Ðe Nètia Nyuiwɔwɔ Yomea?

“Ne nudzeamewɔwɔ aɖe li, eye ne kafukafu aɖe li la, misusu nusiawo ŋuti!”—FILIPITƆWO 4:8.

 1. Nukae nye vɔ̃wɔwɔ, eye nukatae wometsɔe ƒo ɖi Yehowa ƒe tadedeagui o?

VƆ̃WƆWƆ enye nutovowɔwɔ alo nugbegblẽwɔwɔ. Ebɔ fũ ɖe xexe si me míele la me. (Efesotɔwo 2:1-3) Gake Yehowa Mawu maɖe mɔ woaƒo ɖi eƒe tadedeagu dzadzɛ la o. Kristotɔwo ƒe agbalẽwo, kpekpewo, kple takpekpewo gblɔa nuxlɔ̃amenya siwo sɔ ɖe ɣeyiɣia dzi na mí le agbenɔnɔ masɔmasɔwo ŋu. Wonaa kpekpeɖeŋu si dze mí tso Ŋɔŋlɔawo me be ‘míalé ɖe nusi nyo’ le Mawu ŋkume ŋu. (Romatɔwo 12:9) Eyata abe habɔbɔ ene la, Yehowa Ðasefowo le agbagba dzem be yewoanɔ dzadzɛ, anye nyuiwɔlawo. Gake le mía dometɔ ɖekaɖeka ɖesiaɖe hã gome ɖe? Ðe wò ŋutɔ nèle nyuiwɔwɔ yome tim ŋutɔŋutɔa?

 2. Nukae nye nyuiwɔwɔ, eye nukatae wòhiã agbagbadzedze hafi woayi edzi anɔ nyui wɔm?

² Nyuiwɔwɔe nye agbenyuinɔnɔ si ŋu kpɔtsotso mele o, nusi nyo wɔwɔ, nudzeamewɔwɔ kple tamesusu si sɔ. Menye nɔnɔme si be ɖe ame mee o ke boŋ nɔnɔme si dzena le ame ŋu, si ɖea vi na amee wònye. Nyuiwɔwɔ bia nu geɖe wu nuvɔ̃ tsitsri ko; efia nusi nyo yometiti. (Timoteo I, 6:11) Apostolo Petro xlɔ̃ nu ehati Kristotɔwo be: “Miɖe amewɔwɔ [alo nyuiwɔwɔ] fia le miaƒe xɔse me.” Aleke? Eyae nye be “mitsɔ veviedodo katã kpe ɖe [Mawu ƒe ŋugbedodo xɔasiawo ŋu].” (Petro II, 1:5) Esi míenye nuvɔ̃mewo ta la, ebia agbagbadzedze blibo hafi míayi edzi anye nyuiwɔlawo. Gake Mawu vɔ̃la siwo nɔ anyi le blema la nye nyuiwɔlawo, togbɔ be wodo go kplamatsedonu sesẽwo gake.

Eti Nyuiwɔwɔ Yome

 3. Nu vɔ̃ɖi kawoe Fia Axaz wɔ?

³ Amesiwo ti nyuiwɔwɔ yome ƒe kpɔɖeŋu geɖe le Ŋɔŋlɔawo me. Le kpɔɖeŋu me, bu Xizkiya, amesi wɔ nyui ŋu kpɔ. Edze ƒã be fofoa, Yuda-fia Axaz subɔ Molex. “Axaz xɔ ƒe blave, esime wòzu fia, eye wòɖu fia ƒe wuiade le Yerusalem. Mewɔ nusi dze Yehowa, eƒe Mawu la ŋu abe fofoa Dawid ene o, ke boŋ eto Israel-fiawo ƒe ʋe me; gɔglɔ̃gɔ la ena viawo to dzo me le dukɔ, siwo Yehowa nyã le Israel-viwo ŋgɔ la ƒe ŋunyɔnuwo nu. Esa vɔ, eye wòdo dzudzɔ le nuxeƒewo, togbɛwo dzi kple ati damawo katã te.” (Fiawo II, 16:2-4) Ame aɖewo gblɔna be ‘dzometoto’ fia ŋutikɔkɔkɔnu ƒomevi aɖe ke menye amegbetɔ tsɔtsɔ sa vɔe o. Gake agbalẽ si nye Molech—A God of Human Sacrifice in the Old Testament, si John Day ŋlɔ la gblɔ be: “Edze le blemanuŋɔŋlɔwo kple Carthagetɔwo tɔ, kpakple blemanuwo kuku me be . . . Kanaanitɔwo tsɔa amegbetɔ saa vɔe, eye eyata mele be woake ɖi [amegbetɔvɔsa] ŋu nya siwo wogblɔ le Nubabla Xoxoa me o.” Hekpe ɖe eŋu la, Kronika II, 28:3 gblɔe tẽ be Axaz “[na] viawo to dzo me.” (Tsɔe sɔ kple Mose V, 12:31; Psalmo 106:37, 38.) Nu vɔ̃ɖi kawoe nye si wòwɔ!

 4. Aleke Xizkiya wɔ nui le amesiwo dome vɔ̃wɔwɔ xɔ aƒe ɖo la domee?

⁴ Aleke Xizkiya wɔ nui le amesiawo siwo me vɔ̃wɔwɔ yɔ la dome? Psalmo 119 lia me nyawo ate ŋu akpe ɖe mía ŋu, elabena ame aɖewo xɔe se be Xizkiya ye kpa ha sia me nyawo le ɣeyiɣi si me wòganye fiavi. (Psalmo 119:46, 99, 100) Eyata nya siawo ate ŋu asɔ ɖe nɔnɔme si me wònɔ nu, be: “Ne amegãwo [fiaviwo, NW] kpe ta, eye wole nu ƒom le ŋunye hã, wò dɔla dea ŋugble le wò ɖoɖowo ŋu. Nye luʋɔ fa aɖatsi le nuxaxa ta.” (Psalmo 119:23, 28) Esi alakpasubɔsubɔha me tɔwo ƒo xlã Xizkiya ta la, ɖewohĩ ezu alɔmeɖenu na fiaƒemetɔwo, woɖea fu nɛ ale gbegbe be alɔ̃dɔdɔ zua dɔ nɛ. Ke hã enɔ nyuiwɔwɔ dzi, eye wòva zu fia emegbe eye “wòwɔ nusi dze Yehowa ŋu . . . Eɖo ŋu ɖe Yehowa, Israel ƒe Mawu la ŋu.”—Fiawo II, 18:1-5.

Woyi Nyuiwɔwɔ Dzi

 5. Dodokpɔ kawo mee Daniel kple exɔlɔ̃ etɔ̃awo to?

⁵ Amesiwo hã ɖo nyuiwɔwɔ ƒe kpɔɖeŋu nyui aɖee nye Daniel kple eƒe zɔhɛ Hebri-vi etɔ̃awo, siwo ŋkɔwoe nye Xananya, Misael, kple Azarya. Wokplɔ wo sesẽe dzoe le wo de tsɔ yi aboyo me le Babilon. Wotsɔ Babilontɔwo ƒe ŋkɔwo na ɖekakpui eneawo—Beltsazar, Sadrax, Mesax, kple Abed-Nego. Wotsɔ “fia ƒe nuɖuɖu” siwo me nuɖuɖu siwo nu wode se ɖo le Mawu ƒe Se la me nɔ hã na wo. Hekpe ɖe eŋu la, wozi wo dzi be woafia “Kaldeatɔwo ƒe nuŋɔŋlɔ kple gbe wo.” Menye gbesɔsrɔ̃ dzro ko ƒe nyae o, elabena anɔ eme be ŋkɔ “Kaldeatɔwo” si wozã le afisia ate ŋu afia amesiwo nye agbalẽnyalagãwo le wo dome. Eyata Hebri ɖekakpuiviawo gbɔna Babilontɔwo ƒe nufiafia totrowo se ge.—Daniel 1:1-7.

 6. Nukatae míate ŋu agblɔ be Daniel nɔ nyuiwɔwɔ dzi?

⁶ Togbɔ be woƒo nya ɖe Daniel kple etɔ etɔ̃awo nu vevie hã la, woɖoe be nyui koe yewoawɔ, menye vɔ̃ o. Daniel 1:21 gblɔ be: “Daniel tsi anyi vaseɖe fia Kores ƒe ƒe gbãtɔ me.” Ẽ, Daniel ‘yi edzi’ nye Yehowa subɔla wɔnuteƒe wòwu ƒe 80 sɔŋ—to fia sẽŋu geɖewo ƒe zidzinɔnɔ kple woƒe anyidzedze me. Enɔ nuteƒewɔwɔ na Mawu dzi togbɔ be dziɖuɖumegã gbegblẽwo dea aɖaŋu vɔ̃wo heɖoa nugbe ɖe eŋu eye Babilontɔwo ƒe subɔsubɔ si me gbɔdɔdɔ nugbegblẽwɔwɔwo xɔ aƒe ɖo me tɔwoe ƒo xlãe hã. Daniel nɔ nyuiwɔwɔ dzi.

 7. Nukae míate ŋu asrɔ̃ tso Daniel kple exɔlɔ̃ etɔ̃awo ƒe agbenɔnɔ me?

⁷ Míate ŋu asrɔ̃ nu geɖe tso Mawu vɔ̃la Daniel kple etɔawo gbɔ. Wonɔ nyuiwɔwɔ dzi eye wogbe be yewomasrɔ̃ Babilontɔwo ƒe agbe o. Togbɔ be wotsɔ Babilontɔwo ƒe ŋkɔwo na wo hã la, Yehowa subɔla nyenye mebu le wo ŋu kpɔ gbeɖe o. Kpɔe ɖa ko, anye ƒe 70 megbe la, Babilon-fia gayɔ Daniel ƒe Hebrigbe me ŋkɔ nɛ! (Daniel 5:13) Le Daniel ƒe agbenɔƒe didia me la, egbe be yemawɔ ɖeka kple wo le nu madzɔmadzɔ wɔwɔ me le nu suewo gɔ̃ hã me o. Esi wònye ɖekakpui la, “[eɖo] ɖe tame be yemele fia ƒe nuɖuɖu . . . tsɔ ge agblẽ kɔ ɖo na ye ɖokui o.” (Daniel 1:8) Nyametsotso matrɔmatrɔ sia si Daniel kple exɔlɔ̃ etɔ̃awo wɔ do ŋusẽ wo be wote ŋu nɔ te ɖe dodokpɔ siwo nye agbe kple ku nya siwo va va wo dzi emegbe la nu.—Daniel, ta 3 kple 6.

Nyuiwɔwɔ Dzi Nɔnɔ Egbea

 8. Aleke Kristotɔ sɔhɛwo awɔ agbe ɖekawɔwɔ kple Satana ƒe xexeame?

⁸ Abe Daniel kple exɔlɔ̃ etɔ̃awo ene la, egbea Mawu ƒe amewo gbena be yewomawɔ ɖeka kple Satana ƒe xexeme vɔ̃ɖia o. (Yohanes I, 5:19) Ne Kristotɔ si nye sɔhɛe nènye la, ɖewohĩ hatiwòwo anɔ ezim ɖe dziwò be nàsrɔ̃ yewoƒe nu tɔŋkuwo wɔwɔ le awudodo, dzadzraɖo, kple hadzidzi me. Gake le esi nànɔ nusianu si gava tsia dzi yome teƒe la, nɔ tsitre sesĩe, eye mègaɖe mɔ le ɖokuiwò ŋu ne ‘nàsrɔ̃ nuɖoanyi sia ƒe nɔnɔme o.’ (Romatɔwo 12:2) ‘Gbe mawumavɔ̃mavɔ̃ nuwɔnawo kple xexeame ƒe nudzodzrowo eye nànɔ agbe le ɖokuidziɖuɖu kple nudzɔdzɔewɔwɔ kple mawusosroɖa me.’ (Tito 2:11, 12) Nusi nye veviae nye Yehowa ƒe ŋudzedzekpɔkpɔ ɖe ŋuwò, menye hatiwòwo tɔ o.—Lododowo 12:2.

 9. Nyaƒoɖeamenu kawoe Kristotɔ siwo nye asitsalawo ate ŋu ado goe, eye aleke wòle be woawɔ nui?

⁹ Kristotɔ siwo nye ame tsitsiwo hã doa go nyaƒoɖeamenuwo eye ele be woanye nyuiwɔlawo. Ate ŋu awɔ na Kristotɔ siwo nye asitsalawo be woazã asitsamɔnu fitifitiwo alo be woada le dziɖuɖu ƒe sewo dzi alo asi le adzɔxexe nu. Gake aleke mía hati asitsalawo alo míaƒe dɔwɔhatiwo wɔa nui o, míawo ya ‘míedi be míawɔ nu le anukwareɖiɖi me le nusianu me.’ (Hebritɔwo 13:18) Ŋɔŋlɔawo bia tso mía si be míaɖi anukware awɔ nusi le eteƒe na dɔtɔwo, dɔwɔviwo, asisiwo, kple dziɖuɖuwo. (Mose V, 25:13-16; Mateo 5:37; Romatɔwo 13:1; Timoteo I, 5:18; Tito 2:9, 10) Mina hã be míadze agbagba awɔ nu ɖe ɖoɖo nu le míaƒe dɔwɔnyawo me. Ne míewɔa nuŋlɔɖi siwo de pɛpɛpɛ eye míedea dɔwɔɖoɖowo agbalẽ me la, akpe ɖe mía ŋu míaxe mɔ na masɔmasɔwo.

Lé Be na Ðokuiwò!

10. Nukatae wòle vevie be ‘míalé ŋku ɖe’ míaƒe hadzidziwo ‘ŋu nyuie’?

¹⁰ Psalmo 119:9 he míaƒe susu yi alesi míawɔ anye nyuiwɔlawo le Mawu ŋkume ƒe akpa bubu dzi. Hakpala la dzi ha be: “Aleke ɖekakpui alé eƒe mɔ atsɔ fɔɖiɖi manɔmee? Ne elé ŋku ɖe eɖokui ŋu ɖe wò nya la nu.” Satana ƒe aʋawɔnu siwo ɖea kpe wu dometɔ ɖekae nye hadzidzi, si nye nusi te ŋu ʋãa ame ƒe seselelãmewo. Enye nublanuinya be Kristotɔ aɖewo mete ŋu ‘lé be na wo ɖokui’ le hadzidzi me o, eye wokpɔ be hadzidzi madzeto ƒomevi aɖewo, abe rap kple heavy metal ene lé dzi na yewo. Ame aɖewo agblɔ be hadzidzi mawo megblẽa naneke le yewo ŋu o alo be yewomeléa to ɖe wo me nyaawo ŋu o. Ame bubuwo gblɔna be eƒe ɖiɖi sesĩe alo dzitaa sesẽ si woƒona ɖe wo ŋu koe nya sena na yewo. Gake le Kristotɔwo gome la, menye ne nane nya sena alo menya senae nye nya la o. Nusi ŋu wotsia dzi ɖoe nye ne ‘enyo Aƒetɔ la ŋu’ alo menyo eŋu o. (Efesotɔwo 5:10) Le rap kple heavy metal ha akpa gãtɔ me la, vɔ̃wɔwɔwo abe mawumavɔ̃mavɔ̃nuwo, ahasiwɔwɔ, kple kura gɔ̃ hã satanasubɔsubɔ dzie wodena—nusiwo womewɔna le Mawu ƒe amewo dome kura o.a (Efesotɔwo 5:3) Míenye ɖeviwo alo ame tsitsiwo o, anyo be mía dometɔ ɖesiaɖe nabu biabia sia ŋu nyuie be, Nyui alo vɔ̃wɔwɔ yomee metina le ha si meƒona mea?

11. Aleke Kristotɔ awɔ anɔ ŋudzɔ le television dzi wɔnawo, video, kple sinimawo me?

¹¹ Television dzi wɔnawo, video, kple sinima geɖewo hã dea vɔ̃wɔwɔ dzi. Tagbɔdɔdala xɔŋkɔ aɖe gblɔ be ‘agbeɖuɖu, gbɔdɔdɔ, ŋutasesẽ, ŋukeklẽ, kple ɖokuitɔdidi’ ye bɔna wu ɖe sinima siwo woɖena egbea ƒe akpa gãtɔ me. Eyata beléle na mía ɖokui ƒe akpa aɖee nye be míatia nusiwo míekpɔna me. Hakpala la do gbe ɖa be: “Ðe nye ŋku ɖa le nu dzodzrowo kpɔkpɔ ŋu.” (Psalmo 119:37) Kristotɔ sɔhɛ aɖe si ŋkɔe nye Joseph tsɔ gɔmeɖose sia wɔ dɔe. Esi wodze gbɔdɔdɔ kple anyranuwo wɔwɔ ɖeɖefia gɔme le sinima aɖe me la, edo go dzo. Ðe wòkpe ŋu nɛ be yedzoa? Joseph ɖo eŋu be: “Kura o. Yehowa ŋue mebu gbã kple alesi madze eŋui.”

Akpa si Nusɔsrɔ̃ Kple Ŋugbledede Wɔna

12. Nukatae ɖokuisinusɔsrɔ̃ kple ŋugbledede hiã le nyuiwɔwɔ yometiti me?

¹² Nugbegblẽwɔwɔ tsitsri ɖeɖe mesɔ gbɔ o. Nyuiwɔwɔ yometiti gafia nu nyui siwo woŋlɔ ɖe Mawu ƒe Nya la me sɔsrɔ̃ kple ŋugbledede le wo ŋu ale be míate ŋu atsɔ eƒe gɔmeɖose dzɔdzɔeawo awɔ dɔe le míaƒe agbenɔnɔ me hã. Hakpala la do ɣli be: “Aleke gbegbe nyemehelɔ̃a wò se lae o! Nye ŋugbledede wònye ɖaa.” (Psalmo 119:97) Ðe ɖokuisi Biblia kple Kristotɔwo ƒe agbalẽwo sɔsrɔ̃ le wò kwasiɖa sia kwasiɖa ƒe ɖoɖowɔɖi mea? Nyateƒee, ɣeyiɣi kpɔkpɔ ɖe Mawu ƒe Nya la sɔsrɔ̃ ŋu kutrikukutɔe kple ŋugbledede le eŋu le gbedodoɖa me manye nu bɔbɔe o. Gake zi geɖe la, enya wɔna be woaƒle ɣeyiɣi tso dɔ bubuwo me na ewɔwɔ. (Efesotɔwo 5:15, 16) Ðewohĩ fɔŋli me anye ɣeyiɣi nyui si ade dziwò na gbedodoɖa, nusɔsrɔ̃, kple ŋugbledede.—Tsɔe sɔ kple Psalmo 119:147.

13, 14. (a) Nukatae ŋugbledede le vevie ale gbegbe? (b) Ŋɔŋlɔ kawo ŋu bubue ate ŋu akpe ɖe mía ŋu míanyɔ ŋu gbɔdɔdɔ ƒe agbegbegblẽnɔnɔ?

¹³ Ŋugbledede hiã ale gbegbe, elabena ekpena ɖe mía ŋu nusi míesrɔ̃ la tsia susu me na mí. Gake vevietɔe nye be ate ŋu akpe ɖe mía ŋu Mawu ƒe nukpɔsusu nanɔ mía si. Le kpɔɖeŋu me: Enyanya be Mawu de se ɖe ahasiwɔwɔ nu nye nu ɖeka gake enye nu bubu kura be ‘míanyɔ ŋu vɔ̃ alé ɖe nu nyui ŋu.’ (Romatɔwo 12:9) Ne míede ŋugble le Biblia ƒe kpukpui veviwo ŋu, abe Kolosetɔwo 3:5 ene, si xlɔ̃ nu mí be, “Miwu mia ŋutinu, siwo le anyigba dzi; ahasiwɔwɔ, makɔmakɔnyenye, fiẽŋufiẽŋui, nudzodzro vɔ̃ kple ŋukeklẽ si nye trɔ̃subɔsubɔ” la, ana míate ŋu ase alesi tututu Yehowa sena le eɖokui me ɖe gbɔdɔdɔ ƒe agbegbegblẽnɔnɔ ŋu la le mía ɖokui me. Bia ɖokuiwò se be: ‘Fiẽŋufiẽŋui ka ƒomevie wòle be mawu? Nusi nyɔa dzodzro makɔmakɔ kae wòle be matsri? Ðe tɔtrɔ aɖewo li wòle be mawɔ le alesi mewɔa nu ɖe ŋutsuwo alo nyɔnuwo ŋui mea?’—Tsɔe sɔ kple Timoteo I, 5:1, 2.

¹⁴ Paulo xlɔ̃ nu Kristotɔwo be woatsri ahasiwɔwɔ eye woaɖu wo ɖokui dzi ale be “ame aɖeke nagaba nɔvia, eye wòatafae . . . o.” (Tesalonikatɔwo I, 4:3-7) Bia ɖokuiwò se be: ‘Nukatae ahasiwɔwɔ wɔa nuvevi ame? Nukae magblẽ le nye ŋutɔ ɖokuinye alo ame bubu ŋu ne mewɔ nuvɔ̃ sia? Aleke wòagblẽ nu le ŋunyee le gbɔgbɔ me, seselelãme me, kple ŋutilã me? Ke hamea me tɔ siwo da Mawu ƒe se sia dzi eye wogbe dzimetɔtrɔ ɖe? Aleke nuwo va yi na woe?’ Nusi Ŋɔŋlɔawo gblɔ le agbenɔnɔ sia tɔgbe ŋuti la ŋu bubu ate ŋu ana míaƒe fuléle nusi nye nu vɔ̃ɖi le Mawu ŋkume la nu nasẽ ɖe edzi. (Mose II, 20:14; Korintotɔwo I, 5:11-13; 6:9, 10; Galatiatɔwo 5:19-21; Nyaɖeɖefia 21:8) Paulo gblɔ be “menye amee” ahasiwɔla ‘doa vloe o, ke boŋ Mawue.’ (Tesalonikatɔwo I, 4:8) Kristotɔ vavã kae ado vlo Fofoa si le dziƒo?

Nyuiwɔwɔ Kple Amesiwo Míedea Ha Kplii

15. Akpa kae hadede wɔna le míaƒe nyuiwɔwɔ yometiti me?

¹⁵ Nu bubu si akpe ɖe mía ŋu míayi edzi anye nyuiwɔlawoe nye hadede nyui. Hakpala la dzi ha be: “Xɔlɔ̃ menye na amesiwo katã vɔ̃a wò [Yehowa] kple amesiwo léa ŋku ɖe wò sededewo ŋu.” (Psalmo 119:63) Hadede nyui si míekpɔna le Kristotɔwo ƒe kpekpeawo me hiã mí. (Hebritɔwo 10:24, 25) Ne míeɖea mía ɖokui ɖe aga la, ate ŋu adzɔ be míazu ɖokuiŋubulawo, eye míaɖe ŋu ɖi awɔ vɔ̃ bɔbɔe. (Lododowo 18:1) Gake hadede si me vividodoɖeameŋu le kple Kristotɔwo ate ŋu ado ŋusẽ míaƒe tameɖoɖo kplikpaa be míayi edzi anye nyuiwɔlawo. Míenya be ele be míakpɔ nyuie le ha vɔ̃wo dede hã ŋu. Míate ŋu akɔ dɔme ɖe míaƒe aƒelikawo, dɔwɔhatiwo, kple sukuhatiwo ŋu. Gake ne míele zɔzɔm nunyatɔe vavã la, ke ele be míanya zɔzɔ bene mía kple amesiwo menye Kristotɔ nyuiwɔlawo o dome meganɔ kplikplikpli akpa o.—Tsɔe sɔ kple Kolosetɔwo 4:5.

16. Aleke nusi ŋu Korintotɔwo I, 15:33 me nyawo ku ɖo ŋudɔwɔwɔ akpe ɖe mía ŋu be míanɔ nyuiwɔwɔ dzii egbea?

¹⁶ Paulo ŋlɔ be: “Habɔbɔ vɔ̃wo gblẽa nuwɔna nyuiwo.” Esi wònɔ nya sia gblɔm la, enɔ nu xlɔ̃m xɔsetɔwo be ne wole ha dem kple amesiwo gblɔna be Kristotɔwoe yewonye gake wogbe nusi Ŋɔŋlɔawo fia le tsitretsitsia ŋu la, ate ŋu agbɔdzɔ woƒe xɔse. Gɔmeɖose si dzi Paulo tu eƒe nuxlɔ̃amea ɖo la ku ɖe amesiwo míedea ha kplii le hamea me kple egodo siaa ŋu. (Korintotɔwo I, 15:12, 33) Enye nyateƒe be míedi be míatsri míaƒe gbɔgbɔmenɔviŋutsu kple nɔvinyɔnuwo le esi womelɔ̃ ɖe nane si nye mía ŋutɔ míaƒe susu ko dzi na mí ta o. (Mateo 7:4, 5; Romatɔwo 14:1-12) Ke hã la, ehiã ŋuɖɔɖɔɖo ne hamea me tɔ aɖewo nɔa agbe si ŋu nya ku ɖo alo veve helĩhelĩ kple nyatoƒoetoto ƒe nɔnɔme le wo me. (Timoteo II, 2:20-22) Nunya le eme be míanɔ amesiwo ate ŋu ‘ade dzi ƒo na mí eye míawo hã míadee na wo’ ŋu kplikplikpli. (Romatɔwo 1:11, 12) Esia akpe ɖe mía ŋu le nyuiwɔwɔ yometiti me eye míanɔ “agbemɔ la” dzi.—Psalmo 16:11.

Nɔ Nunyuiwɔwɔ Dzi Ðaa

17. Abe alesi wogblɔe ɖe Mose IV, ta 25 ene la, afɔku kae dzɔ ɖe Israel-viwo dzi, eye nufiame kae le eme na mí?

¹⁷ Esi wòsusɔ vie ko ne Israel-viwo naxɔ Ŋugbedodonyigbaa la, wo dometɔ akpe geɖe ɖoe be yewoawɔ vɔ̃—eye afɔkue tso eme na wo. (Mose IV, ta 25) Egbea Yehowa ƒe amewo le xexeme yeyea ƒe agbo nu. Gege ɖe eme anye yayramɔnukpɔkpɔ na amesiwo yi edzi gbe xexe sia me vɔ̃wɔwɔwo. Esi míenye ame madeblibowo la, dzodzro vɔ̃wo ate ŋu anɔ mía me, gake Mawu ate ŋu akpe ɖe mía ŋu be míawɔ eƒe gbɔgbɔ kɔkɔea ƒe mɔfiame dzɔdzɔewo dzi. (Galatiatɔwo 5:16; Tesalonikatɔwo I, 4:3, 4) Eyata mina míatsɔ nya si Yosua tsɔ xlɔ̃ nu Israel-viwoe la awɔ dɔe, be: “Mivɔ̃ Yehowa, eye misubɔe blibo le nyateƒe me.” (Yosua 24:14) Mawuvɔvɔ̃ ƒe bubu be míava wɔ nusi madze Yehowa ŋu o akpe ɖe mía ŋu míanɔ nyuiwɔwɔ dzi.

18. Nukae wòle be wòanye Kristotɔ ɖesiaɖe ƒe tameɖoɖo kplikpaa le vɔ̃wɔwɔ kple nyuiwɔwɔ ŋu?

¹⁸ Ne enye wò dzimedidi be yeadze Mawu ŋu la, ke ɖoe kplikpaa be yeawɔ ɖe Paulo ƒe nuxlɔ̃ame sia dzi: “Nusiwo nye nyateƒe, nusiwo dzea bubu, nusiwo le dzɔdzɔe, nusiwo le dzadzɛ, nusiwo dze na lɔlɔ̃, nusiwo dze na gbɔgblɔ, ne nudzeamewɔwɔ aɖe li, eye ne kafukafu aɖe li la, misusu nusiawo ŋuti!” Ne èwɔ esia la, nukae atso eme na wò? Paulo gblɔe be: “Nusiawo ke miwɔ, eye ŋutifafa Mawu la anɔ anyi kpli mi.” (Filipitɔwo 4:8, 9) Ẽ, le Yehowa ƒe kpekpeɖeŋu me la, àte ŋu atsri vɔ̃ ati nyuiwɔwɔ yome.

[Etenuŋɔŋlɔ]

Nya Veviawo Me Toto

◻ Nukawoe hiã bene míayi nyuiwɔwɔ dzi?

◻ Nɔnɔme kawo mee Xizkiya, Daniel, kple Hebri-vi etɔ̃awo yi nyuiwɔwɔ dzi le?

◻ Aleke míate ŋu aɖi Daniel le tsitretsitsi ɖe Satana ƒe ameblemɔnuwo ŋu mee?

◻ Nukatae wòle be Kristotɔwo nalé ŋku ɖe wo ɖokui ŋu le modzakaɖeɖe me?

◻ Akpa kae nusɔsrɔ̃, ŋugbledede, kple hadede wɔna le nyuiwɔwɔ yometiti me?

[Nɔnɔmetata si le axa 15]

Xizkiya nɔ nyuiwɔwɔ dzi togbɔ be Molex subɔlawo domee wònɔ hã

[Nɔnɔmetata siwo le axa 17]

Ele be Kristotɔwo nalé be na wo ɖokui le modzakaɖeɖe me