“Fifia Koŋ Ye Nye Amenuveɣi La”
“Kpɔ ɖa! Fifia koŋ ye nye amenuveɣi la. Kpɔ ɖa! Fifiae nye xɔxɔ ƒe ŋkeke la.” —2 KOR. 6:2.
1. Nu ka tae wòle be míade dzesi dɔ si le vevie wu, si wòle be míawɔ le ɣeyiɣi ɖoɖi aɖe me?
‘ƔEYIƔI li na nu sia nu, eye azã li na tameɖoɖowo katã le dziƒoa te.’ (Nyagb. 3:1) Salomo to nya sia dzi nɔ vevienyenye si le ɣeyiɣi nyuitɔ si me wòle be woawɔ dɔ ɖe sia ɖe si ŋu viɖe le la ɖem fia, eɖanye agbledede, mɔzɔzɔ, asitsatsa, alo dzeɖoɖo kple amewo o. Ke hã, ele hã be míade dzesi dɔ si le vevie wu, si wòle be míawɔ le ɣeyiɣi ɖoɖi aɖe me. Ne míagblɔe bubui la, ele be míanya nu siwo wòle be míatsɔ aɖo nɔƒe gbãtɔ la nyuie.
2. Aleke míewɔ nya be esime Yesu nɔ gbeƒã ɖem la, enya ɣeyiɣi si me wònɔ la nyuie?
2 Esime Yesu nɔ anyigba dzi la, enya ɣeyiɣi si me wònɔ kple nu siwo wònɔ nɛ be wòawɔ la nyuie. Esi wònya nu siwo le vevie nɛ wu le agbe me ta la, enyae be ɣeyiɣia de be Mesia la ŋuti nyagblɔɖi gbogbo siwo woŋlɔ ɖi ɣeyiɣi didi aɖee nye ema la nava eme. (1 Pet. 1:11; Nyaɖ. 19:10) Dɔ geɖe nɔ edzi wòawɔ atsɔ aɖee afia be yee nye Mesia si ŋugbe wodo la. Enɔ nɛ be wòaɖi ɖase tsitotsito tso nyateƒe si ku ɖe Fiaɖuƒea ŋu la ŋuti, eye wòaƒo ame siwo ava nye Fiaɖuƒea ƒe domenyilawo la nu ƒu. Enɔ nɛ hã be wòaɖo Kristo hame, si ayi edzi awɔ gbeƒãɖeɖe kple nusrɔ̃lawɔwɔ dɔa va se ɖe anyigba ƒe seƒe ke, la gɔme anyi.—Mar. 1:15.
3. Aleke ɣeyiɣi si me Yesu nɔ la nyanya kpɔ ŋusẽ ɖe eƒe nuwɔnawo dzi?
3 Ɣeyiɣi si me Yesu nɔ la nyanya nye ameʋãŋusẽ nyuitɔ le eƒe agbe me, si ʋãe wòwɔ dɔ dzonɔamemetɔe le Fofoa ƒe lɔlɔ̃nu wɔwɔ me. Egblɔ na eƒe nusrɔ̃lawo be: “Nyateƒee, nuŋeŋe la sɔ gbɔ, gake dɔwɔlawo ya mesɔ gbɔ o. Eya ta miɖe kuku na nuŋeŋe ƒe Aƒetɔ la be wòaɖo dɔwɔlawo ɖe eƒe nuŋeŋe la me.” (Luka 10:2; Mal. 3:23, 24) Gbã la, Yesu tia ame 12 tso eƒe nusrɔ̃lawo dome, emegbe etia wo dometɔ 70 hena mɔfiame siwo le tẽe la wo, eye wòdɔ wo ɖa be woaɖaɖe gbeƒã gbedeasi wɔdɔɖeamedzi sia be: “Dziƒofiaɖuƒe la gogo.” Biblia gblɔ tso Yesu ŋutɔ hã ŋu be: “Esi Yesu wu mɔfiamewo nana eƒe nusrɔ̃la wuieveawo nu vɔ la, edzo le afi ma, eye wòyi be yeafia nu ahaɖe gbeƒã le woƒe duawo me.”—Mat. 10:5-7; 11:1; Luka 10:1.
4. Mɔ ka nue Paulo srɔ̃ Yesu Kristo le?
4 Dzonɔameme kple ɖokuitsɔtsɔna ƒe kpɔɖeŋu debliboe Yesu nye na eyomedzelawo. Nu sia dzie apostolo Paulo nɔ susu hem yi esi wòde dzi ƒo na eƒe haxɔsetɔwo be: “Mizu srɔ̃nyelawo, abe ale si nye hã menye Kristo srɔ̃la ene.” (1 Kor. 11:1) Mɔ ka nue Paulo srɔ̃ Kristo le? To ale si wòwɔ eƒe ŋutete katã le gbeƒãɖeɖe nya nyuia me. Míekpɔe be, le lɛta siwo Paulo ŋlɔ na hameawo me la, ezã nyawo abe “migawɔ kuvia le miaƒe dɔ ŋu o,” “miwɔ dɔ na Yehowa abe kluviwo ene,” “miwɔ geɖe le Aƒetɔ la ƒe dɔwɔwɔ la me ɣesiaɣi,” kple “nu sia nu si wɔm miele la, miwɔe tso luʋɔ blibo me abe Yehowa ye miele ewɔm na ene.” (Rom. 12:11; 1 Kor. 15:58; Kol. 3:23) Paulo meŋlɔ ale si Aƒetɔ Yesu Kristo ɖe eɖokui fiae le Damasko mɔa dzi la be kpɔ gbeɖe o, eye meŋlɔ nya siwo Yesu gblɔ na nusrɔ̃la Anania be, “Ŋutsu sia nye dɔwɔnu tiatia aɖe nam, be wòatsɔ nye ŋkɔ la ayi na dukɔwo kple fiawo kpakple Israel viwo,” nya siwo Anania anya gblɔ nɛ godoo la hã be o.—Dɔw. 9:15; Rom. 1:1, 5; Gal. 1:16.
“Fifia Koŋ Ye Nye Amenuveɣi La”
5. Nu kae ʋã Paulo wòwɔ eƒe subɔsubɔdɔa dzonɔamemetɔe?
5 Ne míele Dɔwɔwɔwo ƒe agbalẽa xlẽm la, míade dzesi dzideƒo kple dzonɔameme si Paulo tsɔ wɔ eƒe subɔsubɔdɔae la godoo. (Dɔw. 13:9, 10; 17:16, 17; 18:5) Paulo kpɔ vevienyenye si nɔ ɣeyiɣi si me wònɔ la ŋu dze sii. Egblɔ be: “Kpɔ ɖa! Fifia koŋ ye nye amenuveɣi la. Kpɔ ɖa! Fifiae nye xɔxɔ ƒe ŋkeke la.” (2 Kor. 6:2) Do ŋgɔ na eƒe ŋkekea la, ƒe 537 D.M.Ŋ. nye amenuveɣi na aboyome siwo nɔ Babilon la be woatrɔ agbɔ va wo denyigba dzi. (Yes. 49:8, 9) Ke nu kae Paulo wɔnɛ le afi sia? Nya siwo ƒo xlã eƒe nyaa la kpe ɖe mía ŋu míekpɔ nu si nɔ susu me nɛ la dze sii.
6, 7. Bubu tɔxɛ kae wode Kristotɔ amesiamina siwo li egbea ŋu, eye ame kawoe le dɔ wɔm aduadu kple amesiaminawo?
6 Do ŋgɔ la, Paulo ƒo nu tso bubu tɔxɛ si wode eya kple ehati Kristotɔ amesiaminawo ŋu la ŋu le eƒe lɛtaa me. (Mixlẽ 2 Korintotɔwo 5:18-20.) Eɖe eme be, Mawu yɔ yewo ɖe taɖodzinu aɖe koŋ ta, be yewoawɔ “ame nɔewo dome dzadzraɖo ƒe subɔsubɔdɔ,” be yewoaɖe kuku na amewo be, “mina woadzra mia kple Mawu dome ɖo.” Ema fia be amewo nana woa kple Mawu dome nanɔ nyuie alo woanɔ ŋutifafa me kplii.
7 Tso esime aglãdzedze do mo ɖa le Eden bɔa me kee ameƒomea katã te ɖe aga alo klã ɖa tso Yehowa gbɔ. (Rom. 3:10, 23) Esia nyrɔ amegbetɔƒomea katã ɖe gbɔgbɔmeviviti me eye wòhe fukpekpe kple ku va na wo. Paulo ŋlɔ bena: “Míenyae be nuwɔwɔ blibo la katã le ŋeŋem ɖekae, eye wòle veve sem ɖekae va se ɖe fifia.” (Rom. 8:22) Gake Mawu wɔ afɔɖeɖe geɖewo tsɔ de dzi ƒo na amewo be woatrɔ ava ye gbɔ, ne míagblɔe ŋutɔŋutɔ la, “eɖe kuku” na wo be woana woadzra woa kplii dome ɖo. Emae nye subɔsubɔdɔ si wode asi na Paulo kple ehati Kristotɔ amesiaminawo ɣemaɣi. “Amenuveɣi” ma ate ŋu azu “xɔxɔ ƒe ŋkeke” na ame siwo xɔ Yesu dzi se. Kristotɔ amesiaminawo katã kple woƒe zɔhɛ ‘alẽ bubuawo,’ siwo le dɔ wɔm aduadua kpli wo la yi edzi le amewo kpem be woana “amenuveɣi” la naɖe vi na wo.—Yoh. 10:16.
8. Nu kae na be amewo kpekpe be woana woadzra woa kple Mawu dome ɖo la gaɖe dzesii geɖe wu?
8 Nu si na amewo kpekpe be woana woadzra woa kple Mawu dome ɖo la gaɖe dzesii geɖe wue nye be, togbɔ be amegbetɔwo ƒe aglãdzedze le Eden bɔa me gbɔe kuxia tso hã la, Mawu ŋutɔ tsɔe ɖo eɖokui dzi wɔ afɔɖeɖe be yeatsɔ aɖɔ kuxia ɖo. (1 Yoh. 4:10, 19) Nu kae wòwɔ? Paulo gblɔ be: “Mawu to Kristo dzi nɔ woa kple xexe aɖe dome dzram ɖo, eye megabua woƒe vodadawo na wo o, eye wòtsɔ ame nɔewo dome dzadzraɖo ƒe nya la de asi na mí.”—2 Kor. 5:19; Yes. 55:6.
9. Nu kae Paulo wɔ tsɔ ɖe eƒe ŋudzedzekpɔkpɔ ɖe Mawu ƒe nublanuikpɔkpɔ ŋu fia?
9 Yehowa to tafevɔsaa dzi na be wòate ŋu anya wɔ be ame siwo xɔ tafea dzi se la nakpɔ nu vɔ̃wo ƒe tsɔtsɔ ke, eye ƒomedodo nyui nagava nɔ woa kplii dome. Gakpe ɖe eŋu la, eɖo eƒe amedɔdɔwo ɖa be woaɖade dzi ƒo na amewo le afi sia afi be woawɔ ŋutifafa kplii esi ɣeyiɣia gakpɔ li na ewɔwɔ. (Mixlẽ 1 Timoteo 2:3-6.) Esi Paulo se nu si Mawu ƒe lɔlɔ̃nu nye gɔme eye wòkpɔ ɣeyiɣi si me wònɔ la dze sii ta la, ewɔ dɔ kutrikukutɔe le “ame nɔewo dome dzadzraɖo ƒe subɔsubɔdɔ” la me. Yehowa ƒe lɔlɔ̃nu metrɔ o. Mawu gakpɔtɔ ke eƒe abɔwo me na ameƒome si ɖe ɖa aga tso egbɔ la kokoko. Paulo ƒe nya siwo nye “fifia koŋ ye nye amenuveɣi la” kple “fifiae nye xɔxɔ ƒe ŋkeke la” gasɔ egbea hã. Mawu si kpɔa nublanui hesea veve ɖe ame nu ka gbegbee nye esi Yehowa nye!—2 Mose 34:6, 7.
‘Mègada Taɖodzinu Si Le Eŋu La Ƒu O’
10. Nu kae “xɔxɔ ƒe ŋkeke la” fia na Kristotɔ amesiamina siwo nɔ anyi le blema kple esiwo li egbea?
10 Ame gbãtɔ siwo Mawu ƒe amenuveve ɖe vi nae nye ame siwo “le ƒomedodo me kple Kristo.” (2 Kor. 5:17, 18) Le woawo gome la, “xɔxɔ ƒe ŋkeke” la dze egɔme tso ƒe 33 M.Ŋ. ƒe Pentekostea dzi. Tso ɣemaɣi la, wode dɔ asi na wo be woanɔ gbeƒã ɖem “ame nɔewo dome dzadzraɖo ƒe nya la.” Egbea la, Kristotɔ amesiamina susɔeawo gakpɔtɔ le “ame nɔewo dome dzadzraɖo ƒe subɔsubɔdɔ” la wɔm. Wokpɔe dze sii be, mawudɔla ene siwo apostolo Yohanes kpɔ le nyagblɔɖiŋutega si woɖe fiae me la “[lé] anyigba ƒe ya eneawo ɖe asi goŋgoŋ, bene ya aɖeke nagaƒo ɖe anyigba dzi” o. Eya ta ɣeyiɣi si me míele la gakpɔtɔ nye “xɔxɔ ƒe ŋkeke” kple “amenuveɣi.” (Nyaɖ. 7:1-3) Le susu sia ta, tso keke ƒe alafa 20 lia ƒe gɔmedzedze ke la, amesiamina susɔeawo le “ame nɔewo dome dzadzraɖo ƒe subɔsubɔdɔ” si wode wo si la wɔm dzonɔamemetɔe yi ɖe anyigba ƒe dzogoeawo katã dzi.
11, 12. Aleke Kristotɔ amesiamina siwo nɔ anyi le ƒe alafa 20 lia ƒe gɔmedzedze la ɖee fia be yewonya ɣeyiɣi si me yewonɔ la? (Kpɔ foto si le axa 15 lia.)
11 Le kpɔɖeŋu me, abe ale si wogblɔe le agbalẽ si nye Jehovah’s Witnesses—Proclaimers of God’s Kingdom (Les Témoins de Jéhovah: Prédicateurs du Royaume de Dieu) me ene la, le ƒe alafa 20 lia ƒe gɔmedzedze la, Nɔviŋutsu “C. T. Russell kple eƒe hadɔwɔlawo xɔe se vevie be yewole nuŋeɣi la me, eye ehiã be amewo nase nyateƒe si naa ablɔɖe ame la.” Nu kae wowɔ tso esia ŋu? Esi wokpɔe dze sii be nuŋeɣi la mee yewole, eye ɣemaɣi “koŋ ye nye amenuveɣi la” ta la, amewo kpekpe be woava se mawunya ɖeɖe mesɔ gbɔ na wo o. Nenemae Kristodukɔa ƒe sɔlemehakplɔlawo wɔna ɣeyiɣi didi aɖee nye ema. Le esia teƒe la, Kristotɔ amesiaminawo dze mɔnu bubu siwo wɔa dɔ nyuie la zazã gɔme aɖaŋutɔe le nya nyuia kaka me. Woto mɔ̃ɖaŋunu yeyewo kple mɔ bubuwo dzi do woƒe dɔa ɖe ŋgɔ.
12 Be gbeƒãɖela siwo me dzo nɔ ƒe ƒuƒoƒo sue ma nakaka Fiaɖuƒe ŋuti nya nyuia la, wozã traktwo, agbalẽviwo, magazinewo, kple agbalẽwo. Woŋlɔa nu Biblia me nyati vovovowo ŋu eye wonana wotaa wo ɖe nyadzɔdzɔgbalẽ akpe geɖewo me. Woƒoa nuƒo siwo wotu ɖe Ŋɔŋlɔawo dzi le dukɔa ƒe radio kpakple radio siwo woate ŋu alé le dukɔ bubuwo me dzi. Hafi sinima ƒe asitsanuɖoanyia nadze sinima alo nɔnɔmetata siwo ʋãna siwo ŋu gbeɖiɖiwo kpe ɖo wɔwɔ gɔme la, nɔviawo dze sinima siawo wɔwɔ gɔme hezãa wo le gbeƒãɖeɖedɔa me xoxo. Nu kae do tso dzonɔameme sia, si nu metsi o, si woɖe fia la me? Egbea la, ame siwo wu miliɔn adre siwo ɖo to gbedeasia la wɔ ɖeka le gbeƒã ɖem nya sia be: “Mina woadzra mia kple Mawu dome ɖo.” Vavãe, Yehowa subɔla siwo nɔ anyi le ƒe alafa 20 lia ƒe gɔmedzedze la nye kpɔɖeŋu ɖedzesi aɖe, togbɔ be nuwo mede wo dzi abe egbea ene o hã.
13. Mawu ƒe tameɖoɖo kae wòle be míabu nya vevii?
13 Nya si Paulo gblɔ be, “fifia koŋ ye nye amenuveɣi la” gakpɔtɔ nye nyateƒe kokoko. Mí ame siwo ɖɔ Yehowa ƒe amenuveve kpɔ la, míedaa akpe be wona mɔnukpɔkpɔ mí be míese ame nɔewo dome dzadzraɖo ƒe gbedeasia eye míewɔ ɖe edzi. Le esi míase le mía ɖokui me be ema ɖeɖe sɔ gbɔ na mí teƒe la, míebua nya sia si Paulo gagblɔ kplɔe ɖo be, “míele kuku ɖem na mi vevie hã be, miagaxɔ Mawu ƒe amenuveve la, evɔ ada taɖodzinu si le eŋu ya ƒu o” la nya vevii. (2 Kor. 6:1) Amenuveve ƒe ɖoɖo si Mawu wɔ ye nye be ‘yeato Kristo dzi adzra ye kple xexea dome ɖo.’—2 Kor. 5:19.
14. Mɔnukpɔkpɔ kae su amewo si le dukɔ geɖe me?
14 Ameƒomea ƒe akpa gãtɔ, si Satana gbã ŋku na la, gakpɔtɔ le adzɔge tso Mawu gbɔ eye womenya amenuveve ƒe ɖoɖo Mawu wɔ o. (2 Kor. 4:3, 4; 1 Yoh. 5:19) Gake xexea me ƒe nɔnɔme si le gbegblẽm ɖe edzi la wɔe be ame geɖe va le to ɖom, ne woɖee fia wo be aglãdzedze ɖe Mawu ŋu gbɔe ameƒomea ƒe kuxiwo kple fukpekpewo tso. Le dukɔ siwo me amewo meɖoa to gbedeasia le tsã o gɔ̃ hã me la, ame geɖe va le to ɖom nya nyuia fifia, eye wole afɔ ɖem be woadzra woa kple Mawu dome ɖo. Azɔ, ɖe míekpɔe dze sii be, fifiae nye ɣeyiɣi si me wòle be míaɖe gbeƒã kukuɖenya sia si nye, “Mina woadzra mia kple Mawu dome ɖo” la dzonɔamemetɔe geɖe wu oa?
15. Le esi míado ŋugbe na amewo be ne wote ɖe Mawu ŋu la, akpɔ woƒe kuxiwo katã gbɔ na wo teƒe la, nu kae míedina be ame sia ame nanya?
15 Menye gbɔgblɔ na amewo be ne wotrɔ ɖe Mawu ŋu ko la akpɔ woƒe kuxiwo katã gbɔ na wo eye woƒe dzi adze eme ye míaƒe dɔa nye o. Nu ma ko dimee ame geɖe le le sɔlemewo me, eye sɔlemehakplɔlawo hã dzea agbagba be yewoagblɔ nya mawo tɔgbi na wo. (2 Tim. 4:3, 4) Menye emae nye míaƒe subɔsubɔdɔa ƒe taɖodzinu o. Ke boŋ nya nyui si míeɖea gbeƒã lae nye be, lɔlɔ̃ ʋã Yehowa wòlɔ̃ faa be yeatsɔ amewo ƒe nu vɔ̃wo ake wo to Kristo dzi. Esia awɔe be ame sia ame ate ŋu ate ɖe Mawu ŋu eye wòana woadzra woa kplii dome ɖo. (Rom. 5:10; 8:32) Ke hã, “amenuveɣi la” ƒe nuwuwu le aƒe tum kabakaba.
“Mixɔ Dzo Le Gbɔgbɔ La Me”
16. Nu kae na dzo nɔ Paulo me eye dzi nɔ eƒo?
16 Ke aleke míate ŋu awɔ be dzo nanɔ mía me ɖe tadedeagu vavãtɔa ŋu eye enu nagati o? Ate ŋu anɔ eme be mía dometɔ aɖewo kpea ŋu le dzɔdzɔme nu, alo nu menya ƒona na wo o, eye ate ŋu asesẽ na wo be woate ɖe amewo ŋu xɔlɔ̃wɔwɔtɔe aɖo dze kpli wo faa. Ke hã, enyo be míaɖo ŋku edzi be, menye seselelãme ɖeɖe fia alo gotagome dzidzɔkpɔkpɔ dzro koe dzonɔameme nye o; eye menɔ te ɖe ame ƒe amenyenye hã dzi o. Paulo fia asi nu vevi si naa dzo nɔa ame me esi wòde dzi ƒo na ehati Kristotɔwo be: “Mixɔ dzo le gbɔgbɔ la me.” (Rom. 12:11) Yehowa ƒe gbɔgbɔa wɔ akpa vevi aɖe le apostoloa ƒe dzinɔameƒo kple dzidodo le gbeƒãɖeɖedɔa wɔwɔ me la me. Paulo tsɔ ƒe siwo wu 30 sɔŋ wɔ subɔsubɔdɔa, tso esime Yesu ɖe eɖokui fiae va se ɖe esime wolée de gaxɔ me zi mamlɛtɔ eye wòku xɔsetaku le Roma—ke hã, dzo si nɔ eme la nu metsi kpɔ gbeɖe o. Paulo kpɔ Mawu, ame si to gbɔgbɔ la dzi do ŋusẽe la, si nu ɣesiaɣi. Egbɔ be: “Le nuwo katã gome la, mekpɔa ŋusẽ tso ame si doa ŋusẽm la gbɔ.” (Flp. 4:13) Aleke gbegbee eƒe kpɔɖeŋua sɔsrɔ̃ aɖe vi na míi enye esi!
17. Aleke míawɔ be ‘míaxɔ dzo le gbɔgbɔ la me’?
17 Nu si nya si gɔme woɖe be ‘xɔ dzo’ la fia le nya la ŋutɔŋutɔ nue nye “nɔ fiefiem.” (Kingdom Interlinear) Ne míeɖo tsi dzo dzi eye míedi be tsia nanɔ fiefiem la, ele be míanɔ dzoa tum ɖo. Nenema kee ne míedi be ‘míaxɔ dzo le gbɔgbɔ me’ la, ele be míaɖe mɔ Mawu ƒe gbɔgbɔ la nanɔ dɔ wɔm le mía me madzudzɔmadzudzɔe. Mɔ si dzi míato be esia nava eme na mí ye nye be, míawɔ mɔnuɖoɖo siwo katã Yehowa wɔ na mí be woado ŋusẽ mí le gbɔgbɔ me la ŋu dɔ. Esia fia be míabu hamea kple míaƒe ƒomea ƒe tadedeagu nu vevii—míanɔ gome kpɔm le ɖokuisinusɔsrɔ̃, ƒomenusɔsrɔ̃, gbedodoɖa, kple hadede kple mía nɔvi Kristotɔwo le kpekpewo me edziedzi. Esia ana be kpɔɖeŋu ƒe “dzo” la nanɔ bibim eye tsia hã “nanɔ fiefiem,” si akpe ɖe mía ŋu be míayi edzi ‘axɔ dzo le gbɔgbɔ la me.’—Mixlẽ Dɔwɔwɔwo 4:20; 18:25.
18. Abe Kristotɔ ɖeadzɔgbewo ene la, taɖodzinu ka ŋue wòle be míaƒe susu katã nanɔ?
18 Ame aɖe si ɖe adzɔgbe be yeawɔ nane la tsɔa eƒe susu katã ɖoa taɖodzinu aɖe ŋu eye menɔa bɔbɔe be woahe eƒe susu ɖa le edzi alo woaɖe dzi le eƒo be wòagati taɖodzinu ma yome o. Abe Kristotɔ ɖeadzɔgbewo ene la, míaƒe taɖodzinue nye be míawɔ nu sia nu si Yehowa di tso mía si la, abe ale si Yesu wɔe ene. (Heb. 10:7) Egbea la, Yehowa ƒe lɔlɔ̃nue nye be ame ale si nu ate ŋui la nana woadzra woa kplii dome ɖo. Eya ta le Yesu kple Paulo sɔsrɔ̃ me la, mina mí katã míatsɔ dzonɔameme awɔ dɔ vevitɔ kekeake si hiã kpata egbea.
Èɖo Ŋku Wo Dzia?
• “Ame nɔewo dome dzadzraɖo ƒe subɔsubɔdɔ” kae wode asi na Paulo kple Kristotɔ amesiamina bubuawo?
• Alekee amesiamina susɔeawo wɔ si koŋ nye “amenuveɣi” la ŋu dɔ nyuie?
• Aleke Kristotɔwo ate ŋu awɔ ‘axɔ dzo le gbɔgbɔ la me’?
[Nɔnɔmetata si le axa 12]
Paulo meŋlɔ ale si Aƒetɔ Yesu Kristo ɖe eɖokui fiae la be kpɔ gbeɖe o