Nyabiabia Siwo tso Exlẽlawo Gbɔ

Nukae nye Biblia ƒe nukpɔsusu le kufiatsotso, si nye ku tsɔtsɔ he to na hlɔ̃dolawoe ŋu?

Eme kɔ be seselelãme si nɔ te ɖe nusi teƒe míekpɔ alo nɔnɔme si me míele le agbe me dzi la anɔ mía dometɔ ɖesiaɖe si le nya sia ŋu. Gake ele be mí Yehowa Ðasefowo míadze agbagba be míaƒe susu nasɔ kple Mawu tɔ le kufiatsotso ŋu, gake míade akpa aɖeke dzi le dunyahehe ƒe nyaʋiʋli siwo me ame geɖe kpɔa gome le le nya sia ŋu me o.

Ne míagblɔe tẽ la, Mawu megblɔ le eƒe Nya si woŋlɔ ɖi me be kufiatsotso nye nu gbegblẽ o.

Yehowa gblɔ eƒe susu le nya la ŋu le amegbetɔ ƒe ŋutinya ƒe gɔmedzeɣi ke, abe alesi míexlẽ le Mose ƒe Agbalẽ Gbãtɔ ta 9 ene. Noa kple eƒe ƒomea, amesiwo va zu tɔgbui kple mamawo na ameƒomea katã la ŋue nya sia ku ɖo. Esi wodo go le aɖakaʋua me vɔ la, Mawu gblɔ be woate ŋu aɖu lãwo—si fia be woate ŋu awu lãwo, woatso ʋu wo, eye woaɖui. Emegbe Mawu gblɔ le Mose I, 9:5, 6 be: “Ke mia ŋutɔwo miaƒe ʋu la, mabiae le lãwo kple amewo siaa si, mabia amesiame ƒe agbe le nɔvia si. Amesi kɔ ameʋu ɖi la, amewo akɔ eya hã ƒe ʋu ɖi; elabena Mawu ƒe nɔnɔme nue wowɔ ame ɖo.” Eyata Yehowa ɖe mɔ ɖe kufiatsotso na amewulawo ŋu.

Esime Mawu nɔ nu wɔm kple Israel-vi siwo nye eƒe dukɔ la, wotsɔ ku he to na ame ne wowɔ vodada gã bubu ƒomevi vovovowo le Mawu ƒe sea nu. Míexlẽ nyagbɔgblɔ gbadza sia le Mose IV, 15:30 be: “Ne ame aɖe ɖo tame wɔ nane la, ekema edo vlo Yehowa, eɖanye duamevi alo amedzro o; ele be, woatsrɔ̃e ɖa le eƒe dukɔ la dome.”

Ke esi woɖo Kristo-hamea anyi megbe ya ɖe? Míenya be Yehowae ɖe mɔ amegbetɔ ƒe dziɖuɖuwo li, eye eyɔ wo be dziɖuɖu siwo ŋusẽ li na. Le nyateƒe me la, esi Biblia de dzi ƒo na Kristotɔwo be woabɔbɔ wo ɖokui na dziɖuɖu siawo vɔ la, egblɔ be “Mawu ƒe subɔla wònye le wò nyonyo ŋuti. Ke ne èwɔ nu vɔ̃ɖi la, ŋɔ nadzi wò, elabena melé yi la ɖe asi dzodzro o, elabena Mawu ƒe subɔla kple amesi tsɔa dziku biaa hlɔ̃ amesi le nu vɔ̃ɖi wɔm la wònye.”—Romatɔwo 13:1-4.

Ðe nya ma fia be woɖe mɔ na dziɖuɖuwo be woawu hlɔ̃dola siwo wɔ nu vlo gãwo gɔ̃ hã? Míate ŋu aɖo eŋu be ẽ, le nya siwo le Petro I, 4:15 ta. Apostoloa xlɔ̃ nu nɔviawo le afima be: “Mia dome ame aɖeke nagakpe fu abe hlɔ̃dola alo fiafitɔ alo vɔ̃wɔla alo abe amesi doa gaglãsu ɖe ame bubuwo ƒe nya me la ene o.” Ède dzesiia, “mia dome ame aɖeke nagakpe fu abe hlɔ̃dola ene o”? Petro ƒe nyawo mefia be ŋusẽ mele dziɖuɖuwo si be woana amewula nakpe fu ɖe hlɔ̃ si wòdo ta o. Ke boŋ ɖe wòɖee fia be amewula ate ŋu axɔ tohehe si dze nɛ wòasɔ. Ðe ku tsɔtsɔ he to na amee hã le emea?

Ate ŋu anɔ eme. Paulo ƒe nya siwo dze le Dɔwɔwɔwo ta 25 na esia me kɔ. Yudatɔwo tsɔ nya ɖe Paulo ŋu be eda yewoƒe Se dzi. Esi aʋafia gã la nɔ eƒe gamenɔla Paulo ɖom ɖe Roma mɔ̃mefia gbɔ la, egblɔ le Dɔwɔwɔwo 23:29 be: “Mekpɔ bena, wole enu tsom le woƒe se la ƒe anukutsyɔtsyɔwo ŋuti; gake nutsotso aɖeke mele eŋu, si dze ku alo bablawo o.” Ƒe eve megbe la, Paulo va do ɖe Mɔ̃mefia Festo ŋkume. Míexlẽ le Dɔwɔwɔwo 25:8 be: “Paulo ɖe eɖokui nu gblɔ bena: Nyemewɔ nuvɔ̃ aɖeke ɖe Yudatɔwo ƒe se la alo ɖe gbedoxɔ la alo ɖe Kaisaro ŋu o.” Gake azɔ lé ŋku ɖe nya siwo wògblɔ le tohehe, si ate ŋu anye kufiatsotso gɔ̃ hã ŋu kpɔ. Míexlẽ le Dɔwɔwɔwo 25:10, 11 be:

“Paulo gblɔ bena: Kaisaro ƒe ʋɔnudrɔ̃zikpui la ŋgɔe nye esi mele tsitre ɖo, afisi wòle be, woadrɔ̃ ʋɔnum le; nyemewɔ vɔ̃ aɖeke Yudatɔwo o, abe alesi wò ŋutɔ hã nènyae nyuie ene. Ne tɔnye medzɔ o, eye mewɔ nane, si dze ku la, nyemegbe ku o; ke ne nusiwo amesiawo tsɔ le nunye tsom la, ƒe ɖeke mele eme o la, ame aɖeke mate ŋu atsɔm ade asi na wo o. Kaisaro si me metsɔ nye nya dee!”

Esime Paulo tsi tre ɖe dziɖula si woɖo le se nu ƒe ŋkume la, elɔ̃ ɖe edzi be Kaisaro kpɔ mɔ ahe to na nuvɔ̃wɔlawo, ate ŋu awu wo gɔ̃ hã. Megbe be womegahe to na ye ne yetɔ medzɔ o. Tsɔ kpe ɖe eŋu la, megblɔ be amewulawo koe Kaisaro kpɔ mɔ atso kufia na o.

Enye nyateƒe be Roma-ʋɔnudrɔ̃ɖoɖoa mede blibo o; nenemae amegbetɔ ƒe ʋɔnudrɔ̃ɖoɖowo hã le egbea. Wobu fɔ ame maɖifɔ aɖewo ɣemaɣi kple egbea hã eye wohe to na wo. Pilato gɔ̃ hã gblɔ le Yesu ŋu be: “Nyemekpɔ naneke le eŋu, si dze ku o; azɔ maƒoe, eye maɖe asi le eŋu!” Ẽ, togbɔ be dziɖuɖumegã la lɔ̃ ɖe edzi be ame maɖifɔe Yesu nye hã la, wowu ame maɖifɔ sia.—Luka 23:22-25.

Numadzɔmadzɔwɔwɔ mawo mena Paulo kple Petro wohe nya be kufiatsotso menyo kura o. Ke boŋ Mawu ƒe susu le nya la ŋue nye be zi alesi Kaisaro ƒe dziɖuɖu siwo ŋusẽ li na kpɔtɔ li ko la, ‘wolé yi la ɖe asi hetsɔa dziku biaa hlɔ̃ amesiwo le nu vɔ̃ɖi wɔm.’ Yi la zazã le gɔmesese sia nu be woatso kufia na ame hã le eme. Gake le nyabiabia si ŋu nyaʋiʋli le si nye be ɖe xexe sia me dziɖuɖu aɖe kpɔ mɔ atso kufia na amewulawo hã gome la, Kristotɔ vavãwo ɖɔa ŋu ɖo be woagade akpa aɖeke dzi o. Womedea nu nya sia ŋuti nyaʋiʋli aɖeke me o, si to vovo na Kristodukɔa ƒe osɔfowo.