‘Alea Gbegbee Mawu Lɔ̃ Mi̇́i’
“Esi Mawu lɔ̃ mí ale la, ele na míawo hã be, míalɔ̃ mía nɔewo.”—YOHANES I, 4:11.
1. Nukatae ame miliɔn geɖe akpe ta ɖe Fiaɖuƒe Akpatawo me kple takpeƒe bubuwo le xexeame godoo le March 23 lia ƒe ɣeɖoto megbe?
ÐIKEKEMANƆMEE la, amesiwo asɔ gbɔ wu 13,000,000 akpe ta le xexeame katã ɖe Fiaɖuƒe Akpatawo me kple teƒe bubu siwo Yehowa Ðasefowo akpe ta ɖo la le Kwasiɖa, March 23, 1997, ƒe ɣeɖoto megbe. Nukatae? Esi lɔlɔ̃ gãtɔ kekeake si Mawu ɖe fia ameƒomea wɔ dɔ ɖe wo dzi tae. Yesu Kristo he susu yi Mawu ƒe lɔlɔ̃ ɖeɖefia ƒe kpeɖodzi wɔdɔɖeamedzi sia dzi, esi wògblɔ be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.”—Yohanes 3:16.
2. Nya kawoe wòanyo na mí katã be míabia mía ɖokui le alesi míewɔa nu ɖe Mawu ƒe lɔlɔ̃ ŋui ŋuti?
2 Esi míele lɔlɔ̃ si Mawu ɖe fia ŋu bum la, anyo be míabia mía ɖokui ase be, ‘Ðe mekpɔ ŋudzedze ɖe nusi Mawu wɔ la ŋu vavãa? Ðe mɔ si nu menɔa agbe ɖo ɖee fia be mekpɔa ŋudzedze ɖe eŋu nenemaa?’
“Mawu Enye Lɔlɔ̃”
3. (a) Nukatae lɔlɔ̃ ɖeɖefia menye nusi Mawu mewɔ kpɔ o? (b) Aleke ŋusẽ kple nunya dze le eƒe asinudɔwɔwɔwo mee?
3 Lɔlɔ̃ ɖeɖefia ŋutɔ menye nusi Mawu mewɔ kpɔ o elabena “Mawu enye lɔlɔ̃.” (Yohanes I, 4:8) Lɔlɔ̃ ye nye eƒe nɔnɔme vevitɔ. Esime wònɔ anyigba la dzi dzram ɖo be wòanye nɔƒe na amegbetɔ la, alesi wòwɔ towoe eye wòƒo tsiwo nu ƒu ɖe tawo kple atsiaƒuwo me nye ŋusẽ ɖeɖefia wɔdɔɖeamedzi aɖe. (Mose I, 1:9, 10) Esi Mawu na ɖoɖo si nu tsi zɔna ɖo tso tsidzadza dzi vaseɖe esi wòagatrɔ azu alilikpo kple ɖoɖo si nu oxygen, ya si míegbɔna, zɔna ɖo, dze dɔwɔwɔ gɔme, esime wòwɔ nugbagbevi suesue gbogbo siwo míenya xexlẽme na o kpakple numiemie hamehamewo bene woatrɔ nu vevi siwo le anyigba la me ne woazu nuɖuɖu si ŋu amegbetɔ anɔ agbe ɖo, esime wòde ɣeyiɣidzidzenuwo lãme na mí siwo wɔa dɔ ɖe ŋkekewo kple dzinuwo ƒe didime le Anyigba la dzi dzi la, eɖe nunya gã la fia. (Psalmo 104:24; Yeremya 10:12) Gake nusi gaɖe dzesi wu kura le nuwɔwɔ siwo wokpɔna mee nye Mawu ƒe lɔlɔ̃.
4. Le nuwɔwɔ siwo míekpɔna gome la, nusiwo ɖe Mawu ƒe lɔlɔ̃ fia kawoe wòle be mí katã míakpɔ ahakpɔ ŋudzedze ɖe wo ŋu?
4 Míaƒe aɖe gblɔa Mawu ƒe lɔlɔ̃ ŋu nya na mí ne míeɖu atikutsetse ɖiɖi vivi siwo edze ƒã be menye míaƒe agbe lelé ɖe te ta koe wowɔ wo ɖo o ke boŋ ɖe dzidzɔdodo na mí ta hãe la. Míaƒe ŋku kpɔa eƒe kpeɖodzi si ŋu ɖikeke mele o le ɣe ƒe amigogbagba dzeaniwo me, wokpɔnɛ ne yame kɔ dzinuviwo do nyuie, le seƒoƒo hamehame kple woƒe amadede nyakpɔawo, lãwo ƒe viwo ƒe fefe, kple xɔlɔ̃wo ƒe dzidzɔdoɖeameŋu nukokowo me. Míaƒe ŋɔti naa míenyana ne míegbɔ adame seƒoƒowo ƒe ʋeʋẽ lilili. Míaƒe to tonɛ na mí ne míese tsitsetsewo ƒe hoowɔwɔ, xewo ƒe xɔxlɔ̃, kple lɔlɔ̃tɔwo ƒe gbe. Míesenɛ le mía ɖokui me ne lɔlɔ̃tɔwo kpla asi kɔ na mí atuu. Wowɔ lã aɖewo kple ŋutete be wote ŋu kpɔa nu, sea nu alo sea nanewo ƒe ʋeʋẽ si mí amegbetɔwo míate ŋu ase alo akpɔ o. Gake amegbetɔ si wowɔ ɖe Mawu ƒe nɔnɔme nu sie ŋutete le be wòakpɔ Mawu ƒe lɔlɔ̃ la adze sii le mɔ si nu lã aɖeke mate ŋui o nu.—Mose I, 1:27.
5. Aleke Yehowa ɖe lɔlɔ̃ geɖe fia Adam kple Xawae?
5 Esi Yehowa Mawu wɔ ame gbãtɔ Adam kple Xawa la, etsɔ nusiwo ɖe eƒe lɔlɔ̃ fia la ƒo xlã woe. Etso abɔ, paradiso, eye wòna ati hamehame mie ɖe eme. Ena tɔsisi aɖe do tso eme be wòade tsii eye wòwɔ xe kple lã dodzidzɔnamewo wobɔ ɖe eme kpaŋkpaŋ. Esiawo katãe wòtsɔ na Adam kple Xawa be wòanye woƒe aƒe. (Mose I, 2:8-10, 19) Yehowa wɔ nu ɖe wo ŋu abe viawo ene, abe amesiwo nye eƒe xexeame katã ƒe ƒomea me tɔwo ene. (Luka 3:38) Esi atsu kple asi gbãtɔ siawo Fofo dziƒotɔ la wɔ Eden wònye kpɔɖeŋu na wo la, ede dɔ si me dzidzeme le asi na wo be woana Paradiso la naxɔ anyigba bliboa dzi. Wo vi siwo woadzi la ayɔ anyigba bliboa dzi.—Mose I, 1:28.
6. (a) Aleke nèse le ɖokuiwò me le aglãdzenu si Adam kple Xawa wɔ la ŋu? (b) Nukae ate ŋu afia be míesrɔ̃ nu tso nusi dzɔ le Eden la me eye be sidzedze ma le vi ɖem na mí?
6 Gake medidi o, Adam kple Xawa do go toɖoɖo ƒe dodokpɔ, nuteƒewɔwɔ ƒe dodokpɔ aɖe. Gbã la, wo dometɔ ɖekae do kpo ŋudzedzekpɔkpɔ ɖe lɔlɔ̃ si woɖe fia wo la ŋu eye emegbe nɔvia hã dze eyome. Nusi wowɔ tso dzika ƒo ŋutɔ. Womate ŋu ado taflatse le eŋu o! Ena be wo kple Mawu dome gblẽ, wonyã wo ɖa le eƒe ƒomea me, eye woganyã wo le Eden la hã. Mí amesiwo li egbea míegale woƒe nuvɔ̃metsonuwo ƒe fu kpem kokoko. (Mose I, 2:16, 17; 3:1-6, 16-19, 24; Romatɔwo 5:12) Gake ɖe míesrɔ̃ nu le nu ma si dzɔ la mea? Aleke míawo hã míele nu wɔm ɖe Mawu ƒe lɔlɔ̃ la ŋui? Ðe míaƒe gbesiagbe nyametsotsowo fiana be míekpɔa ŋudzedze ɖe lɔlɔ̃ sia ŋua?—Yohanes I, 5:3.
7. Togbɔ be Adam kple Xawa wɔ nu nenema hã la, aleke Yehowa ɖee fia be yelɔ̃ woƒe dzidzimeviwoe?
7 Gake ŋudzedzemakpɔmakpɔ gã si mía dzila siwo nye amegbetɔ gbãtɔwo ɖe fia ɖe nu gbogbo ma gbegbe si Mawu wɔ na wo ŋu gɔ̃ hã meɖe Mawu ŋutɔ ƒe lɔlɔ̃ dzi kpɔtɔ o. Le nublanuikpɔkpɔ na amegbetɔ siwo womedzi ɣemaɣi haɖe o—si me mí amesiwo li egbea hã míele—me la, Mawu ɖe mɔ na Adam kple Xawa be woadzi vi hafi aku. (Mose I, 5:1-5; Mateo 5:44, 45) Ne ɖe menye nenemae wòwɔe o la, mía dometɔ aɖeke míadzɔ o. Yehowa na nusi dzi Adam ƒe dzidzimevi siwo katã awɔ nu le xɔse me anɔ te ɖo bene mɔkpɔkpɔ nanɔ wo si la wo esime wònɔ eƒe lɔlɔ̃nu ɖem fia vivivi. (Mose I, 3:15; 22:18; Yesaya 9:5, 6) Mɔ si dzi dukɔwo katã ato bene nusi Adam bu si nye be woanɔ agbe deblibo anye Mawu ƒe xexeame katã ƒe ƒomea me tɔ nagasu wo si hã nɔ ɖoɖo si wòwɔ me. Ewɔ esia esi wòna tafe la.
Nukata Tafe la Hiã?
8. Nukatae Mawu mate ŋu agblɔ ko be togbɔ be Adam kple Xawa aku hã la, woƒe dzidzimevi aɖeke ya maku o?
8 Nyateƒee wònye be ehiã be woaxe tafe si anye amegbetɔ ƒe agbea? Ðe Mawu mate ŋu agblɔe ko be Adam kple Xawa naku ɖe woƒe aglãdzedzea ta, gake woƒe dzidzimevi siwo aɖo to Mawu ya ate ŋu anɔ agbe mavɔ oa? Adze abe ɖe susu le nya sia me ene le amegbetɔ ƒe nukpɔsusu si mekpɔa nu yia ŋgɔ o nu. Gake ‘dzɔdzɔenyenye kple ʋɔnudɔdrɔ̃ lɔ̃la’ ye Yehowa nye. (Psalmo 33:5) Adam kple Xawa zu nuvɔ̃mewo vɔ megbe hafi dzi wo viwo; eyata womedzi vi mawo dometɔ aɖeke ame debliboe o. (Psalmo 51:7) Wo katã wonyi nuvɔ̃ ƒe dome, eye nuvɔ̃ ƒe tohehee nye ku. Ne ɖe Yehowa tsɔe ko be mewɔ naneke o la, anye ne kpɔɖeŋu ka ƒomevie wòaɖo na eƒe xexeame katã ƒe ƒomea me tɔwo? Mate ŋu aɖe asi le eya ŋutɔ ƒe dzidzenu dzɔdzɔeawo ŋu o. Ede bubu dzɔdzɔenyenye ƒe nudidiwo ŋu. Ame aɖeke mate ŋu akpɔ vodada le mɔ si nu Mawu kpɔ nya siwo ŋu nya la ku ɖo gbɔe wòasɔ o.—Romatɔwo 3:21-23.
9. Tafe ka tɔgbee hiã le Mawu ƒe dzɔdzɔenyenye ƒe dzidzenu nu?
9 Ke aleke woawɔ akpɔ nusi dzi woate ŋu anɔ te ɖo aɖe Adam ƒe dzidzimevi siwo ava ɖo to Yehowa lɔlɔ̃tɔe? Ne amegbetɔ deblibo aɖe aku vɔsaku ɖe wo ta la, ke ele dzɔdzɔe be woatsɔ agbe deblibo ma ƒe asixɔxɔ atsyɔ amesiwo axɔ tafe la dzi ase eye woakpɔ ŋudzedze ɖe eŋu la ƒe nuvɔ̃wo dzi. Esi wònye ame ɖeka si nye Adam ƒe nuvɔ̃e na amegbetɔƒomea katã zu nuvɔ̃wɔlawo ta la, amegbetɔ deblibo bubu ƒe ʋu si woakɔ ɖi, si ƒe asixɔxɔ asɔ kplii, la ana woakpɔ nusi ʋɔnu dzɔdzɔe dɔdrɔ̃ abia la atsɔ ana. (Timoteo I, 2:5, 6) Gake afikae woakpɔ amesia le?
Aleke Gbegbe Wòxɔ Asii?
10. Nukatae Adam ƒe dzidzimeviwo mete ŋu kpɔ tafe si hiã la na o?
10 Nuvɔ̃wɔla Adam ƒe dzidzimevi aɖeke meli si ate ŋu atsɔ nusi hiã bene woaƒle agbenɔnɔ ƒe mɔnukpɔkpɔ siwo dome Adam gblẽ la ana o. “Ame aɖeke mate ŋu axɔ nɔvia akpɔ o, eye mate ŋu axe etafe na Mawu,—elabena woƒe agbe ƒeƒle xɔ asi ŋutɔ eye ado kpoe tegbee,—be wòanɔ agbe ayi dzi, eye makpɔ yɔdo o.” (Psalmo 49:8-10) Le esi Yehowa nagblẽ ameƒomea ɖe yame mɔkpɔkpɔmanɔwosii teƒe la, eya ŋutɔ tsɔ nublanuikpɔkpɔ wɔ ɖoɖo ɖe eŋu.
11. Mɔ ka nue Yehowa to na amegbetɔ ƒe agbe deblibo si dze na tafe la le?
11 Menye mawudɔla aɖee Yehowa dɔ ɖo ɖe anyigba dzi be wòawɔ eɖokui abe ɖe wòku ene evɔ wòanye ŋutilã si wòdo la koe wòɖe da ɖi evɔ wòayi edzi anɔ agbe le gbɔgbɔ me o. Ke boŋ Wɔla la wɔ nukunu si Mawu ɖeɖekoe wòate ŋu ava susu me na, eye wòtsɔ via aɖe si le dziƒo ƒe agbeŋusẽ kple eƒe amenyenye de nyɔnu si ŋkɔe nye Maria, Eli vi, si tso Yuda-toa me, ƒe vidzidɔ me. Mawu ƒe dɔwɔŋusẽ, eƒe gbɔgbɔ kɔkɔe la, kpɔ ɖevia ta esime wònɔ tsitsim le dadaa ƒe vidzidɔ me, eye wodzii amegbetɔ debliboe. (Luka 1:35; Petro I, 2:22) Amesia sie nusi hiã be woatsɔ axe tafe si asɔ ɖe Mawu ƒe dzɔdzɔenyenye ƒe nudidiwo nu bliboe la le.—Hebritɔwo 10:5.
12. (a) Gɔmesese ka nue Yesu nye Mawu ƒe “Tenuvi” le? (b) Aleke alesi Mawu dɔ amesia be wòatsɔ tafea ana la na Eƒe lɔlɔ̃ na mí dze kɔtee?
12 Yehowa ƒe dziƒovi akpeakpeawo dometɔ kae wòtsɔ dɔ sia de asi na? Amesi Ŋɔŋlɔawo yɔ be eƒe “Tenuvi” lae. (Yohanes I, 4:9) Menye nusi wòva zu esime wodzii amegbetɔe ye woyɔ ŋkɔ sia na o, ke boŋ nusi wònye do ŋgɔ na ema le dziƒo ye. Eya koe nye amesi Yehowa wɔ tẽ si ame bubu aɖeke mekpe ɖe eŋu o. Eyae nye nuwɔwɔwo katã ƒe Ŋgɔgbevi. Eyae nye amesi Mawu zã le nuwɔwɔ bubuwo katã wɔwɔ me. Mawudɔlawo nye Mawu viwo, abe alesi Adam nye Mawu vii ene. Gake wogblɔ le Yesu ŋu be “ŋutikɔkɔe abe Tenuvi, si wodzi tso Fofoa gbɔ la, ƒe ŋutikɔkɔe ene” ye le eŋu. Wogblɔ be ele “Fofoa kɔme.” (Yohanes 1:14, 18) Wo kple Fofo la dome le kplikplikpli, wosea wo nɔewo domenya, eye wolɔ̃ wo nɔewo vevie. Eya hã lɔ̃ amegbetɔƒomea abe alesi Fofoa lɔ̃ woe ene. Lododowo 8:30, 31, NW, gblɔ alesi Fofo la sena le eɖokui me na Vi la kple alesi Vi la sena le eɖokui me na amegbetɔƒomea be: “Menye amesi gbɔ gbesiagbe [Yehowa] melɔ̃a nu le kura o, eye mekpɔa dzidzɔ le eŋkume ɣeawokatãɣi, . . . Nyee nye amesi ƒe nya wòlɔ̃na [Yehowa lɔ̃na] vevie gbesiagbe, eye mekpɔa dzidzɔ le eŋkume ɣesiaɣi, eye nusiwo [nye Yesu, Yehowa ƒe Dɔnunɔlagã, amesi woyɔ be nunya] melɔ̃na vevie la ku ɖe amegbetɔviwo ŋu.” Via sia si Mawu lɔ̃ alea gbegbe ye Wòdɔ ɖo ɖe anyigba la dzi be wòaxe tafe la. Eyata Yesu ƒe nya siawo me kɔ ale gbegbe, be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena”!—Yohanes 3:16.
13, 14. Nuka gɔmee wòle be nusi Biblia ƒe nuŋlɔɖia gblɔ le alesi Abraham di be yeatsɔ Isak asa vɔe ŋu la nakpe ɖe mía ŋu be míase le nusi Yehowa wɔ ŋu? (Yohanes I, 4:10)
13 Be nya sia me nanya ase na mí vie la, ɣeyiɣi didi aɖe hafi Yesu nava anyigba dzi la, Mawu gblɔ na Abraham, anye ƒe 3,890 ye nye esia be: “Kplɔ Isak, wò tenuvi, si gbɔ mèlɔ̃a nu lena o la, yi ɖe Moria-nyigba dzi, eye natsɔe amè nui le afima le vɔsamlekpui dzi le to aɖe, si mafia wò la dzi!” (Mose I, 22:1, 2) Le xɔse me, Abraham wɔ ɖe edzi. Tsɔe be yee nye Abraham. Ne viwòe nye ma, viwò ɖeka kolia si gbɔ mèlɔ̃a nu le o, ye ɖe? Aleke nànɔ sesem le ɖokuiwò me esime nèle nakea dzem na numevɔ la sasa, esime nènɔ mɔ si zɔzɔ xɔ ŋkeke geɖe la dzi yina ɖe Moria-nyigba dzi, eye nètsɔ viwòa da ɖe vɔsamlekpuia dzi?
14 Nukatae dzila si sea veve ɖe vi nu ase le eɖokui me nenema? Mose I, 1:27 gblɔ be Mawu ƒe nɔnɔme nue wòwɔ ame ɖo. Yehowa ŋutɔ ƒe lɔlɔ̃ kple nublanuikpɔkpɔ ƒe akpa sue aɖe koe dzena le lɔlɔ̃ kple nublanuikpɔkpɔ ƒe seselelãme siwo le mía me la me. Le Abraham gome la, Mawu de asi nya la me, ale be wometsɔ Isak sa vɔe ŋutɔŋutɔ o. (Mose I, 22:12, 13; Hebritɔwo 11:17-19) Gake Yehowa ŋutɔ ya megbe nusi axe tafea la tsɔtsɔ na o, togbɔ be ebia be eya ŋutɔ kple Via naɖe asi le nu xɔasi ŋutɔ aɖe ŋu hã. Nusi wowɔ la nye Mawu ƒe amenuveve ɖeɖefia gã aɖe, menye be ɖe wònye dzizizi nɛ tae o. Ðe míekpɔa ŋudzedze blibo ɖe eŋua?—Hebritɔwo 2:9.
Nusi ƒe Mɔ Wòʋu Ði
15. Aleke tafe la kpɔ ŋusẽ ɖe amewo ƒe agbe dzii le fifi nuɖoanyi sia me gɔ̃ hã?
15 Ðoɖo ma si me lɔlɔ̃ le si Mawu wɔ la kpɔ ŋusẽ gã aɖe ɖe amesiwo kpɔa ŋudzedze ɖe eŋu le xɔse me la ƒe agbe dzi. Le nuvɔ̃ ta wonye Mawu ƒe futɔwo tsã. Abe alesi eƒe Nya la gblɔe ene la, wonye ‘ketɔwo tsã elabena woƒe susu nɔ dɔwɔwɔ vɔ̃ɖiwo dzi.’ (Kolosetɔwo 1:21-23) Gake ‘wolé avu le wo kple Mawu dome to Via ƒe ku me.’ (Romatɔwo 5:8-10) Esi woɖe asi le woƒe agbenɔnɔ xoxotɔ ŋu eye wolɔ̃ xɔ tsɔtsɔke si Mawu na wòate ŋu asu amesiwo tsɔa Kristo ƒe vɔsa la dzixɔse dea dɔwɔwɔ me si la, wove wo nu na dzitsinya nyui wo.—Hebritɔwo 9:14; Petro I, 3:21.
16. Yayra kawoe wona alẽha sue la le woƒe tafe la dzixɔxɔse ta?
16 Yehowa ve amesiawo dometɔ siwo woɖo xexlẽme na, alẽha sue aɖe, nu be woakpe ɖe Via ŋu le dziƒo Fiaɖuƒea me, bene woana tame si Mawu ɖo ɖe anyigba ŋu le gɔmedzedzea me nava eme. (Luka 12:32) Wotia amesiawo “tso to sia to kple gbegbɔgblɔ sia gbegbɔgblɔ kple du sia du kple dukɔ sia dukɔ me . . . eye [wowɔ] wo fiawo kple nunɔlawo na míaƒe Mawu, eye woaɖu fia [ɖe] anyigba la dzi.” (Nyaɖeɖefia 5:9, 10) Apostolo Paulo ŋlɔ na amesiawo be: “Vinyenyegbɔgbɔ la . . . miexɔ, esi me míedo ɣli le be: Aba, Fofo! Gbɔgbɔ la ŋutɔ ɖia ɖase kpena ɖe míaƒe gbɔgbɔ la ŋu bena, mawuviwo míenye. Ke ne viwo míenye la, ekema domenyilawo hã míenye: Mawu ƒe domenyilawo kple Kristo ƒe hadomenyilawo.” (Romatɔwo 8:15-17) Esi Mawu xɔ wo viawoe la, wona ƒomedodo xɔasi si Adam bu la su wo si; gake woagana subɔsubɔdɔwɔwɔ le dziƒo ƒe mɔnukpɔkpɔ—nusi menɔ Adam si kpɔ o—vi siawo. Eyata mewɔ nuku o be apostolo Yohanes gblɔ be: “Mikpɔ lɔlɔ̃ gã, si ƒomevi Fofo la tsɔ ke mí la ɖa, bena woayɔ mí be mawuviwo!” (Yohanes I, 3:1) Menye lɔlɔ̃ si wotu ɖe gɔmeɖose dzi (a·gaʹpe) koe Mawu ɖe fia amesiawo o ke eɖe numalɔ̃malɔ̃leamegbɔ ƒe lɔlɔ̃ (phi·liʹa), si nye esi tɔgbe blaa xɔlɔ̃ vavãwo goŋgoŋ, hã fia wo.—Yohanes 16:27.
17. (a) Mɔnukpɔkpɔ kae wona amesiwo katã tsɔa tafe la dzixɔse wɔa dɔe? (b) Nukae “mawuviwo ƒe ŋutikɔkɔe ƒe ablɔɖe” la afia na wo?
17 Yehowa ʋu ƒomedodo xɔasi ma si Adam bu la ƒe mɔnukpɔkpɔ na ame bubuwo hã—amesiwo katã tsɔa ɖoɖo si Mawu wɔ dɔmenyotɔe na agbekpɔkpɔ to Yesu Kristo dzi la dzixɔse wɔa dɔe. Apostolo Paulo ɖe nu me be: “Nuwɔwɔ la [nuwɔwɔ siwo nye amegbetɔ siwo dzɔ tso Adam me] ƒe mɔkpɔkpɔ vevi la le mawuviwo ƒe ɖeɖefia la lalam [efia be, wole mɔ kpɔm na ɣeyiɣi si me wòadze kɔte be Mawu vi siwo nye dziƒo Fiaɖuƒea ƒe domenyilawo kpe ɖe Kristo ŋu la tso ɖe nuwɔwɔ ŋu ɖe amegbetɔƒomea ƒe nyonyo ta]. Elabena wobɔbɔ nuwɔwɔ la ɖe gbegblẽ la te [wodzi wo ɖe nuvɔ̃ me eye kue nye nusi le wo lalam, eye mɔ aɖeke menɔ anyi si nu woate ŋu aɖe ga wo ɖokui o], menye eya ŋutɔ ƒe lɔlɔ̃nu o, ke le amesi bɔbɔe ɖe anyi la ŋuti hena mɔkpɔkpɔ [si Mawu na]. Eyata woaɖe nuwɔwɔ la ŋutɔ hã tso gbegblẽ ƒe kluvinyenye la me ayi ɖe mawuviwo ƒe ŋutikɔkɔe ƒe ablɔɖe la me.” (Romatɔwo 8:19-21) Nuka ablɔɖe ma afia? Be woɖe wo tso nuvɔ̃ kple ku ƒe kluvinyenye me. Woade blibo le susu kple ŋutilã me, Paradiso azu woƒe aƒe, eye woana agbe mavɔ si me woase vivi le woƒe blibodedea me eye woaɖe alesi wokpɔ ŋudzedze ɖe eŋui la afia Yehowa, Mawu vavã ɖeka kolia, la wo. Eye aleke esiawo katã awɔ ava eme? To Mawu ƒe Tenuvi la ƒe tafevɔsa la dzie.
18. Nukae míawɔ le March 23 lia ƒe ɣeɖoto megbe, eye nukatae?
18 Le ƒe 33 M.Ŋ. ƒe Nisan 14 lia dzi le dziƒoxɔ aɖe dzi le Yerusalem la, Yesu ɖo eƒe ku ƒe Ŋkuɖodzi anyi. Ŋkuɖoɖo eƒe kua dzi ƒe sia ƒe va zu nudzɔdzɔ vevi aɖe le Kristotɔ vavãwo katã ƒe agbe me. Yesu ŋutɔ de se be: “Minɔ esia wɔwɔ dzi hena ŋkuɖoɖo dzinye.” (Luka 22:19, NW) Woawɔ Ŋkuɖodzia le March 23 lia dzi (si nye ɣeyiɣi si Nisan 14 lia adze egɔme) le ƒe 1997 me. Gbemagbe la, naneke manɔ vevie wu Ŋkuɖodzi sia ɖuƒe yiyi o.
Aleke Nàɖo Wo Ŋui?
◻ Mɔ kawo nue Mawu ɖe lɔlɔ̃ gbogbo aɖe fia amegbetɔƒomea le?
◻ Nukatae amegbetɔ ƒe agbe deblibo hiã be woatsɔ axe tafe ɖe Adam ƒe dzidzimeviwo ta?
◻ Nu xɔasi ka ŋue Yehowa ɖe asi le le tafea tsɔtsɔ na me?
◻ Nukawoe tafea na woate ŋu ava eme?
[Nɔnɔmetata si le axa 10]
Mawu tsɔ eƒe Tenuvi la na