De dzesi ale si Yesu na amedzidzi yeyee ƒe vevienyenye dze ƒãa le eƒe numedzodzro kple Nikodemo me. Egblɔ be: “Ne womegbugbɔ ame dzi o la, mate ŋu akpɔ Mawu fiaɖuƒe la o.” (Yohanes 3:3) Nya siwo nye “ne” kple “mate ŋu” te gbe ɖe ale si wòhiã vevie be woagbugbɔ ame adzi la dzi. Le kpɔɖeŋu me: Ne ame aɖe gblɔ be, “Ne ɣe medze o la, míate ŋu akpɔ kekeli o” la, efia be ŋdɔa ƒe ʋuʋu hiã godoo hafi woakpɔ kekeli. Nenema kee Yesu gblɔ be ele kokoko be woagbugbɔ ame adzi hafi wòakpɔ Mawu fiaɖuƒe la.

Yesu ƒe nyaawo xexlẽ tsitotsito ana míakpɔe be Yesu mefia nu be ame ŋutɔe atiae be woadzi ye yeyee o. Nu ka tae míegblɔ nenema? Woagate ŋu aɖe Helagbe me nya si gɔme woɖe be ‘woagbugbɔ dzi’ la gɔme be “ele be woadzi tso dziƒo.”a Eya ta le gɔmeɖeɖe evelia sia ƒe nya nu la, amedzidzi yeyee sia “tsoa dziƒo”—‘tso Fofo la gbɔ.’ (Yohanes 19:11; Yakobo 1:17) Ɛ̃, Mawu gbɔe wòtsona.—1 Yohanes 3:9.