Yehowa, Mawu Si ‘Lɔ̃a Tsɔtsɔke’

“[Yehowa, “NW”] wò dɔme nyo, eye nèlɔ̃a tsɔtsɔke.” —PSALMO 86:5.

 1. Agba kpekpe kae nɔ Fia Dawid dzi, eye aleke wòkpɔ akɔfafa na eƒe dzi si nɔ nu xam lae?

BLEMA Israel Fia Dawid nya alesi gbegbe tsidzinya ƒe fɔbuame te ŋu doa agba kpekpe na amee. Eŋlɔ bena: “Nye vodadawo gbɔ tanye, eye wole kpeyem ŋutɔ abe agba kpekpe ene. Megbɔdzɔ, eye nye lãme gbã gudugudu, mele ɣli dom wu alesi dzata ɖea gbee.” (Psalmo 38:5, 9) Gake Dawid kpɔ akɔfafa na eƒe dzi si nɔ nu xam la. Enya be togbɔ be Yehowa tsri nuvɔ̃ hã, meléa fu amesi wɔ nuvɔ̃ o—ne amea trɔ dzime nyateƒe eye wòtrɔ le eƒe mɔ vɔ̃wo dzi ko. (Psalmo 32:5; 103:3) Esi Dawid xɔe se bliboe be Yehowa lɔ̃na faa kpɔa nublanui na dzimetrɔlawo ta la, egblɔ be: “[Yehowa, NW] wò dɔme nyo, eye nèlɔ̃a tsɔtsɔke.”—Psalmo 86:5.

2, 3. (a) Ne míewɔ nuvɔ̃ la, agba kae ate ŋu ava nɔ mía dzi, eye nukata esia nyo? (b) Afɔku kae le eme be míana fɔbuameɖokui ‘naɖu mía dzi’? (d) Kakaɖedzi kae Biblia na mí le alesi Yehowa lɔ̃ faa be yeatsɔ akee ŋu?

² Ne míawo hã míewɔ nuvɔ̃ la, dzitsinya ƒe fuwɔame si nyea agba kpekpe la anɔ míawo hã dzi. Vevesese ɖe nuvɔ̃ ta alea nyo, eye wòɖea vi gɔ̃ hã. Ate ŋu aʋã mí míawɔ afɔɖeɖe nyuiwo atsɔ aɖɔ vodadaa ɖo. Gake fɔbuameɖokui va wu tsɔtsɔ na Kristotɔ aɖewo. Ðewohĩ woƒe dzi si na wobua fɔ wo ɖokui la ana woabui ɣesiaɣi be Mawu matsɔe ake yewo keŋkeŋ gbeɖe o, eɖanye aleke ke yewotrɔ dzimee hã. Nɔvinyɔnu aɖe si nɔ nu ƒom tso vodada aɖe si wòwɔ ŋu la gblɔ be: “Enyea vevesese ŋutɔ ne èbui be ɖewohĩ Yehowa magalɔ̃ wò azɔ o.” Togbɔ be etrɔ dzime eye wòxɔ aɖaŋuɖoɖo nyuiwo tso hamemegãwo gbɔ hã, egasenɛ le eɖokui me be yemedze na Mawu ƒe tsɔtsɔke o. Egblɔ be: “Ŋkeke aɖeke mava yi si nyemabia Yehowa ƒe tsɔtsɔke o.” Ne fɔbuame ‘mi’ mí la, Satana ate ŋu ate kpɔ be yeana míana ta, eye míabui be míegadze asubɔ Yehowa o.—Korintotɔwo II, 2:5-7, 11.

³ Gake menye nenemae Yehowa bua nyawoe kura o! Eƒe Nya ka ɖe edzi na mí be ne míeɖe dzimetɔtrɔ vavãtɔ fia la, Yehowa lɔ̃ faa eye ele klalo hã be yeatsɔe ake mí. (Lododowo 28:13) Eyata ne ewɔ na wò be Mawu matsɔ ake ye gbeɖe o la, ke ɖewohĩ ahiã be nàse nusita wòtsɔ kena kple alesi wòwɔnɛ gɔme nyuie wu.

Nukata Yehowa ‘Lɔ̃a Tsɔtsɔke’?

 4. Nuka dzie Yehowa ɖoa ŋkui le míaƒe wɔwɔme ŋu, eye aleke esia kpɔa ŋusẽ ɖe alesi wòwɔa nu ɖe mía ŋui dzi?

⁴ Míexlẽ be: “Alesi ɣedzeƒe didi tso ɣetoɖoƒe gbɔe la, nenema wòte mía dzidadawo ɖa boo tso mía gbɔe. Alesi fofo ƒe dɔme trɔna ɖe viawo ŋui la, nenema Yehowa ƒe dɔme trɔna ɖe amesiwo vɔ̃nɛ la ŋui.” Nukata Yehowa lɔ̃a nublanuikpɔkpɔ na amewo? Kpukpui si kplɔe ɖo ɖo eŋu be: “Elabena enya míaƒe wɔwɔme, eɖoa ŋui be, kewɔ míenye.” (Psalmo 103:12-14) Ẽ, Yehowa meŋlɔnɛ be o be kewɔe wòtsɔ wɔ mí, eye vodada, alo gbɔdzɔgbɔdzɔ siwo tso blibomademade gbɔ la le mía ŋu. Nyagbɔgblɔ si nye “enya míaƒe wɔwɔme” ɖo ŋku edzi na mí be Biblia tsɔ Yehowa sɔ kple zemela eye wòtsɔ míawo sɔ kple ze siwo wòmena.a (Yeremya 18:2-6) Zemela léa eƒe anyinuwo sesĩe gake eléa be nɛ ɖɔɖɔɖɔ, eye woƒe wɔwɔme nɔa susu me nɛ ɣesiaɣi. Nenema ke Yehowa si nye Zemela Gãtɔ la wɔa nu kpli mí ɖɔɖɔɖɔ ɖe míaƒe nuvɔ̃menyenye ƒe gbɔdzɔgbɔdzɔwo nu.—Tsɔe sɔ kple Korintotɔwo II, 4:7.

 5. Aleke Romatɔwo ƒe agbalẽa ƒo nu tso alesi nuvɔ̃ kpɔ ŋusẽ ɖe míaƒe ŋutilã madebliboa dzi ŋui?

⁵ Yehowa sea alesi gbegbe nuvɔ̃ sẽŋui la gɔme. Ŋɔŋlɔawo ƒo nu tso nuvɔ̃ ŋu be enye ŋusẽ gã aɖe si lé amegbetɔ ɖe eƒe asi wuameawo me. Aleke nuvɔ̃ kpɔa ŋusẽ ɖe ame dzii? Apostolo Paulo si gbɔgbɔ ʋã la ɖe esia me tsitotsito le Romatɔwo ƒe agbalẽa me: Míele “nuvɔ̃a te,” abe alesi asrafowo le woƒe ŋgɔnɔla te ene (Romatɔwo 3:9); ‘eɖu’ ameƒomea dzi abe fia ene (Romatɔwo 5:21); ‘exɔ aƒe’ alo ‘xɔ anyinɔ’ ɖe mía me (Romatɔwo 7:17, 20); eƒe “se” nɔa dɔ dzi le mía me, eye wòdzea agbagba be yeakpɔ ŋusẽ ɖe míaƒe nuwɔna dzi. (Romatɔwo 7:23, 25) Aʋa sesẽ kae nye si wòle be míawɔ atsɔ atsi tre ɖe nuvɔ̃ ƒe ŋusẽ si wòkpɔ ɖe míaƒe ŋutilã madebliboa dzi ŋu!—Romatɔwo 7:21, 24.

 6. Aleke Yehowa bua amesiwo tsɔa dzimetɔtrɔ dia eƒe nublanuikpɔkpɔe?

⁶ Eyata mía Mawu nublanuikpɔla la nya be manya wɔ be míawɔ eƒe gbe dzi bliboe o, eɖanye aleke ke míaƒe dzi adi be yeawɔɛ hafi o. (Fiawo I, 8:46) Eka ɖe edzi na mí lɔlɔ̃tɔe be ne míetsɔ dzimetɔtrɔ bia nublanuikpɔkpɔ tso eya si nye fofo gbɔ la, yeatsɔe ake mí. Hakpala Dawid gblɔ be: “Vɔsawo na Mawu [nye] gbɔgbɔ, si wote ɖe anyi; Mawu, màdo vlo dzi gbagbã, si tugu la o.” (Psalmo 51:19) Yehowa magbe dzi si fɔbuame te ɖe anyi hegbã gudugudu la, alo atrɔ megbe dee o. Aleke gbegbe nya ma ɖɔ alesi Yehowa le klalo be yeatsɔ ake míi enye si!

 7. Nukata míate ŋu abu Mawu ƒe nublanuikpɔkpɔ nu tsɛe o?

⁷ Gake ɖe esia fia be míabu Mawu ƒe nublanuikpɔkpɔ nu tsɛe, ahatsɔ míaƒe nuvɔ̃menyenye ado taflatse ɖe nuvɔ̃ taa? Kura o! Yehowa menɔa te ɖe seselelãme dzro ko dzi wɔa nu o. Seɖoƒe le eƒe nublanuikpɔkpɔ ŋu. Matsɔe ake amesiwo sẽa dzime ɖonɛ koŋ wɔa nuvɔ̃ eye wogbea dzimetɔtrɔ la gbeɖe o. (Hebritɔwo 10:26-31) Gake ne ekpɔ dzi “gbagbã, si tugu” la, ‘elɔ̃na tsɔ kena faa.’ (Lododowo 17:3) Mina míadzro nya ɖedzesi siwo wozã le Biblia me tsɔ fia alesi Mawu tsɔ kena bliboe la dometɔ aɖewo me kpɔ.

Aleke Yehowa Tsɔ Kena Bliboe?

 8. Nukae wònye Yehowa wɔna ne etsɔ míaƒe nuvɔ̃wo ke mí, eye ŋusẽ kae wòle be esia nakpɔ ɖe mía dzi?

⁸ Fia Dawid si trɔ dzime la gblɔ be: “Meɖe nye nuvɔ̃wo fia wò, eye nyemetsɔ nu tsyɔ nye vodadawo dzi o; megblɔ be, maʋu nye dzidadawo me na Yehowa; tete nètsɔ nye nuvɔ̃ ƒe vodadawo kem.” (Psalmo 32:5, míawoe te gbe ɖe edzi.) Nya si nye ‘tsɔ ke’ la nye Hebrigbe me nya si gɔme koŋue nye “kɔe ɖe dzi,” “tsɔe, droe” la ƒe gɔmeɖeɖe. Alesi wozãe le afisia la fia be ‘woaɖe fɔbuame, nuvɔ̃, kple dzidada ɖa.’ Eyata Yehowa kɔ Dawid ƒe nuvɔ̃wo heɖe wo ɖa, le kpɔɖeŋumɔ nu. (Tsɔe sɔ kple Mose III, 16:20-22.) Ðikeke mele eme o be esia ɖe fɔɖiɖi ƒe seselelãme si nɔ Dawid dzi la dzi kpɔtɔ. (Tsɔe sɔ kple Psalmo 32:3.) Míawo hã míate ŋu aka ɖe Mawu dzi bliboe be etsɔa amesiwo nɔa te ɖe Yesu Kristo ƒe tafevɔsa dzixɔxɔse dzi biaa eƒe tsɔtsɔke la ƒe nuvɔ̃wo kea wo. (Mateo 20:28; tsɔe sɔ kple Yesaya 53:12.) Eyata mele be nuvɔ̃ si wowɔ va yi ŋuti fɔɖiɖi ƒe seselelãmewo naganye agba anɔ amesiwo ƒe nuvɔ̃wo Yehowa kɔ heɖe ɖa la dzi o.

 9. Nukae Yesu ƒe nya siwo nye: “Natsɔ míaƒe [fewo] ake mí” fia?

⁹ Yesu zã alesi fetɔwo kple fenyilawo dome nɔna tsɔ wɔ alesi Yehowa tsɔ kena ƒe kpɔɖeŋui. Le kpɔɖeŋu me, Yesu ƒoe ɖe mía nu be míado gbe ɖa be: “Natsɔ míaƒe [fewo, NW] ake mí.” (Mateo 6:12) Eyata Yesu tsɔ “nuvɔ̃wo” sɔ kple ‘fenyinyi.’ (Luka 11:4) Ne míewɔ nuvɔ̃ la, míeva zua ‘fenyilawo’ le Yehowa gbɔ. Helagbe me dɔwɔnya si gɔme woɖe be ‘tsɔ ke’ ate ŋu afia “be woana fe natsi ame ŋu, woatsɔe ake eye womagabia o.” Efia be ne Yehowa tsɔ ke la, etea fli ɖe fe si wòate ŋu abu na mí míaxe hafi la me. Esia ate ŋu afa akɔ na nuvɔ̃wɔla siwo trɔ dzime. Yehowa mabia be woaxe fe si me wòte fli ɖo gbeɖe o!—Psalmo 32:1, 2; tsɔe sɔ kple Mateo 18:23-35.

10, 11. (a) Nukae nyagbɔgblɔ ‘woatutui’ si dze le Dɔwɔwɔwo 3:19 la ɖe fia? (b) Aleke woɖe alesi Yehowa tsɔ kena keŋkeŋ la fiae?

¹⁰ Biblia gazã nyagbɔgblɔ bubu aɖe si me kɔ tsɔ ɖɔ Mawu ƒe tsɔtsɔkee le Dɔwɔwɔwo 3:19 be: “Eyata mitrɔ le miaƒe dzi me, eye migbugbɔ, be woatutu miaƒe nuvɔ̃wo.” Nyagbɔgblɔ ‘woatutui’ nye alesi woɖe Helagbe me dɔwɔnya aɖe si ne wozãe le kpɔɖeŋumɔ nu la, wòate ŋu afia “be woatutu nu, woabu mo nɛ, woate fli ɖe eme alo woagblẽ edome” la gɔmee. Agbalẽnyalagã aɖewo gblɔ be susu si dze le emee nye be woatutu asinuŋɔŋlɔ ɖa. Aleke esia anya wɔe? Nuŋlɔtsi si wolɔ̃a zazã wu le blemaɣeyiɣiwo mee nye aka, aŋe, kple tsi si wotsaka. Ne ame aɖe tsɔ nuŋlɔtsi sia ŋlɔ nu vɔ teti la, ate ŋu atsɔ akutsa si ƒo tsi atutu nuŋɔŋlɔa ɖa.

¹¹ Esia ɖe alesi Yehowa tsɔ kena keŋkeŋ la fia nyuie. Ne etsɔ míaƒe nuvɔ̃wo ke mí la, ɖeko wònɔna abe ɖe wòtsɔ akutsa tutu wo ɖa ene. Mele be míavɔ̃ be abu fɔ mí ɖe nuvɔ̃ siawo ta le etsɔme o, elabena Biblia ɖe nu bubu aɖe fia le Yehowa ƒe nublanuikpɔkpɔ ŋu si ɖe dzesi ŋutɔ: Ne etsɔe ke la, eŋlɔnɛ be!

“Nyemagaɖo Ŋu Woƒe Nuvɔ̃wo Azɔ O”

12. Esi Biblia gblɔ be Yehowa ŋlɔa míaƒe nuvɔ̃wo be la, ɖe wòfia be megate ŋu ɖoa ŋku wo dzi oa, eye nukata nèɖo eŋu nenema?

¹² Yehowa to nyagblɔɖila Yeremya dzi gblɔ nya ɖi le amesiwo le nubabla yeyea me ŋu be: “Matsɔ woƒe vodadawo ake wo, eye nyemagaɖo ŋu woƒe nuvɔ̃wo azɔ o.” (Yeremya 31:34) Ðe esia le fiafiam be ne Yehowa tsɔ nuvɔ̃wo ke la, megate ŋu ɖoa ŋku wo dzi oa? Menye nenema kura o. Biblia ƒo nu tso ame geɖe siwo ƒe nuvɔ̃ Yehowa tsɔ ke ŋu, eye Dawid hã le eme. (Samuel II, 11:1-17; 12:1-13) Edze ƒã be vodada siwo wowɔ la gale nyanya na Yehowa, eye ele be wòanɔ nyanya na míawo hã. Wodzra nuŋlɔɖi si ku ɖe woƒe nuvɔ̃wo, kple woƒe dzimetɔtrɔ kpakple Mawu ƒe tsɔtsɔke ŋu ɖi be wòaɖe vi na mí. (Romatɔwo 15:4) Ekema nukae Biblia wɔnɛ esi wògblɔ be Yehowa ‘meɖoa ŋu’ amesiwo wòtsɔ kena ƒe nuvɔ̃wo o?

13. (a) Nuka hãe gɔmesese si le Hebrigbe me nya si gɔme woɖe be ‘maɖo ŋui’ ŋu la gafia? (b) Esi Yehowa gblɔ be, “Nyemagaɖo ŋu woƒe nuvɔ̃wo azɔ o” la, nuka ƒe kakaɖedzi nam wòle mí?

¹³ Hebrigbe me dɔwɔnya si gɔme woɖe be ‘maɖo ŋui’ la fia nusi yi ŋgɔ wu ŋkuɖoɖo nusi dzɔ va yi dzi ko. Theological Wordbook of the Old Testament gblɔ be “egafia afɔɖeɖe si sɔ wɔwɔ.” Eyata le gɔmesese sia nu la, be ‘woaɖo ŋku’ nuvɔ̃ ‘dzi’ fia be woaɖe afɔ ɖe nuvɔ̃wɔlawo ŋu. Esime nyagblɔɖila Hosea gblɔ le Israel-vi dzeaglãwo ŋu be, “[Yehowa] aɖo ŋu woƒe vodadawo” la, nusi nyagblɔɖila la fiae nye be Yehowa aɖe afɔ ɖe wo ŋu le esi wogbe dzimetɔtrɔ ta. Eyata kpukpuia ƒe akpa mamlɛ gblɔ kpe ɖe eŋu be: “[Ahe] to le woƒe nuvɔ̃wo ta.” (Hosea 9:9) Gake esi Yehowa gblɔ be, “Nyemagaɖo ŋu woƒe nuvɔ̃wo azɔ o” la, ele kakaɖedzi nam mí be ne yenya tsɔ ke nuvɔ̃wɔla si trɔ dzime ko la, yemawɔ nu ɖe eŋu ɖe nuvɔ̃ mawo ta le etsɔme o. (Xezekiel 18:21, 22) Eyata eŋlɔnɛ be le gɔmesese sia nu be megahea míaƒe nuvɔ̃wo ɖe go enuenu be yeatsɔ atso mía nu alo ahe to na mí edziedzi o. Yehowa to esia me ɖo kpɔɖeŋu nyui aɖe ɖi na mí be míasrɔ̃ ne míele nu wɔm kple ame bubuwo. Ne masɔmasɔwo do mo ɖa la, anyo wu be màganɔ ŋku ɖom vodada siwo wowɔ va yi siwo dzi nèlɔ̃ ɖo be yeatsɔe ake dzi o.

Ke Wo Me Tsonuawo Ya Ðe?

14. Nukata tsɔtsɔke mefia be woakpɔ nuvɔ̃wɔla ta tso nu gbegblẽ si wòwɔ me tsonuwo katã me o?

¹⁴ Ðe alesi Yehowa tsɔ kena faa fia be eɖea nuvɔ̃wɔla tsoa nusiwo katã ado tso nu gbegblẽ si wòwɔ me la mea? Kura o. Míate ŋu awɔ nuvɔ̃ agbe eŋuti tohehe xɔxɔ o. Paulo ŋlɔ bena: “Nusi ke ame ƒãna la, esia ke wòaŋe.” (Galatiatɔwo 6:7) Míaƒe nuwɔna alo kuxiwo me tsonu aɖewo ate ŋu ava mía dzi, gake ne Yehowa tsɔ ke mí vɔ la, mehea dzɔgbevɔ̃e vaa mía dzi o. Ne kuxiwo do mo ɖa la, mele be Kristotɔ nabu be, ‘Ðewohĩ Yehowae le to hem nam ɖe nye tsã nuvɔ̃wo ta’ o. (Tsɔe sɔ kple Yakobo 1:13.) Gake Yehowa maɖe mí tso nusiwo míaƒe nugbegblẽwɔwɔwo he vɛ la katã me o. Srɔ̃gbegbe, gbɔmeyafu fɔfɔ si womedi o, nulɔdɔ, kakaɖedzi alo bubu si maganɔ ame ŋu o—nusiawo katã ate ŋu anye nuvɔ̃metsonu wɔnublanuiwo, eye Yehowa makpɔ mía ta tso wo me o. Ðo ŋku edzi be togbɔ be Yehowa tsɔ Dawid ƒe nuvɔ̃ si wòwɔ siwo ku ɖe Bat-Seba kple Uriya ŋu la kee hã la, mekpɔ Dawid ta tso afɔku gã siwo kplɔe ɖo me o.—Samuel II, 12:9-14.

15, 16. Aleke se si woŋlɔ ɖe Mose III, 5:20-26 ɖe vi na amesi dzi wodze agɔ le kple nuvɔ̃wɔla la siaae?

¹⁵ Nu bubuwo hã ate ŋu ado go tso míaƒe nuvɔ̃wo me. Le kpɔɖeŋu me, de ŋugble tso nuŋlɔɖi si le Mose III, ta 5 ŋu kpɔ. Le afisia la, Mose ƒe Sea ƒo nu tso nɔnɔme si me ame aɖe ada vo gã aɖe si nye be wòaxɔ nɔvia Israel-vi ƒe nuwo to adzodada, akpasesẽnuxɔxɔ, alo ametafatafa me ŋu. Emegbe nuvɔ̃wɔla la gbe be yemeɖi fɔ o, eye wòlé dzi ɖe ƒo aka atam alakpatɔe gɔ̃ hã. Enye ame eve dome nya si ŋu kpeɖodzi ŋutɔŋutɔ aɖeke mele o. Gake vodala la ƒe dzitsinya va wɔ fui emegbe eye wòʋu eƒe nuvɔ̃ me. Hafi Mawu natsɔe akee la, ele be wòagawɔ nu etɔ̃ bubuwo: aɖo nusiwo wòtsɔ la teƒe, axe nua ƒe home ƒe akpa 20 le alafa me akpee na amesi ŋu wòwɔe ɖo, eye wòana agbo woatsɔ awɔ nuvɔ̃vɔsae. Azɔ sea gblɔ be: “Nunɔla la alé avu nɛ le Yehowa ƒe ŋku me, eye woatsɔ nusianu, si wòwɔ heɖi fɔ la, akee.”—Mose III, 5:20-26; tsɔe sɔ kple Mateo 5:23, 24.

¹⁶ Se sia nye lɔlɔ̃ ƒe mɔnuɖoɖo si Mawu wɔ. Eɖe vi na amesi dzi wodze agɔ le, amesi ƒe nunɔamesiwo wotrɔ vɛ si ɖikeke mele eme o be eƒe dzi adze eme esime vodalaa lɔ̃ ɖe eƒe nuvɔ̃ dzi mlɔeba. Le ɣeyiɣi ma ke me la, sea ɖe vi na amesi ƒe dzitsinya ʋãe emegbe wòlɔ̃ ɖe edzi be yeɖi fɔ eye wòɖɔ nu gbegblẽ si wòwɔ ɖo. Le nyateƒe me la, ne ɖe wògbe esia wɔwɔ la, makpɔ tsɔtsɔke aɖeke tso Mawu gbɔ o.

17. Ne nuvɔ̃ si míewɔ gblẽ nu le ame bubuwo ŋu la, nukae Yehowa dina be míawɔ?

¹⁷ Togbɔ be míele Mose ƒe Sea te o hã la, ena míesea Yehowa ƒe susu, kple alesi wòbua tsɔtsɔkee gɔme nyuie wu. (Kolosetɔwo 2:13, 14) Ne míaƒe nuvɔ̃wo gblẽ nu le ame bubuwo ŋu alo wɔ fu wo la, edzea Yehowa ŋu ne míewɔ nusi míate ŋui tsɔ ‘ɖɔ nu gbegblẽa ɖo.’ (Korintotɔwo II, 7:11) Esia bia be míalɔ̃ ɖe nuvɔ̃ si míewɔ dzi, míalɔ̃ be míeɖi fɔ, eye míaɖe kuku na amesi ŋu míewɔe ɖo gɔ̃ hã. Ekema míate ŋu anɔ te ɖe Yesu ƒe vɔsaa dzi aɖe kuku na Yehowa be míakpɔ dzidzeme si tsoa dzitsinya dzadzɛ me kple kakaɖedzi be Mawu tsɔe ke mí.—Hebritɔwo 10:21, 22.

18. Tohehe kae Yehowa ate ŋu atsɔ akpe ɖe eƒe tsɔtsɔke ŋu?

¹⁸ Ðewohĩ Yehowa atsɔ tohehe aɖe akpe ɖe tsɔtsɔke si wòana mí ŋu, abe alesi dzila lɔ̃ame ɖesiaɖe awɔ ene. (Lododowo 3:11, 12) Ðewohĩ ahiã be Kristotɔ si trɔ dzime naɖe asi le subɔsubɔmɔnukpɔkpɔ si le esi wònye hamemegã, subɔsubɔdɔwɔla, alo mɔɖela la ŋu. Ate ŋu avee ŋutɔ be mɔnukpɔkpɔ siwo xɔ asi nɛ la nage le esi hena ɣeyiɣi aɖe. Gake tohehe alea mefia be Yehowa megakpɔa ŋudzedze ɖe eŋu alo be Yehowa metsɔe kee o. Tsɔ kpe ɖe eŋu la, ele be míaɖo ŋku edzi be tohehe si tso Yehowa gbɔ ɖoa kpe eƒe lɔlɔ̃ na mí dzi. Exɔxɔ kple eŋudɔwɔwɔ aɖe vi nyuitɔ kekeake na mí eye ate ŋu akplɔ mí ayi agbe mavɔ mee.—Hebritɔwo 12:5-11.

19, 20. (a) Ne èwɔ nuvɔ̃wo la, nukata mele be nàbui be Yehowa makpɔ nublanui na ye gbeɖe o? (b) Nya ka mee míadzro le nyati si kplɔe ɖo me?

¹⁹ Aleke gbegbe wòfaa akɔ na míe nye si be míanya be Mawu si ‘lɔ̃a tsɔtsɔke’ subɔmee míele! Yehowa léa ŋku ɖe nu geɖe ŋu wu míaƒe nuvɔ̃wo kple vodadawo ko. (Psalmo 130:3, 4) Enya nusi le míaƒe dzi me. Ne èkpɔe be yeƒe dzi gbã hetugu le nuvɔ̃ siwo nèwɔ va yi ta la, mègagblɔ be Yehowa makpɔ nublanui na ye gbeɖe o. Eɖanye vodada kawoe nèwɔ o, ne ètrɔ dzime nyateƒe, èwɔ nu tsɔ ɖɔ nusi nègblẽ ɖo, eye nèdo gbe ɖa vevie bia Yehowa ƒe tsɔtsɔke to Yesu ƒe ʋu si wòkɔ ɖi dzi la, ke àte ŋu aka ɖe edzi bliboe be nya siwo le Yohanes I, 1:9 la ava eme na wò hã be: “Ne míeʋu míaƒe nuvɔ̃wo me la, ekema nuteƒewɔla kple dzɔdzɔetɔ wònye, bene wòatsɔ míaƒe nuvɔ̃wo ake mí, eye wòaklɔ madzɔmadzɔnyenye katã ɖa le mía ŋuti.”

²⁰ Biblia de dzi ƒo na mí be míasrɔ̃ Yehowa ƒe tsɔtsɔke le nuwɔwɔ kple mía nɔewo me. Gake ne ame bubuwo wɔ nuvɔ̃ ɖe mía ŋu la, afikae woate ŋu akpɔ mɔ be míatsɔe ake ahaŋlɔe be ase ɖo? Míadzro esia me le nyati si kplɔe ɖo me.

[Etenuŋɔŋlɔ]

Aleke Nàɖo Wo Ŋui?

◻ Nukata Yehowa ‘lɔ̃a tsɔtsɔke’?

◻ Aleke Biblia ƒo nu tso alesi Yehowa tsɔ kena keŋkeŋ ŋui?

◻ Ne Yehowa tsɔ ke la, gɔmesese ka nue wòŋlɔnɛ be le?

◻ Nukae Yehowa kpɔa mɔ be míawɔ ne míaƒe nuvɔ̃wo gblẽ nu le ame bubuwo ŋu?

[Nɔnɔmetata si le axa 12]

Ne nuvɔ̃ si míewɔ gblẽ nu le ame bubuwo ŋu la, Yehowa kpɔa mɔ be míaɖɔ nɔnɔmea ɖo