‘Mide Bubu Ame Siwo Le Dɔ Wɔm Sesĩe Le Mia Dome La Ŋu’
“Miade bubu ame siwo le dɔ wɔm sesĩe le mia dome, eye wole mia dzi kpɔm le Aƒetɔ la me hele nu xlɔ̃m mi la ŋu.”—1 TES. 5:12.
1, 2. (a) Aleke nuwo nɔ na Tesalonika hamea esime Paulo ŋlɔ eƒe lɛta gbãtɔa na wo? (b) Nu kae Paulo de dzi ƒo na Tesalonikatɔwo be woawɔ?
TSƆE be yenɔ ƒe alafa gbãtɔ me Tesalonika hame, si nye hame gbãtɔ siwo woɖo le Europa la dometɔ ɖeka, la me. Apostolo Paulo zã ɣeyiɣi geɖe tsɔ nɔ nɔviawo tum ɖo le afi ma. Anya ɖo hamemetsitsiwo be woaxɔ ŋgɔ le hamea me abe ale si ko wòwɔe le hame bubuwo me ene. (Dɔw. 14:23) Gake esi woɖo hamea vɔ la, Yudatɔwo ƒo nu vlo wɔha aɖe nu ƒu eye wonya Paulo kple Sila le dua me. Kristotɔ siwo susɔ ɖe dua me la anya se le wo ɖokui me be yewotsi yame, ɖewohĩ ŋɔdzi alé wo gɔ̃ hã.
2 Abe ale si míakpɔ mɔ ene la, esi Paulo dzo le Tesalonika la, atsi dzi vevie ɖe hame si woɖo teti koe nye ema la ŋu godoo. Edze agbagba be yeatrɔ ayi dua me, gake ‘Satana va tso mɔ nɛ.’ Eya ta edɔ Timoteo be wòayi aɖade dzi ƒo na hamea. (1 Tes. 2:18; 3:2) Esi Timoteo trɔ gbɔ kple nyatakaka nyuiwo la, esia ʋã Paulo wòŋlɔ lɛta aɖe ɖo ɖe Tesalonikatɔwo. Paulo ɖo aɖaŋu geɖe na wo eye wòde dzi ƒo na wo hã be ‘woade bubu ame siwo nɔ ŋgɔ xɔm le wo dome la ŋu.’—Mixlẽ 1 Tesalonikatɔwo 5:12, 13.
3. Susu kawo tae wònɔ na Tesalonika Kristotɔwo be woade bubu geɖe hamemetsitsiwo ŋu?
3 Nuteƒekpɔkpɔ geɖe mesu nɔviŋutsu siwo nɔ ŋgɔ xɔm le Tesalonika Kristotɔwo dome la si abe Paulo kple eƒe mɔzɔhatiwo ene o; eye wometsi le gbɔgbɔ me abe hamemetsitsi siwo nɔ Yerusalem ene o. Mewɔ nuku o, elabena woɖo hame la mede ƒe ɖeka haɖe o! Ke hã susu nyuiwo nɔ anyi siwo tae wòle be hamea me tɔwo nada akpe ɖe woƒe hamemetsitsi siwo nɔ “dɔ wɔm sesĩe” eye wonɔ hamea “dzi kpɔm” henɔ “nu xlɔ̃m” nɔviawo la ta ɖo. Nyateƒee, esɔ ŋutɔ be woade “bubu geɖe [hamemetsitsiawo] ŋu le lɔlɔ̃ me.” Esi Paulo de dzi ƒo na wo alea vɔ la, eɖo aɖaŋu na wo be ‘woanɔ anyi kple wo nɔewo le ŋutifafa me.’ Ne ènɔ Tesalonika ɣemaɣi la, ɖe nàɖe ŋudzedzekpɔkpɔ deto afia ɖe dɔ siwo wɔm hamemetsitsiawo nɔ la ŋua? Alekee nèbua “nunana siwo nye amewo,” siwo Mawu na miaƒe hamea to Kristo dzi lae?—Ef. 4:8.
Wole “Dɔ Wɔm Sesĩe”
4, 5. Nu ka tae wòsesẽ na hamemetsitsi siwo nɔ anyi le Paulo ƒe ŋkekea me be woafia nu hamea, eye nu ka tae wòsesẽ egbea hã?
4 Esi woɖo Paulo kple Sila ɖe Beroia megbe la, alekee hamemetsitsi siwo nɔ Tesalonika la ‘wɔ dɔ sesĩe’? Le Paulo sɔsrɔ̃ me la, ɖikeke aɖeke mele eme o be wozã Ŋɔŋlɔawo tsɔ fia nu hame la. Ðewohĩ àbia be, ‘Ðe Tesalonikatɔwo kpɔa dzidzɔ ɖe Mawu ƒe Nya la ŋua?’ Elabe Biblia gblɔ be Beroiatɔwo “ɖɔ ʋu wu ame siwo le Tesalonika, . . . wonɔa Ŋɔŋlɔawo me dzrom tsitotsito gbe sia gbe.” (Dɔw. 17:11) Le afi sia la, Yudatɔ siwo nɔ Tesalonika dua me la ŋue Paulo nɔ nu ƒom tso, ke menye Kristotɔawo ŋue wònɔ nu ƒom tso o. Tesalonikatɔ siwo va zu xɔsetɔwo la ‘mexɔ Mawu ƒe nya la abe amegbetɔwo ƒe nya ene o, ke boŋ abe Mawu ƒe nya ene.’ (1 Tes. 2:13) Hamemetsitsiawo anya wɔ dɔ sesĩe hafi te ŋu fia nu ame siawo ƒomevi.
5 Egbea la, kluvi nyateƒetɔ kple aɖaŋudzela ƒe ha la le “nuɖuɖu” nam Mawu ƒe alẽhaa “le ɣeyiɣi nyuitɔ dzi.” (Mat. 24:45) Hamemetsitsiwo wɔa dɔ sesĩe nyia wo nɔviwo le gbɔgbɔ me le kluvi la ƒe mɔfiafia te. Ðewohĩ Biblia srɔ̃gbalẽ gbogbo aɖewo le hamea me tɔwo si, eye Watch Tower Publications Index (Index des publications Watch Tower) kple Watchtower Library si le CD-ROM dzi le gbegbɔgblɔ aɖewo me. Be hamemetsitsiwo nakpɔ hamea ƒe gbɔgbɔmenuhiahiãwo gbɔ la, wozãa gaƒoƒo geɖe tsɔ dzraa kpekpeawo ƒe akpa vovovoawo ɖo ale be woate ŋu awɔ dɔdeasiawo nyuie woaɖe vi na nɔviawo. Ðe nède ŋugble le ɣeyiɣi agbɔsɔsɔme si hamemetsitsiwo zãna tsɔ dzrana ɖo ɖe akpa si wode asi na wo le kpekpewo, takpekpe suewo, kple takpekpe gãwo me ŋu la ŋu kpɔa?
6, 7. (a) Paulo ƒe kpɔɖeŋu kae hamemetsitsi siwo nɔ Tesalonika la srɔ̃? (b) Nu ka tae wòate ŋu asesẽ na hamemetsitsi siwo li egbea be woasrɔ̃ Paulo ƒe kpɔɖeŋua?
6 Hamemetsitsi siwo nɔ Tesalonika la ɖo ŋku kpɔɖeŋu nyui si Paulo ɖo ɖi le alẽkpɔkplɔdɔa me dzi. Be woakplɔ alẽawo fia be woakpɔ woƒe nuhiahiãwo gbɔ na wo le lɔlɔ̃ kple tufafa me, ke menye le dzizizi ta o. Abe ale si míedzro eme le nyati si va yi me ene la, Paulo ‘fa tu . . . , abe ale si vidada si le no nam ye ŋutɔ viawo la léa be na wo nyuie ene.’ (Mixlẽ 1 Tesalonikatɔwo 2:7, 8.) Enɔ lɔlɔ̃m gɔ̃ hã be ‘yeatsɔ yeƒe luʋɔ ana ɖe wo ta’! Ne hamemetsitsiwo le alẽawo srãm kpɔ la, ele be woawɔ nu abe Paulo ene.
7 Egbea, alẽkplɔla Kristotɔwo srɔ̃a Paulo le beléle na alẽawo me. Le dzɔdzɔme nu la, nɔvi aɖewo mefa tu o, eye womedoa vivi ɖe ame ŋu o. Ke hã hamemetsitsiwo dzea agbagba sea nu gɔme na wo, eye ‘wokpɔa nyui’ le wo me. (Lod. 16:20) Enye nyateƒe be esi hamemetsitsiwo mede blibo o ta la, ahiã be woadze agbagba vevie hafi nukpɔsusu nyui nanɔ wo si ɖe nɔvi ɖe sia ɖe ŋu. Ke hã esi wole wo tɔ si nua wɔm be yewoafa tu na alẽawo katã la, ɖe manyo be woaka fu wo ɖe ale si wodzea agbagba be yewoanye alẽkplɔla nyuiwo le Kristo ƒe kpɔkplɔ te la ta oa?
8, 9. Mɔ siwo dzi hamemetsitsiwo ‘dzɔa míaƒe luʋɔwo ŋu’ le la dometɔ aɖewo ɖe?
8 Susu aɖewo li siwo tae wòle be mí katã ‘míabɔbɔ mía ɖokui’ ɖe hamemetsitsiwo te ɖo. Abe ale si Paulo gblɔe ene la, ‘wole míaƒe luʋɔwo ŋu dzɔm.’ (Heb. 13:17) Nyagbɔgblɔ sia ɖo ŋku alẽkplɔla ŋutɔŋutɔ si tsia zãdomadɔlɔ̃e be yeakpɔ yeƒe alẽhaa ta la dzi na mí. Nenema ke egbea la, hamemetsitsiwo tsia zãdomadɔlɔ̃e ne wole alẽ aɖewo, siwo ƒe lãme gblẽ le seselelãme kple gbɔgbɔ me siaa, gbɔ kpɔm. Le kpɔɖeŋu me, wofɔa nɔviŋutsu siwo le Kɔdzi Kadododzikpɔkɔmitiwo me la tso alɔ̃ me le zã me be woayi aɖakpɔ lãmesẽnya aɖewo gbɔ. Ke hã ne kuxi siawo tɔgbi va mía dzi eye wona kpekpeɖeŋu mí la, aleke gbegbee wòdzɔa dzi na míe nye esi!
9 Hamemetsitsi siwo le Nuto Me Xɔtukɔmitiwo kple Kpekpeɖeŋunakɔmitiwo me wɔa dɔ sesĩe kpena ɖe nɔviawo ŋu. Esɔ be míado alɔ wo tso dzi blibo me! De ŋugble le kpekpeɖeŋunadɔ si yi edzi esime ahom si woyɔ be Nargis tu le Myanmar le ƒe 2008 me ŋu kpɔ. Hafi kpekpeɖeŋunahawo naɖo Bothingone Hamea, si le kɔƒedu aɖe, si le Irrawaddy Delta nuto si me ahom la gblẽ nu le vevie me la, wozɔ mɔ to mɔ siwo dzi nuwo kaka ɖo eye amewo ƒe ŋutilã kukuwo kaka ɖe afi sia afi la dzi. Esi nɔviawo kpɔe be yewoƒe nutome sue dzikpɔla tsãtɔ hã le kpekpeɖeŋunaha gbãtɔ si ɖo Bothingone me la, wodo ɣli be: “Mikpɔ ɖa! Míaƒe nutome sue dzikpɔlae nye ema! Yehowa ɖe mí!” Ðe nèkpɔa ŋudzedze ɖe dɔ sesẽ si hamemetsitsiwo wɔna zã kple keli ŋua? Woɖo hamemetsitsi aɖewo be woanɔ kɔmiti tɔxɛwo me akpɔ ʋɔnudrɔ̃nya sesẽwo gbɔ. Hamemetsitsi siawo medana ɖe nu siwo wote ŋu wɔ la ta o; ke hã ame siwo woƒe dɔwɔnawo ɖe vi na la kpɔa ŋudzedze ɖe wo ŋu ŋutɔ.—Mat. 6:2-4.
10. Dɔ bubu kawoe hamemetsitsiwo wɔna siwo ame geɖe menya o?
10 Hamemetsitsi geɖe wɔa dɔ aɖewo egbea siwo lɔ agbalẽnyawo ɖe eme. Le kpɔɖeŋu me, hamemetsitsiwo ƒe ha ƒe ɖoɖowo gbɔ kpɔla wɔa kpekpe siwo míedena kwasiɖa sia kwasiɖa la ŋuti ɖoɖowo. Hamea ƒe agbalẽŋlɔlaa ƒoa gbeadzikɔnta siwo míebu la nu ƒu ɣleti ɖe sia ɖe kple subɔsubɔƒea ƒe nuwuwu. Sukudzikpɔlaa tsɔa ŋuɖɔɖɔɖo blibo maa sukudɔdeasiawo. Le ɣleti etɔ̃ ɖe sia ɖe me la, wotoa hamea ƒe gazazã ŋuti nuŋlɔɖiwo me. Hamemetsitsiawo xlẽa lɛta siwo alɔdzedɔwɔƒea ɖo ɖe wo la, eye wowɔna ɖe mɔfiameawo dzi ale be míeyia edzi ‘wɔa ɖeka le xɔse me.’ (Ef. 4:3, 13) To hamemetsitsi dovevienu siawo ƒe agbagbadzedze dzi la, “nuwo katã [nɔa] ɖoɖo nu ale si dze.”—1 Kor. 14:40.
“Wole Mia Dzi Kpɔm”
11, 12. Ame kawoe kpɔa hamea dzi, eye nu kae dɔ sia wɔwɔ lɔ ɖe eme?
11 Paulo gblɔ tso Tesalonika hamemetsitsi siwo wɔa dɔ sesĩe la ŋu be “wole [hame] la dzi kpɔm.” Susu vevi si le nya sia me le gbe gbãtɔa mee nye be “wonɔa tsitre ɖe wo ŋgɔ,” eye woate ŋu aɖe eme be “wofiaa mɔ; woxɔa ŋgɔ le wo dome.” (1 Tes. 5:12) Paulo gblɔ tso hamemetsitsi mawo ke ŋu be wole “dɔ wɔm sesĩe.” Menye “dzikpɔla zimenɔla” aɖe koŋ ŋue wònɔ nu ƒom tso o, ke hamemetsitsi siwo katã le hamea mee wòwɔnɛ. Egbea la, hamemetsitsiawo dometɔ akpa gãtɔ nɔa tsitre ɖe hame la ŋgɔ eye wokpɔa kpekpewo dzi. Tɔtrɔ si wowɔ nyitsɔ laa be woazã dzesideŋkɔ si nye “hamemetsitsiwo ƒe ha ƒe ɖoɖowo gbɔ kpɔla” la kpena ɖe mía ŋu míekpɔa hamemetsitsiwo katã be wonye ha ɖeka me tɔ siwo wɔ ɖeka.
12 Hamea ‘dzi kpɔkpɔ’ lɔ nu geɖe ɖe eme wu nufiafia ko. Wozã nya ma ke le 1 Timoteo 3:4. Paulo gblɔ be, ele be dzikpɔla nanye “ame si kpɔa ye ŋutɔ ƒe aƒe dzi nyuie, ame si ƒe viwo bɔbɔa wo ɖokui le moveviɖoɖo katã me.” Le afi sia la, edze ƒãa be nyagbɔgblɔ si nye “ame si kpɔa ye ŋutɔ ƒe aƒe dzi nyuie” melɔ nufiafia viawo ɖeɖe ko ɖe eme o, ke ebia hã be wòaxɔ ŋgɔ le ƒomea me, eye ‘viawo nanye ame siwo bɔbɔa wo ɖokuiwo.’ Ɛ̃, hamemetsitsiwo xɔa ŋgɔ le hamea me, eye wokpena ɖe nɔviawo katã ŋu be woabɔbɔ ɖe Yehowa te.—1 Tim. 3:5.
13. Nu ka tae wòate ŋu axɔ ɣeyiɣi geɖe hafi hamemetsitsiwo nawɔ nyametsotso aɖe le woƒe kpekpewo me?
13 Be hamemetsitsiwo nakpɔ alẽawo dzi nyuie la, wodzroa ale si woakpɔ hamea ƒe nuhiahiãwo gbɔ la me le wo nɔewo dome. Ðewohĩ ame aɖe asusu be anyo wu ne hamemetsitsi ɖekae wɔa nyametsotsowo katã. Ke hã, le dziɖuha si nɔ anyi le ƒe alafa gbãtɔ me ƒe kpɔɖeŋua sɔsrɔ̃ me la, hamemetsitsiwo ƒe ha siwo li egbea la dzroa nyawo me faa hedia mɔfiame tso Ŋɔŋlɔawo me. Woƒe taɖodzinue nye be yewoazã Ŋɔŋlɔawo me gɔmeɖosewo atsɔ akpɔ hame si me yewole ƒe nuhiahiãwo gbɔ. Viɖe geɖe dona tso numedzodzro siwo hamemetsitsiwo wɔna me ne wo dometɔ ɖe sia ɖe dzra ɖo ɖe hamemetsitsiwo ƒe kpekpea ŋu hexlẽ Ŋɔŋlɔawo kple mɔfiame siwo tso kluvi nyateƒetɔ kple aɖaŋudzela ƒe ha la gbɔ hafi va. Enye nyateƒe be esia xɔa ɣeyiɣi. Ne hamemetsitsiwo ƒe nu mesɔ le nya aɖe me o, abe ale si wòdzɔ esime ƒe alafa gbãtɔ me dziɖuhaa dzro aʋatsotso ƒe nya la me ene la, ɖewohĩ abia be woazã ɣeyiɣi geɖe wu eye woawɔ numekuku ale be woanɔ te ɖe Ŋɔŋlɔawo dzi ada asi ɖe nya ɖeka dzi.—Dɔw. 15:2, 6, 7, 12-14, 28.
14. Ðe nèkpɔa dzidzɔ be hamemetsitsiwo ƒe ha la wɔa dɔ aduadu le ɖekawɔwɔ mea? Nu ka tae nèsena le ɖokuiwò me nenema?
14 Nu kae ate ŋu adzɔ ne hamemetsitsi aɖe te tɔ ɖe eƒe susu dzi alo dze agbagba be yeado ye ŋutɔ yeƒe nukpɔsusuwo ɖe ŋgɔ? Alo ne ame aɖe, abe Diotrefo si nɔ anyi le ƒe alafa gbãtɔa me ene, dea mama wo dome ya ɖe? (3 Yoh. 9, 10) Esia agblẽ nu le hame bliboa ŋu godoo. Esi Satana dze agbagba be yeagblẽ nu le hame si nɔ anyi le ƒe alafa gbãtɔ me ŋu ta la, míate ŋu aka ɖe edzi be ele didim be yeagblẽ ŋutifafa si le hamea me egbea hã me. Ate ŋu awɔ amegbetɔ ƒe ɖokuitɔdidi ƒe nudzodzrowo, abe didi be woaxɔ ŋkɔ ene, ŋu dɔ. Eya ta, ehiã be hamemetsitsiwo nasrɔ̃ ɖokuibɔbɔ eye woawɔ dɔ ɖekae abe ƒuƒoƒo wɔɖeka ene. Aleke gbegbe míekpɔa ŋudzedze ɖe hamemetsitsi siwo wɔa dɔ aduadu abe ƒuƒoƒo ene la ƒe ɖokuibɔbɔ ŋue nye esi!
‘Woxlɔ̃a Nu Mi’
15. Nu kae ʋãa hamemetsitsiwo woxlɔ̃a nu nɔvi aɖe?
15 Azɔ Paulo te gbe ɖe dɔ aɖe si sesẽ evɔ wòle vevie, si hamemetsitsiwo wɔna la dzi: eyae nye nuxɔxlɔ̃ alẽha la. Le Kristotɔwo Ƒe Hela Ŋɔŋlɔawo me la, Paulo ɖeka koe zã Helagbe me nya si gɔme woɖe be ‘xlɔ̃ nu.’ Ate ŋu afia aɖaŋuɖoɖo aɖe si nu sẽ, gake mefiaa aɖaŋuɖoɖo ameŋumabumabutɔe o. (Dɔw. 20:31; 2 Tes. 3:15) Le kpɔɖeŋu me, Paulo ŋlɔ na Korintotɔwo be: “Menye ɖe mele nya siawo ŋlɔm, be mado ŋukpe mi o, ke boŋ be maxlɔ̃ nu mi abe vinye lɔlɔ̃awo ene.” (1 Kor. 4:14) Ale si wòtsɔ ɖe le eme na nɔviawo lɔlɔ̃tɔe lae ʋãe wòxlɔ̃ nu wo.
16. Nu kae wòanyo be wòanɔ susu me na hamemetsitsiwo ne wole nu xlɔ̃m nɔviawo?
16 Mɔ nyuitɔ si nu wòle be hamemetsitsiwo naxlɔ̃ nu ame le la nɔa susu me na wo. Wodzea agbagba srɔ̃a Paulo le mɔ sia nu be wonyoa dɔme, lɔ̃a ame, eye wokpena ɖe ame ŋu. (Mixlẽ 1 Tesalonikatɔwo 2:11, 12.) Ke hã hamemetsitsiwo ‘léna ɖe nyateƒenya la ŋu goŋgoŋ le woƒe nufiafiaɖaŋu me, bene woatsɔ nufiafia nyuitɔ la axlɔ̃ nu.’—Tito 1:5-9.
17, 18. Nu kae wòle be wòanɔ susu me na wò ne hamemetsitsi aɖe xlɔ̃ nu wò?
17 Nyateƒee, hamemetsitsiwo mede blibo o, eye woate ŋu agblɔ nya aɖe si ava ve wo emegbe. (1 Fia. 8:46; Yak. 3:8) Nenema kee hamemetsitsiwo nyae be, le dzɔdzɔme nu la, aɖaŋuɖoɖoxɔxɔ menyea ‘dzidzɔnya’ na gbɔgbɔ me nɔviŋutsu kple nɔvinyɔnuwo o, ke boŋ enyea “nuxaxa” na wo. (Heb. 12:11) Eya ta ne hamemetsitsi aɖe te ɖe ame aɖe ŋu be yeaxlɔ̃ nui la, efia be ede ŋugble vevie hedo gbe ɖa le nyaa ŋu hafi. Ne hamemetsitsi aɖe xlɔ̃ nu wò la, ɖe nèkpɔa ŋudzedze ɖe ale si hamemetsitsi ma tsɔ ɖe le eme na wò lɔlɔ̃tɔe la ŋua?
18 Tsɔe be lãmesẽkuxi aɖe le fu ɖem na wò evɔ womele dɔléle si wònye la kpɔm o. Emegbe ɖɔkta aɖe te ŋu de dzesi dɔléle si tututu wònye, gake esesẽ na wò be nàxɔe ase. Ðe nàdo dziku ɖe ɖɔktaa ŋua? Ao! Ne egblɔ be ele be woawɔ dɔ na wò kura gɔ̃ hã la, anɔ eme be àlɔ̃ ɖe dɔdamɔnu si ŋu dɔ wòbe yeawɔ la dzi, le esi nèxɔe se be aɖe vi na ye ta. Ale si ɖɔktaa gblɔ nyaa na wò la ate ŋu ate ɖe dziwò, gake ɖe nàɖe mɔ esia nàkpɔ ŋusẽ ɖe wò nyametsotso dzia? Ðewohĩ màwɔ nenema o. Nenema kee mele be nàɖe mɔ ale si woxlɔ̃ nu wò la nawɔe be nàgbe toɖoɖo ame siwo Yehowa kple Yesu anya nɔ zazãm be yewoana nànya nu si wòle be nàwɔ be nàwɔ ŋgɔyiyi le nyateƒea me alo ayi edzi anɔ ƒomedodo nyui me kple Yehowa la o.
Kpɔ Ŋudzedze Ðe Hamemetsitsi Siwo Yehowa Na Mí Ŋu
19, 20. Aleke nàte ŋu ada akpe ɖe “nunana siwo nye amewo” la ta?
19 Nu kae nàwɔ ne èxɔ nunana aɖe si ŋu wotrɔ asi le etɔxɛe na wò koŋ? Ðe nàzãe atsɔ aɖee afia be yekpɔ ŋudzedze ɖe eŋua? ‘Nunana siwo nye amewo’ lae nye nu si Yehowa na wò to Yesu Kristo dzi. Mɔ ɖeka aɖe si dzi nàto aɖee afia be yekpɔ ŋudzedze ɖe nunana siawo ŋue nye be nànɔ to lém ɖe nuƒo siwo hamemetsitsiwo ƒona la ŋu nyuie ahadze agbagba anɔ wɔwɔm ɖe nufiame siwo dze le wo me la dzi. Àte ŋu agaɖe wò ŋudzedzekpɔkpɔ afia hã to nyaŋuɖoɖo le kpekpeawo me le mɔ si atu ame ɖo nu dzi. Kpe asi ɖe dɔ siwo me hamemetsitsiwo le ŋgɔ xɔm le, abe gbeƒãɖeɖedɔa ene, la ŋu. Ne aɖaŋu aɖe si hamemetsitsi aɖe ɖo na wò la ɖe vi na wò la, ɖe manyo ŋutɔ be nàgblɔe nɛ oa? Tsɔ kpe ɖe eŋu la, ɖe manyo be nàɖe ŋudzedzekpɔkpɔ afia hamemetsitsiwo ƒe ƒomewo oa? Ðo ŋku edzi be, hafi hamemetsitsi aɖe nàwɔ dɔ sesĩe le hamea me la, eƒe ƒomea tsɔa ɣeyiɣi si wòatsɔ anɔ anyi ɖekae kpli wo la saa vɔe.
20 Ɛ̃, susu geɖewo li siwo tae wòle be míada akpe ɖe hamemetsitsi siwo le dɔ wɔm sesĩe le mía dome, le mía dzi kpɔm, eye woxlɔ̃a nu mí la ta ɖo. Vavãe, “nunana siwo nye amewo” la nye nu si Yehowa na mí lɔlɔ̃tɔe!
Èɖo Ŋku Wo Dzia?
• Susu kawo tae wònɔ na Tesalonika Kristotɔwo be woakpɔ ŋudzedze ɖe ame siwo nɔ ŋgɔ xɔm le wo dome la ŋu ɖo?
• Aleke hamemetsitsi siwo le miaƒe hamea me la le dɔ wɔm sesĩe ɖe tawò?
• Aleke ale si hamemetsitsiwo le dziwò kpɔm la ɖea vi na wòe?
• Nu kae wòle be wòanɔ susu me na wò ne hamemetsitsi aɖe xlɔ̃ nu wò?
[Nɔnɔmetata si le axa 27]
Ðe nèkpɔa ŋudzedze ɖe mɔ gbogbo siwo nu hamemetsitsiwo kplɔa hamea le la ŋua?