Ta 16
Se Aɖaŋuɖoɖo, Naxɔ Amehehe
1. (a) Ðe mía dometɔ aɖe li si mehiã na aɖaŋuɖoɖo kple amehehe oa? (b) Gake biabia kawo ŋue wòanyo be míade ŋugble le?
MÍ AME akpa gãtɔ míelɔ̃na ɖe ŋɔŋlɔ si gblɔ be, “Mí kata míeda vo le nu geɖewo me” la dzi enumake. (Yak. 3:2) Mesesẽ be míaɖo ŋku wɔna siwo me míedo kpo amesi ƒomevi Mawu ƒe Nya ƒoe ɖe mía nu be míanye eye míedi be míanye la nyenye dzi o. Eyata míelɔ̃na be Biblia to nyateƒe esi wògblɔ na mí be: “Se aɖaŋuɖoɖo, eye naxɔ amehehe na ɖokuiwò, ne nadze nunya le ɣeyiɣi, siwo gbɔna me.” (Lod. 19:20) Míenya be míehiã kpekpeɖeŋu ma. Ðikeke mele eme o be míewɔ tɔtrɔwo le míaƒe agbe me be woasɔ kple nusi míesrɔ̃ le Biblia me. Gake aleke míewɔa nui ne hati Kristotɔ aɖe ɖo aɖaŋu na mí le nane si míewɔ numanyatɔe la ŋu? Alo ne eɖo aɖaŋu na mí le alesi míawɔ akpɔ ŋgɔyiyi le dɔ aɖe wɔwɔ me ŋuti ya ɖe?
2. (a) Nukatae wòle be míaɖe ŋudzedzekpɔkpɔ afia ɖe aɖaŋu si woaɖo na mía ŋutɔwo la ŋuti? (b) Nukae mele be míawɔ o?
2 Togbɔ be le amegbetɔ ƒe blibomademade ta míetsia tre ɖe eŋu enumake hã la, ele be míakpɔ ŋudzedze vavã ɖe aɖaŋuɖoɖo ŋuti ahadze agbagba be míawɔ eŋudɔ. Esia si míawɔ la ate ŋu aɖe vi na mí. (Heb. 12:11) Gake ɖewohi̇̃ esi woɖo aɖaŋu na mí la míedze agbagba be míagblɔ be mía tɔ dzɔ, míabu nɔnɔmea nu tsɛe alo míada fɔbubua ɖe ame bubu dzi. Èwɔ nenema kpɔa? Ne míebu nya la ŋuti la, ɖe míedoa dziku ɖe amesi ɖo aɖaŋua ŋua? Ðe míetɔa ŋku amesi ɖo aɖaŋua na mí la ƒe gbɔdzɔgbɔdzɔwo alo alesi wòɖo aɖaŋu lae abe ɖe míate ŋu atsɔ esia ado taflatse ɖe mía ŋutɔwo míaƒe gbɔdzɔgbɔdzɔwo ta enea? Ðe Biblia ate ŋu akpe ɖe ame ŋu be wòaɖu dzimesusu mawo dzia?
Kpɔɖeŋu Siwo Woŋlɔ Ði Hena Míaƒe Nuxɔxlɔ̃
3. (a) Nukae le Biblia me si ate ŋu akpe ɖe mía ŋu be míatu nukpɔsusu nyuitɔ ɖo ɖe aɖaŋuɖoɖo kple amehehe ŋu? (b) Wɔ nyabiabia siwo le etame la ŋudɔ nadzro nɔnɔme si Saul kple Uziya woɖe fia ɖe aɖaŋuɖoɖo ŋu la me.
3 Hekpe ɖe nuxlɔ̃me tẽ si wona le nya sia ŋuti ŋu la, amesiwo woɖo aɖaŋu na la ƒe agbe me nuteƒekpɔkpɔ ŋutɔŋutɔwo le Mawu ƒe Nya la me. Zi geɖe la aɖaŋuɖoɖoa ganye amehehe elabena ehiã be amesi le exɔm la natrɔ eƒe nɔnɔme alo agbenɔnɔ. Esi netsɔ nyabiabia siwo le ete la le kpɔɖeŋu siawo dometɔ aɖewo me dzrom la, akpɔ be nu geɖe li si aɖe vi na mí katã:
SAUL, KIS ƑE VI: Meɖo to Yehowa bliboe o elabena esi wònɔ aʋa wɔm kple Amalek la, ekpɔ fia la kple lã nyuitɔ kekeakewo ta. (Sam. I, 15:1-11)
Le Saul ƒe nyanuɖeɖe le Samuel ƒe mokaname ƒe aɖaŋu si wòɖo nɛ me la, nukae fia be edi be yeabu vodada la nu tsɛe? (Kp. 20) Amekawo dzie wòdi be yeada fɔbubua ɖo? (Kp. 21) Esi wòlɔ̃ ɖe vodada la dzi mlɔeba la, taflatse kae wòdo? (Kp. 24) Le afisia gɔ̃ hã la, edze abe nuka me koŋ ye wòtsɔ ɖe le ene? (Kp. 25, 30)
UZIYA: Eyi dzudzɔ ʋeʋẽe do ge le Yehowa ƒe gbedoxɔ me togbɔ be nunɔlawo koe wona ŋusẽe be woawɔ esia gake. (Kron. II, 26:16-20)
Esi nunɔlagã dze agbagba be yeaxe mɔ na Fia Uziya la, nukatae fia la do dɔmedzoe? (Tsɔe sɔ kple kpukpui 16.) Nukae do tso eme? (Kp. 19-21)
4. (a) Nukatae wòsesẽ na Saul kple Uziya be woaxɔ aɖaŋuɖoɖo? (b) Nukatae ema nye kuxi gã aɖe egbea hã?
4 Le amesiawo dometɔ ɖesiaɖe gome la, nukatae wòsesẽ nɛ be wòalɔ̃ be yehiã na aɖaŋuɖoɖo? Kuxia koe nye dada, ɖokuiŋudzedze fũ akpa. Egbea ame geɖe hea nuxaxa vaa wo ɖokui dzie le nɔnɔme sia ta. Ne woƒe asi su nusi wobuna be enye ŋkɔxɔxɔ, eɖanye le tsitsi alo nɔƒe ta o ko la, womegaxɔa aɖaŋuɖoɖo o. Wobuna be efia be nane gblẽ le yewo ŋu alo eɖe bubu yewo ŋu. Evɔ la gbɔdzɔgbɔdzɔ ƒe dzesi koŋ ye dada nye. Esia menye nane si woabu nu tsɛ le esi vodada la bɔ ko ta o. Enye mɔ̃ si Satana zãna be wòatsɔ ana ame ƒe tamebubu nado viviti, ale be wòatu afɔkpo Yehowa ƒe lɔlɔ̃ ƒe kpekpeɖeŋu si wònana to eƒe Nya kple eƒe habɔbɔ si wokpɔna dzi. Yehowa xlɔ̃ nu be: “Dada doa ŋgɔ na gbegblẽ, eye ɖokuidodoɖedzi na anyidzedze.”—Lod. 16:18; kpɔ Romatɔwo 12:3; Lododowo 16:5 hã.
5. Zã nyabiabia siwo nye memamã sia ƒe akpa aɖe la natsɔ akpɔ nusiwo woate ŋu asrɔ̃ tso Mose kple Dawid ŋuti nyawo me.
5 Le go bubu me la, kpɔɖeŋu nyuiwo le Ŋɔŋlɔawo me le amesiwo xɔ aɖaŋuɖoɖo la ŋuti. Woate ŋu asrɔ̃ nu vevi geɖe tso esiawo hã me. Bu eŋu kpɔ:
MOSE: Toa ɖo aɖaŋu nyui aɖe na eyama ku ɖe alesi wòate ŋu akpɔ eƒe dɔ triakɔa gbɔe be magagblẽ nu le eƒe lãmesẽ ŋuti o la ŋu. Mose ɖo to hewɔ eŋudɔ enumake. (Mose II, 18:13-24)
Togbɔ be ŋusẽ gã nɔ Mose si hã la, nukatae wòɖo to aɖaŋuɖoɖo si me susu le? (Tsɔe sɔ kple Mose IV, 12:3.) Aleke gbegbee nɔnɔme ma le vevie na mí egbeae? (Zef. 2:3)
DAWID: Ewɔ ahasi, eye wòwɔ ɖoɖo be woawu nyɔnua srɔ̃ ale be yeakpɔ mɔ aɖee be yeatsyɔ nu yewoƒe ahasiwɔwɔa dzi. Exɔ ɣleti aɖewo hafi Yehowa dɔ Natan be wòaɖaka ŋku me na Dawid. (Sam. II, 11:2–12:12)
Ðe Dawid do dɔmedzoe le mokaka la ta, bu vodada la nu tsɛ aɖe, alo dze agbagba be yeada fɔbubua ɖe ame aɖe dzia? (Sam. II, 12:13; Ps. 51:1-5) Ðe nyateƒe si wònye be Mawu xɔ Dawid ƒe dzimetɔtrɔ la fia be Dawid kple eƒe aƒekɔa vo tso eƒe nɔnɔme gbegblẽ si wòɖe fia la ƒe emetsonu gbegblẽwo si mea? (Sam. II, 12:10, 11, 14; Mose II, 34:6, 7)
6. (a) Aleke Dawid se le eɖokui me ɖe amesiwo na aɖaŋuɖoɖo nyui eyama la ŋuti? (b) Viɖe kae míate ŋu akpɔ ne míelɔ̃na faa xɔa aɖaŋuɖoɖo ma tɔgbe? (d) Nukae mele ne míaŋlɔ be o ne wohe to na mí vevie?
6 Fia Dawid nya viɖe si le toɖoɖo aɖaŋuɖoɖo nyui me la nyuie, eye ɣeaɖeɣi la eda akpe na Mawu ɖe amesi dzi wòto va la ta. (Sam. I, 25:32-35; kpɔ Lododowo 9:8 hã.) Ðe míele nenema? Ne nenemae la, akpɔ mía ta tso nyagbɔgblɔ kple nuwɔna geɖe siwo ate ŋu ahe nuxaxa vɛ la me. Gake ne míege ɖe nɔnɔme siwo he tohehe sesẽ vɛ na mí me, abe alesi wònɔ na Dawid le eƒe nuvɔ̃ si wòwɔ kple Bat-Seba me ene la, mele be míaŋe aɖaba aƒu nyateƒenya sia dzi o be tohehe la nye Yehowa ƒe lɔlɔ̃ ɖeɖe fia hena míaƒe nyui mavɔ.—Lod. 3:11, 12; 4:13.
Nɔnɔme Xɔasi Siwo Woatu Ðo
7. Nɔnɔme kae Yesu gblɔ be ele be wòanɔ amewo si hafi woate ŋu age ɖe Fiaɖuƒe la me?
7 Be kadodo nyui nanɔ mía kple Yehowa kple mía nɔvi Kristotɔwo dome la, ele be míatu nɔnɔme aɖewo ɖo ɖe mía ŋutɔwo mía ɖokui me. Yesu tɔ asi nɔnɔme siawo dometɔ ɖeka dzi esime wòtsɔ ɖevi sue aɖe ɖo eƒe nusrɔ̃lawo titina eye wògblɔ be: “Ne mietrɔ, eye miezu abe ɖeviwo ene o la, miele yiyi ge ɖe dziƒofiaɖuƒe la me akpɔ o. Eyaŋuti amesi ke bɔbɔ eɖokui ɖe anyi abe nenem ɖevi sia ene la, eyae ƒo ta le dziƒofiaɖuƒe la me.” (Mat. 18:3, 4) Ehiã be nusrɔ̃la mawo nawɔ tɔtrɔ. Ele be woaɖe asi le woƒe dada ŋuti eye woatu ɖokuibɔbɔɖeanyi ɖo.
8. (a) Amekawoe wòhiã be míabɔbɔ mía ɖokui na, eye nukatae? (b) Ne míele nenema la, aleke míawɔ nu ɖe aɖaŋuɖoɖo ŋutie?
8 Emegbe la apostolo Petro ŋlɔ ɖo ɖe ehati Kristotɔwo bena: “Mi katã mibɔbɔ mia ɖokui ɖe mia nɔewo te, eye mitsɔ ɖokuibɔbɔɖeanyi hetsyɔ; elabena Mawu tsia tre ɖe dadalawo ŋuti; ke evea ɖokuibɔbɔlawo nu.” (Pet. I, 5:5) Míenya be ele be míabɔbɔ mía ɖokui ɖe anyi le Mawu ƒe ŋku me, gake ŋɔŋlɔ sia le gbɔgblɔm bena ele be míabɔbɔ mía ɖokui, alo míabɔbɔ mía ɖokui le susu me le kadodo kple mía hati xɔsetɔwo me hã. Ne míele alea la, míatsɔ movidzɔdzɔ atu afɔkpo woƒe susu siwo woado ɖa la o. Míanɔ klalo be míasrɔ̃ nu tso mía nɔewo gbɔ. (Lod. 12:15) Eye ne mía nɔviwo kpɔe be ehiã be yewoana aɖaŋuɖoɖo si nye ɖɔɖɔɖo la, ekema le dzesi dedee be Yehowa toa esia dzi lɔlɔ̃tɔe trɔa asi le mía ŋu ta la, míagbee o.—Ps. 141:5.
9. (a) Nɔnɔme vevi kae do ƒome kplikplikpli kple ɖokuibɔbɔ? (b) Nukatae wòle be míatsɔ ɖe le ŋusẽ si míaƒe agbenɔnɔ akpɔ ɖe ame bubuwo dzi la me?
9 Nɔnɔme bubu si do ƒome kplikplikpli kple ɖokuibɔbɔ enye ɖetsɔleme vavãtɔ na ame bubuwo ƒe nyonyo. Míate ŋu asi le nyateƒe si wònye be nusi míewɔna la kpɔna ŋusẽ ɖe ame bubuwo dzi la nu o. Apostolo Paulo ɖo aɖaŋu na Kristotɔ gbãtɔ siwo nɔ Korinto kple Roma la be woabu ame bubuwo ƒe dzitsinya ŋu. Menɔ gbɔgblɔm be woaɖe asi le nusiwo katã woa ŋutɔwo di la ŋu o, gake eƒoe ɖe wo nu be woagawɔ naneke si ade dzi ƒo na ame bubu be wòawɔ nusi eƒe dzitsinya gblɔ nɛ be menyo o la be wòagblẽ le gbɔgbɔ me o. Le gɔmesesea me kɔkɔ keŋkeŋ me la, Paulo ŋlɔe be: “Ame aɖeke nagadi ye ŋutɔ tɔ o, ke nusi nye ame bubu tɔ la boŋ. . . . Azɔ la ne miele nu ɖum alo miele nu nom alo miele dɔ aɖe wɔm la, miwɔ ye katã na Mawu ƒe kafukafu. Migazu nukikli na Yudatɔwo kple Helatɔwo kple Mawu ƒe hame la o.”—Kor. I, 10:24-33; 8:4-13; Rom. 14:13-23.
10. Nukae aɖee afia be míetsɔe wɔ míaƒe nɔnɔme be míawɔ ɖe Ŋɔŋlɔa ƒe aɖaŋuɖoɖo ma dzi?
10 Ðe nenye amesi tsɔe ɖo dɔe be natsɔ ame bubuwo ƒe nyui aɖo ŋgɔ na nusi wò ŋutɔ nedia? Woate ŋu awɔ esia le mɔ geɖe nu, gake bu kpɔɖeŋu aɖe ŋuti kpɔ: Ne woaƒo nu tso eŋuti gbadzaa la, awudodo kple atsyɔ̃ɖoɖo nye amesiame ŋutɔ ƒe nya, zi alesi míewɔe le ʋuɖɔɖɔ me eye wòle dzadzɛ ko. Gake ne èva see bena le amesiwo le wò nutoa me ƒe nɔnɔmewo ta wò awudodo alo atsyɔ̃ɖoɖo ƒe nɔnɔme le mɔ xem na amewo bena womagaɖo to Fiaɖuƒe gbedasia o la, ɖe nawɔ asitɔtrɔa? Ðe ame bubu ƒe agbe le vevie na wò wu wò ŋutɔ ɖokuiwò ŋu dzedzea?
11. Nukae ɖee fia be ele vevie be míatu nɔnɔme siawo ɖo ne míeɖoe vavã be míanye Kristotɔwo?
11 Ne nɔnɔme siwo me míedzro le etame la va zu míaƒe amenyenye ƒe akpa aɖe la, esia nana ɖaseɖiɖi be Kristo ƒe tamesusu le mía si sum. Yesu ɖo kpɔɖeŋu deblibo ɖi le ɖokuibɔbɔ gome. (Yoh. 13:12-15; Fil. 2:5-8) Le ɖetsɔleme ɖeɖe fia ame bubuwo me la, le esi teƒe be wòanɔ eya ŋutɔ ɖokui ŋu dzem la, eɖo kpɔɖeŋu ɖi na mí be míasrɔ̃.—Rom. 15:2, 3.
Megagbe Yehowa Ƒe Amehehe o
12. (a) Tɔtrɔ kawoe wòhiã be mí katã míawɔ be nɔnɔme si dzea Mawu ŋu la nanɔ mía si? (b) Nukae akpe ɖe mía ŋu?
12 Esi mí katã míenye nuvɔ̃wɔlawo ta la, asitɔtrɔ le míaƒe nɔnɔme, nuƒoƒo kple nuwɔna ŋuti hiã hafi míate ŋu aɖe mía Mawu ƒe amenyenye afia. Ehiã be míado “ame yeye” la. (Kol. 3:5-14; Tito 2:11-14) Aɖaŋuɖoɖo kple amehehe kpena ɖe mía ŋuti be míade dzesi afisiwo asitɔtrɔ hiã le eye míakpɔ alesi míawɔ woe.
13. (a) Mɔ kawo nue Yehowa to na aɖaŋuɖoɖo kple amehehe mí katã? (b) Nukae wòle be míatsɔe awɔ?
13 Mɔfiafia ma ƒe dzɔtsoƒe koŋ ye nye Biblia ŋutɔ. (Tim. II, 3:16, 17) Emegbe to Biblia-srɔ̃gbalẽwo kple kpekpe siwo Yehowa ƒe habɔbɔ si wokpɔna wɔna na mí dzi la, ekpena ɖe mía ŋu be míanya alesi míazãe. Ðe míatsɔ ɖokuibɔbɔ ade dzesie be míehiã nɛ—ne míesee kpɔ kura gɔ̃ hã—eye míadze agbagba enuenu be míawɔ ɖɔɖɔɖoa?
14. Kpekpeɖeŋu bubu kae Yehowa nana mí ɖekaɖekae?
14 Yehowa megblẽa mí ɖi be míaʋli le mía ɖokui si le nya siwo anye kuxi tɔxɛ na mí me o. To lɔlɔ̃ ƒe ɖetsɔleme dzi la, ewɔa kpekpeɖeŋu ƒe mɔnuɖoɖo na mí. To aƒeme Biblia nusɔsrɔ̃ dzi la, ame miliɔn geɖe va kpɔ viɖe tso kpekpeɖeŋu ma me. Enye agbanɔamedzi tɔxɛ na dzilawo be woahe wo viwo hena wo ta kpɔkpɔ tso nuwɔna siwo ahe dzigbagbã geɖe vɛ emegbe la me. (Lod. 6:20-35; 15:5) Le hamea me hã enye agbanɔamedzi na amesiwo dze le gbɔgbɔ me la be woazã Ŋɔŋlɔawo atsɔ aɖɔ amewo ɖoe ne wokpɔ be ehiã, gake woawɔe le dɔmefafa ƒe gbɔgbɔ me. (Gal. 6:1, 2) To mɔ siawo dzi la Yehowa ɖoa aɖaŋu na mí henana amehehe mí be míasubɔ ye abe amesiwo wɔ ɖeka ene.
Numetoto
● Aleke Yehowa kpena ɖe mía ŋu lɔlɔ̃tɔe be míakpɔ afisi mía ŋutɔ míehiã na asitɔtrɔ le?
● Nukatae wòsesẽna na ame geɖe be woaxɔ aɖaŋuɖoɖo? Aleke gbegbee esia nye ŋkubiãnyae?
● Nɔnɔme xɔasi kawoe akpe ɖe mía ŋu be míaxɔ aɖaŋuɖoɖo? Aleke Yesu ɖo esia ƒe kpɔɖeŋu ɖie?