Ta Atɔ̃lia
Yehowa Subɔlawo ƒe Ablɔɖe
1, 2. (a) Ablɔɖe ka ƒomevie Mawu na atsu kple asi gbãtɔ? (b) Yɔ se siwo kpɔ ŋusẽ ɖe Adam kple Xawa ƒe nuwɔna dzi dometɔ aɖewo.
ESIME Yehowa wɔ ŋutsu kple nyɔnu gbãtɔ la, ablɔɖe si me wonɔ la de ŋgɔ sasasã wu ablɔɖe ɖesiaɖe ƒomevi si me amewo le egbea. Paradiso, Eden-bɔ dzeani la, ye nye woƒe aƒeme. Dɔléle aɖeke megblẽ vivi si wosena na agbe me o, elabena wode blibo le susu kple ŋutilã me. Ku menɔ wo lalam abe alesi wòle le amesiame gome tso ɣemaɣi ene o. Tsɔ kpe ɖe eŋu la, womewɔ wo abe mɔ̃ si wɔa dɔ nuŋumabumabui ene o, ke boŋ wona tiatiawɔwɔ ƒe ablɔɖe wɔnuku aɖe wo, si nye ŋutete be woawo ŋutɔ woate ŋu awɔ nyametsotso. Gake, be woayi edzi ase vivi na ablɔɖe wɔnuku sia la, ele kokoko be woade bubu Mawu ƒe sewo ŋu.
2 Le kpɔɖeŋu me, bu dzɔdzɔmese siwo Mawu de wo me ŋu kpɔ. Eme kɔ kɔte be se siawo menye nya kpaŋkpaŋ woŋlɔ ɖi ya o, gake alesi wowɔ Adam kple Xawae la bia kokoko be woawɔ ɖe se mawo dzi. Ne dɔ le wo wum la, woasee le wo ɖokui me be ele be yewoaɖu nu; tsikɔwuame na wonya be yewoano tsi; ɣe ƒe toɖoɖo gblɔ na wo be woamlɔ anyi. Yehowa de dɔ hã asi na wo. Le nyateƒe me la, dɔ ma ɖeko wòsɔ kple se, elabena afia mɔ wo woanya nusi woawɔ. Wogblɔ na wo be woadzi, woaɖu nu gbagbe ƒomevi vovovo siwo le anyigba dzi la dzi, eye woakeke Paradisoa ɖe enu vaseɖe esime wòaxɔ anyigba bliboa katã dzi. (Mose I, 1:28; 2:15) Se kae nyo hegaɖea vi na ame ale! Ena mɔnukpɔkpɔ wo be woawɔ dzidzɔdɔ si woase vivi na bliboe eye wòana woazã woƒe ŋutetewo wòade edeƒe le mɔ ɖeviwo nu. Ena ablɔɖe gbogbo aɖe hã wo be woawɔ nyametsotsowo le alesi woawɔ dɔ si wode asi na woe la ŋu. Nukae woagate ŋu abia wu ema?
3. Aleke Adam kple Xawa awɔ anya alesi woazã ablɔɖe si wona wo la le nunya me?
3 Gake esi wotsɔ nyametsotsowɔwɔ ƒe mɔnukpɔkpɔa na Adam kple Xawa la, mefia be nu nyui ado tso woƒe nyametsotso ɖesiaɖe ko me o. Ele be woana Mawu ƒe sewo kple gɔmeɖosewo nafia mɔ afisi woƒe ablɔɖe se ɖo le nyametsotsowɔwɔ me. Gake aleke woawɔ anya wo? Eyae nye be woaɖo to wo Wɔla eye woalé ŋku ɖe eƒe asinudɔwɔwɔwo ŋu. Mawu na susu Adam kple Xawa be woawɔ nusi wosrɔ̃ ŋudɔ le agbe me. Esi wònye be ɖe wowɔ wo ame deblibowoe ta la, anye woƒe dzɔdzɔmedidi be yewoaɖe Mawu ƒe nɔnɔmewo afia le nyametsotsowɔwɔ me. Le nyateƒe me, woakpɔ egbɔ be yewowɔ ema ne nusi Mawu na wo la dze wo ŋu vavã eye wodi be yewoƒe nu nadze eŋu.—Mose I, 1:26, 27; Yohanes 8:29.
4. (a) Ðe se si wode na Adam kple Xawa be woagaɖu ati ɖeka aɖe ƒe tsetse o la te ablɔɖe woa? (b) Nukatae wònye nudidi si sɔ?
4 Eyata esɔ be Mawu ɖo be yeado alesi wotsɔ wo ɖokui na eyama si nye woƒe Agbenala la, kple alesi woalɔ̃ faa be yewoƒe nuwɔna nase ɖe afisi Mawu na ablɔɖe wo se ɖo la, akpɔ. Yehowa de se sia na Adam be: “Ðu abɔmetiawo katã ƒe tsetse faa; ke ati, si na wodzea si nyui kple vɔ̃ la, megaɖu eya ƒe tsetse aɖeke o; gbesigbe naɖu eƒe ɖe, ku ke naku.” (Mose I, 2:16, 17) Le Xawa wɔwɔ megbe la, wona eya hã nya nu tso se sia ŋu. (Mose I, 3:2, 3) Ðe se sia te ablɔɖe woa? Kura o. Nuɖuɖu nyui ƒomevi ɖesiaɖe le wo si woaɖu si mahiã be woaɖu ati ɖeka ma ƒe tsetse o. (Mose I, 2:8, 9) Nu nyuitɔ kekeake si woawɔ koe nye be woalɔ̃ ɖe edzi be Mawu tɔe nye anyigba la, elabena eyae wɔe. Eyata ekpɔ mɔ ade se siwo asɔ ɖe eƒe tameɖoɖo nu eye woaɖe vi na ameƒomea.—Psalmo 24:1, 10.
5. (a) Aleke Adam kple Xawa wɔ bu ŋutikɔkɔeblɔɖe si nɔ wo si? (b) Nukae va xɔ ɖe ablɔɖe si me Adam kple Xawa nɔ tsã la teƒe, eye aleke wògblẽ nu le míawo hã ŋui?
5 Gake nukae va dzɔ? Ðokuitɔdidi kple nugãdidi na be mawudɔla aɖe zã eƒe tiatiawɔwɔblɔɖe ɖe mɔ gbegblẽ nu eye wòva zu Satana, si gɔmee nye “Tsitretsiɖeŋula.” Eble Xawa esi wòka ɖe edzi nɛ be nane si menye Mawu ƒe lɔlɔ̃nu o la asu esi. (Mose I, 3:4, 5) Adam va kpe ɖe Xawa ŋu le Mawu ƒe sea dzi dada me. Esi wotsɔ nane si menye wo tɔ o la, wobu ŋutikɔkɔeblɔɖe si nɔ wo si la. Nuvɔ̃ va zu aƒetɔ na wo, eye abe alesi Mawu gblɔe na wo do ŋgɔ ene la, kue va kplɔe ɖo. Domenyinu si wogblẽ ɖi na wo viwoe nye nuvɔ̃—esia dzena le dzɔdzɔmedidi aɖe si le mía me si na be nugbegblẽwɔwɔ dzroa mí me. Nuvɔ̃ hã he gbɔdzɔgbɔdzɔ siwo hea dɔléle, tsitsi, kple ku vɛ. Nugbegblẽwɔwɔ ƒe dzodzro si le mía me, si Satana ƒe ŋusẽkpɔɖeamedzi gava gblẽ ɖe edzi la na fuléle, nuvlowɔwɔ, ameteteɖeanyi, kple aʋawɔwɔ tsrɔ̃ ame miliɔn geɖe. Kpɔ alesi gbegbe wòto vovo na ablɔɖe si Mawu na ameƒomea le gɔmedzedzea mee ɖa!—Mose V, 32:4, 5; Hiob 14:1, 2; Romatɔwo 5:12; Nyaɖeɖefia 12:9.
Afisi Míate Ŋu Akpɔ Ablɔɖe Le
6. (a) Afikae míate ŋu akpɔ ablɔɖe vavã le? (b) Ablɔɖe ka ƒomevi ŋue Yesu ƒo nu le?
6 Le alesi nuwo gblẽ le afisiafi egbea ta la, mewɔ nuku o be amewo dina be ablɔɖe siwo lolo wu nasu yewo si. Gake afikae míate ŋu akpɔ ablɔɖe vavã le? Yesu gblɔ be: “Ne mienɔ nye nya la me la, ekema nye nusrɔ̃la vavãwo mienye, eye miadze si nyateƒe la, eye nyateƒe la lawɔ mi ablɔɖeviwoe.” (Yohanes 8:31, 32) Menye ablɔɖe si ƒomevi amewo kpɔa mɔ na ne wogbe dziɖula aɖe alo dziɖuɖu ƒomevi aɖe hetia bubu ye wònye o. Ke boŋ ablɔɖe sia ku ɖe nusi tututu gbɔ amegbetɔwo ƒe kuxiwo tso la ŋu. Nusi ŋu Yesu nɔ nu ƒom le enye ablɔɖekpɔkpɔ tso kluvinyenye na nuvɔ̃ me. (Yohanes 8:24, 34-36) Eyata ne ame aɖe va zu Yesu Kristo ƒe nusrɔ̃la vavã la, ekpɔnɛ be tɔtrɔ gã aɖe va yeƒe agbe me, evona tsoa kluvinyenye me!
7. (a) Gɔmesese ka nue míate ŋu avo tso nuvɔ̃ si me le fifia? (b) Be ablɔɖe ma nasu mía si la, nukae wòle be míawɔ?
7 Mefia be fifia nuvɔ̃wɔwɔ ƒe dzodzro si míedzɔ kpli la megakpɔa ŋusẽ ɖe Kristotɔ vavãwo ya dzi o. Esi wonyi nuvɔ̃ ƒe dome ta la, wogawɔa avu kplii kokoko. (Romatɔwo 7:21-25) Gake ne ame aɖe nɔa agbe ɖe Yesu ƒe nufiafiawo nu vavã la, maganye nuvɔ̃ ƒe kluvi o. Nuvɔ̃ maganɔ abe dzizizidziɖula aɖe si nɔa gbe ɖem nɛ wòle be wòawɔ eƒe lɔlɔ̃nu kokoko ene o. Agbenɔnɔ si ŋu taɖodzinu mele o si naa ame ƒe dzitsinya bua fɔ ame magakpɔ ŋusẽ ɖe edzi o. Dzitsinya dzadzɛ asu esi le Mawu gbɔ elabena le Kristo ƒe vɔsa la dzixɔxɔse ta wotsɔ nuvɔ̃ siwo wòwɔ va yi la kee. Nuvɔ̃ ƒe dzodzrowo agadi kokoko be yewoakpɔ ŋusẽ ɖe edzi ya, gake ne egbea toɖoɖo wo le esi wòɖoa ŋku Kristo ƒe nufiafia siwo dza dzi la, eɖenɛ fiana be nuvɔ̃ meganye yeƒe aƒetɔ o.—Romatɔwo 6:12-17.
8. (a) Ablɔɖe kawoe Kristotɔnyenye vavãtɔ na mí? (b) Nukae wòle be wòanye míaƒe nɔnɔme ɖe dziɖuɖuwo ŋu?
8 Bu ablɔɖe siwo sua mía si le esi míenye Kristotɔwo ta la ŋu kpɔ. Míevo tso nusiwo alakpanufiafiawo dzixɔse gblẽna le ame ŋu la me, míevo tso kluvinyenye na aʋatsodzixɔse me, eye nuvɔ̃ megaɖua aƒetɔ ɖe mía dzi o. Nyateƒe wɔnuku siwo ku ɖe nɔnɔme si me ame kukuwo le ŋu kple tsitretsitsi mɔkpɔkpɔa na míevo tso vɔvɔ̃ na ku me. Sidzedzee be Mawu ƒe Fiaɖuƒe dzɔdzɔea ava xɔ ɖe amegbetɔwo ƒe dziɖuɖu madeblibowo teƒe la wɔ mí ablɔɖeviwoe tso mɔkpɔkpɔmanɔamesi si me. (Daniel 2:44; Mateo 6:10) Gake ablɔɖe sia si su mía si la mefia be míekpɔ mɔ agbe bubudede dziɖuɖuwo kple woƒe sewo ŋu o.—Tito 3:1, 2; Petro I, 2:16, 17.
9. (a) Aleke Yehowa kpena ɖe mía ŋui be ablɔɖe gbogbotɔ kekeake si ate ŋu asu amegbetɔwo si fifia la nasu mía si? (b) Aleke míawɔ awɔ nyametsotso siwo me nunya le?
9 Yehowa megblẽe ɖe mía ŋutɔ mía si me be míato nuwɔkpɔ dzi ake ɖe mɔ si anye nyuitɔ kekeake si nu míanɔ agbe ɖo ŋu o. Enya míaƒe wɔwɔme, nusi ahe dzidzeme akuakua vɛ na mí, kple nusi aɖe vi na mí tegbee. Enya tamesusu kple agbenɔnɔ siwo ate ŋu agblẽ ƒomedodo si le Eyama kple ame aɖe dome, kpakple amea kple ame bubuwo dome la me, eye ɖewohĩ wòaxe mɔ na amea be mayi ɖe xexe yeyea me o. Esi Yehowa lɔ̃ mí ta la, eto Biblia kple eƒe habɔbɔ si wokpɔna dzi gblɔa nusiawo katã na mí. (Marko 13:10; Galatiatɔwo 5:19-23; Timoteo I, 1:12, 13) Ke ekpɔ mía ŋkume azɔ be míazã tiatiawɔwɔblɔɖe si Mawu na mí atsɔ atso nya me le nusi míawɔ le eŋu la ŋu. Ne míesrɔ̃ Adam o eye míewɔ nusi Biblia gblɔ na mí la, nunya anɔ míaƒe nyametsotsowo me. Míato esia me aɖee afia be ƒomedodo nyui me nɔnɔ kple Yehowa koŋ ye nye nusi ŋu míetsia dzi ɖo le agbe me.
Ablɔɖe Bubu Ƒomevi Didi
10. Ablɔɖe ka ƒomevie amesiwo nye Yehowa Ðasefowo dometɔ aɖewo di?
10 Ɣeaɖewoɣi awɔ na sɔhɛ aɖewo siwo nye Yehowa Ðasefowo—kple ame tsitsiwo hã—be yewodi be ablɔɖe bubu ƒomevi aɖe nasu yewo si. Xexeame adze nu dzroame si me vivisese le na wo, eye zi alesi wobu eŋui la, zi nenemae dzodzro si le wo me be yewoawɔ nuwɔna siwo medze Kristotɔwo o siwo bɔ ɖe xexeame la nu sẽna ɖe edzii. Ate ŋu anye be womaɖoe be yewoazã atikevɔ̃ɖiwo, alo amu aha, alo awɔ ahasi ya o. Gake woadze hadede kple ame aɖewo siwo menye Kristotɔ vavãwo o gɔme, eye woadi be yewoƒe nu nadze wo ŋu. Ðewohĩ woadze woƒe nuƒoƒo kple agbenɔnɔ hã sɔsrɔ̃ gɔme.—Yohanes III, 11.
11. Afikae amenubeble be woawɔ nu gbegblẽ la tsona ɣeaɖewoɣi?
11 Ɣeaɖewoɣi la, ame aɖe si gblɔna be Yehowa subɔlae yenye ye blea ame dea agbenɔnɔ si medze Kristotɔwo o me. Nenemae wòdzɔ ɖe Kristotɔ gbãtɔ aɖewo dzii, eye agate ŋu adzɔ nenema ke le míaƒe ŋkekea me hã. Zi geɖe la, amesiawo lɔ̃a nusiwo wosusu be ana yewoase vivi la wɔwɔ, gake nusiawo nyea nusiwo tsi tre ɖe Mawu ƒe sewo ŋu. Woƒonɛ ɖe ame bubuwo nu be woawɔ nusi ana “woase vivi.” ‘Wodoa ablɔɖenyenye ŋugbe, evɔ wònye woa ŋutɔwo la gbegblẽ ƒe dɔlawo wonye hafi.’—Petro II, 2:19.
12. Nu gbegblẽ kawoe dona tsoa agbenɔnɔ si tsi tre ɖe Mawu ƒe sewo kple gɔmeɖosewo ŋu me?
12 Nu gbegblẽ koe tsoa alakpablɔɖe sia me ɣesiaɣi, elabena efia Mawu ƒe sewo dzi dada. Le kpɔɖeŋu me, seselelãme ƒe fuɖename, dɔléle, ku, kple gbɔmeyafufɔfɔ ate ŋu atso gbɔdɔdɔ manɔsenu me, eye wòate ŋu agblẽ srɔ̃ɖeɖe me hã. (Korintotɔwo I, 6:18; Tesalonikatɔwo I, 4:3-8) Atikevɔ̃ɖizazã ate ŋu ana dzi naku ame kabakaba, ame ƒe nuƒoƒo me makɔ o, woakpɔ nu flukpe, ame ƒe mo natsyɔ zi, womate ŋu anɔ gbɔgbɔm nyuie o, woanɔ nusiwo meli o kpɔm alo anɔ gbeɖiɖi siwo meli o sem, eye kura gɔ̃ hã ate ŋu awu ame. Ate ŋu ava zu nutsiamesi, si ana woado hlɔ̃ be woatsɔ akpɔ ga na atikevɔ̃ɖia ƒeƒle. Nu mawo ke dometɔ geɖe ate ŋu atso ahatsunono hã me. (Lododowo 23:29-35) Agbe sia nɔlawo asusu be yewovo, gake kaka woava nya la, etsi megbe akpa elabena wova zu nuvɔ̃ ƒe kluviwo. Eye aƒetɔ tagbɔsesẽtɔ gã aɖee nuvɔ̃ nye! Nya la ŋu bubu fifia ate ŋu akpe ɖe mía ŋu be nu ma madzɔ ɖe mía dzi o.—Galatiatɔwo 6:7, 8.
Afisi Kuxiawo Dzea Egɔme Tsonɛ
13. (a) Zi geɖe la, nukae nyɔa dzodzro siwo hea kuxiwo vɛ ɖe ame me? (b) Ameka ƒe nukpɔsusue míehiã bene míase nusi ‘hadede vɔ̃wo’ fia la gɔme? (d) Na nusi nye Yehowa ƒe nukpɔsusu nadze ƒã esime nèle nyabiase siwo le axa 13 lia ŋu ɖom.
13 Bu afisi kuxiwo lɔ̃a egɔmedzedze tsoe ŋu. Biblia ɖe nu me be: “Wotea amesiame kpɔna, ne eya ŋutɔ ƒe nudzodzro henɛ, eye wòblenɛ; emegbe la ne nudzodzro la fɔ fu la, edzia nuvɔ̃; ke ne nuvɔ̃ la tsi vɔ la, edzia ku.” (Yakobo 1:14, 15) Ke nukae nyɔa dzodzroa ɖe ame me? Nusi gena ɖe ame ƒe susu mee. Zi geɖe la, hadede kple amesiwo metsɔa Biblia ƒe gɔmeɖosewo wɔa dɔ o gbɔe wòtsona. Nyateƒee, mí katã míenya be ele be míatsri ‘hadede vɔ̃wo.’ (Korintotɔwo I, 15:33) Gake hadede kawoe nye hadede vɔ̃wo? Aleke Yehowa bua nya lae? Biabia siwo gbɔna la ŋu bubu kple mawunyakpukpui siwo woyɔ la xexlẽ akpe ɖe mía ŋu míaɖo nyataƒoƒo nyuitɔ gbɔ.
Ðe ame aɖewo ƒe dzedze bubumewoe fia be wonyo woade ha kpli woa? (Mose I, 34:1, 2, 18, 19)
Ðe woƒe dzeɖoɖo, kple ɖewohĩ woƒe fefenyawo, fia be wodze míade ha kpli wo kplikplikplia? (Efesotɔwo 5:3, 4)
Aleke Yehowa sena le eɖokui me ne míedea ha kplikplikpli kple amesiwo melɔ̃ eyama o? (Kronika II, 19:1, 2)
Togbɔ be míawɔ dɔ kple amesiwo ƒe dzixɔsewo to vovo na mía tɔ alo míade suku kple wo hã la, nukatae wòle be míakpɔ nyuie? (Petro I, 4:3, 4)
Television kple sinima kpɔkpɔ, Internet zazã, kple agbalẽ, magazine, kpakple nyadzɔdzɔgbalẽwo xexlẽ nye mɔ siwo dzi míetona dea ha kple amewo. Nukawo ƒomevi ŋue wòle be míanɔ ŋudzɔ ɖo le nusiwo tsoa teƒe siawo gome? (Lododowo 3:31; Yesaya 8:19; Efesotɔwo 4:17-19)
Nukae amesiwo míetiana be míade ha kplii gblɔna na Yehowa tso amesiwo ƒomevi míenye ŋu? (Psalmo 26:1, 4, 5; 97:10)
14. Ablɔɖe wɔnuku kae le amesiwo wɔna ɖe nuxlɔ̃ame si le Mawu ƒe Nya la me dzi nuteƒewɔwɔtɔe fifia la lalam?
14 Mawu ƒe xexeme yeyea gogo mí ŋutɔ. Mawu ato dziƒo Fiaɖuƒedziɖuɖua dzi aɖe Satana kple eƒe nuɖoanyi vɔ̃ɖia katã ƒe ŋusẽkpɔkpɔ ɖe ameƒomea dzi ɖa. Ʋɛʋɛʋɛ la, woaɖe nuvɔ̃ ƒe ŋusẽkpɔɖeamedzi ɖesiaɖe ɖa na ameƒomea me tɔ siwo nye toɖolawo, esi ana be míade blibo le susu kple ŋutilã me, ale be míate ŋu ase vivi na agbe mavɔ nɔnɔ le Paradiso me. Ablɔɖe si wɔ ɖeka le go sia go me kple ‘Yehowa ƒe gbɔgbɔ’ ava su nuwɔwɔ ɖesiaɖe si mlɔeba. (Korintotɔwo II, 3:17) Ðe susu anɔ eme be míade nusiawo gbegbe ƒe mía si susu afɔku me le nuxlɔ̃ame si le Mawu ƒe Nya la me gbegbe fifia ta? Neva eme na mí katã be míato míaƒe Kristotɔwo ƒe ablɔɖe la zazã nunyatɔe fifia me aɖee afia kɔte be nyateƒee, míedi “mawuviwo ƒe ŋutikɔkɔe ƒe ablɔɖe” la.—Romatɔwo 8:21.
Numetoto
• Ablɔɖe ka ƒomevi mee atsu kple asi gbãtɔ nɔ? Ne míetsɔe sɔ kple nusiwo me tom ameƒomea le fifia la, aleke wòle?
• Ablɔɖe kae su Kristotɔ vavãwo si? Aleke wòto vovoe na nusi wobuna le xexeame be eyae nye ablɔɖe lae?
• Nukatae wòle vevie ale gbegbe be míatsri hadede vɔ̃wo? Le nusi to vovo na nusi Adam wɔ me la, ameka ƒe nyametsotso le nusi nye vɔ̃ ŋue míexɔna?
[Nɔnɔmetata siwo le axa 46]
Mawu ƒe Nya la xlɔ̃ nu mí be: “Migana woable mi o! Habɔbɔ vɔ̃wo gblẽa nuwɔna nyuiwo”