Ke Mawuɖekaetɔ̃ ƒe “Kpeɖodzi Mawunyakpukpuiwo” Ya Ðe?

WOGBLƆNA be kpeɖodzi si da asi ɖe Mawuɖekaetɔ̃ la dzi dze le Biblia me mawunyakpukpui aɖewo me. Gake ne míele mawunyakpukpui mawo xlẽm la, ele be wòanɔ susu me na mí be Biblia kple ŋutinya me ɖaseɖiɖiwo meda asi ɖe Mawuɖekaetɔ̃a dzi o.

Ele be míatsɔ nufiafia si toa mɔ ɖeka le Biblia la katã me si dze le nya siwo ƒo xlã mawunyakpukpui ma me la ase Biblia ƒe nyayɔyɔ ma mee. Zi geɖe la, nya si ŋu kpukpui siwo ƒo xlãe ƒo nu le la kɔa mawunyakpukpui ma ƒe gɔmesese vavãtɔ me.

Etɔ̃ le Ðeka Me

AGBALẼ si nye New Catholic Encyclopedia yɔ mawunyakpukpui mawo tɔgbe etɔ̃ gake elɔ̃ ɖe edzi be: “Womefia Mawuɖekaetɔ̃ Kɔkɔea ƒe nufiafia le N[ubabla] X[oxoa] me o. Le N[ubabla] Y[eyea] me la, eƒe ɖaseɖiɖi xoxotɔ kekeake dze le Paulo ƒe lɛtawo me, vevietɔ le Kor II, 13.13 [kpukpui 14 lia le Biblia aɖewo me], kple Kor I, 12.4-6 me. Le Nyanyuieawo me la, Mawuɖekaetɔ̃ ƒe ɖaseɖiɖi dze kɔte le mawutsidenamenya siwo le Mt 28.19 me ko.”

Le kpukpui mawo me la, woɖo “ame” etɔ̃ mawo ɖe ɖoɖo si gbɔna la nu le The New Jerusalem Bible me. Korintotɔwo II, 13:13 (14) ƒo ame etɔ̃awo nu ƒu ale: “Aƒetɔ Yesu Kristo ƒe amenuveve, Mawu ƒe lɔlɔ̃ kple Gbɔgbɔ Kɔkɔe la ƒe hamenɔnɔ nenɔ anyi kple mi katã.” Korintotɔwo I, 12:4-6 gblɔ be: “Nunana ƒomevi vovovo geɖewo li, gake Gbɔgbɔ ma kee ɣesiaɣi; mɔ vovovo geɖe siwo nu woasubɔ le la li, gake Aƒetɔ ma kee ɣesiaɣi. Dɔwɔwɔ ƒomevi vovovo geɖewo li, gake le amesiame me la, Mawu ma kee le dɔ wɔm le wo katã me.” Eye Mateo 28:19 xlẽ be: “Eyata miheyi ɖawɔ dukɔwo katã nusrɔ̃lawoe; mide mawutsi ta na wo le Fofo la kple Vi la kple Gbɔgbɔ Kɔkɔe la ƒe ŋkɔa me.”

Ðe kpukpui mawo le gbɔgblɔm be Mawu, Kristo, kple gbɔgbɔ kɔkɔea nye Mawuɖekaetɔ̃ ƒe Mawu eye be wonye nu ma ƒomevi ke, hesɔ le ŋusẽ, kple mavɔmavɔtɔnyenye mea? Ao, womele gbɔgblɔm nenema o, abe alesi ame etɔ̃, abe Mensa, Anani kple Do ene yɔyɔ mefia be wonye ame etɔ̃ le ame ɖeka mee o ene.

McClintok kple Strong ƒe Cyclopedia of Biblical, Theological and Ecclesiastical Literature lɔ̃ ɖe edzi be “ɖeko [nuyɔyɔ sia ƒomevi] ɖo kpe edzi be nu etɔ̃e woyɔ, . . . gake eya ɖeɖe meɖo kpe edzi be nu etɔ̃awo katã le Mawu ƒe nɔnɔme me eye Mawu ƒe bubu ma ke le wo katã ŋu kokoko o.”

Togbɔ be agbalẽ ma de Mawuɖekaetɔ̃ dzi hã la, egblɔ tso Korintotɔwo II, 13:13 (14) ŋu be: “Menye nusi sɔ be míaƒo nya ta be ŋusẽ si sɔ kple wo nɔewo le wo si o, alo be nɔnɔme ma ke le wo si o.” Eye egblɔ tso Mateo 28:18-20 ŋu be: “Ne míetsɔ nusi mawunyakpukpui sia ŋutɔ gblɔ wɔ dɔe la, maɖo kpe nu etɔ̃ siwo woyɔ la ƒe amenyenye alo woƒe tasɔsɔ alo mawunyenye dzi bliboe o.”

Esime wonyrɔ̃ Yesu ɖe tsi me la, woƒo nu tso Mawu, Yesu, kple gbɔgbɔ kɔkɔea ŋu le mawunyakpukpui mawo ke me. Yesu “[kpɔ] Mawu ƒe gbɔgbɔ la le ɖiɖim abe akpakpa ene va edzi.” (Mateo 3:16) Gake esia mele fiafiam be wo ame etɔ̃a nye nu ɖeka o. Woyɔ Abraham, Isak kple Yakob ŋkɔ ɖekae zi geɖe, gake esia mewɔe be wozu ame ɖeka o. Woyɔ Petro, Yakobo, kple Yohanes ŋkɔ ɖekae, gake ema hã mena wozu ame ɖeka o. Gawu la, Mawu ƒe gbɔgbɔ ɖi ɖe Yesu dzi le eƒe nyɔnyrɔ̃xɔxɔ me, si ɖee fia be wometsɔ gbɔgbɔ si ami na Yesu o vaseɖe ɣemaɣi hafi. Esi nya la le alea la, aleke wòate ŋu anye Mawuɖekaetɔ̃ ƒe akpa aɖee le afisi wo kple gbɔgbɔ kɔkɔea nye ɖeka le ɣesiaɣi?

Teƒe bubu si woƒo nu tso wo ame etɔ̃a ŋu le ɖekae la dze le Biblia gɔmeɖeɖe xoxo aɖewo me le Yohanes I, 5:7. Gake agbalẽnyalawo lɔ̃ ɖe edzi be nya siawo menɔ Biblia me tsã o ke boŋ emegbe kura hafi wotsɔ wo va kpee. Egbegbe gɔmeɖeɖe geɖe dzoa kpo to kpukpui sia si wokpa kpee la ta eye esia nye nusi sɔ.

“Kpeɖodzimawunyakpukpui” bubuwo ku ɖe ƒomedodo si le ame eve—Fofo la kple Yesu—dome ŋu. Mina míalé ŋku ɖe wo dometɔ aɖewo ŋu.

“Mía kple Fofo la Ðekae Míele”

WOYƆ mawunyakpukpui ma si le Yohanes 10:30 me la zi geɖe be woatsɔ ade Mawuɖekaetɔ̃a dzie, togbɔ be womeyɔ ame etɔ̃lia aɖeke ŋkɔ le afima o hã. Gake Yesu ŋutɔ ɖe nusi gblɔm wòle be ye kple Fofo la “ɖekae” yewole la fia. Edo gbe ɖa na Fofo la le Yohanes 17:21, 22 me be yeƒe nusrɔ̃lawo “[nazu] ɖeka, sigbe alesi wò, Fofo, nèle menye, eye nye hã mele mewò ene, bena woawo hã woazu ɖeka le mía me, . . . bena woazu ɖeka, sigbe alesi míawo míele ɖeka ene.” Ðe Yesu nɔ gbe dom ɖa be yeƒe nusrɔ̃lawo katã nazu ame ɖeka pɛ koa? Ao, edze ƒã be ɖe Yesu nɔ gbe dom ɖa be woawɔ ɖeka le tamesusu kple tameɖoɖo me, abe alesi wo kple Mawu wole ene.—Kpɔ Korintotɔwo I, 1:10 hã.

Paulo gblɔ le Korintotɔwo I, 3:6, 8 me be: “Nye la medo nu, eye Apolo de tsii, . . . Ke amesi le nu dom kple amesi le tsi demi la wo kpakple eve le ɖeka.” Paulo mele gbɔgblɔm be ye kple Apolo yewonye ame eve le ame ɖeka me o; ele fiafiam be yewowɔ ɖeka le tameɖoɖo me. Helagbe me nya si Paulo zã le afisiae hena “ɖeka” (hen) la nye esi wozãna na nuwo, le egbɔgblɔ tẽ nu la, wonye “[nu] ɖeka,” si fia ɖekawɔwɔ le dɔwɔwɔ aduadu me. Nya ma kee Yesu zã le Yohanes 10:30 me tsɔ ƒo nu le ƒomedodo si le wo kple Fofoa dome la ŋu. Nya ma ke Yesu gazã le Yohanes 17:21, 22 me. Eyata esime wòzã nya “ɖeka” (hen) le esiawo gome la, tamesusu kple taɖodzinu ƒe ɖekawɔwɔ ŋue wòle nu ƒom le.

Ku ɖe Yohanes 10:30 ŋu la, John Calvin (si nye Mawuɖekaetɔ̃dzixɔsela) gblɔ le Commentary on the Gospel According to John me be: “Blematɔwo zã mawunyakpukpui sia ɖe mɔ gbegblẽ nu be woatsɔ aɖo kpe edzie be Kristo . . . kple Fofo la nye nu ɖeka ƒomevi. Elabena Kristo meʋli nya tso nusi ƒomevi wonye la ƒe ɖekanyenye ŋu o, ke boŋ ɖekawɔwɔ si le wo kple Fofo la dome ŋue wòƒo nu le.”

Le nya siwo le kpukpui siwo kplɔ Yohanes 10:30 ɖo tututu me la, Yesu ʋli nya ŋusẽtɔe be yeƒe nyawo mefia be yenye Mawu o. Ebia Yudatɔ siwo ƒo nya ta ma vodadatɔe eye wodi be yewoaƒu kpee la be: “Nukatae miele fɔ bum be megblɔ busunya le esi nye, amesi ŋu Fofo la kɔ eye wòdɔ ɖe xexeame la, megblɔ be ‘menye Mawuvi’?” (Yohanes 10:31-36, NE) Ao, Yesu megblɔ be yenye Mawu Vi la o ke boŋ be yenye Mawu ƒe Vi.

Ðe ‘Wòtsɔ Eɖokui Sɔ Kple Mawua’?

WOGBLƆNA be ŋɔŋlɔ bubu si de Mawuɖekaetɔ̃ la dzie nye Yohanes 5:18. Egblɔ be Yudatɔwo (abe alesi wòle Yohnanes 10:31-36 mee ene) di be yewoawu Yesu le esi “[wòyɔ] Mawu hã be eya ŋutɔ Fofoa, eye wòtsɔ eya ŋutɔ ɖokui ɖo Mawu ŋu” ta.

Gake amekawoe gblɔ be Yesu nɔ eɖokui tsɔm nɔ sɔsɔm kple Mawu? Menye Yesue o. Eʋli eɖokui ta tso aʋanutsotso sia me le kpukpui si kplɔe ɖo laa (19) me be: “Yesu ɖo nutsotso sia ŋu be: . . . ’Vi la mate ŋu awɔ naneke ɖe eɖokui si o; nusi wòkpɔ Fofoa wòwɔna koe wòate ŋu awɔ.’”—JB.

To esia gbɔgblɔ dzi la, Yesu ɖee fia Yudatɔwo be yemesɔ kple Mawu o eye le esia ta yemate ŋu awɔ naneke le ye ɖokui si o. Ðe míate ŋu asusui be ame aɖe si sɔ kple Mawu Ŋusẽkatãtɔ la agblɔ be ‘yemate ŋu awɔ naneke le ye ɖokui si oa’? (Tsɔe sɔ kple Daniel 4:31, 32.) Enye nusi le be míade dzesii be le nya siwo ƒo xlã Yohanes 5:18 kple 10:30 siaa me la, Yesu ʋli eɖokui ta tso aʋatsonutsotso siwo Yudatɔ siwo, abe Mawuɖekaetɔ̃dzixɔselawo ene, nɔ nyataƒonya gbegblẽwo wɔm la si me!

‘Esɔ Kple Mawua’?

KATOLIKOTƆWO ƒe Douay Version (Dy), ƒe 1609 tɔ gblɔ tso Yesu ŋu le Filipitɔwo 2:6 me be: “Amesi togbɔ be Mawu ƒe nɔnɔme mee wònɔ hã la, mebui amebabae be yeasɔ kple Mawu o.” Alesi King James Version, (KJ) ƒe 1611 tɔ hã gblɔe ɖi ema ŋutɔ. Ame aɖewo zãa gɔmeɖeɖe siawo tɔgbe kokoko be woatsɔ ade nukpɔsusu si nye be Yesu sɔ kple Mawu la dzie. Gake de dzesi alesi gɔmeɖeɖe bubuwo ɖe kpukpui sia gɔmee:

1869: “amesi, esi wònɔ Mawu ƒe nɔnɔme me la, mebui be enye nusi dzi yeƒe asi nasu sesẽe be yeanɔ tasɔsɔ me kple Mawu o.” The New Testament, si gɔme G. R. Noyes ɖe.

1965: “Eya—amesi nɔ Mawu ƒe nɔnɔme ŋutɔŋutɔ me!—mewɔ eɖokui be yesɔ kple Mawu kakaɖeɖokuidzitɔe o.” Das Neue Testament, Friedrich Pfäfflin ƒe gɔmeɖeɖe si me wogbugbɔ to.

1968: “amesi, togbɔ be enɔ Mawu ƒe nɔnɔme me hã la, mebu sɔsɔ kple Mawu be enye nusi yeatsɔ nuhaha awɔ ye ɖokui tɔe o.” La Bibbia Concordata.

1976: “Mawu ƒe nɔnɔme nɔ esi ɣeawokatãɣi, gake mesusu be yeadze agbagba akpasesẽtɔe asɔ kple Mawu o.” Today’s English Version.

1984: “amesi, togbɔ be enɔ Mawu ƒe nɔnɔme me hã la, mebu nuʋiʋli ŋu be, ele be yeasɔ kple Mawu o.” New World Translation of the Holy Scriptures.

1985: “Amesi, togbɔ be enɔ Mawu ƒe nɔnɔme me hã la, mebu tasɔsɔ kple Mawu be enye nusi dzi yeƒe asi nasu sesẽe o.” The New Jerusalem Bible.

Gake ame aɖewo gblɔna be gɔmeɖeɖe siawo siwo sɔ wu la fia be (1) Yesu nɔ tasɔsɔ me kple Mawu xoxo gake medi be yeaku ɖe ema ŋu o alo be (2) mehiã be wòadi be yeƒe asi naka tasɔsɔ dzi o elabena ele esi xoxo.

Le esia gome la, Ralph Martin gblɔ le The Epistle of Paul to the Philippians me ku ɖe Helagbe si me woŋlɔe ɖo gbã la ŋu be: “Gake enye nusi ŋu woabia nya le be ɖe dɔwɔnya la ƒe gɔmesese ate ŋu agli le eƒe gɔmesese ŋutɔŋutɔ si nye be ‘woaxɔ sesẽe’, ‘woaʋli ŋusẽtɔe’ nu be wòazu ‘woalé nu me ɖe asi sesĩe’ hã.” The Expositor’s Greek Testament hã gblɔ be: “Míekpɔ mawunyakpukpui aɖeke si me ἁρπάζω [har·paʹzo] alo nya siwo do tso eƒe agunu me ƒe gɔmesese nye ‘woaxɔ nane awɔ ame tɔe,’ ‘woalé nane me ɖe asi’ o. Le go ɖesiaɖe me la, edze abe ɖe egɔmeɖeɖee nye ‘woaxɔ sesẽe,’ ‘woaʋli ŋusẽtɔe’ ene. Eyata menye nusi ŋu mɔɖeɖe le be nya si nye ‘asi naka’ la naɖiɖi tso eƒe gɔmesese ŋutɔŋutɔ dzi ava zu nane si to vovo kura si nye be ‘woalé nu me ɖe asi sesĩe’ o.”

Edze ƒã le nya siwo dze do ŋgɔ me be gɔmeɖeɖe aɖewo abe Douay kple King James ene gɔmeɖelawo le gbeŋutise me sewo trom bene yewoatsɔ ade Mawuɖekaetɔ̃ la dzie. To vovo sãa na alesi míagblɔ be Yesu susu be esɔ be ye kple Mawu yewoasɔ la, ne míetsɔ susumekɔkɔe xlẽ Helagbe si le Filipitɔwo 2:6 me la, ele be wòafia nusi tsi tre ɖe ema ŋu kura na mí be Yesu mesusu be esɔ o.

Nya siwo ƒo xlã kpukpui mawo (3-5, 7, 8 Dy) na alesi wòle be woase kpukpui 6 lia mee la dze. Wode dzi ƒo na Filipitɔwo be: “Le ɖokuibɔbɔ me la, amesiame nebu ame bubuwo be wonyo wu ye ŋutɔ.” Paulo yi edzi azɔ zã Kristo abe kpɔɖeŋu si ɖe dzesi le nɔnɔme sia ɖeɖefia me ene be: “Tamesusu sia si nɔ Kristo Yesu hã me nenɔ mia me.” “Tamesusu” ka? Be ‘woabui be menye amebaba be yeasɔ kple Mawu o’ yea? Ao, ema anye nusi tututu tsi tre ɖe nusi gblɔm wòle la ŋu! Ke boŋ Yesu, amesi ‘bui be Mawu nyo wu ye ŋutɔ’ la mabui gbeɖe be “enye nusi dzi yeƒe asi nasu sesẽe be yeanɔ tasɔsɔ me kple Mawu o,” ke boŋ “ebɔbɔ eɖokui ɖe anyi, eye wòɖo to yiɖase ku me.”

Kakaɖedzitɔe la, ema mate ŋu anɔ nu ƒom tso Mawu Ŋusẽkatãtɔ la ƒe akpa aɖeke ŋu o. Yesu Kristo, amesi nye nusi ŋu nya Paulo gblɔ le afisia ƒe kpɔɖeŋu deblibo—si nye asixɔxɔ si le ɖokuibɔbɔ ɖe ame ƒe Gãtɔ kple Wɔla, Yehowa Mawu te la—ŋue wòle nu ƒom le.

“Menye”

GƆMEÐEÐE geɖewo, abe The Jerusalem Bible ene, na Yesu gblɔ le Yohanes 8:58 me be: “Hafi Abraham nanɔ anyi la, Menye.” Ðe Yesu nɔ nu fiam be woyɔ dzesideŋkɔ si nye “Menye” na ye abe alesi Mawuɖekaetɔ̃fialawo tea tɔ ɖe edzie enea? Eye abe alesi wogblɔnɛ ene la, ɖe esia fia be enye Yehowa si le Hebri Ŋɔŋlɔawo me, le esi King James Version gblɔ le Mose II, 3:14 me be: “Mawu gblɔ na Mose be, NUSI MENYE LAE MENYE” ta?

Le Mose II, 3:14 (KJ) me la, wozã nyagbɔgblɔ “MENYE” abe dzesideŋkɔ ene na Mawu be woatsɔ afia be enɔ anyi ŋutɔŋutɔ eye be awɔ nusi ƒe ŋugbe wòdo. The Pentateuch and Haftorahs, si me Ðk. J. H. Hertz to, gblɔ tso nyagbɔgblɔ sia ŋu be: “Le Israel-vi siwo nɔ kluvinyenye me gome la, eƒe gɔmesese anye, ‘Togbɔ be Meɖe Eƒe ŋusẽ fia mi haɖe o hã la, Ele esia wɔ ge; Enye mavɔmavɔtɔ eye Aɖe mi kokoko.’ Egbegbetɔ geɖewo dzea Rashi [Fransetɔ Biblia kple Talmud numeɖela aɖe] ƒe nukpɔsusu yome le [Mose II, 3:14] gɔme ɖeɖe me be ‘Manye nusi manye.’”

Nyagbɔgblɔ si wozã le Yohanes 8:58 me to vovo sãa tso esi wozã le Mose II, 3:14 me gbɔ. Yesu mezãe abe ŋkɔ alo dzesideŋkɔ ene o ke boŋ ezãe tsɔ ɖe eƒe anyinɔnɔ do ŋgɔ na amegbetɔzuzu mee. Eyata de dzesi alesi Biblia gɔmeɖeɖe bubuwo ɖe Yohanes 8:58 gɔmee:

1869: “Tso ɣeyiɣi si do ŋgɔ na esime Abraham nɔ anyi la, menɔ anyi.” The New Testament, si gɔme G. R. Noyes ɖe.

1935: “Menɔ anyi hafi wodzi Abraham!” The Bible—An American Translation, si gɔme J. M. P. Smith kple E. J. Goodspeed ɖe.

1965: “Hafi woava dzi Abraham la, menye amesi menye la xoxo.” Das Neue Testament, si gɔme Jörg Zink ɖe.

1981: “Menɔ agbe hafi wodzi Abraham!” The Simple English Bible.

1984: “Hafi Abraham nadzɔ la, menɔ anyi.” New World Translation of the Holy Scriptures.

Eyata susu si tututu le Helagbe me nya si wozã le afisia mee nye be Yesu, Mawu ƒe “ŋgɔgbevi” si wòwɔ la nɔ anyi ɣeyiɣi didi aɖe do ŋgɔ hafi Abraham dzɔ.—Kolosetɔwo 1:15; Lododowo 8:22, 23, 30; Nyaɖeɖefia 3:14.

Le afisia hã nya siwo ƒo xlãe la ɖee fia be esiae nye gɔmesese nyuitɔ. Le ɣeyiɣi sia me la, Yudatɔwo di be yewoaƒu kpe Yesu le alesi wògblɔ be ‘yekpɔ Abraham’ togbɔ be, abe alesi wogblɔe ene la, mexɔ ƒe 50 haɖe o hã. (Kpukpui 57 lia) Nusi ko wòle be woakpɔ mɔ na be Yesu atsɔ aɖo eŋue nye be wòagblɔ nyateƒe si ku ɖe ƒe si wòxɔ ŋu. Eyata egblɔ na wo abe alesi wòle ene be “[yenɔ] agbe hafi wodzi Abraham!”—The Simple English Bible.

“Nya lae Nye Mawu”

YOHANES 1:1 xlẽ le King James Version me be: “Le gɔmedzedzea me Nya la nɔ anyi, eye Nya la nɔ anyi kple Mawu, eye Nya lae nye Mawu.” Mawuɖekaetɔ̃fialawo gblɔna be esia fia be “Nya la” (Helagbe, ho loʹgos) si va anyigba dzi abe Yesu Kristo ene lae nye Mawu Ŋusẽkatãtɔ la ŋutɔ.

Gake de dzesii be le afisia hã la, nya siwo ƒo xlãe la na gɔmeɖokpe si dzi woanɔ te ɖo hena gɔmesese si sɔ la. King James Version gɔ̃ hã gblɔ be “Nya la nɔ anyi kple Mawu.” (Míawoe te ɖe edzi.) Ame aɖe si li “kple” ame bubu la mate ŋu aganye ame bubu ma o. Le ɖekawɔwɔ me kple esia la Journal of Biblical Literature, si me Yesutɔ Joseph A. Fitzmyer to, de dzesii be ne woɖe Yohanes 1:1 ƒe nuwuwu gɔme be wòafia be Mawu “la” la, “ekema [esia] atsi tre ɖe nya la ƒe akpa si do ŋgɔ nɛ,” si gblɔ be Nya la nɔ anyi kple Mawu “la ŋu.”

De dzesi alesi gɔmeɖeɖe bubuwo ɖe kpukpuia ƒe akpa sia gɔmee la hã:

1808: “eye nya la nye mawu aɖe.” The New Testament in an Improved Version, Upon the Basis of Archbishop Newcome’s New Translation: With a Corrected Text.

1864: “eye mawu aɖe enye nya la.” The Emphatic Diaglott, gɔmeɖeɖe si me woɖe nyawo gɔme le ɖekaɖekae, si gɔme Benjamin Wilson ɖe.

1928: “eye Nya la nye ame aɖe si le Mawu ƒe nɔnɔme me.” La Bible du Centenaire, L’Evangile selon Jean, si gɔme Maurice Goguel ɖe.

1935: “eye Nya la nye mawumeme.” The Bible—An American Translation, si gɔme J. M. P. Smith kple E. J. Goodspeed ɖe.

1946: “eye Mawu ƒe nɔnɔme mee Nya la nɔ.” Das Neue Testament, si gɔme Ludwig Thimme ɖe.

1950: “eye Nya la nye mawu aɖe.” New World Translation of the Christian Greek Scriptures.

1958: “eye Nya la nye Mawu aɖe.” The New Testament, si gɔme James L. Tomanek ɖe.

1975: “eye mawu aɖe (alo, amesi le Mawu ƒe nɔnɔme me) enye Nya la.” Das Evangelium nach Johannes, si gɔme Siegfried Schulz ɖe.

1978: “eye amesi ɖi Mawu ye nye Logos la.” Das Evangelium nach Johannes, si gɔme Johannes Schneider ɖe.

Hela ŋkɔnya the·osʹ (mawu) ƒe yɔyɔ evee le Yohanes 1:1 me. Gbãtɔ ku ɖe Mawu Ŋusẽkatãtɔ si gbɔ Nya la nɔ ŋu (“eye Nya la [loʹgos] li kple Mawu [the·osʹ yɔyɔ ƒomevi aɖe]”). Nya ton (la) si nye Helagbe me asitɔnudzinyakui si hã tɔa asi nusi le eɖokui si dzi tẽ, si nye Mawu Ŋusẽkatãtɔ le go sia me la, (“eye Nya la li kple Mawu [la]”), nya ton siae do ŋgɔ na the·osʹ gbãtɔ sia.

Gake asitɔnudzinyakui aɖeke medo ŋgɔ na the·osʹ evelia si le Yohanes 1:1 me o. Eyata ne woaɖe egɔme le alesi wogblɔ nya la ŋutɔŋutɔe nu la, axlẽ be: “eye mawu nye Nya la.” Gake míekpɔe be gɔmeɖeɖe geɖewo ɖe the·osʹ evelia sia (si nye nɔnɔmefiaŋkɔnya) gɔme be “mawumeme,” “amesi ɖi Mawu,” alo “mawu aɖe.” Nuka dzie wonɔ te ɖo ɖe egɔme alea?

Asitɔnudzinyakui si fiaa asi nu tẽ (esi nye nya “la”) nɔ Koine Helagbe me, gake asitɔnudzinyakui si mefiaa asi nu tẽ o (esi nye “aɖe”) ya menɔ eme o. Eyata ne asitɔnudzinyakui si fiaa asi nu tẽ medo ŋgɔ na nɔnɔmefiaŋkɔnya la o la, ekema woase egɔme be enye nusi dzi womele asi tɔmee tẽ o, le alesi nya si ƒo xlãe la le nu.

Journal of Biblical Literature gblɔ be le nyagbɔgblɔ “siwo me nɔnɔmefiaŋkɔnya si ŋu asitɔnudzinyakui mekpe ɖo o la do ŋgɔ na dɔwɔnya la me la, eƒe gɔmesese koŋ kuna ɖe nɔnɔme si le nusi ŋu wole nu ƒom le si la ŋu.” Abe alesi Journal la de dzesii ene la, esia ɖee fia be woate ŋu atsɔ loʹgos la asɔ kple mawu aɖe. Egblɔ tso Yohanes 1:1 hã ŋu be: “Nɔnɔmefiaŋkɔnya la ƒe ameɖɔɖɔŋusẽ dze ƒã ale gbegbe be womate ŋu abui be ŋkɔnya [the·osʹ] la dzie wole asi tɔmee o.”

Eyata Yohanes 1:1 le gbe tem ɖe Nya la ƒe nɔnɔme dzi be enye “mawumeme,” “amesi ɖi Mawu,” alo “mawu aɖe,” ke menye be enye Mawu Ŋusẽkatãtɔ o. Esia wɔ ɖeka kple Biblia ƒe akpa susɔeawo, siwo ɖee fia be Yesu si woyɔ le afisia be “Nya la” le eƒe wɔƒe henye Mawu ƒe Nyanuɖela, eye wònye Mawu tevi si ɖoa to, amesi Mawu Ŋusẽkatãtɔ Si Kɔkɔ Wui la dɔ ɖo ɖe anyigba dzi.

Biblia ƒe kpukpui bubu geɖewo li siwo me gɔmeɖelawo katã kloe tsɔa asitɔnudzinyakui si nye “aɖe” kpena ɖe nya la ŋu ɣesiaɣi ne wole Helagbe me nya mawo tɔgbe gɔme ɖem. Le kpɔkpeŋu me, le Marko 6:49 me la, esime nusrɔ̃lawo kpɔ Yesu wònɔ tsi dzi zɔm la, King James Version gblɔ be: “wobu xa be gbɔgbɔ aɖee.” Le Koine Helagbea me la, nya “aɖe” aɖeke medo ŋgɔ na “gbɔgbɔ” la o. Gake gɔmeɖeɖewo katã kloe le gbegbɔgblɔ bubuwo me tsɔa “aɖe” kpenɛ be woana gɔmeɖeɖea nasɔ ɖe nya si gblɔm wole la nu. Nenema ke, esi Yohanes 1:1 ɖee fia be Nya la kple Mawue nɔ anyi ta la, mate ŋu anye Mawu o ke boŋ enye “mawu aɖe,” alo “amesi le Mawu ƒe nɔnɔme me.”

Joseph Henry Thayer si nye mawuŋutinunyala kple agbalẽnyala si kpɔ gome le American Standard Version gɔmeɖeɖe me la gblɔ kpuie ko be: “Logos la nye amesi le Mawu ƒe nɔnɔme me, menye Mawu la ŋutɔe wònye o.” Eye Yesutɔ John L. McKenzie ŋlɔ ɖe eƒe Dictionary of the Bible me be: “Ele be woatsɔ gɔmeɖeɖe si sɔ tututu aɖe Yn. 1:1 mee . . . ’nya la nye mawumeme aɖe.’”

Ðe Wònye Se aɖe Dzi Dadaa?

GAKE ame aɖewo gblɔna be egɔmeɖeɖe mawo tɔgbe nye dada le Koine Helagbe ƒe gbeŋutise si Helagbenyala E. C. Colwell ŋlɔ le ƒe 1933 me la dzi. Egblɔ be le Helagbe me la, “asitɔnudzinyakui [si fiaa asi nu tẽ] kpena ɖe [nɔnɔmefiaŋkɔnya] ŋu ne eva ɖe dɔwɔnya la yome; asitɔnudzinyakui [si fiaa asi nu tẽ] mekpena ɖe eŋu ne edo ŋgɔ na dɔwɔnya la o.” Nusi eƒe nya sia fiae nye be ele be míase egɔme abe ɖe asitɔnudzinyakui si fiaa asi nu tẽ (“la”) kpe ɖe nɔnɔmefiaŋkɔnya si do ŋgɔ na dɔwɔnya la ŋu ene. Le Yohanes 1:1 me la, ŋkɔnya evelia (the·osʹ) si nye nɔnɔmefiaŋkɔnya, do ŋgɔ na dɔwɔnya la—“eye [the·osʹ] nye Nya la.” Eyata Colwell be ele be Yohanes 1:1 naxlẽ be: “eye Mawu [la] enye Nya la.”

Gake bu tame tso kpɔɖeŋu eve ko siwo dze le Yohanes 8:44 me le Eŋlisigbe Bibliawo me ŋu. Yesu gblɔ tso Abosam ŋu le afima be: “Eya la amewula aɖe wònye” kple “aʋatsokala aɖe . . . wònye.” Abe alesi wòle le Yohanes 1:1 mee ene la, nɔnɔmefiaŋkɔnyawo (“amewula” kple “aʋatsokala”) do ŋgɔ na dɔwɔnya (“nye”) le Helagbea me. Asitɔnudzinyakui si mefiaa asi nu tẽ o (“aɖe”) medo ŋgɔ na ŋkɔnya eveawo o elabena mele Koine Helagbea me o. Gake gɔmeɖeɖe akpa gãtɔ tsɔna nya “aɖe” sia dena eme elabena Helagbe ƒe gbeŋutise kple nya si ŋu wole nu ƒom le la bia nenema.—Kpɔ Marko 11:32; Yohanes 4:19; 6:70; 9:17; 10:1; 12:6 hã.

Ele be Colwell nalɔ̃ ɖe esia dzi ku ɖe nɔnɔmefiaŋkɔnya la ŋu, elabena egblɔ be: “Ne nya siwo ƒo xlãe la bia nenema ko hafi teƒe si metɔa asi nu dzi tẽ o nɔa [aɖe] si.” Eyata eya gɔ̃ hã lɔ̃ ɖe edzi be ne nya si ŋu wole nu ƒom le bia nenema la, gbegɔmeɖelawo ate ŋu atsɔ asitɔnudzinyakui si metɔa asi nu dzi tẽ o akpe ŋkɔnya la le nyagbe ƒe ɖoɖo sia tɔgbe me.

Ðe nya siwo ƒo xlã Yohanes 1:1 bia be woatsɔ asitɔnudzinyakui si metɔa asi nu dzi tẽ o akpeea? Ẽ, elabena ɖaseɖiɖi si dze le Biblia la katã mee nye be Yesu menye Mawu Ŋusẽkatãtɔ o. Eyata menye Colwell ƒe gbeŋutise me se si ŋu nya ku ɖo ye le be wòafia mɔ gbegɔmeɖelawo le nya siawo tɔgbe me o, ke boŋ nya si ŋu wole nu ƒom le ye le be wòafia mɔe. Eye edze ƒã le gɔmeɖeɖe gbogbo siwo tsɔ asitɔnudzinyakui “aɖe,” si metɔa asi nu dzi tẽ o de Yohanes 1:1 me kple teƒe bubuwo me be agbalẽnyalawo melɔ̃ ɖe se ma si nye nya kpakpa la dzi o eye nenema ke Mawu ƒe Nya la hã melɔ̃ ɖe edzie o.

Menye Tsitretsiɖeŋunu O

ÐE EGBƆGBLƆ be Yesu Kristo nye “mawu aɖe” la tsi tre ɖe Biblia ƒe nufiafia si nye be Mawu ɖeka kolia koe li la ŋua? Ao, elabena ɣeaɖewoɣi la, Biblia zãa nya ma tsɔ yɔna nuwɔwɔ siwo kpɔ ŋusẽ lae. Psalmo 8:6 xlẽ be: “Esusɔ vie, nèna [amegbetɔ sɔ] kple [amesiwo ɖi Mawu] [Hebrigbe, ʼelo·himʹ] kloe,” eyae nye eɖi mawudɔlawo kloe. Esi Yesu nɔ eɖokui ta ʋlim le Yudatɔwo ƒe nutsotso be egblɔ be yenye Mawu me la, egblɔ be: “Se la zãa nya mawuwo na amesiwo ta Mawu ƒe nya la va ɖo la,” si nye na amegbetɔ siwo nye ʋɔnudrɔ̃lawo. (Yohanes 10:34, 35, JB; Psalmo 82:1-6) Woyɔ Satana gɔ̃ hã be “xexe sia me mawu” le Korintotɔwo II, 4:4 me.

Yesu ƒe nɔƒe kɔkɔ boo wu mawudɔlawo, amegbetɔ madeblibowo, alo Satana tɔ. Esi woyɔ amesiawo be “mawuwo,” alo ŋusẽtɔwo ta la, kakaɖedzitɔe la, woate ŋu ayɔ Yesu be “mawu aɖe,” eye mawu aɖee wònye hã. Le nɔƒe tɔxɛ si le esi le Mawu gbɔ ta la, Yesu nye “Mawu kalẽtɔ,” [alo, “Mawu Ŋusẽtɔ,” NW]—Yohanes 1:1; Yesaya 9:5.

Gake ɖe “Mawu Ŋusẽtɔ” kpakple alesi wotsɔ ŋɔŋlɔdzesi gãwo ŋlɔe la mefia be Yesu sɔ kple Yehowa Mawu le mɔ aɖe nu oa? Kurakura o. Ðeko Yesaya gblɔ nya ɖi be esia anye ŋkɔ ene siwo woayɔ na Yesu la dometɔ ɖeka, eye le Eŋlisigbe me la, woŋlɔa ŋkɔ mawo kple ŋɔŋlɔdzesi gãwo. Azɔ hã togbɔ be woyɔ Yesu be “Ŋusẽtɔ” hã la, ame ɖeka koe li woate ŋu ayɔ be “Ŋusẽkatãtɔ.” Yehowa Mawu yɔyɔ be “Ŋusẽkatãtɔ” anye nusi ŋu gɔmesese gobi aɖeke manɔ o negbe ɖe ame bubuwo hã li siwo woyɔ be mawuwo gake wole tsɛ wu eye woƒe nɔƒe bɔbɔ ɖe anyi wu.

Bulletin of the John Rylands Library si le England la gblɔ be le mawuŋutinunyala Katolikotɔ Karl Rahner ƒe nya nu la, togbɔ be wozã the·osʹ le mawunyakpukpui aɖewo abe Yohanes 1:1 me ene si ku ɖe Kristo ŋu hã la, “womezã ‘theos’ le mɔ aɖeke nu be wòafia be Yesue nye amesi woyɔ le Nubabla Yeyea ƒe teƒe bubuwo be ‘ho Theos,’ si nye Mawu Nusianutaƒola la o.” Eye Bulletin la gagblɔ be: “Ne Nubabla Yeyea ŋlɔlawo susui be enye nusi hiã vevie be xɔsetɔwo naxɔe se be Yesu nye ‘Mawu’ la, ke ɖe woate ŋu aɖe alesi xɔsemeʋuʋu sia tututu ƒomevi medze kloe le Nubabla Yeyea me o la mea?”

Ke alesi apostolo Toma gblɔ na Yesu be, “Nye Aƒetɔ kple nye Mawu!” le Yohanes 20:28 me ya ɖe? Hena Toma la, Yesu nɔ abe “mawu aɖe” ene, vevietɔ le nɔnɔme wɔnuku siwo na wògblɔ nya siawo la me. Agbalẽnyala aɖewo do susu ɖa be ɖeko Toma nɔ ɣli si ɖe alesi nya la wɔ nuku nɛ ƒe seselelãme fia la dom; be enye nya si wògblɔ le nuƒoƒo kple Yesu me gake wònye nusi wònɔ gbɔgblɔm na Mawu. Le esiawo dometɔ ɖesiaɖe gome la, Toma mesusui be Yesu nye Mawu Ŋusẽkatãtɔ o, elabena wo kple apostoloawo katã nya be Yesu megblɔ ɣeaɖekeɣi kpɔ be yenye Mawu o ke boŋ efia nu be Yehowa ɖeɖekoe nye “Mawu vavã ɖeka la.”—Yohanes 17:3.

Nya siwo ƒo xlãe gakpe ɖe mía ŋu ake be míase nya sia gɔme. Ŋkeke ʋee aɖewo do ŋgɔ la, Yesu si wofɔ ɖe tsitre la gblɔ na Maria Magdalatɔ la be wòagblɔ na nusrɔ̃lawo be: “Meyina dziƒo ɖe Fofonye kple miawo hã mia Fofo, nye Mawu kple miawo hã mia Mawu la gbɔ.” (Yohanes 20:17) Togbɔ be wofɔ Yesu ɖe tsitre xoxo abe gbɔgbɔ triakɔ aɖe ene hã la, Yehowa ganye Mawu nɛ kokoko. Eye Yesu yi edzi yɔ Eyama nenema le Biblia ƒe agbalẽ mamletɔ gɔ̃ hã me, le esime wodo ŋutikɔkɔe nɛ megbe.—Nyaɖeɖefia 1:5, 6; 3:2, 12.

Le kpukpui etɔ̃ siwo kplɔ ɣli si Toma do la ɖo me, le Yohanes 20:31 me la, Biblia gakɔ nya la me ɖe edzi wu esi wògblɔ be: “Woŋlɔ esiawo ɖi, bena miaxɔ ase bena, Yesu enye Kristo, Mawuvi la,” menye be eyae enye Mawu Ŋusẽkatãtɔ o. Eye efia “Vi” le nya la ƒe gɔmesese ŋutɔŋutɔ nu, abe alesi wòle le fofo kple vi ŋutɔŋutɔ gome ene, ke menye abe Mawuɖekaetɔ̃ ƒe Mawuƒokpli ƒe nya ɣaɣla aɖe ene o.

Ele Be Wòawɔ Ðeka Kple Biblia La

WOGBLƆNA be mawunyakpukpui bubu geɖe de Mawuɖekaetɔ̃ la dzi. Gake esiawo sɔ kple esiwo me míedzro la le etame le go sia me be, ne wolé ŋku ɖe wo ŋu tsitotsito la, womegblɔ nya aɖeke si de edzi o. Ðeko mawunyakpukpui mawo na eme kɔ be le nusianu si woagblɔ be ede Mawuɖekaetɔ̃a dzi me la, ele be woabia se be: Ðe egɔmeɖeɖe wɔ ɖeka kple Biblia la katã ƒe nufiafia si toa mɔ ɖeka—be Yehowa Mawu koe nye Nusianutaƒola la? Ne mele nenema o la, ke vodadae gɔmeɖeɖea nye.

Ele be míagaɖo ŋku edzi hã be “kpeɖodzimawunyakpukpui” ɖeka hɔ̃ hã megblɔ be Mawu, Yesu, kple gbɔgbɔ kɔkɔea nye nu ɖeka le Mawuƒokpli ƒe nya ɣaɣla aɖe me o. Mawunyakpukpui ɖeka pɛ hã megblɔ le Biblia ƒe akpa aɖeke be wo ame etɔ̃awo katã nye nu ma ke, eye ŋusẽ kple mavɔmavɔtɔnyenye ma ke le wo si o. Biblia la gblɔa nya ɖeka le eɖeɖe fia me be Mawu Ŋusẽkatãtɔ Yehowa koe Ƒo Nuwo Katã Ta, be Yesu nye Vi si wowɔ, eye be gbɔgbɔ kɔkɔea nye Mawu ƒe dɔwɔŋusẽ.

[Nya si ɖe dzesi si le axa 24]

“Blematɔwo zã [Yohanes 10:30] ɖe mɔ gbegblẽ nu be woatsɔ aɖo kpe edzie be Kristo . . . kple Fofo la nye nu ɖeka ƒomevi.”—Commentary on the Gospel According to John, si John Calvin ŋlɔ

[Nya si ɖe dzesi si le axa 27]

Ame aɖe si li “kple” ame bubu la mate ŋu aganye ame bubu ma ke o

[Nya si ɖe dzesi si le axa 28]

“Logos la nye amesi le Mawu ƒe nɔnɔme me, menye Mawu la ŋutɔe wònye o.”—Joseph Henry Thayer, Biblia ŋutinunyala

[Nɔnɔmetata siwo le axa 25]

Yesu do gbe ɖa na Mawu be yeƒe nusrɔ̃lawo ‘katã nazu ɖeka,’ abe alesi ye kple ye Fofo ‘yewole ɖeka ene’

[Nɔnɔmetata si le axa 26]

Yesu ɖee fia Yudatɔwo be yemesɔ kple Mawu o eye wògblɔ na wo be ‘yemate ŋu awɔ naneke le ye ɖokui si o negbe nusi yekpɔ ye Fofo wòle wɔwɔm ko’

[Nɔnɔmetata siwo le axa 29]

Esi Biblia yɔ amegbetɔwo, mawudɔlawo, kple Satana gɔ̃ hã be wonye “mawuwo” alo ŋusẽtɔwo ta la, esɔ be woate ŋu ayɔ Yesu si le nɔƒe si kɔkɔ wu le dziƒo be “mawu aɖe”