“Miheyi Ðawɔ . . . Nusrɔ̃lawo”

1-2. (a) Le Yesu ƒe nya si dze le Mateo 28:18-20 nu la, dɔ kae nye dɔ vevitɔ si wòde asi na Kristo hamea? (b) Biabia kawo mee míadzro le nyati sia me?

LE YESU ƒe tsitretsitsi megbe la, ewɔ ɖoɖo be yeƒe nusrɔ̃lawo nava do go ye le to aɖe gbɔ le Galilea. Esi apostoloawo va ƒo ƒu ɖe afi ma la, woanya nɔ mɔ kpɔm na nu si gbɔna dzɔdzɔ ge la vevie. (Mat. 28:16) Ðewohĩ, ɣemaɣie Yesu ɖe “eɖokui fia nɔvi siwo wu alafa atɔ̃ zi ɖeka.” (1 Kor. 15:6) Nu ka tae Yesu yɔ eƒe nusrɔ̃lawo be woava kpekpe sia? Nu si tae nye be, edi be yeade dɔ vevi aɖe asi na wo; egblɔ na wo be: “Miheyi ɖawɔ dukɔwo katã me tɔwo woanye nusrɔ̃lawo.”—Xlẽ Mateo 28:18-20.

² Nusrɔ̃la siwo se Yesu ƒe nyawo lae va zu Kristo hame si nɔ anyi le ƒe alafa gbãtɔ me la me tɔwo. Dɔ vevitɔ si kpɔ hame ma ŋkumee nye be wòawɔ ame geɖewo woanye Kristo ƒe nusrɔ̃lawo.b Egbea, Kristotɔ vavãwo ƒe hame akpe geɖewoe le anyigbaa katã dzi, eye dɔ vevitɔ ma kee kpɔ hame mawo ŋkume. Le nyati sia me la, míadzro biabia ene siawo me: Nu ka tae nusrɔ̃lawɔwɔdɔa le vevie ŋutɔ? Afɔ kawoe wòle be míaɖe be míawɔ nusrɔ̃lawo? Ðe Kristotɔ ɖe sia ɖe wɔa akpa aɖe le nusrɔ̃lawo wɔwɔ dɔa mea? Eye nu ka tae míehiã dzigbɔɖi le dɔ sia wɔwɔ me?

 3. Le Yohanes 14:6 kple 17:3 ƒe nya nu la, nu ka tae nusrɔ̃lawɔwɔdɔa le vevie ŋutɔ?

³ Nu ka tae nusrɔ̃lawɔwɔdɔa le vevie ŋutɔ? Nu si tae nye be, Kristo ƒe nusrɔ̃lawo koe ate ŋu anye Mawu xɔlɔ̃wo. Gakpe ɖe eŋu la, Kristo yomedzelawo kpɔa dzidzedze le agbe me fifia eye mɔkpɔkpɔ le wo si be yewoava nɔ agbe tegbee le etsɔme. (Xlẽ Yohanes 14:6; 17:3) Eme kɔ ƒãa be, agbanɔamedzi gã aɖee Yesu tsɔ de mía si, gake menye míawo ɖeɖee le dɔ sia wɔm o. Apostolo Paulo ŋlɔ tso eya kple eƒe zɔhɛ kplikplikpli aɖewo ŋu be: “Mawu ƒe hadɔwɔlawo míenye.” (1 Kor. 3:9) Mɔnukpɔkpɔ gã ka gbegbee nye esi Yehowa kple Kristo siaa na mí amegbetɔ madeblibowo!

 4. Nu kae míate ŋu asrɔ̃ tso Ivan kple Matilde ƒe nuteƒekpɔkpɔa me?

⁴ Míate ŋu akpɔ dzidzɔ geɖe le nusrɔ̃lawɔwɔdɔa me. Bu Ivan kple srɔ̃a, Matilde, siwo le Colombia la, ƒe kpɔɖeŋua ŋu kpɔ. Woɖi ɖase na ɖekakpui aɖe si ŋkɔe nye Davier, si gblɔ na wo be: “Medi be mawɔ tɔtrɔwo, gake esesẽ nam.” Davier nye kɔdala si zãa atike vɔ̃ɖiwo, elɔ̃a aha geɖe nono, eye eya kple eƒe ahiãvi, Erika, ye li ɖekae. Ivan gblɔ be: “Kɔƒe saɖeaga aɖe mee wònɔ esi míedze Biblia sɔsrɔ̃ gɔme kplii, eye esia bia be míado míaƒe gasɔwo gaƒoƒo geɖe to mɔ siwo wɔ ba finyafinya la dzi. Esi Erika de dzesii be Davier le asi ɖem le eƒe nɔnɔme gbegblẽwo ŋu la, eya hã lɔ̃ be míasrɔ̃ Biblia kpli ye.” Ɣeyiɣi aɖe megbe la, Davier dzudzɔ atike vɔ̃ɖiwo zazã, ahanono, kple kɔdada hã. Azɔ hã, eɖe Erika le se nu. Matilde gblɔ be: “Esi Davier kple Erika siaa xɔ nyɔnyrɔ le ƒe 2016 me la, míeɖo ŋku edzi be Davier gblɔna ɣesiaɣi be, ‘Medi be mawɔ tɔtrɔwo, gake esesẽ nam.’ Ewɔ dɔ ɖe mía dzi ale gbegbe be aɖatsi ge le mo na mí.” Ɛ̃, ne míekpe ɖe amewo ŋu wova zu Kristo ƒe nusrɔ̃lawo la, míekpɔa dzidzɔ geɖe ŋutɔ.

 5. Nu kae nye afɔ gbãtɔ si wòle be míaɖe be míawɔ nusrɔ̃lawo?

⁵ Afɔ gbãtɔ si wòle be míaɖe be míawɔ nusrɔ̃lawo ye nye be ‘míadi’ ame siwo di be yewoasrɔ̃ nu tso Yehowa ŋu. (Mat. 10:11) Ne míeɖia ɖase na ame sia ame le míaƒe anyigbamamaa me hetoa esia me wɔna ɖe se si Kristo de na mí be míaɖe gbeƒã dzi la, ekema, míeɖoa kpe edzi be míenye Yehowa Ðasefowo kple Kristo yomedzela vavãwo.

 6. Nu kae ate ŋu akpe ɖe mía ŋu be míakpɔ dzidzedze le gbeƒãɖeɖedɔa me?

⁶ Ame aɖewo di vevie be yewoasrɔ̃ Biblia me nyateƒea, ke hã, ewɔna na mí le gɔmedzedzea me be ame geɖe siwo míedoa goe la metsɔ ɖeke le gbedeasia me o. Ðewohĩ, ahiã be míanyɔ woƒe ɖetsɔleme. Hafi míate ŋu akpɔ dzidzedze le gbeƒãɖeɖedɔa me la, ehiã be míadzra ɖo ɖe gbeƒãɖeɖedɔa ŋu nyuie. Ðoe wò taɖodzinu be nàƒo nu tso nya siwo le vevie na ame siwo nàdo goe le gbeadzi la ŋu. Trɔ asi le ale si nàhe susu ayi nyaa dzii la ŋu nyuie.

 7. Aleke nàte ŋu adze dzeɖoɖo gɔme kple ame aɖe, eye nu ka tae nèsusu be ele vevie be míaɖo to amea ahade bubu eŋu?

⁷ Le kpɔɖeŋu me, àte ŋu abia aƒemenɔlaa be: “Meɖe kuku, àdi be yeagblɔ nu si nèsusu tso nya sia ŋu nama? Kuxi siwo me tom míele egbea la le fu ɖem na amewo le xexea me godoo. Èsusu be dziɖuɖu aɖe si aɖu xexea katã dzi la hiã hafi woate ŋu akpɔ xexea me ƒe kuxiwo gbɔa?” Eyome, dzro Daniel 2:44 me kplii. Alo àte ŋu abia aƒelika aɖe be: “Le wò susu nu la, mɔ kae nye nyuitɔ si nu woahe ɖeviwo le? Madi be manya wò susu le biabia ma ŋu.” Eyome, dzro 5 Mose 6:6, 7 me kplii. Nyati ka ke ŋue nèɖo be yeaƒo nu tsoe o, de ŋugble le ame siwo ase wò nyawo la ŋu. Bu ale si nu si tututu Biblia fia nyanya aɖe vi na woe ŋu. Ne èle dze ɖom kpli wo la, ele vevie be nàɖo to wo ne wole woƒe susuwo gblɔm eye nàde bubu wo ŋu. Ne èwɔe alea la, àse woƒe nɔnɔmewo gɔme nyuie wu, eye woawo hã woalɔ̃ faa be yewoase wò nyawo.

 8. Nu ka tae tɔtrɔyiwo wɔwɔ bia kutrikuku?

⁸ Hafi ame aɖe nava lɔ̃ be nàsrɔ̃ Biblia kpli ye la, ahiã be nàtrɔ ayi egbɔ zi gbɔ zi geɖe eye esia biaa ɣeyiɣi geɖe hã. Nu ka tae? Nu si tae nye be, ɖewohĩ, màkpɔ amea le eƒe me ne ègatrɔ yi egbɔ ake o. Azɔ hã, ɖewohĩ, ahiã be nàgatrɔ ayi aƒemenɔlaa gbɔ enuenu hafi wòava ɖe dzi ɖi ahalɔ̃ faa be nàsrɔ̃ Biblia kpli ye. Ðo ŋku edzi be, ne wole tsi dem ati edziedzi lae wòtsina nyuie. Nenema kee, ame si lɔ̃ be míasrɔ̃ Biblia kpli ye la ƒe lɔlɔ̃ na Yehowa kple Kristo anɔ tsitsim ɖe edzi ne míele Mawu ƒe Nya la me dzrom kplii edziedzi.

9-10. Nu ka tae míate ŋu agblɔ be Kristotɔ ɖe sia ɖe wɔa akpa aɖe le dzianukwaretɔwo didi me?

⁹ Kristotɔ ɖe sia ɖe kpea asi ɖe dzianukwaretɔwo didi ŋu. Míate ŋu atsɔ ɖevi aɖe si bu wole didim la awɔ esia ƒe kpɔɖeŋui. Aleke esia sɔ kple dzianukwaretɔwo didi? Gbe ɖeka, ŋutsuvi dzaa aɖe si xɔ ƒe etɔ̃ la bu wole didim. Ame siwo ade 500 la katã nɔ edim. Mlɔeba, le gaƒoƒo 20 aɖewo megbe la, ŋutsu aɖe si tsɔ eɖokui na faa henɔ gome kpɔm le ɖevia didi me la va ke ɖe eŋu le bligble aɖe me. Ŋutsu sia melɔ̃ be woatsɔ kafukafua ana ye be yee kpɔ ɖevia o. Egblɔ be: “Ame alafa geɖe kpe asi ɖe edidi ŋu hafi míeke ɖe eŋu.”

¹⁰ Ame geɖe le abe ɖevi ma si bu la ene. Wosena le wo ɖokuiwo me be yewobu. Mɔkpɔkpɔ bu ɖe wo, gake wodi be woakpe ɖe yewo ŋu. (Ef. 2:12) Mí ame siwo wu miliɔn enyi ye le gome kpɔm le ame siwo dze la didi me. Ðewohĩ, wò ŋutɔ màke ɖe ame aɖe si di be woasrɔ̃ Biblia kpli ye la ŋu o. Ke hã, gbeƒãɖela bubu siwo mia kpli wo miele dɔ wɔm le anyigbamama ɖeka me la ate ŋu ake ɖe ame aɖe si di be yeasrɔ̃ nu tso nyateƒe si le Mawu ƒe Nyaa me ŋu la ŋu. Ne nɔviŋutsu alo nɔvinyɔnu aɖe ke ɖe ame aɖe ŋu wòva zu Kristo ƒe nusrɔ̃la la, ame sia ame si kpe asi ɖe edidi ŋu la ate ŋu akpɔ dzidzɔ le eta.

11. Ne wò ŋutɔ mèle Biblia srɔ̃m kple ame aɖeke o hã la, mɔ bubu kawo nue nàte ŋu akpe asi ɖe nusrɔ̃lawɔwɔdɔa ŋu le?

¹¹ Ne wò ŋutɔ mèle Biblia srɔ̃m kple ame aɖeke fifia o hã la, àte ŋu akpe asi ɖe nusrɔ̃lawɔwɔdɔa ŋu le mɔ bubu geɖe nu. Le kpɔɖeŋu me, àte ŋu axɔ ame yeye siwo vaa miaƒe Fiaɖuƒe Akpataa me la atuu ahado vivi ɖe wo ŋu. Ne èwɔnɛ alea la, àkpe asi ɖe eŋu woava ka ɖe edzi be lɔlɔ̃ dea dzesi mí be míawoe nye Kristotɔ vavãwo. (Yoh. 13:34, 35) Azɔ hã, ne èɖoa nya ŋu kpuikpuikpui le kpekpeawo me la, esia ate ŋu afia ame yeye siwo le ha dem kpli mí la be woaƒo nu faa tso dzi me aʋu woƒe xɔse me ahawɔ esia le bubumɔ nu. Gakpe ɖe eŋu la, àte ŋu awɔ dɔ kple gbeƒãɖela yeye aɖe le gbeadzi ahakpe ɖe eŋu be wòazã Ŋɔŋlɔawo atsɔ ade ŋugble kple amewo. Àto esia me afia gbeƒãɖela yeyea be wòasrɔ̃ Kristo ƒe kpɔɖeŋua.—Luka 10:25-28.

12. Ðe wòle be ŋutete tɔxɛwo nanɔ mía si hafi míate ŋu awɔ nusrɔ̃lawoa? Ðe eme.

¹² Mele be mía dometɔ aɖeke nasusu be ele be ŋutete tɔxɛwo nanɔ mía si hafi míafia nu ame bubuwo woanye Yesu ƒe nusrɔ̃lawo o. Nu ka tae? Bu Faustina, si le Bolivia la, ƒe kpɔɖeŋua ŋu kpɔ. Esime wòte hadede kple Yehowa Ðasefowo la, menya nuxexlẽ o. Tso ɣemaɣi la, esrɔ̃ nuxexlẽ, gake meɖu tu nɛ tututu o. Fifia, exɔ nyɔnyrɔ, eye elɔ̃ nufiafia ame bubuwo. Esrɔ̃a Biblia kple ame atɔ̃ kwasiɖa sia kwasiɖa. Togbɔ be Faustina metea ŋu xlẽa nu nyuie o eye eƒe nusrɔ̃viawo dometɔ akpa gãtɔ hã metea ŋu xlẽa nu nyuie o hã la, ekpe ɖe ame ade ŋu woxɔ nyɔnyrɔ.—Luka 10:21.

13. Ne vovo menɔa mía ŋu o hã la, dzidzɔ kawoe ate ŋu asu mía si le nusrɔ̃lawɔwɔdɔa me?

¹³ Vovo menɔa mía nɔvi Kristotɔ geɖewo ŋu o, le esi agbanɔamedzi veviwo kpɔ wo ŋkume ta. Ke hã, wodia ɣeyiɣi srɔ̃a Biblia kple amewo, eye wokpɔa dzidzɔ geɖe le esia wɔwɔ me. Bu Melanie ƒe kpɔɖeŋua ŋu kpɔ. Enye dzilaɖekɛ si le vianyɔnuvi si xɔ ƒe enyi la dzi kpɔm le Alaska. Azɔ hã, ewɔa dɔ ŋkeke atɔ̃ le kwasiɖaa me abe ale si ame geɖe wɔnɛ ene, eye ekpea asi ɖe fofoa si le kansadɔ lém la dzi kpɔkpɔ ŋu. Melanie ɖeka koe nye Ðasefo le woƒe du saɖeaga la me. Togbɔ be yame fa miamiamia le afi ma hã la, edoa gbe ɖa be Yehowa nado ŋusẽ ye yeado aɖaɖe gbeƒã, elabe edi vevie be yeake ɖe ame aɖe si yeate ŋu asrɔ̃ Biblia kpli la ŋu. Mlɔeba, eva do go Sara; esi Sara va nya Mawu ƒe ŋkɔa la, ekpɔ dzidzɔ ale gbegbe. Ɣeyiɣi aɖe megbe la, Sara va lɔ̃ be wòasrɔ̃ Biblia kpli ye. Melanie gblɔ be: “Fiɖagbe fiẽwo la, ɖeɖi tea ŋunye ŋutɔ, gake eɖea vi na nye kple vinyenyɔnuvia siaa ne míeyi ɖasrɔ̃ nu kplii. Mí ame evea míetsɔa dzidzɔ kua nu me be míaɖo Sara ƒe biabiawo ŋu nɛ, eye esi wòva zu Yehowa xɔlɔ̃ la, edo dzidzɔ na mí ale gbegbe.” Sara do dzi le tsitretsiɖeŋu siwo va edzi la me dzinɔameƒotɔe, edo le subɔsubɔha si me wònɔ tsã la me, eye wòxɔ nyɔnyrɔ.

14. (a) Nu ka tae nusrɔ̃lawɔwɔdɔa le abe tɔƒodede ene? (b) Dɔ kae Paulo ƒe nya siwo dze le 2 Timoteo 4:1, 2 la wɔ ɖe dziwò?

¹⁴ Ne mèkpɔ ke ɖe ame aɖe si di be yeazu nusrɔ̃la la ŋu haɖe o gɔ̃ hã la, dzi megaɖe le ƒowò o. Ðo ŋku edzi be Yesu tsɔ nusrɔ̃lawɔwɔdɔa sɔ kple tɔƒodede. Tɔƒodelawo zãa gaƒoƒo geɖe tsɔ nɔa tɔmelãwo dim hafi va ɖea lã. Zi geɖe la, wodea tɔƒo le zãtiƒe alo ŋdikanya, eye ɣeaɖewoɣi la, wodea keke didiƒe ke hafi daa ɖɔ. (Luka 5:5) Le mɔ ma ke nu la, gbeƒãɖela aɖewo nɔa ame siwo adi be yewoasrɔ̃ Biblia la dim dzigbɔɖitɔe gaƒoƒo geɖe le teƒe vovovowo kple ɣeyiɣi vovovowo me. Nu ka tae? Nu si tae nye be, wonyae be, esia wɔwɔ ana yewoate ŋu ake ɖe amewo ŋu. Ame siwo kua kutri vevie le amewo didi me la tea ŋu kena ɖe ame siwo tsɔ ɖe le míaƒe gbedeasia me ŋu. Ðe nàte ŋu aɖe gbeƒã le ŋkekea ƒe ɣeyiɣi siwo me wòanɔ bɔbɔe be nàke ɖe amewo ŋu le la me alo le teƒe siwo nàte ŋu ake ɖe wo ŋu le bɔbɔea?—Xlẽ 2 Timoteo 4:1, 2.

15. Nu ka tae Biblia sɔsrɔ̃ kple amewo bia dzigbɔɖi?

¹⁵ Nu ka tae Biblia sɔsrɔ̃ kple amewo bia dzigbɔɖi? Nu ɖekae nye be, ele be míawɔ geɖe wu be míakpe ɖe nusrɔ̃via ŋu wòanya Biblia ƒe nufiafiawo ahalɔ̃ wo ko. Ele be míakpe ɖe nusrɔ̃via ŋu hã be wòanya Yehowa, Ame si gbɔ Biblia tso, ahalɔ̃e. Azɔ hã, menye ɖeko míafia nu siwo Yesu bia tso eƒe nusrɔ̃lawo si la nusrɔ̃via ko evɔ o, ele hã be míakpe ɖe nusrɔ̃via ŋu wòanya ale si wòanɔ agbe abe Kristotɔ vavãwo ene. Ele be míakpe ɖe eŋu dzigbɔɖitɔe esime wòle agbagba dzem be yeawɔ ɖe Biblia me gɔmeɖosewo dzi. Ame aɖewo tea ŋu trɔa woƒe nuŋububu kple woƒe agbenɔnɔ le ɣleti ʋɛ aɖewo ko me; gake exɔa ɣeyiɣi geɖe le ame bubuwo ya gome.

16. Nu kae nèsrɔ̃ tso nuteƒekpɔkpɔ si ku ɖe Raúl ŋu la me?

¹⁶ Nɔviŋutsu aɖe si wɔ dutanyanyuigbɔgblɔdɔa le Peru la ƒe nuteƒekpɔkpɔa na míekpɔ nu si tae wòle vevie be míagbɔ dzi ɖi. Egblɔ be: “Mesrɔ̃ agbalẽ eve kple nye Biblia nusrɔ̃vi aɖe si ŋkɔe nye Raúl. Ke hã, egahiã kokoko be wòawɔ tɔtrɔ veviwo le eƒe agbenɔnɔ me. Kuxi geɖe nɔ eƒe srɔ̃ɖeɖe me, egblɔa nya madzetowo, eye esesẽ na viawo be woade bubu eŋu le eƒe agbe maɖɔʋu nɔnɔ ta. Ke hã, edea kpekpeawo edziedzi, eya ta, mekpɔtɔ yia egbɔ be makpe ɖe eya kple eƒe ƒomea ŋu. Ƒe etɔ̃ kple edzivɔ megbe tso esime medo goe la, eva dze hexɔ nyɔnyrɔ.”

17. Nu ka mee míadzro le nyati si kplɔ esia ɖo me?

¹⁷ Yesu gblɔ na mí be, “Miheyi ɖawɔ dukɔwo katã me tɔwo woanye nusrɔ̃lawo.” Esi míedi be míawɔ dɔ sia ade goe ta la, zi geɖe la, míeƒoa nu kple ame siwo ƒe nuŋububu to vovo na mía tɔ, eye wo dometɔ aɖewo nye ame siwo mele subɔsubɔha aɖeke me o alo ame siwo mexɔe se be Mawu li o. Nyati si kplɔ esia ɖo la dzro ale si míate ŋu agblɔ nya nyuia na ame siawo ƒomevi la me.