De Asixɔxɔ Wò Subɔsubɔ Mɔnukpɔkpɔa Ŋu
1. Aleke xexea me tɔ geɖe bua míaƒe gbeƒãɖeɖedɔa?
1 Satana ƒe xexea me tɔ geɖe bua míaƒe gbeƒãɖeɖedɔa be enye ‘bometsinu.’ (1 Kor. 1:18-21) Ne míekpɔ nyuie o la, nukpɔsusu totro sia ate ŋu ana dzi naɖe le mía ƒo alo ana dzo si le mía me la dzi naɖe akpɔtɔ. (Lod. 24:10; Yes. 5:20) Susu kawo tae wòle be míade asixɔxɔ mɔnukpɔkpɔ si su mía si be míenye Yehowa ƒe Ðasefowo la ŋu?—Yes. 43:10.
2. Nu ka tae woate ŋu ayɔ gbeƒãɖeɖedɔa be “dɔ kɔkɔe”?
2 “Dɔ Kɔkɔe” Aɖee Wònye: Apostolo Paulo yɔ gbeƒãɖeɖedɔa be “dɔ kɔkɔe.” (Rom. 15:15, 16) Mɔ ka nue gbeƒãɖeɖedɔa nye “dɔ kɔkɔe” le? Gomekpɔkpɔ le gbeƒãɖeɖedɔa me na míezua Yehowa, “Kɔkɔetɔ” la, ƒe “hadɔwɔlawo,” eye esia wɔa akpa aɖe le eƒe ŋkɔa ŋuti kɔkɔ me. (1 Kor. 3:9; 1 Pet. 1:15) Yehowa bua míaƒe gbeƒãɖeɖedɔa be enye “kafukafuvɔsa,” eya ta subɔsubɔdɔa nye míaƒe tadedeagu ƒe akpa vevi aɖe.—Heb. 13:15.
3. Nu kae na gbeƒãɖeɖe nya nyuia nye mɔnukpɔkpɔ gã aɖe?
3 Ame ʋɛ aɖewo ko sie gbeƒãɖeɖe nya nyuia ƒe mɔnukpɔkpɔ gã sia su. Mawudɔlawo awɔ dɔ sia kple dzidzɔ blibo, eye ɖikeke mele eme o be woawɔe nyuie ale gbegbe. (1 Pet. 1:12) Ke hã mí, amegbetɔ madeblibo siwo nye “anyigoewo” ye Yehowa tsɔ mɔnukpɔkpɔ wɔnuku sia na!—2 Kor. 4:7.
4. Aleke míate ŋu aɖee afia be míedea asixɔxɔ míaƒe subɔsubɔdɔa ŋu?
4 Enye Dɔ Vevitɔ Na Mí: Esi míedea asixɔxɔ mɔnukpɔkpɔ si su mía si la ŋu vavã ta la, míebua míaƒe subɔsubɔdɔa be enye “nu siwo le vevie wu” le míaƒe agbe me la dometɔ ɖeka. (Flp. 1:10) Eya ta míewɔa ɖoɖo kpɔa gome le eme kwasiɖa sia kwasiɖa. Ne mɔnukpɔkpɔ su haƒola aɖe si be wòaƒo ha kple haƒoha aɖe si xɔ ŋkɔ le xexea me eye wòdea asixɔxɔ mɔnukpɔkpɔ si su esi ŋu la, adzra ɖo ɣesiaɣi si woyina ha ƒo ge le teƒe aɖe eye wòadze agbagba be yeagabi ɖe haƒoƒo me nyuie wu. Nenema kee wòahiã be míawo hã míadzra ɖo hafi ayi gbeadzi, ale be míate ŋu ‘awɔ nyateƒenya la ŋu dɔ pɛpɛpɛ,’ eye míadze agbagba be míaƒe “nufiafiaɖaŋu” naganyo ɖe edzi wu.—2 Tim. 2:15; 4:2.
5. Ame kae dea asixɔxɔ míaƒe subɔsubɔdɔa ŋu?
5 Mègana amewo ƒe nuwɔna naɖe dzi le ƒowò o. Ðo ŋku edzi be ame geɖe gale míaƒe anyigbamama me siwo kpɔa ŋudzedze ɖe míaƒe gbeƒãɖeɖedɔa ŋu. Ke hã menye amegbetɔwo ŋue míedina be míadze o. Nu si le vevie na mí wue nye ale si Yehowa sena le eɖokui me ɖe mía ŋu; eye edea asixɔxɔ gã aɖe míaƒe kutrikuku ŋu.—Yes. 52:7.