Alesi Nyateƒea Wɔa Mí Ablɔɖeviwoe
1 Gbeɖeka Yesu gblɔ na Yudatɔ siwo xɔ edzi se be: “Miadze si nyateƒe la, eye nyateƒe la lawɔ mi ablɔɖeviwoe.” (Yoh. 8:32) Ablɔɖe si de ŋgɔ wu dukɔmevinyenye ƒe ablɔɖe, ablɔɖe si li na amesiame—eɖanye kesinɔtɔ alo ame dahe o, agbalẽnyala alo ame manyagbalẽ o—ŋu nya gblɔm wònɔ. Yesu fia nyateƒe si ana amewo nakpɔ ablɔɖe tso nuvɔ̃ kple ku ƒe kluvinyenye me. Yesu gblɔ be, “amesiame, si le nuvɔ̃ wɔm la, nuvɔ̃ ƒe kluvi wònye.” (Yoh. 8:34) Aleke gbegbe míekpɔa mɔ vevie na ŋkeke si woaɖe ameƒomea me tɔ toɖolawo ‘atso gbegblẽ ƒe kluvinyenye me ayi ɖe mawuviwo ƒe ŋutikɔkɔe ƒe ablɔɖe la me’ enye esi!—Rom. 8:21.
2 Nyateƒe si ku ɖe Yesu ŋu kple akpa si wɔm wòle le Mawu ƒe tameɖoɖowo me lae nana wokpɔa ablɔɖe ma. Elɔ tafe si wòxe ɖe mía ta ŋuti sidzedze hã ɖe eme. (Rom. 3:24) Fifia gɔ̃ hã la, Biblia me nyateƒea xɔxɔ kple alesi míabɔbɔ mía ɖokui ahawɔ wo ŋudɔe nana míevona tsoa vɔvɔ̃, mɔkpɔkpɔbuɖeame, kple nuwɔna gbegblẽ ƒomevi ɖesiaɖe wɔwɔ me.
3 Ablɔɖekpɔkpɔ tso Vɔvɔ̃ Kple Mɔkpɔkpɔbuɖeame Me: Mele be xexeame ƒe nɔnɔmewo nana mɔkpɔkpɔ nabu ɖe mí o elabena míenya nusita vɔ̃ɖinyenye li ɖo eye míenyae be woaɖee ɖa le anyigba dzi kpuie. (Ps. 37:10, 11; Tim. II, 3:1; Nyaɖ. 12:12) Azɔ hã nyateƒea naa ablɔɖe mí tso alakpanufiafia siwo ku ɖe nɔnɔme si me ame kukuwo le ŋu me. Míenya be kukuawo mate ŋu awɔ nuvevi mí o, womele fu kpem le dzomavɔ aɖeke me o, eye be Mawu menaa amewo kuna be woava nɔ ye gbɔ le gbɔgbɔmenuto me o.—Nyagb. 9:5; Dɔw. 24:15.
4 Nyateƒe sia lé vifofo kple vidada aɖe ɖe te esime wo viŋutsu ku le ʋufɔku aɖe me. Vidadaa gblɔ be: “Nane bu le míaƒe agbe me si teƒe naneke mate ŋu axɔ ɖo o vaseɖe esime míagakpɔ mía viŋutsua ake ne wofɔe ɖe tsitre. Gake míenya hã be ɣeyiɣi kpui aɖe koe míaƒe vevesesea anɔ anyi ase ɖo.”
5 Ablɔɖekpɔkpɔ tso Nuwɔna Gbegblẽwo Me: Biblia ate ŋu atrɔ ame ƒe tamebubu kple amenyenye, si ana woavo tso kuxi aɖewo siwo woate ŋu aƒo asa na si me. (Ef. 4:20-24) Anukwareɖiɖi kple dɔwɔwɔ veviedodotɔe ate ŋu aɖe ame tso ahedada me. (Lod. 13:4) Ðokuitsɔtsɔsavɔ ƒe lɔlɔ̃ ɖeɖe fia na wonɔa ƒomedodo nyui me kple amewo. (Kol. 3:13, 14) Bubudede Kristotɔwo ƒe tanyenye ŋu ɖea ƒomekuxiwo dzi kpɔtɔna. (Ef. 5:33–6:1) Ahamumu, agbegbegblẽnɔnɔ, atama zazã, kple atikevɔ̃ɖiwo tsitsri na wonɔa lãmesẽ me.—Lod. 7:21-23; 23:29, 30; Kor. II, 7:1.
6 Asiɖeɖe le atikevɔ̃ɖizazã ƒe asieke sɔŋ ƒe numame ŋu va zu kuxi sesẽ na ɖekakpui aɖe. Gbeɖeka la, edo go gbeƒãɖela aɖe si le ɖase ɖim le ablɔdzi. Ðekakpuia xɔ agbalẽ aɖe, eye wowɔ ɖoɖo be woava srãe akpɔ le eƒe aƒeme. Wodze Biblia-nusɔsrɔ̃ gɔme. Ðekakpuia dzudzɔ atikevɔ̃ɖiwo zazã keŋkeŋ le ɣleti eve ko megbe, eye wòxɔ nyɔnyrɔ le ɣleti enyi ƒe nusɔsrɔ̃ megbe. Esi nɔviaŋutsu kple srɔ̃ɖia wokpɔ alesi wòdzudzɔ eƒe numamea la, eʋã woawo hã be wodze Biblia-sɔsrɔ̃ gɔme.
7 Kpe Ðe Amewo Ŋu Ablɔɖe Nasu Wo Si: Ate ŋu asesẽ na amesiwo nɔ alakpanufiafia ƒe kluvinyenye me le woƒe agbenɔɣi katã be woase ablɔɖe si Mawu ƒe Nya la nana gɔme. Esia bia be mí amesiwo nye nufialawo míatsɔ veviedodo adzra ɖo etɔxɛ be míate ŋu aɖo amesiawo ƒe dzi gbɔ. (Tim. II, 4:2, 5) Menye ɣeyiɣi siae nye ɣeyiɣi si woawɔ alɔgblɔdɔ le ‘gbeƒãɖeɖe ablɔɖe na amesiwo wode gae’ me o. (Yes. 61:1) Ablɔɖe si sua Kristotɔwo si la nye nu xɔasi. Agbe mavɔe wòahe vɛ na amesiwo si wòsu.—Tim. I, 4:16.