“Yi Edzi Nàdo Vevie . . . Nufiafia”
“MIEYƆAM be: ‘Nufiala,’ kple ‘Aƒetɔ,’ eye míegblɔe nyuie, elabena eyae menye.” (Yoh. 13:13) Yesu to nya siawo dzi te gbe ɖe edzi na eƒe nusrɔ̃lawo be nufialae yenye. Eye do ŋgɔ teti na Yesu ƒe dziƒoyiyi la, ede se na eyomedzelawo be: “Eya ta miheyi ɖawɔ dukɔwo katã me tɔwo woanye nusrɔ̃lawo, . . . miafia nu wo be, woawɔ nu siwo katã ƒe se mede na mi la.” (Mat. 28:19, 20) Emegbe la, apostolo Paulo te gbe ɖe edzi be agbanɔamedzi tɔxɛe wònye be ame nanye Mawu ƒe Nya la fiala. Eɖo aɖaŋu na Timoteo, si nye Kristotɔ hamemetsitsi la, be: “Yi edzi nàdo vevie dutoƒo nuxexlẽ, nuxɔxlɔ̃, kple nufiafia. . . . De ŋugble le nu siawo ŋu; wò dzi katã neku ɖe wo ŋu, bene wò ŋgɔgbedede nadze ƒãa na amewo katã.”—1 Tim. 4:13-15.
Abe ale si wònɔ ɣemaɣi ene la, egbea hã, nufiafia nye míaƒe gbeadzisubɔsubɔdɔa kple míaƒe Kristotɔwo ƒe kpekpewo ƒe akpa vevi aɖe. Aleke míate ŋu ayi edzi ado vevie nufiafia? Eye mɔ kawo nue esia ate ŋu akpe ɖe mía ŋu le be míawɔ ŋgɔyiyi abe Mawu ƒe Nya la fialawo ene?
Srɔ̃ Nufiala Gã La
Ale si Yesu fiaa nui la léa dzi na eƒe nyasela geɖewo. Kpɔ ale si eƒe nyawo wɔ dɔ ɖe ame siwo nɔ ƒuƒoƒea le Nazaret dzii ɖa. Nya Nyui ŋlɔla Luka ŋlɔ bena: “Wo katã wote ɖase nyui ɖiɖi tso eŋu, eye woƒe mo wɔ yaa le nya vivi wɔdɔɖeamedzi siwo do tso eƒe nu me la ta.” (Luka 4:22) Yesu ƒe nusrɔ̃lawo dze woƒe Aƒetɔa ƒe kpɔɖeŋu yome le woƒe gbeƒãɖeɖedɔa me. Le nyeteƒe me la, apostolo Paulo de dzi ƒo na hati Kristotɔwo be: “Mizu srɔ̃nyelawo, abe ale si nye hã menye Kristo srɔ̃la ene.” (1 Kor. 11:1) Esi Paulo srɔ̃ ale si Yesu fia nui ta la, eva bi ɖe ‘nufiafia le dutoƒo kple tso aƒe me yi aƒe me’ me ŋutɔ.—Dɔw. 20:20.
Nufiafia “Le Asi Me”
Ŋutete si le Paulo si be wòtea ŋu fiaa nu le dutoƒo la ƒe kpɔɖeŋu ɖedzesi aɖe dze le nuŋlɔɖi si le Dɔwɔwɔwo ta 17 lia la me. Woƒo nu tso ɣeyiɣi si me wòyi Atene, le Hela, la ŋu le ta sia me. Afi sia afi si Paulo ɖe ŋku ɖo le du ma me—le mɔwo dzi loo, alo ablɔwo me o—ekpɔ legbawo. Mewɔ nuku be nu sia ɖe fu nɛ vevie o! Ke hã, meɖe mɔ eƒe seselelãmewo ɖu edzi o. Nu si wòwɔ boŋue nye be, “ete numedzodzro kple Yudatɔwo le ƒuƒoƒe la, . . . eye wòdzroa nu me le asi me gbe sia gbe kple ame siwo wòkpɔna le afi ma la hã.” (Dɔw. 17:16, 17) Kpɔɖeŋu nyui kae nye esi wòle be míasrɔ̃! Ne míetena ɖe ame ƒomeviwo katã ŋu ɖea gbeƒã na wo, menye kple fɔbuame ƒe susu o, ke boŋ le bubudede wo ŋu me la, míate ŋu ana mɔnukpɔkpɔ wo dometɔ aɖewo woaɖo to, eye mlɔeba woava vo tso alakpasubɔsubɔ ƒe kluvinyenye me.—Dɔw. 10:34, 35; Nyaɖ. 18:4.
Ame siwo Paulo ɖe gbeƒã na le asi me la dometɔ geɖe meɖo to eƒe gbedeasia o. Wo dometɔ aɖewo nye xexemenunyala siwo ƒe nukpɔsusu tsi tsitre ɖe nyateƒe siwo ƒe gbeƒã ɖem wònɔ la ŋu. Esime Paulo ƒe nyaselawo he nya ɖe eŋu la, ɖikeke mele eme o be ede ŋugble tso woƒe nyaawo ŋu. Ame aɖewo yɔe le Helagbe me be “nukufɔla,” si nye adagana aɖe si fiaa “nukpoloeƒola.” Ame bubuwo gblɔ be: “Ewɔ abe dutamawuwo ŋuti gbeƒãɖela aɖee wònye ene.”—Dɔw. 17:18.
Ke hã, vlodoamenya mawo meɖe dzi le Paulo ƒo o. Ke boŋ esime wobia tso esi be wòaɖe nu siwo fiam wònɔ la me la, Paulo wɔ mɔnukpɔkpɔa ŋu dɔ ƒo nuƒo wɔdɔɖeamedzi aɖe si ɖe ale si wòbi ɖe nufiafia me la fia. (Dɔw. 17:19-22; 1 Pet. 3:15) Na míadzro eƒe nuƒoa me tsitotsito eye míasrɔ̃ nu siwo ate ŋu akpe ɖe mía ŋu míana míaƒe nufiafiaɖaŋuwo nanyo ɖe edzi.
Ƒo Nu Tso Nu Siwo Me Wò Nyaselawo Tsɔ Ðe Le Ŋu
Paulo gblɔ be: “Atenetɔwo, mekpɔe be le nu sia nu me la, edze abe mievɔ̃a mawuwo ŋutɔ wu ame bubuwo ene. Le kpɔɖeŋu me, esi menɔ . . . ŋku lém ɖe nu siwo miesubɔna ŋu nyuie la, mekpɔ vɔsamlekpui aɖe hã si ŋu woŋlɔ ɖo be ‘Mawu Si Womenya O La Tɔe.’ Eya ta nu si mienya o, hafi tsɔ mia ɖokui le enam la, eya ke ŋu nya gblɔm mele na mi.”—Dɔw. 17:22, 23.
Paulo lé ŋku ɖe nu siwo ƒo xlãe la ŋu. Eto eƒe ŋkuléle ɖe nuwo ŋu nyuie me nya nu geɖe tso ame siwo wònɔ nu ƒom na la ŋu. Ne míawo hã míeléa ŋku ɖe nu ŋu la, míate ŋu anya nanewo tso ame si míele nu ƒom na la ŋu. Le kpɔɖeŋu me, ɖeviwo ƒe fefenu siwo le xɔxɔnu alo dzesi siwo le ʋɔtru ŋu ate ŋu afia nu geɖe mí tso aƒemenɔlaa ŋu. Ne míete ŋu nya nɔnɔme si me aƒemenɔlaa le va se ɖe afi aɖe la, menye ɖeko míaɖɔ ŋu ɖo le nya si míagblɔ nɛ tiatia me o, ke míanya ale si míagblɔe hã.—Kol. 4:6.
Paulo mebu fɔ eƒe nyaselawo o. Ke hã, ekpɔe dze sii be ‘mawuvɔvɔ̃’ si le Atenetɔwo me la menɔ te ɖe sidzedze vavãtɔ dzi o. Paulo fia ale si woate ŋu asubɔ Mawu vavã lae eme kɔ. (1 Kor. 14:8) Ekema aleke wòle vevie enye esi be míaƒo nu eme nakɔ eye míade bubu amewo ŋu ne míele gbeƒã ɖem Fiaɖuƒe ŋuti nya nyuia na wo!
Ðɔ Ŋu Ðo Eye Mègakpɔ Ame Ŋkume O
Paulo yi edzi hegblɔ be: “Mawu si wɔ xexea kple nu siwo katã le eme, esi wònye dziƒo kple anyigba ƒe Aƒetɔe Ame sia nye ta la, menɔa gbedoxɔ siwo wotsɔ asi wɔ la me o, eye menye ame ƒe asiwo hã wotsɔna subɔnɛ, abe ɖe nane le ehiãm ene o, elabena eya ŋutɔe naa agbe kple agbegbɔgbɔ kpakple nuwo katã ame sia ame.”—Dɔw. 17:24, 25.
Le afi sia la, Paulo he susu yi Yehowa dzi be eyae nye míaƒe Agbenala, eye wòwɔ esia ŋuɖɔɖotɔe esime wògblɔ tso eŋu be enye “dziƒo kple anyigba ƒe [Aƒetɔ].” Mɔnukpɔkpɔ gã kae nye esi wònye na mí be míakpe ɖe dzi anukwaretɔwo, siwo nye subɔsubɔha vovovo me tɔwo, siwo ƒe dekɔnuwo to vovo la, ŋu woava kpɔe adze sii be Yehowa Mawu gbɔe nu gbagbewo katã ƒe agbe dzɔ tso!—Ps. 36:10.
Eyome la, Paulo gblɔ be: “Eye wòwɔ amewo ƒe dukɔ sia dukɔ tso ame ɖeka me, . . . eye wòɖo ɣeyiɣi ɖoɖiwo kple amegbetɔwo nɔƒewo ƒe liƒowo ɖi, bene woadi Mawu, ne ɖe woatsa asi adii kura gɔ̃ hã, ne woake ɖe eŋu vavã, togbɔ be le nyateƒe me la, mele adzɔge tso mía dometɔ aɖeke gbɔ hafi o.”—Dɔw. 17:26, 27.
Ale si míefiaa nui la ate ŋu ana amewo nakpɔ Mawu si ƒomevi míedea ta agu na la adze sii. Yehowa mekpɔa ame ŋkume o, eɖe mɔ be dukɔwo katã me tɔwo ‘nadi ye.’ Nenema kee míawo hã míeɖea gbeƒã na amewo katã ameŋkumemakpɔmakpɔtɔe. Míedzea agbagba be míakpe ɖe ame siwo xɔ edzi se be Wɔla aɖe li la ŋu be woana ƒomedodo nyui si ate ŋu ana woava kpɔ yayra mavɔwo la nava nɔ woa kplii dome. (Yak. 4:8) Gake alekee míekpena ɖe ame siwo kea ɖi be Mawu ƒe anyinɔnɔ la ŋu? Míesrɔ̃a Paulo ƒe kpɔɖeŋua. Bu nya si wògblɔ kplɔe ɖo la ŋu kpɔ.
“Eya dzie míeto le agbe, eye míeʋãna, eye míeli, abe ale si mia dome hakpanyaŋlɔla aɖewo kura gɔ̃ hã gblɔe ene be: ‘Elabena eƒe viwoe míawo hã míenye.’ Eya ta esi míenye Mawu ƒe viwo ta la, mele be míasusu be mawunyenye la le abe sika alo klosalo alo kpe ene o.”—Dɔw. 17:28, 29.
Le afi sia la, Paulo he susu yi hakpanyaŋlɔla siwo Atenetɔwo nya eye wodea bubu wo ŋu la ƒe nya dzi kple susu be yeƒe nyaselawo naɖo to nya si gblɔm yele. Nenema kee míawo hã míenɔa te ɖe nya siwo me míenya be míaƒe nyaselawo ƒe susu wɔ ɖeka kpli mí le la dzi dzroa nu me kpli wo. Le kpɔɖeŋu me, kpɔɖeŋu si Paulo wɔ le agbalẽ si wòŋlɔ na Hebritɔwo me la wɔa dɔ ɖe ame dzi egbea abe ale si ko wònɔ le blema ene. Egblɔ be: “Aƒe sia aƒe la, ame aɖee tsonɛ, gake ame si wɔ nuwo katã lae nye Mawu.” (Heb. 3:4) Ne mía kple aƒemenɔlawo míede ŋugble tso kpɔɖeŋu bɔbɔe sia ŋu la, ate ŋu akpe ɖe wo ŋu woakpɔ nya si gblɔm míele la ƒe nyateƒenyenye adze sii. Paulo gawɔ nufiafiaɖaŋu bubu aɖe si naa ame ƒe nufiafia ɖea kpe la ŋu dɔ le eƒe nuƒoa me—eyae nye dzideƒoname.
Te Gbe Ðe Nuwɔwɔ Kpata Ƒe Vevienyenye Dzi
Paulo gblɔ be: “Nyateƒee, Mawu ŋe aɖaba ƒu numanyamanya ƒe ɣeyiɣi mawo dzi, gake azɔ la, ele gbɔgblɔm na amegbetɔwo le afi sia afi be ele be wo katã woatrɔ dzi me. Elabena eɖo ŋkeke aɖe ɖi, si dzi wòɖo tame be yeadrɔ̃ ʋɔnu anyigba dzi tɔwo katã le dzɔdzɔenyenye me to ŋutsu aɖe si wòɖo la dzi.”—Dɔw. 17:30, 31.
Mawu ƒe mɔɖeɖe ɖe vɔ̃ɖinyenye ŋu hena ɣeyiɣi aɖe la na mɔnukpɔkpɔ mí katã be míaɖe nu si tututu le míaƒe dzi me afia. Ele vevie be míate gbe ɖe ale si nuwɔwɔ kpata hiã vevie le míaƒe ŋkekea me la dzi eye míaƒo nu tso yayra siwo Fiaɖuƒedziɖuɖua, si tu aƒe ŋutɔ fifia, ahe avae la ŋu kakaɖedzitɔe.—2 Tim. 3:1-5.
Amewo Wɔa Nu Ðe Nyaa Ŋu Le Mɔ Vovovowo Nu
“Esi wose tsitretsitsi tso ame kukuwo dome ŋuti nya la, wo dometɔ aɖewo te fewuɖuɖu, gake bubuwo gblɔ be: ‘Míagase nu le nya sia ŋu tso gbɔwò ɣebubuɣi.’ Ale Paulo dzo le wo dome, gake ŋutsu aɖewo va wɔ ɖeka kplii, eye wozu xɔsetɔwo.”—Dɔw. 17:32-34.
Ame aɖewo lɔ̃na ɖe míaƒe nufiafia dzi enumake; gake le ame bubuwo gome la, ɖewohĩ ɣeyiɣi geɖe ava yi hafi woava ka ɖe nya si gblɔm míele la dzi. Ke hã, ne míeɖe nyateƒea me eme kɔ nyuie eye esia wɔe be Yehowa ŋuti sidzedze vavãtɔ va su ame ɖeka gɔ̃ hã si la, alekee míedaa akpee enye esi be Mawu le mía zãm tsɔ le amewo hem va Via gbɔe!—Yoh. 6:44.
Nu Siwo Míate Ŋu Asrɔ̃ Tso Eme
Ne míede ŋugble tso Paulo ƒe nuƒoa ŋu la, míate ŋu asrɔ̃ nu geɖe tso ale si míaɖe Biblia me nyateƒea me na amewoe ŋu. Ne mɔnukpɔkpɔ sua mía si míeƒoa dutoƒonuƒowo le hamea me la, míate ŋu adze agbagba asrɔ̃ Paulo to ale si míagblɔ nyawo ŋuɖɔɖotɔe be wòakpe ɖe dzimaxɔsetɔwo ŋu woase Biblia me nyateƒeawo gɔme ahaxɔ wo dzi se la nu. Míedi be míagblɔ nyateƒenya mawo wo me nakɔ, gake míaɖɔ ŋu ɖo be míagada dzimaxɔsetɔ siwo le nyaselawo dome la dometɔ aɖeke ƒe dzixɔsewo ɖe anyi o. Nenema kee le míaƒe gbeƒãɖeɖedɔa me la, míedzea agbagba ƒoa nu na amewo ŋuɖɔɖotɔe hekpena ɖe wo ŋu be woatrɔ woƒe susu. To esia wɔwɔ me la, míeɖenɛ fiana be míele aɖaŋu si Paulo ɖo na mí be ‘míado vevie nufiafia’ la dzi wɔm vavã.
[Nɔnɔmetata si le axa 30]
Paulo fia nu ŋuɖɔɖotɔe, eƒe nyawo me kɔ, eye wo gɔme sese nɔ bɔbɔe
[Nɔnɔmetata si le axa 31]
Míesrɔ̃a Paulo to ale si míebua ame siwo míeɖea gbeƒã na la ƒe seselelãmewo ŋu me