Nu Ka Tae Nu Vɔ̃ɖi Wɔwɔ Kple Fukpekpe Li Ðo?

Ne afɔku aɖe dzɔ la, ame geɖe gblɔna be, “Nu ka tae nu sia dzɔ ɖo?” Gake edzɔ dzi na mí ŋutɔ be Biblia ɖo nya sia ŋu na mí eme kɔ nyuie!

1. Nu kae Satana wɔ si he nu vɔ̃ɖi wɔwɔ va xexea me?

Satana Abosam dze aglã ɖe Mawu ŋu. Satana di be yeaɖu ame bubuwo dzi, eya ta, eble amegbetɔ gbãtɔ siwo nye Adam kple Xawa ale be woawo hã wodze aglã ɖe Mawu ŋu. Ale si Satana wɔ esia ye nye be eda alakpa na Xawa. (1 Mose 3:1-5) Ena Xawa susui be Yehowa nɔ nu nyui aɖe tem eyama. Eƒe nyawo fia be amegbetɔwo akpɔ dzidzɔ wu ne womeɖo to Mawu o. Satana ka aʋatso gbãtɔ esi wògblɔ na Xawa be mele kuku ge o. Esia tae Biblia yɔ Satana be “aʋatsokala kple aʋatsokafofo” ɖo.—Yohanes 8:44.

2. Nu kae Adam kple Xawa wɔ?

Yehowa na nu nyui geɖewo Adam kple Xawa. Egblɔ na wo be woate ŋu aɖu ati siwo le Eden-bɔa me la dometɔ ɖe sia ɖe ƒe tsetse faa, negbe ɖeka ko. (1 Mose 2:15-17) Gake wosẽ to eye woɖu ati si ŋu Mawu de se ɖo la ƒe tsetse. Xawa ‘gbe eƒe tsetse la ƒe ɖe heɖu.’ Emegbe, Adam ‘hã ɖui.’ (1 Mose 3:6) Wo ame evea siaa meɖo to Mawu o. Esi Adam kple Xawa de blibo ta la, enɔa bɔbɔe na wo le dzɔdzɔme nu be woawɔ nu si le eteƒe. Gake esi woɖoe koŋ gbe toɖoɖo Mawu ta la, wowɔ nu vɔ̃, eye woƒe nuwɔna sia ɖee fia be wogbe be Mawu megaɖo nu si yewoawɔ la na yewo o. Woƒe tomaɖomaɖoa wɔe be wokpe fu geɖe ŋutɔ.—1 Mose 3:16-19.

3. Aleke nu si Adam kple Xawa wɔ la gblẽ nu le mía ŋui?

Esi Adam kple Xawa wɔ nu vɔ̃ ta la, wozu ame madeblibowo, eya ta, woƒe dzidzimeviwo katã nyi blibomademade ƒe dome tso wo gbɔ. Biblia gblɔ tso Adam ŋu be: “To ame ɖeka dzi nu vɔ̃ va xexea me, eye to nu vɔ̃ me ku la va, ale ku la kaka ɖe amewo katã dome.”—Romatɔwo 5:12.

Míekpea fu le susu vovovowo ta. Ɣeaɖewoɣi la, míekpea fu le esi míawo ŋutɔwo míetso nya me nyuie o ta. Ɣeaɖewoɣi hãa, míekpea fu le ame bubuwo ƒe nyametsotso gbegblẽwo ta. Eye ɣeaɖewoɣi hãa, míekpea fu le esi afɔku aɖe dzɔ ɖe mía dzi le vo me ta.—Xlẽ Nyagblɔla 9:11.

SRƆ̃ NU BUBUWO

4. Ame si gbɔ míaƒe fukpekpewo tso

Ame geɖe xɔe se be Mawue le xexe sia dzi ɖum. Gake nyateƒe yea? Mikpɔ VIDEOA.

VIDEO: Ame Kae Le Xexe Sia Dzi Ðum? (1:24)

Mixlẽ Yakobo 1:13 kple 1 Yohanes 5:19, eye miadzro nyabiase sia me:

• Mawu gbɔe nu vɔ̃ɖi wɔwɔ kple fukpekpewo tsoa?

5. Nu kawoe do tso Satana ƒe dziɖuɖu me?

VIDEO: Nu Ka Tae Mawu Ðe Mɔ Fukpekpe Li?—Videoa Ƒe Akpa Aɖe (3:07)

Mixlẽ 1 Mose 3:1-6, eye miadzro biabia siawo me:

• Alakpa kae Satana da?—Kpɔ kpukpui 4 kple 5 lia.

• Nya kae Satana gblɔ si na wòdze abe ɖe Yehowa le nu nyui aɖe tem amegbetɔwo ene?

• Aleke Satana na wòdze abe mehiã be Yehowa naɖu amegbetɔwo dzi hafi woakpɔ dzidzɔ o ene?

Mixlẽ Nyagblɔla 8:9, eye miadzro nyabiase sia me:

• Esi wònye be menye Yehowae le xexe sia dzi ɖum o ta la, aleke nɔnɔmeawo le?

1. A. Adam kple Xawa de blibo esime wonɔ Paradisoa me. Gake wova ɖo to Satana eye wodze aglã ɖe Yehowa ŋu

2. B. Woƒe aglãdzedzea wɔe be nu vɔ̃, fukpekpe kple ku va xɔ xexea me

3. D. Yehowa ava ɖe nu vɔ̃, fukpekpe kple ku ɖa. Amegbetɔwo agava de blibo, eye woanɔ agbe le Paradiso me

6. Yehowa sea veve ɖe mía nu ne míele fu kpem

Ðe Mawu sea veve ɖe mía nu ne míele fu kpema? Bu nya si Fia David kple apostolo Petro gblɔ ŋu kpɔ. Mixlẽ Psalmo 31:7 kple 1 Petro 5:7, eye miadzro nyabiase sia me:

• Esi nèkpɔe be Yehowa nya fu siwo kpem míele eye wòsea veve ɖe mía nu la, aleke esia na nèse le ɖokuiwò me?

NU SIWO MÍESRƆ̃

Satana Abosam kple Adam kpakple Xawa koŋ gbɔe wòtso be fukpekpe va le xexea me. Yehowa sea veve ɖe mía nu ŋutɔ ne míele fu kpem, eye ava ɖe míaƒe fukpekpewo ɖa kpuie.

Numetoto

• Alakpanya kae Satana Abosam gblɔ na Xawa?

• Aleke Adam kple Xawa ƒe aglãdzedzea gblẽ nu le mí katã ŋui?

• Aleke míewɔ nya be Yehowa sea veve ɖe mía nu ne míele fu kpem?

KU NU ME TSO NYATIA ŊU

Xlẽ nu tso nu si Biblia gblɔ be nu vɔ̃ nye la ŋu.

“Nu Kae Nye Nu Vɔ̃?” (Nyati sia le jw.org)

Le nyati sia me la, àkpɔ numeɖeɖe bubuwo ku ɖe nya si Satana Abosam fɔ ɖe te le Eden-bɔa me la ŋu.

“Nu Ka Tae Mawu Ðe Mɔ Fukpekpe Li Ðo?” (Gbetakpɔxɔ, January 1, 2014)

Àkpɔ nyabiase sesẽ aɖe ƒe ŋuɖoɖo fakɔnamewo le nyati sia me.

“Nu Ka Tae Mawu Ðe Mɔ Nazitɔwo Tsrɔ̃ Yudatɔwo?” (Nyati sia le jw.org)

Le video sia me la, àkpɔ nu si ŋutsu aɖe va nya ku ɖe fukpekpe siwo teƒe kpɔm wònɔ la ŋu.

Nyemegatsi Akogo Azɔ O (5:09)

Nu si gbɔ wòtso be míewɔa nu vɔ̃, míekpea fu, eye míekuna ye nye be, atsu kple asi gbãtɔ siwo nye Adam kple Xawa gbe toɖoɖo Mawu.a Gake mɔkpɔkpɔ li na mí. Yehowa dɔ Via, Yesu Kristo, ɖe anyigba dzi be wòava ku ɖe mía ta, ale be míavo tso nu vɔ̃ kple ku si me. Biblia na míenya be esi Yesu ku la, eto esia me xe fe ɖe mía ta. Nu kae nye tafe? Tafe nye fe si woxena be woaɖe asi le ame aɖe ŋu. Nu si Yesu tsɔ xe fe ɖe mía tae nye eƒe agbe debliboa. (Xlẽ Mateo 20:28.) Gome nɔ Yesu si be wòanɔ agbe tegbee le anyigba dzi hafi, gake elɔ̃ faa ku ɖe mía ta, ale be nu siwo katã Adam kple Xawa bu na mí la nava su mía si. Azɔ hã, Yesu na míenya ale si gbegbe eya ŋutɔ kple Yehowa siaa lɔ̃ míi. Nusɔsrɔ̃ sia akpe ɖe ŋuwò be nàgakpɔ ŋudzedze ɖe ale si Yesu tsɔ eƒe agbe sa vɔ ɖe mía ta la ŋu geɖe wu.

1. Aleke Yesu ƒe kua ɖea vi na mí egbea?

Esi míenye nu vɔ̃ mewo ta la, míewɔa nu geɖe siwo medzea Yehowa ŋu o. Gake ne míese veve ɖe míaƒe nu vɔ̃wo ta tso dzi me eye míedo gbe ɖa na Yehowa le Yesu Kristo ƒe ŋkɔ me be wòatsɔ míaƒe nu vɔ̃wo ake mí eye míedze agbagba vevie be míagawɔ vodada mawo ake o la, mía kple Mawu dome ate ŋu anɔ kplikplikpli. (1 Yohanes 2:1) Biblia gblɔ be: “Kristo ku zi ɖeka ɖe ɣeyiɣiawo katã nu ɖe nu vɔ̃wo ta, ame dzɔdzɔe ɖe ame madzɔmadzɔwo teƒe, ne wòakplɔ mi ayi Mawu gbɔ.”—1 Petro 3:18.

2. Aleke Yesu ƒe kua aɖe vi na mí le etsɔme?

Yehowa dɔ Yesu wòva tsɔ eƒe agbe debliboa sa vɔe, “be ame sia ame si xɔa [Yesu dzi] sena la nagatsrɔ̃ o, ke boŋ wòakpɔ agbe mavɔ.” (Yohanes 3:16) Le Yesu ƒe vɔsaa ta la, Yehowa ava ɖɔ nu siwo katã Adam ƒe tomaɖomaɖoa gblẽ le eƒe dzidzimeviwo ŋu la ɖo kpuie. Esia fia be, ne míeɖenɛ fiana be míexɔ Yesu ƒe vɔsaa dzi se la, ekema mɔnukpɔkpɔ asu mía si be míava nɔ agbe tegbee le paradiso me le anyigba dzi!—Yesaya 65:21-23.

SRƆ̃ NU BUBUWO

3. Yesu ƒe kua naa ablɔɖe mí tso nu vɔ̃ kple ku si me

VIDEO: Nu Ka Tae Yesu Ku?—Akpa 1 (2:01)

• Esi Adam gbe toɖoɖo Mawu ta la, mɔnukpɔkpɔ nyui kae ge le esi?

Mixlẽ Romatɔwo 5:12, eye miadzro biabia sia me:

• Nu kae Adam ƒe nu vɔ̃a gblẽ le ŋuwò?

Mixlẽ Yohanes 3:16, eye miadzro biabia sia me:

• Nu ka tae Yehowa dɔ Via ɖe anyigba dzi?

1. Adam nye ame deblibo si gbe toɖoɖo Mawu, eye eto esia me kplɔ amegbetɔwo katã de nu vɔ̃ kple ku me

2. Yesu nye ame deblibo si ɖo to Mawu, eye esia wɔe be mɔnukpɔkpɔ su amegbetɔwo si be woava de blibo eye woanɔ agbe tegbee

4. Yesu ƒe kua ate ŋu aɖe vi na amewo katã

VIDEO: Nu Ka Tae Yesu Ku?—Akpa 2 Lia (2:00)

• Aleke ame ɖeka ƒe ku ate ŋu aɖe vi na amewo katã?

Mixlẽ 1 Timoteo 2:5, 6, eye miadzro biabia sia me:

• Ame debliboe Adam nye, gake esi wòwɔ nu vɔ̃ ta la, esia wɔe be amegbetɔwo katã wɔa nu vɔ̃ eye wokuna. Ame debliboe Yesu hã nye. Nu nyui kawoe do tso Yesu ƒe kua me si ɖee fia be enye “tafe si sɔ ɖe enu”?

5. Yehowa na Via va ku ɖe tawò

Yehowa ƒe xɔlɔ̃wo bua tafea be enye nunana tso egbɔ na yewo. Esia ƒe kpɔɖeŋu aɖe dze le Galatiatɔwo 2:20. Mixlẽe, eye miadzro biabia sia me:

• Aleke apostolo Paulo ɖee fia be yebua tafea be enye nunana tso Yehowa gbɔ na ye?

Esi Adam wɔ nu vɔ̃ ta la, esia he ku vɛ na eya ŋutɔ kple eƒe dzidzimeviwo katã. Gake Yehowa dɔ Via wòva ku ale be mɔnukpɔkpɔ nate ŋu asu asiwò be nàva nɔ agbe tegbee.

Ne miele mawunyakpukpui siwo gbɔna xlẽm la, de ŋugble le ale si Yehowa anya se le eɖokui me esi wòkpɔ Via wònɔ fu kpem la ŋu. Mixlẽ Yohanes 19:1-7, 16-18, eye miadzro biabia sia me:

• Aleke nèse le ɖokuiwò me tso nu si Yehowa kple Yesu wɔ na wò la ŋu?

NU SIWO MÍESRƆ̃

Le Yesu ƒe kua ta la, Yehowa ate ŋu atsɔ míaƒe nu vɔ̃wo ake mí, eye míate ŋu anɔ agbe tegbee.

Numetoto

• Nu ka tae Yesu ku?

• Mɔ ka nue Yesu ƒe agbe debliboa nye tafe si sɔ ɖe enu le?

• Aleke Yesu ƒe kua ate ŋu aɖe vi na wòe?

KU NU ME TSO NYATIA ŊU

Xlẽ nu tso nu si tae Biblia gblɔ be Yesu ƒe agbe debliboa nye tafe la ŋu.

“Aleke Yesu Ƒe Vɔsa Nye ‘Tafe Na Ame Geɖewo’?” (Nyati sia le jw.org)

Xlẽ nu tso nu si míehiã be míakpɔ ɖeɖe la ŋu.

“Yesu Naa Ðeɖe—Le Mɔ Ka Nu?” (Nyati sia le jw.org)

Ðe Yehowa ate ŋu atsɔ nu vɔ̃ gãwo gɔ̃ hã akea?

“Biblia Me Biabiawo Ƒe Ŋuɖoɖowo” (Gbetakpɔxɔ, May 1, 2013)

Xlẽ nyati sia be nàkpɔ ale si nusɔsrɔ̃ tso Kristo ƒe vɔsaa ŋu kpe ɖe ŋutsu aɖe ŋu wòtrɔ eƒe agbenɔnɔ.

“Nyemeganye Ŋutasẽnuwɔla O” (Nyati sia le jw.org