Lɔlɔ̃​—Nɔnɔme Nyui Xɔasi Aɖee Wònye

MAWU ƒe gbɔgbɔ ʋã apostolo Paulo wòŋlɔ nu tso nɔnɔme nyui asieke siwo sua ame si to gbɔgbɔ kɔkɔea ƒe kpekpeɖeŋu me ŋu. (Gal. 5:22, 23) Eyɔ nɔnɔme nyui dzeameŋu asieke siawo be “gbɔgbɔ la ƒe kutsetse.”a Gbɔgbɔa ƒe kutsetsea ɖea dzesi le “amenyenye yeye la” ŋu. (Kol. 3:10) Abe ale si ko ati tsea ku nyuie ne wolé be nɛ ene la, nenema kee ame ate ŋu aɖe gbɔgbɔa ƒe kutsetsea afia ne gbɔgbɔ kɔkɔea le dɔ wɔm le eƒe agbe me ale si dze.—Ps. 1:1-3.

Gbɔgbɔa ƒe kutsetsea ƒe akpa gbãtɔ si Paulo yɔ lae nye nɔnɔme nyui xɔasi si nye lɔlɔ̃. Aleke gbegbee nɔnɔme sia xɔ asii? Paulo gblɔ be ne lɔlɔ̃ mele ye si o la, ‘yemenye naneke o.’ (1 Kor. 13:2) Gake nu kae nye lɔlɔ̃, eye aleke míawɔ be nɔnɔme nyui sia nasu mía si eye míanɔ eɖem fia gbe sia gbe?

Togbɔ be womate ŋu atsɔ nyawo aɖe nu si lɔlɔ̃ nye me bɔbɔe o hã la, Biblia na míenya ale si woɖenɛ fiana. Le kpɔɖeŋu me, Biblia gblɔ be “lɔlɔ̃ gbɔa dzi blewu, eye wònyoa dɔme.” Azɔ hã, ‘ekpɔa dzidzɔ ɖe nyateƒe ŋu,’ eye “enɔa te ɖe nuwo katã nu, exɔa nuwo katã dzi sena, ekpɔa mɔ na nuwo katã, edoa dzi le nuwo katã me.” Ne lɔlɔ̃ le ame aɖe si la, etsɔa ɖe le eme na amewo vevie, eye wònyea xɔlɔ̃ nyui hã. Gake ame si si lɔlɔ̃ mele o la ʋãa ŋu, edoa eɖokui ɖe dzi, ewɔa nu si dze eya ŋutɔ ŋu, edia eɖokui tɔ eye metsɔa vɔ̃ si wowɔ ɖe eŋu la kena o. To vovo na nɔnɔme gbegblẽ mawo la, lɔlɔ̃ si míedi be míatu ɖo la “media eya ŋutɔ tɔ o.”—1 Kor. 13:4-8.

“Mawu nye lɔlɔ̃.” Vavãe, Yehowa ƒe amenyenye bliboa nye lɔlɔ̃. (1 Yoh. 4:8) Eƒe dɔwɔwɔwo kple nuwɔnawo katã ɖea eƒe lɔlɔ̃ fiana. Lɔlɔ̃ gãtɔ kekeake si wòɖe fia amegbetɔwo lae nye esi wòdɔ Yesu wòva kpe fu heku ɖe mía ta. Apostolo Yohanes gblɔ be: “Esia me woɖe Mawu ƒe lɔlɔ̃ ɖe go fia le le mía me, be Mawu dɔ eƒe Tenuvi la ɖo ɖe xexea me, be míakpɔ agbe to eya amea dzi. Esia me lɔlɔ̃ la le, menye be míawo míelɔ̃ Mawu o, ke boŋ be eya lɔ̃ mí, eye wòdɔ Via be wòanye avulévɔsa ɖe míaƒe nu vɔ̃wo ta.” (1 Yoh. 4:9, 10) Esi Mawu lɔ̃ mí ta la, esia wɔe be woate ŋu atsɔ míaƒe nu vɔ̃wo ake mí, mɔkpɔkpɔ su mía si, eye míate ŋu anɔ agbe tegbee.

Yesu ɖee fia be yelɔ̃ amegbetɔwo esi wòlɔ̃ faa wɔ nu si Mawu di tso esi. Paulo ŋlɔ bena: “[Yesu gblɔ] be: ‘Kpɔ ɖa! Meva ɖo be mawɔ wò lɔlɔ̃nu.’ . . . Le eƒe ‘lɔlɔ̃nu’ sia nu la, wokɔ mía ŋu to Yesu Kristo ƒe ŋutilã si wotsɔ na zi ɖeka ɖe ɣeyiɣiawo katã nu la dzi.” (Heb. 10:9, 10) Amegbetɔ aɖeke mate ŋu alɔ̃ ehavi amegbetɔ wu esia o. Yesu gblɔ be: “Lɔlɔ̃ gã wu esia megale ame aɖeke si, be ame natsɔ eƒe agbe aɖo anyi ɖe xɔlɔ̃awo ta o.” (Yoh. 15:13) Ðe mí amegbetɔ madeblibowo míate ŋu asrɔ̃ lɔlɔ̃ si Yehowa kple Yesu ɖe fia mía? Ɛ̃, míate ŋui! Na míadzro ale si míate ŋu awɔ esiae la me.

Paulo de dzi ƒo na mí be: “Mizu Mawu srɔ̃lawo abe via lɔlɔ̃awo ene, eye miyi edzi miazɔ le lɔlɔ̃ me, abe ale si ko Kristo la hã lɔ̃ mí, eye wòtsɔ eɖokui na ɖe mía ta . . . la ene.” (Ef. 5:1, 2) ‘Míeyia edzi zɔna le lɔlɔ̃ me’ ne míeɖea nɔnɔme nyui sia fiana le míaƒe agbenɔnɔ ƒe akpa sia akpa. Nuwɔna mee míeɖea lɔlɔ̃ sia fiana le ke menye le nyagbɔgblɔ me o. Yohanes ŋlɔ bena: “Vinye lɔlɔ̃awo, migana míatsɔ nya kple aɖe ko alɔ̃ ame o, ke boŋ míatsɔ nuwɔna kple nyateƒe alɔ̃ ame.” (1 Yoh. 3:18) Le kpɔɖeŋu me, ne míezɔna le lɔlɔ̃ me la, míalɔ̃ Mawu kple mía haviwo, eye esia aʋã mí be míaɖe gbeƒã “Fiaɖuƒe ŋuti nya nyui” la na amewo. (Mat. 24:14; Luka 10:27) Míezɔna le lɔlɔ̃ me ne míegbɔa dzi blewu, nyoa dɔme, eye míetsɔna kena faa. Esia tae Biblia ɖo aɖaŋu na mí be: “Ale si ko Yehowa tsɔ ke mi faa la, miawo hã miwɔ nenema ke.”—Kol. 3:13.

Ne míeɖɔ amewo ɖo alo xlɔ̃ nu wo la, esia mefia be mímelɔ̃ wo o. Le kpɔɖeŋu me, dzila aɖewo wɔa nu sia nu si wo viwo di la na wo be woadzudzɔ avifafa. Gake dzila siwo lɔ̃ wo viwo vavã la tɔa afɔ to sesĩe ne ehiã. Nenema kee togbɔ be Mawu nye lɔlɔ̃ hã, ‘ame si wòlɔ̃na la, eyae wòhea to na.’ (Heb. 12:6) Ne míezɔna le lɔlɔ̃ me la, míawo hã míahe to na mía viwo le mɔ nyuitɔ nu ne ehiã. (Lod. 3:11, 12) Ke hã, le esia wɔwɔ me la, ele be míaɖo ŋui be míawo hã nu vɔ̃ mewo míenye eye míate ŋu awɔ nu si mesɔ o. Eya ta, ehiã be mí katã míaɖe lɔlɔ̃ afia geɖe wu le go aɖewo me. Aleke míate ŋu awɔ esia? Na míadzro eƒe kpɔɖeŋu etɔ̃ me.

Gbã, bia Mawu be wòana eƒe gbɔgbɔ kɔkɔe, si nana lɔlɔ̃ sua ame si la wò. Yesu gblɔ be Yehowa naa “gbɔgbɔ kɔkɔe ame siwo bianɛ.” (Luka 11:13) Ne míedoa gbe ɖa biaa gbɔgbɔ kɔkɔea eye míedzea agbagba ‘zɔna le gbɔgbɔ me’ la, ʋɛʋɛʋɛ la, lɔlɔ̃ ava nɔ dzedzem le míaƒe nuwɔnawo me geɖe wu. (Gal. 5:16) Le kpɔɖeŋu me, ne hamemetsitsie nènye le Kristo hamea me la, àte ŋu abia be gbɔgbɔ kɔkɔea nakpe ɖe ŋuwò be nàte ŋu atsɔ Ŋɔŋlɔawo aɖo aɖaŋu na haxɔsetɔwo le lɔlɔ̃ me. Alo ne dzilae nènye la, àte ŋu abia Mawu be wòana eƒe gbɔgbɔa nakpe ɖe ŋuwò nàɖɔ viwòwo ɖo le lɔlɔ̃ me, ke menye le dziku me o.

Evelia, de ŋugble le ale si Yesu ɖe lɔlɔ̃ fia esime wodo dziku nɛ la ŋu. (1 Pet. 2:21, 23) Ahiã be míade ŋugble le Kristo ƒe kpɔɖeŋua ŋu, vevietɔ ne wodze agɔ le mía dzi alo wowɔ nu madzɔmadzɔ ɖe mía ŋu. Le ɣeyiɣi mawo tɔgbi me la, nya si míabia mía ɖokui ye nye be, ‘Nu kae Yesu awɔ le nɔnɔme sia me?’ Nɔvinyɔnu aɖe si ŋkɔe nye Leigh la kpɔe be ŋugbledede le biabia sia ŋu kpena ɖe ye ŋu yebua nuwo ŋu hafi ɖea afɔ. Egblɔ be: “Gbe ɖeka, nye dɔwɔhati aɖe ɖo e-mail ɖe nye dɔwɔhati susɔeawo tsɔ gblɔ nya si mesɔ o tso nye ŋutɔ kple dɔ si mewɔna ŋu. Esia te ɖe dzinye ŋutɔ. Ke hã, mebia ɖokuinye be, ‘Aleke mate ŋu asrɔ̃ Yesu le ale si mawɔ nu kple nye dɔwɔhatia me?’ Esi mede ŋugble le nu si Yesu awɔ ŋu vɔ la, metso nya me be maɖe asi le nyaa ŋu ahaɖe susu ɖa le eŋu. Emegbe, meva se be, sigbeɖe, lãmesẽkuxi sesẽ aɖe nɔ fu ɖem na nye dɔwɔhatia eye nuteɖeamedzi nɔ fu ɖem nɛ vevie. Azɔ meƒo nya ta be, anɔ eme be menye ɖe wòɖoe be yeagblẽ ŋunye o. Esi mede ŋugble le ale si Yesu ɖea lɔlɔ̃ fiana ne wodo dziku nɛ gɔ̃ hã ŋu la, esia kpe ɖe ŋunye mewɔ nu ɖe nye dɔwɔhatia ŋu nenema ke.” Ɛ̃, ne míesrɔ̃ Yesu ƒe kpɔɖeŋua la, míawɔ nu le lɔlɔ̃ me ɣesiaɣi.

Etɔ̃lia, tu ɖokuitsɔtsɔsavɔ ƒe lɔlɔ̃, si nye nɔnɔme nyui si dea dzesi Kristotɔ vavãwo la ɖo. (Yoh. 13:34, 35) Lɔlɔ̃ sia kee nɔ Yesu hã si, eye eɖo kpɔɖeŋu deblibo ɖi na mí be míasrɔ̃. Aleke wòwɔe? Eyae nye be, elɔ̃ faa dzo le dziƒo ‘heɖi gbɔlo eɖokui’ “yi ɖase ku me” gɔ̃ hã. (Flp. 2:5-8) Ne míesrɔ̃a eƒe ɖokuitsɔtsɔsavɔ ƒe lɔlɔ̃a la, míaƒe nuŋububu kple seselelãme ava ɖi Kristo la tɔ geɖe wu, eye esia aʋã mí be míadi ame bubuwo ƒe nyonyo gbã. Nu nyui bubu kawoe dona tso eme ne lɔlɔ̃ le mía si?

Ne míelɔ̃a amewo la, viɖe geɖe dona tso eme. Bu eƒe kpɔɖeŋu eve ŋu kpɔ:

• DUKƆWO DOME NƆVIWO ƑE HABƆBƆ: Esi míelɔ̃ mía nɔewo ta la, míenyae be hame ɖe sia ɖe si me míaɖi tsa ayi le anyigba bliboa dzi la, mía nɔviŋutsuwo kple nɔvinyɔnuwo axɔ mí nyuie. Yayra ka gbegbee nye esi wònye be “nɔviwo ƒe habɔbɔ blibo si le xexea me la” lɔ̃ mí! (1 Pet. 5:9) Afi kae míagakpɔ lɔlɔ̃ sia ƒomevi le ne menye le Mawu ƒe amewo dome ko o?

• ŊUTIFAFA: Ne míedoa dzi nɔa ‘anyi kple mía nɔewo le lɔlɔ̃ me’ la, esia wɔnɛ be míewɔa ɖeka le “ŋutifafa ƒe nublanu la me.” (Ef. 4:2, 3) Míesea vivi na ŋutifafa sia le míaƒe hame ƒe kpekpewo kpakple takpekpe suewo kple gãwo me. Ðe màlɔ̃ ɖe edzi be ŋutifafa si le mía dome la ɖe dzesi ŋutɔ le xexe sia si me ɖekawɔwɔ mele o la me oa? (Ps. 119:165; Yes. 54:13) Ne míenɔa anyi kple amewo le ŋutifafa me la, míeɖea ale si gbegbe míelɔ̃ woe la fiana, eye esia dzea mía Fofo si le dziƒo la ŋu.—Ps. 133:1-3; Mat. 5:9.

Paulo ŋlɔ bena: “Lɔlɔ̃ tua ame ɖo.” (1 Kor. 8:1) Aleke lɔlɔ̃ wɔa esiae? Apostolo Paulo ɖe ale si lɔlɔ̃ tua ame ɖo la me le lɛta gbãtɔ si wòŋlɔ na Korintotɔwo la ƒe ta 13 lia me. Ame aɖewo yɔa agbalẽa ƒe ta sia be “Lɔlɔ̃ Ƒe Psalmo.” Lɔlɔ̃ dia ame bubuwo ƒe nyonyo. (1 Kor. 10:24; 13:5) Gakpe ɖe eŋu la, esi lɔlɔ̃ bua ame ŋu, esea nu gɔme na ame, egbɔa dzi blewu, eye wònyoa dɔme ta la, ewɔnɛ be lɔlɔ̃ nɔa ƒomewo me eye ɖekawɔwɔ nɔa hamea me.—Kol. 3:14.

Lɔlɔ̃ si le mí katã si na Mawu lae nye lɔlɔ̃ vevitɔ kple lɔlɔ̃ si tua mí ɖo wu ɖe sia ɖe. Lɔlɔ̃ sia wɔnɛ be ame ƒomevi vovovo siwo ƒe ŋutigbalẽ kple gbegbɔgblɔwo to vovo la wɔa ɖeka hesubɔa Yehowa “le ɖekawɔwɔ me.” (Zef. 3:9) Mina míaɖoe kplikpaa be míaɖe Mawu ƒe gbɔgbɔ kɔkɔea ƒe kutsetsea ƒe akpa vevi sia afia gbe sia gbe.