Te Ðe Mawu Ŋu

Ðe Nane Ate Ŋu “Ama Mí Ða Tso Mawu Ƒe Lɔlɔ̃” La Gbɔa? Romatɔwo 8:38, 39

MÍA dometɔ kae medina be amewo nalɔ̃ ye o? Le nyateƒe me la, míaƒe dzi dzea eme ne míese le mía ɖokuiwo me be míaƒe ƒometɔwo kple xɔlɔ̃wo lɔ̃ mí. Nublanuitɔe la, amegbetɔwo ƒe ƒomedodowo me tea ŋu gblẽna bɔbɔe ŋutɔ eye kakaɖedzi menɔa wo ŋu o. Míaƒe ame veviwo ate ŋu agbã dzi na mí, agble mí ɖi, alo agbe nu le mía gbɔ gɔ̃ hã. Ke hã, ame aɖe li si ƒe lɔlɔ̃ nu metsina gbeɖe o. Woɖɔ lɔlɔ̃ si le Yehowa Mawu si na esubɔlawo la nyuie le Romatɔwo 8:38, 39 me.

Apostolo Paulo gblɔ be “meka ɖe edzi bliboe.” Nu ka dzie wòka ɖo bliboe? Eka ɖe edzi bliboe be naneke “mate ŋu ama mí ɖa tso Mawu ƒe lɔlɔ̃” la gbɔ o. Paulo megblɔ nya sia ɖe eya ŋutɔ ɖeɖe ko nu o, ke boŋ eƒo nu ɖe “mí” ame siwo katã subɔa Mawu nuteƒewɔwɔtɔe la hã nu. Be Paulo nate gbe ɖe nya si gblɔm wònɔ dzi la, eyɔ nu vovovo aɖewo siwo mate ŋu axe mɔ na lɔlɔ̃ si le Yehowa si na esubɔla siwo ɖe adzɔgbe nɛ la o.

“Alo nuwɔwɔ bubu aɖeke.” Paulo zã nya siawo siwo lɔ nuwɔwɔwo katã ɖe eme la tsɔ ɖee fia be naneke kura meli si ate ŋu ama Yehowa subɔla wɔnuteƒewo dome tso Eƒe lɔlɔ̃ la gbɔ o.

To vovo na amegbetɔwo ƒe lɔlɔ̃ si ate ŋu atrɔ alo si nu ate ŋu atsi la, lɔlɔ̃ si le Mawu si na ame siwo yia edzi kpɔa mɔ nɛ le xɔse me la ya metrɔna o; enɔa anyi tegbee. Kakaɖedzitɔe la, esia nyanya ʋãa mí míetena ɖe Yehowa ŋu, eye míedzea agbagba ɖe sia ɖe be míaɖe lɔlɔ̃ si le mía si nɛ la afia.