‘Oo, Mawu Ƒe Nunya Me Goglo Loo!’

“Oo, Mawu ƒe kesinɔnuwo kple nunya kpakple sidzedze me goglo loo! Aleke seɖoƒe meli na eƒe ʋɔnudɔdrɔ̃wo me dzodzro o, eye eƒe mɔwo mele nyanya me o ye nye esi!”—ROM. 11:33.

 1. Mɔnukpɔkpɔ gãtɔ kekeake kae su Kristotɔ xɔnyɔnyrɔwo si?

MƆNUKPƆKPƆ gãtɔ kae su asiwò kpɔ? Gbã la, ɖewohĩ wò susu ayi dɔdeasi aɖewo siwo nèxɔ kpɔ, alo ale si wode bubu ŋuwò ɣeaɖeɣi kpɔ, la dzi. Gake le mí Kristotɔ xɔnyɔnyrɔwo ya gome la, mɔnukpɔkpɔ gãtɔ si wotsɔ ɖo mía ŋkume ye nye mɔnukpɔkpɔ si su mía si be ƒomedodo kplikplikpli nanɔ mía kple Yehowa, Mawu vavã ɖeka kolia la, dome. Esia wɔe be ‘Mawu va nya mí.’—1 Kor. 8:3; Gal. 4:9.

 2. Nu ka tae mɔnukpɔkpɔ gã aɖee wònye be míenya Yehowa, eye be eya hã nya mí?

² Nu ka tae mɔnukpɔkpɔ gã aɖee wònye na mí be míenya Yehowa, eye be eya hã nya mí? Elabena eyae nye Ame vevitɔ kekeake le xexea katã me, ke menye esia ɖeɖe koe o, eya kee nye Ame si kpɔa ame siwo lɔ̃nɛ la ta. Gbɔgbɔ ʋã nyagblɔɖila Naxum wòŋlɔ bena: ‘Yehowa ƒe dɔme nyo, enye sitsoƒe le xaxagbe, eye wònya ame siwo ɖoa dzi ɖe eŋu.’ (Nax. 1:7; Ps. 1:6) Le nyateƒe me la, míaƒe agbe mavɔ kpɔkpɔ kura gɔ̃ hã nɔ te ɖe Mawu vavã la kple Via, Yesu Kristo, nyanya dzi.—Yoh. 17:3.

 3. Nu kae sidzedze Mawu lɔ ɖe eme?

³ Sidzedze Mawu lɔ nu geɖe ɖe eme wu eƒe ŋkɔ ŋutɔŋutɔ ɖeɖe ko nyanya. Ele be wòanye mía Xɔlɔ̃, eye míanya nu siwo wòdina kple nu siwo medina o la nyuie. Eye agbenɔnɔ le ɖekawɔwɔ me kple sidzedze ma hã wɔa akpa vevi aɖe le ale si míeɖenɛ fiana be míenya Mawu nyuie la me. (1 Yoh. 2:4) Gake nu bubu hã hiã vevie ne míedi vavã be míanya Yehowa. Eyae nye be, menye nu siwo wòwɔ koe wòhiã be míanya o, ke ele be míanya ale si wòwɔ nanewo kple nu si tae wòwɔ wo ɖo hã. Zi ale si míese Yehowa ƒe tameɖoɖowo gɔme la, zi nenemae ale si gbegbe ‘Mawu ƒe nunya me gogloe’ la awɔ nuku na mí.—Rom. 11:33.

Enye Tameɖoɖo Ƒe Mawu

4, 5. (a) Ne wozã nya “tameɖoɖo” le Biblia me la, nu kae wòfiana? (b) Wɔ ale si woate ŋu ato mɔ vovovowo dzi aɖo taɖodzinu aɖe gbɔ ƒe kpɔɖeŋu.

⁴ Tameɖoɖo ƒe Mawue Yehowa nye, eye Biblia ƒo nu tso eƒe “tameɖoɖo mavɔ” ŋu. (Ef. 3:10, 11) Nu ka tututue nyagbɔgblɔ sia fia? Ne wozã nya “tameɖoɖo” le Biblia me la, efiaa taɖodzinu aɖe koŋ si gbɔ ame ate ŋu aɖo to mɔ vovovowo dzi.

⁵ Míawɔ eƒe kpɔɖeŋu ale: Ame aɖe ate ŋu aɖoe be yeazɔ mɔ ayi teƒe aɖe. Le go sia me la, teƒea ɖoɖo va zu eƒe taɖodzinu, alo tameɖoɖo. Ate ŋu atiae be yeazɔ afɔ, yeado keke, alo yeatsɔ ʋu azɔ mɔa, eye ate ŋu ato mɔ vovovowo aɖo teƒea. Ne ele mɔ si wòtia dzi yina la, ate ŋu adzɔ be yame ƒe nɔnɔme made ame dzi o, alo ʋuwo nasɔ gbɔ ɖe mɔa dzi, eye ɖewohĩ woatu mɔa le teƒe aɖewo, si ana wòahiã be wòato mɔ bubu. Ke hã asitɔtrɔ ka kee wòahiã be wòawɔ o, aɖo eƒe taɖodzinua gbɔ kokoko ne eva ɖo teƒea mlɔeba.

 6. Alekee Yehowa trɔ ɖe nɔnɔmeawo ŋu be yeana yeƒe tameɖoɖoa nava eme?

⁶ Nenema kee Yehowa hã trɔ ɖe nɔnɔme vovovowo ŋu be yeana yeƒe tameɖoɖo mavɔ la nava eme. Le bubudede tiatiawɔblɔɖe si le eƒe nuwɔwɔ siwo si nunya le si ŋu me la, ewɔa tɔtrɔwo enumake be yeaɖo yeƒe taɖodzinua gbɔ. Le kpɔɖeŋu me, mina míade ŋugble tso ale si Yehowa wɔ na tame si wòɖo ku ɖe Dzidzimevia ŋu va eme la ŋu. Le gɔmedzedzea me la, Yehowa gblɔ na atsu kple asi gbãtɔa be: ‘Midzi, ne miasɔ gbɔ, eye miayɔ anyigba la dzi, eye mianye agbo ɖe edzi.’ (1 Mose 1:28) Ðe aglãdzedze si yi edzi le Eden bɔa me la gblẽ Mawu ƒe tameɖoɖoa mea? Kura o! Yehowa ɖe afɔ enumake tsɔ kpɔ nɔnɔme ma si do mo ɖa la gbɔ to ɖoɖo bubu aɖe dzi, abe ɖee wòto “mɔ” bubu ene, be yeaɖo yeƒe taɖodzinua gbɔ. Egblɔ ‘dzidzimevi’ aɖe, si ava ɖɔ nu siwo aglãdzela mawo gblẽ ɖo la, ƒe vava ŋu nya ɖi.—1 Mose 3:15; Heb. 2:14-17; 1 Yoh. 3:8.

 7. Nu kae míesrɔ̃ tso ale si Yehowa ɖɔ eɖokui abe ale si woŋlɔe ɖe 2 Mose 3:14 ene la me?

⁷ Ŋutete si le Yehowa si be wòakpɔ kuxi ɖe sia ɖe si ado mo ɖa la gbɔ esime wòle egbɔ kpɔm be yeƒe tameɖoɖoa nava eme la wɔ ɖeka kple ale si wòɖɔ eɖokui. Esi Mose gblɔ nu siwo ate ŋu ado kplamatsee le dɔ si Yehowa de esi la wɔwɔ me na Yehowa la, Yehowa na kakaɖedzii hegblɔ nɛ be: “‘Manye nu si manye.’ Eye wògblɔ kpee be: ‘Ale nàgblɔ na Israel viwoe nye esi: “Manye ye dɔm ɖe mia gbɔ.”’” (2 Mose 3:14, NW) Ɛ̃, Yehowa le klalo be yeatrɔ azu nu sia nu si hiã ale be yeana yeƒe tameɖoɖo nava eme bliboe! Apostolo Paulo wɔ esia ƒe kpɔɖeŋu le Romatɔwo ƒe agbalẽa ƒe ta 11 lia me le mɔ wɔdɔɖeamedzi aɖe nu. Le ta ma me la, eƒo nu tso kpɔɖeŋu ƒe amiti aɖe ŋu. Kpɔɖeŋu si wòwɔ la me dzodzro ana mí katã míaƒe ŋudzedzekpɔkpɔ ɖe ale si gbegbe Yehowa ƒe nunya me gogloe ŋu nagade to ɖe edzi—dziƒoyiyi ƒe mɔkpɔkpɔe ɖale mía si loo alo agbe mavɔ nɔnɔ le anyigba sia dzi ƒe mɔkpɔkpɔe le mía si o.

Yehowa Ƒe Tameɖoɖo Le Dzidzimevi Si Ŋu Nya Wogblɔ Ði La Ŋu

8, 9. (a) Nyateƒenya vevi ene kawoe akpe ɖe mía ŋu míase amitia ŋuti kpɔɖeŋua gɔme? (b) Nyabiase ka ƒe ŋuɖoɖoe ɖe ale si Yehowa trɔna ɖe nɔnɔmeawo ŋu be yeƒe tameɖoɖo nava eme la fia?

⁸ Hafi míate ŋu ase amitia ŋuti kpɔɖeŋua gɔme la, ehiã be míase nyateƒenya ene aɖewo, siwo ku ɖe Yehowa ƒe tameɖoɖo le dzidzimevi, si ŋu nya wògblɔ ɖi, ŋu la me vava ŋu gɔme. Gbãtɔe nye be, Yehowa do ŋugbe na Abraham be, “woayra anyigba dzi dukɔwo katã [godoo]” to eƒe dzidzimeviwo dzi. (1 Mose 22:17, 18) Evelia, wona mɔnukpɔkpɔ Israel dukɔ si dzɔ tso Abraham me la be “nunɔlawo ƒe fiaɖuƒe” aɖe nado tso wo me. (2 Mose 19:5, 6) Etɔ̃lia, esime dzɔdzɔme Israel viwo ƒe akpa gãtɔ mexɔ Mesia la o la, Yehowa ɖe afɔ bubu aɖewo tsɔ ƒo “nunɔlawo ƒe fiaɖuƒe” la me tɔwo nu ƒu. (Mat. 21:43; Rom. 9:27-29) Eye eneliae nye be, togbɔ be Abraham ƒe dzidzimevia ƒe akpa vevitɔa ye nye Yesu hã la, wona mɔnukpɔkpɔ ame bubuwo hã be woazu dzidzimevia ƒe akpa aɖe.—Gal. 3:16, 29.

⁹ Le ɖekawɔwɔ me kple nyateƒenya vevi ene siawo la, míekpɔe le Nyaɖeɖefia ƒe agbalẽa me be ame siwo aɖu dzi kple Yesu abe fiawo kple nunɔlawo ene le dziƒo la katã ƒe xexlẽme anye ame 144,000. (Nyaɖ. 14:1-4) Woyɔ ame siawo hã be “Israel viwo.” (Nyaɖ. 7:4-8) Gake ɖe wòfia be ame 144,000 la katã nye dzɔdzɔme Israel viwo, alo Yudatɔwoa? Nya sia ƒe ŋuɖoɖo ɖe ale si Yehowa trɔna ɖe nɔnɔmeawo ŋu be yeƒe tameɖoɖo nava eme la fia. Azɔ mina míakpɔ ale si apostolo Paulo ƒe lɛta si wòŋlɔ na Romatɔwo la kpe ɖe mía ŋu míekpɔ nya sia ƒe ŋuɖoɖoe ɖa.

“Nunɔlawo Ƒe Fiaɖuƒe”

10. Mɔnukpɔkpɔ kae nɔ ʋuʋu ɖi na dzɔdzɔme Israel dukɔa ɖeɖe ko?

¹⁰ Abe ale si míegblɔe do ŋgɔ ene la, Israel dukɔa ɖeɖe koe mɔnukpɔkpɔa nɔ ʋuʋu ɖi na be woatia “nunɔlawo ƒe fiaɖuƒe kple dukɔ kɔkɔe” la me tɔwo tso wo dome. (Mixlẽ Romatɔwo 9:4, 5.) Gake nu kae adzɔ ne Dzidzimevi si ŋugbe wodo la va ɖo? Ðe gbɔgbɔ me Israel vi 144,000 siwo ava zu Abraham ƒe dzidzimevia ƒe akpa evelia la katã ado tso dzɔdzɔme Israel viwo domea?

11, 12. (a) Ɣekaɣie wodze ame siwo ava zu dziƒo Fiaɖuƒea me tɔwo la tiatia gɔme, aleke Yudatɔ siwo nɔ anyi ɣemaɣi la ƒe akpa gãtɔwo wɔ nui? (b) Nu kae Yehowa wɔ be ame siwo ava zu Abraham ƒe dzidzimevia ƒe “xexlẽme blibo la” nade?

¹¹ Xlẽ Romatɔwo 11:7-10. Abe dukɔ ene la, ƒe alafa gbãtɔ me Yudatɔwo gbe Yesu. Eya ta mɔnukpɔkpɔ si nye be Abraham ƒe dzidzimevia nado tso wo me la megava nye woawo ɖeɖe ko tɔ o. Ke hã esi wodze ame siwo ava zu “nunɔlawo ƒe fiaɖuƒe” le dziƒo la tiatia gɔme le ƒe 33 M.Ŋ. ƒe Pentekosteŋkekea dzi la, Yudatɔ dzi dzɔdzɔe tɔ aɖewo xɔ amekpekpea. Ne wotsɔ ame akpe ʋɛ siwo xɔ amekpekpea sɔ kple Yuda dukɔ bliboa la, ɖeko wonɔ abe “ame susɔe aɖewo” ko ene.—Rom. 11:5.

¹² Ke aleke Yehowa awɔ be ame siwo ava nye Abraham ƒe dzidzimevia ƒe “xexlẽme blibo la” nade? (Rom. 11:12, 25) Kpɔ ale si apostolo Paulo ɖo nya sia ŋue ɖa: “Menye abe ɖe Mawu ƒe nya la do kpo nu ene o. Elabena menye ame siwo katã do tso [dzɔdzɔme] Israel me lae nye ‘Israel’ ŋutɔŋutɔ o. Eye menye be esi wonye Abraham ƒe dzidzime [alo dzidzimeviwo] ta la, wo katã wonye viwo [Abraham ƒe dzidzimevia ƒe akpa aɖe] o . . . Egɔmee nye be, ŋutilãmeviwo menye Mawu ƒe viwo ŋutɔŋutɔ o, ke boŋ ŋugbedodo la ƒe viwoe wobuna dzidzime la.” (Rom. 9:6-8) Eya ta Yehowa mebia be ame siwo anye dzidzimevia ƒe akpa aɖe la nanye Abraham ƒe dzidzimeviwo le ŋutilã nu kokoko o.

Kpɔɖeŋu Ƒe Amiti La

13. Nu kae nu siwo gbɔna la le tsitre ɖi na? (a) amiti la, (b) eƒe kea, (d) atia ŋutɔ, kple (ɖ) eƒe alɔawo.

¹³ Le numeɖeɖea dzi yiyi me la, apostolo Paulo tsɔ ame siwo ava nye Abraham ƒe dzidzimevia ƒe akpa aɖe la sɔ kple kpɔɖeŋu ƒe amiti aɖe ƒe alɔwo.a (Rom. 11:21) Amiti sia si wodo ɖe abɔ me la le tsitre ɖi na Mawu ƒe tameɖoɖo si ku ɖe nubabla si wòwɔ kple Abraham la me vava ŋu. Atia ƒe ke le kɔkɔe eye wòle tsitre ɖi na Yehowa, ame si naa agbe gbɔgbɔ me Israel la. (Yes. 10:20; Rom. 11:16) Atia ŋutɔ le tsitre ɖi na Yesu, si nye Abraham ƒe dzidzimevia ƒe akpa vevitɔ. Atia ƒe alɔawo le tsitre ɖi na ame siwo nye Abraham ƒe dzidzimevia ƒe akpa evelia ƒe “xexlẽme blibo la.”

14, 15. Ame kawoe ‘woŋe ɖa’ tso amiti si wodo ɖe abɔ me la ŋu, eye ame kawoe wova do ɖe eme?

¹⁴ Le amitia ŋuti kpɔɖeŋua me la, wotsɔ dzɔdzɔme Yudatɔ siwo gbe Yesu la sɔ kple amitia ƒe alɔ siwo ‘woŋe ɖa.’ (Rom. 11:17) Esia wɔe be wobu mɔnukpɔkpɔ si su wo si be woava zu Abraham ƒe dzidzimevia ƒe akpa aɖe la. Gake ame kawoe ava xɔ ɖe wo teƒe? Ŋuɖoɖoa awɔ nuku na dzɔdzɔme Yudatɔ siwo Abraham ƒe dzidzimevi nyenye le ŋutilã nu nyea dada na la ŋutɔ. Gake Yohanes Amenyrɔɖetsimela la xlɔ̃ nu wo do ŋgɔ be, ne Yehowa di la, ate ŋu ana viwo nado tso kpewo gɔ̃ hã me na Abraham.—Luka 3:8.

¹⁵ Ke nu kae Yehowa wɔ be eƒe tameɖoɖoa nava eme? Paulo ɖe eme be wotsɔ amiti gbemetɔ ƒe alɔwo do ɖe abɔmemiti la ƒe alɔ siwo woŋe ɖa la teƒe. (Mixlẽ Romatɔwo 11:17, 18.) Eya ta wotsɔ Kristotɔ amesiamina siwo nye dukɔwo me tɔwo, abe esiwo nɔ hame si nɔ Roma me ene, la do ɖe kpɔɖeŋu ƒe amitia me le kpɔɖeŋunyagbɔgblɔ nu. To mɔ sia dzi la, wova zu Abraham ƒe dzidzimevia ƒe akpa aɖe. Le dzɔdzɔme nu la, wonɔ abe gbemiti ƒe alɔwo ene, eye mɔnukpɔkpɔ aɖeke menɔ wo si be woanye nubabla tɔxɛ sia me tɔwo o. Gake Yehowa ʋu mɔnukpɔkpɔa ɖi na wo be woava zu gbɔgbɔ me Yudatɔwo.—Rom. 2:28, 29.

16. Alekee apostolo Petro ɖe gbɔgbɔ me dukɔ yeyea ɖoɖo anyi me?

¹⁶ Apostolo Petro ɖe nya sia me ale: “Eya ta [mi gbɔgbɔ me Israel vi, siwo dome Kristotɔ siwo nye Dukɔwo me tɔwo hã le la, ye Yesu Kristo nye] ame vevi na, elabena mienye xɔsetɔwo; gake le ame siwo mexɔna sena o gome la, ‘kpe ma tututu si xɔtulawo gbe la va zu dzogoedzikpe vevitɔ,’ kpakple ‘kpe si ana woakli nu kple agakpe si ana woadze anyi.’ . . . Gake miawo ya mienye ‘dzidzime tiatia, nunɔla siwo nye fiawo, dukɔ kɔkɔe, ame siwo nye Mawu tɔ koŋ, bene miaɖe gbeƒã’ ame si yɔ mi tso viviti me va eƒe kekeli wɔnukua me la ‘ƒe nɔnɔme nyuiwo.’ Elabena mienye dukɔ tsã o, gake azɔ la, mienye Mawu ƒe dukɔ; mienye ame siwo womekpɔ nublanui na tsã o, gake azɔ la, miezu ame siwo wokpɔ nublanui na.”—1 Pet. 2:7-10.

17. Nu ka tae nu si Yehowa wɔ la “mele dzɔdzɔme nu o”?

¹⁷ Yehowa wɔ nane si ame geɖe manɔ mɔ kpɔm na kura o. Paulo ɖɔ nu si wòwɔ be enye “nu si mele dzɔdzɔme nu o.” (Rom. 11:24) Nu ka tae? Nya lae nye be, adze nu si mebɔ o, eye adze kura gɔ̃ hã be mele dzɔdzɔme nu be woalã atilɔ tso gbemiti aɖe dzi ava do ɖe abɔmemiti aɖe me o; ke hã nu sia ye agbledela aɖewo wɔna le ƒe alafa gbãtɔ me.b Le mɔ ma ke nu la, Yehowa wɔ nane si amewo menɔ mɔ kpɔm na o. Le Yudatɔwo ƒe susu nu la, Dukɔwo me tɔwo mate ŋu atse ku si ƒomevi dim wole o. Ke hã Yehowa na ame siawo tututu zu “dukɔ” si tsea Fiaɖuƒea ƒe ku la me tɔwo. (Mat. 21:43) Tso amisisi na Kornelio—Dukɔwo me tɔ aʋamatsomatsotɔ gbãtɔ si trɔ dzi me—le ƒe 36 M.Ŋ. me dzi la, woʋu mɔnukpɔkpɔa ɖi na ame siwo menye Yudatɔwo o, siwo nye aʋamatsomatsotɔwo, be woado wo ɖe kpɔɖeŋu ƒe amiti sia me.—Dɔw. 10:44-48.c

18. Mɔnukpɔkpɔ kae wogana dzɔdzɔme Yudatɔwo le ƒe 36 M.Ŋ. megbe?

¹⁸ Ðe esia fia be esi ƒe 36 M.Ŋ. va yi ko la, womagana mɔnukpɔkpɔ aɖeke dzɔdzɔme Yudatɔwo be woazu Abraham ƒe dzidzimevia ƒe akpa aɖe oa? Ao. Paulo ɖe eme be: “[Wo, dzɔdzɔme Yudatɔwo] hã, ne womeyi edzi le woƒe dzimaxɔse la me o la, woatsɔ wo ado ɖe edzi; elabena Mawu agate ŋu atsɔ wo ado ɖe edzi ake. Elabena ne wolã wò tso amiti si nye gbemetɔ tso dzɔdzɔme la ŋu, eye wowɔ nu si mele dzɔdzɔme nu o, be wotsɔ wò do ɖe amiti si le abɔ me dzi la, ekema ɖe womatsɔ esiawo, siwo nye dzɔdzɔmetɔ la, ado ɖe woawo ŋutɔwo ƒe amiti la dzi geɖe wu oa?”d—Rom. 11:23, 24.

“Woana Ðeɖe Israel Blibo La”

19, 20. Abe ale si amiti la ŋuti kpɔɖeŋua ɖee fia ene la, nu kae Yehowa wɔ de goe?

¹⁹ Ɛ̃, Yehowa ƒe tameɖoɖo si ku ɖe “Mawu ƒe Israel la” ŋu le eme vam le nukumɔ aɖe nu. (Gal. 6:16) Abe ale si Paulo gblɔe ene la, “woana ɖeɖe Israel blibo la.” (Rom. 11:26) Le Yehowa ƒe ɣeyiɣi ɖoɖi dzi la, “Israel blibo la”—si nye, gbɔgbɔ me Israel viwo ƒe xexlẽme bliboa—asubɔ abe fiawo kple nunɔlawo ene le dziƒo. Naneke mate ŋu ana Yehowa ƒe tameɖoɖoa nado kpo eme vava o!

²⁰ Abe ale si wogblɔe ɖi ene la, Abraham ƒe dzidzimevia—si nye Yesu Kristo kpakple ame 144,000 la—ahe yayrawo avae na “dukɔwo me tɔwo.” (Rom. 11:12; 1 Mose 22:18) Le mɔ sia nu la, ɖoɖo sia aɖe vi na Mawu ƒe amewo katã. Vavãe, ne míede ŋugble tso ale si Yehowa ƒe tameɖoɖo mavɔ la le eme vamee ŋu la, ale si gbegbe “Mawu ƒe kesinɔnuwo kple nunya kpakple sidzedze me goglo” la awɔ nuku na mí godoo.—Rom. 11:33.

[Etenuŋɔŋlɔwo]

Èɖo Ŋku Wo Dzia?

• Nu kae míesrɔ̃ tso Yehowa ŋu le ale si wònaa eƒe tameɖoɖo vaa emee la me?

• Le Romatɔwo 11 lia me la, nu kae nu siwo gbɔna la le tsitre ɖi na?

Amiti la.

Eƒe ke la.

Atia ŋutɔ.

Eƒe alɔwo.

• Nu ka tae gbemiti ƒe alɔwo dodo ɖe abɔmemiti me “mele dzɔdzɔme nu o”?

[Aɖaka/Nɔnɔmetatawo si le axa 24]

Nu Ka Tae Wodoa Gbemiti Ƒe Alɔwo Ðe Abɔmemiti Me?

▪ Lucius Junius Moderatus Columella si nye Roma asrafo heganye agbledela la nɔ anyi le ƒe alafa gbãtɔ mía M.Ŋ. me. Wonyae tɔ ɖe agbalẽ 12 siwo wòŋlɔ ku ɖe agbledzigbenɔnɔ kple agbledede ŋu la ŋu nyuie.

Eyɔ blemalododo sia ɖe eƒe agbalẽ atɔ̃lia me be: “Ame si ŋlɔa amiti te la le biabiam tso esi be wòatse ku; ame si dea aɖu ete la le koko ƒom nɛ be wòatse ku; ame si ɖea eŋu la le eƒom ɖe enu be wòatse ku.”

Esi wòɖɔ ati siwo tsina nyuie evɔ wodoa kpo kutsetse vɔ la, ekafu afɔɖeɖe siawo: “Susu nyui aɖee wònye be woatsɔ ga biɖoe aɖe do ɖe eme eye woatsɔ gbemiti ƒe alɔ fẽ aɖe ade eme ahablae sesĩe wòalé ɖe eŋu nyuie; nu si dona tso emee nye be, atia tsea ku geɖe wu, abe ɖe wotsɔ ati fẽa va do fui le kpɔɖeŋunyagbɔgblɔ nu ene.”

[Nɔnɔmetata si le axa 23]

Ðe nèse amiti ŋuti kpɔɖeŋua gɔmea?