Nya Ɣaɣla aɖe si Mele Be Kristotɔwo Nagbe Gbɔgblɔ O!
“Nye la meƒo nu na xexeame le gaglãgbe, . . . nyemegblɔ nya aɖeke le ɣaɣlaƒe o.”—YOHANES 18:20.
1, 2. Gɔmesese kae le Helagbe me nya my·steʹri·on ŋu le alesi wozãe le Ŋɔŋlɔawo me nu?
WOÐE Helagbe me nya my·steʹri·on gɔme le New World Translation of the Holy Scriptures me zi gbɔ zi 25 be “nya ɣaɣla kɔkɔe” kple zi 3 be “nya ɣaɣla.” Nya ɣaɣla si wobe ele kɔkɔe la anɔ vevie nyateƒe! Ele be amesiame si wona mɔnukpɔkpɔe wònya nya ɣaɣla ma la nase le eɖokui me be wove ye nu ŋutɔ, elabena wobui be edze ase nya ɣaɣla aɖe si le nyanya na xexeame katã ƒe Mawu Ŋusẽkatãtɔ la.
2 Vine ƒe Expository Dictionary of Old and New Testament Words ɖo kpe edzi be egɔmeɖeɖe be “nya ɣaɣla kɔkɔe” sɔ le teƒe geɖe wu “nya ɣaɣla.” Egblɔ le my·steʹri·on ŋu be: “Le [Kristotɔwo ƒe Hela Ŋɔŋlɔawo] me la, mefia nya ɣaɣla si gɔme womate ŋu ase o (abe alesi Eŋlisigbe me nyaa fia ene o), ke efia nusi gɔme amegbetɔ mate ŋu ase le eɖokui si o negbe ɖe Mawu ɖee fiae hafi, eye amesiwo Mawu ƒe Gbɔgbɔ ʋu susu na ɖeɖekoe wòɖee fia le mɔ kple ɣeyiɣi si eya ŋutɔ ɖo dzi. Le nya la ƒe gɔmesese gbadzaa nu la, nya ɣaɣla fia sidzedze si wotsɔ ɣla; ke Ŋɔŋlɔawo me gɔmesese fia nyateƒe si woɖe fia. Eyata nya siwo do ƒome kple nyati sia koŋue nye ‘wogblɔ,’ ‘woɖee fia,’ ‘woʋu goe,’ ‘woɖe gbeƒãe,’ ‘wose egɔme,’ ‘wokakae.’ ”
3. Aleke ƒe alafa gbãtɔ me Kristo-hamea to vovo tso adzamehabɔbɔ aɖewo gbɔe?
3 Numeɖeɖe sia ɖe vovototo gã si le adzamehabɔbɔ siwo nɔ anyi le ƒe alafa gbãtɔ me kpakple Kristo-hame yeye si woɖo dome la fia. Wotsɔ nyawo ɣaɣla ƒe atamkaka blaa amesiwo wokplɔ de vivimehawo me zi geɖe be woakpɔ subɔsubɔnufiafiawo ta, gake wometsɔ se ma bla Kristotɔwo gbeɖe o. Nyateƒe wònye baa be apostolo Paulo ƒo nu tso ‘Mawu ƒe nunya si le nya ɣaɣla kɔkɔe me’ ŋu, eye wòyɔe be “nunya, si le ɣaɣla,” si fia be, woɣlae ɖe “xexe sia me dziɖulawo.” Womeɣlae ɖe Kristotɔ siwo woɖee fia to Mawu ƒe gbɔgbɔ me bene woaɖe gbeƒãe la o.—Korintotɔwo I, 2:7-12; tsɔe sɔ kple Lododowo 1:20.
Wode Dzesi “Nya Ɣaɣla Kɔkɔe” La
4. Ameka koŋ ŋue “nya ɣaɣla kɔkɔe” la ku ɖo, eye alekee?
4 Yesu Kristo ŋue Yehowa ƒe “nya ɣaɣla kɔkɔe la” ku ɖo. Paulo ŋlɔ be: “[Yehowa na] míenya eƒe lɔlɔ̃nu ƒe nya ɣaɣla [kɔkɔe] la le eƒe ŋudzedze, si wòɖo ɖi le eɖokui me la nu hena azãgbewo ƒe ɖoɖo ƒe nuɖoanyi, bene woaƒo nuwo katã nu ƒu ade ta ɖeka te le Kristo me, nusiwo le dziƒo kple nusiwo le anyigba dzi.” (Efesotɔwo 1:9, 10) Paulo gblɔ alesi tututu ‘nya ɣaɣla kɔkɔea’ le esime wòƒo nu tso ‘Mawu ƒe nya ɣaɣla kɔkɔe, si nye Kristo ŋuti sidzedze vavãtɔ’ ƒe vevienyenye ŋu.—Kolosetɔwo 2:2.
5. Nukawoe le “nya ɣaɣla kɔkɔe la” me?
5 Gake eku ɖe nu geɖe ŋu elabena “nya ɣaɣla kɔkɔe la” nye nya ɣaɣla le go geɖe me. Mefia be woadze si Yesu be eyae nye Ŋugbedodovi alo Mesia la ko evɔ o; akpa si wode esi be wòawɔ le Mawu ƒe tameɖoɖo me hã le eme. Eku ɖe dziƒodziɖuɖu aɖe ŋu, Mawu ƒe Mesia Fiaɖuƒea, abe alesi Yesu ɖe eme nyuie ene esime wògblɔ na eƒe nusrɔ̃lawo be: “Miawo la, wona mi bena, mianya dziƒofiaɖuƒe la ƒe nu [ɣaɣla kɔkɔewo], ke woawo la, womena wo o.”—Mateo 13:11.
6. (a) Nukatae wòsɔ be woagblɔ be wotsɔ “nya ɣaɣla kɔkɔe la” “[ɣla] tso ɣeyiɣi mavɔmavɔwo me ke”? (b) Aleke woɖee fia vivivii?
6 Dometsotso didi aɖe anɔ Mawu ƒe tameɖoɖo gbɔgblɔ zi gbãtɔ be yeaɖo Mesia Fiaɖuƒe anyi kple esime “woawu Mawu ƒe nya ɣaɣla [kɔkɔe] la nu” dome. (Nyaɖeɖefia 10:7; Mose I, 3:15) Woawu eɖeɖefia nu le Fiaɖuƒea ɖoɖo anyi me, abe alesi Nyaɖeɖefia 10:7 tsɔtsɔ sɔ kple 11:15 ɖo kpe edzii ene. Le nyateƒe me la, ƒe si ade 4,000 va yi tso esime wodo Fiaɖuƒea ŋugbe zi gbãtɔ le Eden vaseɖe esime Fia si Wotia la do le ƒe 29 M.Ŋ. me. Ƒe 1,885 bubu hã va yi hafi woɖo Fiaɖuƒea le dziƒo le ƒe 1914 me. Ale woɖe “nya ɣaɣla kɔkɔe la” fia vivivi le ƒe 6,000 kloe me. (Kpɔ axa 16.) Paulo to nyateƒe ŋutɔ esime wògblɔ be enye “nya ɣaɣla [kɔkɔe], si woɣla tso ɣeyiɣi mavɔmavɔwo me ke la, ƒe ɖeɖefia la nu, esi woɖe ɖe go fia azɔ.”—Romatɔwo 16:25-27; Efesotɔwo 3:4-11.
7. Nukata míate ŋu aka ɖe dɔla nuteƒewɔla kple aɖaŋudzela ƒe ha la dzi bliboe?
7 Amegbetɔwo ya ƒe agbenɔƒe le kpuie gake Yehowa tɔ mele nenema o, eyata metsia dzi gbeɖe ɖe ɣeyiɣi ƒe anyimanɔmanɔ ŋu ale be wòʋua go eƒe nya ɣaɣlawo ne ɣeyiɣi mede nɛ hafi o. Ele be nya sia nakpe ɖe mía ŋu ale be ne womate ŋu aɖe Biblia me nyabiabia aɖe gɔme fifia eme nakɔ na mí o la, mele be míatsi dzi o. Dɔla nuteƒewɔla kple aɖaŋudzela ƒe ha si woɖo be wòana nuɖuɖu Kristotɔwo le ɣeyiɣi nyui dzi ƒe ɖokuibɔbɔ wɔnɛ be metsɔa ɖokuidodoɖedzi trea nusiwo me mekɔ haɖe o la gbɔgblɔ do ŋgɔ o. Dɔla ƒe ha la dzea agbagba be yemafia nusi ŋu kpeɖodzi mele o. Etsɔa ɖokuibɔbɔ lɔ̃na ɖe edzi be yemate ŋu aɖo nya sia nya ŋu fifia o, eye Lododowo 4:18 me nyawo nɔa susu me nɛ kɔte. Gake dzidzɔ kae nye si wònye be míanya be Yehowa ayi edzi anɔ eƒe tameɖoɖowo ŋuti nya ɣaɣlawo ɖem fia le eya ŋutɔ ƒe ɣeyiɣi ɖoɖi kple eƒe mɔ nu! Megadzɔ gbeɖe be míagbe dzigbɔgbɔɖi ɖe Yehowa ƒe ɖoɖowo ŋu, anɔ agbagba dzem susumanɔŋutɔe be míadze ŋgɔ na Amesi ɖea nya ɣaɣlawo ɖe go o. Kakaɖedzi ka gbegbee nye si wònye be míanya be amesiwo zãm Yehowa le egbea la mewɔa nenema o! Enye nuteƒewɔla kple aɖaŋudzela.—Mateo 24:45; Korintotɔwo I, 4:6.
Ele Be Woagblɔ Nya Ɣaɣla si Woɖe Fia!
8. Aleke míewɔ nya be ɖe wobe woagblɔ “nya ɣaɣla kɔkɔe la” na amewo?
8 Yehowa meɖe eƒe “nya ɣaɣla kɔkɔe la” fia Kristotɔwo be woamia nu ɖe edzi o. Ðe wòbe woagblɔe wòanye wɔwɔ ɖe gɔmeɖose si Yesu ɖo ɖi na eyomedzelawo katã dzi—menye na subɔsubɔhakplɔla ʋee aɖewo ko o: “Miawoe nye xexeame ƒe kekeli. Du, si le to dzi la, womate ŋu aɣlae o. Eye womesia akaɖi hã dana ɖe afianu te o, ke ɖe akaɖiti dzi boŋ, eye wòaklẽ na amesiwo katã le aƒea me. Nenema ke mina miaƒe kekeli naklẽ le amewo ƒe ŋku me, bena woakpɔ miaƒe nu nyui wɔwɔwo, eye woakafu mia Fofo, si le dziƒo.”—Mateo 5:14-16; 28:19, 20.
9. Nukae ɖo kpe edzi be Yesu menye dziɖuɖumula abe alesi ame aɖewo gblɔnɛ ene o?
9 Dziɖuɖumumu ƒe susu aɖeke menɔ Yesu si be wòaɖo eyomedzelawo ɖe adzamehabɔbɔ me ɖe adzamenuwo wɔwɔ ŋu o. Robert M. Grant ŋlɔ ametaʋlinya si ƒe alafa evelia me xɔsetaʋlila Justin Martyr gblɔ tsɔ ɖe Kristotɔ gbãtɔwo nu ɖe agbalẽ si nye Early Christianity and Society me be: “Ðe Kristotɔwo nye dziɖuɖumulawo la anye ne woawɔ nu le bebeme bene woaɖo woƒe taɖodzinu gbɔ.” Gake aleke Kristotɔwo “awɔ nu le bebeme” evɔ le ɣeyiɣi ma ke me woanɔ abe “du, si le to dzi” ene? Womekpɔ mɔ aɣla woƒe akaɖi ɖe afianu te o! Eyata naneke meli si nu dziɖuɖua navɔ̃ ɖo le woƒe dɔwɔnawo ŋu o. Agbalẽŋlɔla sia gayi edzi ɖɔ wo be wonye “fiagã la ƒe dɔwɔhati vevitɔwo le ŋutifafa kple ɖoɖo nyui dzi zɔzɔ ɖoɖo anyi me.”
10. Nukatae mele be Kristotɔwo naɣla amesiwo wonye o?
10 Yesu medi be yeƒe nusrɔ̃lawo naɣla amesi ƒomevi wonye abe ke nusi woyɔna be kɔmamã me tɔwoe wonye ene o. (Dɔwɔwɔwo 24:14; 28:22) Ne míena míaƒe akaɖia klẽ egbea o la, madze Kristo kple Fofoa, Amesi ɖea nya ɣaɣlawo ɖe go ŋu o, eye mana míakpɔ dzidzɔ o.
11, 12. (a) Nukatae Yehowa di be woana amewo nanya Kristotɔnyenye? (b) Aleke Yesu ɖo kpɔɖeŋu nyuitɔ ɖii?
11 Yehowa “melɔ̃ bena, ame aɖeke natsrɔ̃ o, ke boŋ bena amewo katã natrɔ va dzimetɔtrɔ gbɔ.” (Petro II, 3:9; Xezekiel 18:23; 33:11; Dɔwɔwɔwo 17:30) Nusi dzi woanɔ te ɖo atsɔ nuvɔ̃wɔla siwo trɔ dzime ƒe nuvɔ̃wo ake wo enye be woaxɔ Yesu Kristo, amesi tsɔ eɖokui na tafee ɖe amewo katã ta—menye ɖe ame ʋee aɖewo ko ta o—ƒe tafevɔsa dzi ase bene “amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.” (Yohanes 3:16) Ele vevie be woakpe ɖe amewo ŋu woawɔ afɔɖeɖe siwo hiã si ana woadze bene le ʋɔnudɔdrɔ̃ si gbɔna me la, woadrɔ̃ ʋɔnu wo be wonye alẽwo, ke menye gbɔ̃wo o.—Mateo 25:31-46.
12 Womeɖoe be woatsɔ Kristotɔnyenye vavãtɔ aɣla o; ɖe wobe woaƒo nu le eŋu le mɔ sia mɔ si sɔ nu. Yesu ŋutɔ ɖo kpɔɖeŋu nyuitɔ ɖi. Esi nunɔlagã la bia nyae le eƒe nusrɔ̃lawo kple eƒe nufiafia ŋu la, egblɔ be: “Nye la meƒo nu na xexeame le gaglãgbe, mefia nu ɖaa le ƒuƒoƒewo kple mawuƒe me, afisi Yudatɔwo katã ƒoa ƒu ɖo, eye nyemegblɔ nya aɖeke le ɣaɣlaƒe kpɔ o.” (Yohanes 18:19, 20) Le kpɔɖeŋu sia ta Mawuvɔ̃la kae atse able wòatsɔ gbedasi si Mawu be woagblɔ le gaglãgbe la aɣla? Amekae kpɔ mɔ atsɔ “sidzedze ƒe safui” si kplɔa ame yia agbe mavɔ me la aɣla? Nusia wɔwɔ ana ame ƒe nuwɔna nasɔ kple mawusubɔsubɔ me alakpanuwɔla siwo nɔ anyi le ƒe alafa gbãtɔ me tɔ.—Luka 11:52; Yohanes 17:3.
13. Nukatae wòle be míaɖe gbeƒã le mɔnukpɔkpɔ ɖesiaɖe me?
13 Megadzɔ gbeɖe be ame aɖe nate ŋu agblɔ le mí Yehowa Ðasefowo ŋu be míetsɔ Mawu ƒe Fiaɖuƒe gbedasia ɣla o! Wosee alo womeɖasee o, ele be amewo nanya be woɖe gbeƒãe kpɔ. (Tsɔe sɔ kple Xezekiel 2:5; 33:33) Eyata mina míawɔ mɔnukpɔkpɔ ɖesiaɖe ŋudɔ agblɔ nyateƒenya la na amesiame le afisiafi si míekpɔ wo le.
Gadede Alɔgo me na Satana
14. Nukata mele be míahe ɖe megbe le nuƒoƒo tso míaƒe tadedeagu ŋu me o?
14 Wova le nu ƒom tso Yehowa Ðasefowo ŋu le nyadzɔdzɔwo me ŋutɔ le teƒe geɖe. Wokaa aʋatso ɖe wo si heyɔa wo zi geɖe abe alesi wòdzɔ ɖe Kristotɔ gbãtɔwo dzi ene be wonye vivimeha kple adzamekɔmamã manyomanyo. (Dɔwɔwɔwo 28:22) Ðe wòanye be míaƒe gbeƒãɖeɖe le gaglãgbe ana woagatɔ ŋku mí veviea? Susu manɔ eme kura be míatsɔ mía ɖokui ade nyaʋiʋli me dzodzro o, eye manye wɔwɔ ɖe aɖaŋu si Yesu ɖo dzi hã o. (Lododowo 26:17; Mateo 10:16) Gake mele be míatsɔ Fiaɖuƒe gbeƒãɖeɖedɔ kple kpekpe ɖe amewo ŋu be woana woƒe agbenɔnɔ nanyo ɖe edzi, si nye dɔ ɖevi la aɣla o. Enyea kafukafu na Yehowa, edonɛ ɖe dzi, eye wòhea amewo ƒe susu yia eya kple eƒe Fiaɖuƒe si wòɖo dzi. Alesi amewo le Biblia me nyateƒea xɔm dzidzɔtɔe le ŋkeke siawo me le Ɣedzeƒe Europa kple teƒe aɖewo le Afrika la tso alesi mɔnu ʋu ɖi fifia be woaɖe gbeƒã nyateƒea le teƒe mawo hã gbɔ.
15, 16. (a) Nukawoe míaƒe gbeƒãɖeɖe faa kple gbɔgbɔ me dzidzedzekpɔkpɔ wɔna, gake ɖe esia nye nusita míatsi dzia? (b) Nukata Yehowa de ga alɔgo me na Satana?
15 Nyateƒe wònye be alesi Yehowa Ðasefowo ɖea gbeƒãe le gaglãgbe, gbɔgbɔmeparadiso si me wole, kple woƒe dzidzedzekpɔkpɔ—le dzidziɖedzi kple ŋutilã me nunɔamesiwo siaa gome—metoa ŋku ŋu yina o. Togbɔ be nusiawo hea dzianukwaretɔwo hã la, woate ŋu ave dɔme na tsitretsiɖeŋulawo. (Korintotɔwo II, 2:14-17) Le nyateƒe me la, ɖewohĩ nusiawo ana wòava dzro Satana ƒe aʋakɔwo woadi be yewoadze Mawu ƒe amewo dzi.
16 Ðe wòle be esia nana míatsi dzia? Masɔ ɖe Yehowa ƒe nyagblɔɖi si le Xezekiel ta 38 nu nenema o. Egblɔe ɖi be Gog si tso Magog, si nye alesi woyɔ Satana Abosam tso esime woɖi gbɔe ɖo ɖe anyigba dzi nutowo me esime woɖo Fiaɖuƒea le ƒe 1914 megbe la, ana woaho ɖe Mawu ƒe amewo ŋu. (Nyaɖeɖefia 12:7-9) Yehowa gblɔ na Gog be: “Agblɔ bena: Maho ɖe anyigba, si le nuvo la ŋu, eye maƒo ɖe amesiwo li bɔkɔɔ, eye woɖe dzi ɖi la dzi, amesiwo li, eye gli, gameti kple agbo mele wo si o, ne naha nu, naɖe aboyo nu, eye nanyẽ wò asi ɖe aƒedo, si me ame le, kple dukɔ, si woƒo ƒu tso dukɔwo dome la dzi, amesiwo si lãwo kple kesinɔnuwo le, eye wole anyigba ƒe ƒoƒoli nu.” (Xezekiel 38:11, 12) Gake kpukpui 4 lia fia be mele be Mawu ƒe amewo navɔ̃ amedzidzedze sia o elabena Yehowa gbɔe wòatso. Gake nukatae Mawu aɖe mɔ—ẽ, wòana gɔ̃ hã—be woaho ɖe eƒe amewo ŋu? Míexlẽ alesi Yehowa ɖo eŋui le kpukpui 23 lia me be: “Mado gã ɖokuinye, makɔ ɖokuinye ŋu, eye maɖe ɖokuinye afia le dukɔ geɖewo ŋku me, ne woadze sii be, nyee nye Yehowa.”
17. Aleke wòle be míabu Gog ƒe amedzidzedze si gbɔna kpuie lae?
17 Esia ta le esi teƒe be Gog ƒe amedzidzedze nana Yehowa ƒe amewo navɔ̃ la, wokpɔa mɔ na Biblia me nyagblɔɖi me vava bubu sia vevie. Dzidzɔ kae nye si wònye be míanya be esi Yehowa le eƒe habɔbɔ si wokpɔna yram wòle dzidzedze kpɔm la, ede ga alɔgo me na Satana eye wòle wo kple eƒe aʋakɔ hem yina be yeaɖu wo dzi!—Xezekiel 38:4.
Wole Egblɔm Fifia Wu Ɣeyiɣi Bubu Ðesiaɖe!
18. (a) Nukae ame geɖe va le si dzemee fifia, eye nukatae? (b) Aleke amewo ƒe Fiaɖuƒe gbedasia xɔxɔ nye ameʋãŋusẽ gã aɖee?
18 Egbea la, Yehowa Ðasefowo gblɔa woƒe nukpɔsusu siwo nɔ te ɖe Biblia dzi faa togbɔ be medzɔa dzi na amewo o gake. Ƒe geɖewoe nye sia wole nu xlɔ̃m le afɔku siwo le atamanono kple atikevɔ̃ɖizazã me, viwɔwɔ na vi etsɔ ŋu mabumabui, ŋusẽ gbegblẽ si modzakaɖeɖe siwo me gbɔdɔdɔ ƒe agbegbegblẽnɔnɔ kple ŋutasesẽ bɔ ɖo la kpɔna ɖe ame dzi, kple ʋudodo me fɔkuwo ŋu. Woɖe amedzɔtsolãme nufiafia ƒe aʋatsonyenye hã fia. Ame geɖe wu va le gbɔgblɔm azɔ be, “Menye aʋatso kam Yehowa Ðasefowo le hafi o.” Ðe míegblɔa míaƒe nukpɔsusuwo na amewo o la, anye womate ŋu agblɔ nya sia o. Eye mègaŋlɔ nya sia be o be esi wole nya ma gblɔm la, ɖe wole didim be yewoagblɔ be, “Satana, alakpatɔe nènye; Yehowa boŋue to nyateƒe.” Ameʋãŋusẽ ka gbegbee nye si wònye na mí be míayi edzi asrɔ̃ Yesu ƒe kpɔɖeŋu agblɔ nyateƒenya la le dutoƒo!—Lododowo 27:11.
19, 20. (a) Tameɖoɖo kplikpaa kae Yehowa ƒe amewo gblɔ le ƒe 1922 me, eye ɖe nya siawo kpɔtɔ le dɔ wɔma? (b) Aleke wòle be míabu Yehowa ƒe “nya ɣaɣla kɔkɔe” lae?
19 Yehowa ƒe amewo nya agba si le wo dzi le go sia me tso gbaɖegbe ke. Le takpekpe ɖedzesi aɖe si wowɔ le ƒe 1922 me la, J. F. Rutherford si nye Gbetakpɔxɔ Habɔbɔa ƒe zimenɔla ɣemaɣi gblɔ dzidzɔnya sia na eƒe nyaselawo be: “Minɔ mo xexi, minɔ ŋudzɔ, misẽ ŋu, eye miwɔ kalẽ. Minye Aƒetɔ la ƒe ɖasefo nuteƒewɔla vavãwo. Miyi edzi miawɔ aʋa la vaseɖe esime Babilon ƒe akpa sia akpa nazu aƒedo keŋkeŋ. Mikaka gbedasia ɖe didiƒe kple kpuiƒe. Ele be xexeame nanyae be Yehowa ye nye Mawu eye be Yesu Kristo ye nye fiawo dzi Fia kple aƒetɔwo dzi Aƒetɔ. Ŋkeke siae nye esi ƒo ɖesiaɖe ta. Mikpɔ ɖa, Fia la le dzi ɖum! Miawoe nye eƒe nyakakalawo. Eyata miɖe gbeƒã, miɖe gbeƒã, miɖe gbeƒã Fia la kple eƒe Fiaɖuƒe la.”
20 Esi nya siawo nɔ vevie le ƒe 1922 me la, aleke wògale vevie wu enye si le ƒe 75 megbe esime Kristo ƒe ɖeɖefia abe Ʋɔnudrɔ̃la kple Hlɔ̃biala ene la gogo wu! Yehowa ƒe Fiaɖuƒe si woɖo kple gbɔgbɔmeparadiso si me Mawu ƒe amewo le ŋuti gbedasia nye “nya ɣaɣla kɔkɔe” si xɔ asi ale gbegbe be womate ŋu agbe egbɔgblɔ o. Abe alesi Yesu ŋutɔ gblɔe eme kɔ ene la, ele be le gbɔgbɔ kɔkɔea ƒe kpekpeɖeŋu me la, eyomedzelawo nanye ɖasefowo “vaseɖe anyigba ƒe seƒe ke” le ɖoƒe vevi si wòle le Yehowa ƒe tameɖoɖo mavɔwo me ŋuti. (Dɔwɔwɔwo 1:8; Efesotɔwo 3:8-12) Le nyateƒe me esi míenye Yehowa, Mawu si ɖea nya ɣaɣlawo ɖe go ƒe subɔlawo ta la, mele be míazi kpi ɖe nya ɣaɣla sia dzi gbeɖe o!
Aleke Nàɖo Wo Ŋui?
◻ Nukae nye “nya ɣaɣla kɔkɔe” la?
◻ Aleke míewɔ nya be ele be woana amewo nanya?
◻ Nukae ana Gog nadze Yehowa ƒe amewo dzi, eye aleke wòle be míabu nusiae?
◻ Nukae wòle be mía dometɔ ɖesiaɖe naɖo kplikpaa be yeawɔ?
[Aɖaka si le axa 16]
“Nya Ɣaɣla Kɔkɔe” si Woɖe Fia Vivivi
◻ Ƒe 4026 D.M.Ŋ. megbe: Mawu do ŋugbe be yeaɖo Dzidzimevi aɖe wòava tsrɔ̃ Satana.—Mose I, 3:15
◻ Ƒe 1943 D.M.Ŋ.: Wowɔ Abraham ƒe nubabla si me wodo ŋugbe le be Dzidzimevia adzɔ tso Abraham me.—Mose I, 12:1-7
◻ Ƒe 1918 D.M.Ŋ.: Wodzi Isak wònye nubabla la domenyila.—Mose I, 17:19; 21:1-5
◻ Ƒe 1761 D.M.Ŋ. lɔƒo.: Yehowa ɖo kpe edzi be Dzidzimevia ado tso Isak vi, Yakob me.—Mose I, 28:10-15
◻ Ƒe 1711 D.M.Ŋ.: Yakob ɖee fia be ye vi Yuda mee Dzidzimevia adzɔ tso.—Mose I, 49:10
◻ Ƒe 1070-1038 D.M.Ŋ.: Fia Dawid see be yeƒe ƒomea mee Dzidzimevia atso eye wòanye Fia aɖu dzi tegbee.—Samuel II, 7:13-16; Psalmo 89:36, 37
◻ Ƒe 29-33 M.Ŋ.: Wode dzesi Yesu be eyae nye Dzidzimevi la, Mesia, ʋɔnudrɔ̃la si ava, kple Fia si wotia.—Yohanes 1:17; 4:25, 26; Dɔwɔwɔwo 10:42, 43; Korintotɔwo II, 1:20; Timoteo I, 3:16
◻ Yesu ɖee fia be hati dziɖulawo kple ʋɔnudrɔ̃lawo anɔ ye si, be teviwo anɔ Dziƒofiaɖuƒea si, eye be ele be ye yomedzelawo katã nanye Fiaɖuƒe gbeƒãɖelawo.—Mateo 5:3-5; 6:10; 28:19, 20; Luka 10:1-9; 12:32; 22:29, 30; Yohanes 10:16; 14:2, 3
◻ Yesu ɖee fia be woaɖo Fiaɖuƒea le ɣeyiɣi aɖe koŋ dzi, abe alesi xexemenudzɔdzɔwo ɖo kpe edzii ene.—Mateo 24:3-22; Luka 21:24
◻ Ƒe 36 M.Ŋ.: Wona Petro nya be amesiwo menye Yudatɔwo o hã anye Fiaɖuƒea ƒe hatidziɖulawo.—Dɔwɔwɔwo 10:30-48
◻ Ƒe 55 M.Ŋ.: Paulo ɖe eme be woafɔ Fiaɖuƒe hatidziɖulawo ɖe tsitre makumaku kple magblẽmagblẽe le Kristo ƒe anyinɔɣi.—Korintotɔwo I, 15:51-54
◻ Ƒe 96 M.Ŋ.: Yesu si le eyomedzela amesiaminawo dzi ɖum xoxo la ɖee fia be woƒe xexlẽme katã anye 144,000.—Efesotɔwo 5:32; Kolosetɔwo 1:13-20; Nyaɖeɖefia 1:1; 14:1-3
◻ Ƒe 1879 M.Ŋ.: Zion’s Watch Tower tɔ asi ƒe 1914 dzi be enye ƒe ɖedzesi le Mawu ƒe “nya ɣaɣla kɔkɔe la” me vava me
◻ Ƒe 1925 M.Ŋ.: Gbetakpɔxɔ ɖe eme be woɖo Fiaɖuƒea le ƒe 1914 me; ele be woaɖe gbeƒã Fiaɖuƒe ŋuti “nya ɣaɣla kɔkɔe la.”—Nyaɖeɖefia 12:1-5, 10, 17
[Nɔnɔmetata siwo le axa 15]
Yehowa Ðasefowo ɖea gbeƒã Yehowa ƒe Fiaɖuƒea le gaglãgbe abe wo Kplɔla Yesu ene