NUSƆSRƆ̃ 17

Ame Ka Ƒomevie Yesu Nye?

Tatatɔ

Ne míeyi edzi le nu srɔ̃m tso nya siwo Yesu gblɔ kple nu siwo wòwɔ esime wònɔ anyigba dzi ŋu la, míeva dzea si nɔnɔme nyui siwo le esi, eye esia wɔnɛ be míedina be míanye eya kple Fofoa, Yehowa, siaa xɔlɔ̃wo. Nɔnɔme nyui siwo le Yesu si la dometɔ aɖewoe nye kawo? Eye aleke míate ŋu asrɔ̃ Yesu ƒe kpɔɖeŋua?

1. Mɔ kawo nue Yesu le abe Fofoa ene le?

Esime Yesu nɔ dziƒo la, elé ŋku ɖe Fofoa lɔ̃amea ŋu hesrɔ̃ nu tso egbɔ ƒe miliɔn akpe geɖe. Esia wɔe be, eƒe nuŋububu, eƒe seselelãme kple eƒe nuwɔnawo wɔ ɖeka kple Fofoa tɔ. (Xlẽ Yohanes 5:19.) Le nyateƒe me la, Yesu ɖe Fofoa ƒe nɔnɔme nyoameŋuawo fia nyuie ale gbegbe be, egblɔ be: “Ame si kpɔm la, ekpɔ Fofo la hã.” (Yohanes 14:9) Ne èyi edzi le nu srɔ̃m tso Yesu ƒe nɔnɔme nyuiawo ŋu la, àva nya Yehowa hã nyuie. Le kpɔɖeŋu me, ale si Yesu sea veve ɖe ame nu la ɖe ale si gbegbe Yehowa tsɔa ɖe le eme na wòe la fia.

2. Aleke Yesu ɖee fia be yelɔ̃ Yehowa?

Yesu gblɔ be: “Be xexea nanya be melɔ̃ Fofo la ta la, mele nu si tututu Fofo la de se nam be mawɔ la wɔm.” (Yohanes 14:31) Esime Yesu nɔ anyigba dzi la, eɖo to Fofoa ɣesiaɣi, ne esia wɔwɔ sesẽ nɛ ŋutɔ gɔ̃ hã, eye eto esia me ɖee fia be yelɔ̃ ye Fofo ale gbegbe. Azɔ hã, edzɔa dzi na Yesu be yeaƒo nu tso ye Fofo ŋu na amewo eye yeakpe ɖe wo ŋu be woava zu ye Fofo xɔlɔ̃wo.—Yohanes 14:23.

3. Aleke Yesu ɖee fia be yelɔ̃ amewo?

Biblia gblɔ be Yesu ‘melɔ̃a nu le amegbetɔƒomea gbɔ kura o.’ (Lododowo 8:31, etenuŋɔŋlɔ) Ale si Yesu dea dzi ƒo na amewo eye wòwɔa nu sia nu si wòate ŋui tsɔ kpena ɖe wo ŋu la ɖee fia be elɔ̃ amewo vavã. Nukunu siwo wòwɔ la ɖe ŋusẽ si le esi la fia, gake menye ema ɖeɖe ko o, woɖee fia hã be esea veve ɖe ame nu. (Marko 1:40-42) Ewɔ nu ɖe ame sia ame ŋu nyuie eye medea vovototo amewo dome o. Eƒe nyawo fa akɔ na ame sia ame si ɖo toe eye wona mɔkpɔkpɔ su ame siwo katã vɔ̃a Mawu la si. Esi Yesu lɔ̃ amegbetɔƒomea ta la, elɔ̃ faa be yeakpe fu ahaku ɖe wo ta. Togbɔ be Yesu lɔ̃ amegbetɔwo katã hã la, elɔ̃ ame siwo wɔna ɖe eƒe nufiafiawo dzi la geɖe wu.—Xlẽ Yohanes 15:13, 14.

SRƆ̃ NU BUBUWO

Àsrɔ̃ nu geɖe tso nɔnɔme nyui siwo le Yesu si la ŋu. Eye àkpɔ ale si nàte ŋu awɔ nu ɖe amewo ŋu le lɔlɔ̃ kple dɔmenyonyo me abe ale si Yesu wɔe ene.

4. Yesu lɔ̃ Fofoa

Kpɔɖeŋu nyui si Yesu ɖo ɖi na mí la na míekpɔ ale si míaɖee afia be míelɔ̃ Mawu. Mixlẽ Luka 6:12 kple Yohanes 15:10; 17:26. Ne miexlẽ mawunyakpukpuiawo dometɔ ɖe sia ɖe vɔ la, midzro biabia sia me:

Aleke míate ŋu asrɔ̃ Yesu ƒe kpɔɖeŋua ahaɖee afia be míelɔ̃ Yehowa?

Yesu le gbe dom ɖa. — Yesu lɔ̃ Fofoa si le dziƒo eye edoa gbe ɖa nɛ edziedzi

5. Yesu sea veve ɖe ame siwo ɖo hiã me la nu

Yesu dia ame bubuwo ƒe nyonyo wu eya ŋutɔ tɔ. Ne ɖeɖi te eŋu gɔ̃ hã la, ezãa eƒe ɣeyiɣi kple ŋusẽ tsɔ kpena ɖe amewo ŋu. Mixlẽ Marko 6:30-44, eye miadzro nyabiase siawo me:

Le ŋutinya sia me la, mɔ kawo nue Yesu ɖee fia le be yetsɔ ɖe le eme na amewo?—Kpɔ kpukpui 31, 34, 41, kple 42 lia.
Nu kae ʋã Yesu wòkpe ɖe amewo ŋu?—Kpɔ kpukpui 34 lia.
Esi wònye be Yehowa ƒe nɔnɔme nyuiwoe Yesu ɖe fia ta la, nu kae esia fia wò tso ame si ƒomevi Yehowa nye ŋu?
Nu kawoe míate ŋu awɔ atsɔ aɖee afia be míetsɔ ɖe le eme na amewo abe ale si Yesu wɔe ene?

Yesu na nuɖuɖu ame akpewo esi wòna abolo atɔ̃ kple tɔmelã eve dzi ɖe edzi nukutɔe. Nusrɔ̃lawo le nuɖuɖua mam na ŋutsuwo, nyɔnuwo kple ɖeviwo.

6. Yesu nyo dɔme na amewo

Togbɔ be nu geɖe menɔ Yesu si o hã la, enyo dɔme na amewo, eye ede dzi ƒo na mí be míawo hã míanyo dɔme na amewo. Mixlẽ Dɔwɔwɔwo 20:35, eye miadzro biabia sia me:

Le Yesu ƒe nya nu la, nu kae ana míakpɔ dzidzɔ?

Mikpɔ VIDEOA, eye miadzro biabia si gbɔna me.

VIDEO: “Dzidzɔ Geɖe Le Nunana Me”—Videoa Ƒe Akpa Aɖe (4:00)

Ne nu geɖe mele mía si o hã, mɔ kawo dzie míate ŋu ato anyo dɔme na amewo?

Ènyaa?

Biblia fia mí be míado gbe ɖa na Yehowa le Yesu ƒe ŋkɔ me. (Xlẽ Yohanes 16:23, 24.) Ne míedoa gbe ɖa na Yehowa le Yesu ƒe ŋkɔ me la, míeɖenɛ fiana be míekpɔ ŋudzedze ɖe nu si Yesu wɔ be yeakpe ɖe mía ŋu míanye Yehowa xɔlɔ̃wo la ŋu.

AME AÐEWO GBLƆNA BE: “Mawu metsɔa ɖeke le eme na mí ne míele fu kpem o.”