Trenɔnɔ—Dɔwɔwɔ Susuhenuwo Manɔmee Ƒe Mɔnue Wònye
“[Efia] Aƒetɔ la ŋunɔnɔ tututu . . . alesi dze, eye naneke nagahe mi ɖa o.”—KORINTOTƆWO I, 7:35.
1. Nyatakaka gbegblẽ kae Paulo xɔ le Kristotɔ siwo nɔ Korinto ŋu?
APOSTOLO Paulo tsi dzi ɖe nɔvia Kristotɔ siwo nɔ Korinto le Greece ŋu ŋutɔ. Anɔ abe ƒe atɔ̃ enye ema la, eɖo hamea anyi le du deŋgɔ si xɔ ŋkɔ le agbegbegblẽnɔnɔ me la me. Fifia, le ƒe 55 M.Ŋ. me lɔƒo, esime wònɔ Efeso le Asia Sue la, exɔ nyatakaka gbegblẽwo tso Korinto le amedzidede ƒe mamã si ɖo wo dome kple agbegbegblẽnɔnɔ ŋu nya vɔ̃ɖi aɖe si dzi womiã nu ɖo ŋu. Tsɔ kpe ɖe eŋu la, Paulo xɔ lɛta tso Korinto Kristotɔwo gbɔ be neɖo aɖaŋu na yewo le gbɔdɔdɔ ƒe nuwɔnawo, trenɔnɔ, srɔ̃ɖeɖe, kaklã, kple srɔ̃gbugbɔgaɖe ŋu.
2. Aleke wòdze ƒãe be agbegbegblẽnɔnɔ si bɔ ɖe Korinto la nɔ nu gblẽm le Kristotɔ siwo nɔ du ma me ŋu?
2 Edze abe agbegbegblẽnɔnɔ vɔ̃ɖi si bɔ ɖe Korinto la nɔ nu gblẽm le afima hamea ŋu le mɔ eve nu. Kristotɔ aɖewo ɖe ŋu ɖi le agbegbegblẽnɔnɔ ŋu eye woɖe mɔ ɖe eŋu. (Korintotɔwo I, 5:1; 6:15-17) Edze ƒã be gbɔdɔdɔ ƒe vivisese si xɔ aƒe ɖe dua me la wɔe be ame aɖewo ɖo aɖaŋu si gbɔ eme be anyo be woatsri gbɔdɔdɔnuwɔna ɖesiaɖe, le srɔ̃tɔwo gɔ̃ hã dome.—Korintotɔwo I, 7:5.
3. Nya kawo ŋue Paulo ƒo nu tsoe gbã le lɛta gbãtɔ si wòŋlɔ na Korintotɔwo me?
3 Le lɛta legbee si Paulo ŋlɔ na Korintotɔwo me la, eƒo nu tso ɖekamawɔmawɔ ƒe kuxia ŋu gbã. (Korintotɔwo I, ta 1-4) Exlɔ̃ nu wo be woatsri amewo yomenɔnɔ, si ate ŋu ahe mamã vɔ̃ɖiwo vɛ. Ele be woawɔ ɖeka anye “Mawu ƒe hadɔwɔlawo.” Emegbe ena wo mɔfiame tɔxɛwo le alesi woana hamea nanɔ dzadzɛ ŋu. (Ta 5, 6) Azɔ apostoloa trɔ ɖe woƒe lɛtaa ŋu.
Wokafu Trenɔnɔ
4. Nukae Paulo wɔnɛ esi wògblɔ be “enyo na ame bena, wòagade asi nyɔnu ŋu o”?
4 Edze egɔme be: “Nusi ŋuti mieŋlɔ nya nam le la, mebe: Enyo na ame bena, wòagade asi nyɔnu ŋu o.” (Korintotɔwo I, 7:1) Nya si wògblɔ le afisia be “wòagade asi nyɔnu ŋu o” la fia be womaka asi nyɔnu ŋu be woatsɔ aɖi kɔ na gbɔdɔdɔ ƒe dzodzro o. Esi Paulo bu fɔ ahasiwɔwɔ xoxo ta la, fifia gbɔdɔdɔ le srɔ̃ɖeɖe ƒe ɖoɖoa me ŋue wònɔ nu ƒom tsoe. Eyata fifia Paulo nɔ trenɔnɔ kafum. (Korintotɔwo I, 6:9, 16, 18; tsɔe sɔ kple Mose I, 20:6; Lododowo 6:29.) Esi wòyi ŋgɔ vie la, eŋlɔ bena: “Ke megblɔ na trewo kple ahosiwo bena, ne woanɔ abe alesi nye hã mele ene la, ekema anyo na wo.” (Korintotɔwo I, 7:8) Srɔ̃ menɔ Paulo si o, ɖewohĩ srɔ̃a ku.—Korintotɔwo I, 9:5.
5, 6. (a) Nukata eme kɔ be Paulo menɔ ekafum be woanɔ saɖagagbe o? (b) Nukata Paulo kafu trenɔnɔ?
5 Anɔ eme be Kristotɔ siwo nɔ Korinto va nya nu tso Hela-xexemenunya, si yomenɔla aɖewo kafu ameɖokuimamlã, alo nugbegbe le ame ɖokui gbɔ vevie la ŋu. Ðe wòanye ema tae Korintotɔwo bia Paulo be “anyo” be Kristotɔwo natsri gbɔdɔdɔnuwɔna keŋkeŋ hã? Hela-xexemenunya medze le ŋuɖoɖo si Paulo na la me o. (Kolosetɔwo 2:8) Etɔ to vovo tso Katoliko-mawunyaŋutinunyalawo tɔ gbɔ elabena teƒe aɖeke meli si wòkafu trenɔnɔ ɖokuidzizizitɔe le saɖagaxɔ alo nyɔnuwo ƒe saɖagaxɔ aɖeke me, abe ɖe trewo ŋu kɔ etɔxɛe eye woate ŋu ato woƒe agbenɔnɔ kple gbedodoɖa dzi ana woa ŋutɔwo woakpɔ ɖeɖe ene o.
6 Paulo kafu trenɔnɔ “le hiãkame, si [li, NW] fifi la ŋuti.” (Korintotɔwo I, 7:26) Ðewohĩ ɣeyiɣi sesẽ siwo me tom Kristotɔwo nɔ si srɔ̃ɖeɖe ate ŋu ana wòasesẽ ɖe edzi lae wòwɔnɛ. (Korintotɔwo I, 7:28) Aɖaŋu si wòɖo na Kristotɔ trewoe nye be: “Ne woanɔ abe alesi nye hã mele ene la, ekema anyo na wo.” Egblɔ na ŋutsu siwo srɔ̃ ku be: “Ne wotu wò le nyɔnu ŋuti la, megadi srɔ̃ o.” Eŋlɔ le Kristotɔ ahosi ŋu be: “Nenye be, enɔ anyi nenema srɔ̃maɖemaɖee la, [akpɔ dzidzɔ, NW] awu le nye tamesusu nu. Ke mebuna bena, Mawu ƒe [gbɔgbɔ, NW] la le nye hã menye.”—Korintotɔwo I, 7:8, 27, 40.
Womezii Ðe Ame Dzi be Wòanɔ Tre O
7, 8. Nukae fia be Paulo mezii ɖe Kristotɔ aɖeke dzi be wòanɔ tre o?
7 Ðikekemanɔmee la, Yehowa ƒe gbɔgbɔ kɔkɔe ye fia mɔ Paulo esime wòɖo aɖaŋu sia. Dadasɔ kple ɖokuidziɖuɖu dze le nya siwo katã wògblɔ le trenɔnɔ kple srɔ̃ɖeɖe ŋu me. Mewɔe nuteƒewɔwɔ alo nuteƒemawɔmawɔ ƒe nya o. Ke boŋ tiatiawɔblɔɖe ye wònye, eye eda sɔ esi wòkafu trenɔnɔ na amesiwo ate ŋu anɔ dzadzɛ le nɔnɔme ma me.
8 Esi Paulo gblɔ be “enyo na ame bena, wòagade asi nyɔnu ŋu o” megbe teti la, egagblɔ be: “Ke le ahasiwɔwɔwo ŋuti la nyɔnu nanɔ ŋutsu sia ŋutsu si, eye ŋutsu nanɔ nyɔnu sia nyɔnu si.” (Korintotɔwo I, 7:1, 2) Esi wòɖo aɖaŋu na trewo kple ahosiwo be “woanɔ abe alesi nye hã mele ene” vɔ la, ewɔ kaba gblɔ kpe ɖe eŋu be: “Ke ne womate ŋu aɖu wo ɖokui dzi o la, woaɖe srɔ̃, elabena srɔ̃ɖeɖe nyo wu fieŋufieŋu.” (Korintotɔwo I, 7:8, 9) Aɖaŋu si wòɖo na ŋutsu siwo srɔ̃ ku hãe nye be: “Megadi srɔ̃ o. Ke ne èɖe srɔ̃ hã la, mèwɔ nuvɔ̃ o.” (Korintotɔwo I, 7:27, 28) Tiatiawɔblɔɖe dze le aɖaŋuɖoɖo sia si da sɔ la me.
9. Le Yesu kple Paulo ƒe nya nu la, aleke srɔ̃ɖeɖe kple trenɔnɔ siaa nye Mawu ƒe nunanawoe?
9 Paulo ɖee fia be srɔ̃ɖeɖe kple trenɔnɔ siaa nye Mawu ƒe nunana. “Mele didim bena, amewo katã nanɔ anyi, abe alesi nye hã mele ene; gake amesiame kpɔ ye ŋutɔ ƒe amenuvevenunana tso Mawu gbɔ, amea ɖeka kpɔ esi, eye ame bubu hã kpɔ bubu.” (Korintotɔwo I, 7:7) Ðikeke mele eme o be nya si Yesu gblɔ lae nɔ eƒe susu me. Esi Yesu na eme kɔ be Mawu gbɔe srɔ̃ɖeɖe tso vɔ megbe la, eɖee fia be trenɔnɔ faa ɖe Fiaɖuƒedɔwo wɔwɔ ta nye nunana tɔxɛ: “Menye amewo katãe [ate ŋu awɔ nya sia ŋudɔ, NW] o, negbe amesiwo wona la ko. Elabena ame tata aɖewo li, siwo wodzi wo nenema tso keke wo dada ƒe dɔ me ke; eye ame tata aɖewo li, siwo amewo ta wo; eye ame tata aɖewo li, siwo ta wo ɖokui le dziƒofiaɖuƒe la ŋuti. Amesi ke ate [ŋui la newɔ eŋudɔ, NW].”—Mateo 19:4-6, 11, 12.
Trenɔnɔ ƒe Nunana la Ŋudɔwɔwɔ
10. Aleke woate ŋu ‘awɔ’ trenɔnɔ ƒe nunana la ‘ŋudɔe’?
10 Togbɔ be Yesu kple Paulo gblɔ be trenɔnɔ nye “nunana” hã la, wo dometɔ aɖeke megblɔ be enye nukununana si le ame aɖewo ko si o. Yesu gblɔ be ‘menye amewo katãe wɔa’ nunana ma ‘ŋudɔ o,’ eye exlɔ̃ nu amesiwo ate ŋui be ‘woawɔ eŋudɔ,’ eye Yesu kple Paulo wɔ nenema. Nyateƒee, Paulo ŋlɔ bena: “Srɔ̃ɖeɖe nyo wu fieŋufieŋu,” gake amesiwo ‘mate ŋu aɖu wo ɖokui dzi o’ ŋue wònɔ nu ƒom tsoe. (Korintotɔwo I, 7:9) Paulo ɖee fia le lɛta siwo wòŋlɔ do ŋgɔ me be Kristotɔwo ate ŋu aƒo asa na fieŋufieŋui. (Galatiatɔwo 5:16, 22-24) Zɔzɔ le gbɔgbɔ me fia be míana Yehowa ƒe gbɔgbɔ nakplɔ mí le afɔ ɖesiaɖe si míaɖe me. Ðe Kristotɔ sɔhɛwo ate ŋu awɔ esia? Ẽ, ne wowɔ ɖe Yehowa ƒe Nya la dzi pɛpɛpɛ. Hakpala la ŋlɔ bena: “Aleke ɖekakpui [alo ɖetugbi] alé eƒe mɔ atsɔ fɔɖiɖi manɔmee? Ne elé ŋku ɖe eɖokui ŋu ɖe wò nya la nu.”—Psalmo 119:9.
11. Nukae wòfia be ‘woazɔ le gbɔgbɔ me’?
11 Esia bia be míanɔ ŋudzɔ ɖe mɔɖeɖeɖenuŋu ƒe susu siwo wokakana toa television dzi wɔnawo, sinimawo, magazine me nyatiwo, agbalẽwo, kple hagbewo me la ŋu. Ŋutilãmesusuwoe esiawo nye. Ele be Kristotɔ ɖekakpui alo ɖetugbi si di be yeanɔ tre la “[nazɔ, menye] le ŋutilã nu o, negbe le Gbɔgbɔ nu ko . . . Elabena amesiwo nɔa anyi le ŋutilã nu la, ŋutilã ƒe nuwo wodina; ke amesiwo nɔa anyi le Gbɔgbɔ nu la, gbɔgbɔ me nuwo wodina.” (Romatɔwo 8:4, 5, míawoe te gbe ɖe edzi.) Gbɔgbɔa ƒe nuwo nye nusiwo le dzɔdzɔe, dzadzɛ, nusiwo dze na lɔlɔ̃, kple nudzeamewɔwɔ. Anyo be Kristotɔ sɔhɛ kple ame tsitsiwo siaa ‘nayi edzi asusu nusiawo ŋuti.’—Filipitɔwo 4:8, 9.
12. Nuka koŋ trenɔnɔ ƒe nunana la ŋudɔwɔwɔ bia?
12 Nusi koŋ ana woate ŋu awɔ trenɔnɔ ƒe nunana la ŋudɔe nye be woatsɔ dzi aɖo taɖodzinu ma ŋu eye woado gbe ɖa abia Yehowa ƒe kpekpeɖeŋu le eminyaminyã me. (Filipitɔwo 4:6, 7) Paulo ŋlɔ bena: “Amesi tsi tre sesĩe le eƒe dzi me, eye naneke mezi edzi o, ke boŋ wòkpɔ ŋusẽ ɖe ye ŋutɔ ƒe lɔlɔ̃nu dzi, eye wòɖo esia le eƒe dzi me bena, yeadzra yeƒe ɖetugbia ɖo srɔ̃maɖemaɖee la, eya awɔe nyuie. Eyata amesi tsɔ eƒe ɖetugbi na woɖe la, wɔe nyuie; ke amesi metsɔe na woɖe o la, awɔe nyuie awu.”—Korintotɔwo I, 7:37, 38.
Trenɔnɔ si Ŋu Taɖodzinu Le
13, 14. (a) Aleke Paulo tsɔ Kristotɔ trewo kple srɔ̃tɔwo sɔ kple wo nɔewoe? (b) Aleke koe Kristotɔ tre ate ŋu ‘awɔe nyuie wu’ srɔ̃tɔwo?
13 Menye trenɔnɔ ŋutɔe dea bubu ame ŋu o. Ekema susu ka nue woate ŋu agblɔ le be ‘enyo wu’? Alesi wozãa ablɔɖe si wòhena vɛ la koŋ dzie wònɔa te ɖo. Paulo ŋlɔ bena: “Ke mele didim be, miagakpɔ fuɖeɖe aɖeke o. Amesi meɖe srɔ̃ o la, léa be na nusiwo nye Aƒetɔ la tɔ la, alesi wòawɔ adze Aƒetɔ la ŋu. Ke ŋutsu, si ɖe srɔ̃ la, léa be na xexemenuwo, alesi wòawɔ adze nyɔnu la ŋu, eye wòle evedomesi. Nenema ke nyɔnu, si ɖe srɔ̃ la, kple ɖetugbi hã wole; nyɔnu, si si srɔ̃ mele o la, léa be na nusiwo nye Aƒetɔ la tɔ la, bena wòanɔ kɔkɔe le ŋutilã kple gbɔgbɔ la me; ke nyɔnu, si ɖe srɔ̃ la, léa be na xexe sia me nuwo, alesi wòawɔ adze ŋutsu la ŋu. Ke megblɔ esia le mia ŋutɔwo miaƒe viɖe ta, menye bene maɖe mi kple ka o; ke boŋ bene mianɔ kɔnuwɔwɔ nyui kple Aƒetɔ ŋunɔnɔ tututu dzi, alesi dze, eye naneke nagahe mi ɖa o.”—Korintotɔwo I, 7:32-35.
14 Kristotɔ tre si zãa eƒe trenɔnɔ le ɖokuitɔdidi ƒe taɖodzinuwo minyaminyã me la mewɔe ‘nyuie wu’ Kristotɔ srɔ̃tɔwo o. Ele tre, menye ‘le fiaɖuƒe la ŋuti’ o, ke le eya ŋutɔ ƒe susuwo ta. (Mateo 19:12) Ele be ŋutsu alo nyɔnu si meɖe srɔ̃ o ‘nalé be na nusiwo nye Aƒetɔ la tɔ,’ wòadi vevie be ‘yeadze Aƒetɔ la ŋu,’ eye ‘wòanɔ Aƒetɔ la ŋu tututu alesi dze, eye naneke nagahee ɖa o.’ Esia fia be woatsɔ susu aɖo Yehowa kple Kristo Yesu subɔsubɔ ɖeɖeko dzi naneke nagahe wo ɖa o. Esia wɔwɔ koe ana Kristotɔ ŋutsu kple nyɔnu trewo nawɔe “nyuie awu” Kristotɔ srɔ̃tɔwo.
Dɔwɔwɔ Susuhenuwo Manɔmee
15. Nu vevi kae le nya si Paulo gblɔ le Korintotɔwo I ta 7 me?
15 Nya si koŋ Paulo di be yeagblɔ le ta sia mee nye si: Togbɔ be srɔ̃ɖeɖe sɔ eye wònyo na ame aɖewo le nɔnɔme aɖewo ta hã la, ɖikeke mele eme o be trenɔnɔ ɖea vi geɖe wu na Kristotɔ ŋutsu alo nyɔnu si di be yeasubɔ Yehowa bene nuwo nagahe eƒe susu boo o. Togbɔ be srɔ̃tɔ tsi “evedomesi” hã la, Kristotɔ tre ya vo atsɔ eƒe susu aɖo “nusiwo nye Aƒetɔ la tɔ” ŋu.
16, 17. Aleke Kristotɔ tre awɔ atsɔ susu aɖo “nusiwo nye Aƒetɔ la tɔ” ŋu nyuie wu?
16 Nukawoe nye Aƒetɔ la ƒe nu siwo Kristotɔ tre ate ŋu alé be na nyuie wu srɔ̃tɔwo? Le go bubu me la, Yesu ƒo nu tso nusiwo nye “Mawu tɔ” ŋu—nusiwo Kristotɔ mate ŋu atsɔ na Kaisaro o. (Mateo 22:21) Nusiawo ku ɖe Kristotɔ ƒe agbenɔnɔ, tadedeagu, kple subɔsubɔdɔ ŋu vevie.—Mateo 4:10; Romatɔwo 14:8; Korintotɔwo II, 2:17; 3:5, 6; 4:1.
17 Trewo te ŋu zãa woƒe ɣeyiɣi le Yehowa subɔsubɔ me wu, si ate ŋu aɖe vi le woƒe gbɔgbɔmenyenye kple alesi wowɔa subɔsubɔdɔa me. Woate ŋu azã ɣeyiɣi geɖe wu ɖe ɖokuisinusɔsrɔ̃ kple ŋugbledede ŋu. Ele bɔbɔe na Kristotɔ trewo be woatsɔ Biblia xexlẽ ade woƒe ɖoɖowɔɖi me geɖe wu srɔ̃tɔwo. Woate ŋu adzra ɖo ɖe kpekpewo kple gbeadzisubɔsubɔ ŋu nyuie wu. Esia katã nye ‘woa ŋutɔwo ƒe viɖe.’—Korintotɔwo I, 7:35.
18. Aleke nɔviŋutsu tre geɖe ate ŋu aɖee fia be yewodi be yewoasubɔ Yehowa ‘susuhenuwo manɔmee’?
18 Nɔviŋutsu tre geɖe siwo nye subɔsubɔdɔwɔlawo xoxo la ate ŋu agblɔ na Yehowa be: “Nyee nye esi, dɔm!” (Yesaya 6:8) Woate ŋu abia be yewoade Subɔsubɔdɔ ƒe Hehenasuku, si woɖo na subɔsubɔdɔwɔla kple hamemegã trewo, amesiwo vo asubɔ le afisi hiahiã lolo wu le. Nɔviŋutsu siwo mate ŋu adzo le woƒe hamea me o gɔ̃ hã ate ŋu atsɔ wo ɖokui ana anye subɔsubɔdɔwɔlawo alo hamemegãwo asubɔ wo nɔviwo.—Filipitɔwo 2:20-23.
19. Aleke woyra nɔvinyɔnu tre geɖewoe, eye nukae nye mɔ ɖeka si nu woate ŋu anye yayra na hameawo le?
19 Nɔvinyɔnu tre siwo si srɔ̃ mele woagblɔ woƒe kuxiwo kple dzimenyawo na o la ate ŋu ‘atsɔ woƒe nyawo adro ɖe Yehowa dzi’ kaba wu. (Psalmo 55:23; Korintotɔwo I, 11:3) Esia le vevie vevietɔ le nɔvinyɔnu siwo le tre le lɔlɔ̃ na Yehowa ta la gome. Ne emegbe wova ɖe srɔ̃ la, woaɖee ‘le Aƒetɔ la me ko,’ si fia be amesi ɖe adzɔgbe na Yehowa koe woaɖe. (Korintotɔwo I, 7:39) Edzɔa dzi na hamemegãwo be nɔvinyɔnu trewo le woƒe hamewo me; amesiawo srãa dɔnɔwo kple ame tsitsiwo kpɔna henaa kpekpeɖeŋu wo. Esia hea dzidzɔ vɛ na amesiwo katã ŋu nya la ku ɖo.—Dɔwɔwɔwo 20:35.
20. Aleke Kristotɔ geɖe le eɖem fia be ‘yewole Aƒetɔ la ŋu tututu susuhenuwo manɔmee’?
20 Kristotɔ sɔhɛ geɖe wɔ ɖoɖo ɖe woƒe agbenɔnɔ ŋu ale be woanɔ “Aƒetɔ ŋunɔnɔ tututu dzi, alesi dze, eye naneke nagahe [wo] ɖa o.” (Korintotɔwo I, 7:35) Wozu ɣeyiɣiawo katã ƒe subɔla mɔɖelawo, dutanyanyuigblɔlawo, alo le Gbetakpɔxɔ Habɔbɔa ƒe alɔdzedɔwɔƒeawo dometɔ ɖeka le Yehowa subɔm. Eye ƒuƒoƒo kpɔdzidzɔ ka gbegbe enye si wonye! Aleke gbegbe woƒe mía dome nɔnɔ tua mí ɖoe enye si! Vavãe, wole “abe zãmu . . . ene” le Yehowa kple Yesu ƒe ŋkume.—Psalmo 110:3.
Menye Trenɔnɔ Ðaa ƒe Atamkaka Ye O
21. (a) Nukata eme kɔ be Paulo mede dzi ƒo be woaka trenɔnɔ ƒe atam o? (b) Nukae wòfia esime wògblɔ be “megakpɔtɔ nye ɖetugbi dzaa o”?
21 Nya vevi si le Paulo ƒe aɖaŋuɖoɖoa mee nye be “anyo” be Kristotɔwo nawɔ ɖoɖo ɖe woƒe agbe ŋu anɔ tre. (Korintotɔwo I, 7:1, 8, 26, 37) Gake mede dzi ƒo na wo le mɔ aɖeke nu be woaka trenɔnɔ ƒe atam o. Ke eŋlɔ boŋ be: “Ne ame aɖe susu be, yemawɔ nyuie ɖe yeƒe ɖetugbi ŋuti o, nenye be, [megakpɔtɔ nye ɖetugbi dzaa o, NW] eye ne ele vevie azɔ be, wòaɖe srɔ̃ la, ekema nusi dim wòle la, newɔe; mewɔ nuvɔ̃ o, nena wòaɖe srɔ̃.” (Korintotɔwo I, 7:36) Helagbe me nya ɖeka (hy·peʹra·kmos) si gɔme woɖe be “megakpɔtɔ nye ɖetugbi dzaa o” la gɔmee nye “to kɔkɔƒe kekeake ŋu” le nya la ŋutɔŋutɔ nu eye eku ɖe alesi woato gbɔdɔdɔ ƒe dzodzro sesẽ ƒe ɣeyiɣi me ado. Eyata amesiwo tsɔ ƒe geɖe nɔ tre eye mlɔeba wokpɔe be ele be yewoaɖe srɔ̃ la vo keŋkeŋ aɖe haxɔsetɔ aɖe.—Korintotɔwo II, 6:14.
22. Nukata wòɖea vi le go sia go me ne Kristotɔ meɖe srɔ̃ kaba akpa o?
22 Ƒe siwo Kristotɔ sɔhɛ tsɔ subɔa Yehowa susuhenuwo manɔmee nye dzadzraɖo ɖe etsɔme ŋu nunyatɔe. Ena nunya ŋutɔŋutɔ, nuteƒekpɔkpɔ, kple nugɔmesese sua wo si. (Lododowo 1:3, 4) Amesi nɔ tre le Fiaɖuƒea ta asu te nyuie wu atsɔ srɔ̃gbenɔnɔ kple ɖewohĩ dzilanyenye ƒe agbanɔamedziwo ne emegbe eɖoe nenema.
23. Nukae anɔ susu me na ame aɖewo siwo le srɔ̃ɖeɖe ŋu bum, gake biabia ka mee míadzro le nyati siwo kplɔe ɖo me?
23 Kristotɔ aɖewo siwo tsɔ ƒe geɖe subɔ Yehowa ɣeyiɣiawo katã le trenɔnɔ me tiaa amesi woaɖe le etsɔme ŋuɖɔɖotɔe kple susu be yewoayi edzi awɔ ɣeyiɣiawo katã ƒe subɔsubɔdɔa ƒe akpa aɖe. Le nyateƒe me la, esia dze na kafukafu ŋutɔ. Ame aɖewo gɔ̃ hã abu srɔ̃ɖeɖe ŋu kple susu be yewomaɖe mɔ wòado kplamatse yewoƒe subɔsubɔ le mɔ aɖeke nu o. Gake ɖe wòle be Kristotɔ srɔ̃tɔ nabu be yeate ŋu atsɔ susu aɖo Yehowa subɔsubɔ ŋu abe alesi yewɔe le trenɔɣi enea? Míadzro biabia sia me le nyati siwo kplɔe ɖo me.
Numetoto
◻ Nukata apostolo Paulo kpɔe be ehiã be yeaŋlɔ agbalẽ na Korinto-hamea?
◻ Nukata míenya be menye saɖagagbenɔnɔ kafum Paulo le o?
◻ Aleke woate ŋu ‘awɔ’ trenɔnɔ ‘ŋudɔe’?
◻ Aleke nɔvinyɔnu trewo ate ŋu akpɔ viɖe tso woƒe trenɔnɔ mee?
◻ Mɔ kawo nue nɔviŋutsu trewo ate ŋu awɔ ablɔɖe si le wo si be woasubɔ Yehowa ‘susuhenuwo manɔmee’ la ŋudɔ le wòaɖe vi?