Ðe Yehowa Tsɔ Ðe Le Eme Na Wò Vavã?

“Ale si mesena le ɖokuinye me be nyemele ɖeke me o lae nye kuxi gãtɔ kekeake si dzi mele agbagba dzem be maɖu.” Aleae nyɔnu aɖe si bu be susu aɖeke meli si tae Yehowa atsɔ ɖe le eme na ye o la gblɔ. Ðe wò hã èsena le ɖokuiwò me nenema? Ne nenemae la, ɖewohĩ àbia be, ‘Ðe Yehowa tsɔa ɖe le eme na esubɔlawo dometɔ ɖe sia ɖe vavã?’ Ŋuɖoɖoae nye ɛ̃! Míekpɔ kpeɖodzi si ɖee fia be Yehowa tsɔa ɖe le eme na esubɔla ɖe sia ɖe la le Yesu ƒe nyawo me.—Xlẽ Yohanes 6:44.

Nya kae Yesu, ame si nya Yehowa ƒe amenyenye kple eƒe lɔlɔ̃nu nyuie wu ame bubu ɖe sia ɖe la gblɔ? (Luka 10:22) Yesu gblɔ be: “Ame aɖeke mate ŋu ava gbɔnye o, negbe ɖe Fofo la, ame si dɔm ɖa la, hee vae.” Eya ta míate ŋu ava zu Kristo yomedzelawo kple Yehowa, mía Fofo si le dziƒo la subɔlawo o, negbe ɖe Yehowa ŋutɔ he mí va eɖokui gbɔ. (2 Tesalonikatɔwo 2:13) Ne míese nu si Yesu wɔnɛ gɔme la, ekema eƒe nyawo ana kpeɖodzi sẽŋu mí be Mawu tsɔ ɖe le eme na mí abe ame ɖekaɖekawo ene.

Nu kae nya si Yesu gblɔ be Yehowa hea mí vɛ la fia? Wozãa Helagbe me nya si gɔme woɖe be “hee” la na ɖɔ si me tɔmelãwo le la hehe hã. (Yohanes 21:6, 11) Ðe Yehowa hea mí akpasesẽtɔe heƒonɛ ɖe mía nu be míasubɔ yea? Ao. Yehowa na tiatiawɔblɔɖe mí, eya ta meʋua míaƒe dzi akpasesẽtɔe o. (5 Mose 30:19, 20) Agbalẽnyala aɖe ɖe eme ale: “Asiléƒe mele ame ƒe dzi ƒe ʋɔtru ŋu woate ŋu ʋui tso gota o. Ele be woaʋui tso eme.” Yehowa dzroa ame biliɔn geɖe siwo le xexe sia me la ƒe dziwo me kpɔ be yeakpɔe ɖa be ame kawo ƒe dzie ku ɖe ye ŋu hã. (1 Kronika 28:9) Ne ekpɔ ame aɖe si ƒe dzi ku ɖe eŋu la, ewɔa nu ɖe eŋu lɔlɔ̃tɔe. Aleke wòwɔa esiae?

Yehowa ʋãa ame si “si dzi ƒe nɔnɔme nyui le” la ƒe dzi lɔlɔ̃tɔe. (Dɔwɔwɔwo 13:48) Yehowa wɔa esia to mɔ eve dzi—etoa nya nyui ŋuti gbedeasi si le Biblia me, si ɖoa mía dometɔ ɖe sia ɖe gbɔ, kpakple eƒe gbɔgbɔ kɔkɔea dzi. Ne Yehowa de dzesii be ame aɖe ƒe dzi xɔ Biblia me nyateƒea la, ezãa eƒe gbɔgbɔa tsɔ kpena ɖe amea ŋu be wòase nyateƒea gɔme ahanɔ agbe ɖe enu. (1 Korintotɔwo 2:11, 12) Mawu ƒe kpekpeɖeŋu manɔmee la, míate ŋu ava zu Yesu yomedzela vavãwo kple Yehowa subɔla dovevienuwo o.

Azɔ nufiame kae le nya si Yesu gblɔ tso Yehowa Mawu ŋu le Yohanes 6:44 la me na mí? Nu si tae Yehowa hea amewo ɖoe nye be, ekpɔa nu nyui aɖe le woƒe dzi me eye wòtsɔa ɖe le eme na wo dometɔ ɖe sia ɖe. Esi nyɔnu si ŋu míeƒo nu tsoe le gɔmedzedzea me la se nyateƒe lédziname sia gɔme la, efa akɔ nɛ. Egblɔ be: “Mɔnukpɔkpɔ gãtɔ kekeakee wònye be ame nazu Yehowa subɔla. Eye esi wònye be Yehowa tiam be manye ye subɔla ta la, efia be mexɔ asi le eŋkume.” Ke wò ya ɖe? Esi nènyae be Yehowa tsɔa ɖe le eme na esubɔlawo dometɔ ɖe sia ɖe la, ɖe esia ʋã wò nèdi be yeate ɖe eŋua?