Srɔ̃ŋutsu Kple Hamemegã—Agbaawo Tsɔtsɔ Wòada Asɔ
‘Ele be dzikpɔla nanye nyɔnu ɖeka srɔ̃.’—TIMOTEO I, 3:2.
1, 2. Nukata nunɔlawo ƒe srɔ̃maɖemaɖe mesɔ ɖe Ŋɔŋlɔawo nu o?
LE ƑE alafa gbãtɔ me la, Kristotɔ nuteƒewɔlawo lé fɔ ɖe woƒe agbanɔamedzi vovovowo tsɔtsɔ wòada asɔ ŋu. Esime apostolo Paulo gblɔ be Kristotɔ si nɔ tre la “wɔe nyuie [wu]” la, ɖe wòfia be ŋutsu sia adze nyuie wu anye dzikpɔla le Kristo-hamea mea? Le nyateƒe me la, ɖe wònɔ eɖom be trenɔnɔ nanye nudidi na hamemegãwoa? (Korintotɔwo I, 7:38) Wobia tso Katoliko-nunɔlawo si be woanɔ tre. Gake Ŋɔŋlɔawo dzie nunɔlawo ƒe trenɔnɔ nɔ te ɖoa? Ɣetoɖoƒe Orthodɔks Sɔlemehawo ɖea mɔ woƒe osɔfowo zua ŋutsu srɔ̃tɔwo, gake menye woƒe bisiɔpwo ya o. Ðe ema wɔ ɖeka kple Biblia?
2 Srɔ̃tɔwoe Kristo ƒe apostolo 12 siwo wotsɔ ɖo Kristo-hamea gɔme anyii la nye. (Mateo 8:14, 15; Efesotɔwo 2:20) Paulo ŋlɔ bena: “Alo ɖe míekpɔ ŋusẽ bena, míakplɔ nɔvinyɔnu, si anye mía srɔ̃ la, anɔ nugbe yim, abe alesi apostolo bubuawo kple Aƒetɔ la nɔviwo kpakple Kefa [Petro] hã wɔna ene oa?” (Korintotɔwo I, 9:5) Agbalẽ si nye New Catholic Encyclopedia lɔ̃ ɖe edzi be “sɔlemehawoe to trenɔnɔ ƒe sea vɛ” eye be “trenɔnɔ ƒe se mebla N[ubabla] Y[eyea] ƒe subɔlawo o.” Yehowa Ðasefowo wɔna ɖe Ŋɔŋlɔawo ƒe mɔfiame dzi tsɔ wu be woakplɔ sɔlemehawo ƒe se ɖo.—Timoteo I, 4:1-3.
Hamemegãnyenye Kple Srɔ̃ɖeɖe Te Ŋu Zɔna Ðekae
3. Ŋɔŋlɔawo me nyateƒenya kawoe ɖee fia be Kristotɔ dzikpɔlawo ate ŋu anye ŋutsu srɔ̃tɔwo?
3 Le esi teƒe be Paulo nagblɔ be ele be ŋutsu siwo woaɖo dzikpɔlawoe nanye trewo la, eŋlɔ na Tito boŋ be: “Eyata megblẽ wò ɖe Kreta, bena naɖo nusiwo susɔ la teƒeteƒe, eye naɖo hamemegãwo [Helagbe, pre·sbyʹte·ros] si me woɖe nya “nunɔla” tsoe le du sia du me, abe alesi mede se na wò la ene: Amesi ke nye mokaka manɔŋutɔ, nyɔnu ɖeka srɔ̃, amesi si vi xɔsetɔ, siwo nu wometso be, wowɔa nu vlo alo womeɖoa to o la le. Elabena ele na dzikpɔla [Helagbe, e·piʹsko·pos, si me nya “bisiɔp” tso] bena, wòanye mokaka manɔŋutɔ, abe Mawu ƒe xɔnuvi ene.”—Tito 1:5-7.
4. (a) Aleke míewɔ nya be srɔ̃ɖeɖe menye nudidi na Kristotɔ dzikpɔlawo o? (b) Aleke nɔnɔmea dea tre si nye hamemegã dzi wui?
4 Gake srɔ̃ɖeɖe menye Ŋɔŋlɔawo me nudidi na hamemegãnyenye o. Yesu nɔ tre. (Efesotɔwo 1:22) Paulo si nye dzikpɔla ɖedzesi le ƒe alafa gbãtɔ me Kristo-hamea me la meɖe srɔ̃ ɣemaɣi o. (Korintotɔwo I, 7:7-9) Egbea Kristotɔ tre geɖe li siwo nye hamemegãwo. Ðewohĩ woƒe trenɔnɔ na wokpɔa ɣeyiɣi geɖe wu wɔa dzikpɔkpɔdɔwo.
‘Ŋutsu si Ðe Srɔ̃ la Le Evedomesi’
5. Ŋɔŋlɔawo me nyateƒenya ka dzie wòle be nɔviŋutsu srɔ̃tɔwo nalɔ̃ ɖo?
5 Ne Kristotɔ ŋutsu ɖe srɔ̃ la, ele be wòakpɔe adze sii be agbanɔamedzi yeye siwo axɔ yeƒe ɣeyiɣi kple susu la xɔmee yele. Biblia gblɔ be: “Amesi meɖe srɔ̃ o la, léa be na nusiwo nye Aƒetɔ la tɔ la, alesi wòawɔ adze Aƒetɔ la ŋu. Ke ŋutsu, si ɖe srɔ̃ la, léa be na xexemenuwo, alesi wòawɔ adze nyɔnu la ŋu, eye wòle evedomesi.” (Korintotɔwo I, 7:32, 33) Gɔmesese ka nue wòle evedomesi?
6, 7. (a) Nukae nye mɔ ɖeka si nu ŋutsu srɔ̃tɔ tsi “evedomesi” le? (b) Aɖaŋu kae Paulo ɖo na Kristotɔ srɔ̃tɔwo? (d) Aleke esia ate ŋu akpɔ ŋusẽ ɖe ŋutsu ƒe nyametsotso be yeaxɔ dɔdasi aɖe dzii?
6 Nu ɖekae nye be, ŋutsu si ɖe srɔ̃ megakpɔ ŋusẽ ɖe ye ŋutɔ ƒe ŋutilã dzi o. Paulo na esia me kɔ nyuie be: “Nyɔnu mekpɔ ŋusẽ ɖe ye ŋutɔ ƒe ŋutilã dzi o, negbe srɔ̃ŋutsu la ko; ke nenema ke ŋutsu hã mekpɔ ŋusẽ ɖe ye ŋutɔ ƒe ŋutilã dzi o, negbe nyɔnu la ko.” (Korintotɔwo I, 7:4) Ame aɖewo siwo le srɔ̃ɖeɖe ŋu bum abu esia nu tsɛe elabena gbɔdɔdɔ manye nu vevitɔ le woƒe srɔ̃ɖeɖe me o. Gake esi wònye Ŋɔŋlɔawo me nudidi be woanɔ agbe dzadzɛ do ŋgɔ na srɔ̃ɖeɖe ta la, Kristotɔwo menyana amesi woaɖe le etsɔme ƒe ememe nuhiahiãwo ŋutɔŋutɔ doa ŋgɔ na srɔ̃ɖeɖe o.
7 Paulo ɖee fia be ele be srɔ̃tɔ siwo ‘tsɔ susu ɖo gbɔgbɔmenuwo ŋu’ gɔ̃ hã nabu wo nɔewo ƒe gbɔdɔdɔ me nuhiahiãwo ŋu. Eɖo aɖaŋu na Kristotɔ siwo nɔ Korinto be: “Ŋutsu nawɔ nusi dzɔ la, na srɔ̃a, eye nyɔnu hã nawɔ na srɔ̃a nenema ke. Migagblẽ mia nɔewo ɖi o, negbe ne wo kpakple eve lɔ̃ halase ɣeyiɣi aɖe dzi hafi, bena miakpɔ asinu ado gbe ɖa, eye nusia megbe la miagava awɔ ɖeka, bene Satana nagate mi akpɔ le miaƒe ɖokuidzimaɖumaɖu la ŋuti o.” (Romatɔwo 8:5; Korintotɔwo I, 7:3, 5) Nublanuitɔe la, ame aɖewo wɔ ahasi le esi womewɔ ɖe aɖaŋuɖoɖo sia dzi o ta. Esi wòle alea ta la, ele be Kristotɔ srɔ̃tɔ nada nyawo kpɔ nyuie hafi axɔ dɔdasi si ana wòadzo le srɔ̃a gbɔ ɣeyiɣi didi aɖe. Ablɔɖe si wòtsɔ wɔa nui tsã esime wònye tre la megale esi o.
8, 9. (a) Nukae Paulo wɔnɛ esi wògblɔ be Kristotɔ srɔ̃tɔwo “léa be na xexemenuwo”? (b) Nuka wɔwɔ ŋue wòle be Kristotɔ srɔ̃tɔwo natsi dzi ɖo?
8 Gɔmesese ka nue woate ŋu agblɔ le be Kristotɔ ŋutsu siwo ɖe srɔ̃, kple hamemegãwo hã, “léa be na xexemenuwo [koʹsmos]”? (Korintotɔwo I, 7:33) Edze ƒã be menye xexe sia me nu vɔ̃ɖi siwo wòle be Kristotɔ vavãwo katã natsri ŋue Paulo nɔ nu ƒom tsoe o. (Petro II, 1:4; 2:18-20; Yohanes I, 2:15-17) Mawu ƒe Nya la gblɔ na mí be “míagbe mawumavɔ̃mavɔ̃ kple xexeame [ko·smi·kosʹ] nudzodzrowo, eye míanɔ anyi le ɖokuidziɖuɖu kple nu dzɔdzɔe wɔwɔ kpakple mawusosroɖa me le xexe sia me.”—Tito 2:12.
9 Eyata Kristotɔ srɔ̃tɔ “léa be na xexemenuwo” le susu sia nu be etsia dzi ɖe anyigbadzinu siwo nye srɔ̃gbenɔnɔ ƒe akpa aɖe la ŋu wòsɔ. Esia ƒe ɖewoe nye aƒe si me woanɔ, nuɖuɖu, avɔtata, modzakaɖeɖe—tsɔ kpe ɖe nu bubu geɖe siwo ŋu woalé ŋku ɖo ne ɖeviwo li ŋu. Gake le srɔ̃tɔ siwo medzi vi o gɔ̃ hã gome la, nenye be srɔ̃ɖeɖea adze edzi la, ele be srɔ̃ŋutsu kple srɔ̃nyɔnu siaa natsi dzi ɖe alesi ‘woadze’ wo srɔ̃ ‘ŋu’ la ŋuti. Esia le vevie ŋutɔ na Kristotɔ hamemegãwo ne woada asɔ le woƒe agbanɔamedziwo tsɔtsɔ me.
Srɔ̃ŋutsu Nyuiwo Kple Hamemegã Nyuiwo
10. Hafi Kristotɔ nadze azu hamemegã la, nukae wòle be nɔviawo kple egodotɔwo nate ŋu akpɔ le eŋu?
10 Togbɔ be srɔ̃ɖeɖe menye nudidi na hamemegãwo o hã la, ne Kristotɔ ŋutsu ɖe srɔ̃ hafi wokafui be woaɖoe hamemegã la, ele kokoko be wòaɖee afia be yedzea agbagba be yeanye srɔ̃ŋutsu nyui si lɔ̃a ame, le tanyenye ŋudɔwɔwɔ nyuie me. (Efesotɔwo 5:23-25, 28-31) Paulo ŋlɔ bena: “Ne ame aɖe le dzikpɔladɔ dim la, ele dɔwɔwɔ nyui dim. Azɔ la ele na dzikpɔla bena, mokaka naganɔ eŋu o: Wòanye nyɔnu ɖeka srɔ̃.” (Timoteo I, 3:1, 2) Ele be wòadze ƒã be hamemegã le eƒe ŋutete katã wɔm be yeanye srɔ̃ŋutsu nyui, ne srɔ̃a ɖanye hati Kristotɔ alo meɖanyee o hã. Le nyateƒe me la, ele be hamea godo tɔwo gɔ̃ hã nate ŋu akpɔe be eléa be na srɔ̃a hetsɔa eƒe agbanɔamedzi bubuwo nyuie. Paulo gblɔ kpe ɖe eŋu be: “Ke ele nɛ be, wòakpɔ ɖaseɖiɖi nyui atso amesiwo le egodo la hã gbɔ, bene wòagadze dzudzu kple Abosam ƒe mɔ̃tetre me o.”—Timoteo I, 3:7.
11. Nukae nyagbɔgblɔ “nyɔnu ɖeka srɔ̃” fia, eyata nuka mee wòle be hamemegãwo nakpɔ nyuie le?
11 Le nyateƒe me la, nyagbɔgblɔ si nye “nyɔnu ɖeka srɔ̃” fia be womate ŋu aɖe srɔ̃ geɖe o, gake efia anukwareɖiɖi le srɔ̃ɖeɖe me hã. (Hebritɔwo 13:4) Ele be hamemegãwo koŋ nakpɔ nyuie ne wole kpekpeɖeŋu nam nɔvinyɔnuwo le hamea me. Mele be woawo ɖeɖe woayi aɖasra nɔvinyɔnu si hiã aɖaŋuɖoɖo kple akɔfafa la kpɔ o. Anyo be hamemegã bubu, subɔsubɔdɔwɔla, alo wo srɔ̃ gɔ̃ hã nayi kpli wo ne dzideƒoname ƒe sasrãkpɔ ko wònye.—Timoteo I, 5:1, 2.
12. Nya ka nue wòle be hamemegãwo kple subɔsubɔdɔwɔlawo srɔ̃wo nadze agbagba anɔ agbe ɖo?
12 Eva eme be esime apostolo Paulo nɔ nusiwo woadi tso hamemegãwo kple subɔsubɔdɔwɔlawo si yɔm la, eɖo aɖaŋu na amesiwo wotsɔ mɔnukpɔkpɔ siawo na la srɔ̃wo hã. Eŋlɔ bena: “Nenema ke nyɔnuwo hã nalé wo ɖokui nyuie: Woaganye ameŋuzɔlawo o, woanye ame ɖɔŋuɖowo, nuteƒewɔlawo le nusianu me.” (Timoteo I, 3:11) Kristotɔ srɔ̃ŋutsu ate ŋu awɔ geɖe atsɔ akpe ɖe srɔ̃a ŋu wòawɔ nu ɖe aɖaŋuɖoɖo ma nu.
Nusiwo Ŋɔŋlɔawo Gblɔ be Woawɔ na Srɔ̃nyɔnu
13, 14. Ne menye Ðasefoe hamemegã srɔ̃ nye o hã la, nukata wòle be wòanɔ anyi kplii ahanye srɔ̃ŋutsu nyui?
13 Le nyateƒe me la, aɖaŋu sia si woɖo na hamemegãwo alo subɔsubɔdɔwɔlawo srɔ̃wo fia be srɔ̃nyɔnu siawo nye Kristotɔ ɖeadzɔgbewo. Aleae wòle le ame geɖe gome elabena wobia tso Kristotɔwo si be woaɖe srɔ̃ ‘le Aƒetɔ la me ko.’ (Korintotɔwo I, 7:39) Ke nɔviŋutsu si ɖe dzimaxɔsetɔ xoxo hafi tsɔ eƒe agbe ɖe adzɔgbe na Yehowa, alo amesi srɔ̃ ge le nyateƒea me esi menye eƒe vodadae o ya ɖe?
14 Esia ɖeɖe maxe mɔ nɛ be mazu hamemegã o. Ke hã la, mate ŋu anɔ te ɖe esia dzi aklã tso srɔ̃a gbɔ le esi eƒe dzixɔsewo mesɔ kple etɔ ta o. Paulo ɖo aɖaŋu be: “Nenye ɖe wobla wò ɖe nyɔnu ŋuti la, megadi etutu o.” (Korintotɔwo I, 7:27) Egblɔ yi edzi be: “Ne nyɔnu, si mexɔ se o la, le nɔvi aɖe si, eye wòdze nyɔnua ŋu bena, yeanɔ egbɔ la, negagbee o. Ke ne amesi mexɔ se o la, gbe srɔ̃a la, negbee faa! Nɔviŋutsu alo nɔvinyɔnu la menye kluvi le nya siawo ƒomevi me o. Ke Mawu yɔ mí le ŋutifafa me. Elabena wò nyɔnu, aleke nènyae bena, àte ŋu axɔ srɔ̃wò ɖe agbe mahã? Alo wò ŋutsu, aleke nènyae bena, àte ŋu axɔ srɔ̃wò ɖe agbe mahã?” (Korintotɔwo I, 7:12, 15, 16) Ne menye Ðasefoe hamemegã srɔ̃ nye o hã la, ele be wòanye srɔ̃ŋutsu nyui.
15. Aɖaŋu kae apostolo Petro ɖo na Kristotɔ srɔ̃ŋutsuwo, eye nukae ate ŋu ado tso eme ne hamemegã zu srɔ̃ŋutsu si ŋea aɖaba ƒua nu dzi?
15 Ne haxɔsetɔe Kristotɔ hamemegã srɔ̃ nye alo meɖanyee o, ele be wòakpɔe adze sii be srɔ̃anyɔnu hiã eƒe beléle lɔlɔ̃tɔe. Apostolo Petro ŋlɔ bena: “Nenema ke, mi ŋutsuwo la, minɔ anyi kple nyɔnuwo [mia srɔ̃wo] le nunya me, esi wonye gbɔdzɔgbɔdzɔtɔwo wu la ŋuti, eye mitsɔ bubu na wo; elabena woawo hã wonye agbe ƒe amenuveve hadomenyilawo, bene miagaxe mɔ na miaƒe gbedodoɖawo o.” (Petro I, 3:7) Srɔ̃ŋutsu si ɖonɛ koŋ gbea beléle na srɔ̃a la le eya ŋutɔ ƒe ƒomedodo kple Yehowa me gblẽm; ate ŋu axe Yehowa gbɔ yiyi ƒe mɔ nɛ abe “alilikpo [ene] ale be gbedodoɖa aɖeke [maɖi] go ɖe egodo o.” (Konyifahawo 3:44) Esia ate ŋu ana magadze anye Kristotɔ dzikpɔla o.
16. Nya vevi kae le Paulo ƒe nyawo me, gake aleke wòle be hamemegãwo nabu le esia ŋu?
16 Abe alesi míede dzesii ene la, nu vevi si le Paulo ƒe nyawo mee nye be ne ŋutsu ɖe srɔ̃ la, ablɔɖe si nɔ esi tsã esime wònye ŋutsu tre si ɖe mɔ nɛ ‘wònɔ Aƒetɔ la ŋu tututu susuhenuwo manɔmee’ la ƒe geɖe meganɔa esi o. (Korintotɔwo I, 7:35) Nyatakakawo ɖee fia be hamemegã srɔ̃tɔ aɖewo medana sɔna ɣesiaɣi le Paulo ƒe nya siwo tso gbɔgbɔ me la ŋububu me o. Esi wodi be yewoawɔ nusi wosusu be ele be hamemegã nyuiwo nawɔ ta la, ɖewohĩ woaŋe aɖaba aƒu woƒe srɔ̃ŋutsudɔ aɖewo dzi. Asesẽ na wo dometɔ aɖewo be woagbe hamea me mɔnukpɔkpɔ aɖe xɔxɔ, ne edze ƒã be exɔxɔ agblẽ nu le wo srɔ̃wo ŋu le gbɔgbɔ me gɔ̃ hã. Wosea vivi le mɔnukpɔkpɔ siwo le srɔ̃ɖeɖe me la me, gake ɖe wolɔ̃na tsɔa agbanɔamedzi siwo le eme la?
17. Nukae dzɔ ɖe srɔ̃nyɔnu aɖewo dzi, eye aleke woate ŋu axe mɔ ɖe esia nu hafi?
17 Nyateƒee, hamemegã veviedola dze na kafukafu. Gake ɖe Kristotɔ da sɔ ne ewɔa hamea me dɔwo evɔ mewɔa nusiwo Ŋɔŋlɔawo bia be wòawɔ na srɔ̃a oa? Ne hamemegã si da sɔ di be yeado alɔ amesiwo le hamea me la, abu srɔ̃a ƒe gbɔgbɔmenyenye hã ŋu. Hamemegã aɖewo srɔ̃wo gbɔdzɔ le gbɔgbɔ me, eye ‘nu gblẽ le’ wo dometɔ aɖewo ‘ŋu’ le gbɔgbɔ me. (Timoteo I, 1:19) Togbɔ be ele be srɔ̃nyɔnu ŋutɔe awɔ eƒe xɔxɔdɔ hã la, le ame aɖewo gome la, woate ŋu axe mɔ ɖe gbɔgbɔmekuxia nu hafi ne hamemegã la ‘nyia’ srɔ̃a ‘hekpɔa edzi,’ “abe alesi Aƒetɔ la wɔna na hame la ene.” (Efesotɔwo 5:28, 29) Ele be hamemegãwo nakpɔ egbɔ be ‘yewokpɔa yewo ɖokui kple alẽha blibo la katã ta.’ (Dɔwɔwɔwo 20:28) Wo srɔ̃wo hã le eme ne srɔ̃tɔwoe wonye.
“Xaxa le Ŋutilã Me”
18. Nukae nye “xaxa” si Kristotɔ srɔ̃tɔwo kpɔna la ƒe akpa aɖewo, eye aleke esia ate ŋu akpɔ ŋusẽ ɖe hamemegã ƒe dɔwɔnawo dzii?
18 Apostoloa ŋlɔ hã be: “Ne ɖetugbi ɖe srɔ̃ la, mewɔ nuvɔ̃ o; ke nenem me siawo akpɔ xaxa le ŋutilã me. Ke nye la ɖe mekpɔ mia nublanui.” (Korintotɔwo I, 7:28) Paulo di be yeana amesiwo ate ŋu asrɔ̃ trenɔnɔ ƒe kpɔɖeŋu si yeɖo la navo tso dzimaɖitsitsi siwo nɔa srɔ̃ɖeɖe me godoo la me. Le srɔ̃tɔ siwo si vi mele o gɔ̃ hã gome la, dzimaɖitsitsi siawo ƒe ɖewo ate ŋu anye lãmegbegblẽwo alo gakuxiwo kple agba siwo le wo dzi le Ŋɔŋlɔawo me be woakpɔ wo srɔ̃ dzila siwo tsi la dzi. (Timoteo I, 5:4, 8) Ele be hamemegã nanye kpɔɖeŋuɖola adze ŋgɔ agbanɔamedzi siawo, eye ɣeaɖewoɣi la, esia ana Kristotɔ dzikpɔla ƒe dɔ siwo wòwɔna dzi naɖe kpɔtɔ. Dzidzɔtɔe la, hamemegã akpa gãtɔ le agbagba dzem ŋutɔ le woƒe ƒome kple hamea me agbanɔamedziwo tsɔtsɔ me.
19. Nukae Paulo wɔnɛ esi wògblɔ be: “Amesiwo si nyɔnu le la, nanɔ abe ɖe ɖeke mele wo si o ene”?
19 Paulo gagblɔ be: “Ɣeyiɣi la le kpuie; eyata azɔ la amesiwo si nyɔnu le la, nanɔ abe ɖe ɖeke mele wo si o ene.” (Korintotɔwo I, 7:29) Le nyateƒe me le nya siwo wòŋlɔ na Korintotɔwo xoxo le ta sia me ta la, edze ƒã be mefia be ele be srɔ̃tɔ Kristotɔwo nagblẽ wo srɔ̃nyɔnuwo ɖi le mɔ aɖewo nu o. (Korintotɔwo I, 7:2, 3, 33) Eɖe nusi wòwɔnɛ fia esime wòŋlɔ bena: “Amesiwo wɔa xexe sia me ŋuti dɔ la, nanɔ abe ɖe womele eŋuti dɔ wɔm o ene; elabena xexe sia me ƒe nɔnɔme nu va yina.” (Korintotɔwo I, 7:31) “Xexeame va yina,” eye ele nenema fifia wu alesi wònɔ le Paulo alo apostolo Yohanes ƒe ŋkekea me gɔ̃ hã. (Yohanes I, 2:15-17) Eyata Kristotɔ srɔ̃tɔ siwo kpɔe be ehiã be yewoatsɔ nanewo asa vɔe adze Kristo yome la mate ŋu ase vivi le srɔ̃ɖeɖe me dzidzɔkpɔkpɔ kple mɔnukpɔkpɔwo me ɖaa o.—Korintotɔwo I, 7:5.
Srɔ̃nyɔnu Siwo Tsɔa Wo Ðokui Saa Vɔe
20, 21. (a) Nukawoe Kristotɔ srɔ̃nyɔnu geɖe lɔ̃na faa tsɔ saa vɔe? (b) Nukae srɔ̃nyɔnu ate ŋu akpɔ mɔ wòasɔ be ye srɔ̃ nawɔ, ne hamemegãe wònye gɔ̃ hã?
20 Abe alesi hamemegãwo tsɔa nuwo saa vɔe ale be wòaɖe vi na ame bubuwo ene la, hamemegã geɖe srɔ̃wo hã dzea agbagba be yewoada asɔ le srɔ̃ɖeɖe me agbanɔamedziwo tsɔtsɔ me be yewoate ŋu awɔ Fiaɖuƒea ƒe dɔ veviwo. Edzɔa dzi na Kristotɔ nyɔnu akpe geɖe be woawɔ nu aduadu kple wo srɔ̃wo ale be woate ŋu awɔ woƒe dzikpɔkpɔdɔwo. Yehowa lɔ̃a wo ɖe esia ta, eye eyraa nɔnɔme nyui si woɖena fiana. (Filemon 25) Gake Paulo ƒe aɖaŋuɖoɖo si da sɔ la fia be dzikpɔlawo srɔ̃wo ate ŋu akpɔ mɔ wòasɔ be wo srɔ̃ nakpɔ vovo ɖe yewo ŋu ahakpɔ yewo gbɔ alesi dze. Enye hamemegãwo ƒe dɔ si le Ŋɔŋlɔawo me be woadi ɣeyiɣi si sɔ anɔ wo srɔ̃wo gbɔ ale be woada asɔ le srɔ̃ŋutsu kple dzikpɔla ƒe agbawo tsɔtsɔ me.
21 Ke ne Kristotɔ hamemegã nye vifofo hafi ganye srɔ̃ŋutsu ya ɖe? Esia dzia eƒe agbanɔamedziwo ɖe edzi eye eva hiãna be wòawɔ dzikpɔkpɔdɔ le go bubu aɖe me akpee, abe alesi míele ekpɔ ge le nyati si kplɔe ɖo me ene.
Numetoto
◻ Ŋɔŋlɔawo me nyateƒenya kawoe ɖee fia be Kristotɔ dzikpɔla ate ŋu anye ŋutsu srɔ̃tɔ?
◻ Ne hamemegã si nye tre ɖe srɔ̃ la, nukae wòle be wòanɔ susu me nɛ?
◻ Mɔ kawo nue Kristotɔ si ɖe srɔ̃ “léa be na xexemenuwo” le?
◻ Aleke dzikpɔlawo srɔ̃ geɖe ɖea ɖokuitsɔtsɔsavɔ ƒe gbɔgbɔ nyui fianae?
[Nɔnɔmetata si le axa 17]
Togbɔ be teokrasidɔwo ana hamemegã naxaxa hã la, ele be wòakpɔ vovo ɖe srɔ̃a ŋu lɔlɔ̃tɔe