Bubunɔameŋu Amegbetɔ Kafukafu Ye alo Mawu Ŋuti Kɔkɔ Yea?

XENOPHON si nye Helatɔ aʋafiagã xɔŋkɔ aɖe ŋlɔ be: “Ele be dziɖula naƒo eteviwo ta, menye be wòanyo wu wo ŋutɔŋutɔ ko o, ke ele be wòana woavɔ̃e ɖe ƒomevii hã.” Ame geɖe ayɔ ‘vɔvɔ̃’ ma tɔgbe be bubunɔameŋu.

Gake menye dziɖula siwo nye amegbetɔwo katã ŋue bubu le o. Ke hã amesiwo ŋu wòle la zãa woƒe ŋutete be amewo naku ɖe yewo ŋu eye wotsɔe ɖua amewo dzi hena woawo ŋutɔ ƒe viɖe. Ðewohĩ Adolf Hitler ye nye nusia wɔla vloetɔ si wonya le míaƒe ɣeyiɣia me. William L. Shirer ŋlɔ le eƒe agbalẽ si nye The Rise and Fall of the Third Reich me be: “[Le ƒe 1933 me la,] Germanytɔ akpa gãtɔ ƒe susue nye be Hitler nye kplɔla ŋutɔŋutɔ si ŋu bubu le—alo bubu ava nɔ eŋu kpuie. Woatsɔ bometsitsi anɔ eyome le ƒe wuieve sesẽ siwo kplɔe ɖo me abe ke ɖe wòtsoa nya me ɖe Mawu tɔ nu ene.”

Kplɔla siwo ŋu bubu nɔ bɔ ɖe mawusubɔsubɔ ƒe ŋutinya me fũ, amesiwo wɔ nu be woƒe amewo naku ɖe wo ŋu gake wohe dzɔgbevɔ̃e va wo yomedzelawo dzi. Yesu xlɔ̃ nu be: “Mikpɔ nyuie, bena ame aɖeke nagaflu mi o. Elabena ame geɖewo ava le nye ŋkɔa dzi agblɔ bena: Nye enye Kristo; eye woaflu ame geɖewo.” (Mateo 24:4, 5) Menye ƒe alafa gbãtɔa me koe aʋatso Kristo siwo ŋu wodea bubui va le o. Jim Jones gblɔ le ƒe 1970 ƒe ƒeawo me be yee nye “mesia na Amewo ƒe Gbedoxɔ ƒe ha la.” Wogblɔ be enye “sɔlemetɔ bubutɔ” si si “ŋusẽ tɔxɛ aɖe le ɖe amewo dzi,” eye eyae na ame gbogbo aɖewo wu wo ɖokui le ƒe 1978 me wònye gãtɔ siwo dzɔ kpɔ le ŋutinya me la dometɔ ɖeka.a

Edze ƒã be bubunɔameŋu ate ŋu azu nunana vɔ̃ɖi. Gake Biblia ƒo nu tso nunana, alo nunanawo, ƒomevi bubu siwo tso Mawu gbɔ na amewo katã hena amesiame ƒe viɖe ŋu. Nya si wozã le Helagbe me na nunana siae nye khaʹri·sma, eye edze zi gbɔ zi 17 le Biblia me. Helatɔ agbalẽnyala aɖe ɖe egɔme be enye ‘amenuvevenunana si wona ame faa, nusi menye teƒeɖoɖo o si wotsɔ na ame evɔ medze nɛ hafi o, nusi woxɔ le Mawu ƒe amenuveve me eye wònye nusi ame mate ŋu ato eya ŋutɔ ƒe agbagbadzedze me wòasu esi alo wòanɔ esi o.’

Eyata le Ŋɔŋlɔawo nu la, khaʹri·sma nye nunana si woxɔna le Mawu ƒe amenuveve me. Nukawoe nye nusiwo Mawu nyo dɔme na mí la dometɔ aɖewo? Eye aleke míazã wo atsɔ akafui? Mina míalé ŋku ɖe amenuvevenunana siawo dometɔ etɔ̃ ŋu kpɔ.

Agbe Mavɔ

Ðikeke mele eme o be nunanawo dometɔ gãtɔe nye agbe mavɔ. Paulo ŋlɔ na Romatɔwo ƒe hamea be: “Nuvɔ̃ la ƒe fetue nye ku; ke Mawu ƒe amenuvevenunana [khaʹri·sma] la enye agbe mavɔ le Kristo Yesu, mía Aƒetɔ me.” (Romatɔwo 6:23) Anyo be míade dzesii be ‘fetua’ (ku) nye teƒeɖoɖo, togbɔ be menye mía ŋutɔwo gbɔ wòtso o hã la, míexɔe esi míedzɔ nuvɔ̃mewoe ta. Gake agbe mavɔ si Mawu nana la nye nusi míedze na kura o si míate ŋu awɔ naneke woatsɔe axe fe na mí ɖe eta gbeɖe o.

Ele be míabu agbe mavɔ nunana la nu xɔasii eye míanae ame bubuwo. Míate ŋu akpe ɖe amewo ŋu woava nya Yehowa, asubɔe ale be wòave wo nu ana agbe mavɔ wo. Nyaɖeɖefia 22:17 gblɔ be: “Gbɔgbɔ la kple ŋugbetɔ la le gbɔgblɔm bena: Va! Eye amesi le esem la, negblɔ be: Va! Eye amesi tsikɔ le ewum la, neva; amesi lɔ̃ la, nexɔ agbetsi la no faa.”

Aleke míawɔ akplɔ amewo ayi agbetsi sia gbɔe? To Biblia zazã viɖetɔe le míaƒe subɔsubɔdɔa me koŋ dzie. Ele eme baa be ƒã hafi amewo xlẽa gbɔgbɔmenyawo alo bua tame le wo ŋu le teƒe aɖewo le xexeame ya; ke hã mɔnukpɔkpɔwo li ɣesiaɣi míatsɔ ‘aʋu to’ na ame aɖe. (Yesaya 50:4) Míate ŋu aɖo ŋu ɖe Biblia ƒe ameʋãŋusẽ ŋu le go sia me, “elabena Mawu ƒe nya la le agbe, eye wòsẽa ŋu.” (Hebritɔwo 4:12) Eɖanye Biblia ƒe nunya si wɔa dɔ, akɔfafa kple mɔkpɔkpɔ si wònana, alo numeɖeɖe si wòna le tameɖoɖo si le agbe ŋu ye o, Mawu ƒe Nya ate ŋu aʋã dzi na amewo eye wòada wo ɖe agbemɔa dzi.—Timoteo II, 3:16, 17.

Gakpe ɖe eŋu la, Biblia-srɔ̃gbalẽwo ate ŋu akpe ɖe mía ŋu míagblɔ be “Va!” Nyagblɔɖila Yesaya gblɔe ɖi be le gbɔgbɔmeblukɔ ƒe ɣeyiɣi sia me la, ‘Yehowa aklẽ’ ɖe eƒe amewo dzi. (Yesaya 60:2) Yayra sia si tso Yehowa gbɔ la tsoa Gbetakpɔxɔ Habɔbɔa ƒe agbalẽwo me, eye ekplɔa ame akpe geɖe yia Yehowa, gbɔgbɔmekekeli Tsoƒe la gbɔ ƒe sia ƒe. Wometsɔa gãnyenye naa amegbetɔ aɖeke le woƒe agbalẽwo me o. Abe alesi Gbetakpɔxɔ ƒe ŋgɔdonya ɖe nu mee ene la, “tameɖoɖo si le Gbetakpɔxɔ ŋu enye be wòado Yehowa Mawu ɖe dzi be eyae nye xexeame katã ƒe Aƒetɔ Fiagã. . . . Edea dzi ƒo be woaxɔ Mawu ƒe Fia, Yesu Kristo si le dzi ɖum fifia, eye wòkɔ eƒe ʋu ɖi heʋu mɔ na ameƒomea be wòakpɔ agbe mavɔ la dzi ase.”

Nyɔnu Kristotɔ, ɣeyiɣiawo katã ƒe subɔla si kpɔ dzidzedze ɖedzesi le eƒe subɔsubɔdɔ me ƒe geɖe la gblɔ asixɔxɔ si le Gbetakpɔxɔ kple Nyɔ! ŋu le alesi wokpena ɖe amewo ŋu be woate ɖe Mawu ŋu be: “Ne nye Biblia-nusrɔ̃viwo dze Gbetakpɔxɔ kple Nyɔ! xexlẽ gɔme eye wole wonu vivim la, wowɔa ŋgɔyiyi kabakaba. Mekpɔe be magazineawo nye kpekpeɖeŋunu xɔasi aɖe le kpekpeɖeŋu nana amewo be woadze si Yehowa me.”

Subɔsubɔ Mɔnukpɔkpɔwo

Timoteo nye Kristotɔ nusrɔ̃la si wona nunana bubui si hiã beléle tɔxɛ. Apostolo Paulo gblɔ nɛ be: “Megawɔ ƒome le amenuvevenunana [khaʹri·sma], si le mewò, si wona wò to nyagblɔɖi me, esime hamemegãwo da woƒe asiwo ɖe dziwò la ŋuti o.” (Timoteo I, 4:14) Nukae nunana sia nye? Eyae nye Timoteo ɖoɖo dzikpɔla mɔzɔlae, si nye subɔsubɔ mɔnukpɔkpɔ si wòle nɛ be wòaɖɔ ŋu ɖo azã. Paulo xlɔ̃ nu Timoteo le nuŋlɔɖi ma ke me be: “Nɔ agbalẽxexlẽ kple nuxɔxlɔ̃ kple nufiafia dzi. Kpɔ ɖokuiwò kple wò nufiafia la dzi nyuie, nɔ nusiawo dzi; elabena ne èwɔ esia la, àxɔ ɖokuiwò kple amesiwo ɖoa to wò la, ɖe agbe.”—Timoteo I, 4:13, 16.

Ele be hamemegã siwo li egbea hã nalé be na woƒe subɔsubɔ mɔnukpɔkpɔwo. Abe alesi Paulo gblɔe ene la, mɔ ɖeka si nu woawɔe toe enye be ‘woakpɔ woƒe nufiafia dzi nyuie.’ Le esi woawɔ nu abe kplɔla xexemetɔ siwo dia bubu na wo ɖokui ene teƒe la, ele be woahe susu ayi Mawu dzi boŋ ke menye woawo ŋutɔ dzi o. Yesu si nye woƒe Kpɔɖeŋuɖola, nye nufiala ɖedzesi si ɖikeke mele eme o be nɔnɔme si ahe bubu vɛ nɛ la nɔ esi, gake ebɔbɔ eɖokui hetsɔ ŋutikɔkɔe na Fofoa. Egblɔ be: “Nye nufiafia la menye [tɔnye] o, ke boŋ amesi dɔm ɖa la tɔe.”—Yohanes 5:41; 7:16.

Yesu tsɔ eƒe nufiafia tso Mawu ƒe Nya me tsɔ kɔ Fofoa si le dziƒo ŋuti. (Mateo 19:4-6; 22:31, 32, 37-40) Paulo hã te gbe ɖe alesi wòhiã be dzikpɔlawo ‘nalé nyateƒenya la me ɖe asi sesĩe le woƒe nufiafia me’ dzi. (Tito 1:9) Ne hamemegãwo tua woƒe nuƒowo ɖe Ŋɔŋlɔawo dzi koŋ la, ke nya si gblɔm woanɔ asɔ kple Yesu tɔ be: “Nya, siwo gbɔlm mele na mi la, nyemegblɔ wo le ɖokuinye si o.”—Yohanes 14:10.

Aleke hamemegãwo ‘alé nyateƒenya la me ɖe asi sesĩe’? Ne wotua woƒe nuƒowo kple kpekpewo me dɔdasiwo ɖe Mawu ƒe Nya dzi, eye woɖea mawunyakpukpui siwo wozãna me hetea gbe ɖe wo dzi. Vevietɔ ne wowɔa kpɔɖeŋu wɔmoyawo alo wogblɔa nya ɖikokoewo wogbɔa eme la, ahe nyaselawo ƒe susu ɖa le Mawu ƒe Nya dzi eye susu ayi nuƒola la ŋutɔ ƒe ŋutete boŋ dzi. Gake Biblia ƒe kpukpuiwoe aɖo nyaselawo ƒe dzi gbɔ ahaʋã wo. (Psalmo 19:8-10; 119:40; tsɔe sɔ kple Luka 24:32.) Nuƒo mawo mehea susu yia amegbetɔwo dzi boo o ke boŋ wokɔa Mawu ŋu geɖe wu.

Mɔ bubu si dzi hamemegãwo ato anye nufiala bibiwoe nye be woasrɔ̃ nu tso wo nɔewo gbɔ. Abe alesi Paulo kpe ɖe Timoteo ŋui ene la, nenema ke hamemegã ate ŋu akpe ɖe nɔvia ŋui. “Alesi wotsɔa ga nyrea gae la, nenema ame nyrea nɔviae.” (Lododowo 27:17; Filipitɔwo 2:3) Eɖea vi na hamemegãwo ne wogblɔ woƒe nukpɔsusuwo heɖo aɖaŋu na wo nɔewo. Hamemegã aɖe si woɖo eteƒe medidi o la gblɔ be: “Hamemegã kpɔnuteƒe aɖe gbɔ dzi ɖi fia alesi wòdzrana ɖo ɖe dutoƒonuƒo ŋui lam. Ne ele dzadzram ɖo la, edea nyabiabiawo, kpɔɖeŋuwo, alo nuteƒekpɔkpɔ kpuiwo, kpakple Ŋɔŋlɔawo ƒe akpa aɖewo siwo ŋu wòwɔ numekuku nyuiwo le la eme. Mesrɔ̃ alesi made nya vovovowo nye nuƒowo me bene womaganɔ kplala ahati ame o la tso egbɔ.”

Ehiã be mí amesiwo katã si subɔsubɔ mɔnukpɔkpɔwo le, eɖanye hamemegã, subɔsubɔdɔwɔla, alo mɔɖelawoe míenye o, míade asixɔxɔ míaƒe nunana ŋu. Esi wòsusɔ vie Paulo naku la, eɖo ŋku edzi na Timoteo be ‘wòade dzo Mawu ƒe amenuvevenunana [khaʹri·sma] si le eme la me,’ eye le Timoteo gome la, enye gbɔgbɔ ƒe nunana tɔxɛ aɖe. (Timoteo II, 1:6) Dzoka xɔxɔwo koe dzowo nyena le Israel-viwo ƒe aƒewo me. Wote ŋu ‘tua wo ɖo’ be woabi flaflafla ahana dzoxɔxɔ. Eyata wole dzi dem ƒo na mí be míatsɔ míaƒe dzi kple ŋusẽ katã awɔ míaƒe dɔdasiwoe, míade dzo gbɔgbɔmenunana ɖesiaɖe si wode mía si me abe dzo ene.

Gbɔgbɔmenunana Siwo Woana Ame Bubuwo

Lɔlɔ̃ si nɔ Paulo si na nɔvia siwo nɔ Roma ʋãe wòŋlɔ na wo be: “Ele dzroyem vevie bena, makpɔ mi ɖa, bene matsɔ gbɔgbɔ me nunana [khaʹri·sma] aɖe ana mi, ne wòado ŋusẽ mi; eya nye bene, woafa akɔ nam le mia dome le xɔse, si nye mía kple mia tɔ siaa la me.” (Romatɔwo 1:11, 12) Paulo bu ŋutete si le mía si be míado ŋusẽ amewo ƒe xɔse to nuƒoƒo na wo me be enye gbɔgbɔmenunana. Gbɔgbɔmenunana mawo nana ame nɔewo anye xɔse tutuɖo kple dzidedeƒo na ame nɔewo.

Eye nusia hiã vevie vavã. Mí katã míedoa go xaxa ƒomevi vovovowo le nuɖoanyi vɔ̃ɖi sia si me míele me. Gake dzidedeƒo na ame nɔewo edziedzi ate ŋu akpe ɖe mía ŋu be míado dzi. Nunana ame nɔewo—nana kple xɔxɔ siaa—le vevie bene míakpɔtɔ asẽ ŋu le gbɔgbɔ me. Nyateƒee, dzideƒo hiãa mí katã ɣeaɖewoɣi, gake mí katã míate ŋu atu mía nɔewo ɖo.

Ne míenɔa ŋudzɔ dea dzesi haxɔsetɔ siwo ƒo dzi ɖe le la, míate ŋu “atsɔ akɔfafa, si Mawu tsɔ fa akɔ na mí la, afa akɔ na amesiwo kpea fu sia fu la.” (Korintotɔwo II, 1:3-5) Helagbe me nya si wozã na akɔfafa (pa·raʹkle·sis) ƒe gɔmesese le nya la nue nye “ame yɔyɔ va ame ɖokui gbɔ.” Ne kpekpeɖeŋu hiã mía nɔviŋutsu alo nɔvinyɔnu aɖe eye míeyi egbɔ ɖanae la, ɖikeke mele eme o be woakpe ɖe míawo hã ŋu ne ehiã mí.—Nyagblɔla 4:9, 10; tsɔe sɔ kple Dɔwɔwɔwo 9:36-41.

Hamemegãwo ƒe alẽwo sasrãkpɔdɔ si me lɔlɔ̃ le la hã nye viɖenu gã aɖe. Togbɔ be ɣeaɖewoɣi sasrãkpɔa nyea Ŋɔŋlɔawo me ɖaŋu aɖe ɖoɖo le nya aɖe si hiã be woakpɔ egbɔ ŋu hã la, sasrãkpɔa akpa gãtɔ nye dzidedeƒo ƒe ɣeyiɣi si nyea ‘akɔfafa na dziwo.’ (Kolosetɔwo 2:2) Ne dzikpɔlawo wɔ sasrãkpɔ mawo siwo doa ŋusẽ xɔse la, gbɔgbɔmenunana aɖe nam wole vavã. Abe Paulo ene la, woakpɔe be viɖe le nunana ƒomevi tɔxɛ sia ŋu, eye wo nɔviwo ƒe nu ava nɔ wo ‘dzrom vevie.’—Romatɔwo 1:11.

Nenemae wòdzɔ le hamemegã aɖe si le Spain gome, amesi gblɔ nuteƒekpɔkpɔ si gbɔna be: “Ricardo nye ŋutsuvi ƒe 11 vi aɖe si edze abe metsɔ ɖeke le kpekpeawo kple hametɔ akpa gãtɔ me o ene. Eyata mebia mɔ le Ricardo dzilawo gbɔ be masrã wo viŋutsua kpɔ, eye wolɔ̃ enumake. Towo domee wole eye ʋu me nɔnɔ tso aƒenyeme yi wo gbɔ ade gaƒoƒo ɖeka. Edze ƒã be Ricardo kpɔ dzidzɔ ɖe alesi metsɔ ɖe le emee ŋu, eye ewɔ afɔɖeɖe enumake. Medidi o eva zu gbeƒãɖela maxɔnyɔnyrɔ eye wòva zu hamea me tɔ veviedola aɖe. Eva ɖe asi le eƒe ŋukpe ŋu va zu dzidzɔme si doa vivi ɖe ame ŋu geɖe. Hamea me tɔ geɖe bia be: ‘Nukae dzɔ ɖe Ricardo dzi?’ Edze abe woƒe ŋku va le eŋu azɔ ene. Ne mebu sasrãkpɔ vevi ma ŋu la, mekpɔe be eɖe vi nam geɖe wu Ricardo. Ne ege ɖe Fiaɖuƒe Akpataa me la, dzidzɔ nɔa mo nɛ, eye enɔa du dzi va doa gbe nam. Gbɔgbɔ me ŋgɔyiyi si wɔm wòle la nye dzidzɔ nam.”

Ðikeke mele eme o be yayra nyuiwo dona tsoa kplɔlawo ƒe sasrãkpɔ sia tɔgbe me. Sasrãkpɔ mawo wɔ ɖeka kple kuku si Yesu ɖe be: “Kpɔ nye alẽawo dzi.” (Yohanes 21:16) Gake menye hamemegãwo koe ate ŋu ana nu le gbɔgbɔ me alea o. Hamea me tɔ ɖesiaɖe ate ŋu ade dzi ƒo na ame bubuwo hena lɔlɔ̃ kple dɔ nyuiwo wɔwɔ. (Hebritɔwo 10:23, 24) Abe alesi tolialawo dea ka wo nɔewo ƒoa kplii ene la, nenema ke gbɔgbɔ me nublanuwo blaa mí ɖekae. Nusi míewɔna kple nya siwo míegblɔna kpɔa ŋusẽ ɖe ame bubuwo dzi kokoko. Dzugbe zazã alo ɖeklemiɖeɖe vlodoametɔe ate ŋu alã nusiwo blaa mí ɖekae me. (Efesotɔwo 4:29; Yakobo 3:8) Gake dzideƒonya dzetowo kple kpekpeɖeŋu nana le lɔlɔ̃ me akpe ɖe mía nɔviwo ŋu be woaɖu kuxiwo dzi. Míate ŋu ato mɔ sia dzi ana gbɔgbɔmenu siwo ŋu viɖe mavɔ le la amewo.—Lododowo 12:25.

Nana be Mawu ƒe Ŋutikɔkɔe Naklẽ Ðe Edzi

Eme kɔ be bubunɔameŋu ƒe nunana aɖe le Kristotɔ ɖesiaɖe si. Wona agbe mavɔ ƒe mɔkpɔkpɔ si naneke mesɔ kplii o mí. Wona gbɔgbɔ me nuwo hã mí siwo míate ŋu ana ame bubuwo. Eye míate ŋu adze agbagba ade dzo amewo me alo aʋã wo ɖe dɔ nyuiwo wɔwɔ ŋu. Subɔsubɔ mɔnukpɔkpɔwo li kpe ɖe eŋu na ame aɖewo. Nunana siawo katã ɖo kpe Mawu ƒe amenuveve dzi. Eye esi wònye Mawu gbɔe míexɔ nusianu si le mía si tsoe ta la, susu aɖeke kura meli si ta míaƒo adegbe o.—Korintotɔwo I, 4:7.

Ele be mí Kristotɔwo míabia mía ɖokuiwo be, ‘Ðe mazã bubunɔameŋu ƒe nunana ɖesiaɖe ƒomevi si le asinye atsɔ akɔ Yehowa, “nunana nyuiwo katã kple nunana blibowo katã” Nala la ŋua? (Yakobo 1:17) Ðe masrɔ̃ Yesu ale be masubɔ ame bubuwo le nye ŋutete kple nɔnɔmewo nua’?

Apostolo Petro ƒo nu tso míaƒe agbanɔamedziwo ŋu kpokploe alea be: “Misubɔ mia nɔewo le alesi amesiame xɔ amenuvevenunana [khaʹri·sma] la nu, abe Mawu ƒe amenuveve bubu ƒomevi geɖewo ƒe xɔnuvi nyuiwo ene. Ne ame aɖe le nya gblɔm la, negblɔe abe mawunya ene; ne ame aɖe le subɔsubɔm la, netsɔ ŋusẽ, si Mawu tsɔ kee la subɔ, bene woakafu Mawu le nuwo katã me to Yesu Kristo dzi.”—Petro I, 4:10, 11.

[Etenuŋɔŋlɔ]

[Nɔnɔmetata Tsoƒe si le axa 23]

Corbis-Bettmann

UPI/Corbis-Bettmann