Mawu Ƒe Nufiafia Ðua Dzi
“Miakpɔ miaƒe [Nufiala Gãtɔ] kple ŋku, eye miaƒe to ase nya sia le mia megbe bena: Mɔ la enye si, mito edzi!”—YESAYA 30:20, 21.
1. Nukata woate ŋu ayɔ Yehowa ƒe mɔfiame be Mawu ƒe nufiafia wòasɔ?
YEHOWA MAWU ye nye nufiafia nyuitɔ kekeake si ame aɖe ate ŋu axɔ la Dzɔtsoƒe. Ne míeɖoa to ne wòƒo nu, vevietɔ to eƒe Nya Kɔkɔe la dzi la, anye míaƒe Nufiala Gãtɔ. (Yesaya 30:20) Hebri Ŋɔŋlɔawo hã yɔe be “Mawu Ŋusẽkatãtɔ.” (Psalmo 50:1) Eyata Yehowa ƒe mɔfiafia nye Mawu ƒe nufiafia.
2. Gɔmesese ka nue wònye nyateƒe le be Mawu ɖeka koe nye nunyala?
2 Xexeame dana ɖe hehenasuku gbogbo siwo le esi la dzi, gake Mawu ƒe nufiafia metsoa wo dometɔ ɖeka pɛ hã me o. Nyateƒee, nunya siwo katã nu ameƒomea ƒo ƒu ɖi le ŋutinya katã me meɖo afi aɖeke o ne wotsɔe sɔ kple Mawu ƒe nufiafia si wotu ɖe Yehowa ƒe nunya si seɖoƒe meli na o la dzi. Romatɔwo 16:27 gblɔ be Mawu ɖeɖekoe nye nunyala, eye esia nye nyateƒe le gɔmesese sia nu be Yehowa ko sie nunya si de blibo le.
3. Nukata wònye Yesu Kristo ye nye nufiala gãtɔ si nɔ anyigba dzi kpɔ?
3 Mawu ƒe Vi, Yesu Kristo, ye nye nunya deblibo kɔkɔtɔ kekeake ƒe kpɔɖeŋu eye eya hãe nye nufiala gãtɔ kekeake si nɔ anyigba sia dzi kpɔ. Mewɔ nuku o! Yehowa nye eƒe Nufiala le dziƒo ɣeyiɣi didi aɖe si ƒe didime míenya o. Le nyateƒe me la, Mawu ƒe nufiafia dze egɔme esime Mawu dze nufiafia eƒe nuwɔwɔ gbãtɔ si nye eƒe Tenuvi la gɔme. Eyata Yesu te ŋu gblɔ be: “Abe alesi Fofonye fiam ene la, nu mawo ke megblɔna.” (Yohanes 8:28; Lododowo 8:22, 30) Kristo ŋutɔ ƒe nya siwo woŋlɔ ɖe Biblia me na míenya nu geɖe tso Mawu ƒe nufiafia ŋu. Ne Kristotɔ amesiaminawo fia nusiwo Yesu fia la, afia be wole to ɖom Nufiala Gãtɔ, amesi ƒe lɔlɔ̃nue wònye be woana ‘Mawu ƒe nunya ƒomevi hamehame’ to hamea dzi.—Efesotɔwo 3:10, 11; 5:1; Luka 6:40.
Nunya Didi
4. Nya kae wogblɔ le ahɔhɔ̃ ƒe ŋutete ŋu?
4 Nunya si tsoa Mawu ƒe nufiafia me ƒe amesisusu bia be míado vevie nu le tamebubu ƒe ŋutete siwo Mawu na mí la zazã me. Esia anya wɔ elabena ŋutete gbogbo aɖe le amegbetɔ ƒe ahɔhɔ̃ ŋu. Agbalẽ si nye The Incredible Machine gblɔ be: “Kɔmpiuta sesẽtɔ kekeake siwo ava susu me na mí la nye fefenu tsɛwo ko ne wotsɔ wo sɔ kple alesi amegbetɔ ƒe ahɔhɔ̃ nye nu klitsu si ƒe ŋutete ŋu seɖoƒe mele o eye wòte ŋu trɔa asi le nu hamehame ŋuti bɔbɔe la—ŋutete siawo le esi, le esi wode nyatakakaxɔɖoɖo wɔnuku si zãa elektrikŋusẽ kple lãmetsiwo ƒe dɔwɔwɔ aduadu si wɔa dɔ ɖe ɖoɖo nu pɛpɛpɛ la eme ta. . . . Nyatakaka gbogbo aɖe nɔa nyatakakaxɔdzesi miliɔn geɖe siwo nɔa du dzi nɔ wò ahɔhɔ̃ me tom ɣesiaɣi la me. Wona nènyaa nusiwo le dzɔdzɔm le wò lãme kple le gota: ne wò afɔbide de ga, alo kɔfi ʋẽ lilili, alo xɔ̃wò aɖe ƒe nyagbɔgblɔ aɖe ɖi kokoe. Ne nyatakakaxɔdzesi bubuwo wɔ dɔ tso nya la ŋu eye wode ŋugble tso eŋu tsitotsito la, wonana nèsea seselelãme aɖewo, nèɖoa ŋku nanewo dzi, susu, alo ɖoɖo aɖewo vaa tame na wò si dzi nànɔ te ɖo atso nya me. Enumake ko la, dzesi siwo tso wò ahɔhɔ̃ me la gblɔa nusi wòle be wò ŋutilã ƒe akpa bubuwo nawɔ la na wo: ʋuʋu afɔbide, no kɔfia, ko nu, alo ɖewohĩ tsɔ nukokoedonamenya aɖe ɖo eŋui. Esime nusiawo le edzi yim la, wò ahɔhɔ̃ ganɔa dɔ wɔm tso wò gbɔgbɔ, wò ʋu ƒe dɔwɔwɔ, wò dzoxɔxɔ, kpakple dɔ vevi bubuwo hã ŋu evɔ wò ŋutɔ mènyana o. Eɖoa gbeɖeɖe siwo naa wò ŋutilã te ŋu nɔa te eye wòwɔa dɔ ɖe ɖoɖo nu nyuie la ɖa togbɔ be afisi nèle nɔa tɔtrɔ dzi ɖaa hã. Edzrana ɖo ɖe nuhiahiã bubu siwo ava hã ŋu.”—Axa 326.
5. Le Ŋɔŋlɔawo me gɔmesese nu la, nukae nye nunya?
5 Togbɔ be ɖikekemanɔmee la, ŋutete wɔnuku aɖe le amegbetɔ ƒe ahɔhɔ̃ ŋu hã la, aleke míawɔ azã míaƒe susu ɖe mɔ nyuitɔ kekeake nu? Menye eyae nye be míaƒo mía ɖokui ɖe gbesɔsrɔ̃, ŋutinya, dzɔdzɔmeŋutinunya, agbenɔnɔ kple susu ŋutinunya sɔsrɔ̃ vevie alo subɔsubɔhawo tsɔtsɔ sɔ kple wo nɔewo me ko evɔ o. Ele be míazã míaƒe tamebubuŋutete ɖe Mawu ƒe nufiafia xɔxɔ ŋu koŋ. Eya ɖeɖekoe naa nunya akuakua ame. Gake nukae nye nunya akuakua? Le alesi Ŋɔŋlɔawo zã nya nunya nu la, eku ɖe nuŋububu nyui si wotu ɖe sidzedze vavãtɔ kple gɔmesese ŋutɔŋutɔ dzi ŋu koŋ. Nunya kpena ɖe mía ŋu be míanya alesi míatsɔ sidzedze kple gɔmesese akpɔ kuxiwo gbɔe, be míaƒo asa na afɔkuwo, akpe ɖe ame bubuwo ŋu, eye be míaɖo taɖodzinuwo gbɔ. Enyo be míade dzesii be Biblia yɔ lãdzɔdzɔ, bometsitsi, kple aɖaʋadzedze be woawoe nye nusiwo tsi tre ɖe nunya ŋu—esiawo nye nɔnɔme siwo míadi godoo be míatsri.—Mose V, 32:6; Lododowo 11:29; Nyagblɔla 6:8.
Yehowa ƒe Nufiagbalẽ Gã La
6. Hafi nunya vavãtɔ nasu mía si la, nuka ŋudɔe wòle be míawɔ nyuie?
6 Xexeame ƒe nunya gbogbo aɖe ƒo xlã mí. (Korintotɔwo I, 3:18, 19) Agbalẽ gbogbo aɖewo le xexeame si le sukuwo kple agbalẽdzraɖoƒewo! Wo dometɔ geɖe nye nufiagbalẽ siwo fiaa gbegbɔgblɔ, akɔnta, dzɔdzɔmeŋutinunya, kple nusɔsrɔ̃ bubuwo ame. Gake Nufiala Gãtɔ na nufiagbalẽ si ƒo bubu ɖesiaɖe ta la mí—eƒe Nya, Biblia, si tso gbɔgbɔ me. (Timoteo II, 3:16, 17) Menye ne wòle nu ƒom tso nusɔsrɔ̃wo, abe ŋutinya, dzɔdzɔmeŋutinunya, anyigbaŋutinunya, kple numiemiewo ŋutinunya ŋu koe eƒe nyawo sɔna pɛpɛpɛ o, nenema ke wòle ne ele etsɔ me gblɔm ɖi hã. Gawu la, ekpena ɖe mía ŋu be míanɔ agbe si me dzidzɔ gãtɔ kekeake le eye viɖe gbogbotɔ tsoa eme la fifia hã. Gake abe alesi wòhiã be sukuviwo nazã woƒe nufiagbalẽwoe le xexemesukuwo me ene la, nenema ke wòle be míawo hã míanya Mawu ƒe Nufiagbalẽ gã la nyuie eye míazãe ne míedi be míawɔ nu le nunya vavãtɔ me abe amesiwo ‘Yehowa fia nui’ ene.—Yohanes 6:45.
7. Nukatae nàgblɔ be Biblia me nyawo nyanya le susu me ɖeɖeko mesɔ gbɔ o?
7 Gake menye Biblia nyanya ɖe susu mee nye nunya vavãtɔ kple wɔwɔ ɖe Mawu ƒe nufiafia dzi o. Le kpɔɖeŋu me: Le ƒe alafa 17 lia M.Ŋ. me la, Katolikotɔ aɖe si ŋkɔe nye Cornelius van der Steen la di be yeazu nunɔla Yesutɔ gake womexɔe o le esi wònye ame kpui akpa ta. Manfred Barthel gblɔ le eƒe agbalẽ si nye The Jesuits—History and Legend of the Society of Jesus me be: “Kɔmitia gblɔ na van der Steen be ne ate ŋu asrɔ̃ Biblia me nyawo katã alé wo ɖe tame be wòate ŋu agbugbɔe agblɔ ko hafi yewoalɔ̃ aɖe asi le eƒe kɔkɔnya la ŋu. Anye ne mahiã be woagblɔ ŋutinya sia hafi o ne menye ɖe van der Steen lɔ̃ wɔ ɖokuidodoɖedzinu gã sia gbegbe si wobia tso esi la o.” Eye agbagba gbogbo kae nye si wòdze be wòalé Biblia bliboa katã ɖe susu me! Gake kakaɖedzitɔe la, Mawu ƒe Nya la gɔmesese le vevie wu eléle ɖe susu me agbugbɔ agblɔ.
8. Nukae akpe ɖe mía ŋu be Mawu ƒe nufiafia naɖe vi na mí eye míaɖe nunya vavãtɔ afia?
8 Ne míedi be nunya vavãtɔ nasu mía si eye Mawu ƒe nufiafia naɖe vi na mí bliboe la, ke ele be Ŋɔŋlɔawo me sidzedze vavãtɔ nasu mía si. Ele hã be Yehowa ƒe gbɔgbɔ kɔkɔea, alo eƒe dɔwɔŋusẽ nafia mɔ mí. Esia akpe ɖe mía ŋu be míasrɔ̃ nyateƒe goglowo, “Mawu ƒe nu gogloawo.” (Korintotɔwo I, 2:10) Eyata mina míatsɔ kutrikuku asrɔ̃ Yehowa ƒe Nufiagbalẽ gã lae eye míado gbe ɖa abia eƒe mɔfiafia to gbɔgbɔ kɔkɔe la dzi. Le wɔwɔ ɖe nya si le Lododowo 2:1-6 dzi la, mina míaƒu to anyi ɖe nunya ŋu, míamlã míaƒe dzi be wòade vovototo nu me, eye míayɔ gɔmesese. Ele be míawɔ esia abe alesi wokua kesinɔnu siwo le tome ene, elabena eya ko hafi míate ŋu ‘ase Yehowa vɔvɔ̃ gɔme eye míake ɖe sidzedze Mawu ŋutɔŋutɔ ŋu.’ Ŋugbledede le alesi Mawu ƒe nufiafia aɖewo le dzi ɖumee kple viɖe siwo tsoa eme ŋu la ana míakpɔ ŋudzedze ɖe nunya si Mawu na mí la ŋu ɖe edzi.
Nugɔmesese Vivivi
9, 10. Nya kae Mawu gblɔ abe alesi woŋlɔe ɖe Mose I, 3:15 la ene, eye nukae nye eƒe gɔmesese nyuitɔ?
9 Mawu ƒe nufiafia ɖua dzi le alesi wònaa Ŋɔŋlɔawo gɔmesese si me nɔ kɔkɔm vivivi Yehowa ƒe amewo ta. Le kpɔɖeŋu me, míesrɔ̃e be Satana Abosam ye to da aɖe dzi le Eden da alakpa be aʋatso kam Mawu le be ne woɖu atikutsetse si ŋu wode se ɖo la, woaku. Gake míekpɔe be tomaɖomaɖo Mawu he ku vɛ na amegbetɔƒomea nyateƒe. (Mose I, 3:1-6; Romatɔwo 5:12) Gake Mawu na mɔkpɔkpɔ ameƒomea esime wògblɔ na da la, esi nye egbɔgblɔ na Satana be: “Made adikã mia kple nyɔnu la dome, wò dzidzime kple nyɔnu la ƒe dzidzime dome, eya la agbã ta na wò, eye wò la àɖu afɔkpodzi nɛ.”—Mose I, 3:15.
10 Nya ɣaɣla aɖe le nya mawo me si wole ɖeɖem fia vivivi to Mawu ƒe nufiafia me. Yehowa fia eƒe amewo be nyati vevitɔ si le Biblia mee nye Yehowa ƒe dziɖulanyenye taʋiʋli to Dzidzimevi la dzi; Dzidzimevi sia adzɔ tso Abraham kple Dawid ƒe dzidzimea me eye Fiaɖuƒe dziɖulanyenye ƒe gome si le se nu asu esi. (Mose I, 22:15-18; Samuel II, 7:12, 13; Xezekiel 21:30-32) Míaƒe Nufiala Gãtɔ fia mí hã be Yesu Kristo ye nye “nyɔnu” la, si nye Mawu ƒe xexeame katã ƒe habɔbɔa, ƒe Dzidzimevi vevitɔ. (Galatiatɔwo 3:16) Togbɔ be Satana he dodokpɔ ɖesiaɖe ƒomevi va Yesu dzi hã la, elé nuteƒewɔwɔ me ɖe asi vaseɖe ku me ke—esi nye Dzidzimevia ƒe afɔkpodzi ɖuɖu. Míesrɔ̃e hã be Fiaɖuƒea ƒe hadomenyila 144,000 siwo tso ameƒomea me akpe ɖe Kristo ŋu le ta gbagbã na Satana, “da xoxo” la me. (Nyaɖeɖefia 14:1-4; 20:2; Romatɔwo 16:20; Galatiatɔwo 3:29; Efesotɔwo 3:4-6) Aleke gbegbe míekpɔa ŋudzedze ɖe Mawu ƒe Nya la me sidzedze sia ŋue nye si!
Gege Ðe Mawu ƒe Nukukekeli la Me
11. Nukatae míate ŋu agblɔ be Mawu ƒe nufiafia ɖua dzi le alesi wòkplɔa amewo vaa gbɔgbɔmekekeli mee me?
11 Mawu ƒe nufiafia ɖua dzi le alesi wòhea amewo yia gbɔgbɔmekekeli mee me. Esia va eme na Kristotɔ amesiaminawo le Petro I, 2:9 ƒe emevava me be: “Miawoe nye dzidzime tiatia la, fia nunɔlanyenye, dukɔ kɔkɔe, dukɔ, si nye Mawu ŋutɔ tɔ, bene miaɖe gbeƒã amesi yɔ mi tso viviti me va ye ŋutɔ ƒe nukukekeli gbɔ la, ƒe nutsuwɔwɔwo afia.” “Ameha gã” aɖe si le mɔ kpɔm be yewoanɔ agbe mavɔ le paradisonyigba dzi hã xɔa kekeli si Mawu nana la egbea. (Nyaɖeɖefia 7:9; Luka 23:43) Esime Yehowa le nu fiam eƒe amewo la, Lododowo 4:18 vaa eme be: “Ame dzɔdzɔe ƒe toƒe le abe agudzedze ƒe kekeli, si nɔa kɔkɔm ɖe dzi, vaseɖe esime ŋu kena keŋ ene.” Nusɔsrɔ̃ vivivi sia naa míaƒe Mawu ƒe nufiafia la gɔmesese me kɔna ɖe edzi, abe alesi nufiala ƒe kpekpeɖeŋu nyui kpena ɖe sukuviwo ŋu woyia ŋgɔ le gbeŋutise, ŋutinya, alo nusɔsrɔ̃ bubu me ene.
12, 13. Nufiafia me afɔku kawo mee Mawu ƒe nufiafia kpɔ Yehowa ƒe amewo ta le?
12 Mawu ƒe nufiafia ƒe dziɖuɖukpɔkpɔ bubue ganye be ekpɔa ɖokuibɔbɔla siwo xɔnɛ la ta tso “gbɔgbɔ vɔ̃wo ƒe nufiafia” si me. (Timoteo I, 4:1) Gake kpɔ Kristodukɔa me ɖa! Roma Katoliko nunɔlagã John Henry Newman ŋlɔ le keke ƒe 1878 me ke be: “Esi Sɔlemeha la ƒe amegãwo ka ɖe Kristotɔnyenye ƒe ŋusẽ dzi be ate ŋu awɔ aʋa kple nugbegblẽwɔwɔ ƒe gege ɖe ha la me, eye be wòatrɔ gbɔgbɔvɔ̃subɔsubɔnuwo kple eƒe kɔnuwo woazu nusiwo ado nyanyuia ɖe ŋgɔ ta la . . . , wolɔ̃ be ne ahiã la, yewoaxɔ dukɔwo ƒe kɔnu kple wɔna siwo nɔ anyi ɣemaɣi, kpakple agbalẽnyalawo ƒe xexemenunyafiafiawo, alo yewoasrɔ̃ wo, alo yewoada asi ɖe wo dzi.” Newman gagblɔ be nusiawo abe tsi kɔkɔe, nunɔlawo ƒe awuwo, kple nɔnɔmewɔwɔwo “katã dzɔ tso trɔ̃subɔsubɔ me, eye wotsɔ alesi Sɔlemeha la xɔ woe la kɔ wo ŋui.” Mawu ƒe amewo daa akpe gã aɖe be Mawu ƒe nufiafia kpɔa yewo ta tso xɔsegbegbe sia me. Eɖua gbɔgbɔvɔ̃subɔsubɔ ƒomevi ɖesiaɖe dzi.—Dɔwɔwɔwo 19:20.
13 Mawu ƒe nufiafia kpɔa dziɖuɖu ɖe subɔsubɔhawo ƒe vodadawo dzi le mɔ ɖesiaɖe nu. Le kpɔɖeŋu me, mí amesiwo Mawu fia nui la míexɔ Mawuɖekaetɔ̃ dzi se o ke boŋ míexɔe se be Yehowa ye nye Dziƒoʋĩtɔ la, Yesue nye Via, eye gbɔgbɔ kɔkɔe lae nye Mawu ƒe dɔwɔŋusẽ. Míevɔ̃na be woava wɔ funyafunya mí le hell ƒe dzobibi me o, elabena míenya be Biblia ƒe hell ye nye ameƒomea ƒe yɔdo. Eye togbɔ be alakpamawusubɔlawo gblɔna be luʋɔ makumaku le amegbetɔ si hã la, míawo míenya be ame kukuwo menya naneke o. Míate ŋu ayi edzi aƒo nu tso nyateƒe gbogbo siwo ŋu Mawu ƒe nufiafia la kpe ɖe mía ŋu míeva ke ɖo la ŋu. Yayra gã kae nye si wònye be woɖe mí tso gbɔgbɔmekluvinyenye na Babilon Gã, xexeame katã ƒe alakpasubɔsubɔha ƒe fiaɖuƒe la me!—Yohanes 8:31, 32; Nyaɖeɖefia 18:2, 4, 5.
14. Nukatae Mawu subɔlawo ate ŋu ayi edzi anɔ zɔzɔm le gbɔgbɔmekekeli me?
14 Esi Mawu ƒe nufiafia ɖua subɔsubɔhawo ƒe vodadawo dzi ta la, ekpena ɖe Mawu subɔlawo ŋu be woanɔ zɔzɔm le gbɔgbɔmekekeli me. Ðeko wòle abe ɖe wosea nya tso wo megbe ene be: “Mɔ la enye esi, mito edzi.” (Yesaya 30:21) Mawu ƒe nufiafia gakpɔa esubɔlawo ta tso tamesusu masɔmasɔwo me. Esi “aʋatso-apostolowo” nɔ mamã dem Kristo-hame si nɔ Korinto me la, apostolo Paulo ŋlɔ na wo be: “Míaƒe aʋawɔnuwo menye ŋutilãtɔ o, ke boŋ ŋusẽnu, siwo wotsɔna gbaa mɔ̃wo ƒua anyi la, wonye le Mawu ƒe ŋku me—esi míegbaa tamebubuwo kple nu kɔkɔ sia nu kɔkɔ, si kɔa eɖokui ɖe dzi ɖe sidzedze Mawu ŋuti la, eye míeɖea nyasãwo katã aboyo hena Kristo.” (Korintotɔwo II, 10:4, 5; 11:13-15) Wotsɔa nufiafia si wofiana le tufafa me le hamea me kple míaƒe nyanyui gbeƒãɖeɖe na egodotɔwo gbaa tamebubu siwo tsi tre ɖe Mawu ƒe nufiafia ŋu la ƒua anyi.—Timoteo II, 2:24-26.
De Ta Agu le Gbɔgbɔ Kple Nyateƒe Me
15, 16. Nukae wòfia be woade ta agu na Yehowa le gbɔgbɔ kple nyateƒe me?
15 Esi Fiaɖuƒe gbeƒãɖeɖea le ŋgɔ yim la, Mawu ƒe nufiafia le dzi ɖum le alesi wòfiaa ame fafawo be woade ta agu na Mawu “le gbɔgbɔ kple nyateƒe me” la me. Yesu gblɔ na Samaria-nyɔnu aɖe le Yakob ƒe vudo si gogo Sixar la to be yeate ŋu ana tsi si ana agbe mavɔe. Esi wònɔ Samariatɔwo ŋu nya gblɔm la, eyi edzi be: “Miawo la miedoa gbe ɖa na nusi mienya o; . . . Gaƒoƒo gbɔna, eye wòde azɔ, esi nyateƒegbedoɖalawo ado gbe ɖa na Fofo la le gbɔgbɔ kple nyateƒe me; elabena Fofo la dia gbedoɖala siawo tɔgbe.” (Yohanes 4:7-15, 21-23) Le esia megbe la, Yesu ɖe eɖokui fiae be yee nye Mesia la.
16 Gake aleke míate ŋu ade ta agu na Mawu le gbɔgbɔ mee? Eyae nye be míatsɔ dzi siwo me akpedada kple lɔlɔ̃ na Mawu si wotu ɖe eƒe Nya ƒe sidzedze vavãtɔ dzi yɔ fũ la asubɔ le kɔkɔenyenye me. Míate ŋu ade ta agu nɛ le nyateƒe me ne míegbe subɔsubɔhawo ƒe aʋatsonufiafiawo eye míewɔ Mawu ƒe lɔlɔ̃nu si woɖe fia ɖe Yehowa ƒe Nufiagbalẽ gã la me.
Eɖua Dodokpɔwo Kple Xexeame Dzi
17. Aleke nàte ŋu aɖo kpe edzii be Mawu ƒe nufiafia kpe ɖe Yehowa subɔlawo ŋu wonɔ te ɖe dodokpɔwo nu?
17 Ne Mawu ƒe amewo ɖo dodokpɔwo me la, Mawu ƒe nufiafia ɖua dzi zi geɖe. Bu esia ŋu kpɔ: Esi Xexemeʋa II dze egɔme le ƒe 1939 ƒe September me la, Yehowa subɔlawo hiã eƒe nufiagbalẽ gã la gɔmesese etɔxɛe. November 1, 1939 ƒe Watchtower si gblɔ nusi nye Mawu ƒe nufiafia le Kristotɔwo ƒe akpaɖekedzimademade ŋu kɔte la kpe ɖe wo ŋu ŋutɔ. (Yohanes 17:16) Nenema ke le ƒe 1960 ƒe ƒeawo ƒe gɔmedzedze me la, Gbetakpɔxɔ me nyati siwo ƒo nu tso alesi míabɔbɔ mía ɖokui na ‘dziɖuŋusẽwo’ vaseɖe afi aɖe la kpe ɖe Mawu subɔlawo ŋu be woawɔ ɖe Mawu ƒe nufiafia dzi le xexe si me aglãdzegbɔgbɔ va xɔ aƒe ɖo la me.—Romatɔwo 13:1-7; Dɔwɔwɔwo 5:29.
18. Aleke amesiwo gblɔ be Kristotɔwoe yewonye le ƒe alafa evelia kple etɔ̃lia M.Ŋ. me bu modzakaɖeɖe ɖigbɔwoe, eye kpekpeɖeŋu kae Mawu ƒe nufiafia na le go sia me egbea?
18 Mawu ƒe nufiafia kpena ɖe mía ŋu míeɖua dodokpɔwo, abe amenublenu siwo hea ame be woadi modzakaɖeɖe ɖigbɔwo ene, hã dzi. De dzesi nya si amesiwo gblɔ be Kristotɔwoe yewonye le ƒe alafa evelia kple etɔ̃lia M.Ŋ. me la gblɔ. Tertullian ŋlɔe be: “Nya aɖeke mele mía kple fefewɔƒewo ƒe tsukukunuwɔwɔ, nukpɔƒewo ƒe ŋumakpemakpe, kple yivuwɔƒewo ƒe ŋutasẽnuwɔwɔwo dome le nuƒoƒo me loo, alo nukpɔkpɔ, alo nusese me o.” Agbalẽŋlɔla bubu si nɔ anyi ɣemaɣi bia be: “Nuka dim Kristotɔ nuteƒewɔla le le nusiawo dome, esi wònye be mate ŋu abu nuvɔ̃ɖiwɔwɔ gɔ̃ hã ŋu o? Nukatae ŋutilã ƒe nudzodzrowo wɔwɔfia ana wòase vivi?” Togbɔ be agbalẽŋlɔla siawo nɔ anyi le ƒe alafa gbãtɔ me Kristotɔwo ƒe ku megbe ƒe aɖewo hã la, wotsri dzidzɔkpɔkpɔ ɖigbɔwo. Egbea Mawu ƒe nufiafia fiaa nunya mí be míatsri ŋunyɔnu, agbegbegblẽnɔnɔ, kple ŋutasesẽ ƒe modzakaɖeɖewo.
19. Aleke Mawu ƒe nufiafia kpena ɖe mía ŋu be míaɖu xexeame dzii?
19 Wɔwɔ ɖe Mawu ƒe nufiafia dzi kpena ɖe mía ŋu be míeɖua xexeame ŋutɔ gɔ̃ hã dzi. Ẽ, wɔwɔ ɖe míaƒe Nufiala Gãtɔ ƒe nufiafia dzi ana míaɖu xexe sia si le Satana ƒe ŋusẽ te la ƒe ŋusẽkpɔɖeamedzi vɔ̃wo dzi. (Korintotɔwo II, 4:4; Yohanes I, 5:19) Efesotɔwo 2:1-3 gblɔ be togbɔ be míenye ame kukuwo tsã le dzidadawo kple nuvɔ̃wo me, esi míezɔ le xexe sia me ƒe yameŋusẽ nu hã la, Mawu gbɔ agbe mí. Aleke gbegbe míedaa akpe na Yehowa enye si be Mawu ƒe nufiafia kpena ɖe mía ŋu míeɖua xexemenudidiwo kple gbɔgbɔ si tsoa eƒe futɔ kple míawo hã ƒe futɔ—si nye Satana Abosam, ameblela gãtɔ gbɔ la dzii!
20. Nyabiabia kawo ŋue wòle be míagade ŋugble le?
20 Eyata eme kɔ be Mawu ƒe nufiafia ɖua dzi le mɔ geɖewo nu. Le nyateƒe me la, edze abe manya wɔ be míaƒo nu tso dzi siwo katã wòɖu la ŋu o ene. Ekpɔa ŋusẽ ɖe amewo dzi le xexeame katã. Gake nuka wɔmee wòle na wò? Aleke Mawu ƒe nufiafia le ŋusẽ kpɔm ɖe wò agbe dzii?
Nukae Nèsrɔ̃?
◻ Aleke míate ŋu aɖe nunya vavãtɔ gɔmee?
◻ Nukae Mawu ɖe fia vivivi le Mose I, 3:15 ŋu?
◻ Aleke Mawu ƒe nufiafia ɖu dzi le gbɔgbɔmenyawo mee?
◻ Nukae wòfia be woade ta agu na Mawu le gbɔgbɔ kple nyateƒe me?
◻ Aleke Mawu ƒe nufiafia kpe ɖe Yehowa subɔlawo ŋu be woɖu dodokpɔwo kple xexeame dzii?
[Nɔnɔmetata siwo le axa 10]
Yesu wɔ nuteƒe yiɖase ku me ke—si nye afɔkpodzi ɖuɖu na Dzidzimevi la