Susu Nyui Nenɔ Asiwò Ne Dzidzɔ Mele Wò Srɔ̃ɖeɖe Me O

“Mele mɔfiame sia nam srɔ̃tɔwo, ke hã, menye nyee o, ke boŋ Aƒetɔ lae.”—1 KOR. 7:10.

ÀTE ŊU AÐE WO MEA?

Gɔmesese ka nue Mawu bla srɔ̃tɔwo ɖekae le?

Aleke hamemetsitsiwo ate ŋu akpe ɖe Kristotɔ siwo le srɔ̃ɖekuxiwo me tom ŋu?

Aleke wòle be míabu srɔ̃ɖeɖee?

 1. Aleke Kristotɔwo bua srɔ̃ɖeɖe, eye nu ka tae?

LE Kristotɔwo ƒe srɔ̃kpegbe la, atsu kple asia kaa atam le Mawu ŋkume—esia daa agba gã aɖe ɖe wo dzi. (Nyagb. 5:3-5) Esi Yehowa ye nye srɔ̃ɖeɖe Gɔmeɖoanyila ta la, ‘ebla’ ame siwo ɖe wo nɔewo la “ɖekae.” (Mar. 10:9) Wole babla le Mawu ŋkume, se ka kee ɖakplɔa srɔ̃ɖeɖe le dukɔ si me wole me o. Ele be Yehowa subɔlawo nabu srɔ̃ɖetamkakaa abe ale si wòbunɛ ene. Ele be wòanɔ alea, ne woɖe wo nɔewo hafi va zu Yehowa subɔlawo gɔ̃ hã.

 2. Nyabiase kawo mee míadzro le nyati sia me?

² Srɔ̃ɖeɖe si kpɔ dzidzedze ate ŋu ana ame nakpɔ dzidzɔ geɖe. Gake nu kae míawɔ ne dzidzɔ mele míaƒe srɔ̃ɖeɖe me o? Ðe woate ŋu ado ŋusẽ srɔ̃ɖeɖe aɖe si me gbɔdzɔa? Kpekpeɖeŋu kae li na ame siwo mekpɔ gbɔdzɔe le woƒe srɔ̃ɖeɖe me o?

WÒ SRƆ̃ÐEÐE ANYE DZIDZƆ LOO ALO DZIGBAGBÃ?

3, 4. Ne ame aɖe mewɔ nyametsotso nyuie le ame si wòaɖe tiatia me o la, nu kae ate ŋu ado tso eme?

³ Ne Kristotɔ aɖe ƒe srɔ̃ɖeɖe kpɔ dzidzedze la, dzidzɔ gã aɖe wònyena, eye ehea kafukafu vanɛ na Yehowa. Ne mekpɔ dzidzedze o la, enyea nuxaxa gã aɖe. Kristotɔ aɖe si mekpɔ ɖe srɔ̃ o, si le srɔ̃ɖeɖe ŋu bum, la ate ŋu adze srɔ̃ɖeɖe gɔme nyuie ne ewɔ ɖe Mawu ƒe mɔfiafia dzi. Le go bubu me la, ne ame aɖe mewɔ nyametsotso nyuie le ame si wòaɖe tiatia me o la, ate ŋu ahe dzimaɖitsitsi kple nuxaxa vae nɛ. Le kpɔɖeŋu me, sɔhɛ aɖewo dze gbeɖoɖoɖi gɔme esi womele klalo atsɔ agbanɔamedzi siwo le srɔ̃ɖeɖe me o. Ame aɖewo dia ame si woaɖe la le Internet dzi eye wotsia klokloklo dzi gena ɖe srɔ̃ɖeɖe si me dzidzɔ mele kura o me. Ame bubuwo wɔa nu vɔ̃ gã aɖe esime wonɔ zɔzɔm do ŋgɔ na srɔ̃ɖeɖe eye woŋea aɖaba ƒua edzi heɖea wo nɔewo, gake wodzea woƒe srɔ̃ɖeɖea gɔme kple bubumademade wo nɔewo ŋu.

⁴ Kristotɔ aɖewo meɖea srɔ̃ “le Aƒetɔ la me” o, eye wokpea fu zi geɖe esi wo srɔ̃ menye Yehowa subɔla o ta. (1 Kor. 7:39) Ne nɔnɔme sia mee nèle la, ke do gbe ɖa nàbia Mawu ƒe tsɔtsɔke kple kpekpeɖeŋu. Meɖea vodada si ame aɖe wɔ va yi la me tsonuwo ɖa o, gake ekpena ɖe dzimetrɔlawo ŋu wodoa dzi le fukpekpe me. (Ps. 130:1-4) Dze agbagba ɖe sia ɖe be nàdze eŋu fifia heyi ɖe mavɔmavɔ me eye ‘Yehowa ƒe dzidzɔ anye wò mɔ sesẽ.’—Nex. 8:10, NW.

NE SRƆ̃ÐEÐE ÐO AFƆKU ME

 5. Ne dzidzɔ mele míaƒe srɔ̃ɖeɖe me o la, nuŋububu kae wòle be míaƒo asa na?

⁵ Ame siwo mele dzidzɔ kpɔm le woƒe srɔ̃ɖeɖe me o la tea ŋu biaa wo ɖokuiwo be: ‘Ðe wòhiã ŋutɔŋutɔ be makpɔ nye srɔ̃ɖeɖea ta? Ne megbe srɔ̃nye heɖe ame bubu la, ɖewohĩ makpɔ dzidzɔ wue!’ Wotea ŋu nɔa eŋu bum be yewoatso srɔ̃ɖetamkaka me henɔ susum be, ‘Ee, magavo ake! Ðe made dzinye wu ne megbe srɔ̃nye oa? Ne nyemate ŋu agbee wòasɔ ɖe Ŋɔŋlɔawo nu o gɔ̃ hã la, ɖe manyo be maklã tso egbɔ be magase vivi na agbea ake oa?’ Le esi Kristotɔwo nanɔ nuwo ŋu bum alea alo anɔ ale si agbea atrɔ na woe ŋu susum teƒe la, ele be woadi Mawu ƒe mɔfiafia le nɔnɔme si me wole fifia ŋu eye woawɔ woƒe ŋutete ɖe sia ɖe awɔ ɖe wo dzi.

 6. Ðe nu si Yesu ƒe nya si le Mateo 19:9 fia la me.

⁶ Ne Kristotɔ aɖe gbe srɔ̃a, evɔ menye ahasie srɔ̃a wɔ o la, mevo le Ŋɔŋlɔawo nu aɖe ame bubu o. Gake ne ahasie srɔ̃a wɔ hafi wògbee la, eya ko hafi wòvo aɖe ame bubu. Yesu gblɔ be: “Ame sia ame si gbe srɔ̃a, ne menye le agbe gbegblẽ nɔnɔ ta o, eye wòɖe bubu la, ewɔ ahasi.” (Mat. 19:9) Nya “ahasi” si wozã le afi sia lɔ nu vɔ̃ gã siwo nye gbɔdɔnuwɔna manɔsenu ɖe sia ɖe ƒomevi ɖe eme. Eya ta ne ame aɖe le srɔ̃gbegbe ŋu bum, evɔ srɔ̃a mewɔ gbɔdɔnuwɔna manɔsenu aɖeke hafi o la, ele vevie be wòado gbe ɖa ahabu eŋu nyuie hafi awɔ nyametsotso.

 7. Ne Kristotɔ aɖe ƒe srɔ̃ɖeɖe me gblẽ la, nu kae eteƒekpɔlawo asusu?

⁷ Ne ame aɖe ƒe srɔ̃ɖeɖe me gblẽ la, efia be woa kple Mawu dome ƒomedodo la me gbɔdzɔ. Apostolo Paulo bia nya vevi sia be: “Le nyateƒe me la, ne ame aɖe menya ale si wòakpɔ ye ŋutɔ ƒe aƒe dzi o ɖe, aleke wòawɔ akpɔ Mawu ƒe hame la dzi?” (1 Tim. 3:5) Le nyateƒe me la, ne atsu kple asi aɖe gblɔna be Kristotɔwo yewonye, evɔ woƒe srɔ̃ɖeɖe me gblẽ la, eteƒekpɔlawo ate ŋu asusu be woawo ŋutɔwo menɔa agbe ɖe nya siwo woɖea gbeƒãe la nu o.—Rom. 2:21-24.

 8. Ne Kristotɔ atsu kple asi tso nya me be yewoagbe yewo nɔewo la, nu kae ate ŋu anye kuxia?

⁸ Ne Kristotɔ srɔ̃tɔ xɔnyɔnyrɔwo le ɖoɖo wɔm be yewoaklã alo yewoagbe yewo nɔewo evɔ mewɔ ɖeka kple Ŋɔŋlɔawo o la, efia be nane kokoko gblẽ le woa kple Yehowa dome ƒomedodo ŋu. Edze ƒãa be wo dometɔ ɖeka loo, alo wo ame evea siaa mele agbe nɔm ɖe Ŋɔŋlɔawo me gɔmeɖosewo nu o. Ne ‘woɖoa ŋu ɖe Yehowa ŋu tso woƒe dzi blibo me’ nyateƒe la, woawɔ woƒe ŋutete ɖe sia ɖe akpɔ woƒe srɔ̃ɖeɖea ta godoo.—Mixlẽ Lododowo 3:5, 6.

 9. Aleke woɖo Kristotɔ srɔ̃tɔ aɖewo siwo meɖe ta le woƒe srɔ̃ɖeɖea te o la ƒe dzigbɔɖi teƒe na wo?

⁹ Edzɔna zi geɖe be srɔ̃ɖeɖe geɖe va kpɔa dzidzedze nyuie, togbɔ be edzena le gɔmedzedzea me be eme di be yeagblẽ gɔ̃ hã. Kristotɔ siwo mena ta bɔbɔe esi woƒe srɔ̃ɖeɖe ɖo afɔku me o la va kpɔa teƒeɖoɖo nyui aɖe zi geɖe. Bu nu si ate ŋu adzɔ le ƒome si me ma le subɔsubɔnyawo gome me ŋu kpɔ. Apostolo Petro ŋlɔ bena: “Mi srɔ̃nyɔnuwo hã, mibɔbɔ mia ɖokui na mia ŋutɔwo mia srɔ̃wo, ale be ne wo dometɔ aɖewo meɖoa to nya la o la, wo srɔ̃wo ƒe agbenɔnɔ nya aɖeke magblɔmagblɔe naɖe wo, esi wokpɔa miaƒe agbenɔnɔ dzadzɛ kple bubu deto la ta.” (1 Pet. 3:1, 2) Ɛ̃, Kristotɔ srɔ̃tɔ ƒe agbenɔnɔ nyuiwo ate ŋu ana srɔ̃a dzimaxɔsetɔ nava xɔ nyateƒea! Ne edzɔ alea la, edea bubu Mawu ŋu, eye wòate ŋu anye yayra gã aɖe na srɔ̃ŋutsua, srɔ̃nyɔnua, kple ɖeviawo, ne viwo le wo si.

10, 11. Kuxi siwo womele mɔ kpɔm na o kawoe ate ŋu ado mo ɖa le srɔ̃ɖeɖe me, gake nu ka dzie Kristotɔ ate ŋu aka ɖo?

¹⁰ Esi Kristotɔ tre geɖewo di be yewoadze Yehowa ŋu ta la, woɖe hati Kristotɔ ɖeadzɔgbe. Gake le esia gɔ̃ hã me la, nɔnɔmewo tea ŋu va trɔna kpata. Le kpɔɖeŋu me, togbɔ be esia mebɔ o hã la, srɔ̃tɔ aɖe ate ŋu ava nɔ seselelãmekuxi sesẽwo me tom. Alo ɣeyiɣi aɖe le srɔ̃ɖeɖea megbe la, srɔ̃tɔawo dometɔ ɖeka tea ŋu va zua gbeƒãɖela si dzudzɔ gbeadzidede. Eƒe kpɔɖeŋu aɖee nye esi: Lindaa nye Kristotɔ bibi kple vidada lɔ̃ame aɖe. Esi srɔ̃aŋutsu si nye Kristotɔ xɔnyɔnyrɔ la va te agbe si tsi tsitre ɖe Ŋɔŋlɔawo ŋu nɔnɔ dzimematrɔmatrɔe la, ekpɔe be naneke meli yeate ŋu awɔ tso eŋu o. Mlɔeba la, wova ɖe srɔ̃a le hamea me. Ne edze abe mɔkpɔkpɔ aɖeke megali be Kristotɔ aɖe ƒe srɔ̃ɖeɖe akpɔ dzidzedze o le susu sia tɔgbi ta la, nu kae wòle be wòawɔ?

¹¹ Ðewohĩ àbia ɖokuiwò be, ‘Ðe wòle be mayi edzi anɔ agbagba dzem be makpɔ nye srɔ̃ɖeɖea ta nu ka kee ɖadzɔ oa?’ Ame aɖeke mate ŋu awɔ nyametsotso ma na wò o, eye mele be ame aɖeke nawɔe na wò hã o. Ke hã susu nyuiwo li siwo tae mele be woaɖe ta le srɔ̃ɖeɖe si me le gbɔdzɔgbɔdzɔm la te o. Mawuvɔ̃la si yia edzi doa dzi toa srɔ̃ɖeɖe me kuxi sesẽwo me le eƒe dzitsinya ta la xɔ asi le Mawu ŋkume ŋutɔ. (Mixlẽ 1 Petro 2:19, 20.) Yehowa ato eƒe Nya la kple eƒe gbɔgbɔa dzi akpe ɖe Kristotɔ si le agbagba dzem vevie be yeado ŋusẽ yeƒe srɔ̃ɖeɖe si me di be yeagblẽ la ŋu.

WOLE KLALO BE YEWOAKPE ÐE ŊUWÒ

12. Ne míedi kpekpeɖeŋu tso hamemetsitsiwo gbɔ la, aleke woabu míi?

¹² Ne èle srɔ̃ɖekuxiwo me tom la, te ɖe Kristotɔ hamemetsitsiwo ŋu ne woakpe ɖe ŋuwò, mègahe ɖe megbe o. Hamemetsitsiwo le subɔsubɔm abe alẽha la kplɔlawo ene eye ado dzidzɔ na wo be yewoahe wò susu ayi Ŋɔŋlɔawo me aɖaŋuɖoɖo siwo tso gbɔgbɔ me la dzi. (Dɔw. 20:28; Yak. 5:14, 15) Mègasusu be, ne mia kple srɔ̃wòa miebia kpekpeɖeŋu tso hamemetsitsiwo gbɔ eye miedzro miaƒe srɔ̃ɖeɖe me kuxi sesẽ aɖe me kpli wo la, ana womagade bubu mia ŋu o. Ke boŋ esia awɔe be woalɔ̃ mi vevie eye woade bubu mia ŋu geɖe wu, elabena woakpɔe be miedi vevie be yewoadze Mawu ŋu.

13. Aɖaŋuɖoɖo kae dze le 1 Korintotɔwo 7:10-16?

¹³ Ne Kristotɔ siwo srɔ̃wo menye nɔviwo o bia kpekpeɖeŋu tso hamemetsitsiwo gbɔ la, hamemetsitsiwo hea woƒe susu yia Paulo ƒe aɖaŋuɖoɖo siawo ƒomevi dzi, si gblɔ be: “Mele mɔfiame sia nam srɔ̃tɔwo, ke hã, menye nyee o, ke boŋ Aƒetɔ lae, be mele be srɔ̃nyɔnu nadzo le srɔ̃a gbɔ o; gake ne edzo le egbɔ . . . la, nenɔ anyi srɔ̃maɖemaɖee, alo negbugbɔ va srɔ̃a gbɔ; eye mele be srɔ̃ŋutsu hã nadzo le srɔ̃a gbɔ o. . . . Ke srɔ̃nyɔnu, aleke nèwɔ nya be màxɔ srɔ̃wò ɖe agbe o? Alo srɔ̃ŋutsu, aleke nèwɔ nya be màxɔ srɔ̃wò ɖe agbe o?” (1 Kor. 7:10-16) Yayra ka gbegbee nye esi wònye ne nɔvi aɖe ƒe agbenɔnɔ na be srɔ̃a dzimaxɔsetɔ va xɔ nyateƒea!

14, 15. Ɣekaɣie srɔ̃tɔ Kristotɔ aɖe ate ŋu abu kaklã tso srɔ̃a gbɔ ŋu, gake nu ka tae gbedodoɖa kple ŋugbledede le nyametsotso sia ŋu anukwaretɔe le vevie?

¹⁴ Nɔnɔme kawo tae srɔ̃nyɔnu Kristotɔ ate ŋu ‘adzo le srɔ̃a gbɔ’ le? Nyɔnu aɖewo tiae be yewoaklã tso yewo srɔ̃ gbɔ, elabena ŋutsua ɖoe koŋ gbe ƒomea dzi kpɔkpɔ. Bubuwo ɖe afɔ sia le esi wo srɔ̃ ƒoa wo kutɔkutɔe, alo esi eƒe nuwɔna wɔe be Kristotɔa megate ŋu le Mawu subɔm o ta.

¹⁵ Ne ame aɖe adzo le srɔ̃a gbɔ alo madzo le egbɔ o la, esia nye eya ŋutɔ ƒe nyametsotso. Ke hã ele be nɔvi ɖeadzɔgbe xɔnyɔnyrɔ la nado gbe ɖa ahabu nyaa ŋu nyuie anukwaretɔe. Le kpɔɖeŋu me, nyateƒee wònye be dzimaxɔsetɔ la ɖeɖe gbɔe wòtso be Kristotɔa megate ŋu le Yehowa subɔm oa? Alo ɖe Kristotɔa va le kuvia wɔm le Biblia sɔsrɔ̃, kpekpewo dede ɖe ɖoɖo nu, kple gbeadzidede edziedzi mea?

16. Nu kae wòle be wòaƒoe ɖe Kristotɔ nu be wòagatsɔ dzitsitsi atso nya me le srɔ̃gbegbe ŋu o?

¹⁶ Nyateƒe si wònye be míedea asixɔxɔ mía kple Mawu dome ƒomedodoa kple eƒe nunana si nye srɔ̃ɖeɖe ŋu ƒoe ɖe mía nu be míagatsɔ dzitsitsi atso nya me le srɔ̃gbegbe ŋu o. Esi míenye Yehowa subɔlawo ta la, eƒe ŋkɔ ŋuti kɔkɔ le vevie na mí ŋutɔ. Esia ta míaɖo tame vɔ̃ gbeɖe be míagbe mía srɔ̃ ale be míate ŋu aɖe ame bubu o.—Yer. 17:9; Mal. 2:13-16.

17. Nɔnɔme ka mee woate ŋu agblɔ le be Mawu yɔ Kristotɔ srɔ̃tɔwo va ŋutifafa gbɔ?

¹⁷ Ele be Kristotɔ aɖe si srɔ̃ nye dzimaxɔsetɔ la nadze agbagba vevie ado ŋusẽ woƒe srɔ̃ɖeɖea. Ke hã ne Kristotɔa dze agbagba vevie tso dzi blibo me be yeakpɔ srɔ̃ɖeɖea ta gake srɔ̃a dzimaxɔsetɔa gbe be yemanɔ egbɔ o la, mehiã be Kristotɔa nabu fɔ eɖokui o. Paulo ŋlɔ bena: “Ne dzimaxɔsetɔ la be yeadzo la, nedzo faa; nɔviŋutsu alo nɔvinyɔnu menye kluvi le nɔnɔme siawo me o, ke boŋ Mawu yɔ mi va ŋutifafa gbɔ.”—1 Kor. 7:15.b

KPƆ MƆ NA YEHOWA

18. Ne manya wɔ be woakpɔ srɔ̃ɖeɖe aɖe ta o hã la, nu nyui kawoe ate ŋu ado tso eme ne wodze agbagba le eŋu?

¹⁸ Ne èle srɔ̃ɖekuxi aɖe me tom la, do gbe ɖa nàbia Yehowa be wòakpe ɖe ŋuwò nàlé dzi ɖe ƒo eye nàkpɔ mɔ nɛ ɣesiaɣi. (Mixlẽ Psalmo 27:14.) Bu Linda si ŋu míeƒo nu tsoe va yi la ŋu kpɔ. Eya kple srɔ̃a wova gbe wo nɔewo mlɔeba, togbɔ be edze agbagba vevie ƒe geɖe be yeakpɔ yeƒe srɔ̃ɖeɖea ta hã. Ðe wòse le eɖokui me be yegblẽ ɣeyiɣi mawo ɖe ya mea? Eɖo eŋu be: “Gbeɖe. Nye agbagbadzedzeawo nye ɖaseɖiɖi nyui aɖe na eteƒekpɔlawo. Nye dzitsinya mebua fɔm o. Emetsonu si ganyo wue nye be, ƒe mawo katã kpe ɖe mía vinyɔnua ŋu wòli ke le nyateƒea me. Etsi va zu Yehowa ƒe Ðasefo ɖeadzɔgbe si me dzo le.”

19. Ne míedze agbagba be míakpɔ míaƒe srɔ̃ɖeɖe ta la, nu kae ate ŋu ado tso eme?

¹⁹ Edo dzidzɔ na nyɔnu Kristotɔ aɖe si ŋkɔe nye Marilyn la ŋutɔ be yeɖo ŋu ɖe Mawu ŋu heku kutri be yeakpɔ yeƒe srɔ̃ɖeɖea ta. Egblɔ be: “Edzrom be madzo le srɔ̃nye gbɔ le esi wògbe dzinyekpɔkpɔ eye wòna wòsesẽ nam be masubɔ Yehowa ta. Evɔ hamemetsitsie srɔ̃nye nye tsã hafi va ƒo eɖokui ɖe asitsaɖoɖo aɖe si me nunya mele o me. Eva te kpekpeawo dada ƒu, eye míegava ɖoa dze kple mía nɔewo kura o. Ŋɔdzidonamelawo ƒe amedzidzedze le míaƒe dua me na ŋɔdzi lém ale gbegbe be medzudzɔ hadede kple amewo. Emegbe meva kpɔe be nye hã tɔnye medzɔ o. Míegate dzeɖoɖo kple mía nɔewo ake, míegadze míaƒe ƒomenusɔsrɔ̃ wɔwɔ gɔme, eye míegava te kpekpeawo dede edziedzi ake. Hamemetsitsiwo wɔ nu ɖe mía ŋu nyuie eye wokpe ɖe mía ŋu ŋutɔ. Ðeko wòle abe ɖe míedze srɔ̃ɖegbenɔnɔ gɔme yeyee ene. Ɣeyiɣi aɖe megbe la, srɔ̃nye gadze eye subɔsubɔmɔnukpɔkpɔwo gasu esi ake le hamea me. Nɔnɔme sesẽ aɖe mee wònye meto, gake nu nyuiwo do tso eme.”

20, 21. Nu kae wòle be míaɖo kplikpaa be míawɔ le míaƒe srɔ̃ɖeɖe me?

²⁰ Míeɖanye trewo alo srɔ̃tɔwo o, mina míayi edzi anɔ nu wɔm dzinɔameƒotɔe ahakpɔ mɔ na Yehowa ɣesiaɣi. Ne míele srɔ̃ɖekuxiwo me tom la, ele be míaku kutri vevie be míakpɔ kuxiawo gbɔ, eye wòanɔ susu me na mí be, ŋutsu kple nyɔnu siwo ɖe wo nɔewo la “[meganye] eve o, ke boŋ ŋutilã ɖeka.” (Mat. 19:6) Eye mina wòanɔ susu me na mí be, ne Kristotɔ aɖe do dzi le ƒome si me ma le subɔsubɔnyawo gome me la, ate ŋu ava kpɔ dzidzɔ geɖe ŋutɔ ne eƒe agbenɔnɔ wɔe be srɔ̃a va xɔ nyateƒea mlɔeba.

²¹ Nɔnɔme ka ke me míeɖale o, mina míawɔ nu ŋuɖɔɖotɔe ale be míaxɔ ɖaseɖiɖi nyui tso eteƒekpɔla siwo menye hamea me tɔwo o la gbɔ. Ne míele srɔ̃ɖekuxi sesẽwo me tom eye wòva susu me na mí be míadzo le mía srɔ̃ gbɔ la, ele be míado gbe ɖa tso eŋu vevie eye míadzro míaƒe dzi me anukwaretɔe. Ele be míade ŋugble le Ŋɔŋlɔawo hã ŋu vevie, eye míadi kpekpeɖeŋu tso hamemetsitsiwo gbɔ. Ƒo wo katã ta la, mina míaɖoe kplikpaa be míadze Yehowa Mawu ŋu le nu sia nu si míewɔna me, eye míaɖee afia be míedea asixɔxɔ vavã eƒe nunana wɔnuku si nye srɔ̃ɖeɖe ŋu.

[Etenuŋɔŋlɔwo]

[Nya si ɖe dzesi si le axa 10]

Kristotɔ siwo mena ta bɔbɔe esi woƒe srɔ̃ɖeɖe ɖo afɔku me o la va kpɔa teƒeɖoɖo nyui aɖe zi geɖe

[Nya si ɖe dzesi si le axa 12]

Kpɔ mɔ na Yehowa ɣesiaɣi eye biae be wòakpe ɖe ŋuwò nàlé dzi ɖe ƒo

[Nɔnɔmetata si le axa 9]

Yehowa yraa srɔ̃tɔ Kristotɔ siwo kua kutri be yewoado ŋusẽ yewoƒe srɔ̃ɖeɖea

[Nɔnɔmetata si le axa 11]

Kristo hamea ate ŋu anye akɔfafa kple gbɔgbɔ me kpekpeɖeŋu tsoƒe na mí