Yehowa Nebu Nyui Na Wò
“Nye Mawu, ɖo ŋu esia . . . nam . . . Nye Mawu, ɖo ŋku edzi nam hena nye nyui.”—NEXEMYA 13:22, 31.
1. Nukae kpena ɖe amesiwo ɖe adzɔgbe na Mawu ŋu be woabu akɔnta nyui na Yehowa?
NUSIANU si akpe ɖe Yehowa subɔlawo ŋu woabu akɔnta nyui nɛ la le wo si. Nukatãe? Nusitae nye be ƒomedodo kplikplikpli le wo kple Mawu dome elabena wole eƒe anyigba dzi habɔbɔa me. Eɖe eƒe tameɖoɖowo fia wo, eye ekpe ɖe wo ŋu hena gbɔgbɔ me gɔmesese wo to eƒe gbɔgbɔ kɔkɔe la dzi. (Psalmo 51:13; 119:105; Korintotɔwo I, 2:10-13) Nɔnɔme tɔxɛ siawo ta Yehowa bia tso esubɔla siwo le anyigba dzi si lɔlɔ̃tɔe be woabu akɔnta le wo ɖokui ŋuti na ye, le amesi wonye kple nusi wowɔna le yeƒe ŋusẽ me kpakple to yeƒe gbɔgbɔ kɔkɔe ƒe kpekpeɖeŋu me ŋu.
2. (a) Mɔ kawo nue Nexemya bu akɔnta nyui le eɖokui ŋuti na Mawu? (b) Kukuɖeɖe kae Nexemya tsɔ ƒo Biblia-gbalẽ si ŋu eƒe ŋkɔ le tae?
2 Ŋutsu aɖe si bu akɔnta nyui le eɖokui ŋuti na Mawue nye Nexemya, si nye Persia-fia Artaxsasta (Longimanus) ƒe ahakula. (Nexemya 2:1) Nexemya va zu Yudatɔwo ƒe anyigbadzikpɔla eye wògbugbɔ Yerusalem-gliwo ɖo togbɔ be futɔwo kple afɔkuwo nɔ anyi gake. Dzonɔameme ɖe tadedeagu vavãtɔ ŋu na wòdo ŋusẽ Mawu ƒe Sea dziwɔwɔ eye wòtsɔ ɖe le eme na amesiwo wote ɖe anyi. (Nexemya 5:14-19) Nexemya ƒoe ɖe Lewi-viwo nu be woakɔ wo ɖokui ŋu edziedzi, woadzɔ agboawo nu, eye woawɔ Sabat-ŋkekea kɔkɔe. Esia ta wòte ŋu do gbe ɖa be: “Nye Mawu, ɖo ŋu esia hã nam, eye nakpɔ tanye le wò amenuveve gã la nu!” Esɔ hã be Nexemya ƒo eƒe agbalẽ si tso Mawu ƒe gbɔgbɔ me ta kple kukuɖeɖe sia be: “Nye Mawu, ɖo ŋku edzi nam hena nye nyui.”—Nexemya 13:22, 31.
3. (a) Aleke nàƒo nu tso amesi wɔa nu nyui ŋutii? (b) Ne míebu nusiwo Nexemya wɔ ŋu la, nya kawoe wòana míabia mía ɖokui?
3 Amesi wɔa nu nyui enye nudzeamewɔla eye ewɔa nu dzɔdzɔe wòɖea vi na ame bubuwo. Ame ma ƒomevie Nexemya nye. Evɔ̃ Mawu bubutɔe eye wòtsɔ dzo ɖe tadedeagu vavãtɔ ŋu vevie. Hekpe ɖe eŋu la, ekpɔ ŋudzedze ɖe mɔnukpɔkpɔ siwo su esi le Mawu subɔsubɔ me ŋu eye wòbu akɔnta nyui le eɖokui ŋuti na Yehowa. Ŋugbledede le nusiwo wòwɔ ŋu ana míabia mía ɖokui be, ‘Aleke mebua mɔnukpɔkpɔ kple agbanɔamedzi siwo Mawu nam lae? Akɔnta ka tɔgbe bum mele le ɖokuinye ŋuti na Yehowa Mawu kple Yesu Kristo?’
Sidzedze Na Míebua Akɔnta
4. Dɔ kae Yesu de asi na eyomedzelawo, eye nukae amesiwo ‘ƒe nɔnɔme sɔ na agbe mavɔ kpɔkpɔ’ la wɔ?
4 Yesu de dɔ asi na eyomedzelawo be: “Miheyi ɖawɔ dukɔwo katã me nɔlawo ne woanye nusrɔ̃lawo, mianyrɔ wo . . . miafia wo bena, woawɔ nusiwo katã meɖo na mi la dzi.” (Mateo 28:19, 20, NW) Wobe woafia nu amewo ne woazu nusrɔ̃lawo. Eyata amesiwo wofia nui eye ‘woƒe nɔnɔme sɔ na agbe mavɔ kpɔkpɔ’ la axɔ nyɔnyrɔ abe alesi Yesu xɔe ene. (Dɔwɔwɔwo 13:48; Marko 1:9-11) Dzimee woƒe didi be yewoawɔ nusiwo katã wòɖo la atso. Woayi ŋgɔ aɖo adzɔgbeɖeɖe gbɔ to Mawu ƒe Nya ŋuti sidzedze vavãtɔ xɔxɔ kple eŋudɔwɔwɔ me.—Yohanes 17:3.
5, 6. Aleke míase Yakobo 4:17 gɔmee? Gblɔ nusi wòfia ƒe kpɔɖeŋu.
5 Zi alesi míaƒe Ŋɔŋlɔawo me sidzedze de toe la, zi nenemae míaƒe xɔse ali kee. Le ɣeyiɣi ma ke me la, akɔnta si míabu na Mawu lolona ɖe edzi. Yakobo 4:17 gblɔ be: “Amesi ke nya nu nyui wɔwɔ, eye mewɔnɛ o la, enye nuvɔ̃ nɛ.” Edze ƒã be nyagbɔgblɔ sia nye nufiame si le nya si nusrɔ̃la Yakobo gblɔ do ŋgɔ teti le adegbeƒoƒo ŋu le esi teƒe be woaɖo ŋu ɖe Mawu ŋu bliboe la me. Ne ame aɖe nya be yemate ŋu awɔ naneke wòali ke ne Yehowa mekpe ɖe ye ŋu o evɔ mewɔe nenema o la, nuvɔ̃e. Gake nya siwo Yakobo gblɔ ate ŋu afia nuvɔ̃ si wònye be woagblẽ nane ɖi mawɔmawɔe hã. Le kpɔɖeŋu me, le Yesu ƒe alẽwo kple gbɔ̃wo ŋuti lododoa me la, menye gbɔ̃awo ƒe nuwɔna vɔ̃ɖiwo tae wobu fɔ wo ɖo o ke le esi womekpe ɖe Kristo nɔviwo ŋu o tae.—Mateo 25:41-46.
6 Ŋutsu aɖe si Yehowa Ðasefowo nɔ Biblia-nusɔsrɔ̃ wɔm kpli la menɔ gbɔgbɔmeŋgɔyiyi boo aɖeke wɔm o, edze ƒã be esi medzudzɔ atamanono o tae, evɔ enya be ele be yeadzudzɔ hafi. Hamemegã aɖe gblɔ nɛ be wòaxlẽ Yakobo 4:17. Esi hamemegã la gblɔ nusi mawunyakpukpui sia fia vɔ la, egblɔ be: “Togbɔ be mèxɔ nyɔnyrɔ o hã la, woabia akɔnta wò eye ele be nàxɔ nyametsotso si nàwɔ ƒe agba atsɔ.” Dzidzɔtɔe la, ŋutsua wɔ ɖe nya la dzi, edzudzɔ atamanono eye eteƒe medidi o edze na nyɔnyrɔxɔxɔ si wòtsɔ ɖe adzɔgbe si wòɖe na Yehowa Mawu fia.
Míabu Akɔnta le Míaƒe Subɔsubɔdɔ Ŋu
7. Mɔ siwo nu míaɖe míaƒe ŋudzedzekpɔkpɔ ɖe “sidzedze Mawu” ŋu afia le ƒe ɖekae nye ka?
7 Ele be míadi vevie be míadze mía Wɔla ŋu. Mɔ siwo nu míaɖe míaƒe ŋudzedzekpɔkpɔ ɖe “sidzedze Mawu” ŋu afia le ɖekae nye be míawɔ dɔ si nye be míawɔ amewo woanye Via, Yesu Kristo, ƒe nusrɔ̃lawo. Esia ganye mɔ si nu míaɖe míaƒe lɔlɔ̃ na Mawu kple mía havi afia le. (Lododowo 2:1-5; Mateo 22:35-40) Ẽ, sidzedze Mawu wɔa mí amesiwo abu akɔnta nɛ, eye ele be míabu mía havi amegbetɔwo be woate ŋu azu nusrɔ̃lawo.
8. Nukata míate ŋu agblɔ be Paulo kpɔe be ele be yeabu akɔnta le yeƒe subɔsubɔdɔa ŋu na Mawu?
8 Apostolo Paulo nya be nyanyuia xɔxɔ kple dzi blibo kpakple edziwɔwɔ ana woakpɔ ɖeɖe, gake emaxɔmaxɔ ate ŋu ahe tsɔtsrɔ̃ vɛ. (Tesalonikatɔwo II, 1:6-8) Eyata ekpɔe be ele be yeabu akɔnta le yeƒe subɔsubɔdɔ ŋu na Yehowa. Le nyateƒe me la, Paulo kple eƒe zɔhɛwo kpɔ ŋudzedze ɖe woƒe subɔsubɔdɔ ŋu ale gbegbe be woɖɔ ŋu ɖo vevie be magawɔ na amewo be ɖe wole ga kpɔm tso eme tae o. Hekpe ɖe eŋu la, Paulo ƒe dzi ʋãe wògblɔ be: “Ne megblɔ nyanyuie fia la, menye kafukafu nam o, elabena ele nam kokoko be, mawɔe; elabena nenye be, nyemegblɔ nyanyuie la fia o la, baba nam!”—Korintotɔwo I, 9:11-16.
9. Fe vevi kae wòle be Kristotɔwo katã naxe?
9 Esi míenye Yehowa subɔla ɖeadzɔgbewo ta la, ‘ele na mí kokoko be míagblɔ nyanyui la.’ Dɔ wònye wode asi na mí be míaɖe gbeƒã Fiaɖuƒegbedasia. Míexɔ agbanɔamedzi ma esi míetsɔ mía ɖokui ɖe adzɔgbe na Mawu. (Tsɔe sɔ kple Luka 9:23, 24.) Azɔ hã la, fe le mía ŋu míaxe. Paulo gblɔ be: “Helatɔwo kple Barbaratɔwo, nunyalawo kple ame manyanuwo katã ƒe fenyila menye. Ale le gonyeme la melɔ̃ bena, magblɔ nyanyuie la afia mi amesiwo le Roma hã.” (Romatɔwo 1:14, 15) Paulo nye fenyila elabena enya be yeƒe dɔe wònye be yeaɖe gbeƒã bene amewo nase nyanyui la ne woakpɔ ɖeɖe. (Timoteo I, 1:12-16; 2:3, 4) Eyata eku kutri wu eƒe dɔdasia nu eye wòxe fe si wònyi le ehavi amegbetɔwo si la. Fe ma le mí Kristotɔwo hã ŋu be míaxe. Gbeƒãɖeɖe Fiaɖuƒea nye mɔ vevi si hã dzi míaɖe lɔlɔ̃ na Mawu, Via, kple mía haviwo afia le.—Luka 10:25-28.
10. Nukae ame aɖewo wɔ tsɔ keke woƒe subɔsubɔdɔ ɖe enu?
10 Mɔ siwo nu míabu akɔnta na Mawu le wòadze eŋu dometɔ ɖekae nye be míazã míaƒe ŋutetewo adzi míaƒe subɔsubɔdɔa ɖe edzi. Le kpɔɖeŋu me: Ame gbogbo aɖewo tso dukɔ geɖe me va Britania le ƒe siawo me. Be woagblɔ nyanyuia na amesiawo la, mɔɖela (ɣeyiɣiawo katã ƒe Fiaɖuƒegbeƒãɖela) siwo wu 800 kple Ðasefo alafa geɖe bubuwo le gbe vovovowo srɔ̃m. Esia gade dzo subɔsubɔdɔa me. Mɔɖela aɖe si le Chinagbe fiam gblɔ be: “Nyemebui kpɔ be mava fia mía degbe Ðasefo bubuwo be woato esia dzi agblɔ nyateƒea na ame bubuwo o. Ena nye dzi dze eme ŋutɔ!” Àte ŋu adzi wò subɔsubɔdɔa ɖe edzi le mɔ sia tɔgbe nua?
11. Nukae dzɔ esi Kristotɔ aɖe ɖi ɖase le vome?
11 Anɔ eme be mía dometɔ ɖesiaɖe awɔ nusi wòate ŋui aɖe amesi tsi lé. Nenema ke Yehowa subɔlawo di vevie be yewoazã yewoƒe ŋutetewo aɖi ɖase le mɔnukpɔkpɔ ɖesiaɖe me. Ðasefo aɖe bɔbɔ nɔ nyɔnu aɖe xa le bɔs me nyitsɔ laa eye wòƒo nu nɛ tso Ŋɔŋlɔawo ŋu. Esi nya siwo nyɔnua se do dzidzɔ nɛ la, ebia nya geɖe. Esi Ðasefoa nɔ ɖiɖim le bɔs la me la, nyɔnua ɖe kuku nɛ be wòava ye ƒeme boŋ elabena nya geɖe ganɔ esi wòabia. Ðasefoa lɔ̃. Nukae va dzɔ? Wodze Biblia-nusɔsrɔ̃ gɔme eye ɣleti ade megbe la, nyɔnua zu Fiaɖuƒegbeƒãɖela maxɔnyɔnyrɔ. Eteƒe medidi o eya ŋutɔ nɔ aƒeme Biblia nusɔsrɔ̃ ade wɔm. Ame ƒe ŋutetewo ŋudɔwɔwɔ le Fiaɖuƒesubɔsubɔa me ƒe teƒeɖoɖo dodzidzɔname kae nye si!
12. Aleke mí subɔlawo míate ŋu awɔ míaƒe ŋutetewo ŋudɔ nyuie le gbeadzi?
12 Mí subɔlawo míate ŋu awɔ míaƒe ŋutetewo ŋudɔ nyuie le gbeadzi to agbalẽwo abe axa 192-gbalẽ si nye Sidzedze Si Kplɔa Ame Yia Agbe Mavɔ Me ene zazã me. Vaseɖe ƒe 1996 ƒe April me la, Yehowa Ðasefowo ƒe Dziɖuha ƒe Nuŋɔŋlɔkɔmiti ɖe mɔ be woata Sidzedze-gbalẽa ɖe gbegbɔgblɔ 140 kple edzivɔ me, eye ɣemaɣi wota 30,500,000 ɖe gbegbɔgblɔ 111 me xoxo. Wota agbalẽ sia kple susu be woakpe ɖe Biblia-nusrɔ̃viwo ŋu woasrɔ̃ nusi hiã le Mawu ƒe Nya kple eƒe tameɖoɖowo ŋu ale be woaɖe adzɔgbe na Yehowa ahaxɔ nyɔnyrɔ. Esi Fiaɖuƒegbeƒãɖelawo mawɔ aƒeme Biblia nusɔsrɔ̃ kple nusrɔ̃vi ɖeka ma ke ƒe geɖe o ta la, woate ŋu awɔ nusɔsrɔ̃ kple ame geɖe alo adzi woƒe aƒeme yi aƒeme kple subɔsubɔdɔa ƒe akpa bubuwo ɖe edzi. (Dɔwɔwɔwo 5:42; 20:20, 21) Esi wonya be yewoabu akɔnta na Mawu ta la, wohea amewo ƒe susu yia Mawu ƒe nuxlɔ̃amewo dzi. (Xezekiel 33:7-9) Gake woƒe taɖodzinu vevitɔe nye be yewoade bubu Yehowa ŋu ahakpe ɖe ame geɖe ŋu alesi yewoate ŋui ne woasrɔ̃ nyanyuia le ɣeyiɣi kpui si susɔ na nuɖoanyi vɔ̃ɖi sia me.
Akɔnta Nyui si Wòle be Ƒomewo Nabu
13. Nukata wòle be ƒome vɔ̃mawuwo nawɔ ƒome Biblia nusɔsrɔ̃ edziedzi?
13 Amesiame kple ƒome ɖesiaɖe si le Kristotɔnyenye vavãtɔ ŋudɔ wɔm la abu akɔnta na Mawu, esia ta ele be ‘woade ŋgɔgbe atsi’ eye ‘woanɔ tsitre sesĩe le xɔse me.’ (Hebritɔwo 6:1-3; Petro I, 5:8, 9) Le kpɔɖeŋu me, ehiã be amesiwo srɔ̃ Sidzedze-gbalẽa eye woxɔ nyɔnyrɔ la nana woƒe Ŋɔŋlɔawo me sidzedze nadzi ɖe edzi to kpekpewo dede edziedzi kple Biblia kpakple Kristotɔwo ƒe agbalẽ bubuwo xexlẽ me. Ele be ƒome vɔ̃mawuwo hã nawɔ ƒomenusɔsrɔ̃ edziedzi elabena ema nye nu vevi si ana ‘woanɔ ŋudzɔ, anɔ tsitre sesĩe le xɔse me, awɔ ŋutsu, ahasẽ ŋu!’ (Korintotɔwo I, 16:13) Ne wòe nye ƒomea ƒe ta la, ke wò koŋue abu akɔnta na Mawu be nàkpɔ egbɔ anyi wò ƒomea nyuie le gbɔgbɔ me. Abe alesi ŋutilãmenuɖuɖu nyui naa lãmesẽe ene la, nenema ke gbɔgbɔmenuɖuɖu geɖe ɖuɖu edziedzi hiã bene mia kple wò ƒomea miayi edzi “[anɔ] blibo le xɔse me.”—Tito 1:13.
14. Nukae do tso ɖase si Israel-nyɔnuvi si wofia nui nyuie la ɖi me?
14 Ne ɖeviwo le wò ƒomea me eye nèfia nu wo nyuie le gbɔgbɔ me la, Mawu abu nyui na wò ɖe eta. Nufiafia ma aɖe vi na wo abe alesi wòɖe vi na Israel-nyɔnuvi sue aɖe si Aramtɔwo ɖe aboyoe le Mawu ƒe nyagblɔɖila Elisa ƒe ŋkekeawo me ene. Ezu Aram-ʋafia Naeman si dze anyi la srɔ̃ ƒe subɔvi. Togbɔ be nyɔnuvia metsi o hã la, egblɔ na eƒe aƒenɔ be: “Oo, ne nye aƒetɔ ade nyagblɔɖila, si le Samaria gbɔ la! ayɔ dɔ eƒe anyi la nɛ.” Eƒe ɖaseɖiɖi wɔe be Naeman yi Israel, ewɔ Elisa ƒe mɔfiafia dzi mlɔeba eye wòyi ɖale tsi le Yordan-tɔsisia me zi adre, ale anyi la vɔ le eŋu. Hekpe ɖe eŋu la, Naeman va zu Yehowa subɔla. Aleke gbegbe ema adzɔ dzi na nyɔnuvi sue ma enye si!—Fiawo II, 5:1-3, 13-19.
15. Nukata wòle vevie be dzilawo nahe wo viwo nyuie le gbɔgbɔ me? Wɔ eƒe kpɔɖeŋu.
15 Ðeviwo nyinyi be woavɔ̃ Mawu le xexe gblẽku sia si le Satana ƒe ŋusẽ te me mele bɔbɔe o. (Yohanes I, 5:19) Gake Timoteo mama Loide kple dadaa Eunike wofia Ŋɔŋlɔawoe dzidzedzetɔe tso eƒe vidzĩ me ke. (Timoteo II, 1:5; 3:14, 15) Biblia sɔsrɔ̃ kple mia viwo, wo kpɔkplɔ yi Kristotɔwo ƒe kpekpewoe ɣesiaɣi, kple wo kpɔkplɔ yi gbeadzi mlɔeba katã nye hehenamɔnu siwo ŋu miabu akɔnta le na Mawu godoo. Kristotɔ aɖe si le Wales, si le eƒe ƒe 80-awo titina fifia gblɔ be le ƒe 1920-awo ƒe gɔmedzedze la, ye fofo kplɔa ye ɖe asi zɔna lia to kilometa 10 (yiyi kple gbɔgbɔ nye kilometa 20) yina Biblia ƒe traktwo mã ge na kɔƒemetɔwo le toa godo. Egblɔ ŋudzedzekpɔkpɔtɔe be: “Mɔzɔzɔ mawo mee fofonye ƒã nyateƒea ɖe nye dzime.”
Hamemegãwo Bua Akɔnta—Alekee?
16, 17. (a) Mɔnukpɔkpɔ kawoe su ame tsitsi siwo bi le gbɔgbɔ me la si le blema Israel? (b) Ne míetsɔe sɔ kple alesi nuwo nɔ le blema Israel la, nukatae wobia nu geɖe wu tso Kristotɔ hamemegãwo si egbea?
16 Nunyala Salomo gblɔ be: “Atsyɔ̃fiakuku enye ta ƒowɔ, dzɔdzɔenyenye ƒe mɔ dzi wokpɔnɛ lena.” (Lododowo 16:31) Gake menye tsitsi le ŋutilã mee naa ŋutsu sua te na agbanɔamedzi xɔxɔ le Mawu ƒe amewo ƒe hamea me o. Ŋutsu tsitsi siwo bi le gbɔgbɔ me le blema Israel la nye ʋɔnudrɔ̃lawo kple dzikpɔlawo ale be woadrɔ̃ ʋɔnu ɖe eteƒe ahana ŋutifafa, ɖoɖo nyui, kple gbɔgbɔmelãmesẽ nanɔ anyi. (Mose V, 16:18-20) Togbɔ be nenema ke wòle le Kristo-hamea me hã la, wobia nu geɖe wu tso hamemegãwo si le esi nuɖoanyi sia ƒe nuwuwu ɖo vɔ ta. Nukatae?
17 Israel-viwo nye ‘dukɔ tiatia’ si Mawu ɖe tso blema Egipte. Esi woxɔ Sea to woƒe domenɔla Mose dzi ta la, wodzi woƒe dzidzimeviwo ɖe dukɔ ɖeadzɔgbe me eye wonya Yehowa ƒe sewo. (Mose V, 7:6, 11) Gake womedzia ame aɖeke ɖe dukɔ ɖeadzɔgbe ma tɔgbe me egbea o, eye ne míagblɔe la, ame ʋee aɖewo koe wonyina le ƒome vɔ̃mawu siwo nya Ŋɔŋlɔawo me nyateƒea nyuie la me. Vevietɔ amesiwo te ‘zɔzɔ le nyateƒea me’ eteƒe medidi o ahiã mɔfiafia le alesi woanɔ agbe ɖe Ŋɔŋlɔawo me gɔmeɖosewo nui ŋuti. (Yohanes III, 4) Eyata agba ka gbegbe enye si le hamemegã nuteƒewɔlawo dzi esime ‘wolé nya siwo le blibo me ɖe asi’ eye wole kpekpem ɖe Yehowa ƒe amewo ŋu!—Timoteo II, 1:13, 14.
18. Kpekpeɖeŋu kae wòle be hamemegãwo nasu te ana, eye nukatae?
18 Ðevi sue si le azɔlizɔzɔ srɔ̃m la ate ŋu akli nu adze anyi. Ekpɔnɛ be yemele dedie o eye wòhiã dzilawo ƒe kpekpeɖeŋu kple dzideƒo. Nenema ke amesi ɖe adzɔgbe na Yehowa hã ate ŋu akli nu alo adze anyi le gbɔgbɔ me. Apostolo Paulo gɔ̃ hã kpɔe be ehiã be yeaʋli be yeawɔ nusi le dzɔdzɔe alo nyo le Mawu ŋkume. (Romatɔwo 7:21-25) Ehiã be Mawu ƒe alẽha la kplɔlawo nakpe ɖe Kristotɔ siwo wɔ nuvɔ̃ gake wotrɔ dzime vavã la ŋu lɔlɔ̃tɔe. Esi hamemegãwo yi nyɔnu adzɔgbeɖela aɖe si wɔ vodada gã aɖe gbɔ la, egblɔ na wo le srɔ̃a si ɖe adzɔgbe ŋkume be: “Menya be miaɖem le ha me!” Gake esi wogblɔ nɛ be ɖe hamemegãwo di be yewoanya kpekpeɖeŋu si hiã ale be yewoafɔ ƒomea ɖe te le gbɔgbɔ me la, ewó avi. Esi hamemegãwo nya be ele be yewoabu akɔnta ta la, edzɔ dzi na wo be yewokpe ɖe haxɔsetɔ si trɔ dzime la ŋu.—Hebritɔwo 13:17.
Miyi Edzi Mianɔ Akɔnta Nyui Bum
19. Aleke míate ŋu ayi edzi abu akɔnta nyui le mía ɖokui ŋuti na Mawu?
19 Ehiã be hamemegãwo kple Mawu subɔla bubuwo katã nayi edzi anɔ akɔnta nyui bum le wo ɖokui ŋuti na Yehowa. Esia anya wɔ ne míelé ɖe Mawu ƒe Nya la ŋu eye míewɔ eƒe lɔlɔ̃nu. (Lododowo 3:5, 6; Romatɔwo 12:1, 2, 9) Vevietɔ míedi be míawɔ nyui na haxɔsetɔwo. (Galatiatɔwo 6:10) Gake nuŋeŋea gasɔ gbɔ kokoko, evɔ nuŋelawo mede ha o. (Mateo 9:37, 38) Eyata mina míaɖe gbeƒã Fiaɖuƒegbedasia vevie atsɔ awɔ nyui na ame bubuwo. Yehowa abu nyui na mí ne míexe míaƒe adzɔgbeɖefe, míewɔ eƒe lɔlɔ̃nu, heɖe gbeƒã nyanyuia nuteƒewɔwɔtɔe.
20. Nukae míesrɔ̃ tso nusiwo Nexemya wɔ ŋu bubu me?
20 Eyata mina míayi edzi awɔ geɖe le Aƒetɔ la ƒe dɔwɔwɔ me. (Korintotɔwo I, 15:58) Eye anyo be míabu Nexemya ŋu, amesi gbugbɔ Yerusalem-gliwo ɖo, do ŋusẽ Mawu ƒe Sea, hedo tadedeagu vavãtɔ ɖe ŋgɔ veviedodotɔe. Edo gbe ɖa be Yehowa Mawu naɖo ŋku ye dzi le nu nyui siwo yewɔ ta. Wò hã tsɔ ɖokuiwò na Yehowa nenema, eye neva eme be wòabu nyui na wò.
Ŋuɖoɖo Kawoe Nàna?
◻ Kpɔɖeŋu kae Nexemya ɖo?
◻ Nukata sidzedze na míebua akɔnta na Mawu?
◻ Aleke míate ŋu abu akɔnta le míaƒe subɔsubɔdɔa me na Yehowa wòadze eŋu?
◻ Nukae ƒomewo ate ŋu awɔ be woabu akɔnta nyui na Mawu?
◻ Aleke Kristotɔ hamemegãwo bua akɔntae?
[Nɔnɔmetata siwo le axa 18]
Mí Fiaɖuƒegbeƒãɖelawo míate ŋu abu akɔnta nyui na Mawu abe alesi Paulo bui ene
[Nɔnɔmetata siwo le axa 19]
Ðe viwòwo ƒe xɔse sẽ ŋu abe Israel-nyɔnuvi sue si nɔ Naeman ƒeme tɔ enea?