Mawu Ðe Eƒe Lɔlɔ̃ Fia Mí

‘Amenuveve la hã aɖu fia to dzɔdzɔenyenye me hena agbe mavɔ.’—ROM. 5:21.

1, 2. Nunana eve kawoe ame geɖe buna nu xɔasiwo, eye kae xɔ asi wu?

NUFIALAGÃ aɖe gblɔ be: ‘Domenyinu gãtɔ si Romatɔwo gblẽ ɖi na wo megbeviwoe nye woƒe se kple gɔmesese si nɔ wo si be ele be se nafia mɔ amegbetɔ ƒe agbenɔnɔ.’ (Aƒetɔ David J. Williams, si nye Nufialagã le Melbourne Yunivɛsiti, Australia) Ne nya sia nye nyateƒe hã la, domenyinu alo nunana aɖe li, si xɔ asi sãsãsã wu ema. Nunana siae nye ɖoɖo si Mawu wɔ be tenɔnɔ dzɔdzɔe nasu amegbetɔwo si le Mawu ŋkume ne yeakpɔ ŋudzedze ɖe wo ŋu, eye yeabu wo ame dzɔdzɔewo hena ɖeɖe kple agbe mavɔ kpɔkpɔ.

² Le gɔmesese aɖe nu la, mɔ si dzi Mawu to na nunana sia su mía si la wɔ ɖeka kple eƒe dzɔdzɔenyenye. Le Romatɔwo ta 5 lia me la, apostolo Paulo meƒo nu tso nya sia ŋu abe se ŋuti numeɖeɖe legbee aɖe ene o. Ke boŋ edze emeɖeɖe gɔme kple kakaɖedzinya sia be: “Wobu mí ame dzɔdzɔewo le xɔse [ta, eya ta] mina míanɔ ŋutifafa me kple Mawu to mía Aƒetɔ Yesu Kristo dzi.” Ame siwo xɔ Mawu ƒe nunanaa la hã lɔ̃nɛ ɖe eteƒe. Paulo nye wo dometɔ ɖeka. Eŋlɔ bena: “Wotrɔ Mawu ƒe lɔlɔ̃ la kɔ ɖe míaƒe dziwo me to gbɔgbɔ kɔkɔe . . . la dzi.”—Rom. 5:1, 5.

 3. Nya kawoe wòsɔ be míabia ku ɖe nu si Mawu na mí ŋu?

³ Gake nu ka tae míehiã na nunana sia si wona mí lɔlɔ̃tɔe la ɖo? Aleke Mawu ate ŋu ana nunana sia mí le mɔ si sɔ le se nu hele eteƒe la nu? Eye nu kae wobia tso ame ɖe sia ɖe si woana nunana sia la si be wòawɔ hafi adze nɛ? Mina míadi nyabiase siawo ƒe ŋuɖoɖo fakɔnamewo eye míakpɔ ale si woɖo kpe Mawu ƒe lɔlɔ̃ dzii ɖa.

Mawu Lɔ̃ Mí Esime Míenye Nu Vɔ̃ Wɔlawo

4, 5. (a) Mɔ deŋgɔ ka nue Yehowa ɖe eƒe lɔlɔ̃ fia le? (b) Nu ka nyanyae akpe ɖe mía ŋu míase nya si le Romatɔwo 5:12 la gɔme?

⁴ Yehowa ɖe eƒe lɔlɔ̃ gã la fia esi wòdɔ eƒe Tenuvi la be wòava kpe ɖe amegbetɔwo ŋu. Paulo gblɔ nya sia ale: “Mawu ɖe ye ŋutɔ ƒe lɔlɔ̃ na mí fia le esia me be, esime míeganye nu vɔ̃ wɔlawo la, Kristo ku ɖe mía ta.” (Rom. 5:8) De ŋugble le nyateƒenya si wògblɔ be, “esime míeganye nu vɔ̃ wɔlawo la,” ŋu kpɔ. Ehiã be amegbetɔwo katã nase ale si wòdzɔ be míeva zu nu vɔ̃ wɔlawo la gɔme.

⁵ Paulo ɖe nya sia me, eye wòdze egɔme kple nya sia be: “To ame ɖeka dzi nu vɔ̃ ge ɖe xexea me, eye to nu vɔ̃ me ku la va, eye ale ku la kaka ɖe amewo katã dome, esi wo katã wɔ nu vɔ̃ ŋuti la.” (Rom. 5:12) Míate ŋu ase nya sia gɔme, elabena Mawu na woŋlɔ ale si amegbetɔwo wɔ va dzɔ ƒe ŋutinya ɖi. Yehowa wɔ ame eve, Adam kple Xawa. Wɔla la de blibo, eye esia ta ame eve gbãtɔ mawo, siwo nye mía tɔgbuiwo la, hã nye ame deblibowo. Mawu de se ɖeka aɖe ko na wo hegblɔ na wo be, ne woda se ma dzi la, woaku. (1 Mose 2:17) Ke hã wowɔ nu tovo, woɖoe koŋ da se bɔbɔe ma si Mawu de na wo la dzi, eye woto esia me gbe nu le eya, si nye Senala kple Dziɖulagã la, gbɔ.—5 Mose 32:4, 5.

 6. (a) Nu ka tae wòdzɔ be hafi Mawu nana Mose ƒe Sea la, Adam ƒe dzidzimeviwo kuna eye woyi edzi le kukum le sea nana megbe? (b) Aleke míate ŋu awɔ ŋusẽ si nu vɔ̃ kpɔna ɖe mía dzi ƒe kpɔɖeŋu?

⁶ Esi Adam zu nu vɔ̃ wɔla megbee wòte vidzidzi, si wɔe be viawo katã nyi nu vɔ̃ kple emetsonuwo ƒe dome tso egbɔ. Enye nyateƒe be Adam ƒe dzidzimeviwo meda Mawu ƒe sea dzi abe Adam ene o, eya ta womebu nu vɔ̃ ma ke na wo o; eye womede se aɖeke hã na wo ɣemaɣi o. (1 Mose 2:17) Ke hã wonyi nu vɔ̃ ƒe dome. Eya ta nu vɔ̃ kple ku ɖu fia va se ɖe esime Mawu na sewo Israel viwo, si ɖee fia kɔtɛ be wonye nu vɔ̃ wɔlawo. (Mixlẽ Romatɔwo 5:13, 14.) Míate ŋu atsɔ nu vɔ̃ si ƒe dome míenyi ƒe ŋusẽkpɔɖeamedzi asɔ kple dɔléle aɖewo siwo dome ɖeviwo nyina tso wo dzilawo gbɔ. Togbɔ be ɖevi aɖewo nyia dɔléle mawo dome tso wo dzilawo gbɔ hã la, menye wo katãe xɔa dɔléle mawo o. Gake mele nenema le nu vɔ̃ ya gome o. Mí katã míenyi nu vɔ̃ ƒe dome tso Adam gbɔ, eye le esia ta la, mí katã míekuna. Ðe míate ŋu ado le nɔnɔme wɔnublanui ma me gbe ɖeka?

Nu Si Mawu Na Mí To Yesu Kristo Dzi

7, 8. Aleke nu siwo to vovo na wo nɔewo la do tso ame deblibo eve ƒe agbenɔnɔ me?

⁷ Lɔlɔ̃tɔe la, Yehowa wɔ ɖoɖo aɖe si akpe ɖe amegbetɔwo ŋu woavo tso nu vɔ̃ si ƒe dome wonyi la si me. Paulo ɖe eme be esia anya wɔ to ame deblibo bubu aɖe—si míagblɔ ko be enye Adam mamlɛtɔ—la dzi. (1 Kor. 15:45) Gake nu siwo to vovo kura na wo nɔewoe do tso amegbetɔ deblibo eveawo ƒe agbenɔnɔ me. Nu ka tae wòyi alea?—Mixlẽ Romatɔwo 5:15, 16.

⁸ Paulo ŋlɔ bena: “Nunana faa ya tɔ mele abe ale si vodada la tɔ nɔ ene o.” Adam ɖi fɔ le nu vɔ̃ ma si wòwɔ ta, eye esɔ be wotso kufia matrɔmatrɔ nɛ—eye wòku. Ke hã menye eya ɖeka koe aku o. Míexlẽe be: “Ame ɖeka [ma] ƒe vodadae na ame geɖewo ku.” Kufia dzɔdzɔe si wotso na Adam la lɔ via madeblibowo katã ɖe eme—míawo hã míele eme. Ke hã, enyanya be nu si to vovo na ema ye do tso ame deblibo Yesu ƒe agbenɔnɔ me ate ŋu afa akɔ na mí. Nu kae do tso eme? Míekpɔ ŋuɖoɖoa le Paulo ƒe nya siwo wògblɔ be “wobu ame ƒomeviwo katã be wole dzɔdzɔe hena agbekpɔkpɔ” la me.—Rom. 5:18.

 9. Gɔmesese kae le nya si dze le Romatɔwo 5:16, 18 be Mawu bu amewo be wole dzɔdzɔe la si?

⁹ Gɔmesese kae le megbe na Helagbe me nya siwo wozã le nyagbɔgblɔ si gɔme woɖe be “wobu amewo be wole dzɔdzɔe” la? Biblia gɔmeɖela aɖe ŋlɔ tso nya sia ŋu be: “Enye nyamenya aɖe si de sɔsɔ ge kple seŋutiɖoɖo. Eku ɖe tɔtrɔwɔwɔ le tenɔnɔ si le ame aɖe si le Mawu ŋkume ŋu la ŋuti, ke menye le amea ƒe amenyenye ememetɔ ŋu o . . . Nyamenya la ɖe Mawu fia abe ʋɔnudrɔ̃la aɖe si tso afia wòde ame si wobu fɔe, si wokplɔ va Mawu ƒe ʋɔnudrɔ̃zikpui ŋkume le kpɔɖeŋunyagbɔgblɔ nu be ewɔ nu madzɔmadzɔ aɖe, la dzi. Gake Mawu ɖe fɔbubua ɖa le ame si wobu fɔe la dzi.”

10. Nu kae Yesu wɔ si dzi woate ŋu anɔ te ɖo abu amegbetɔwo be wole dzɔdzɔe?

¹⁰ Nu ka dzie “xexe me [blibo la] ƒe ʋɔnudrɔ̃la” dzɔdzɔe la ate ŋu anɔ te ɖo aɖe fɔbubu ɖa le ame madzɔmadzɔ aɖe dzi? (1 Mose 18:25) Afɔ vevi gbãtɔ si Mawu ɖe be esia nanya wɔe nye be lɔlɔ̃ ʋãe wòdɔ eƒe Tenuvi la ɖe anyigba dzi. Yesu wɔ Fofoa ƒe lɔlɔ̃nu bliboe, togbɔ be tetekpɔwo va edzi, woɖu fewu le eŋu vevie, eye wowɔ fui gɔ̃ hã. Elé eƒe fɔmaɖimaɖi me ɖe asi ʋuu keke yi ɖe ku me le fuwɔameti ŋu gɔ̃ hã. (Heb. 2:10) Esi Yesu tsɔ eƒe agbe debliboa sa vɔ la, ena tafe aɖe si ate ŋu aɖe Adam ƒe dzidzimeviwo tso nu vɔ̃ kple ku si me.—Mat. 20:28; Rom. 5:6-8.

11. Nu ka nue tafe la sɔ ɖo?

¹¹ Paulo yɔ esia le eƒe agbalẽ bubu me be, “tafe si sɔ ɖe enu.” (1 Tim. 2:6) Nu ka nue wòsɔ ɖo? Adam na eƒe dzidzimevi akpeakpe teƒe akpeawo katã zu ame madeblibowo eye wokuna. Enye nyateƒe be esi Yesu nye ame deblibo ta la, dzidzimevi deblibo akpeakpe teƒe akpewo ate ŋu adzɔ tso eme hafi.a Esia ta míese egɔme be Yesu ƒe agbe kpakple dzidzimevi deblibo siwo katã ate ŋu adzɔ tso eme la ƒe agbe siaa zu vɔsa aɖe si sɔ ɖe Adam kpakple eƒe dzidzimevi madebliboawo ƒe agbe nu. Gake Biblia megblɔ be dzidzimevi siwo ate ŋu adzɔ tso Yesu me la dometɔ aɖe hã nye tafea ƒe akpa aɖe o. Romatɔwo 5:15-19 ɖe eme nyuie be “ame ɖeka” pɛ ƒe ku mee tafe la tso. Ɛ̃, Yesu ƒe agbe deblibo la sɔ ɖe Adam tɔ nu. Susua le Yesu Kristo dzi, eye eya ɖeɖe ko dzie wòle be wòanɔ. Tso ɣemaɣi la, mɔnukpɔkpɔa ʋu ɖi be ame ƒomeviwo katã naxɔ nunana faa la eye woakpɔ agbe, le Yesu ƒe ‘nuwɔna dzɔdzɔe ɖeka,’ si nye eƒe toɖoɖo kple nuteƒewɔwɔ yi ɖase ɖe ku me gɔ̃ hã la ta. (2 Kor. 5:14, 15; 1 Pet. 3:18) Aleke wɔ nu sia te ŋu do tso eme?

Wonɔ Te Ðe Tafea Dzi Ðe Fɔbubua Ða

12, 13. Nu ka tae ame siwo wobu ame dzɔdzɔewoe la hiã na Mawu ƒe amenuveve kple eƒe lɔlɔ̃ ɖo?

¹² Yehowa Mawu kpɔ ŋudzedze ɖe Via ƒe tafevɔsaa ŋu. (Heb. 9:24; 10:10, 12) Ke hã Yesu ƒe nusrɔ̃la siwo le anyigba dzi la kpɔtɔ nye ame madeblibowo, nenema kee wònɔ le eƒe apostolo wɔnuteƒeawo hã gome. Togbɔ be woʋli vevie be yewoaƒo asa na nu vɔ̃ wɔwɔ hã la, womete ŋu kpɔ dzidzedze ɣesiaɣi o. Nu ka tae? Elabena wonyi nu vɔ̃ ƒe dome. (Rom. 7:18-20) Gake Mawu ate ŋu awɔ nane le nɔnɔmea ŋu, eye wòwɔe hã. Exɔ “tafe si sɔ ɖe enu” la, eye wòlɔ̃ faa be yeawɔ eŋu dɔ wòaɖe vi na esubɔla siwo nye amegbetɔwo.

¹³ Menye dɔ nyui aɖewoe apostoloawo kple ame bubuwo wɔ siwo tae wòle na Mawu be wòawɔ tafea ŋu dɔ wòaɖe vi na wo o. Ke boŋ Mawu ƒe amenuveve kple eƒe lɔlɔ̃ gã lae ʋãe wòwɔ esia. Etiae be yeaɖe fɔbuʋɔnu si wodrɔ̃ apostoloawo kpakple ame bubuwo la ɖa le wo dzi ahabu wo be wovo tso fɔbubu si dome wonyi la me. Paulo na esia me kɔ nyuie be: “Le nyateƒe me la, amenuveve siae na woɖe mi to xɔse me; eye menye mia gbɔe esia tso o, Mawu ƒe nunana ye.”—Ef. 2:8.

14, 15. Teƒeɖoɖo kae wotsɔ ɖo ame siwo Mawu bu ame dzɔdzɔewoe la ŋkume, gake nu kae wòhiã kokoko be woawɔ?

¹⁴ Wò ya bu nunana xɔasi si gbegbe wònye be Ŋusẽkatãtɔ la natsɔ ame aɖe ƒe nu vɔ̃ si ƒe dome wònyi la kpakple vodada siwo katã wòwɔ kpɔ la siaa akee ŋu kpɔ! Màte ŋu axlẽ nu vɔ̃ si gbegbe ame aɖe wɔ hafi va zu Kristotɔ la o; ke hã Mawu ate ŋu anɔ te ɖe tafea dzi atsɔ nu vɔ̃ mawo ake. Paulo ŋlɔ bena: ‘Nunana si wona le vodadawo ƒe agbɔsɔsɔ ta lae nye be wobu ame geɖewo ame dzɔdzɔewoe.’ (Rom. 5:16) Ele na apostoloawo kple ame bubu siwo wona lɔlɔ̃nunana sia (si nye wo bubu ame dzɔdzɔewoe) la be woayi edzi anɔ Mawu vavã la subɔm le xɔse me. Teƒeɖoɖo kae asu wo si le etsɔme? “Ame siwo xɔ amenuveve la kple dzɔdzɔenyenye ƒe nunana faa le agbɔsɔsɔ me la anɔ agbe ahaɖu fia . . . to ame ɖeka, si nye Yesu Kristo dzi.” Le nyateƒe me la, nu vɔ̃ la he ku vae, gake dzɔdzɔenyenye ƒe nunana la he agbe vae.—Rom. 5:17; mixlẽ Luka 22:28-30.

¹⁵ Ame siwo xɔ nunana ma, si nye wo bubu ame dzɔdzɔewoe la, zua Mawu ƒe gbɔgbɔmeviwo. Esi wonye Kristo ƒe hadomenyilawo ta la, mɔkpɔkpɔ le wo si be woafɔ wo ayi dziƒo woazu gbɔgbɔmeviwo ŋutɔŋutɔ “ahaɖu fia” kple Yesu Kristo.—Mixlẽ Romatɔwo 8:15-17, 23.

Mawu Ðe Eƒe Lɔlɔ̃ Fia Ame Bubuwo Hã

16. Nunana kae ate ŋu asu ame siwo si anyigba dzi nɔnɔ ƒe mɔkpɔkpɔ le la si fifia gɔ̃ hã?

¹⁶ Menye ame siwo xɔ ɖoɖo si Mawu wɔ la dzi se eye wosubɔe nuteƒewɔwɔtɔe abe Kristotɔwo ene la katã sie mɔkpɔkpɔ le be ‘woaɖu fia’ kple Kristo le dziƒo o. Mɔkpɔkpɔ aɖe si ŋu nya wogblɔ le Biblia me, si nɔ Mawu subɔla siwo nɔ anyi do ŋgɔ na Kristo la si ye le ame geɖewo si. Wole mɔ kpɔm be yewoava nɔ agbe tegbee le paradiso me le anyigba dzi. Ðe woate ŋu axɔ lɔlɔ̃nunana aɖe tso Mawu gbɔ fifia kura gɔ̃ hã, si awɔe be woabu wo abe ame dzɔdzɔewo ene, be woava nɔ agbe le anyigba dzia? Le nya si Paulo ŋlɔ na Romatɔwo nu la, ŋuɖoɖo si ŋu kakaɖedzi lee nye ɛ̃!

17, 18. (a) Alekee Mawu bu Abraham le xɔse si nɔ esi ta? (b) Nu kae wɔe be Yehowa te ŋu bu Abraham abe ame dzɔdzɔe ene?

¹⁷ Paulo ƒo nu tso ame siawo ƒe kpɔɖeŋu vevi ɖeka ŋu, eyae nye Abraham, ame si nye xɔsetɔ si zɔ kple Yehowa hafi Mawu tsɔ sea na Israel dukɔa, eye wònɔ anyi ɣeyiɣi didi aɖe ŋutɔ do ŋgɔ hafi Kristo va ʋu agbenɔnɔ le dziƒo ƒe mɔnukpɔkpɔa ɖi. (Heb. 10:19, 20) Míexlẽe be: “Menye to se mee Abraham alo eƒe dzidzimevi la xɔ ŋugbedodo le be wòanye xexe aɖe ƒe domenyila o, ke boŋ dzɔdzɔenyenye si su esi to xɔse me la mee.” (Rom. 4:13; Yak. 2:23, 24) Eya ta Mawu bu nuteƒewɔla Abraham abe ame dzɔdzɔe ene.—Mixlẽ Romatɔwo 4:20-22.

¹⁸ Esia mate ŋu afia be esi Abraham nɔ Yehowa subɔm ƒe blananewo la, enye ame si ŋu nu vɔ̃ menɔ o. Ao, menye ame dzɔdzɔe le gɔmesese ma nu o. (Rom. 3:10, 23) Ke hã le Yehowa ƒe nunya si seɖoƒe meli na o me la, ebu Abraham ƒe xɔse si mebɔ o kple dɔ siwo eƒe xɔse ʋãe wòwɔ la ŋu. Esi gale etɔxɛ ye nye be Abraham xɔ ‘dzidzimevi’ si ŋugbe wodo be adzɔ tso eƒe dzidzimeviwo me la dzi se. Dzidzimevi mae va nye Mesia, alo Kristo la. (1 Mose 15:6; 22:15-18) Eya ta Mawu, ame si nye Ʋɔnudrɔ̃la la, te ŋu nɔ te ɖe “tafe si Kristo Yesu xe” la dzi tsɔ nu vɔ̃ siwo wowɔ tsã la ke. Esia wɔe be mɔkpɔkpɔ li be woafɔ Abraham kple xɔsetɔ bubu siwo katã nɔ anyi do ŋgɔ na Kristo la ɖe tsitre.—Mixlẽ Romatɔwo 3:24, 25; Ps. 32:1, 2.

Tenɔnɔ Dzɔdzɔe Ate Ŋu Asu Asiwò Fifia

19. Nu ka tae wòle be ale si Mawu bu Abraham la nade dzi ƒo na ame geɖe egbea?

¹⁹ Ele be nyateƒe si wònye be lɔlɔ̃ ƒe Mawu la bu Abraham abe ame dzɔdzɔe ene la nade dzi ƒo na Kristotɔ vavã siwo li egbea. Yehowa mebui be enye ame dzɔdzɔe le gɔmesese si nu wòbu ame siwo wòtsɔ gbɔgbɔ si ami na be woazu “Kristo ƒe hati domenyilawo” la nu o. “Woyɔ” ƒuƒoƒo ma me tɔ siwo xexlẽme li na la “be woava zu ame kɔkɔewo” eye woxɔ wo abe “Mawu ƒe viwo” ene. (Rom. 1:7; 8:14, 17, 33) Gake Abraham ya zu “Yehowa xɔlɔ̃” xoxoxo hafi wova sa tafevɔsaa. (Yak. 2:23; Yes. 41:8) Ke Kristotɔ vavã siwo le mɔ kpɔm be yewoava nɔ agbe le Paradiso si woagbugbɔ aɖo anyi le anyigba dzi me ya ɖe?

20. Nu kae Mawu kpɔa mɔ be ame siwo wòbuna egbea abe ame dzɔdzɔewo ene le gɔmesese si nu wòbu Abraham ɖo la nawɔ?

²⁰ Ame siawo mexɔ “dzɔdzɔenyenye ƒe nunana faa” la be ‘woakpɔ ablɔɖe to tafe si Kristo Yesu xe la dzi’ ayi dziƒo o. (Rom. 3:24; 5:15, 17) Ke hã woxɔ Mawu dzi se vevie hexɔ ɖoɖo siwo wòwɔ la hã dzi se, eye woɖea woƒe xɔsea fiana to dɔ nyuiwo wɔwɔ me. Dɔ mawo dometɔ ɖekae nye be wonɔa “gbeƒã ɖem Mawu fiaɖuƒe la . . . eye [wonɔa] nu siwo ku ɖe Aƒetɔ Yesu Kristo ŋu la fiam” amewo. (Dɔw. 28:31) Eya ta Yehowa tea ŋu bua ame siawo abe ame dzɔdzɔewo ene le gɔmesese si nu wòbu Abraham abe ame dzɔdzɔe ene la nu. Nunana si ame siawo xɔ—si nye xɔlɔ̃dzedze Mawu—la to vovo na “nunana faa” si amesiaminawo xɔ. Ke hã kakaɖedzitɔe la, wokpɔa ŋudzedze ɖe nunana si woxɔ la ŋu ale gbegbe.

21. Yayra kawo ƒe mɔnukpɔkpɔe le ʋuʋu ɖi le Yehowa ƒe lɔlɔ̃ kple dzɔdzɔenyenye ta?

²¹ Ne èle mɔ kpɔm be yeava nɔ agbe tegbee le anyigba dzi la, ele be nànyae be menye ɖoɖo aɖe si womele mɔ kpɔm na o, si amegbetɔ dziɖula aɖe wɔ la gbɔe wòtso be mɔnukpɔkpɔ sia su asiwò o. Ke boŋ ɖoɖo sia ɖe Xexea Me Katã Dziɖulagã la ƒe tameɖoɖo si me nunya le la fia. Yehowa ɖe afɔ vovovowo vivivi be yeƒe tameɖoɖoa nava eme. Afɔ siwo wòɖe la wɔ ɖeka kple dzɔdzɔenyenye vavãtɔ. Gawu la, woɖe Mawu ƒe lɔlɔ̃ gã la fia. Eya ta esɔ nyuie ŋutɔ be Paulo gblɔ be: “Mawu ɖe ye ŋutɔ ƒe lɔlɔ̃ na mí fia le esia me be, esime míeganye nu vɔ̃ wɔlawo la, Kristo ku ɖe mía ta.”—Rom. 5:8.

[Etenuŋɔŋlɔ]

Èɖo Ŋku Wo Dzia?

• Domenyinu kae Adam ƒe dzidzimeviwo xɔ tso egbɔ, eye nu kae do tso eme?

• Aleke wona tafe aɖe si sɔ ɖe enu, eye gɔmesese ka nue wòsɔ ɖe enu le?

• Mɔnukpɔkpɔ kae nunana si nye amewo bubu ame dzɔdzɔewoe la ʋu ɖi na wò?

[Nɔnɔmetata si le axa 13]

Ame deblibo Adam wɔ nu vɔ̃. Ame deblibo Yesu na “tafe si sɔ ɖe enu”

[Nɔnɔmetata si le axa 15]

Nya nyui kae nye esi be woate ŋu ato Yesu dzi abu mí ame dzɔdzɔewoe!