Ènyaa?
Nu kae Yesu wɔnɛ esi wògblɔ na Saul be: “Esẽ na wò be, nàda afɔkpo nutɔnu”?—Dɔwɔwɔwo 26:14, Eʋegbe Biblia.
▪ Le Biblia ƒe ɣeyiɣiwo me la, agbledelawo zãa nutɔnu tsɔ fiaa mɔ dɔwɔlãwo esime wole agble ŋlɔm. Nutɔnu nye ati aɖe si ƒe nugbɔ le tsutsuẽ si ƒe didime anɔ abe meta eve kple afã ene. Ga biɖoe nɔa eƒe akpa ɖeka. Ne lãa da afɔkpo nutɔnua la, awɔ nuvevi eɖokui. Zi geɖe la, ga si ƒe nu le gbabɛ la nɔa atia ƒe akpa kemɛ, eye wotsɔnɛ ɖea anyikɔ, ba, alo gbewo le agblenu ŋu.
Wozãa nutɔnu abe lãnu ene hã ɣeaɖewoɣi. Samgar, si nye Israel viwo ƒe ʋɔnudrɔ̃la kple aʋawɔla la “tsɔ nyikplɔti [alo nutɔnu] wu” Filistitɔ 600.—Ʋɔnudrɔ̃lawo 3:31.
Ŋɔŋlɔawo ƒo nu tso dɔwɔnu sia ŋu le kpɔɖeŋunyagbɔgblɔ nu hã. Le kpɔɖeŋu me, Fia Salomo ŋlɔ bena nunyala ƒe nyawo “le abe nutɔnu ene,” le gɔmesesea nu be eƒe nyawo ate ŋu ade dzi ƒo na exɔlɔ̃a be wòawɔ nyametsotso nyuitɔ.—Nyagblɔla 12:11, NW.
Nya si Yesu, si wofɔ ɖe tsitre ɣemaɣi, nɔ gbɔgblɔm na Saul la nye kpɔɖeŋunyagbɔgblɔ. Enɔ nu xlɔ̃m Saul, si nye Kristotɔwo yome tila la, be wòadzudzɔ ‘afɔkpodada nutɔnu.’ Kpɔɖeŋu sia ana míakpɔ ale si nuwo anɔ na lã aɖe si gbe be yemawɔ agbledelaa ƒe mɔfiamewo dzi o la le susu me. Saul wɔ nu le nunya me, ewɔ Yesu ƒe aɖaŋuɖoɖoa dzi, eye wòtrɔ eƒe agbenɔnɔ heva zu apostolo Paulo.
Aleke ƒe alafa gbãtɔ me Yudatɔwo wɔna nyaa gaƒoƒo si me wole ne zã do?
▪ Yudatɔ siwo nɔ anyi le ƒe alafa gbãtɔ Mía Ŋɔli me la tea ŋu zãa ɣegaƒoƒofianu tsɔ bua gaƒoƒoe ne yame kɔ le ŋkekea me. Ke hã, ne alilikpowo xe ɣea ŋkume alo zã do la, wozãa clepsydra, alo tsigaƒoƒofianu. To vovo na Yudatɔwo la, blema Egiptetɔwo, Persiatɔwo, Helatɔwo, kple Romatɔwo hã zãnɛ.
Numekugbalẽ si nye The Jewish Encyclopedia, ɖee fia be blemagbalẽ siwo nye Mishnah kple Talmud la siaa yɔ ŋkɔ vovovowo na clepsydra la, “ɖewohĩ le esi woƒe wɔwɔme nɔa vovovo ta, ke hã, gɔmesese ɖekae le ŋkɔ vovovoawo ŋu; eyae nye ale si tsia nɔ gegem toŋtoŋ, alo ne míagblɔe bubui la, ale si tsia nɔ sisim blewu, si nye gɔmesese si le nya ‘clepsydra’ ŋu le Helagbe me.”
Aleke gaƒoƒofianu sia wɔa dɔe? Woŋɔa do vi aɖe ɖe nugo aɖe gɔme bena tsi si wokɔ ɖe goa me la nato doa me akɔ ɖe nugo bubu me. Ame aɖe ate ŋu anya gaƒoƒo si me wòle ne ekpɔ afi si tsia ɖo le nugo etametɔ alo etetɔ me, elabena wowɔ dzesidewo ɖe nugoawo kple eve ŋu si fiaa ame gaƒoƒo si me wòle.
Le Roma asrafowo ƒe asaɖawo me la, wozãa gaƒoƒofianu sia tsɔ nyana zãdzɔɣi si me wole. Wokua kpẽ ne ɣeyiɣia de be dzɔlawo naɖɔ li wo nɔewo. Ame sia ame si see la anya zãdzɔɣi eneawo dometɔ ɖe sia ɖe ƒe gɔmedzedze kple nuwuwu.—Marko 13:35.