Ame Nyuiwo Katãe Ayi Dziƒoa?

FIẼ si do ŋgɔ na Yesu ƒe ku, esime wòɖu nu kple eƒe apostolowo zi mamlɛtɔ vɔ la, edo ŋugbe na wo be woava xɔ teƒeɖoɖo le dziƒo. Egblɔ be: “Fofonye ƒe aƒe me la, nɔƒe geɖewo li. Ne ɖe mele nenema o la, anye ne megblɔe na mi, elabena meyina be madzra teƒe ɖo ɖi na mi.” (Yohanes 14:2) Nu ka tae Yesu ana teƒe wo le dziƒo? Nu kae woawɔ le afi ma?

Yesu nya be dɔ vevi aɖe li yeƒe nusrɔ̃lawo awɔ. Le zã ma ke me la, egblɔ be: “Miawoe nye ame siwo nɔ ŋunye le nye tetekpɔwo me; eye mele nu blam kpli mi, abe ale si Fofonye hã bla nu kplim ene, hena fiaɖuƒe aɖe.” (Luka 22:28, 29) Mawu do ŋugbe na Yesu be eyae ava nye Fia si ana amegbetɔwo ƒe nuhiahiã vevitɔ kekeakewo dometɔ ɖeka—dziɖuɖu nyuitɔ—nasu wo si. Yesu aɖe amewo tso fukpekpe me, eye wòato ame siwo le wo tem ɖe anyi la nyanyanya. Togbɔ be Yesu ƒe Fiaɖuƒea teviwo aɖo “anyigba ƒe mlɔenuwo ke” hã la, dziƒoe eƒe fiazikpuia anɔ.—Psalmo 72:4, 8; Daniel 7:13, 14.

Ke hã, menye Yesu ɖekae aɖu dzi o. Esia tae wòdo ŋugbe na eƒe apostolowo be nɔƒe li na wo le dziƒo ɖo. Woawoe nye ame siwo wotia be “woaɖu fia ɖe anyigba la dzi” dometɔ gbãtɔwo—Nyaɖeɖefia 5:10.

Ame nenie ayi dziƒo? Abe ale si ko wònɔna le dziɖuɖu ɖe sia ɖe gome ene la, ame siwo aɖu dzi le Mawu ƒe dziƒofiaɖuƒea me la mesɔ gbɔ o, ne wotsɔ wo sɔ kple ame siwo katã anye Fiaɖuƒe ma teviwo. Yesu gblɔ na ame siawo siwo aɖu fia kplii la be: “Alẽha sue, mègavɔ̃ o, elabena edze mia Fofo la ŋu be yeatsɔ fiaɖuƒe la ana mi.” (Luka 12:32) “Alẽha sue” sia me tɔwo ƒe xexlẽme anye ame 144,000. (Nyaɖeɖefia 14:1) Xexlẽme ma le ʋɛ ŋutɔ ne wotsɔe sɔ kple nuteƒewɔla miliɔn gbogbo siwo anɔ agbe tegbee le Fiaɖuƒe ma te le anyigba dzi.—Nyaɖeɖefia 21:4.

Eya ta menye ame nyuiwo katãe ayi dziƒo o. Apostolo Petro gblɔ tso Fia David si nye ame nyui la ŋu kã be: “David melia yi dziƒowo o.” (Dɔwɔwɔwo 2:34) Ame nyui ye Yohanes amenyrɔɖetsimela hã nye. Gake Yesu ɖee fia be manɔ ame siwo aɖu fia le dziƒo la dome o. Yesu gblɔ be: “Le ame siwo nyɔnuwo dzi dome la, ɖeke medo kpɔ, si nye gã wu Yohanes Amenyrɔɖetsimela o; gake ame si le sue le dziƒofiaɖuƒea me la nye gã wui.”—Mateo 11:11.

Ðe Teƒeɖoɖo Si Li Na Ame Nyuiwo Asu Asiwòa?

Nu kae ame awɔ hafi agbe tegbee nɔnɔ le anyigba dzi ƒe teƒeɖoɖoa nasu esi? Yesu gblɔ be: “Mawu lɔ̃ xexea ale gbegbe be wòtsɔ eƒe Tenuvi la na, bene ame sia ame si ɖenɛ fiana be yexɔ edzi se la nagatsrɔ̃ o, ke boŋ wòakpɔ agbe mavɔ.” (Yohanes 3:16) De dzesii be Mawu ƒe lɔlɔ̃ na xexea ʋãe wòtsɔ agbe tegbee nɔnɔ ƒe mɔnukpɔkpɔa ɖo amewo katã ŋkume, gake ame siwo ‘ɖea xɔse fiana’ la ko sie teƒeɖoɖo ma asu.

Ele be woatu xɔse ɖe sidzedze vavãtɔ dzi. (Yohanes 17:3) Àte ŋu aɖee afia be yenye ame nyui ne èyi edzi srɔ̃ nu geɖe tso Yehowa ƒe tameɖoɖo na amegbetɔwo ŋu. Xɔ nu siwo nèsrɔ̃ la dzi se eye nànɔ agbe ɖe wo nu. Ekema kakaɖedzi asu asiwò be agbe mavɔ nɔnɔ ƒe mɔnukpɔkpɔ le ʋuʋu ɖi na wò.

[Aɖaka si le axa 7]

Nya Kae Biblia Gblɔ?

Nyabiase:

Nu kae dzɔna ɖe ame nyuiwo dzi ne woku?

Ŋuɖoɖoa:

“Kukuawo menya naneke o.”—NYAGBLƆLA 9:5.

Nyabiase:

Etsɔmemɔkpɔkpɔ kae li na ame nyuiwo?

Ŋuɖoɖoa:

“Gaƒoƒo la gbɔna, esi me ame siwo katã le ŋkuɖodziyɔdowo me la ase [Yesu ƒe] gbe, eye woado go.”—YOHANES 5:28, 29.

Nyabiase:

Afi kae ame nyuiwo dometɔ akpa gãtɔ anɔ agbe le?

Ŋuɖoɖoa:

“Ame dzɔdzɔewo anyi anyigba la dome, eye woanɔ edzi tegbee.”—PSALMO 37:29.