Le xexea me godoo la, susu vovovowoe le amewo si ku ɖe aha sesẽ nono ŋu. Le ame aɖewo gome la, wonoa aha sesẽ ɣeaɖewoɣi ne wo kple wo xɔlɔ̃wo le nu ɖum ɖekae. Ame aɖewo hã tiae be yewomano aha sesẽ kura o. Eye ame aɖewo hã noa aha muna. Nya kae Biblia gblɔ tso aha sesẽ nono ŋu?

1. Ðe aha sesẽ nono nye nu gbegblẽa?

Biblia megblɔ be aha sesẽ nono nye nu gbegblẽ o. Ke boŋ, esi Biblia nɔ nu ƒom tso nu nyui vovovo siwo Mawu na mí ŋu la, egblɔ hã be ‘wain doa dzidzɔ na amegbetɔ ƒe dzi.’ (Psalmo 104:14, 15) Ŋutsu kple nyɔnu nuteƒewɔla siwo ŋu woƒo nu tsoe le Biblia me la dometɔ aɖewo no aha sesẽ.—1 Timoteo 5:23.

2. Aɖaŋu kae Biblia ɖo na ame siwo tiae be yewoano aha sesẽ?

Yehowa meda asi ɖe aha geɖe nono kple ahamumu dzi o. (Galatiatɔwo 5:21) Eƒe Nya, Biblia, gblɔ be: “Mèganɔ aha tsu nolawo . . . dome o.” (Lododowo 23:20) Eya ta ne míetiae be míano aha sesẽ, eɖanye le ame dome alo míawo ɖeɖee li o, mele be míano aha ale gbegbe be míagava nɔ nuwo ŋu bum nyuie o, alo wòana be míagaɖɔ ŋu ɖo le nuƒoƒo kple nuwɔna me o, alo be wòagblẽ nu le míaƒe lãmesẽ ŋu o. Ne míetea ŋu ɖua mía ɖokui dzi le ahanono gome o la, ke anyo be míadzudzɔ enono kura.

3. Ne ame aɖe tiae be yeano aha alo yemanoe o la, aleke míate ŋu ade bubu eƒe nyametsotsoa ŋu?

Ame sia ame ŋutɔe atso nya me be yeano aha sesẽ loo alo yemanoe o. Ne ame aɖe noa aha le ŋuɖɔɖo me la, mele be míabu fɔe o, eye ne ame aɖe medi be yeano aha o la, mele be míaƒoe ɖe enu be wòanoe o. (Romatɔwo 14:10) Míate ŋu atso nya me be míano aha o ne míekpɔe be míaƒe ahanono aɖe fu na ame aɖe. (Xlẽ Romatɔwo 14:21.) Esia aɖee afia be ‘míedia míawo ŋutɔwo ƒe nyonyo ko o, ke míedia ame bubu tɔ hã.’—Xlẽ 1 Korintotɔwo 10:23, 24.

SRƆ̃ NU BUBUWO

4. Dae kpɔ nenye be àno aha loo alo mànoe o.

Nu kae nye Yesu ƒe susu le aha sesẽ nono ŋu? Míate ŋu akpɔ ŋuɖoɖoa ne míexlẽ nu tso nukunu gbãtɔ si Yesu wɔ la ŋu. Mixlẽ Yohanes 2:1-11, eye miadzro biabia siawo me:

• Nu kae nukunu sia fia mí tso ale si Yesu bua aha sesẽ nono kple ame siwo nonɛ la ŋu?

• Esi wònye be Yesu megblɔ be ahanono nye nu gbegblẽ o ta la, aleke wòle be Kristotɔ nabu ame si tiae be yeano aha sesẽ?

Togbɔ be Kristotɔ ate ŋu atiae be yeano aha sesẽ hã la, esia mefia be ɣesiaɣie wòasɔ be wòanoe o. Mixlẽ Lododowo 22:3, eyome mikpɔe ɖa nenye be asɔ be nàno aha le nɔnɔme vovovo siwo gbɔna me loo alo masɔ o:

• Èle ʋu ku ge alo èle mɔ̃ aɖe zã ge atsɔ awɔ dɔ.

• Èfɔ fu.

• Ðɔkta gblɔ na wò be mègano aha sesẽ o.

• Mètea ŋu ɖua ɖokuiwò dzi le aha sesẽ nono gome o.

• Dukɔa ƒe se meɖe mɔ na wò be nàno aha sesẽ o.

• Ne ame aɖe si tsri aha sesẽ nono le esi wònye kuxi nɛ kpɔ ta la le gbɔwò.

Ne èɖo srɔ̃ɖekplɔ̃ alo èkpe amewo na wɔna bubu aɖe la, ɖe wòahiã be nàna aha sesẽ ameawoa? Mikpɔ VIDEOA be nàkpɔ nu si akpe ɖe ŋuwò nàtso nya me le nya sia ŋu.

VIDEO: Ðe Wòle Be Mana Aha Sesẽ Ame Siwo Mekpea? (2:41)

Mixlẽ Romatɔwo 13:13 kple 1 Korintotɔwo 10:31, 32. Ne miexlẽ mawunyakpukpuiawo dometɔ ɖe sia ɖe vɔ la, midzro biabia sia me:

• Aleke gɔmeɖose sia dzi wɔwɔ ate ŋu akpe ɖe ŋuwò be nàtso nya me wòadze Yehowa ŋu?

5. Tso nya me le aha agbɔsɔsɔme si nàno ŋu

Ne ètiae be yeano aha sesẽ la, na nya sia nanɔ susu me na wò be: Togbɔ be Yehowa megblɔ be aha sesẽ nono nye nu gbegblẽ o hã la, meda asi ɖe aha geɖe nono ya dzi o. Nu ka tae? Mixlẽ Hosea 4:11, 18, eye miadzro nyabiase sia me:

• Nu kae ate ŋu adzɔ ne ame aɖe no aha fũu akpa?

Nu kae ate ŋu akpe ɖe mía ŋu be míagano aha fũu akpa o? Ehiã be míanya aha agbɔsɔsɔme si míate ŋu ano. Mixlẽ Lododowo 11:2, eye miadzro nyabiase sia me:

• Nu ka tae wòanyo be nàɖo seɖoƒe na ɖokuiwò le aha agbɔsɔsɔme si nàno gome?

6. Nu kae ate ŋu akpe ɖe ame aɖe ŋu be wòadzudzɔ aha geɖe nono?

VIDEO: ‘Nye Agbenɔnɔ Tim’ (6:32)

• Le videoa me la, ne Dmitry no aha la, aleke wòwɔa nui?

• Ðe wòte ŋu dzudzɔ ahanono enumakea?

• Aleke wòwɔ te ŋu va dzudzɔ aha geɖe nono mlɔeba?

Mixlẽ 1 Korintotɔwo 6:10, 11, eye miadzro biabia siawo me:

• Aleke gbegbee ahamumu nye ŋkubiãnyae?

• Nu kae ɖee fia be ahamulawo ate ŋu atrɔ woƒe agbenɔnɔ?

Mixlẽ Mateo 5:30, eye miadzro biabia sia me:

• Nya si Yesu gblɔ be ame nalã eƒe asi ɖa la fia be ehiã be míaɖe asi le nuwɔna aɖewo ŋu ale be míaƒe nu nadze Mawu ŋu. Ne ele sesẽm na wò be nàdzudzɔ aha geɖe nono la, nu kae nàte ŋu awɔ?a

Mixlẽ 1 Korintotɔwo 15:33, eye miadzro biabia sia me:

• Nu kae adzɔ ne èdea ha kple aha geɖe nolawo?

NU SIWO MÍESRƆ̃

Yehowa ƒe nunanae aha nye, etsɔe na mí be wòado dzidzɔ na mí. Gake meda asi ɖe aha tsu nono kple ahamumu dzi o.

Numetoto

• Nya kae Biblia gblɔ tso aha sesẽ nono ŋu?

• Nu kawoe aha geɖe nono gblẽna le ame ŋu?

• Ne ame aɖe tiae be yeano aha alo yemanoe o la, aleke míate ŋu ade bubu eƒe nyametsotsoa ŋu?

KU NU ME TSO NYATIA ŊU

Aleke sɔhɛwo awɔ atso nya me nyuie le aha sesẽ nono ŋu?

Bu Nuwo Ŋu Nyuie Hafi Nànoe (2:31)

Xlẽ nu tso nu siwo ate ŋu akpe ɖe ŋuwò be nàdzudzɔ aha tsu nono la ŋu.

“Aha Sesẽ Zazã Le Ŋuɖɔɖo Me” (Gbetakpɔxɔ, January 1, 2010)

Ðe wòle be Kristotɔwo nakpe ahanokpluwo alo ado wo ɖe dzia?

“Nyabiabia Siwo Tso Exlẽlawo Gbɔ” (Gbetakpɔxɔ, February 15, 2007)

Xlẽ agbemeŋutinya si ƒe tanyae nye “Menye Ahanoxe,” be nàkpɔ nu si kpe ɖe ŋutsu aɖe ŋu be wòdzudzɔ aha tsu nono.

“Biblia Le Amewo Ƒe Agbenɔnɔ Trɔm” (Gbetakpɔxɔ, May 1, 2012)

Awu si tɔgbi mía dometɔ ɖe sia ɖe dina be yeado kple ale si yeadzra ɖoe la le vovovo. Biblia ƒe gɔmeɖose, alo mɔfiame bɔbɔe aɖewo li siwo ate ŋu akpe ɖe mía ŋu be míadzra ɖo ale si míedii eye míaƒe nu nadze Yehowa ŋu hã. Na míadzro mɔfiame mawo dometɔ aɖewo me kpɔ.

1. Biblia ƒe mɔfiame kawoe ate ŋu akpe ɖe mía ŋu míanya awu siwo míado kple ale si míadzra ɖoe?

Ele be míado “awu ɖe nɔnɔme nyui me, le ŋukpekpe kple ŋuɖɔɖo me,” míanɔ dzadzɛ eye míaƒe dzadzraɖo naɖee afia be ‘míevɔ̃a Mawu.’ (1 Timoteo 2:9, 10) Bu mɔfiame ene siawo ŋu kpɔ: (1) Ele be míaƒe awudodo nanɔ “nɔnɔme nyui me.” Abe ale si nèkpɔnɛ le míaƒe hame ƒe kpekpewo me ene la, Yehowa ƒe amewo lɔ̃a awu ƒomevi vovovowo dodo, gake míaƒe awudodo kple ɖakpakpa alo ɖawɔwɔ ɖenɛ fiana be míedea bubu Mawu si míesubɔna ŋu. (2) Awudodo “le ŋukpekpe” me fia be, mele be míaƒe nudodowo nanyɔ gbɔdɔdɔ ƒe dzodzro ɖe amewo me alo ahe susu ava mía ɖokuiwo dzi fũu akpa o. (3) Awudodo le “ŋuɖɔɖo me” fia be mele be míakplɔ awudodo ƒe atsyã ɖe sia ɖe si wobe ele tsia dzi la ɖo o. (4) Ele be míaƒe dzedzeme naɖee afia ɣesiaɣi be ‘míevɔ̃a Mawu,’ eye wòana amewo nakpɔe be míenye Mawu vavã la subɔlawo.—1 Korintotɔwo 10:31.

2. Nu ka tae wòle be míabu míaƒe haxɔsetɔwo ŋu ne míele awu si míado la tiam?

Togbɔ be ablɔɖe le mía si be míatia awu si ƒomevi míado hã la, ele be míabu ale si wòate ŋu aɖe fu na ame bubuwoe la ŋu. Eya ta, míedzea agbagba vevie be míagaɖia ame aɖeke nu o, ke boŋ be ‘míadze mía havi ŋu hena eƒe nyonyo, be míatui ɖo.’—Xlẽ Romatɔwo 15:1, 2.

3. Aleke míaƒe awudodo kple dzadzraɖo ate ŋu ana amewo nadi be yewoasrɔ̃ nu tso Yehowa ŋu?

Míedzea agbagba vevie be míado awu le nɔnɔme nyui me ɣeawokatãɣi, gake míeɖɔa ŋu ɖo etɔxɛe ne míedi be míade hame ƒe kpekpewo alo akpɔ gome le gbeƒãɖeɖedɔa me. Míedi be míaƒe dzedzeme naɖe fu na amewo si awɔe be womadi be yewoase nya nyuia o. Ke boŋ, míedi be míaƒe dzedzeme nahe amewo ɖe nyateƒea ŋu eye wòaɖo “atsyɔ̃ na Mawu, mía Xɔla, ƒe nufiafia.”—Tito 2:10.

SRƆ̃ NU BUBUWO

4. Ne míaƒe dzedzeme sɔ nyuie la, míedea bubu Yehowa ŋu

Nu kae nye susu vevitɔ si tae wòle be míakpɔ egbɔ be míaƒe dzedzeme sɔ nyuie? Mixlẽ Psalmo 47:2, eye miadzro biabia siawo me:

• Esi wònye be míenye Yehowa ƒe Ðasefowo ta la, aleke wòle be míaƒe awudodo kple dzadzraɖo nanɔ?

• Ðe nèsusu be ehiã kokoko be míatsi dzi ɖe míaƒe dzedzeme ŋu ne míedi be míade kpekpewo alo akpɔ gome le gbeƒãɖeɖedɔa mea? Nu ka tae nèɖo eŋu nenema?

5. Nu kae akpe ɖe mía ŋu be míaƒe awudodo kple dzadzraɖo nasɔ nyuie?

Mikpɔ VIDEOA.

VIDEO: “Miwɔ Nuwo Katã Hena Mawu Ƒe Kafukafu” (10:18)

Míaƒe awuwo ɖaxɔ asi alo womeɖaxɔ asi o, ele be woanɔ dzadzɛ eye woasɔ ɖe nɔnɔme si me míele nu. Mixlẽ 1 Korintotɔwo 10:24 kple 1 Timoteo 2:9, 10. Eyome, miadzro nu si tae wòle be míaƒo asa na awu siawo tɔgbi dodo la me:

• Awu siwo mele dzadzɛ o, alo awudodo ɖewoɖewoe.

• Awu siwo míaa ame kpaɖii, esiwo nana ame ƒe teƒeteƒewo nɔa dzedzem, alo esiwo nyɔa gbɔdɔdɔ ƒe dzodzro ɖe ame me.

Togbɔ be Kristotɔwo mele Mose ƒe Sea te o hã la, Sea na míenya Yehowa ƒe susu le nuwo ŋu. Mixlẽ 5 Mose 22:5, eye miadzro nyabiase sia me:

• Nu ka tae wòle be míaƒo asa na awudodo kple dzadzraɖo siwo nana ŋutsuwo dzena abe nyɔnuwo ene alo nana nyɔnuwo dzena abe ŋutsuwo ene?

Mixlẽ 1 Korintotɔwo 10:32, 33 kple 1 Yohanes 2:15, 16, eye miadzro nyabiase siawo me:

• Nu ka tae wòle be míabu eŋu nyuie kpɔ be ɖe míaƒe awudodo kple dzadzraɖo ɖiaa nutoa me tɔ aɖewo alo hamea me tɔwo nu hã?

• Awudodo kple dzadzraɖo kawo tɔgbie bɔ ɖe miaƒe nutoa me?

• Ðe nèsusu be awudodo kple dzadzraɖo ƒe atsyã mawo dometɔ aɖewo masɔ na Kristotɔwo oa? Nu ka tae nèɖo eŋu nenema?

NU SIWO MÍESRƆ̃

Ne míetsoa nya me nyuie le awu si míado kple ale si míadzra ɖoe ŋu la, míeɖenɛ fiana be míedea bubu Yehowa kple ame bubuwo ŋu.

Numetoto

• Nu ka tae ale si míedoa awui kple ale si míedzrana ɖoe la le vevie na Yehowa?

• Biblia ƒe mɔfiame siwo ate ŋu akpe ɖe mía ŋu míatso nya me le míaƒe awudodo kple dzadzraɖo ŋu la dometɔ aɖewo ɖe?

• Nu kae míaƒe awudodo kple dzadzraɖo ate ŋu ana amewo nasusu tso subɔsubɔ vavãtɔ ŋu?

KU NU ME TSO NYATIA ŊU

Nyati sia ana nàkpɔ ale si wò awudodo ate ŋu ana amewo nabu wòe.

“Aleke Nye Dzedzeme Le?” (Nyati sia le jw.org)

Le nyati sia me la, àkpɔ nu si tae wòle vevie be nàbu nuwo ŋu nyuie hafi atá nu ɖe ŋuti (alo awɔ tattoo).

“Nya Kae Biblia Gblɔ Tso Nutáta Ðe Ŋuti Ŋu?” (Nyati sia le jw.org)

Xlẽ nu tso mɔfiame bubu siwo ate ŋu akpe ɖe mía ŋu míawɔ nyametsotso nyuiwo la ŋu.

“Ðe Wò Awudodo Dea Bubu Mawu Ŋua?” (Gbetakpɔxɔ, September 2016)

Aleke nyɔnu aɖe si di vevie be yeadze Mawu ŋu la na susu nyuitɔ va su esi le ame bubuwo ƒe awudodo kple dzadzraɖo ŋu?

“Amewo Ƒe Awudodo Kple Dzadzraɖoe Nye Nukikli Nam” (Nyɔ! ƒe nyati)