Mikpɔ Nyuie le Aʋatsonufialawo Ŋu!

“Aʋatsonufialawo lava miawo hã mia dome.”—PETRO II, 2:1.

 1. Nuka ŋue Yuda di be yeaŋlɔ nu le hafi, eye nukatae wòva ŋlɔ nu tso nu bubu ŋu?

NUKUNYA kae nye si! Be aʋatsonufialawo nɔ ƒe alafa gbãtɔ me Kristo-hamea me! (Mateo 7:15; Dɔwɔwɔwo 20:29, 30) Yesu dadavi Yuda nya nu tso nya sia ŋu. Egblɔ be ɖe yeɖoe gbã be yeaŋlɔ agbalẽ na haxɔsetɔwo ‘le mí katã míaƒe xɔxɔ ŋuti’ aɖo ɖe wo hafi, gake eɖe nu me be: “Ezu dzizizi nam be, maŋlɔe atsɔ axlɔ̃ nu mi, bene miaʋli xɔse, si wode asi na ame kɔkɔewo zi ɖeka ɖe ɣeyiɣiawo katã nu la ta.” Nukatae Yuda trɔ nusi wòdi be yeaŋlɔ la? Egblɔ be nusitae nye be “ame aɖewo va tra ɖe [hameawo me] dzaa, . . . amesiwo trɔa mía Mawu ƒe amenuveve yina ɖe agbe baɖa nɔnɔ me.”—Yuda 3, 4.

 2. Nukatae Petro II, ta 2 kple Yuda ƒe agbalẽa me nyawo ɖi wo nɔewo?

² Edze abe ɖe Yuda ŋlɔ eƒe agbalẽa ɣeyiɣi kpui aɖe le Petro ƒe agbalẽ evelia ŋɔŋlɔ vɔ megbe ene. Ðikekemanɔmee la, Yuda nya nu tso lɛta sia me nyawo ŋu nyuie. Edze ƒã be egblɔ nya siwo ɖi etɔ le eya ŋutɔ ƒe nuxlɔ̃amelɛta sesẽ la me. Eyata esi míele Petro II, ta 2, me dzrom la, míakpɔ alesi wòɖi Yuda ƒe agbalẽae ɖa.

Nusiwo Aʋatsonufiafia Gblẽna

 3. Nukae dzɔ kpɔ le blema si Petro gblɔ be agadzɔ ake?

³ Esi Petro xlɔ̃ nu nɔviawo be woalé ŋku ɖe nyagblɔɖinya la ŋu vɔ la, egblɔ be: “Ke aʋatsonyagblɔɖilawo va tsi tre le [blema Israel-dukɔ] la dome, abe alesi aʋatsonufialawo lava miawo hã mia dome ene.” (Petro II, 1:14–2:1) Nyagblɔɖi siwo nye nyateƒee wotsɔ na Mawu ƒe amewo le blema, gake ehiã be woatsi tre ɖe aʋatsonyagblɔɖilawo ƒe nufiafia totrowo hã ŋu. (Yeremya 6:13, 14; 28:1-3, 15) Yeremya ŋlɔ be: “Mekpɔ ŋunyɔnuwɔwɔ le nyagblɔɖila, siwo le Yerusalem la ŋu: Wole amatre wɔm, wole alakpadada dzi.”—Yeremya 23:14.

 4. Nukatae aʋatsonufialawo dze na tsɔtsrɔ̃?

⁴ Esi Petro nɔ nu ƒom le nusi aʋatsonufialawo awɔ le Kristo-hamea me ŋu la, egblɔ be: “[Amesiawo] latsɔ gbegblẽ ƒe kɔmamãwo ava tra ɖe eme dzaa, eye woagbe nu le Aƒetɔ [Yesu Kristo], si xe fe ɖe wo ta gbɔ, eye woahe gbegblẽ kpatakpata ava wo ɖokui dzi.” (Petro II, 2:1; Yuda 4) Nusi va do tso ƒe alafa gbãtɔ me kɔmamã me mlɔebae nye Kristodukɔa si míenya egbea. Petro ɖe nusita aʋatsonufialawo dze na tsɔtsrɔ̃ vevie la me be: “Ame geɖewo adze woƒe hadzenuwɔwɔwo yome, amesiwo ta woagblɔ busunya ɖe nyateƒemɔ la ŋuti ɖo.”—Petro II, 2:2.

 5. Nugbegblẽwɔwɔ kawoe tso aʋatsonufialawo gbɔ?

⁵ Bu eŋu kpɔ! Le aʋatsonufialawo ƒe ŋusẽkpɔɖedzi ta ame geɖewo anɔ hadzegbe le hamea me. Helagbe me nya si gɔme woɖe be “hadzegbenɔnɔ” fia mɔɖeɖe ɖe agbegbegblẽnɔnɔ ŋu faa, ɖokuidzimaɖumaɖu, gbegblẽnuwɔwɔ, yakanuwɔwɔ, kple ŋukpenanuwɔwɔ. Petro gblɔ do ŋgɔ be Kristotɔwo “[si] tso nudzodzrowo ƒe gbegblẽ, si le xexe sia me la gbɔ.” (Petro II, 1:4) Gake ame aɖewo gale tɔtrɔ ge ayi ɖe gbegblẽ ma me ake, eye aʋatsonufiala siwo le hameawo me gbɔe esia ƒe akpa gã aɖe atso! Ana be woado vlo nyateƒe la. Ewɔ nublanui ŋutɔ! Nyateƒee, nya si ŋu wòle be Yehowa Ðasefo ɖesiaɖe nalé ŋku ɖo nyuie ye nya sia nye. Mele be míaŋlɔe be akpɔ gbeɖe o be míaƒe agbenɔnɔ ana woakafu Yehowa Mawu kple eƒe amewo loo alo woado vlo wo.—Lododowo 27:11; Romatɔwo 2:24.

Aʋatsonufiafiawo Toto Vɛ

 6. Nukae ʋãa aʋatsonufialawo, eye aleke wodina be yewoawɔ akpɔ nusi dim yewole?

⁶ Nunya le eme be míade dzesi alesi aʋatsonufialawo tsɔa woƒe tamebubu gbegblẽ la vaa hamea mee. Petro gblɔ be gbã la, wowɔnɛ dzaa, alo le ayemɔ si madze gaglãa o nu. Egblɔ kpee be: “Le ŋukeklẽ me woatsɔ nyakpakpawo adi viɖe le mia ŋu.” Ŋukeklẽe dɔa aʋatsonufialawo, abe alesi wona wòdze kɔte le The Jerusalem Bible mee ene be: “Woatsɔ ameblenyawo adi vevie be yewoaƒle mi na wo ɖokui.” James Moffatt ƒe gɔmeɖeɖe hã gblɔ nya sia tɔgbe ke le afisia be: “Le woƒe nudzodzro me woatsɔ ayemenyawo adi viɖe le mia ŋu.” (Petro II, 2:1, 3) Aʋatsonufialawo ƒe numenyawo adze nya siwo me susu le na amesi mele ŋudzɔ le gbɔgbɔ me o, gake ɖe wotrɔ asi le wo ŋu aɖaŋutɔe be yewoatsɔ ‘aƒle’ amewoe, eye wokplɔa amesiwo woble dea wo blelawo ƒe ɖokuitɔdidinuwo wɔwɔ me.

 7. Xexemenufiafia kae va bɔ le ƒe alafa gbãtɔ me?

⁷ Ðikekemanɔmee la, xexemetɔwo ƒe nukpɔsusu si nɔ anyi ɣemaɣie kpɔ ŋusẽ ɖe ƒe alafa gbãtɔ me aʋatsonufialawo dzi. Le Petro ƒe ɣeyiɣia me lɔƒo la, xexemenunyafiafia aɖe si woyɔna be Sidzedzeha nɔ bɔbɔm. Sidzedzehametɔwo xɔ edzi se be nusianu si nye ŋutilãmenu la nye nu gbegblẽ eye be gbɔgbɔmenuwo koe nyo. Eyata wo dometɔ aɖewo gblɔ be nusi amegbetɔ tsɔ eƒe ŋutilã wɔe mele vevie o. Wogblɔna be mlɔeba la, ŋutilã sia megagbɔna amegbetɔ tɔ nye ge o. Eyata woƒo nya ta be ŋutilãmenuvɔ̃wo—si me gbɔdɔdɔ tɔwo hã le—menye naneke o. Edze abe ɖe nukpɔsusu siawo va nɔ ŋusẽ kpɔm ɖe amesiwo gblɔ be Kristotɔwoe yewonye dzi ene.

 8, 9. (a) Nuŋububu totro kae gblẽ nu le Kristotɔ gbãtɔ aɖewo ŋu? (b) Nukae Yuda gblɔ be ame aɖewo nɔ wɔwɔm le hameawo me?

⁸ Biblia-nyala aɖe de dzesii be “ame aɖewo nɔ Ha la me siwo trɔ gbo amenuveve nufiafia la.” (Efesotɔwo 1:5-7) Egblɔ be ale tɔgbe wo dometɔ aɖewo bua tamee: “Ðe nèle gbɔgblɔm be Mawu ƒe [amenuveve] sɔ gbɔ kakaka atsyɔ nuvɔ̃ ɖesiaɖe dzia? . . . Ke mina míayi nuvɔ̃wɔwɔ dzi, elabena Mawu ƒe [amenuveve] ate ŋu atutu nuvɔ̃ ɖesiaɖe ɖa. Le nyateƒe me, zi alesinu míewɔ nuvɔ̃ la, zi nenemae Mawu ƒe [amenuveve] akpɔ mɔnu awɔ dɔe.” Èse nya aɖe si gatro wu ema kpɔa?

⁹ Apostolo Paulo tsi tre ɖe nukpɔsusu masɔmasɔ si nɔ amewo si le Mawu ƒe nublanuikpɔkpɔ ŋu esi wòbia be: “Ðe míaganɔ nuvɔ̃ me, bene amenuveve la nasɔ gbɔ ɖe dzia?” Egabia be: “Esi míegale se la te o, hafi amenuveve la te boŋ míele ŋuti la, míaganɔ nuvɔ̃wɔwɔ dzi mahã?” Paulo ɖo biabiaa ɖesiaɖe ŋu ŋusẽtɔe be: “Gbeɖe!” (Romatɔwo 6:1, 2, 15) Edze kɔte, abe alesi Yuda de dzesii ene, be ame aɖewo “trɔa mía Mawu ƒe amenuveve yina ɖe agbe baɖa nɔnɔ me.” Gake Petro gblɔe be ame mawo ƒe ‘tsɔtsrɔ̃ mele akɔlɔ̃e dɔm o.’—Yuda 4; Petro II, 2:3.

Nuxlɔ̃amekpɔɖeŋuwo

10, 11. Nuxlɔ̃amekpɔɖeŋu etɔ̃ kawoe Petro gblɔ?

¹⁰ Petro gblɔ Ŋɔŋlɔawo me nuxlɔ̃amekpɔɖeŋu etɔ̃ tsɔ te gbe ɖe edzi be Mawu atso ɖe amesiwo bua wɔa nu gbegblẽ ŋu. Gbã, eŋlɔ be: “Mawu mekpɔ mawudɔla wɔnuvɔ̃wo ƒe nublanui o.” Yuda gblɔ be mawudɔla siawo “medzra woƒe amegãnyenye ɖo o, ke wogblẽ woa ŋutɔwo ƒe nɔƒe ɖi” le dziƒo. Wova anyigba dzi do ŋgɔ na Tsiɖɔɖɔa va do amegbetɔ ƒe ŋutilã be woadɔ kple amegbetɔvi nyɔnuwo. Wotsɔ wo ƒu gbe ɖe “Tartarus” (NW) tsɔ he to na woe, alo abe alesi Yuda ƒe nuŋlɔɖia gblɔe ene la, “wotsɔ kɔsɔkɔsɔ mavɔwo bla wo hedzra wo ɖo ɖe viviti tsiɖitsiɖi me hena ŋkeke gã la ƒe ʋɔnudɔdrɔ̃.”—Petro II, 2:4; Yuda 6; Mose I, 6:1-3.

¹¹ Azɔ Petro yi edzi ƒo nu tso Noa ƒe ŋkekea me tɔwo ŋu. (Mose I, 7:17-24) Egblɔ be le Noa ƒe ŋkekea me la, Mawu “mekpɔ blema xexeme la ƒe nubanui o, . . . esime wòhe tɔɖɔɖɔ va ame mavɔ̃mawuwo ƒe xexeme dzi.” Mlɔeba Petro ŋlɔ be Mawu ɖo “kpɔɖeŋu na amesiwo ava nɔ agbe le mawumavɔ̃mavɔ̃ me” esi “wòna Sodom kple Gomora ƒe duwo zu afi.” Yuda gblɔ nya bubu siawo kpee be ame mawo “wɔ ahasi akpa . . . eye wodze ŋutilã bubu yome.” (Petro II, 2:5, 6; Yuda 7) Menye nyɔnuwo gbɔ dɔdɔ manɔsenu me koe ŋutsuwo kpɔ gome le o ke ŋutsu bubuwo ƒe ŋutilã hã ƒe dzodzro ho ɖe wo me, anɔ eme be lã nyasamanɔsitɔwo ke hã ƒe ŋutilã dzro wo.—Mose I, 19:4, 5; Mose III, 18:22-25.

12. Aleke Petro gblɔ be woɖoa nudzɔdzɔewɔwɔ teƒe na amee?

¹² Gake le ɣeyiɣi ma ke me la, Petro gblɔ be Yehowa ɖoa eteƒe na amesiwo subɔnɛ le nuteƒewɔwɔ me. Le kpɔɖeŋu me, egblɔ alesi Mawu ‘kpɔ Noa, dzɔdzɔenyenye ƒe gbeƒãɖela ta, hekpe ɖe ame adre bubuwo ŋu’ esime Wòhe Tsiɖɔɖɔa vɛ. Egblɔ alesi Yehowa ɖe “Lot dzɔdzɔetɔ” le Sodomtɔwo ŋɔli hã, eye wòƒo nya ta be: “Aƒetɔ la nya alesi wòaɖe mawumemewo atso tetekpɔwo me, eye wòadzra ame madzɔmadzɔwo ɖo hena ʋɔnudrɔ̃gbe, bene woatu fe vɔ̃ na wo.”—Petro II, 2:5, 7-9.

Nuwɔna Siwo Dze na Tohehe

13. Amekawo koŋ ye wodzra ɖo ɖi na ʋɔnudɔdrɔ̃, eye anye nuka ƒe drɔ̃ewoe wokuna?

¹³ Petro tɔ asi ame aɖewo koŋ dzi be wodze na Mawu ƒe ʋɔnudɔdrɔ̃, woawoe nye, “amesiwo zɔna le ŋutilã nu le makɔmakɔnyenye ƒe nudzodzro la me, eye wodoa vlo aƒetɔnyenye.” Míate ŋu akpɔ alesi gbegbe dzi ku Petro ɖe wo ŋui le nya siwo wògblɔ ɖe wo ŋu me be: “Ame mabunuwo, ɖokuiŋudzelawo kple amesiwo medzona nyanyanya, ne wogblɔ busunya ɖe [ŋutikɔkɔemewo] ŋuti la o.” Yuda ŋlɔ be “nenema ke drɔ̃ekula siawo hã ƒoa ɖi ŋutilã, . . . eye wogblɔa busunya ɖe [ŋutikɔkɔemewo] ŋuti.” (Petro II, 2:10; Yuda 8) Gbɔdɔdɔ makɔmakɔ ƒe nuŋububuwo hã ate ŋu anɔ woƒe drɔ̃ekukuawo me si ade dzi ƒo na wo be woayi woƒe gbɔdɔdɔ ƒe agbegbegblẽnɔnɔ ƒe vivisesea yometiti dzi. Gake gɔmesese ka nue “wodoa vlo aƒetɔnyenyewo” eye wogblɔa “busunya ɖe [ŋutikɔkɔemewo] ŋuti” le?

14. Gɔmesese ka nue aʋatsonufialawo ‘doa vlo aƒetɔnyenye’ eye wogblɔa “busunya ɖe [ŋutikɔkɔemewo] ŋu” le?

¹⁴ Wowɔnɛ le gɔmesese sia nu be womedea bubu ŋusẽ siwo Mawu ɖo ŋu o. Kristotɔ hamemegãwo le ŋutikɔkɔetɔ Yehowa Mawu kple Via teƒe, eye le esia ta la, wodo ŋutikɔkɔe aɖe na wo. Nyateƒee, wowɔa vodada, abe alesi Petro ŋutɔ hã wɔ vodadae ene, gake Ŋɔŋlɔawo xlɔ̃ nu hamea me tɔwo be woabɔbɔ wo ɖokui na ŋutikɔkɔeme siawo. (Hebritɔwo 13:17) Woƒe gbɔdzɔgbɔdzɔwo menye nusita míagblɔ busunya ɖe wo ŋu o. Petro gblɔ be mawudɔlawo ‘mehea busufɔbubu vaa aʋatsonufialawo dzi o,’ togbɔ be wodze nɛ geɖe hã. Petro yi edzi be: “Amesiawo le abe lã nyasã manɔsitɔ, siwo wodzi hena lelé kple tsɔtsrɔ̃ le woƒe dzɔdzɔme nu la ene: Wogblɔa busunya le nya, siwo womenya kura o la me, eye woatsrɔ̃ hã le woƒe gbegblẽ la me.”—Petro II, 2:10-13.

“Wotua Aglo Kpli Mi”

15. Mɔ kawo nue aʋatsonufialawo wɔa nu le, eye afikae woblea amewo le?

¹⁵ Togbɔ be ame gbegblẽ siawo “bua gbesiagbe ƒe aglotutu dzidzɔnui” eye wonye “ɖiƒoƒo kple ŋukpe” hã la, wodze aye. Wowɔa nu ‘dzadzadza’ eye ‘woblea ame,’ abe alesi Petro gblɔe do ŋgɔe ene. (Petro II, 2:1, 3, 13) Eyata womana wòadze gaglãa be yewotsi tre ɖe hamemegãwo ƒe agbagbadzedze be woalé Mawu ƒe agbenyuinɔnɔ ƒe dzidzenuwo me ɖe asi alo woadi woawo ŋutɔ woƒe gbɔdɔdɔ ƒe vivisese gaglãa o. Ke boŋ Petro gblɔ be “wotsɔa nusiwo wokpɔ to woƒe amebeble me la, ɖua nu tsui, eye wotua aglo kpli mi.” Yuda hã ŋlɔe be: “Amesiawo nye agakpe siwo ɣla ɖe tɔ me le miaƒe lɔlɔ̃nuɖuɖuwo me.” (Yuda 12, NW) Ẽ, abe alesi tɔgɔmegakpe tsutsuɛwo ate ŋu afe tɔdziʋu te tsi nalé ʋumenɔla siwo mele ŋudzɔ o ene la, nenemae aʋatsonufialawo nɔ susu gblẽm na amesiwo mele ŋudzɔ o, amesiwo wofluna be wolɔ̃m yewole le woƒe “lɔlɔ̃nuɖuɖuwo” me.

16. (a) Nukae nye “lɔlɔ̃nuɖuɖuwo,” eye nɔnɔme siwo sɔ kplii kawo tɔgbe mee nugbegblẽwɔlawo ate ŋu agblẽ nu le egbea? (b) Amekawo koŋ ye aʋatsonufialawo tɔa ŋkui, eyata nukae wòle be amesiawo nawɔ?

¹⁶ Anye hadomewɔna siwo me ƒe alafa gbãtɔ me Kristotɔwo kpea ta ɖua nu eye wodea ha kple wo nɔewoe nye ‘lɔlɔ̃nuɖuɖu’ siawo. Yehowa Ðasefowo hã kpea wo nɔviwo ɣeaɖewoɣi egbea, abe le srɔ̃kpekpewo me, modzakatsaɖiɖi me nuɖuɖuwo me, alo na hadede fiẽ aɖe. Aleke ame gbegblẽwo ate ŋu azã wɔna siawo akplɔ amewo atrae? Petro ŋlɔe be: “Ŋku, siwo yɔ taŋ kple ahasiwɔwɔ, . . . li na wo; woblea luʋɔ, siwo meli ke o la.” Woƒe “dzi, si ŋukeklẽ mã ŋutɔ” nɔa amesiwo meli ke le gbɔgbɔ me o siwo metsɔ nyateƒea wɔ wo ɖokui tɔ bliboe o la ŋu. Eyata na nusi dzɔ le Petro ƒe ŋkekea me nanye nuxlɔ̃ame na wò, eye nànɔ ŋudzɔ! Tsi tre ɖe nu makɔmakɔ ɖesiaɖe si ame aɖe ado ɖe gbɔwò la ŋu, eye mègana ame aɖe si le ahiãnya dom ɖe gbɔwò ƒe tugbedzedze alo ɖekadzedze naflu wò o!—Petro II, 2:14.

“Bileam ƒe Mɔ”

17. Nukae nye “Bileam ƒe mɔ,” eye aleke wògblẽ nu le Israel-vi 24,000 ŋui?

¹⁷ ‘Fiƒodevi’ siawo nya nyateƒea ɣeyiɣi aɖee nye esia. Woadze abe amesiwo gale agbagba dzem kokoko le hamea me ene. Gake Petro gblɔ be: “Esime wogblẽ mɔ dzɔdzɔe la ɖi la, wotre mɔ, eye wodze Bileam, Beor vi, amesi lɔ̃ madzɔmadzɔnyenye ƒe fetu la [ƒe mɔ dzi, NW].” (Petro II, 2:14, 15) Nyagblɔɖila Bileam ƒe mɔ, alo nuwɔna, ye nye be wòable amewo ade agbegbegblẽnɔnɔ me ɖe eya ŋutɔ ƒe viɖekpɔkpɔ ta. Egblɔ na Moab-fia Balak be Mawu aƒo fi de Israel-viwo ne wote ŋu ble wo wowɔ ahasi. Esia na Moab-nyɔnuwo ble Mawu ƒe amewo dometɔ geɖe, eye ame 24,000 tsrɔ̃ ɖe agbegbegblẽnɔnɔ ta.—Mose IV, 25:1-9; 31:15, 16; Nyaɖeɖefia 2:14.

18. Aleke gbegbe Bileam dze agbagbae, eye nukae nusi va dzɔ ɖe edzi fia le nusi adzɔ ɖe aʋatsonufialawo dzi ŋu?

¹⁸ Petro gblɔ be woxe mɔ ɖe Bileam nu esi eƒe tedzi ƒo nu nɛ, gake Bileam “lɔ̃ madzɔmadzɔnyenye ƒe fetu” ale gbegbe be esi nu ma dzɔ hã la, medzudzɔ eƒe “lãnuwɔwɔ” la o. (Petro II, 2:15, 16) Evɔ̃ɖi ŋutɔ! Baba na amesiwo katã dina be yewoagblẽ Mawu ƒe amewo eye wotea wo kpɔ be woanɔ agbe gbegblẽ! Bileam ku ɖe eƒe vɔ̃ɖivɔ̃ɖi la ta, wònye kpɔɖeŋu na nusi adzɔ ɖe amesiwo katã adze eƒe nuwɔna yome la dzi.—Mose IV, 31:8.

Woƒe Amebeble si Ði Abosam Tɔ

19, 20. (a) Nukawoe wotsɔ Bileam-mewo sɔ kple, eye nukatae? (b) Amekawoe woblena, eye aleke woblea woe? (d) Nukatae míate ŋu agblɔ be woƒe amebebleawo ɖi Abosam tɔ, eye aleke míawɔ akpɔ mía ɖokui kple ame bubuwo ta tso wo si me?

¹⁹ Esi Petro nɔ nu ƒom tso Bileam-mewo ŋu la, eŋlɔ be: “Amesiwo nye tsivudo, siwo me tsi mele o, kple alilikpo, siwo ahom ƒona yina gbɔna.” Tsivudo si me ƒu kplakplakpla ate ŋu anye ku na gbedzi mɔzɔla si tsikɔ le wuwum. Eyata mewɔ nuku o be “wodzra viviti tsiɖitsiɖi la ɖo ɖi” na amesiwo ƒe nɔnɔme ɖi nusiawo! Petro yi edzi be: “Elabena esi wogblɔ yakanya lolo gãwo la, wotsɔ ŋutilã ƒe nudzodzrowo kple hadzedze vɔ̃wo ble amesiwo si fifi laa tso mɔtrelawo gbɔ.” Petro be woblea amesiwo mekpɔ nuteƒe o, “[doa] ablɔɖe ŋugbe na wo, wònye woa ŋutɔwo la gbegblẽ ƒe dɔlawo wonye hafi.”—Petro II, 2:17-19; Galatiatɔwo 5:13.

²⁰ Nufiala gbegblẽ mawo ƒe amebeble ɖi Abosam tɔ ŋutɔ. Le kpɔɖeŋu me, woate ŋu agblɔ be: ‘Mawu nya be gbɔdzɔgbɔdzɔtɔwoe míenye eye míaƒe nudzodzrowo hona na mí. Eyata ne míeɖe mɔ le mía ɖokui ŋu wɔ míaƒe gbɔdɔdɔ ƒe nudzodzrowo dzi la, Mawu akpɔ nublanui na mí. Ne míeʋu míaƒe nuvɔ̃ me la, atsɔe ake mí abe alesi wòtsɔ ke míi esi míeva nyateƒea me zi gbãtɔ ene.’ Ðo ŋku edzi be nya mawo tɔgbe ke Abosam gblɔ na Xawa esi wòdo ŋugbe nɛ be ate ŋu awɔ nuvɔ̃ faa naneke madzɔ ɖe edzi o. Le Xawa gome la, egblɔ nɛ be nuvɔ̃ si wòawɔ ɖe Mawu ŋu la ana eƒe ŋku naʋu eye wòazu ablɔɖeme. (Mose I, 3:4, 5) Ne eva me be míekpɔ ame gbegblẽ sia tɔgbe aɖe le hamea me la, enye míaƒe agbanɔamedzi be míagblɔe na amesiwo wode dɔ asi na le Kristo-hamea me atsɔ akpɔ mía ɖokui kple ame bubuwo tae.—Mose III, 5:1.

Sidzedze Vavãtɔ Kpɔa Ame Ta

21-23. (a) Nukae wògblẽna ne wometsɔ sidzedze vavãtɔ wɔ dɔe o? (b) Kuxi bubu ka ŋue Petro ƒo nu le si me míadzro le nyati si kplɔe ɖo me?

²¹ Petro ƒo nu tso nusiwo dzɔna ne wodo kpo sidzedze si ŋu wògblɔ le do ŋgɔ be ehiã vevie hena “agbe kple mawusosroɖa” la tsɔtsɔ wɔ dɔe tsɔ wu eƒe lɛta la ƒe akpa sia nui. (Petro II, 1:2, 3, 8) Eŋlɔe be: “Ne wosi le xexeame ƒe makɔmakɔnyenye nu to . . . Aƒetɔ kple xɔla Yesu Kristo [ŋuti sidzedze vavãtɔ me, NW], eye wona wogalé wo le nu mawo ke me, eye wogaɖu wo dzi la, ekema woƒe anyinɔnɔ mamlɛtɔ zu vɔ̃ na wo wu tsãtɔ.” (Petro II, 2:20) Nublanuinya kae nye si! Le Petro ƒe ŋkekea me la, ame mawo tsɔ woƒe makumakugbenɔnɔ le dziƒo ƒu gbe ɖe ɣeyiɣi kpui aɖe ko ƒe gbɔdɔdɔ ƒe vivisese ta.

²² Eyata Petro gblɔ be: “Elabena ne ɖe womedze si dzɔdzɔenyenye ƒe mɔ o la, ne enyo na wo wu esi wodze sii, eye gake wogagbugbɔ tso sedede kɔkɔe, si wode na wo la gbɔ. Eva me na wo le nyateƒe lododo la nu bena: ‘Avũ gbugbɔ yi ɖe ye ŋutɔ ƒe xeɖeɖe la gbɔ,’ eye ‘ha, si wole tsi na la, le mimlim yina ba me.’ ”—Petro II, 2:21, 22; Lododowo 26:11.

²³ Kuxi bubu si edze ƒã be eva nɔ fu ɖem na Kristotɔ gbãtɔawo la ɖi esi ɖea fu na ame aɖewo egbea. Ewɔ abe ame aɖewo nɔ nyatoƒoe tom le alesi wòwɔ abe ɖe Kristo ƒe anyinɔnɔ si ŋugbe wodo mele vava ge o ene ŋu. Mina míakpɔ alesi Petro kpɔ nya sia gbɔe ɖa.

Èɖo Ŋku Wo Dzia?

◻ Nuxlɔ̃amekpɔɖeŋu etɔ̃ kawoe Petro gblɔ?

◻ Aleke aʋatsonufialawo ‘doa vlo aƒetɔnyenyee’?

◻ Nukae nye Bileam ƒe mɔ, eye aleke amesiwo le edzi dzea agbagba be yewoable amewoe?

◻ Nukawoe dona tsoa eme ne wometsɔ sidzedze vavãtɔ wɔ dɔe o?

[Nɔnɔmetata si le axa 16, 17]

Bileam nye nuxlɔ̃amekpɔɖeŋu