Agbe Mavɔ Mɔ Ðeka Kolia La
“Nyee nye mɔ la kple nyateƒe la kpakple agbe la.”—YOHANES 14:6.
1, 2. Nukae Yesu tsɔ mɔ si kplɔa ame yia agbe mavɔ me la sɔ kple, eye kpɔɖeŋua gɔme ɖe?
LE YESU ƒe Todzimawunya xɔŋkɔa me la, etsɔ agbe mavɔ mɔ la sɔ kple mɔ aɖe si dzi woazɔ ato agbo aɖe nu. De dzesii be Yesu te gbe ɖe edzi be agbemɔ sia dzi zɔzɔ menye nu bɔbɔe o, esi wògblɔ be: “Miyi ɖe agbo bii la me; elabena agbo la keke, eye mɔ la le gbadza, si kplɔa amewo yina ɖe tsɔtsrɔ̃ me, eye ame geɖewo nye amesiwo le edzi yina ɖe eme. Elabena agbo la le biie, eye mɔ la hã xaxa, si kplɔa amewo yina ɖe agbe [mavɔ] la me, eye ame ʋeewo nye amesiwo kpɔnɛ.”—Mateo 7:13, 14.
2 Èse kpɔɖeŋu sia gɔmea? Ðe mefia be mɔ ɖeka koe li si kplɔa ame yina ɖe agbe me eye be ehiã be míakpɔ egbɔ nyuie be naneke nagate mí ɖa le agbemɔ ma dzi oa? Ke nukae nye agbe mavɔ mɔ ɖeka kolia sia?
Yesu Kristo ƒe Wɔƒe
3, 4. (a) Aleke Biblia ɖe wɔƒe vevi si Yesu wɔna le míaƒe agbekpɔkpɔ me fiae? (b) Ɣekaɣie nye zi gbãtɔ si Mawu ɖee fia be ameƒomea agate ŋu anɔ agbe mavɔ?
3 Edze kɔte be wɔƒe vevi aɖe li si Yesu awɔ le mɔ ma dzi, abe alesi eƒe apostolo Petro ɖe gbeƒãe ene be: “Menye ame bubu aɖeke me xɔxɔ la le o; elabena ŋkɔ bubu aɖeke mele dziƒoa te [wu Yesu tɔ], si wona amegbetɔwo, le esi me wòle be, míakpɔ xɔxɔ la le o.” (Dɔwɔwɔwo 4:12) Nenema ke apostolo Paulo hã ɖe gbeƒãe be: “Mawu ƒe amenuvevenunana la enye agbe mavɔ le Kristo Yesu, mía Aƒetɔ me.” (Romatɔwo 6:23) Yesu ŋutɔ ɖee fia be ye dzie agbe mavɔ mɔ ɖeka kolia la to, elabena egblɔ be: “Nyee nye mɔ la kple nyateƒe la kpakple agbe la.”—Yohanes 14:6.
4 Eyata ele vevie ale gbegbe be míadze si akpa si Yesu awɔ akpɔ egbɔ be míakpɔ agbe mavɔ. Eyata mina míalé ŋku ɖe eƒe wɔƒea ŋu nyuie wu. Esi Adam wɔ nuvɔ̃ vɔ megbe la, ènya ɣeyiɣi si Yehowa Mawu gblɔ be ameƒomea agate ŋu akpɔ agbe mavɔa? Adam ƒe nuvɔ̃wɔwɔ vɔ megbe teti ye. Azɔ mina míadzro alesi wogblɔe ɖii be woatsɔ Yesu Kristo ana wòanye ameƒomea Ðela me.
Ŋugbedodovi La
5. Aleke míawɔ anya amesi nye da si ble Xawa?
5 Yehowa Mawu zã kpɔɖeŋunyagbɔgblɔ tsɔ fia Ðela si ƒe ŋugbe wòdo lae. Eɖee fia esime wònɔ fɔbunyawo gblɔm na “da” si ƒo nu na Xawa hetee kpɔ be wògbe toɖoɖo Mawu heɖu ati si ŋu wode se le nɛ. (Mose I, 3:1-5) Gake menye da ŋutɔe da ma nye o. Gbɔgbɔmenuwɔwɔ triakɔ si wode dzesi le Biblia me be “da xoxo la, esi woyɔna be: Abosam kple Satana” ye. (Nyaɖeɖefia 12:9) Satana zã lã tsɛ aɖe wònye eƒe nyanuɖela tsɔ ble Xawae. Eyata esime Mawu nɔ kufia tsom na Satana la, egblɔ nɛ be: “Made adikã mia kple nyɔnu la dome, wò dzidzime kple nyɔnu la ƒe dzidzime dome, eya [nyɔnua ƒe dzidzimevi] la agbã ta na wò, eye wò la àɖu afɔkpodzi nɛ.”—Mose I, 3:15.
6, 7. (a) Amekae nye nyɔnu si dzi ‘dzidzimevi’ la? (b) Amekae nye Ŋugbedodovi la, eye nukae wòawɔ?
6 Amekae nye “nyɔnu” sia si Satana alé fui alo adikã anɔ wo dome? Abe alesi woɖe “da xoxo” la fiae le Nyaɖeɖefia ta 12 ene la, nenema ke woɖe nyɔnu si Satana lé fui hã fiae. De dzesii le kpukpui 1 me be ‘edo ɣe, eye ɣleti le eƒe afɔ te, eye ɣletivi wuieve ƒe fiakuku le eta.’ Nyɔnu sia le tsitre ɖi na Mawu ƒe dziƒohabɔbɔ si me mawudɔla wɔnuteƒewo le, eye “ŋutsuvi” si wòdzi hã le tsitre ɖi na Mawu ƒe Fiaɖuƒe si ƒe Fiae nye Yesu Kristo.—Nyaɖeɖefia 12:1-5.
7 Ke amekae nye nyɔnua ƒe ‘dzidzimevi’ si ŋu woƒo nu tsoe le Mose I, 3:15 si “agbã ta” na Satana atsrɔ̃e ɖa? Eyae nye amesi Mawu ɖo ɖa tso dziƒo be ɖetugbi nɔaƒe aɖe nadzi to nukumɔ dzi, ẽ, eyae nye ame Yesu. (Mateo 1:18-23; Yohanes 6:38) Nyaɖeɖefia ta 12 fia be Yesu Kristo, Dziƒofia si wofɔ ɖe tsitre, amesi nye Dzidzimevia, ye axɔ ŋgɔ woawɔ aʋa atsrɔ̃ Satana eye wòaɖo ‘mía Mawu ƒe fiaɖuƒe kple eƒe Kristo ƒe dziɖuɖu’ anyi abe alesi Nyaɖeɖefia 12:10 gblɔe ene.
8. (a) Nu yeye ka ƒe ɖoɖoe Mawu wɔ si do ƒome kple eƒe tameɖoɖo le gɔmedzedzea me? (b) Amekawoe nye Mawu ƒe dziɖuɖu yeyea me tɔwo?
8 Eyata Fiaɖuƒe sia si le Yesu Kristo si me la nye nu yeye si ƒe ɖoɖo Mawu wɔ si do ƒome kple eƒe tameɖoɖo gbãtɔ si nye be amegbetɔ nase vivi le agbe mavɔ nɔnɔ me le anyigba dzi. Le Satana ƒe aglãdzedze vɔ megbe la, Yehowa wɔ ɖoɖo enumake be yeaɖe nu gbegblẽ siwo tso vɔ̃ɖinyenye me ɖa to Fiaɖuƒe dziɖuɖu yeye sia dzi. Esime Yesu nɔ anyigba dzi la, eɖee fia be menye ye ɖeɖekoe anɔ dziɖuɖu sia me o. (Luka 22:28-30) Woatia ame bubuwo tso amegbetɔƒomea dome, eye amesiawo ava kpe ɖe eŋu le dziƒo aɖu dzi kplii, eye esia awɔe be woanye nyɔnua ƒe dzidzimevi ƒe akpa evelia. (Galatiatɔwo 3:16, 29) Woyɔ Yesu ƒe hatidziɖula siawo ƒe xexlẽme le Biblia me be wonye ame 144,000—amegbetɔƒome nuvɔ̃me siwo le anyigba dzi domee wotia wo katã tsoe.—Nyaɖeɖefia 14:1-3.
9. (a) Nukata wòhiã be Yesu nava anyigba dzi ava nye amegbetɔ? (b) Aleke Yesu gblẽ Abosam ƒe dɔwo mee?
9 Gake hafi Fiaɖuƒe ma nadze dziɖuɖu gɔme la, ehiã vevie be Yesu Kristo si nye Dzidzimevia ƒe akpa vevitɔ nava anyigba dzi. Nukata? Elabena Yehowa Mawu ɖoe be wòanye amesi ‘agblẽ Abosam ƒe dɔwɔwɔwo,’ alo, aɖɔ nusiwo wògblẽ ɖo. (Yohanes I, 3:8) Satana ƒe dɔwɔwɔwo dometɔ aɖee nye alesi wòble Adam de nuvɔ̃ mee, si he nuvɔ̃ kple ku ƒe fɔbubu va Adam ƒe dzidzimeviwo katã dzi. (Romatɔwo 5:12) Yesu ɖɔ Abosam ƒe nugbegblẽ sia ɖo esime wòtsɔ Eƒe agbe na tafee. Esia wɔe be wòna gɔmeɖokpe si dzi woanɔ te ɖo aɖe amegbetɔƒomea tso nuvɔ̃ kple ku ƒe fɔbubu me eye wòʋu agbe mavɔ nɔnɔ ƒe mɔ ɖi.—Mateo 20:28; Romatɔwo 3:24; Efesotɔwo 1:7.
Nusi Tafea Wɔna
10. Aleke Yesu kple Adam wosɔe?
10 Esi wotrɔ Yesu ƒe agbe tso dziƒo va de nyɔnu aɖe ƒe vidzidɔ me ta la, wodzii amegbetɔ debliboe, Adam ƒe nuvɔ̃ manɔŋui. Agbe mavɔ nɔnɔ le anyigba dzi ƒe ŋutete le esi. Nenema ke wowɔ Adam amegbetɔ debliboe eye agbe mavɔ nɔnɔ le anyigba dzi ƒe mɔkpɔkpɔwo nɔ esi. Alesi ŋutsu eve siawo sɔ kple wo nɔewo lae nɔ susu me na apostolo Paulo esi wòŋlɔ be: “ ‘Ame gbãtɔ, Adam la, zu luʋɔ gbagbe.’ Adam [mamlɛtɔ, Yesu Kristo] zu gbɔgbɔ, si na agbe. Ame gbãtɔ, si tso anyigba me la, enye anyigbadzitɔ, ame evelia enye Aƒetɔ si tso dziƒo.”—Korintotɔwo I, 15:45, 47.
11. (a) Ŋusẽ kae Adam kple Yesu kpɔ ɖe amegbetɔƒomea dzi? (b) Aleke wòle be míabu Yesu ƒe vɔsae?
11 Wote gbe ɖe ame eve siawo—ame eve siwo koe de blibo nɔ anyigba dzi kpɔ—ƒe sɔsɔ kple wo nɔewo dzi le Biblia ƒe nyagbɔgblɔ me be Yesu “tsɔ eɖokui na tafe si sɔ ɖe enu ɖe amewo katã ta.” (Timoteo I, 2:6, NW) Amekae Yesu sɔ kple? Eyae nye Adam le ɣeyiɣi si me wòganye ame deblibo! Adam gbãtɔ ƒe nuvɔ̃ na wotso kufia na amegbetɔƒomea katã. “Adam mamlɛtɔ” ƒe vɔsa nye nusi dzi woanɔ te ɖo aɖe amewo tso nuvɔ̃ kple ku me, ale be míate ŋu anɔ agbe tegbee. Aleke gbegbe Yesu ƒe vɔsa la xɔ asii enye si! Apostolo Petro gblɔe be: “Menye nu gbegblẽ, siwo nye klosalo alo sika la, wotsɔ xe fe ɖe mia ta heɖe mi . . . o.” Ke boŋ, Petro ɖe nu me be, “Kristo ƒe ʋu xɔasi la abe alẽvi, si ŋu mokaka kple kpɔtsotso mele o la, ƒe ʋu” ye.—Petro I, 1:18, 19.
12. Aleke Biblia ƒo nu tso alesi woawɔ aɖe kufɔbubu si le mía dzi ɖa ŋui?
12 Biblia ɖe alesi woawɔ aɖe kufɔbubu si le amegbetɔƒomea dzi ɖa me nyuie be: “Alesi to vodada ɖeka [Adam tɔ] me fɔbubu va amewo katã dzi la, nenema ke to nu dzɔdzɔe wɔwɔ ɖeka [Yesu ƒe nuteƒewɔwɔgbe si katã wònɔ vaseɖe esime wòku] me agbe ƒe afiatsotsoname hã va amewo katã dzi. Elabena alesi to ame ɖeka [Adam] ƒe tomaɖomaɖo me wowɔ ame geɖewo zu nuvɔ̃wɔlawo la, nenema ke to ame ɖeka [Yesu] ƒe toɖoɖo me hã woawɔ ame geɖewo woazu ame dzɔdzɔewo.”—Romatɔwo 5:18, 19.
Ŋutikɔkɔe Mɔkpɔkpɔ Aɖe
13. Nukatae alesi ame geɖe susuna le agbe mavɔ nɔnɔ ŋu la le nenema?
13 Ele be ɖoɖo sia si Mawu wɔ nana dzi nadzɔ mí ale gbegbe! Ðe medzɔ dzi na wò be wona Ðela mí oa? Esi wobia amewo be, “Ðe agbe mavɔ nɔnɔ dzroa wòa?” le numekuku aɖe si nyadzɔdzɔgbalẽ aɖe talawo wɔ ɣeaɖeɣi le Amerika dugã aɖe me me la, nukutɔe la, amesiwo wobia gbee dometɔ alafa memamã 67.4 ɖo eŋu be, “Ao.” Nukata wogblɔ be yewomedi be yewoanɔ agbe tegbee o? Edze ƒã be esi kuxi geɖe le agbenɔnɔ le anyigba dzi me tae. Ameawo dometɔ ɖeka gblɔ be: “Medzroam be mabu alesi manɔ ne mexɔ ƒe 200 ŋu o.”
14. Nukata agbe mavɔ nɔnɔ anye vivisese blibo?
14 Gake menye xexe si me amewo anɔ agbe mavɔ le si me woadze dɔ, aku amegã, eye nu wɔnublanui bubuwo nadzɔ ɖe wo dzi ƒe nya gblɔm Biblia le o. Kura o, elabena Mawu Fiaɖuƒea ƒe Dziɖula, Yesu, aɖe kuxi siwo katã Satana he vɛ ɖa. Biblia gblɔ be Mawu Fiaɖuƒea “agbã” xexe sia me dziɖuɖu siwo tea ame ɖe to “katã, eye wòagblẽ wo.” (Daniel 2:44) Ɣemaɣi woaɖo gbe si Yesu fia eyomedzelawo be woado ɖa be “woawɔ [Mawu ƒe] lɔlɔ̃nu le anyigba dzi, sigbe alesi wowɔna le dziƒo ene” la ŋu. (Mateo 6:9, 10) Le Mawu ƒe xexe yeyea me, ne woɖe vɔ̃ɖinyenye ɖesiaɖe ɖa le anyigba dzi vɔ la, woawɔ Yesu ƒe tafea ƒe viɖewo ŋudɔ bliboe. Ẽ, lãmesẽ deblibo agaɖo amesiwo katã dze la si!
15, 16. Nɔnɔme kawoe anɔ Mawu ƒe xexe yeyea me?
15 Biblia me nya sia ava eme na Mawu ƒe xexe yeyea me tɔwo be: “Dzo aɖo eƒe lãme abe ɖekakpui ene, eye wòagaɖo eƒe ɖekakpuiŋkekewo me.” (Hiob 33:25) Biblia ƒe ŋugbedodo bubu hã ava eme be: “Ŋkuagbãtɔwo ƒe ŋku aʋu, eye tokunɔwo ƒe to aʋu; ekema xɔdrɔ̃wo ati kpo abe zi ene, eye aɖetututɔwo ƒe aɖe atso aseye.”—Yesaya 35:5, 6.
16 Bu eŋu kpɔ ko: Ƒe ka kee míexɔ ɣemaɣi o, eɖanye ƒe 80, 800, alo ɖe míegatsi wu ema o, míaƒe ametia aganɔ lãmesẽ deblibo me. Ðeko wòanɔ abe alesi Biblia do ŋugbee ene be: “Duametɔ aɖeke magblɔ be, yele dɔ lém o.” Ɣemaɣi la, ŋugbedodo sia hã ava eme be: “Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.”—Yesaya 33:24; Nyaɖeɖefia 21:3, 4.
17. Nukawoe míate ŋu akpɔ mɔ be amewo nawɔ le Mawu ƒe xexe yeyea me?
17 Le xexe yeye ma me la, míate ŋu azã míaƒe ahɔhɔ̃ wɔnukua le mɔ si nu mía Wɔla la wɔe ɖo esime wòwɔe kple nusɔsrɔ̃ ƒe ŋutete si seɖoƒe meli na o. Bu nu wɔnuku siwo míate ŋu awɔ ŋu kpɔ ko! Amegbetɔ madeblibowo gɔ̃ hã tsɔ nusiwo le anyigba ƒe tomenudzraɖoƒe wɔ nusianu si míekpɔna egbea—telefon si nɔa ame ŋu wotsɔna ɖia tsae, nuƒomɔ̃wo, gaƒoɖokuiwo, kotokumemɔ̃ siwo me woŋlɔa nya veviwo ɖo, kɔmpiutawo, yameʋuwo, ẽ, nusianu si dzi nàɖo ŋkui ko. Menye nusiwo wotsɔ tso didiƒe ʋĩ le yame aɖekee wotsɔ wɔ woe o. Esi míanɔ agbe tegbetegbe le anyigba dzi Paradiso si gbɔna me ta la, seɖoƒe manɔe na nusiwo míate ŋu awɔ o!—Yesaya 65:21-25.
18. Nukatae agbe mati ame le Mawu ƒe xexe yeyea me gbeɖe o?
18 Agbenɔnɔ mati ame akpɔ hã o. Fifia kura gɔ̃ hã la, míegale mɔ kpɔm na nusi míagaɖu, togbɔ be míeɖu nu ma kpɔ zi gbɔ zi akpe nanewo va yi hã. Ne míeɖo amegbetɔ ƒe blibodede gbɔ la, míagase vivi na Paradisonyigbaa dzi nuɖuɖu viviwo ɖe edzi wu kura. (Yesaya 25:6) Eye anye dzidzɔ na mí tso mavɔ me yi mavɔ me be míakpɔ anyigbadzilã gbogbo siwo li la dzi, akpɔ ɣe ƒe amigogbagba, to, tɔsisi, kple bali dzeaniwo. Le nyateƒe me la, agbenɔnɔ manye nu ɖeka tɔgbe ko wɔwɔ ɣesiaɣi gbeɖe le Mawu ƒe xexe yeyea me o!—Psalmo 145:16.
Mawu ƒe Nudidiwo Gbɔ Ðoɖo
19. Nukata susu le eme be míaxɔe ase be nudidiwo li hena Mawu ƒe nunana si nye agbe la xɔxɔ?
19 Ðe nàkpɔ mɔ be yeaxɔ Mawu ƒe nunana wɔnuku sia si nye agbe mavɔ nɔnɔ le Paradiso me naneke mawɔmawɔea? Ðe menye nusi me susu le be Mawu nadi nane tso mía si oa? Nyateƒee, susu le eme alea. Mawu matsɔ nunana sia aƒu gbe ɖe mí o. Etsɔe ɖo mía ŋkume, gake ele be míadze agbagba aɖo egbɔ eye míaƒe asi nasu edzi. Ẽ, ebia agbagbadzedze. Ðewohĩ àbia nya ma ke si ɖekakpui aɖe si nye dziɖula kesinɔtɔ bia Yesu, be: “Nu nyui ka mawɔ, ne makpɔ agbe mavɔ mahã?” Alo àbia nya abe alesi Filipi gaxɔdzikpɔla aɖe biae apostolo Pauloe ene be: “Nukae le nam be mawɔ, bena makpɔ ɖeɖe mahã?”—Mateo 19:16; Dɔwɔwɔwo 16:30.
20. Nudidi vevi kae li hena agbe mavɔ kpɔkpɔ?
20 Yesu yɔ nudidi vevi aɖe le zã si do ŋgɔ na eƒe ku me le gbedodoɖa na Fofoa me be: “Esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.” (Yohanes 17:3) Ðe menye nudidi si me susu le be míanya Yehowa, amesi wɔe be wòanya wɔ be míanɔ agbe mavɔ, kple Yesu Kristo, amesi ku ɖe mía ta oa? Gake ebia nu geɖe wu sidzedze sia ɖeɖeko xɔxɔ.
21. Aleke míaɖee afia be míele xɔse ɖeɖefia ƒe nudidia gbɔ ɖom?
21 Biblia gblɔ hã be: “Amesi tsɔa Via dzixɔse dea dɔwɔwɔ me la, agbe mavɔ le esi.” Eye wògagblɔ kpee be: “Amesi meɖoa to Via o la, makpɔ agbe o, ke boŋ Mawu ƒe dɔmedzoe tsia eyama dzi.” (Yohanes 3:36, NW) Àte ŋu aɖee afia be yetsɔ Vi la dzixɔxɔse le dɔ wɔm ne èwɔ tɔtrɔwo le wò agbenɔnɔ me eye nèwɔa nu wòsɔna kple Mawu ƒe lɔlɔ̃nu. Ahiã be nàɖe asi le agbe vlo si nènɔna tsã ŋu ahawɔ nusi adze Mawu ŋu. Ehiã be nàwɔ nusi ƒe se apostolo Petro de be: “Mitrɔ le miaƒe dzi me, eye migbugbɔ, be woatutu miaƒe nuvɔ̃wo, bena ne gbɔɖemeɣi nava tso Aƒetɔ la ƒe ŋku me.”—Dɔwɔwɔwo 3:19.
22. Afɔɖeɖe kawo hãe le Yesu ƒe afɔtoƒewo yomedzedze me?
22 Migana míaŋlɔe be gbeɖe o be Yesu dzixɔse tsɔtsɔ wɔ dɔe dzi koe míato hafi anɔ agbe mavɔ. (Yohanes 6:40; 14:6) Míaɖee afia be míexɔ Yesu dzi se ne ‘míedze eƒe afɔɖoƒewo yome tututu.’ (Petro I, 2:21) Nukae eyomedzedze tututu bia? Yesu kɔ gbe dzi gblɔ le gbedodoɖa me na Mawu be: “Kpɔ ɖa, megbɔna, . . . be, oo Mawu, wò lɔlɔ̃nu mawɔ!” (Hebritɔwo 10:7) Ele vevie ŋutɔ be nàsrɔ̃ Yesu alɔ̃ ɖe edzi be yeawɔ Mawu ƒe lɔlɔ̃nu eye yeatsɔ yeƒe agbe aɖe adzɔgbe na Yehowa. Le ema megbe la, ele be nàtsɔ nyɔnyrɔxɔxɔɖetsime aɖo kpe adzɔgbeɖeɖe ma dzii; Yesu hã tsɔ eɖokui na be woanyrɔ ye. (Luka 3:21, 22) Gɔmesese blibo le afɔɖeɖe siawo ŋu. Apostolo Paulo gblɔ be ‘Kristo ƒe lɔlɔ̃ la ʋãa mí.’ (Korintotɔwo II, 5:14, 15) Le mɔ ka nu? Lɔlɔ̃e ʋã Yesu be wòtsɔ eƒe agbe na ɖe mía ta. Ðe mele be ema naʋã mí be míawo hã míatrɔ ɖe eŋu atsɔ edzixɔxɔse awɔ dɔe oa? Ẽ, ele be wòaʋã mí be míasrɔ̃ eƒe amelɔlɔ̃ ƒe kpɔɖeŋu si me wòtsɔ eɖokui na wòkpe ɖe ame bubuwo ŋu. Kristo nɔ agbe hena Mawu ƒe lɔlɔ̃nu wɔwɔ; ele be míawo hã míawɔe nenema, ale be míaganɔ agbe na mía ɖokui o.
23. (a) Nuka ŋue wòle be woatsɔ amesiwo xɔ agbe la akpe ɖo? (b) Nukae wobia tso amesiwo le Kristo-hamea me si?
23 Gake mese ɖe afima o. Biblia gblɔ be esi wonyrɔ ame 3,000 le ƒe 33 M.Ŋ. ƒe Pentekostea ɖuƒe vɔ la, ‘wotsɔ wo kpe ɖe wo ŋu.’ Wotsɔ wo kpe ɖe nuka ŋu? Luka ɖe eme be: “Wonɔ apostolowo ƒe nufiafia kple habɔbɔ . . . me.” (Dɔwɔwɔwo 2:41, 42) Ẽ, wokpe ta ɖekae na Biblia sɔsrɔ̃ kpakple hadede kple wo nɔewo ale be wotsɔ wo kpe ɖe Kristo-hamea ŋu, alo wozu emetɔwo. Kristotɔ gbãtɔwo de kpekpewo hena gbɔgbɔmenufiafiawo xɔxɔ. (Hebritɔwo 10:25) Nusia kee Yehowa Ðasefowo wɔna egbea, eye wole dzi dem ƒo na wò be nàde kpekpe siawo kple yewo.
24. Nukae nye “agbe vavã la,” aleke woakpɔe eye ɣekaɣi woakpɔe?
24 Ame miliɔn geɖe le mɔ xaxɛ si kplɔa ame yia agbe me dzi fifia. Ebia agbagbadzedze be woanɔ mɔ xaxɛ sia dzi! (Mateo 7:13, 14) Paulo fia asi esia le eƒe nuxlɔ̃ame aɖe si me lɔlɔ̃ le me be: “Ʋli xɔse ƒe ʋiʋli nyui la; wò asi nasu agbe mavɔ, si ta woyɔ wò ɖo . . . la dzi.” Ʋiʋli sia hiã bene “asi nasu agbe vavã la dzi.” (Timoteo I, 6:12, 19) Menye agbe sia si me aɖukliɖuɖu kple vevesese kpakple fukpekpe siwo Adam ƒe nuvɔ̃ he ƒu mí ye nye agbe vavã ma o. Ke boŋ eyae nye agbenɔnɔ le Mawu ƒe xexe yeyea me, si madidi o wòava ne wozã Kristo ƒe tafevɔsaa na Yehowa Mawu kple Via lɔ̃lawo katã le esime woɖe nuɖoanyi sia ɖa vɔ megbe. Neva eme be mí katã míanɔ amesiwo tia agbe—“agbe vavã la”—agbe mavɔ nɔnɔ le Mawu ƒe ŋutikɔkɔexexe yeyea me dome.
Aleke Nàɖo Wo Ŋui?
◻ Amekae nye da la, nyɔnu la, kple dzidzimevi si woyɔ le Mose I, 3:15?
◻ Aleke Yesu sɔ kple Adam, eye nukae anya wɔ le tafea ta?
◻ Nukae nàte ŋu akpɔ mɔ na si ana Mawu ƒe xexeme yeyea navivi nuwò ale gbegbe?
◻ Nudidi kawo gbɔe wòle be míaɖo bene míanɔ agbe le Mawu ƒe xexe yeyea me?
[Nɔnɔmetata si le axa 10]
Yesue nye agbe mavɔ mɔ ɖeka kolia na ɖeviwo kple tsitsiawo siaa
[Nɔnɔmetata si le axa 11]
Le Mawu ƒe ɣeyiɣi ɖoɖi dzi la, ɖekakpuimeŋusẽ agaɖo ame tsitsiwo ŋu