Na Mawu Ƒe Nufiafia Naɖe Vi Na Wò
“Nye Yehowa, wò Mawu, enye amesi fia nusi nyo na wò la wò.”—YESAYA 48:17.
1. Aleke wòanɔ na mí ne míewɔ ɖe Mawu ƒe nufiafia dzi le míaƒe agbenɔnɔ me?
YEHOWA MAWU nya nu wu mí sãa. Ame aɖeke ƒe tamesusu, nyagbɔgblɔ, alo nuwɔna mewu etɔ o. Esi wònye mía Wɔla ta la, enya míaƒe nuhiahiãwo eye wònaa wo mí fũ. Enya alesi tututu wòafia nu mí. Eye ne míewɔ ɖe Mawu ƒe nufiafia dzi la, aɖe vi na mía ŋutɔwo eye dzidzɔ vavãtɔ asu mía si.
2, 3. (a) Ne ɖe Mawu ƒe blemadukɔa wɔ ɖe eƒe sewo dzi la, anye ne viɖe kae woakpɔ hafi? (b) Nukae adzɔ ne míewɔ ɖe Mawu ƒe nufiafia dzi le míaƒe agbe me egbea?
2 Mawu ƒe nufiafia ɖe alesi wònye Mawu ƒe didi vevie be ye subɔlawo nawɔ ɖe yeƒe sewo kple gɔmeɖosewo dzi bene woaƒo asa na dzɔgbevɔ̃e eye woase vivi le agbe me la fia. Ne Yehowa ƒe amesiwo nɔ anyi le blema ɖe woɖo toe la, anye ne ayra wo geɖe elabena egblɔ na wo be: “Nye Yehowa, wò Mawu, enye amesi fia nusi nyo na wò la wò, nyee akplɔ wò to mɔ, si dzi nato la. Ðe wònye ɖe nèɖo to nye seawo la, anye ne wò ŋutifafa anɔ abe tɔsisi ene, eye wò dzɔdzɔenyenye anɔ abe ƒutsotsoewo ene.”—Yesaya 48:17, 18.
3 Ne ɖe Mawu ƒe blemadukɔ la wɔ ɖe eƒe sewo kple nufiamewo dzi la, anye ne aɖe vi na woa ŋutɔwo. Le esi teƒe be woakpe fu le Babilontɔwo si me la, anye ne woƒe ŋutifafa kple nudzedziname agbagba, agoglo, eye wòanɔ anyi ɖaa abe tɔsisi ene. Hekpe ɖe eŋu la, anye ne woƒe nudzɔdzɔewɔwɔ asɔ gbɔ abe ƒutsotsoewo ene. Nenema ke ne míewɔ ɖe Mawu ƒe nufiafia dzi le míaƒe agbenɔnɔ me la, míakpɔ eme viɖe geɖewo. Viɖea dometɔ aɖewo ɖe?
Etrɔa Ame ƒe Agbenɔnɔ
4. Aleke Mawu ƒe nufiafia le ŋusẽ kpɔm ɖe ame geɖewo ƒe agbenɔnɔ dzii?
4 Mawu ƒe nufiafia le vi ɖem na ame geɖewo le esi wòtrɔa woƒe agbenɔnɔ wònyona ta. Amesiwo wɔa Mawu ƒe nufiame dzi la, tsria “ŋutilã ƒe dɔwɔwɔwo,” abe hadzedze, trɔ̃subɔsubɔ, gbɔgbɔyɔyɔ, dzrehehe, kple ŋuʋaʋã ene. Woɖea gbɔgbɔ ƒe kutsetse siwo nye lɔlɔ̃, dzidzɔ, ŋutifafa, dzigbɔgbɔ blewu, dɔmekɔkɔ, dɔmenyonyo, xɔse, dɔmefafa, kple ɖokuidziɖuɖu boŋ fiana. (Galatiatɔwo 5:19-23) Wowɔna ɖe aɖaŋuɖoɖo si le Efesotɔwo 4:17-24 hã dzi, afisi Paulo de dzi ƒo na haxɔsetɔwo le be womegazɔ abe alesi dukɔwo zɔna ene le tamesusu ƒe yakanyenye me, esi woƒe nyasã do viviti, eye wonye amedzrowo le Mawu ƒe agbe la gome ta o. Esi amesiwo si Kristo ƒe nɔnɔme le ƒe dzi meku atri o ta la, ‘woɖea amenyenye xoxoa si nɔa anyi le woƒe tsã gbenɔnɔ nu la ɖa eye wowɔ wo yeyee le ŋusẽ si wɔa dɔ ɖe woƒe susu dzi la nu.’ ‘Wodoa amenyenye yeye si wowɔ le Mawu ƒe lɔlɔ̃nu me le dzɔdzɔenyenye kple nuteƒewɔwɔ vavãtɔ la nu.’
5. Aleke Mawu ƒe nufiafia kpɔa ŋusẽ ɖe amewo ƒe zɔzɔme dzii?
5 Mawu ƒe nufiafia ŋudɔwɔwɔ ƒe viɖe nyui bubue nye be efiaa alesi míazɔ kple Mawui la mí. Ne míezɔ kple Yehowa abe Noa ene la, míazɔ abe alesi míaƒe Nufiala Gãtɔ la fia mí ene. (Mose I, 6:9; Yesaya 30:20, 21) Dukɔwo “zɔna le woƒe tamesusu ƒe yakanyenye” me, abe alesi Paulo gblɔe ene. Eye aleke gbegbe tamesusu mawo dometɔ aɖewo ƒe nuŋɔŋlɔ nyea yakanuie nye si! Esi ame aɖe lé ŋku ɖe nuŋɔŋlɔ aɖewo siwo le gli ŋu le Pompeii ŋu la, eya ŋutɔ ŋlɔ be: “O, ewɔ nuku ŋutɔ be wò gli sia, tsukunɔnya gbogbo siawo gbegbe si wòŋlɔ ɖe dziwò memu wò ƒu anyi haɖe o.” Gake tsukunɔnya aɖeke mele “Yehowa ƒe nufiafia” kple Fiaɖuƒe gbeƒãɖeɖedɔ si wòna wole wɔwɔm la me o. (Dɔwɔwɔwo 13:12) To dɔ ma wɔwɔ me la, wokpe ɖe nyateƒealɔ̃lawo ŋu be wodze nunya. Wofia wo be woadzudzɔ woƒe nuvɔ̃mɔ dzi toto, le Mawu ƒe tameɖoɖowo manyamanya me. Woƒe nyasã megado viviti azɔ o, eye dzi kuatriwo megablea wo be woati taɖodzinu maɖeviwo yome o.
6. Ƒomedodo kae le toɖoɖo Yehowa ƒe nufiafia kple míaƒe dzidzɔkpɔkpɔ dome?
6 Mawu ƒe nufiafia gaɖea vi na mí le esi wòna míenyaa Yehowa kple eƒe nuwɔwɔwo nyuie la. Sidzedze sia tea mí ɖe Mawu ŋu wu, eye wòdzia míaƒe lɔlɔ̃ nɛ kple míaƒe didi be míaɖo toe la ɖe edzi. Yohanes I, 5:3 gblɔ be: “Lɔlɔ̃ na Mawu enye si bena, míalé eƒe sewo me ɖe asi, eye eƒe seawo mesesẽ o.” Míewɔna ɖe Yesu ƒe sededewo hã dzi elabena míenya be Mawu gbɔe eƒe nufiafia tso. (Yohanes 7:16-18) Toɖoɖo sia kpɔa mía ta tsoa gbɔgbɔmefɔkuwo me eye wòdzia míaƒe dzidzɔkpɔkpɔ ɖe edzi.
Tameɖoɖo Vavãtɔ le Agbe Me
7, 8. (a) Aleke wòle be míase Psalmo 90:12 gɔmee? (b) Nukae wòle be míawɔ be dzi nyanu nasu mía si?
7 Yehowa ƒe nufiafia ɖea vi le esi wòfiaa alesi míanɔ agbe si ŋu tameɖoɖo le mí la me. Le nyateƒe me la, Mawu ƒe nufiafia fiaa alesi míaxlẽ míaƒe ŋkekewo le mɔ tɔxɛ aɖe nu hã mí. Ne èbu ame ƒe agbenɔƒe si nye ƒe 70 ƒe ŋkekewo la, àkpɔ be ŋkeke 25,550 ye le ame si. Amesi xɔ ƒe 50 la zã eƒe 18,250 xoxo, eye ŋkeke 7,300 susɔe siwo wòle mɔ kpɔm na la dze nu ʋee ŋutɔ nyateƒe. Fifia koŋ ye wòava se nusitae nyagblɔɖila Mose do gbe ɖa na Mawu le Psalmo 90:12 be: “Fia alesi míaxlẽ míaƒe ŋkekewoe la mí, ne dzi nyanu naɖo mía si” la gɔme nyuie wu. Gake nukae Mose wɔnɛ?
8 Mose mele gbɔgblɔm be Mawu nagblɔ ŋkeke alesi tututu Israel-vi ɖesiaɖe ƒe agbenɔƒe anye la na ye o. Abe alesi wòdze le Psalmo 90:9, 10 ene la, Hebritɔ nyagblɔɖila ma nya be ƒe 70 alo 80 ko agbenɔƒe ate ŋu anye—ele kpuie ŋutɔ. Eyata edze ƒã be Mose nɔ eƒe didi gblɔm na Yehowa le gbedodoɖa me le Psalmo 90:12 be wòafia ye kple Eƒe dukɔa alesi yewoawɔ nu le nunya me ade asixɔxɔ ‘yewoƒe ƒewo ƒe ŋkekewo’ ŋu eye yewoazã wo le mɔ si adze Mawu ŋu la nu. Enyo, ke míawo ya ɖe? Ðe míebua ŋkeke ɖesiaɖe nu xɔasiea? Ðe míena be dzi nyanu le mía si ɖom to alesi míadi be míazã ŋkeke ɖesiaɖe le mɔ si dze nu be wòanye ŋutikɔkɔe na Yehowa Mawu, míaƒe Nufiala Gãtɔ mea? Mawu ƒe nufiafia akpe ɖe mía ŋu be míawɔ nusia tututu.
9. Ne míesrɔ̃ alesi míaxlẽ míaƒe ŋkekewoe be wòahe ŋutikɔkɔe vɛ na Yehowa la, nukae míakpɔ mɔ na?
9 Ne míesrɔ̃ alesi míaxlẽ míaƒe ŋkekewoe le mɔ si ahe ŋutikɔkɔe vɛ na Yehowa nu la, ana míayi edzi anɔ wo xexlẽ dzi ɖaa, elabena Mawu ƒe nufiafia naa sidzedze si ana agbe mavɔ ame. Yesu gblɔ be: “Esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.” (Yohanes 17:3) Nyateƒee, ne xexemenunyawo katã su mía si la, mana agbe mavɔ mí o. Gake ne ame eve siwo nye ame vevitɔwo kekeake le xexeame katã la ŋuti sidzedze vavãtɔ su mía si eye míewɔ nu le xɔse me nyateƒe la, míate ŋu akpɔ agbe mavɔ.
10. Nya kae nugɔmekugbalẽ aɖe gblɔ le hehexɔxɔ ŋu, eye nukae míakpɔ ne míetsɔ nya sia sɔ kple viɖe siwo dona tsoa Mawu ƒe nufiafia me?
10 Eɖanye ɣeyiɣi didi kae míeɖanɔ agbee xoxo o, mina Mawu ƒe nufiafia ƒe viɖe ɖedzesi sia nanɔ susu me na mí: Enaa tameɖoɖo vavãtɔ sua amesiwo wɔa eŋudɔ la si. The World Book Encyclopedia gblɔ be: “Ele be hehexɔxɔ nakpe ɖe amewo ŋu be woazu ŋudɔwɔnu nyuiwo le amesiwo dome wole la me. Ele be wòakpe ɖe wo ŋu hã be woakpɔ ŋudzedze ɖe agbenɔnɔ siwo ƒe dome wonyi tso wo tɔgbuiwo gbɔ la ŋu eye woanɔ agbe si me dzidzeme geɖe wu le.” Mawu ƒe nufiafia kpena ɖe mía ŋu be míanɔ agbe si me dzidzeme le. Ena míekpɔa ŋudzedze deto ɖe gbɔgbɔmenu siwo nye domenyinu na mí Mawu ƒe amewo la ŋu. Eye ɖikekemanɔmee la, ena míenyea viɖenu na amesiwo dome míele la, elabena ekpena ɖe mía ŋu be míawɔ akpa vevi aɖe le amewo ƒe nuhiahiãwo gbɔ kpɔkpɔ me le xexeame godoo. Nukata míate ŋu agblɔe alea?
Xexeame Katã ƒe Nufiafiaɖoɖo
11. Aleke Thomas Jefferson te gbe ɖe alesi hehexɔxɔ nyui hiãe la dzii?
11 Mawu ƒe nufiafia si ɖeke mesɔ kple o la kpɔa amewo ƒe hehexɔxɔnuhiahiãwo gbɔ na wo. Thomas Jefferson si va zu United States ƒe dukplɔla etɔ̃lia la kpɔ alesi wòhiã be woafia nu amewo la dze sii. Le lɛta aɖe si wòŋlɔ le August 13, 1786 dzi ɖo ɖe George Wythe si nye exɔlɔ̃ kple amesi hã de asi Ðokuisinɔnɔxɔgbalẽ te me la, Jefferson ŋlɔe be: “Ewɔ nam be se vevitɔ le míaƒe seawo katã mee nye se si gblɔ be míakaka sidzedze na amewo. Womate ŋu aɖo gɔmeɖoanyi sesẽ bubu aɖeke anyi atsɔ ana ablɔɖe kple dzidzɔkpɔkpɔ nali ke wu esia o. . . . Xɔ̃nye lɔlɔ̃tɔ, ɖe gbeƒã, ho aʋa ɖe numanyamanya ŋu sesĩe; de se si ana woafia nu amehawo, eye nàna woatrɔ asi le eŋu wòanyo ɖe edzi. Na mía detɔwo nanya . . . be adzɔ si woaxe ɖe [nufiafia] sia ta mesɔ gbɔ wu ga si woaxe na fia, nunɔla, kple amegã siwo woaɖo le mía dome ne míegblẽ dukɔa ɖe numanyamanya me la ƒe memamã akpe ɖeka lia o.”
12. Nukatae míate ŋu agblɔ be Mawu ƒe nufiafiae nye xexeame katã ƒe hehenaɖoɖo si le dzidzedze kpɔm hele vi ɖem wu ɖesiaɖe?
12 Le esi teƒe be Yehowa ƒe nufiafia nagblẽ dzɔdzɔenyenyelɔ̃lawo ɖe viviti me la, eɖo xexeame katã ƒe nufiafiaɖoɖo nyuitɔ si aɖe vi na wo la anyi. Esime Xexemeʋa II nu ganɔ sesẽm ƒe 50 enye esia la, United States Dukɔa ƒe Kɔmiti si kpɔa Hehenana ƒe Tɔtrɔnyawo gbɔ la kpɔe be “xexeame katã ƒe hehenana” hiã kpata. Hiahiã ma gakpɔtɔ li kokoko gake Mawu ƒe nufiafia ɖeka pɛ koe nye xexeame katã ƒe hehenaɖoɖo si le dzidzedze kpɔm. Eya ŋue viɖe le hã wu elabena enaa mɔkpɔkpɔ mɔkpɔkpɔmanɔsitɔwo, edoa woƒe agbenyuinɔnɔ kple gbɔgbɔmenuwo ɖe ŋgɔ, eɖea wo tso xexeame ƒe dada kple nazãbubu me, eye wònaa sidzedze si kplɔa ame yia agbe mavɔ me sua wo si. Ƒo wo katã ta la, nufiafiaɖoɖo sia le vi ɖem na amewo le afisiafi le esi wole nu fiam wo be woasubɔ Yehowa Mawu ta.
13. Aleke Yesaya 2:2-4 le eme vam egbeae?
13 Mawu ƒe nufiafia le vi ɖem na ameha gbogbo siwo va le Yehowa subɔlawo zum fifia. Wotsi dzi ɖe woƒe gbɔgbɔmenuhiahiãwo ŋu, eye wonya nyuie be Yehowa ƒe ŋkeke la gogo. (Mateo 5:3; Tesalonikatɔwo I, 5:1-6) Fifi laa sia, “le ŋkeke mlɔeawo me,” amesiawo siwo tso dukɔwo katã me le zi ƒom ɖe Yehowa ƒe to, eƒe tadedeagu dzadzɛ, la ŋu. Eli ke sesĩe eye ekɔ ta gbɔ tadedeagu siwo katã mewɔ ɖeka kple Mawu ƒe lɔlɔ̃nu o la ŋu. (Yesaya 2:2-4) Ne Yehowa ƒe Ðasefo ɖeadzɔgbee nènye la, ɖe medzɔa dzi na wò be yele ameha gbogbo siwo dea ta agu na Yehowa eye eƒe nufiafia le vi ɖem na wo la dome oa? Aleke gbegbe wònyoe nye si be míanɔ amesiwo doa ɣli be: “Mikafu Yehowa!” la dome!—Psalmo 150:6.
Ŋusẽ Nyui si Wòkpɔna Ðe Míaƒe Gbɔgbɔ Dzi
14. Viɖe kae wòanye ne míewɔ ɖe Paulo ƒe aɖaŋuɖoɖo si le Korintotɔwo I, 14:20 dzi?
14 Ŋusẽ nyui si Mawu ƒe nufiafia kpɔna ɖe míaƒe tamesusu kple míaƒe gbɔgbɔ dzi la hã le viɖe gbogbo siwo tsoa eme la dome. Eʋãa mí be míasusu nusiwo le dzɔdzɔe, nusiwo le dzadzɛ, nudzeamewɔwɔ, kple nusiwo dze kafukafu la ŋu. (Filipitɔwo 4:8) Yehowa ƒe nufiafia kpena ɖe mía ŋu míewɔna ɖe Paulo ƒe aɖaŋuɖoɖo sia dzi: “Mizu vidzĩwo le nu tovo wɔwɔ me boŋ, ke nyasã me la mizu ame tsitsiwo.” (Korintotɔwo I, 14:20) Ne míewɔ ɖe nuxlɔ̃ame sia dzi la, míadi be vɔ̃ɖinyenye ƒe sidzedze nasu mía si o. Paulo gaŋlɔe be: “Mina woaɖe veve heliheli kple dɔmedzoe kple dziku kple ɣlidodo kple busubɔbɔ katã kpakple nu tovo wɔwɔ katã hã ɖa le mia dome.” (Efesotɔwo 4:31) Aɖaŋuɖoɖo siawo tɔgbe ŋudɔwɔwɔ akpe ɖe mía ŋu míatsri agbegbegblẽnɔnɔ kple nuvɔ̃ gã bubuwo. Togbɔ be esia ate ŋu aɖe vi na mí le ŋutilã kple susu me hã la, vevietɔ la, ana míakpɔ dzidzɔ ne míenya be míele nusi dzea Mawu ŋu la wɔm.
15. Nukae akpe ɖe mía ŋu be míaƒe tamesusuwo nanɔ nusi nyo ko ŋu ɖaa?
15 Nusiwo akpe ɖe mía ŋu be míaƒe tamesusu nanɔ nusi dze ŋu dometɔ ɖekae nye be míatsri ‘hadede vɔ̃ siwo gblẽa nɔnɔme nyuiwo.’ (Korintotɔwo I, 15:33) Esi míenye Kristotɔwo ta la, míade ha kple matrewɔlawo, ahasiwɔlawo, kple nu gbegblẽ bubu wɔlawo o. Eyata eme kɔ be mele be míade ha kple ame mawo le esi míanɔ nu xlẽm tso wo ŋuti be míaɖi kɔ na míaƒe seselelãmewo alo míanɔ wo kpɔm le television dzi alo le sinima me o. Ame ƒe dzi la, alakpatɔ wònye, nugbegblẽwɔwɔ ƒe nudzodzro ate ŋu age ɖe eme bɔbɔe eye wo wɔwɔ ate ŋu adzroe bɔbɔe. (Yeremya 17:9) Eyata mina míalé ɖe Mawu ƒe nufiafia ŋuti be míaƒo asa na tetekpɔ mawo katã. Ate ŋu akpɔ ŋusẽ ɖe “amesiwo lɔ̃a Yehowa” ƒe tamesusu dzi wòaɖe vi na wo ale gbegbe be ‘woalé fu vɔ̃.’—Psalmo 97:10.
16. Aleke Mawu ƒe nufiafia ate ŋu akpɔ ŋusẽ ɖe gbɔgbɔ si míeɖena fiana la dzii?
16 Paulo gblɔ na eƒe hadɔwɔla Timoteo be: “Aƒetɔ Yesu Kristo nanɔ anyi kple wò gbɔgbɔ la! Amenuveve nanɔ anyi kpli mi!” (Timoteo II, 4:22) Enye apostolo la ƒe didi be Mawu nato Aƒetɔ Yesu Kristo dzi akpɔ ŋudzedze ɖe ameʋãŋusẽ si nɔ Timoteo kple Kristotɔ bubuwo ʋãm la ŋu. Mawu ƒe nufiafia kpena ɖe mía ŋu be míeɖea lɔlɔ̃, dɔmetɔtrɔ, kple dɔmefafa ƒe gbɔgbɔ fiana. (Kolosetɔwo 3:9-14) Eye aleke gbegbe wòheto vovo na ame geɖewo tɔ le ŋkeke mamle siawo mee nye si! Wonye dadalawo, ame madakpewo, amesiwo melɔ̃a ame ƒe nya o, amesiwo melɔ̃na ɖe nya dzi o, ame mabunuwo, amesiwo lɔ̃ hadzedze, kple amesiwo si mawusosroɖa ƒe nɔnɔme vavã mele o. (Timoteo II, 3:1-5) Gake ne míeyi edzi wɔ viɖe siwo tsoa Mawu ƒe nufiafia me ŋudɔ le míaƒe agbenɔnɔ me la, míanɔ gbɔgbɔ si ana Mawu kple mía havi amegbetɔwo nalɔ̃ mí la ɖem fia.
Eɖea Vi le Amegbetɔwo Dome Ƒomedodowo Me
17. Nukata nuwɔwɔ ɖekae ɖokuibɔbɔtɔe hiã vevie nenema gbegbe?
17 Yehowa ƒe nufiafia kpena ɖe mía ŋu míekpɔa viɖe si dona tsoa dɔwɔwɔ ɖekae kple mía hatitadeagulawo me le ɖokuibɔbɔ me dzea sii. (Psalmo 138:6) Míedaa gɔmeɖose dzɔdzɔewo dzi abe alesi ame geɖewo wɔna egbea ene o ke boŋ míelɔ̃na ɖe nya dzi. Le kpɔɖeŋu me, esi dzikpɔla siwo woɖo la wɔa ɖeka le hamemegãwo ƒe kpekpewo me ta la, nu nyui geɖewo dona tsoa eme. Ŋutsu siawo te ŋu ƒoa nu bɔkɔɔ le nyateƒea ta, gake womeɖea mɔ be seselelãme tsyɔa nuŋububu nyui dzi alo wòhea ɖekamawɔmawɔ vɛ o. Ne mí katã míeyi edzi le Mawu ƒe nufiafia ŋudɔ wɔm la, ɖekawɔgbɔgbɔ si le mía dome la aɖe vi na hamea me tɔwo katã.—Psalmo 133:1-3.
18. Nukpɔsusu kae Mawu ƒe nufiafia kpena ɖe mía ŋu wònɔa mía si ɖe haxɔsetɔwo ŋu?
18 Mawu ƒe nufiafia kpena ɖe mía ŋu hã be nukpɔsusu nyui nɔa mía si ɖe haxɔsetɔwo ŋu. Yesu gblɔ be: “Ame aɖeke mate ŋu ava gbɔnye o, ne menye Fofo, si dɔm ɖa lae hee vɛ o.” (Yohanes 6:44) Vevietɔ tso ƒe 1919 me ke la, Yehowa na eƒe amewo le gbeƒã ɖem eƒe ʋɔnudɔdrɔ̃wo eye wotsɔ xexeame katã ƒe nuxlɔ̃amenana sia ʋuʋu Satana ƒe xexemenuɖoanyi lae. Le ɣeyiɣi ma ke me la, Mawu le amegbetɔ siwo vɔ̃nɛ la—‘nu vevitɔwo’—hem be woaɖe wo ɖokui ɖa le dukɔwo ŋu eye woakpe ɖe Kristotɔ amesiaminawo ŋu woatsɔ ŋutikɔkɔe ayɔ Yehowa ƒe tadeaguƒe la taŋ. (Xagai 2:7) Ẽ, ele be míabu ame vevi mawo siwo hem Mawu le la be wonye zɔhɛ lɔlɔ̃tɔwo.
19. Nukae Mawu ƒe nufiafia ɖe fia le kuxi siwo ado mo ɖa le mía kple hati Kristotɔwo dome la gbɔ kpɔkpɔ me ŋu?
19 Gake esi mí katã míede blibo o ta la, nuwo katã mazɔ le agbe me nyuie ya o. Hafi Paulo nadze eƒe dutanyanyuigbɔgblɔ ƒe mɔzɔzɔ evelia gɔme la, Barnaba ɖoe kplikpaa be yeakplɔ Marko ɖe asi. Paulo melɔ̃ ɖe edzi o elabena Marko “trɔ le wo yome le Pamfilia, eye meyi ɖawɔ dɔ kpli wo o.” Esia “zu dɔmedzoe na wo.” Barnaba tsɔ Marko kpe ɖe eɖokui ŋu eye woyi Kipro, ke Paulo hã kplɔ Sila ɖe asi eye woyi Siria kple Kilikia. (Dɔwɔwɔwo 15:36-41) Edze ƒã be woɖɔ masɔmasɔ sia ɖo emegbe, elabena Marko nɔ Paulo ŋu le Roma eye apostolo la ƒo nu nyui le eŋu. (Kolosetɔwo 4:10) Mawu ƒe nufiafia ƒe viɖewo dometɔ ɖekae nye be efiaa mí alesi míaɖɔ masɔmasɔwo ɖo le Kristotɔwo dome to wɔwɔ ɖe nuxlɔ̃amewo, abe Yesu tɔ ene si le Mateo 5:23, 24 kple Mateo 18:15-17 me la dzi.
Eɖea Vi Heɖua Dzi Ðaa
20, 21. Nukae wòle be Mawu ƒe nufiafia me dzodzro naʋã mí be míawɔ?
20 Ðikeke mele eme o be Mawu ƒe nufiafia ƒe viɖewo kple eƒe dziɖuɖu ʋee siwo me míedzro la gɔ̃ hã na mí katã míekpɔ alesi wòhiã be míaku kutri le eŋudɔwɔwɔ me le míaƒe agbe me la dze sii. Eyata mina míatsɔ gbedodoɖa ayi edzi asrɔ̃ nu tso míaƒe Nufiala Gãtɔ la gbɔ. Esusɔ vie ko Mawu ƒe nufiafia aɖu dzi wu ɣeyiɣi bubu ɖesiaɖe. Aɖu dzi le ɣeyiɣi si me xexe sia me nunyalawo nu ayi keŋkeŋ. (Tsɔe sɔ kple Korintotɔwo I, 1:19.) Gawu la, esime ame miliɔn geɖewo le Mawu ƒe lɔlɔ̃nu srɔ̃m eye wole ewɔm la, sidzedze Yehowa axɔ anyigba la dzi abe alesi tsi yɔ atsiaƒu mee ene. (Yesaya 11:9) Aleke gbegbe esia aɖe vi na ameƒomea me tɔ toɖolawo eye wòakɔ Yehowa ŋu be eyae nye Xexeame Katã ƒe Dziɖula Gãtɔ enye si!
21 Yehowa ƒe nufiafia aɖe vi ahaɖu dzi ɣesiaɣi ɖaa tegbee. Àyi edzi anye Mawu ƒe Nufiagbalẽ gã la srɔ̃la veviedonula be wòaɖe vi na wòa? Èle agbe nɔm ɖe Biblia me nyateƒeawo nu hele egblɔm na ame bubuwoa? Ne èwɔnɛ alea la, ekema àte ŋu akpɔ mɔ na ɣeyiɣi si me Mawu ƒe nufiafia aɖu dzi bliboe, be wòanye ŋutikɔkɔe na Aƒetɔ Fiagã Yehowa, míaƒe Nufiala Gãtɔ.
Nukae Nèsrɔ̃?
◻ Ŋusẽ kae Mawu ƒe nufiafia ate ŋu akpɔ ɖe míaƒe agbenɔnɔ dzi?
◻ Aleke Yehowa ƒe nufiafia le hehexɔxɔnuhiahiãwo gbɔ kpɔmee?
◻ Ŋusẽ nyui kae Mawu ƒe nufiafia ate ŋu akpɔ ɖe míaƒe tamebubu kple nuwɔna dzi?
◻ Aleke Mawu ƒe nufiafia ɖea vi le amegbetɔwo dome ƒomedodowo mee?
[Nɔnɔmetata si le axa 15]
Mawu ƒe nufiafia fiaa alesi míazɔ kple Mawu abe alesi Noa zɔ kplii ene la mí
[Nɔnɔmetata si le axa 17]
Dukɔwo katã me tɔwo le zi ƒom ɖe Yehowa ƒe to la ŋu