Alesi Nàna Hehe Wò Dzitsinyae

“DZITSINYA dzadzɛ ye na wodɔa alɔ̃ nyuie.” Blemalododo sia te gbe ɖe nyateƒenya vevi aɖe dzi: Ne míeɖo to míaƒe dzitsinya la, míekpɔa ememeŋutifafa kple dzidzeme.

Gake menye amesiamee wɔa nenema o. Adolf Hitler tsɔe ɖo eɖokui dzi be yeaɖe amegbetɔ tso ameflunu, si nye drɔ̃eƒenya ɖigbɔ si woyɔna be dzitsinya la si me. Eƒe dziɖuɖu si nye ŋɔdzi la fia alesi gbegbe amewo ate ŋu asẽ ŋutae ne wogbe woƒe dzitsinya ŋudɔwɔwɔ la mí wòwɔ mo yaa. Gake nenema ke nuvlowɔla wɔadã geɖe siwo li egbea hã sẽa ŋutae—amesiwo dɔa nyɔnu gbɔ sesẽe hewua ame nublanuimakpɔmakpɔtɔe. Ðeviwo koe nuvlowɔla siawo siwo le dzidzim ɖe edzi la dometɔ geɖe nye. Eyata woŋlɔ tanya sue aɖe ɖe agbalẽ si ƒo nu tso nɔnɔme sia ŋu me be Children Without a Conscience (Ðevi Dzitsinyamanɔsitɔwo).

Togbɔ be nuvlowɔwɔ ŋutasesẽtɔe mava susu me na ame akpa gãtɔ gbeɖe o hã la, wo dometɔ geɖe ƒe lãme metsɔa fu ne wonɔ gbɔdɔdɔ ƒe agbe gbegblẽ, woka aʋatso, alo ba ame o. Agbenyuinɔnɔ le bubum le xexeame katã. Esi apostolo Paulo he susu yi xɔsegbegbe gã tso tadedeagu vavãtɔ gbɔ dzi la, eŋlɔ be Kristotɔ aɖewo aɖe mɔ xexeame ƒe ŋusẽkpɔɖeamedzi able wo eye ana woava zu amesiwo “wotsɔ ga xɔdzo de dzesi wo le woa ŋutɔwo ƒe dzitsinya me.” (Timoteo I, 4:2) Nugbegblẽwɔwɔ ƒe afɔkua galolo wu gɔ̃ hã egbea le ‘ŋkeke mamlɛ’ siawo me. (Timoteo II, 3:1) Eyata ele be Kristotɔwo nadze agbagba vevie akpɔ woƒe dzitsinya ta. Míate ŋu awɔ esia ne míena hehee hetui ɖo.

Susua, Dzi la, Kple Wò Dzitsinya

Apostolo Paulo gblɔ be: “Nyateƒe gblɔm mele le Kristo me, nyemele aʋatso kam o, esi nye dzitsinya le ɖase ɖim kpe ɖe ŋunye le Gbɔgbɔ kɔkɔe me.” (Romatɔwo 9:1) Eyata dzitsinya la ate ŋu anye ɖaseɖila. Ate ŋu adzro nuwɔna aɖe me ada asi ɖe edzi loo alo abu fɔe. Mía Wɔla lae de nyui kple vɔ̃ ƒe sidzenu geɖe mía me. Gake míagate ŋu amlã míaƒe dzitsinya ahana hehee. Le mɔ ka nu? Eyae nye be míaxɔ sidzedze vavãtɔ tso Mawu ƒe Nya la me. Apostolo Paulo gblɔ be: “Mitrɔ miaƒe nɔnɔme to miaƒe tamesusu ƒe yeyewɔwɔ me boŋ, bene miadzro nusi nye Mawu ƒe [lɔlɔ̃nu], si nyo, eye wòdzea eŋu nyuie, eye wòle blibo la me akpɔ.” (Romatɔwo 12:2) Esi nèle Mawu ƒe susu kple lɔlɔ̃nu ƒãm ɖe wò susu me la, wò dzitsinya ate dɔwɔwɔ ɖe Mawu vɔvɔ̃ ƒe mɔ nu geɖe wu.

Yehowa Ðasefowo kpe ɖe ame miliɔn geɖe ŋu le xexeame katã ‘woxɔ Yehowa Mawu kple Yesu Kristo ŋuti sidzedze.’ (Yohanes 17:3) Wotoa woƒe aƒeme Biblia nusɔsrɔ̃ femaxee ƒe ɖoɖoa dzi fiaa nu dzianukwaretɔwo le Yehowa Mawu ƒe dzidzenu siwo ku ɖe gbɔdɔdɔ, aha muamewo nono, srɔ̃ɖeɖe, dɔwɔwɔ, kple nya bubu geɖe ŋu.a (Lododowo 11:1; Marko 10:6-12; Korintotɔwo I, 6:9, 10; Efesotɔwo 5:28-33) ‘Sidzedze vavãtɔ’ sia xɔxɔ nye afɔɖeɖe vevi aɖe le mawuvɔvɔ̃ ƒe dzitsinya tutuɖo me. (Filipitɔwo 1:9) Le nyateƒe me la, ne Biblia me gɔmesese deto su Kristotɔ si hã la, ele be wòayi edzi atsɔ Mawu ƒe Nya la anyi eƒe susui ɣesiaɣi hafi eƒe dzitsinya nate ŋu anɔ sesĩe.—Psalmo 1:1-3.

Biblia tsɔ dzitsinya sɔ kple kpɔɖeŋudzi, si ŋu míaƒe seselelãmewo kple didiwo kpe ɖo. (Romatɔwo 2:15) Hafi dzitsinya nawɔ dɔ nyuie la, ele be susua kple dzia nawɔ dɔ aduadu le ɖekawɔwɔ me. Ema bia nu geɖe wɔwɔ wu nyawo dede wò susu me ko. Ele be nàmlã wò dzi—wò ememe seselelãmewo, didiwo, kple nudzodzrowo. Eyatae Lododowo ƒe agbalẽa zã nyagbɔgblɔwo abe ‘bi wò dzi,’ ‘wò dzi nènɔ eŋu,’ kple ‘fia mɔ wò dzi’ ene. (Lododowo 2:2; 23:19; 27:23) Mɔ aɖe si nu míawɔ esia le enye ŋugbledede le Ŋɔŋlɔawo ŋu kple wo dzakadzaka le susu me. Psalmo 77:13 gblɔ be: “Mabu tame le wò nuwɔwɔwo katã ŋu, eye made ŋugble le wò dɔwɔwɔwo ŋu.” Ŋugbledede kpena ɖe mía ŋu be míaɖo míaƒe ememe seselelãmewo kple dzimesusuwo gbɔ.

Le kpɔɖeŋu me, tsɔe be nɔnɔme makɔmakɔ aɖe tsi asiwò abe atamanono ƒe numãme ene. Abe ame bubuwo ke ene la, ɖikeke mele eme o be ènya alesi wògblẽa nu le ame ŋui. Gake togbɔ be xɔlɔ̃wo kple ƒometɔwo de dzi ƒo na wò be nàdzudzɔ hã, menya le wɔwɔm na wò o. Aleke ŋugbledede le Biblia me nyawo ŋu ado ŋusẽ wò dzitsinya le go sia mee?

Le kpɔɖeŋu me, dze agbagba nàde ŋugble le apostolo Paulo ƒe nya siwo le Korintotɔwo II, 7:1 la ŋu kpɔ: “Azɔ la esi ŋugbedodo siawo le mía si la, lɔlɔ̃tɔwo, mina míakɔ mía ɖokui ŋuti tso ŋutilã kple gbɔgbɔ ƒe ɖiƒoƒo sia ɖiƒoƒo me, bena míawu kɔkɔenyenye nu le mawuvɔvɔ̃ me.” Na nusi nya siawo fia la me nakɔ na wò. Bia ɖokuiwò be, ‘Nuka koŋ ye “ŋugbedodo siawo” siwo Paulo wɔnɛ la nye?’ Ne èxlẽ nya siwo ƒo xlãe la, àkpɔe be kpukpui siwo do ŋgɔ la gblɔ be: “ ‘Mido go le wo dome, eye miɖe mia ɖokui ɖa, Aƒetɔ la gblɔe, eye migaka asi nu makɔmakɔ ŋuti o, eye nye la maxɔ mi, eye manye Fofo na mi, eye miawo hã mianye vinyeŋutsuviwo kple vinyenyɔnuviwo, Aƒetɔ, ŋusẽkatãtɔ la gblɔe.’ ”—Korintotɔwo II, 6:17, 18.

Fifia ŋusẽ gava le Paulo ƒe sedede be ‘míakɔ mía ɖokui ŋu tso ɖiƒoƒo me’ la ŋu wu! Nusi aʋã mí vevie be míawɔ esia enye be Mawu do ŋugbe be ‘yeaxɔ mí,’ si fia be akpɔ mía ta. Ðewohĩ àbia ɖokuiwò be, ‘Ðe ƒomedodo kplikplikpli ate ŋu anɔ mía kplii dome—abe alesi wònɔa viŋutsu alo vinyɔnu kple fofoa dome enea?’ Ðe alesi Mawu lɔlɔ̃tɔ si nya nu ‘naxɔ wò’ alo alɔ̃ wò la medzro wò vevie oa? Ne ƒomedodo ma me mekɔ na wò o la, ke lé ŋku ɖe alesi vifofo lɔ̃amewo ɖea lɔlɔ̃ kple vividoɖeameŋu fiaa wo viwoe ŋu. Fifia kpɔe le susu me be ƒomedodo ma tɔgbe le mia kple Yehowa dome! Zi alesi nèdea ŋugble le eŋui la, zi nenemae ƒomedodo sia dea to ɖe edzii.

Gake de dzesii: Ne ‘mègaka asi nu makɔmakɔ ŋuti o’ ko hafi nàte ŋu ate ɖe Mawu ŋu. Bia ɖokuiwò be: ‘Ðe atamazazã ƒe numãme hã mekpe ɖe “nu makɔmakɔ” siwo Mawu tsri ŋu oa? Ðe ezazã anye “ɖiƒoƒo ŋutilã,” eye wòahe dɔléle vovovowo vɛ nama? Esi Yehowa nye Mawu dzadzɛ, alo “kɔkɔe” ta la, ɖe eɖoɖo koŋ aƒo ɖi ɖokuinye le mɔ sia nu adze eŋua?’ (Petro I, 1:15, 16) De dzesii be Paulo gaxlɔ̃ nu le ‘ɖiƒoƒo ame ƒe gbɔgbɔ,’ alo tamesusu ŋu. Bia ɖokuiwò be: ‘Ðe numãme sia ɖu nye susu dzia? Ðe mawɔ nusianu, ɖewohĩ made nye lãmesẽ, nye ƒomea, alo nye tenɔnɔ le Mawu gbɔ afɔku me atsɔ aɖi kɔ na nye dzodzroa? Afikae meɖe mɔ atamanono ƒe numãme gblẽ nu le nye agbenɔnɔ ŋu se ɖo?’ Biabia ɖefuname siawo ŋu bubu ate ŋu ana nàkpɔ dzideƒo atsɔ adzudzɔ!

Le nyateƒe me la, àhiã ame bubuwo ƒe kpekpeɖeŋu kple alɔdoame be nàɖu atamanono dzi. Gake ŋugbledede le Biblia me nyawo ŋu ana hehe wò dzitsinya vevie eye wòado ŋusẽe ale be nàvo tso numãmea si me.

Ne Míewɔ Nuvɔ̃

Togbɔ be míedzea agbagba ɖesiaɖe kpem be míawɔ nu nyui hã la, míaƒe blibomademadewo kpea mía dzi ɣeaɖewoɣi eye míedaa vo. Enaa míaƒe dzitsinya wɔa fu mí, gake awɔ na mí be míaŋe aɖaba aƒu edzi ko. Alo dzi aɖe le mía ƒo ale gbegbe be míadi be míadzudzɔ agbagbadzedze ɖesiaɖe be míasubɔ Mawu. Gake ɖo ŋku Fia Dawid ƒe nya la dzi. Esi wòwɔ ahasi kple Bat-seba megbe la, eƒe dzitsinya ɖe fu nɛ vevie. Egblɔ le fuwɔame si wòse le eɖokui me ŋu be: “Wò asi sẽ ɖe dzinye keli kple zã, ŋdɔ heliheli na nye ƒuto me mi no.” (Psalmo 32:4) Ese vevea? Ẽ, esee! Gake mawumeblanuiléle sia ʋã Dawid wòtrɔ dzime eye woa kple Mawu dome ganyo. (Tsɔe sɔ kple Korintotɔwo II, 7:10.) Dawid ƒe kukuɖeɖe kple nuxaxa hena tsɔtsɔke ɖe eƒe dzimetɔtrɔ anukwaretɔe fia wòdze ƒã. Esi Dawid ɖo to eƒe dzitsinya ta la, ekpe ɖe eŋu wòtrɔ eye wògava kpɔ dzidzɔ mlɔeba.—Psalmo 51.

Nu ma tɔgbe ate ŋu adzɔ egbea. Ame aɖewo srɔ̃ Biblia kple Yehowa Ðasefowo va yi gake wodzudzɔ esime wokpɔe be yewoƒe agbenɔnɔ mesɔ ɖe Mawu ƒe dzidzenu kɔkɔawo nu o. Ðewohĩ woli kple nyɔnu alo ŋutsu aɖe si menye wo srɔ̃ o alo nɔnɔme makɔmakɔ aɖe tsi wo si. Woƒe dzitsinya ɖe fu na wo!

Ne nɔnɔme sia tɔgbe mee nèle la, ke bu nya siwo apostolo Petro gblɔ le Pentekoste-ŋkekea dzi ŋu kpɔ. Esime wòklo nu le wo detɔ Yudatɔwo ƒe nuvɔ̃wo ŋu la, “etɔ woƒe dzi me.” Le esi teƒe be woana ta la, wowɔ ɖe Petro ƒe aɖaŋuɖoɖo be woatrɔ le woƒe dzime la dzi, eye wokpɔ Mawu ƒe amenuveve. (Dɔwɔwɔwo 2:37-41) Wò hã àte ŋu awɔ nenema ke! Le esi teƒe be nàɖe asi le nyateƒea ŋu le esi wò dzitsinya ɖea fu na wò ta la, na wò dzitsinya naʋã wò boŋ be ‘nàtrɔ le wò dzime eye nàgbugbɔ.’ (Dɔwɔwɔwo 3:19) Ne èɖoe kplikpaa hedze agbagba la, àte ŋu awɔ tɔtrɔ siwo hiã be Mawu nakpɔ ŋudzedze ɖe ŋuwò.

‘Dzitsinya Nyui Nènɔ Asiwò’

Eɖanye fifiae nèdze nusɔsrɔ̃ tso Yehowa ƒe mɔwo ŋu gɔme loo alo ènye Kristotɔ tsitsi si tsɔ ƒe geɖe subɔ o, Petro ƒe nuxlɔ̃mea sɔ na wò be: “Dzitsinya nyui [nenɔ] mia si.” (Petro I, 3:16) Nudeamedzie wònye menye agbae o. Tsɔ nunya si le Mawu ƒe Nya, Biblia, me nyi wò susu kple dzi nàtsɔ ana hehee. Ðo to wò dzitsinya ne exlɔ̃ nu wò. Na tomefafa si toɖoɖo ame ƒe dzitsinya hena vɛ nasu asiwò.

Enye nyateƒe be menye dɔ vie wònye be nàna hehe wò dzitsinya ahamlãe o. Gake àte ŋu ado gbe ɖa na Yehowa Mawu be wòakpe ɖe ŋuwò. Eƒe kpekpeɖeŋu ana nàte ŋu asubɔ Mawu “tso . . . dzitsinya nyui kpakple xɔse, si me alakpa aɖeke mele o la me.”—Timoteo I, 1:5.

[Etenuŋɔŋlɔ]

[Nɔnɔmetata si le axa 6]

Mawu ƒe Nya la xexlẽ kple ŋugbledede le eŋu kpena ɖe mía ŋu míenaa hehe míaƒe dzitsinya