Gbɔgbɔ Kɔkɔea—Mawu ƒe Dɔwɔŋusẽe
LE MAWUÐEKAETƆ̃ ƒe nufiafia nu la, gbɔgbɔ kɔkɔe lae nye ame etɔ̃lia le Mawuƒokpli la me eye esɔ kple Fofo la kple Vi la. Abe alesi agbalẽ si nye Our Orthodox Christian Faith gblɔe ene la: “Gbɔgbɔ Kɔkɔe la nye Mawu keŋkeŋ.”
Le Hebri Ŋɔŋlɔawo me la, nya si wozã wu na “gbɔgbɔ” ye nye ruʹach, si gɔmee nye “gbɔgbɔ [to ŋɔti me]; ya; gbɔgbɔ.” Le Hela Ŋɔŋlɔawo me la, nya si wozãe nye pneuʹma si hã ƒe gɔmeɖeɖe sɔ kple ema. Ðe nya siawo fia be gbɔgbɔ kɔkɔea nye Mawuɖekaetɔ̃ ƒe akpa aɖea?
Dɔwɔŋusẽe
ALESI Biblia zã nya “gbɔgbɔ kɔkɔe” lae fia be enye ŋusẽ si dzi Yehowa kpɔ ŋusẽ ɖo si wòzãna tsɔ wɔa eƒe tameɖoɖo vovovowoe. Le nu geɖe gome la, woate ŋu atsɔe asɔ kple elektrikŋusẽ, si nye ŋusẽ si woate ŋu atsɔ awɔ dɔ vovovoe.
Biblia gblɔ le Mose I, 1:2 me be: “Mawu ƒe gbɔgbɔ [dɔwɔŋusẽ] (Hebrigbe, ruʹach) le agba sam le tsia dzi.” Le afisia la, Mawu ƒe gbɔgbɔa ye nye eƒe dɔwɔŋusẽ si le dɔ wɔm be yeana anyigba la naɖo nɔnɔme nyui me.
Mawu zãa eƒe gbɔgbɔ la tsɔ kɔa nu me na amesiwo subɔna eyamae. Dawid do gbe ɖa be: “Fia wò lɔlɔ̃num mawɔ, elabena nye Mawu nènye; wò gbɔgbɔ [ruʹach] nyui la nekplɔm to anyigba sɔsɔe dzi!” (Psalmo 143:10) Esime wotia ame 70 siwo ŋu ŋutete le be woakpe ɖe Mose ŋu la, Mawu gblɔ nɛ be: “Maɖe gbɔgbɔ [ruʹach], si le dziwò la, ƒe ɖe ada ɖe wo dzi.”—Mose IV, 11:17.
Woŋlɔ Biblia ƒe nyagblɔɖiwo esime “gbɔgbɔ kɔkɔe la [Helagbe, si tso pneuʹma me] ʋã” Mawu ƒe amewo. (Petro II, 1:20, 21) To mɔ sia dzi la, Biblia la “tso Mawu ƒe gbɔgbɔ me,” eye Helagbe me nya si wozã na esiae nye The·oʹpneu·stos, si gɔmee nye “[nusi] Mawu gbɔ [wòdo].” (Timoteo II, 3:16) Eye gbɔgbɔ kɔkɔea fia mɔ ame aɖewo wokpɔ ŋutegawo alo ku drɔ̃ewo.—Samuel II, 23:2; Yoel 3:1, 2; Luka 1:67; Dɔwɔwɔwo 1:16; 2:32, 33.
Gbɔgbɔ kɔkɔea ʋã Yesu be wòayi gbedzi le eƒe nyɔnyrɔ̃xɔxɔ megbe. (Marko 1:12) Gbɔgbɔa nɔ abe dzo ene le Mawu ƒe subɔlawo me eye wòna ŋusẽ ma do ŋusẽ wo. Ekpe ɖe wo ŋu be wotsɔ dzideƒo ƒo nu kalẽtɔe hã.—Mixa 3:8; Dɔwɔwɔwo 7:55-60; 18:25; Romatɔwo 12:11; Tesalonikatɔwo I, 5:19.
Mawu tsɔa eƒe gbɔgbɔa hea eƒe ʋɔnudɔdrɔ̃wo vaa amewo kple dukɔwo dzie. (Yesaya 30:27, 28; 59:18, 19) Eye Mawu ƒe gbɔgbɔa te ŋu ɖoa afisiafi, eye wòkpena ɖe amewo ŋu alo wɔa nusi tsia tre ɖe wo ŋu.—Psalmo 139:7-12.
‘Ŋusẽ si Gbɔ Nusi Le Dzɔdzɔme Nu Ŋu’
MAWU ƒe gbɔgbɔa ate ŋu ana ‘ŋusẽ si gbɔ nusi le dzɔdzɔme nu ŋu’ la amesiwo subɔna eyama. (Korintotɔwo II, 4:7) Esia kpena ɖe wo ŋu be woado dzi le xɔse ƒe dodokpɔwo me alo be woawɔ nusiwo anye ne womate ŋu awɔ hafi o la.
Le kpɔɖeŋu me, Ʋɔnudrɔ̃lawo 14:6 gblɔ tso Simson ŋu be: “Yahweh ƒe gbɔgbɔ dze edzi, eye togbɔ be avuwɔnu aɖeke mele esi o hã la, evuvu dzata la kakɛkakɛe.” (JB) Ðe ame aɖe si nye Mawu ge ɖe Simson me alo dze edzi eye wòzã eƒe ŋutilã wòwɔ nusi wòwɔ la? Ao, “AƑETƆ ƒe ŋusẽ [lae] do ŋusẽ Simson.”—TEV.
Biblia gblɔ be esime wonyrɔ̃ Yesu ɖe tsi me la, gbɔgbɔ kɔkɔea ɖi ɖe edzi le akpakpa ƒe nɔnɔme me, ke menye le amegbetɔ ƒe nɔnɔme me o. (Marko 1:10) Mawu ƒe ŋusẽ wɔdɔ sia kpe ɖe Yesu ŋu wòyɔ dɔ dɔnɔwo eye wòfɔ ame kukuwo ɖe tsitre. Abe alesi Luka 5:17 gblɔe ene la: “Aƒetɔ [Mawu] ƒe Ŋusẽ nɔ megbe na [Yesu ƒe] dɔyɔyɔwo.”—JB.
Mawu ƒe gbɔgbɔ la do ŋusẽ Yesu ƒe nusrɔ̃lawo hã be wowɔ nukunuwo. Dɔwɔwɔwo 2:1-4 ka nya ta na mí be nusrɔ̃lawo kpe ta ɖekae le Pentekoste-ŋkekea dzi eye “kasia gbe aɖe ɖi tso dziƒo abe yaƒoƒo sesẽ ene, . . . Eye gbɔgbɔ kɔkɔe la yɔ wo katã taŋtaŋ, eye wode asi gbe bubuwo gbɔgblɔ me, abe alesi gbɔgbɔ la na wo, be woaƒo nui ene.”
Eyata gbɔgbɔ kɔkɔea na ŋusẽ Yesu kple Mawu subɔla bubuwo be woawɔ nusi amegbetɔwo mate ŋu awɔ le dzɔdzɔme nu o.
Menye Amee O
GAKE ɖe Biblia ƒe kpukpui aɖewo meli siwo ƒo nu tso gbɔgbɔ kɔkɔea ŋu abe ame ŋue wole nu ƒom le ene oa? Ẽ, woli, gake de dzesi nusi Katolikotɔwo ƒe mawuŋutinunyala Edmund Fortman gblɔ le The Triune God me la: “Togbɔ be woƒoa nu tso gbɔgbɔ sia ŋu abe ame ŋue wole nu ƒom le ene hã la, edze ƒã be nuŋlɔla kɔkɔeawo [siwo ŋlɔ Hebri Ŋɔŋlɔawo] mesusui kpɔ alo ƒo nu tso gbɔgbɔ sia ŋu kpɔ abe ame si le eɖokui si ene o.”
Le Ŋɔŋlɔawo me la, enye nusi bɔ be woaƒo nu tso nane ŋu abe ame ŋue wole nu ƒom le ene. Wogblɔ tso nunya ŋu be vi le esi. (Luka 7:35) Woyɔ nuvɔ̃ kple ku be fiawo. (Romatɔwo 5:14, 21) The New English Bible (NE) gblɔ le Mose I, 4:7 me be: “Nuvɔ̃ nye gbɔgbɔ vɔ̃ si be ɖe ʋɔtrua nu,” eye wòƒo nu tso nuvɔ̃ ŋu abe gbɔgbɔ vɔ̃ɖie wònye be ɖe Kain ƒe ʋɔtru nu ene. Gake míenyae be nuvɔ̃ menye gbɔgbɔmeme o; nenema ke nu ƒoƒo tso gbɔgbɔ kɔkɔea ŋu abe ame ene mena wòzu gbɔgbɔmeme o.
Nenema ke le Yohanes I, 5:6-8 (NE) me la, menye gbɔgbɔ la koe o ke boŋ wogblɔ be “tsi la, kple ʋu la” hã nye “ɖasefowo.” Gake eme kɔ ƒã be tsi kple ʋu menye amewo o, eye nenema ke gbɔgbɔ kɔkɔe la hã menye ame o.
Nusi wɔ ɖeka kple esiae nye alesi Biblia zãa nya “gbɔgbɔ kɔkɔe” la le mɔ si mefia ame o nu, abe le etsɔtsɔ sɔ kple tsi kple dzo me ene. (Mateo 3:11; Marko 1:8) Wode dzi ƒo na amewo be gbɔgbɔ kɔkɔea nayɔ wo fũ ɖe esi aha yeye nayɔ wo me fũ teƒe. (Efesotɔwo 5:18) Woƒo nu tso wo ŋu be gbɔgbɔ kɔkɔea yɔ wo me fũ abe alesi nɔnɔme nyui siawo siwo nye nunya, xɔse, kple dzidzɔ yɔa wo mee ene. (Dɔwɔwɔwo 6:3; 11:24; 13:52) Eye le Korintotɔwo II, 6:6 me la, woyɔ gbɔgbɔ kɔkɔea ɖe nɔnɔme vovovowo dome. Nyagbɔgblɔ mawo mabɔ nenema nenye ame ŋutɔŋutɔe gbɔgbɔ kɔkɔea nye o.
Azɔ hã togbɔ be Biblia ƒe mawunyakpukpui aɖewo gblɔ be gbɔgbɔ kɔkɔea ƒoa nu hã la, mawunyakpukpui bubuwo ɖee fia be ewɔ esia ŋutɔŋutɔ to amewo alo mawudɔlawo dzi. (Mateo 10:19, 20; Dɔwɔwɔwo 4:24, 25; 28:25; Hebritɔwo 2:2) Gbɔgbɔa ƒe dɔwɔwɔ le esiawo gome la le abe alesi radioŋusẽ tsɔa gbedasi tso ame aɖe gbɔ yia ame bubu gbɔ le didiƒe ʋĩ ene.
Wogblɔ le Mateo 28:19 me be “le . . . gbɔgbɔ kɔkɔe la ƒe ŋkɔa me.” Gake menye ɣesiaɣie nya “ŋkɔ” fiaa ameŋkɔ le Helagbe me alo le Eʋegbe me o. Ne míegblɔ be “le sea ƒe ŋkɔ me” la, menye ame aɖeke ƒe nya gblɔm míele o. Nusi sea le tsitre ɖi na, esi nye eƒe ŋusẽ ŋu nya gblɔm míele. Robertson ƒe Word Pictures in the New Testament gblɔ be: “Ŋkɔ [onoma] la zazã hena ŋusẽ alo dziɖuŋusẽ nye nusi bɔ le afisia le Septuagint kple Biblia-gbalẽ siwo woŋlɔ ɖe blemagbalẽ dzi me.” Eyata nyɔnyrɔ̃xɔxɔ ‘ɖe gbɔgbɔ kɔkɔea ƒe ŋkɔ me’ la fia sidzedze gbɔgbɔa ƒe ŋusẽ be Mawu gbɔe wòtso eye wòwɔa Mawu ƒe lɔlɔ̃nu.
“Nyaxɔɖakɔla” La
YESU yɔ gbɔgbɔ kɔkɔea be enye “nyaxɔɖakɔla” eye wògblɔ be afia nu, afia mɔ, eye wòaƒo nu. (Yohanes 14:16, 26; 16:13) Helagbe me nya si wòzã na “nyaxɔɖakɔla” [kpeɖeŋutɔ] ye nye pa·raʹkle·tos esi nye ŋkɔnya si nye ŋutsuƒometɔ. Eyata esime Yesu ƒo nu tso nusi kpeɖeŋutɔ la awɔ ŋu la, ezã ŋkɔnyateƒenɔnya si wozãna na nusiwo tso ŋutsuƒome me la. (Yohanes 16:7, 8) Gake esi wozã Helagbe me nya si wozãna na gbɔgbɔ (pneuʹma) la, ŋkɔnyateƒenɔnya si wozãna na nuwo, ke menye esi wozãna na ame ye wozã nɛ o eye esia sɔ.
Biblia-gɔmeɖela siwo nye Mawuɖekaetɔ̃dzixɔselawo dometɔ geɖe ɣlaa nyateƒe sia, abe alesi Katolikotɔwo ƒe New American Bible lɔ̃ ɖe edzie ku ɖe Yohanes 14:17 ŋu ene be: “Helagbe me nya si wozã na ‘Gbɔgbɔ’ la nye esi wozãna na nuwo, eye esime le Eŋlisigbe me la, míezãna ŋkɔnyateƒenɔnya siwo wozãna na amewo (‘he,’ ‘his,’ ‘him’) la, Helagbe me MSS [Biblia-gbalẽ siwo woŋlɔ kple asi] ƒe akpa gãtɔ zã ‘it’ [ŋkɔnyateƒenɔnya si wozãna na nuwo le Eŋlisigbe me].”
Eyata esi Biblia zã ŋkɔnyateƒenɔnya si wozãna na ŋkɔnya siwo nye atsuƒomewo tɔ le pa·raʹkle·tos gome le Yohanes 16:7, 8 me la esia wɔ ɖeka kple gbeŋutise me sewo, ke menye nufiafia aɖe me ɖem wòle o.
Menye Mawuɖekaetɔ̃ ƒe Akpa Aɖeke O
AGBALẼ vovovowo lɔ̃ ɖe edzi be Biblia meda asi ɖe nukpɔsusu si nye be gbɔgbɔ kɔkɔea nye Mawuɖekaetɔ̃ la ƒe ame etɔ̃lia dzi o. Le kpɔɖeŋu me:
The Catholic Encyclopedia: “Míekpɔ asitɔdzinya aɖeke si me kɔ le Nubabla Xoxoa me ku ɖe Ame Etɔ̃lia ŋu o.”
Katolikotɔwo ƒe mawuŋutinunyala Fortman: “Yudatɔwo mebu gbɔgbɔ la kpɔ gbeɖe be enye ame o; eye ɖaseɖiɖi si ŋu kpeɖodzi sẽŋu le la ƒe ɖeke meli si fia be nukpɔsusu sia le Nubabla Xoxoa me nuŋlɔlawo dometɔ aɖeke si o. . . . Woƒoa nu tso Gbɔgbɔ Kɔkɔea ŋu zi geɖe le [Nyanyuie] Siwo Ði Wo Nɔewo me kple le Dɔwɔwɔwo me abe Mawu ƒe ŋusẽ alo ŋutete ene.”
New Catholic Encyclopedia: “Edze ƒã be N[ubabla] X[oxoa] mebu Mawu ƒe gbɔgbɔ be enye ame o . . . Mawu ƒe gbɔgbɔa koe nye Mawu ƒe ŋusẽ. Ne woƒo nu tso eŋu ɣeaɖewoɣi abe nusi to vovo na Mawu ene la, Yahweh ƒe gbɔgbɔ si le dɔ wɔm le gota gome tae.” Egblɔ hã be: “N[ubabla] Y[eyea] me mawunyakpukpuiwo ƒe akpa gãtɔ ɖea Mawu ƒe gbɔgbɔa fiana abe nane ene, menye abe ame aɖe ene o; esia dze vevietɔ le nusiwo sɔ kple wo nɔewo siwo le gbɔgbɔ la kple Mawu ƒe ŋusẽ dome la me.”—Míawoe te gbe ɖe edzi.
A Catholic Dictionary: “Zi geɖe la, Nubabla Yeyea, abe Xoxoa ene, ƒoa nu tso gbɔgbɔ la ŋu abe Mawu ƒe dɔwɔŋusẽ alo ŋutete ene.”
Eyata Yudatɔwo alo Kristotɔ gbãtɔwo mebu gbɔgbɔ kɔkɔea be enye Mawuɖekaetɔ̃ ƒe akpa aɖe o. Nufiafia ma va dzɔ le ƒe alafa geɖe megbe. Abe alesi A Catholic Dictionary de dzesie ene la: “Aɖaŋuɖotakpekpe aɖe si wowɔ le Aleksandria le ƒe 362 me la mee wobe woaxɔ Ame etɔ̃lia la ade eme le kokoko . . . eye woɖo kpe edzi mlɔeba le Konstantinople Aɖaŋuɖotakpekpea me le ƒe 381 me”—esia nye le abe ƒe alafa etɔ̃ kple afã le esi gbɔgbɔ kɔkɔea yɔ nusrɔ̃lawo me taŋ le Pentekoste-ŋkekea dzi megbe!
Ao, gbɔgbɔ kɔkɔea menye ame o eye menye Mawuɖekaetɔ̃ aɖeke ƒe akpa aɖeke o. Gbɔgbɔ kɔkɔea ye nye Mawu ƒe dɔwɔŋusẽ si wòzãna tsɔ wɔa eƒe lɔlɔ̃nui. Mesɔ kple Mawu o ke boŋ ele esi me ɣesiaɣi eye wòbɔbɔ ɖe eyama te.
[Nya si ɖe dzesi si le axa 22]
“Zi geɖe la, Nubabla Yeyea, abe Xoxoa ene, ƒoa nu tso gbɔgbɔ la ŋu abe Mawu ƒe dɔwɔŋusẽ alo ŋutete ene.” —A Catholic Dictionary
[Nɔnɔmetata siwo le axa 21]
Gbɔgbɔ kɔkɔea dze ɣeaɖeɣi abe akpakpa ene. Edze ɣebubuɣi abe dzoƒaɖewo ene—medze abe ame ene kpɔ gbeɖe o