ÈNYAA?
Aleke Romatɔnyenye ɖe vi na apostolo Paulo?
Paulo bia be: “Kaisaro nagbugbɔ nye nya la adrɔ̃ nam”
Ne ame aɖe zu Romatɔ la, gomenɔamesiwo kple mɔnukpɔkpɔwo sua esi le fiaɖuƒea ƒe afi sia afi. Menye nuto siwo le Roma te la ƒe sewoe kplɔa Romatɔwo o, ke boŋ Roma Fiaɖuƒea ƒe se tee wole. Ne wotsɔ nya ɖe Romatɔ aɖe ŋu le ʋɔnu eye wòlɔ̃ be woadrɔ̃ nyaa na ye le fiaɖuƒea ƒe nuto me ʋɔnudrɔ̃ƒe aɖe hã la, gome kpɔtɔ nɔa esi be wòabia be woadrɔ̃ nyaa na ye le Roma-ʋɔnudrɔ̃ƒe. Ne wotso kufia nɛ la, ate ŋu abia be fiagãa ŋutɔ nadrɔ̃ nya na ye.
Aƒetɔ Cicero, si nye Roma Fiaɖuƒea ƒe dziɖuɖumegã le ƒe alafa gbãtɔ Do Ŋgɔ Na Yesu (D.Y.) me la, gblɔ tso nya sia ŋu be: “Sedzidadae wònye be woabla Romatɔ; tagbɔsesẽe wònye be woaƒoe; ne wowui la, wodo hlɔ̃,” si fia be amea wu eya ŋutɔ dzila alo ƒometɔ kplikplikpli.
Apostolo Paulo ɖe gbeƒã tsitotsito le Roma Fiaɖuƒe bliboa me. Eye ewɔ Romatɔnyenye ƒe gomenɔamesia ŋu dɔ zi etɔ̃ wòdze le nuŋlɔɖiwo me: (1) Egblɔ na Filipi dumegãwo be woda se dzi le esi woƒo ye ta. (2) Be wògaƒoe le Yerusalem o la, egblɔ be Romatɔe yenye. (3) Egblɔ be Roma fiagã, Kaisaro, nadrɔ̃ nya na ye ale be yeaɖe ye ɖokui nu le eŋkume.—Dɔwɔwɔwo 16:37-39; 22:25-28; 25:10-12.
Aleke woxea fe na alẽkplɔlawo le Biblia-ŋlɔɣiwo?
Kunifɔm-Nuŋlɔɖikpe si nye alẽ kple gbɔ̃ ƒeƒle ƒe ɖoɖo si wowɔ le ƒe 2050 D.Y. me
Blemafofo Yakob kplɔ nyruia ƒe alẽwo ƒe 20 sɔŋ. Ekplɔ Laban ƒe lãwo ƒe 14 ɖe vianyɔnu eveawo ta, eye Laban tsɔ lãwo ƒe ɖe xe fe nɛ ɖe ƒe 6 bubu siwo wòtsɔ kplɔ eƒe lãwoe ta. (1 Mose 30:25-33) Magazine si nye Biblical Archaeology Review, gblɔ be: “Blema-gbalẽŋlɔlawo kple Biblia-xlẽlawo nya nu tso alẽkpɔkplɔ ŋuti ɖoɖo siwo amewo wɔna, abe esi nɔ Laban kple Yakob dome, la ŋu nyuie.”
Woke ɖe ɖoɖo siawo ƒe ɖewo ŋu le tome le Nuzi, Larsa, kple teƒe bubuwo le egbegbe Iraq, siwo ɖee fia be nenema tututue wowɔa ɖoɖoawoe. Ðoɖo siawo tɔgbi dzea egɔme tso ƒe aɖe ƒe lãfukoɣi dzi va de asi na ƒe si kplɔe ɖo ƒe lãfukoɣi. Le ɖoɖoa nu la, alẽkplɔlawo xɔa alẽnɔ alo agbo xexlẽme aɖe eye woŋlɔa wo ɖi le woƒe ƒexɔxɔ nu. Ne ƒea trɔ la, ame si tɔe lãwo nye la xɔa lãfu, notsi, alẽviwo kple nu bubuwo ƒe agbɔsɔsɔme si dzi wolɔ̃ ɖo la alẽkplɔlaa si. Gake ne nu siawo dometɔ aɖe sɔ gbɔ wu ɖoɖo si wowɔ la, susɔea zua alẽkplɔlaa tɔ.
Be lãwo nadzi ɖe edzi sɔgbɔ la, etsoa alẽnɔ agbɔsɔsɔme si alẽkplɔlaa xɔ gbɔ. Wokpɔa mɔ be alẽnɔ alafa ɖeka adzi alẽvi 80. Gake ne mede o la, ele be alẽkplɔlaa natsɔ esi susɔ la akpee. Esia tae wòle vevietɔ be alẽkplɔlaa nalé be na alẽ siwo wotsɔ de esi la nyuie.