Nu Ka Tae Wòle Be Mawu Ƒe Gbɔgbɔa Nafia Mɔ Mí?

“Nye Mawu nènye; wò gbɔgbɔ nyui la nekplɔm.”—PS. 143:10.

 1. Nu ka tae galékpe tea ŋu hea nu sia nu si wotsɔ gayibɔ wɔ?

ÈTSƆ tɔnui da ɖe galékpe xa kpɔa? Galékpea hea tɔnuia enumake helénɛ ɖe eɖokui ŋu. Nu ka tae wòdzɔna alea? Nu si tae nye be ŋusẽ makpɔmakpɔ aɖe le galékpea me si hea gayibɔ ɖe sia ɖe. Ƒe alafa geɖee nye esia si amewo zãa galékpe tsɔ dia ganuwo le anyigba.

2, 3. (a) Ŋusẽ triakɔ kae Yehowa zã ƒe gbogbo manyaxlẽ aɖewoe nye esi va yi? (b) Nu ka tae wòle be míakpɔ mɔ be Mawu ƒe dɔwɔŋusẽ makpɔmakpɔa nafia mɔ mí egbea?

² Ŋusẽ makpɔmakpɔ bubu aɖe hã li si le vevie wu kura, si kpena ɖe mía ŋu. Eyae nye eka? Eyae nye ŋusẽ si ŋu woƒo nu tsoe le Biblia ƒe kpukpui gbãtɔwo me. Esi Mose Ƒe Agbalẽ Gbãtɔa le nu ƒom tso nu si Yehowa wɔ ƒe gbogbo manyaxlẽ aɖewoe nye esi va yi ŋu la, egblɔ be: “Le gɔmedzedzea me Mawu wɔ dziƒo kple anyigba.” Le esia wɔwɔ me la, ezã ŋusẽ triakɔ aɖe, elabena nuwɔwɔwo ŋuti nuŋlɔɖia yi edzi be: “Mawu ƒe Gbɔgbɔ le agba sam le tsia dzi.” (1 Mose 1:1, 2) Ŋusẽ ka zãm Mawu nɔ le nuwo wɔwɔ me? Eyae nye gbɔgbɔ kɔkɔe la—eƒe dɔwɔŋusẽ si wòzã tsɔ wɔ nuwo. Míedaa akpe na Yehowa be ezã eƒe gbɔgbɔ kɔkɔea tsɔ wɔ mí hewɔ nu bubuawo katã hã.—Hiob 33:4; Ps. 104:30.

³ Míenyae be Yehowa zã eƒe gbɔgbɔ kɔkɔea tsɔ na agbe mí, gake ɖe míagate ŋu akpɔ mɔ be gbɔgbɔ sia nakpɔ ŋusẽ ɖe míaƒe agbe dzi le mɔ bubuwo nua? Mawu ŋutɔ ƒe Vi Yesu nyae be ele be míakpɔ mɔ nenema, elabena egblɔ na eƒe nusrɔ̃lawo be: “[Gbɔgbɔ] la . . . afia mɔ mi le nyateƒe blibo la katã me.” (Yoh. 16:13) Nu ka tututue gbɔgbɔ sia nye, eye nu ka tae wòle be míadi be wòafia mɔ mí?

Nu Si Gbɔgbɔ Kɔkɔea Nye

4, 5. (a) Nu kae Mawuɖekaetɔ̃ dzi xɔselawo susuna vodadatɔe be gbɔgbɔ kɔkɔe la nye? (b) Aleke nàɖe nu si tututu gbɔgbɔ kɔkɔe la nye la me?

⁴ Ðikeke mele eme o be ame siwo nèdoa goe le gbeadzi la dometɔ geɖe xɔ Mawuɖekaetɔ̃ dzi se. Eya ta wosusuna vodadatɔe be ame ŋutɔŋutɔ si le tasɔsɔ me kple Mawu Fofo lae gbɔgbɔ kɔkɔe la nye. (1 Kor. 8:6) Le ɖekawɔwɔ me kple nukpɔsusu ma la, Biblia gɔmeɖela geɖewo tsɔa ŋɔŋlɔdzesi gãwo ŋlɔnɛ abe ame ŋutɔŋutɔe wònye ene. Gake ele bɔbɔe ŋutɔ be míaɖee afia be Mawuɖekaetɔ̃ ƒe nufiafiaa mewɔ ɖeka kple Ŋɔŋlɔawo o.

⁵ Ekema nu ka tututue gbɔgbɔ kɔkɔe la nye? Le Biblia me la, wogaɖea Hebrigbe me nya ruʹach si gɔme woɖe be ‘gbɔgbɔ’ le 1 Moses 1:2 la gɔme be ‘ya,’ alo wozãa nya bubu siwo fiaa ŋusẽ makpɔmakpɔ aɖe la tsɔ ɖea egɔmee. (Tsɔe sɔ kple 1 Mose 8:1.) Abe ale si ko ya nye nu makpɔmakpɔ gake míekpɔa nu siwo wòwɔna ene la, nenema kee gbɔgbɔ kɔkɔe la hã nye nu makpɔmakpɔ gake míekpɔa nu siwo wòwɔna. Gbɔgbɔ sia nye ŋusẽ si tso Mawu gbɔ, si wòzãna ɖe amewo alo nuwo dzi be yeƒe lɔlɔ̃nu nava eme. Ðe wòsesẽ be míaxɔe ase be ŋusẽ wɔnuku ma tsoa Mawu Kɔkɔe Ŋusẽkatãtɔ la gbɔa? Kura o!—Mixlẽ Yesaya 40:12, 13.

 6. Nu ɖedzesi kae David ƒo koko bia Yehowa?

⁶ Ðe Yehowa ate ŋu ayi edzi atsɔ eƒe gbɔgbɔa anɔ mɔ fiam mía? Edo ŋugbe na hakpala David be: “Mafia nu wò, eye mafia mɔ, si nàto la wò.” (Ps. 32:8) Ðe David di be Mawu nafia mɔ yea? Ɛ̃, elabena eƒo koko na Yehowa be: “Fia wò lɔlɔ̃num mawɔ, elabena nye Mawu nènye; wò gbɔgbɔ nyui la nekplɔm.” (Ps. 143:10) Ele be wòanye míaƒe didi eye míalɔ̃ faa be Mawu ƒe gbɔgbɔ la nafia mɔ mí. Nu ka tae? Na míadzro susu ene aɖewo siwo tae la me.

Míedze Afia Mɔ Mía Ðokuiwo O

7, 8. (a) Nu ka tae míate ŋu afia mɔ mía ɖokuiwo o? (b) Kpɔɖeŋu kae na míese nu si tae míehiã na Mawu ƒe mɔfiafia le xexe vɔ̃ɖi sia me la gɔme?

⁷ Gbã la, ele be míadi be Mawu ƒe gbɔgbɔ la nafia mɔ mí, elabena míawo ŋutɔwo míate ŋu afia mɔ mía ɖokuiwo o. “Be woafia mɔ ame” fia be “woafia mɔ nyuitɔ si wòle be wòato lae.” Ke hã Yehowa mewɔ mí kple ŋutete be míafia mɔ mía ɖokui o, eye fifia si míeva zu ame madeblibowo ya la, míate ŋui kura o. Mawu ƒe nyagblɔɖila Yeremiya ŋlɔ bena: “O Aƒetɔ, menyae be amegbetɔ ƒe mɔ mele eya ŋutɔ si me o: ŋusẽ mele amegbetɔ si be wòafia mɔ eƒe afɔɖeɖewo o.” (Yer. 10:23, The Bible in Basic English) Eye nu ka tae mate ŋui o? Mawu gblɔ susu si tae mí amegbetɔwo míate ŋu afia mɔ mía ɖokuiwo o la na mí to Yeremiya dzi. Yehowa gblɔ be: “Ame ƒe dzi la, alakpatɔ wònye wu nuwo katã, nu gbegblẽ wònye, ame ka ahadze sii ma?”—Yer. 17:9; Mat. 15:19.

⁸ Tsɔe be ame aɖe ɖoe be yeazɔ mɔ ayi teƒe aɖe si menya o eye ahiã be wòato avememɔ alo gbedadaƒo. Ne mebia mɔ ta tsitotsito ŋlɔ ɖe agbalẽ dzi lé ɖe asi hafi dze mɔa zɔzɔ gɔme o la, ɖe afɔku manɔ eme oa? Ne amea menya nu siwo wòatsɔ ɖe asi hafi ate ŋu azɔ mɔa kple ale si wòakpɔ nɔnɔme sesẽ siwo wòado goe le mɔa dzi gbɔe o eye menya mɔ siwo wòato aɖo afi si yim wòle la dedie o la, eƒe agbe aɖo afɔku me. Nenema kee ne ame aɖe susu be yeate ŋu afia mɔ ye ɖokui le xexe vɔ̃ɖi sia me eye meɖea mɔ be Mawu nafia mɔ nyuitɔa ye o la, atsɔ eƒe agbe ade afɔku me. Nu si ko ate ŋu akpe ɖe mía ŋu míato nuɖoanyi sia me ado dedie ye nye be míado gbe ɖa abia Yehowa ƒe kpekpeɖeŋu abe ale si David wɔe ene be: “Na nye afɔ nali ɖe wò mɔwo dzi, ale be ke nagaɖe le nye afɔwo te o.” (Ps. 17:5, NW; 23:3) Nu kae míawɔ be míaxɔ mɔfiame sia?

 9. Abe ale si wòdze le nɔnɔmetata si le axa 17 lia me ene la, aleke Mawu ƒe gbɔgbɔa ate ŋu afia mɔ mí?

⁹ Ne míebɔbɔ mía ɖokuiwo eye míelɔ̃ be Yehowa nafia mɔ mí la, atsɔ eƒe gbɔgbɔ kɔkɔe la afia mɔ míaƒe afɔɖeɖewo. Aleke eƒe dɔwɔŋusẽa ate ŋu akpe ɖe mía ŋu? Yesu gblɔ na eƒe nusrɔ̃lawo be: “Kpeɖeŋutɔ la, si nye gbɔgbɔ kɔkɔe la, si Fofo la aɖo ɖa le nye ŋkɔ me la, eya afia nuwo katã mi, eye wòaɖo ŋku nu siwo katã megblɔ na mi la dzi na mi.” (Yoh. 14:26) Ne míedoa gbe ɖa hesrɔ̃a Mawu ƒe Nya la, si ƒe akpa aɖee nye Yesu ƒe nufiafiawo, edziedzi la, gbɔgbɔ kɔkɔea ana míagase Yehowa ƒe nunya gogloawo gɔme ɖe edzi, ale be míate ŋu awɔ eƒe lɔlɔ̃nu ale si dze. (1 Kor. 2:10) Gakpe ɖe eŋu la, ne nane ɖi ɖe mí le vo me la, gbɔgbɔ kɔkɔea akpe ɖe mía ŋu míanya nu si míawɔ. Ana míaɖo ŋku Biblia me mɔfiame vevi siwo míesrɔ̃ va yi la dzi, eye wòakpe ɖe mía ŋu míase ale si míawɔ wo ŋu dɔe le afɔ siwo míaɖe me la gɔme.

Mawu Ƒe Gbɔgbɔa Fia Mɔ Yesu

10, 11. Nu kae Mawu ƒe Tenuvi la kpɔ mɔ be gbɔgbɔ kɔkɔea nawɔ na ye, eye aleke gbɔgbɔ kɔkɔea kpe ɖe eŋui?

¹⁰ Susu evelia si tae wòle be míadi be gbɔgbɔ kɔkɔea nafia mɔ míe nye be eyae Mawu tsɔ fia mɔ ye ŋutɔ Via. Hafi Mawu ƒe Tenuvi la nava anyigba dzi la, enya nyagblɔɖi sia nyuie be: “Yehowa ƒe gbɔgbɔ, si nye nunya kple gɔmesese ƒe gbɔgbɔ, adaŋudede kple ŋusẽ ƒe gbɔgbɔ, sidzedze kple Yehowa vɔvɔ̃ ƒe gbɔgbɔ la, anɔ edzi.” (Yes. 11:2) Wò ya bu ale si gbegbe Yesu nɔ mɔ kpɔm vevie be Mawu ƒe gbɔgbɔa nakpe ɖe ye ŋu le nɔnɔme sesẽ siwo me yeava to esime wònɔ anyigba dzi afi siae la me ŋu kpɔ!

¹¹ Yehowa ƒe nya la va eme. Nuŋlɔɖi siwo le Nya Nyui Gbalẽawo me la gblɔ nu si dzɔ le Yesu ƒe nyɔnyrɔxɔxɔ megbe teti la ale: “Ke Yesu si yɔ fũu kple gbɔgbɔ kɔkɔe la trɔ tso Yordan nu, eye gbɔgbɔ la kplɔe yi teƒeteƒewo le gbedadaƒo.” (Luka 4:1) Esi Yesu nɔ afi ma la, etsi nu dɔ, enɔ gbe dom ɖa henɔ ŋugble dem, eye ɖikeke mele eme o be Yehowa fia nu geɖe Via eye wòdzrae ɖo ɖe nu siwo me wòava to la ŋu. Mawu ƒe dɔwɔŋusẽa kpɔ ŋusẽ nyui ɖe Yesu ƒe susu kple dzi dzi, eye wòfia mɔ eƒe tamebubu kple nyametsotsowo. Esia wɔe be, Yesu nyaa nu si wòawɔ le nɔnɔme ɖe sia ɖe me, eye wòwɔ nu siwo tututu Fofoa di be wòawɔ la.

12. Nu ka tae wòle vevie be míabia Mawu ƒe gbɔgbɔa ƒe mɔfiafia?

¹² Esi Yesu nya ale si gbegbe Mawu ƒe gbɔgbɔa ƒe kpekpeɖeŋu ɖe vi nɛ ta la, ede dzi ƒo na eƒe nusrɔ̃lawo be ele vevie be woabia gbɔgbɔ kɔkɔea eye woaɖe mɔ wòafia mɔ wo. (Mixlẽ Luka 11:9-13.) Nu ka tae gbɔgbɔ kɔkɔea biabia le vevie nenema gbegbe ɖo? Elabena ate ŋu atrɔ míaƒe susu ale be wòasɔ kple Kristo ƒe tamesusu. (Rom. 12:2; 1 Kor. 2:16) Ne míeɖe mɔ Mawu ƒe gbɔgbɔa fiaa mɔ mí le agbe me la, míate ŋu abu nu ŋu abe ale si Kristo bua nu ŋu ene, eye míasrɔ̃ eƒe kpɔɖeŋua.—1 Pet. 2:21.

Xexea Ƒe Gbɔgbɔ Ate Ŋu Akplɔ Mí Atrae

13. Nu kae nye xexea ƒe gbɔgbɔ, eye nu kae wònana amewo wɔna?

¹³ Susu etɔ̃lia si tae wòle be míadi be Mawu ƒe gbɔgbɔa nafia mɔ míe nye be, gbɔgbɔa manɔmee la, xexea ƒe gbɔgbɔ makɔmakɔ si le ŋusẽ kpɔm ɖe ame akpa gãtɔ dzi egbea la akplɔ mí atrae. Esiae nye ŋusẽkpɔɖeamedzi sẽŋu si nana amewo wɔa nu siwo tsi tsitre ɖe gbɔgbɔ kɔkɔea ƒe mɔfiafia ŋu tẽe. Xexea ƒe gbɔgbɔ menana Kristo ƒe tamesusu sua amewo si o, ke boŋ ɖe wònana amewo ƒe tamebubu kple nuwɔna sɔna kple xexea dzi ɖula, Satana, tɔ. (Mixlẽ Efesotɔwo 2:1-3; Tito 3:3.) Ne ame aɖe ɖe mɔ xexea ƒe gbɔgbɔ kpɔ ŋusẽ ɖe edzi eye wònɔa agbe ɖe ŋutilã ƒe dɔwɔwɔwo nu la, emetsonuawo gblẽa nu ŋutɔ, eye axe mɔ nɛ be manyi Mawu Fiaɖuƒe la dome o.—Gal. 5:19-21.

14, 15. Aleke míate ŋu akpɔ dzidzedze le tsitretsitsi ɖe xexea ƒe gbɔgbɔa ŋu me?

¹⁴ Yehowa na kpekpeɖeŋu mí be míate ŋu atsi tsitre ɖe xexea ƒe gbɔgbɔ ŋu. Apostolo Paulo gblɔ na mí be ‘míayi edzi anɔ ŋusẽ xɔm le Aƒetɔ la kple eƒe ŋutete ƒe ŋusẽ gã la me, bene míate ŋu anɔ te le ŋkeke vɔ̃ la dzi.’ (Ef. 6:10, 13) Yehowa toa eƒe gbɔgbɔa dzi doa ŋusẽ mí be míatsi tsitre ɖe agbagba siwo dzem Satana le be yeakplɔ mí atrae la ŋu. (Nyaɖ. 12:9) Ŋusẽ le xexea ƒe gbɔgbɔ ŋu, eye míate ŋu aƒo asa nɛ keŋkeŋ o. Ke hã mele be míaɖe mɔ wòakpɔ ŋusẽ ɖe mía dzi o. Gake ŋusẽ le gbɔgbɔ kɔkɔea ŋu sãsãsã wui, eye akpe ɖe mía ŋu míaɖu edzi!

¹⁵ Apostolo Petro gblɔ le ame siwo dzudzɔ Kristo yome dzedze le ƒe alafa gbãtɔ me ŋu be: “Esi wogblẽ mɔ dzɔdzɔe la ɖi ta la, wotra mɔ.” (2 Pet. 2:15) Aleke gbegbe míedaa akpee nye esi be “menye xexea ƒe gbɔgbɔ ye míexɔ o, ke boŋ gbɔgbɔ si tso Mawu gbɔ lae míexɔ”! (1 Kor. 2:12) Ne míeɖe mɔ gbɔgbɔ kɔkɔea kpena ɖe mía ŋu eye míewɔa ɖoɖo siwo katã Yehowa na mí be woakpe ɖe mía ŋu míayi edzi anɔ mɔ dzɔdzɔea dzi ŋu dɔ bliboe la, míate ŋu atsi tre ɖe xexe vɔ̃ɖi sia ƒe gbɔgbɔa ŋu dzidzedzetɔe.—Gal. 5:16.

Gbɔgbɔ Kɔkɔea Nana Míetsea Ku Nyuiwo

16. Nɔnɔme nyui kawoe gbɔgbɔ kɔkɔea akpe ɖe mía ŋu míatu ɖo?

¹⁶ Susu enelia si tae wòle be míadi be Mawu ƒe gbɔgbɔa nafia mɔ míe nye be, ekpena ɖe ame siwo wòfiaa mɔe la ŋu wotsea ku nyuiwo le woƒe agbenɔnɔ me. (Mixlẽ Galatiatɔwo 5:22, 23.) Mía dometɔ kae madi be yealɔ̃ amewo geɖe wu, yeakpɔ dzidzɔ geɖe wu, eye yeanye ŋutifafame geɖe wu o? Ame kae madi be yeanɔ dzigbɔgbɔ blewu, dɔmenyonyo, kple nyuiwɔwɔ ɖem fia geɖe wu o? Mía dometɔ kae madi be yeatu xɔse sẽŋu, tufafa, kple ɖokuidziɖuɖu ɖo geɖe wu o? Mawu ƒe gbɔgbɔa nana míetsea ku nyui siwo ɖea vi na míawo ŋutɔwo kple ame siwo dome míele kpakple haxɔsetɔwo siaa. Ehiã be míayi edzi anɔ nɔnɔme nyui siawo tum ɖo ɖaa, elabena seɖoƒe meli na gbɔgbɔa ƒe kutsetse agbɔsɔsɔme si míehiã o, eye nenema kee seɖoƒe meli na kutsetsea ƒe agbɔsɔsɔme si wòle be míaɖe afia o.

17. Aleke míawɔ atu gbɔgbɔa ƒe kutsetsea ƒe akpa aɖe ɖo geɖe wu le míaƒe agbenɔnɔ me?

¹⁷ Nunya anɔ eme be míadzro mía ɖokuiwo me akpɔe ɖa be, ɖe míaƒe nyagbɔgblɔ kple nuwɔnawo ɖenɛ fiana vavã be míeɖe mɔ gbɔgbɔ kɔkɔea le mɔ fiam mí eye míele eƒe ku la tsem mahã. (2 Kor. 13:5a; Gal. 5:25) Ne míekpɔe be ehiã be míatu gbɔgbɔa ƒe kutsetsea ƒe akpa aɖe ɖo geɖe wu la, míate ŋu aku kutri vevie wu awɔ dɔ aduadu kple gbɔgbɔ kɔkɔea be míawɔ ŋgɔyiyi le nɔnɔme nyui mawo ɖeɖe fia me. Míate ŋu awɔ esia ne míezã Biblia kple Kristotɔwo ƒe agbalẽwo tsɔ srɔ̃a nu tso gbɔgbɔa ƒe kutsetsea ƒe akpa ɖe sia ɖe ŋu. Ne míewɔe alea la, míate ŋu akpɔ ale si míaɖe gbɔgbɔa ƒe kutsetsea ƒe akpa ɖe sia ɖe afia le míaƒe agbenɔnɔ me gbe sia gbe, eye míaku kutri vevie wu be míaɖee afia geɖe wu.a Ne míekpɔ ale si Mawu ƒe gbɔgbɔa ƒe mɔfiafia le vi ɖem na míawo ŋutɔwo kple mía nɔvi Kristotɔwo dze sii la, míesea nu si tae wòle vevie be wòafia mɔ mí ɖo la gɔme.

Èle Mɔ Ðem Be Mawu Ƒe Gbɔgbɔa Nafia Mɔ Wòa?

18. Aleke Yesu ɖo kpɔɖeŋu ɖi na mí le wɔwɔ ɖe Mawu ƒe gbɔgbɔa ƒe mɔfiafia dzi me?

¹⁸ Biblia ka nya ta be esime Yesu nye amegbetɔ la, ekpɔ ale si gbegbe Mawu ƒe gbɔgbɔ kɔkɔea ate ŋu akpɔ ŋusẽ ɖe eƒe agbe dzii la dze sii. Elɔ̃ faa be wòafia mɔ ye, eye ne gbɔgbɔa fia mɔe be wòawɔ nane la, elɔ̃na faa wɔa nu le ɖekawɔwɔ me kple Mawu ƒe lɔlɔ̃nu. (Mar. 1:12, 13; Luka 4:14) Ðe wò hã èɖea mɔ Mawu ƒe gbɔgbɔa fiaa mɔ wò abe Yesu enea?

19. Nu kae wòle be míawɔ be gbɔgbɔ kɔkɔea nafia mɔ mí?

¹⁹ Mawu ƒe dɔwɔŋusẽa gakpɔtɔ wɔa dɔ ɖe ame siwo lɔ̃na faa la ƒe tamesusuwo kple woƒe dzi dzi eye wòfiaa mɔ wo. Aleke nàwɔ aɖe mɔ be gbɔgbɔa nakplɔ wò ato mɔ nyuitɔ dzi? Eyae nye be nànɔ gbe dom ɖa na Yehowa ɣeawokatãɣi be wòana eƒe gbɔgbɔ la wò eye wòakpe ɖe ŋuwò nàɖe mɔ gbɔgbɔa nafia mɔ wò. (Mixlẽ Efesotɔwo 3:14-16.) Di aɖaŋuɖoɖo siwo le Mawu ƒe Nya, Biblia, si wòtsɔ eƒe gbɔgbɔ kɔkɔea ʋã amewo woŋlɔ, la me, eye nàwɔ ɖe wo dzi atsɔ aɖee afia be èle nu wɔm le ɖekawɔwɔ me kple wò gbedodoɖawo. (2 Tim. 3:16, 17) Wɔ ɖe mɔfiame, siwo me nunya le, siwo le Biblia me la dzi, eye lɔ̃ faa nàwɔ ɖe gbɔgbɔ kɔkɔea ƒe mɔfiafia dzi. Wɔ nu le xɔse me nàtsɔ aɖee afia be nèxɔ ŋutete si le Yehowa si be wòakplɔ wò ato xexe vɔ̃ɖi sia me dedie la dzi se.

[Etenuŋɔŋlɔ]

Èse Susu Veviawo Gɔmea?

• Aleke gbɔgbɔ kɔkɔea ate ŋu akpɔ ŋusẽ ɖe míaƒe agbe dzi?

• Susu ene kawo tae wòle be míadi be Mawu ƒe gbɔgbɔa nafia mɔ mí?

• Nu kawoe míate ŋu awɔ be gbɔgbɔ kɔkɔea ƒe mɔfiafia naɖe vi na mí bliboe?

[Nɔnɔmetata si le axa 15]

Mawu ƒe gbɔgbɔa ye nye ŋusẽ si fia mɔ Yesu esime wònɔ anyigba dzi

[Nɔnɔmetata si le axa 17]

Mawu ƒe gbɔgbɔa wɔa dɔ ɖe amewo ƒe tamesusuwo kple dziwo dzi hefiaa mɔ wo