Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽ Ƒe Nyatsoƒewo
JANUARY 7-13
NU XƆASI SIWO LE MAWU ƑE NYA LA ME | DƆWƆWƆWO 21-22
15 Esime Paulo nɔ Filipo gbɔ la, amedzro bubu aɖe si ŋu wodea bubui la va, eŋkɔe nye Agabo. Ame siwo va ƒo ƒu ɖe Filipo ƒe aƒe me la nya be nyagblɔɖilae Agabo nye; eyae nye ame si gblɔ be dɔ gã aɖe ato le Klaudio ƒe dziɖuɣi. (Dɔw. 11:27, 28) Ðewohĩ woanɔ wo ɖokuiwo biam be: ‘Susu ka tae Agabo anya va ɖo? Gbedeasi kae wòtsɔ vɛ?’ Esi wonɔ ŋku lém ɖe eŋu tututu la, etsɔ Paulo ƒe alidziblanu—alidziblanu sia nye avɔ didi aɖe si me woate ŋu atsɔ ga kple nu bubuwo adee asa ɖe ali. Agobo tsɔ alidziblanu sia bla eya ŋutɔ ƒe asiwo kple afɔwo. Eye wòƒo nu. Nya si wògblɔ la nye ŋkubiãnya. Egblɔ be: “Ale gbɔgbɔ kɔkɔe la gblɔe nye esi, ‘Aleae Yudatɔwo abla ŋutsu si tɔ alidziblanu sia nye la le Yerusalem, eye woatsɔe ade asi na dukɔwo me tɔwo.’”—Dɔw. 21:11.
16 Nyagblɔɖia ɖo kpe edzi be Paulo ayi Yerusalem. Egaɖee fia hã be ne Paulo de ha kple Yudatɔ siwo le afi ma la, ana “woatsɔe ade asi na dukɔwo me tɔwo.” Nyagblɔɖi sia wɔ dɔ ɖe ame siwo nɔ afi ma la dzi. Luka ka nya ta be: “Esi míese nya sia la, míawo kple ame siwo nɔ afi ma míeɖe kuku nɛ vevie be wòagayi Yerusalem o. Ke Paulo ɖo eŋu be: ‘Nu kae nye esi wɔm miele le avi fam be miagblẽ tame si meɖo kplikpaa la me? Migavɔ̃ o, mele klalo, menye be woablam ɖeɖe ko o, ke be maku le Yerusalem le Aƒetɔ Yesu ƒe ŋkɔ la ta hã.’”—Dɔw. 21:12, 13.
17 Kpɔ nɔnɔmea le susu me ɖa. Luka kple nɔviawo ɖe kuku na Paulo be wòagayi o. Wo dometɔ aɖewo le avi fam. Paulo de dzesi ale si wòlɔ̃e vevie la, eye esia wɔ dɔ ɖe edzi wògblɔ be wole “dzi ɖem le ye ƒo,” alo abe ale si Biblia gɔmeɖeɖe bubuwo ɖe Helagbea me ene la, wole “dzi gbãm na ye.” Ke hã, eɖoe kplikpaa be yemana woƒe kukuɖeɖewo kple avifafawo naɖe dzi le yeƒo o, abe ale si wòwɔe esime wònɔ nɔvi siwo le Tiro gbɔ la ene. Ke boŋ eɖe susu si tae wòle be wòayi ɖo la me na wo. Eɖee fia be dzi le ye ƒo eye yeɖoe kplikpaa be yeayi! Abe Yesu ene la, Paulo ɖoe godoo be yeayi Yerusalem. (Heb. 12:2) Menye ɖe Paulo nɔ didim be yeaku xɔsetaku o, ke boŋ ne eva dzɔ nenema hã, abui be bubue wònye na ye be yeaku abe Kristo Yesu yomedzela ene.
18 Aleke nɔviawo wɔ nui? Ne míagblɔe kpuiea, wowɔ nu ɖe eŋu bubutɔe. Biblia gblɔ be: “Esi melɔ̃ be woaƒoe ɖe ye nu o ta la, míedzudzɔ fuɖeɖe nɛ hegblɔ be: ‘Yehowa ƒe lɔlɔ̃nu neva eme.’” (Dɔw. 21:14) Ame siwo nɔ agbagba dzem be yewoaƒo nya ɖe Paulo nu be wòagayi Yerusalem o la, ɖe asi le woƒe susua ŋu. Woɖo to Paulo, eye wolɔ̃ ɖe edzi nɛ, togbɔ be esesẽ na wo hã, wova kpɔe be Yehowa ƒe asi nɔ nyaa me eye woɖe mɔ be eƒe lɔlɔ̃nu nava eme. Afɔ si Paulo ɖe la ate ŋu ana wòava ku mlɔeba. Anɔ bɔbɔe na Paulo wu ne ɖe ame siwo lɔ̃e la medze agbagba be yewoana wòatrɔ susu o.
Mawu Ƒe Nyaa Me Kesinɔnuwo Didi
10 Ke hã, Paulo ɖee fia be yese nu gɔme na ame siwo wɔna ɖe Yudatɔwo ƒe kɔnuwo dzi. Kɔnu siawo ƒe ɖewoe nye dɔ mawɔmawɔ le Sabat dzi kple nuɖuɖu aɖewo tsitsri. (Rom. 14:1-6) Eye mede se aɖeke ku ɖe aʋatsotso ŋu o. Le nyateƒe me la, Paulo na wotso aʋa na Timoteo ale be Yudatɔwo naganɔ nazã bum ɖe Timoteo si fofo nye Helatɔ la ŋu o. (Dɔw. 16:3) Ame ŋutɔ ƒe nyae aʋatsotso nye. Paulo gblɔ na Galatiatɔwo be: “Asixɔxɔ aɖeke mele aʋatsotso alo aʋamatsomatso ŋu na wo o, hafi boŋ xɔse si wɔa dɔ le lɔlɔ̃ me ŋue” asixɔxɔ le. (Gal. 5:6) Ke hã, ne ame aɖe di be yeatso aʋa ale be yeava nɔ Sea te alo ana wòadze abe ele vevie ene hafi Yehowa nakpɔ ŋudzedze ɖe ame ŋu la, nye xɔsemanɔamesi ƒe nuwɔna.
11 Eya ta togbɔ be wobewobe siwo nɔ ɖiɖim la menye nyateƒe o hã, egaɖe fu na Yudatɔwo kokoko. Le susu ma ta, ame tsitsiawo na mɔfiame sia Paulo be: “Ŋutsu ene le mía dome, siwo ɖe adzɔgbe aɖe. Kplɔ ame siawo ne wò kpli wo miayi aɖakɔ mia ɖokuiwo ŋu le kɔa nu, eye nàxe woƒe nugblẽfewo, ne woalũ ta na wo. Ekema ame sia ame anyae be nya siwo wogblɔ na wo tso ŋuwò la dometɔ aɖeke mele eme o, ke boŋ be èle zɔzɔm ɖe ɖoɖo la nu, eye be èléa Se la hã me ɖe asi.”—Dɔw. 21:23, 24.
12 Paulo ate ŋu agblɔ be menye wobewobe siwo le ɖiɖim lae nye kuxia o, ke boŋ dzo si le Yudatɔ mawo me ɖe Mose ƒe Sea ŋue nye kuxia. Gake elɔ̃ faa be yeawɔ ɖe woƒe nyaa dzi, elabe enya be esia mana yeada le Mawu ƒe mɔfiame aɖeke dzi o. Do ŋgɔ la, Paulo ŋlɔ bena: “Mezu abe ame si le se te ene na ame siwo le se te, evɔ nye ŋutɔ nyemele se te hafi o, ale be asinye nasu ame siwo le se te la dzi.” (1 Kor. 9:20) Le nya sia me la, Paulo bɔbɔ ɖe hamemetsitsi siwo le Yerusalem la te, eye wòva zu “abe ame si le se te ene.” Eto esia dzi ɖo kpɔɖeŋu nyui aɖe ɖi na mí egbea be míabɔbɔ ɖe hamemetsitsiwo te eye míagate tɔ ɖe míaƒe susuwo dzi o.—Heb. 13:17.
nwtsty ƒe numeɖeɖe si le Dw 22:16
nàyɔ eƒe ŋkɔ la ne woaklɔ wò nu vɔ̃wo ɖa: Menye tsi si me wonyrɔ ame ɖoe klɔa eƒe nu vɔ̃wo ɖa o, ke boŋ ne eyɔa Yesu ƒe ŋkɔ. Be woawɔ esia la, ele be ame naxɔ Yesu dzi ase, eye wòaɖe xɔse sia afia awɔ Kristotɔwo ƒe dɔwo.—Dɔw. 10:43; Yak. 2:14, 18.
JANUARY 14-20
NU XƆASI SIWO LE MAWU ƑE NYA LA ME | DƆWƆWƆWO 23-24
5 Dzi si wode ƒo na Paulo la va ɖe ɣeyiɣi dzi. Le ŋufɔke la, Yuda ŋutsu 40 aɖewo “ɖo nugbe heka atam be, ne yewomewu Paulo o kpaa, yewomaɖu nu alo ano nu o.” “Nugbeɖoɖo sia si dzi woka atam ƒu” la na míekpɔ ale si gbegbe Yudatɔ mawo ɖoe kplikpaa be yewoawu apostoloa. Ne woƒe nugbeɖoɖoa medze edzi o la, wobui be ke anye fiƒode alo vɔ̃ si ava yewo dzi. (Dɔw. 23:12-15) Woƒe nugbeɖoɖo si dzi nunɔlagãwo kple ame tsitsiawo da asi ɖo lae nye be woana Paulo natrɔ va Sanhedrin la, ale be yewoagabia nyawoe, abe ɖe wodi be yewoaku eƒe nyaa me tsitotsito ene. Gake susu si koŋ le nugbeɖolawo sie nye be yewoade xa ɖi adze Paulo dzi awui.
6 Ke hã, Paulo nyruiyɔviŋutsu aɖe se woƒe nugbeɖoɖoa, eye woka eta na Paulo. Enumake Paulo ɖo ɖekakpuia ɖe Roma aʋafiagã si ŋkɔe nye Klaudio Lisia gbɔ be wòaka nyaa ta nɛ. (Dɔw. 23:16-22) Ðikeke mele eme o be Yehowa melɔ̃a nu le sɔhɛ siwo le abe Paulo nyruiyɔviŋutsu si ŋkɔ womeyɔ o, siwo mevɔ̃na o, siwo tsɔa Mawu ƒe amewo ƒe nyonyo ɖoa ŋgɔ na woawo ŋutɔ tɔ, eye wodzea agbagba be yewoawɔ nu sia nu si yewoate ŋui atsɔ ado Fiaɖuƒea ƒe nuwo ɖe ŋgɔ nuteƒewɔwɔtɔe, la gbɔ o.
10 Le Kaisarea la, wonɔ Paulo ‘ŋu dzɔm le Herodes ƒe fiasã la me’ tsɔ nɔ enutsola siwo atso Yerusalem ava la lalam. (Dɔw. 23:35) Wova ɖo le ŋkeke atɔ̃ megbe. Ame siwo vae nye Nunɔlagã Anania, nyanuɖela si ŋkɔe nye Tertulo kple ame tsitsi aɖewo. Gbãa, Tertulo kafu Felike ɖe nu siwo wɔm wòle na Yudatɔwo ta ɖewohĩ kple susu be yeatsɔ able enu ne yeƒe nu nadze eŋu. Emegbe Tertulo yi nya si le toa me la dzi, eye wògblɔ be Paulo nye ‘nugblẽla vɔ̃ɖi, eye wòle zitɔtɔ dem Yudatɔwo katã me le anyigba dzi godoo, eye wònye Nazaretetɔwo ƒe kɔmama la ƒe ŋgɔnɔla. Ete kpɔ hã be yeagblẽ kɔ ɖo na gbedoxɔ la, eya ta míelée.’ Yudatɔ bubuwo hã “de nutsotsoa dzi be nu siawo le eme nenema tututu.” (Dɔw. 24:5, 6, 9) Zitɔtɔ dede amewo me, kɔmama vɔ̃ɖi dodo ɖe ŋgɔ kple didi be woagblẽ kɔ ɖo na gbedoxɔa nye nutsotso sesẽ siwo ta woate ŋu atso kufia na ame.
13 Paulo ɖo kpɔɖeŋu nyui aɖe ɖi na mí si dzi míate ŋu azɔ ɖo ne edzɔ be wokplɔ mí yi ŋusẽtɔwo gbɔ ɖe míaƒe subɔsubɔ ta eye wotso mía nu alakpatɔe be míele dzi dem ƒo na amewo be woadze aglã, míetsi tsitre ɖe dziɖuɖu ŋu, alo be míenye “kɔmama vɔ̃ɖi” aɖe me tɔwo. Paulo medze agbagba be yeable nutodziɖulaa nu kple nya ŋɔnɔewo abe ale si Tertulo wɔe ene o. Paulo lé eɖokui kpoo eye wode bubu eŋu. Eto nyateƒe eye wòtsɔ aɖaŋudzedze ʋli eɖokui ta. Paulo gblɔ be ‘Yudatɔ siwo tso Asia nutoa me’ siwo tso ye nu be yegblẽ kɔ ɖo na gbedoxɔa la, meva o, eye le se nu la, ɖe wòle be woava gblɔ nya si wotsɔ ɖe ye ŋu la yease ne yeaʋli ye ɖokui ta.—Dɔw. 24:18, 19.
14 Paulo mehe ɖe megbe kura o, eƒo nu tso eƒe dzixɔsewo ŋu le mɔ wɔdɔɖeamedzi aɖe nu. Apostoloa gaƒo nu tso eƒe dzixɔse si ku ɖe tsitretsitsia, si nye nya si he zitɔtɔ vɛ esime wònɔ Sanhedrin la ŋu ake vɔvɔ̃manɔmee. (Dɔw. 23:6-10) Paulo te gbe ɖe tsitretsitsi ƒe mɔkpɔkpɔa dzi tsɔ ʋli eɖokui ta. Nu ka tae? Elabena Paulo nɔ ɖase ɖim tso Yesu kple eƒe tsitretsitsi tso ame kukuwo dome ŋu, si nye nya aɖe si dzi tsitretsiɖeŋula mawo malɔ̃ ɖo o. (Dɔw. 26:6-8, 22, 23) Ɛ̃, eku ɖe tsitretsitsia ŋu, eye nyaʋiʋlia ŋutɔŋutɔ ku ɖe Yesu dzixɔse kple eƒe tsitretsitsi koŋ ŋu.
Mawu Ƒe Nyaa Me Kesinɔnuwo Didi
nwtsty ƒe numeɖeɖe si le Dw 23:6
Farisitɔ . . . menye: Ame siwo nɔ to ɖom la dometɔ aɖewo dze si Paulo. (Dɔw. 22:5) Eya ta woanya se egɔme be esi wògblɔ be Farisitɔwo ƒe vie yenye la, enɔ lɔlɔ̃m ɖe edzi be yenɔ wo dome kpɔ. Wonya be menye alakpa dam Paulo nɔ o, elabe Farisitɔ siwo nɔ Sanhedrin la nya be eva zu Kristotɔ si me dzo le. Gake le afi sia la, Paulo di be woase nya si yegblɔ be Farisitɔe yenye la gɔme bubui; edi be yeagblɔ be Farisitɔe yenye ke menye Zadukitɔ o, elabena Farisitɔwo hã xɔ tsitretsitsia dzi se. Eto esia dzi va le Farisitɔ siwo nɔ afi ma la ƒe akpa dzi. Enya be ne yedo nya sia ɖa la, ana be Sanhedrin la me tɔ aɖewo nava de ye dzi le nyaʋiʋli sia me, eye eƒe aɖaŋua wɔ dɔ. (Dɔw. 23:7-9) Paulo ƒe nya siwo dze le Dɔw. 23:6 la wɔ ɖeka kple ale si wòɖɔ eɖokui esime wònɔ eɖokui ta ʋlim emegbe le Fia Agripa ŋkume. (Dɔw. 26:5) Eye esi wònɔ Roma nɔ agbalẽ ŋlɔm na Kristotɔ siwo le Filipi la, Paulo gahe susu yi edzi be Farisitɔe yenye tsã. (Flp. 3:5) Azɔ hã ale si woɖɔ Kristotɔ bubuwo le Dɔw. 15:5 be Farisitɔwoe wonye tsã la ɖe dzesi.
nwtsty ƒe numeɖeɖe si le Dw 24:24
Drusila: Ame siae nye vinyɔnu etɔ̃ siwo Herodes, si nye Herodes Agripa I, dzi la ƒe ɖevitɔ si ŋu nya wogblɔ le Dɔw. 12:1. Wodzii le ƒe 38 K.Ŋ. me lɔƒo, eye wònye Agripa II kple Bernike nɔvinyɔnu. (Kpɔ Nya Tɔxɛwo Gɔmeɖeƒe “Herodes.”) Nutodziɖula Felike ye nye srɔ̃a evelia. Ŋutsu gbãtɔ si wòɖe la nye Siriatɔwo ƒe Fia Azizus, si tso Emesa, gake egbee eye wova ɖe Felike le ƒe 54 K.Ŋ. me, alo esime woxɔ abe ƒe 16 lɔƒo ene. Anye be enɔ eteƒe esime Paulo ƒo nu le Felike ŋkume “tso dzɔdzɔenyenye kple ɖokuidziɖuɖu kpakple ʋɔnudɔdrɔ̃ si gbɔna ŋu.” (Dɔw. 24:25) Felike meɖe asi le Paulo ŋu hafi Festo va xɔ ɖe eteƒe o kple susu be “yeƒe nu nadze Yudatɔwo ŋu.” Eye ame aɖewo susu be ewɔ esia be yeƒe nu nadze ye srɔ̃ Yudatɔ si nye ɖetugbui la ŋu.—Dɔw. 24:27.
JANUARY 21-27
NU XƆASI SIWO LE MAWU ƑE NYA LA ME | DƆWƆWƆWO 25-26
6 Festo ƒe didi be yeadze Yudatɔwo ŋu alea ate ŋu ana Paulo ƒe agbe naɖo afɔku me. Eya ta Paulo wɔ gome si le esi abe Roma vi ene la ŋu dɔ. Egblɔ na Festo be: “Kaisaro ƒe ʋɔnudrɔ̃zikpui la ŋgɔe metsi tre ɖo, eye afi siae wòle be woadrɔ̃ ʋɔnum le. Nyemeda vo aɖeke ɖe Yudatɔwo ŋu o, abe ale si wò ŋutɔ hã nèva le ekpɔm ene. . . . Kaisaro negbugbɔ nye nya la drɔ̃ nam!” Zi geɖe ne ame aɖe bia be woagbugbɔ nya adrɔ̃ na ye alea la, womate ŋu atrɔe o. Festo te gbe ɖe nya sia dzi esi wògblɔ be: “Èbe Kaisaro negbugbɔ nya la drɔ̃ na ye; eya ta àyi Kaisaro gbɔ.” (Dɔw. 25:10-12) Esi Paulo bia be woana yeayi ʋɔnudrɔ̃ƒe kɔkɔtɔ la, eto esia dzi ɖo kpɔɖeŋu ɖi na Kristotɔ siwo li egbea. Ne tsitretsiɖeŋulawo le “se zãm tsɔ le fu wɔm” Yehowa Ðasefowo la, míewɔa se ŋu dɔ tsɔ ʋlia nya nyuia ta.—Ps. 94:20.
10 Paulo da akpe na Fia Agripa bubutɔe ɖe ale si wòɖe mɔ nɛ be wòaʋli eɖokui ta la ta, eye wògblɔ be fia la nya nu tso Yudatɔwo ƒe kɔnuwo kple nyaʋiʋliwo katã ŋu. Emegbe Paulo ƒo nu tso agbe si wònɔ va yi la ŋu ale: “Menɔ agbe ɖe míaƒe subɔsubɔ ƒe kɔmama, si sẽ wu la, ƒe nudidiwo nu pɛpɛpɛ abe Farisitɔ ene.” (Dɔw. 26:5) Esi Paulo nye Farisitɔ ta la, eka ɖe edzi be Mesia la ava. Ke fifia si wòzu Kristotɔ la, etsɔ dzideƒo gblɔ be Yesu Kristoe nye ame ma si yewonɔ mɔ kpɔm na la. Ame siwo tsitre ɖe eŋu la hã xɔ nya sia dzi se be Mawu awɔ ŋugbe si wòdo na wo tɔgbuiwo la dzi. Nya sia tae wole ʋɔnu drɔ̃m Paulo ɖo. Esia na Agripa gadi geɖe wu be yease nya bubu siwo le Paulo si.
11 Esi Paulo nɔ ŋku ɖom ale si wòtu nu kple Kristotɔwo dzi la, egblɔ be: “Nye la, mexɔe se tsã be ele be mawɔ nu geɖewo atsɔ atsi tsitre ɖe Yesu Nazaretetɔ la ƒe ŋkɔ la ŋu. . . . Esi medo dziku ɖe wo [ame siwo nye Kristo yomedzelawo] ŋu vevie ta la, metia wo yome yia du bubuwo hã me.” (Dɔw. 26:9-11) Menye ɖe Paulo nɔ ami ɖem ɖe nyaa o. Ame geɖe nya nu tso ale si wòsẽ ŋuta le Kristotɔwo ŋu la ŋu. (Gal. 1:13, 23) Agripa anya nɔ eɖokui biam be, ‘Nu kae na ame sia ƒomevi va trɔ?’
12 Nya siwo Paulo gblɔ kplɔe ɖo la na míekpɔ ŋuɖoɖoa. Egblɔ be: “[Mexɔ] mɔɖeɖe kple ŋusẽ blibo tso nunɔlawo ƒe tatɔwo gbɔ dze mɔ yina Damasko, eye le ŋdɔ ga wuieve me esi mele mɔa dzi la, Oo Fia, mekpɔ kekeli aɖe si nu sẽ wu ɣe ƒe keklẽ la wòtso dziƒo klẽ ƒo xlãm, eye wòƒo xlã ame siwo le mɔa zɔm kplim hã. Eye esi mí katã míedze anyi la, mese gbe aɖe wògblɔ nam le Hebrigbe me be: ‘Saul, Saul, nu ka ŋuti nèle yonyeme tim? Ne èle afɔ tum nutɔnu la, nu vevi awɔ wò.’ Ke megblɔ be: ‘Wò ame kae, Aƒetɔ?’ Eye Aƒetɔ la gblɔ be: ‘Nyee nye Yesu, ame si yome tim nèle la.’”—Dɔw. 26:12-15.
13 Hafi Paulo nakpɔ nu wɔnuku sia la, enɔ “afɔ tum nutɔnu” le kpɔɖeŋumɔ nu. Ale si ko agbatsɔlã aɖe ade abi eɖokui ŋu madzemadzee ne etsɔ eɖokui le nyikplɔti si nu le tsutsuẽ tum la, nenemae Paulo de abi eɖokui ŋu le gbɔgbɔ me esi wotsi tre ɖe Mawu ƒe lɔlɔ̃nu ŋu. Esi Yesu si wofɔ ɖe tsitre ɖe eɖokui fia Paulo le Damasko mɔ dzi la, ena ŋutsu sia si me dzo le gake menye le mɔ nyuitɔ nu o la, trɔ susu.—Yoh. 16:1, 2.
14 Le nyateƒe me la, Paulo wɔ tɔtrɔ ɖedzesiwo. Esi wònɔ nu ƒom na Agripa la, egblɔ be: “Nyemegbe ŋutega si woɖe fiam tso dziƒo la dzi wɔwɔ o, ke boŋ metsɔ gbedeasi la yi na ame siwo le Damasko la gbã, eye emegbe la, na ame siwo le Yerusalem kple Yudea nuto blibo la me kpakple dukɔwo hã, be woatrɔ dzi me, eye woatrɔ ɖe Mawu ŋu ahawɔ dɔ siwo dze dzimetɔtrɔ la.” (Dɔw. 26:19, 20) Paulo le dɔ si Yesu Kristo de asi nɛ le ŋutega si wòkpɔ le ŋdɔ ga wuieve me lɔƒo la wɔm ƒe aɖewo nye ema. Nu kawoe do tso eme? Ame siwo ɖo to nya si Paulo nɔ gbeƒã ɖemee la ɖe asi le agbe manyomanyo kple anukwaremaɖimaɖi nuwɔnawo ŋu eye wotrɔ ɖe Mawu ŋu. Ame siawo va zu dumevi nyuiwo, wobɔbɔ wo ɖokuiwo eye wowɔna ɖe se kple ɖoɖowo dzi.
15 Gake ame siwo tsi tre ɖe Paulo ŋu la metsɔ ɖeke le tɔtrɔ mawo me o. Paulo gblɔ be: “Esia tae Yudatɔwo lém le gbedoxɔa me hete kpɔ be yewoawum ɖo. Ke esi Mawu kpe ɖe ŋunye ta la, meyi edzi le ɖase ɖim na ame ŋkutawo kple ame tsɛwo siaa va se ɖe egbe sia.”—Dɔw. 26:21, 22.
16 Ele be mí Kristotɔ vavãwo míanɔ “dzadzraɖoɖi ɣesiaɣi be miaʋli” míaƒe xɔse ta. (1 Pet. 3:15) Ne míele nu ƒom na ʋɔnudrɔ̃lawo kple dziɖulawo tso míaƒe dzixɔse ŋu la, míate ŋu asrɔ̃ mɔnu si Paulo zã esime wònɔ nu ƒom na Agripa kple Festo. Ne míetsɔ ɖokuibɔbɔ ɖe ale si Biblia me nyateƒea kpe ɖe míawo ŋutɔwo kple ame bubu siwo ɖoa to míaƒe gbedeasia ŋu míetrɔ míaƒe agbenɔnɔ la, awɔ dɔ ɖe amegã siawo dzi.
18 Gake Paulo ɖo eŋu na nutodziɖula la be: “Bubutɔ Festo, nyemele aɖaʋa dzem o, nye susu le te, eye nyateƒenyawo ko gblɔm mele. Le nyateƒe me la, fia si mele nu ƒom na faa dziɖeɖitɔe la nya nu siawo nyuie; . . . Fia Agripa, èxɔ Nyagblɔɖilawo dzi sea? Menya be èxɔ wo dzi se.” Agripa gblɔ be: “Esusɔ vie ko nàna matrɔ nye susu azu Kristotɔ.” (Dɔw. 26:25-28) Nya siawo, wole eme alo womele o, ɖo kpe edzi be ɖase si Paulo ɖi la wɔ dɔ ɖe fia la dzi.
Mawu Ƒe Nyaa Me Kesinɔnuwo Didi
nwtsty ƒe numeɖeɖe si le Dw 26:14
afɔ tum nutɔnu: Enye atikplɔ aɖe si wotsɔ fiaa mɔ lãwo. (Ʋɔn. 3:31) Nyagbɔgblɔ si nye “afɔ tum nutɔnu” nye lododo aɖe si dze le Helatɔwo ƒe agbalẽwo me. Enye nɔnɔmetata aɖe si me nyi dzeaglã aɖe si gbe be yemawɔ ɖe mɔfiame si wotsɔ atikplɔa le ye nam o dzi la dze le eye wòtsɔ eɖokui le etum, si na be nu vevi wɔe. Saul wɔ nu alea tɔgbi hafi va zu Kristotɔ. Esi wòtsi tsitre ɖe Yesu yomedzela siwo Yehowa Mawu nɔ megbe na ŋu la, Paulo nɔ nane si ate ŋu ana wòawɔ nu vevi eɖokui la wɔm. (Tsɔe sɔ kple Dw 5:38, 39; 1 Tim. 1:13, 14.) Le Nyg 12:11 la, woyɔ “nyikplɔti si nu le tsutsuẽ” la le kpɔɖeŋumɔ nu, wòfia nunyala ƒe nya siwo ʋãa nyaa sela be wòawɔ ɖe aɖaŋuɖoɖo dzi.
JANUARY 28–FEBRUARY 3
NU XƆASI SIWO LE MAWU ƑE NYA LA ME | DƆWƆWƆWO 27-28
15 Anɔ eme be Paulo nɔ ɖase ɖim na ame siwo nɔ tɔdziʋua me la ƒe akpa gãtɔ tso “ŋugbe si Mawu do . . . la ŋuti mɔkpɔkpɔ” la ŋu. (Dɔw. 26:6; Kol. 1:5) Fifia esi woƒe tɔdziʋua le gbagbã ge la, Paulo ate ŋu aƒo nu tso mɔkpɔkpɔ aɖe si ava kpuie si ŋu kakaɖedzi le la ŋu. Egblɔ be: “Le zã sia me la, Mawu . . . ƒe dɔla va tɔ ɖe gbɔnye gblɔ be: ‘Paulo, mègavɔ̃ o. Àtsi tsitre ɖe Kaisaro ŋkume, eye kpɔ ɖa, Mawu tsɔ ame siwo katã ɖo ʋua kpli wò la ke wò.’” Paulo gblɔ na wo be: “Nɔviwo, milé dzi ɖe ƒo, elabena mexɔ Mawu dzi se be ava eme pɛpɛpɛ abe ale si wògblɔe nam ene. Ke hã, míava si ke le ƒukpo aɖe dzi.”—Dɔw. 27:23-26.
18 Eva dzɔ be, wo va tsi Malta ƒukpo dzi le Sicily ƒe anyiehe. Dutagbedola siwo nɔ ƒukpoa dzi la, ‘nyo dɔme na wo eteƒe mekɔ o.’ (Dɔw. 28:2) Wodo dzo na amedzro siawo siwo ƒo tsi belee eye vuvɔ le wo wɔm wole ƒoƒom kpakpakpa la be woaƒu. Dzoa kpe ɖe wo ŋu be dzo ɖo lãme na wo togbɔ be tsi dza eye vuvɔ nɔ wɔwɔm hã. Esia na nukunu aɖe hã dzɔ.
21 Kesinɔtɔ aɖe si ŋkɔe nye Publio si si anyigba le la le nutoa me. Anɔ eme be eyae nye Roma-srafomegã si le Malta. Luka ɖɔe be enye ‘amegã aɖe si le ƒukpoa dzi,’ eye esia sɔ kple dzesideŋkɔ si tututu dze le Maltatɔwo ƒe nuŋlɔɖi eve aɖewo me. Enyo dɔme na Paulo kple ame siwo nɔ mɔa zɔm kplii la ŋkeke etɔ̃. Ke hã Publio fofo dze dɔ. Luka gaɖɔ ale si nɔnɔmea le na Publio fofo wòde pɛpɛpɛ. Egblɔ be ŋutsua “le anyimlɔƒe, elabena asrã lée eye wòle kpeta hã dem,” esia ɖɔ dɔ si tututu lém wònɔ. Paulo do gbe ɖa eye wòda eƒe asiwo ɖe ŋutsua dzi eye wòhaya. Esi esia wɔ dɔ ɖe nutoa me tɔwo dzi ta la, wokplɔ dɔnɔ bubuwo vɛ be wòada dɔ na wo, eye wotsɔ nunanawo vɛ na Paulo kple ame siwo nɔ mɔa zɔm kplii.—Dɔw. 28:7-10.
10 Esi mɔa zɔlawo va ɖo Roma mlɔeba la, “woɖe mɔ na Paulo be wòanɔ eɖokui si, gake asrafo nanɔ eŋu dzɔm.” (Dɔw. 28:16) Zi geɖe la, wodea kɔsɔkɔsɔ ame siwo womede gaxɔ ŋutɔŋutɔ me o la tsina ɖe asrafo si le wo ŋu dzɔm la ŋu. Togbɔ be ele alea hã la, Paulo nɔ gbeƒã ɖem tso Fiaɖuƒea ŋu, eye kɔsɔkɔsɔwo mena wòmia nu o. Eya ta esi wòna ŋkeke etɔ̃ eɖokui be yeatsɔ aɖi ɖe eme megbe la, eƒo Yudatɔwo ƒe ame ŋkutawo nu ƒu le Roma ne yeaɖe ye ɖokui afia wo eye yeaɖi ɖase na wo.
Mawu Ƒe Nyaa Me Kesinɔnuwo Didi
nwtsty ƒe numeɖeɖe si le Dw 27:9
Avuléŋkeke ƒe nutsitsidɔ la: Egɔmeɖeɖe tẽe, “nutsitsidɔ la.” Helagbe me nya si nye “nutsitsidɔ la” fia nutsitsidɔ ɖeka si ŋu woƒo nu tsoe le Mose ƒe Sea me, si nye nutsitsidɔ si wowɔna ƒe sia ƒe le Avuléŋkekea dzi, wogayɔnɛ be Yom Kippur (Hebrigbe, yohm hak·kip·pu·rimʹ, “avulélewo ƒe ŋkeke”). (3 Mose 16:29-31; 23:26-32; 4 Mose 29:7; kpɔ Nya Tɔxɛwo Gɔmeɖeƒe, “Avuléŋkeke.”) Zi geɖe la, wosea nyagbɔgblɔ ‘woawɔ fu ame ɖokui,’ si wozã wòdo ƒome kple Avuléŋkekea gɔme be, woate nu ame ɖokui le mɔ vovovowo nu, eye nutsitsidɔ hã le eme. (3 Mose 16:29, etenuŋɔŋlɔ) Nya “nutsitsidɔ la,” si wozã le Dɔw. 27:9 ɖo kpe edzi be nu si koŋ wowɔna le Avuléŋkekea dzi tsɔ tea nu ame ɖokui ye nye nutsitsidɔ. Wotsia nu dɔ le avuléŋkekea dzi le September ƒe nuwuwu alo October ƒe gɔmedzedze.
nwtsty ƒe numeɖeɖe si le Dw 28:11
Zeus Viwo: Le Helatɔwo kple Romatɔwo ƒe xotutuwo me la, “Zeus Viwo” (Helagbe, Di·oʹskou·roi) ye nye Castor kple Pollux, siwo nye mawu Zeus (Jupiter) kple Spartan Fianyɔnu Leda viŋutsu siwo nye venɔviwo. Wobua wo be woawoe kpɔa ƒudzidɔwɔlawo ta, eye woxɔna na wo ne woɖo afɔku me le ƒu dzi. Nya sia si woŋlɔ ɖe tɔdziʋua ŋu la nye kpeɖodzi bubu be ame bubu aɖe hã kpɔ nudzɔdzɔa teƒe eye wòŋlɔ nu tso eŋu.
19 Míesrɔ̃ nu vevi aɖe tso nu si dzɔ ɖe Paulo dzi la me be: Míadi gbeɖe be míaƒo nya ɖe amewo nu be woagawɔ geɖe le Mawu subɔsubɔdɔwo me o. Míate ŋu atsɔ nufiame si le eme la asɔ kple nu geɖe, ke menye esiwo ku ɖe agbe kple ku ƒe nyawo ɖeɖe ko ŋu o. Le kpɔɖeŋu me, togbɔ be esesẽna na dzila aɖewo ne wo viwo dzo yi dukɔ didi aɖe me be yewoawɔ dɔ na Yehowa le afi ma hã la, woɖonɛ kplikpaa be yewomaɖe dzi le wo ƒo o. Phyllis, si le England, gblɔ ale si wòse le eɖokui me esi vianyɔnu ɖeka kolia dzo va le dutanyanyuigbɔgblɔdɔa wɔm le Africa. Egblɔ be: “Menɔ bɔbɔe nam kura o. Esesẽ nam be maxɔe ase be adzo le gbɔnye ayi teƒe didi. Melé blanui gake eganye dada nam. Medo gbe ɖa vevie tso eŋu. Gake eya ŋutɔe tso nya me nenema, eye nyemedi be magblẽ eme o. Nyae nye be mefiae enuenu be wòatsɔ Fiaɖuƒea ƒe nuwo aɖo nɔƒe gbãtɔ! Ele subɔsubɔdɔa wɔm le duta ƒe 30 sɔŋ ye nye esi va yi, eye medaa akpe na Yehowa gbe sia gbe be eyi edzi le nuteƒe wɔm nɛ.” Enyo ŋutɔ be míade dzi ƒo na mía nɔvi siwo tsɔ wo ɖokuiwo na faa la alea!