsitsia ate ŋu anye ŋusẽ gã aɖe kpɔƒe na amesi le eƒe agbe fifitɔa ƒe nuwuwu gogom?
14 Amesiwo xɔ tsitretsitsi ƒe mɔkpɔkpɔa wɔ wo tɔe la te ŋu kpɔa ŋusẽdodo gã tso eme. Ne woƒe agbe ƒe nuwuwu gogo la, wonya be eɖanye atikewɔwɔ ƒe mɔ kawo ŋudɔe yewowɔ o, yewomate ŋu ahe ku ɖe megbe ɖaa o. (Nyagb. 8:8) Nenye be wodo vevie nu le Aƒetɔ la ƒe dɔwɔwɔa me eye wosubɔ nuteƒewɔwɔtɔe kple eƒe habɔbɔa la, woate ŋu atsɔ kakaɖedzi blibo akpɔ mɔ na etsɔ me. Wonya be to tsitretsitsia dzi la le Mawu ƒe ɣeyiɣi ɖoɖi dzi la yewoagase vivi le agbe me ake. Eye agbe ka ƒomevie nye si wòanye! Abe alesi apostolo Paulo yɔe ene la, anye “agbe vavã la.”—Tim. I, 6:19; Kor. I, 15:58; Heb. 6:10-12.
15. Ne yometila ŋutasẽlawo le ŋɔdzi dom na mí la, nukae ate ŋu akpe ɖe mía ŋu be míayi edzi awɔ nuteƒe na Yehowa?
15 Menye esi míenya be tsitretsitsi li la koe o, ke boŋ esi míenya Amesi gbɔ ɖoɖo ma tso lae nana ŋusẽ nɔa mía ŋu. Esia doa ŋusẽ mí be míawɔ nuteƒe na Mawu ne ku le yometila ŋutasẽlawo si me dze ŋgɔ mí kura gɔ̃ hã. Ɣeyiɣi didi aɖe enye sia Satana wɔ vɔvɔ̃ na ku kpata ŋudɔ abe nusi dzi wòtona nana amewo nɔa kluvinyenye me la ene. Gake Yesu mena vɔvɔ̃ ma ɖu eyama dzi o; ewɔ nuteƒe na Yehowa vaseɖe ku me ke. To nusi eƒe ku la wɔ dzi la, etsɔ nusi dzi woanɔ te ɖo aɖe ame bubuwo tso vɔvɔ̃ ma me la na. (Heb. 2:14, 15) Le nunana ma dzi si eyomedzela vavãwo xɔ se ta la, wonɔ agbe abe nuteƒewɔlawo ene wòɖe dzesi. Esime wohe xaxa va wo dzi la, woɖee fia be ‘yewomelɔ̃ yewoƒe luʋɔ̃’ wu Yehowa o. (Nyaɖ. 12:11) Nunyatɔe la, womedzea agbagba be woaɖe asi le Kristotɔwo ƒe gɔmeɖosewo ŋu be woatsɔ adze agbagba aɖe woƒe agbe fifitɔ evɔ wòahana agbe mavɔ ƒe mɔkpɔkpɔ la nabu ɖe wo o. (Luka 9:24, 25) Ðe xɔse ma ƒomevi le asiwòa? Anɔ asiwò nenye be elɔ̃ Yehowa vavã eye nexɔ nusi tsitretsitsi ƒe mɔkpɔkpɔa fia na wò la de dzime.
Numetoto
● Nukatae wòhiã be ame nase nusi luʋɔ la nye kple nɔnɔme si me ame kukuwo le la gɔme hafi wòate ŋu akpɔ ŋudzedze ɖe tsitretsitsia ŋu?
● Amekawoe atrɔ agbɔ tso ku me? Aleke wòle be sidzedze sia nawɔ dɔ ɖe mía dzie?
● Aleke tsitretsitsi ƒe mɔkpɔkpɔa doa ŋusẽ míe?