Nana be Míaƒe Kekelia Naklẽ Ðaa

¹ Nukae nye kekeli? Nyagɔmeɖegbalẽ ɖe egɔme be enye “nusi na wote ŋu kpɔa nu.” Gake le nyateƒe me, togbɔ be amegbetɔ wɔ ŋgɔyiyi le mɔ̃ɖaŋu me hã la, mekpɔ ŋuɖoɖo na nya si Yehowa bia si woŋlɔ ɖe Hiob 38:24 keŋkeŋ haɖe o. Ðe míate ŋu anɔ agbe kekeli manɔmeea? Ne kekeli meli o la, míate ŋu anɔ agbe o. Kekeli le vevie bene míate ŋu akpɔ nu le ŋutilã me, eye Biblia gblɔ na mí be le gbɔgbɔ me gɔmesese nu la, “Mawu enye kekeli.” (Yoh. I, 1:5) Amesi ‘naa kekeli mí’ dzie míaƒe agbe nɔ te ɖo keŋkeŋ.—Ps. 118:27.

² Esia nye nyateƒe le ŋutilã me, gake enye nyateƒe le gbɔgbɔ me wu. Alakpasubɔsubɔ kplɔ ame gbogbo aɖewo trae, eye wogblẽ wo ɖe gbɔgbɔmeviviti me eye wole “asi tsam le gli ŋu abe ŋkuagbãtɔwo ene.” (Yes. 59:9, 10) Yehowa ƒe lɔlɔ̃ kple nublanuikpɔkpɔ si tɔgbe meli o la ʋãe ‘wòɖo eƒe kekeli kple nyateƒe ɖa.’ (Ps. 43:3) Ame miliɔn geɖe xɔe eye wodo “tso viviti me va ye ŋutɔ ƒe nukukekeli gbɔ.”—Pet. I, 2:9.

³ Yesu Kristo wɔ akpa vevi aɖe le kekeli sia tsɔtsɔ va xexeamee me. Egblɔ be: “Nye la kekeli menye va xexeame, bena amesiame, si xɔa dzinye sena la, manɔ viviti me o.” (Yoh. 12:46) Ezã eƒe ɣeyiɣi, ŋusẽ, kple nunɔamesiwo katã be wòana nyateƒea ƒe kekeli naklẽ na amewo. Ezɔ mɔ kpe wo denyigba ɖo, eye wòɖe gbeƒã hefia nu le du kple kɔƒe ɖesiaɖe kloe me. Eto yometiti sesẽwo me le goawo katã me, gake elé eƒe dɔ si nye nyateƒea ƒe kekelia keklẽ me ɖe asi sesĩe.

⁴ Yesu tsɔ eƒe susu ɖo nusrɔ̃lawo tiatia, hehenana wo, kple ɖoɖowɔwɔ na wo ŋu, kple taɖodzinu tɔxɛ aɖe. Míexlẽ mɔfiame siwo wòna wo le Mateo 5:14-16 be: “Miawoe nye xexeame ƒe kekeli. . . . mina miaƒe kekeli naklẽ le amewo ƒe ŋku me, bena woakpɔ miaƒe nu nyui wɔwɔwo, eye woakafu mia Fofo, si le dziƒo.” Ele be woanɔ abe Yesu ene pɛpɛpɛ anye “akaɖiwo . . . le xexeame,” ana nyateƒea ƒe kekelia naklẽ ɖe afisiafi. (Fil. 2:15) Woxɔ agbanɔamedzi ma kple dzidzɔ, eye wobui woƒe tameɖoɖo vevitɔe le agbe me. Emegbe kpuie la, Paulo te ŋu gblɔ be “woɖe gbeƒã” nyanyuia “na nuwɔwɔwo katã le dziƒo te.” (Kol. 1:23) Kristo-hamea katã wɔ ɖeka le dɔ gã ma wɔwɔ me.

⁵ Ele be mí amesiwo li egbea míada akpe be míeva le amesiwo “[ɖe] viviti me dɔwɔwɔwo ɖa” la dome. (Rom. 13:12, 13) Míate ŋu aɖe míaƒe ŋudzedzekpɔkpɔ afia to kpɔɖeŋu si Yesu kple blema Kristotɔ nuteƒewɔlawo ɖo ɖi la sɔsrɔ̃ me. Ame bubuwo ƒe nyateƒea sese hiã kpata hele vevie fifia wu ɣeyiɣi bubu ɖesiaɖe le amegbetɔ ƒe ŋutinya me. Dɔwɔna bubu aɖeke mede dɔ sia ƒe hiahiã kpata kple eŋuti viɖe gbogboawo nu o.

⁶ Aleke Míate Ŋu Aklẽ Abe Akaɖiwo Ene? Gomekpɔkpɔ le Fiaɖuƒe gbeƒãɖeɖedɔa mee nye mɔ vevitɔ si dzi míato ana míaƒe kekelia naklẽ. Ðoɖo le hame ɖesiaɖe si ɣesiaɣi be wòaɖe gbeƒã le eƒe anyigbamamã me. Agbalẽ gbogbo vovovowo li eye wole gbegbɔgblɔ geɖe me. Wotoa kpekpeawo dzi naa hehe mí vevie, eye amesiwo kpɔ nuteƒe naa kpekpeɖeŋu le hehenana ame bubuwo me. Ewɔwɔ ƒe mɔnukpɔkpɔ ʋu ɖi na ŋutsuwo, nyɔnuwo, ame tsitsiwo, kple ɖeviwo gɔ̃ hã. Wokpea hamea me tɔ ɖesiaɖe be wòakpɔ gome le eme le alesi ko eƒe ŋutetewo kple nɔnɔmewo ɖe mɔe nu. Gbeƒãɖeɖe ŋue hamea ƒe dɔwɔnawo katã ku ɖo, eye ɖoɖo li be woakpe ɖe hamea me tɔ ɖesiaɖe ŋu be wòakpɔ gome le eme le mɔ aɖe nu. Hadede kple hamea edziedzie nye mɔ nyuitɔ si dzi míato akpɔ egbɔ be míaƒe kekelia nayi edzi aklẽ.

⁷ Míate ŋu aklẽ le mɔ aɖewo nu si ɖewohĩ mabia be míake nu aɖi ɖase o. Míate ŋu atsɔ míaƒe agbenɔnɔ ɖeɖeko ahe ame bubuwo. Nu mae nɔ susu me na Petro esime wòƒoe ɖe mía nu be: “Miaƒe anyinɔnɔ le trɔ̃subɔlawo dome nanɔ nyuie, bene . . . le miaƒe dɔ nyui wɔwɔ, siwo wodze si azɔ ŋuti la, woakafu Mawu.” (Pet. I, 2:12) Ame geɖe tsɔa dɔ aɖe wɔlawo alo habɔbɔ aɖe me tɔwo ƒe agbenɔnɔ dzea si dɔ alo habɔbɔ si ƒomevi wònye. Ne amewo kpɔ amesiwo nɔa agbe dzadzɛ, woɖia anukware, wonye ŋutifafamewo, eye wowɔa se dzi la, wobua ame mawo be woto vovo eye wogblɔna be dzidzenu siwo nu wonɔa agbe ɖo la kɔ boo wu ame akpa gãtɔ tɔ. Eyata srɔ̃ŋutsu na eƒe kekelia klẽna ne edea bubu srɔ̃a ŋu heléa be nɛ lɔlɔ̃tɔe; srɔ̃nyɔnua hã wɔa nenema ke to bubudede srɔ̃a ƒe tanyenye ŋu me. Ðeviwo toa vovo ne woɖo to wo dzilawo eye wotsri agbegbegblẽnɔnɔ kple atikevɔ̃ɖizazã. Wodea bubu dɔwɔla si léa fɔ ɖe eƒe dɔ ŋu, ɖia anukware, hebua ame bubuwo ŋu la ŋuti ŋutɔ. Ne míeɖe Kristotɔwo ƒe nɔnɔme siawo fia la, míana míaƒe kekelia naklẽ eye míaƒe agbenɔnɔ nadzro ame bubuwo.

⁸ Nusiwo míesrɔ̃ le Mawu ƒe Nya la me gbɔgblɔ na ame bubuwoe nye gbeƒãɖeɖe. Míewɔa ema le nuƒolanɔƒea alo le aƒewo me, gake menye afimawo ko wòse ɖo o. Míaƒe gbesiagbedɔwɔnawo na míedoa go ame geɖe. Zi nenie nèƒoa nu na amesiwo ɖe xɔliƒo kpliwò le ŋkeke ɖeka dzi? Zi nenie ame aɖe ƒoa ʋɔ na wò? Ame vovovo nenie nèdoa goe ne èyi asiƒleƒe, ne èle ʋu me, alo le wò ŋutilãmedɔwɔƒe? Ne ɖevie nènye le suku la, àte ŋu axlẽ amesiwo nèɖoa dze kple gbesiagbe ɖekaɖeka? Seɖoƒe meli na mɔnukpɔkpɔ siwo me míaƒo nu na ame bubuwo le o kloe. Nusi nàwɔ koe nye be nàlé Ŋɔŋlɔawo me nya ʋee aɖewo ɖe susu me, Biblia kple trakt aɖewo nanɔ asitsɔƒe, eye nàdze dzeɖoɖo gɔme ne mɔnukpɔkpɔa su asiwò.

⁹ Togbɔ be vomeɖaseɖiɖi le bɔbɔe hã la, ame aɖewo hena ɖe megbe le ewɔwɔ me. Ðewohĩ woazi ɖoɖoe agblɔ be ŋu kpea yewo akpa alo yewovɔ̃na akpa be yewoate ɖe amesiwo yewomenya o ŋu. Ðewohĩ woavɔ̃ be yewoava he amewo ƒe susu ɖe yewo ɖokui ŋu alo be womaxɔ yewo nyuie o. Amesiwo bi ɖe vomeɖaseɖiɖi me ate ŋu agblɔ na wò be naneke mele eme si ta nàtsi dzi o. Ðeko ame bubuwo le abe míawo ke ene; nuhiahiã mawo kee le wo ŋu, nu mawo kee ɖea fu na wo, eye nu mawo kee wodina na wo ɖokui kple woƒe ƒomewo. Ne èɖo nukomo eye nèdo gbe na wo xɔlɔ̃wɔwɔtɔe la, ame akpa gãtɔ axɔ wò nyuie. Be nàdze egɔme la, ele be ‘nàlé dzi ɖe ƒo.’ (Tes. I, 2:2) Gake ne èdze egɔme ko la, emetsonuawo awɔ nuku ahadzɔ dzi na wò.

¹⁰ Woyraa Mí ne Míena Míaƒe Kekelia Klẽ: Vomeɖaseɖiɖi ƒe nuteƒekpɔkpɔ ʋãme aɖewoe nye si: Nyɔnu aɖe si xɔ ƒe 55 di be yeatso mɔdodo me. Esi wòsusɔ vie ʋu aɖe naƒoe la, nɔvinyɔnu aɖe lé eƒe abɔ hee le mɔ dzi hegblɔ nɛ be: “Taflatse, lé be na ɖokuiwò sia. Ɣeyiɣi vɔ̃wo mee míele!” Emegbe eɖe nusitae ɣeyiɣiawo nye vɔ̃ me nɛ. Nyɔnua biae be, “Yehowa Ðasefoe nènyea?” Esi nyɔnua xɔ míaƒe agbalẽ aɖe le nɔvianyɔnu gbɔ la, edi be yeado go Yehowa Ðasefo aɖe eye nudzɔdzɔ sia na wòke ɖe wo ŋu.

¹¹ Nɔvinyɔnu aɖe te dzeɖoɖo kple nyɔnu aɖe le dɔnɔwo kpɔƒe le ɖɔkta ƒe dɔwɔƒe. Nyɔnua ɖo to nyuie eye wògblɔ be: “Menya Yehowa Ðasefowo ewɔ sẽ xoxo; gake ne ava dzɔ be meva zu Yehowa Ðasefo gbaɖegbe la, ke nya si nègblɔ nam fifiae na. Ðeko wò nyawo sese le abe kekelie mekpɔ le viviti me ene.”

¹² Dɔmenyowɔwɔ ate ŋu anye afɔɖeɖe vevi aɖe le kpekpe ɖe ame bubuwo ŋu be woasrɔ̃ nyateƒea me. Esi nɔvinyɔnu eve aɖewo tso gbeadzi gbɔna aƒeme la, wokpɔ nyɔnu tsitsi aɖe ɖi le ʋu me eye edze abe ɖe eƒe lãme menɔ kɔkɔm o ene. Wotɔ hebia nyɔnua be ɖe wòhiã kpekpeɖeŋu hã. Ewɔ nuku nɛ ŋutɔ be ame eve siwo yemenya kura o tsɔ ɖe le eme na ye nenema ale gbegbe be edi kokoko be yeanya nusi tututu ʋã wo. Esia ʋu ɖaseɖiɖi ƒe mɔnu ɖi. Nyɔnua tsɔ eƒe adrɛs na wo enumake eye wòkpe wo dzidzɔtɔe be woava srã ye kpɔ. Wodze nusɔsrɔ̃ gɔme. Eteƒe medidi o nyɔnua te kpekpewo dede eye ele nyateƒea gblɔm na ame bubuwo fifia.

¹³ Nɔvinyɔnu tsitsi aɖe va ɖia ɖase ŋdikanya le woƒe ƒuta. Edoa go gbɔviwo, vidzikpɔlawo, gadzraɖoƒedɔwɔlawo, kple ame bubu siwo va ɖia tsa le ƒuta le ŋdi me. Enɔa zikpuiwo dzi le ƒuata wɔa Biblia-nusɔsrɔ̃wo. Ame geɖe srɔ̃ nyateƒea tso egbɔ eye wozu Yehowa Ðasefowo fifia.

¹⁴ Le dɔwɔƒe la, nɔvinyɔnu aɖe see eƒe dɔwɔhati aɖe nɔ nu ƒom tso dunyaheha aɖe si dzi wòka ɖo be ate ŋu akpɔ xexeame ƒe kuxiwo gbɔ ŋu. Nɔvinyɔnua de nu eme eye wòƒo nu tso nusiwo Mawu ƒe Fiaɖuƒea awɔ ƒe ŋugbedodowo ŋu. Dze sia si woɖo le dɔwɔƒe na wodze Biblia-nusɔsrɔ̃ gɔme edziedzi le aƒeme eye mlɔeba la, nyɔnua kple srɔ̃a va zu Ðasefowo.

¹⁵ Mègaŋlɔ be Gbeɖe be Ðasefoe Yenye O! Esi Yesu ɖɔ eƒe nusrɔ̃lawo be wonye “akaɖiwo . . . le xexeame” la, eƒe susue nye be ele be woakpe ɖe ame bubuwo ŋu be Mawu ƒe Nya la ƒe gbɔgbɔmenumekɔkɔ naɖe vi na wo. Ne míewɔa Yesu ƒe aɖaŋuɖoɖo dzi la, aleke míabu míaƒe subɔsubɔdɔ lae?

¹⁶ Ame aɖewo dia ɣeyiɣi aɖe ƒe dɔ ne wole dɔ dim. Woɖea ɣeyiɣi kple ŋusẽ si woazã ɖe eŋu dzi kpɔtɔna, elabena wodina be yewoazã yewoƒe ɣeyiɣi ƒe akpa gãtɔ ɖe dɔwɔna siwo yewokpɔ be aɖe vi wu la ŋuti. Nenemae míawo hã míebua míaƒe subɔsubɔdɔa? Togbɔ be míate ŋu ase le mía ɖokui me be ele be míawɔ subɔsubɔdɔa eye míalɔ̃ be míadi ɣeyiɣi ɖe eŋu hã la, ɖe wòle be míaƒe didi vevitɔ nanɔ nu bubu ŋua?

¹⁷ Míenya be naneke meli woyɔna be ɣeyiɣi aɖe ƒe Kristotɔ o, eye míeɖe adzɔgbe, ‘gbe nu le mía ɖokui gbɔ’ eye míelɔ̃ be míadze Yesu yome ‘ɣesiaɣi.’ (Mat. 16:24) Míaƒe didie nye be míayi dɔ dzi kple “luʋɔ blibo,” míawɔ mɔnukpɔkpɔ ɖesiaɖe ŋudɔ ana míaƒe kekelia naklẽ ale be míaɖo amewo gbɔ le afisiafi. (Kol. 3:23, 24) Ele be míatsri xexeame ƒe nɔnɔmewo, dzo si nɔ mía me gbã la nakpɔtɔ anɔ mía me, eye míakpɔ egbɔ be míaƒe kekelia naklẽ nyuie ɣesiaɣi. Ðewohĩ ame aɖewo na dzo si le wo me la tsi eye woƒe kekelia wɔ vĩ, si manya kpɔ le adzɔge vie hã o. Ame ma ahiã na kpekpeɖeŋu be dzo nagaɖo eme ɖe subɔsubɔdɔa ŋu.

¹⁸ Ðewohĩ ame aɖewo ahe ɖe megbe le esi míaƒe gbedasia mevivia ame geɖe nu o ta. Paulo gblɔ be Kristo ŋuti gbedasia nye “bometsinya na amesiwo tsrɔ̃ la.” (Kor. I, 1:18) Gake nya kae amewo ɖagblɔ o, egblɔ ŋusẽtɔe be: “Nyanyui la mekpea ŋu nam o.” (Rom. 1:16) Amesi ŋu kpena la bua eɖokui ame tsɛ alo ame maɖinu. Aleke wɔ ŋu nakpe mí ne míeƒo nu tso xexeame katã ƒe Dziɖula Gãtɔ la kple ɖoɖo wɔnuku siwo wòwɔ hena míaƒe dzidzɔkpɔkpɔ mavɔ la ŋu? Manyo be míakpɔ mía ɖokui ame tsɛwo alo ame maɖinuwo ne míegblɔ nyateƒe siawo na ame bubuwo o. Ke ele be wòaʋã mí míawɔ mía tɔ sinua, míaɖe míaƒe kakaɖedzi afia be ‘ŋu mekpea mí o.’—Tim. II, 2:15.

¹⁹ Nyateƒea ƒe akaɖi si le keklẽm le dukɔwo me fifia le xexeame katã la na agbe mavɔ nɔnɔ le paradiso ƒe xexe yeye me ƒe mɔkpɔkpɔ ame. Mina míaɖee afia be míexɔ nuxlɔ̃ame si nye be míana míaƒe kekelia naklẽ ɣesiaɣi la de dzime! Ne míewɔ nenema la, míakpɔ dzidzɔ abe nusrɔ̃la siwo gbesiagbe “womedzudzɔ nufiafia kple nyanyuigbɔgblɔ fia le Yesu Kristo ŋuti o” la ene.—Dɔw. 5:42, míawoe te gbe ɖe edzi.