Ta 19
Nusi Mose ƒe Sea Fia na Wò
1. (a) Nukae fia be tso ƒe 36 M.Ŋ. la, Yehowa xɔ Trɔ̃subɔla aʋamatsomatsotɔwo abe Kristotɔwo ene? (b) Gake nya ka ŋutie Kristotɔ gbãtɔ aɖewo he nya le vevie?
NYA sesẽ aɖe si woʋli le apostolo Paulo ƒe ŋkekea mee nye be ɖe wònye nyaƒoɖeamenu na Trɔ̃subɔla-zu-Kristotɔwo be woawɔ ɖe Mose ƒe Sea ƒe nudidiwo dzi mahã. Enye nyateƒe be le ƒe 36 M.Ŋ. me la, gbɔgbɔ kɔkɔe va Trɔ̃subɔla aʋamatsomatsotɔwo dzi. Gake Kristotɔ aɖewo siwo tso Yudatɔwo dome la see le wo ɖokui me vevie be ele be Trɔ̃subɔla siwo zu nusrɔ̃lawo natso aʋa, eye woafia wo be woalé Mose ƒe Sea me ɖe asi. Le nyateƒe me la, ɖe wòle vevie be woalé Se ma alo eƒe akpa aɖe me ɖe asia? Le ƒe 49 M.Ŋ. lɔƒo la, wotsɔ nya la ɖo ɖe dziɖuha la le Yerusalem.—Dɔw. 10:44-48; 15:1, 2, 5.
2. Nukatae nya sia le vevie na mí?
2 Míetsɔ ɖe le emetsonua me vevie ŋutɔ. Nukata? Menye esi míedoa go ame aɖewo ɣeaɖewoɣi, amesiwo hea nya be ele be Kristotɔwo nawɔ ɖe Sea ƒe nudidi aɖewo abe Sabat ɖuɖu ene dzi la ta koe o, ke boŋ le esi Biblia ŋutɔ gblɔ be “se la le kɔkɔe, eye sedede la le kɔkɔe, le dzɔdzɔe, eye wònyo” la hã tae. (Rom. 7:12) Togbɔ be woyɔe be Mose ƒe Se le esi wònye Mosee nye domenɔla na Se ƒe nubabla la ta hã la, Yehowa Mawu gbɔe Sea tso ŋutɔŋutɔ.—Mose II, 24:3, 8.
Nukatae Wona Se La?
3. Nukatae wona Se la Israel?
3 Nusita Yehowa na Sea Israel la gɔme sese kpɔa ŋusẽ ɖe alesi míekpɔa Se lae egbea la dzi. Ŋɔŋlɔawo ɖe eme be: “Vodadawo ŋuti wotsɔe kpe ɖe [Abraham ƒe nubabla] ŋuti, vaseɖe ɣeyiɣi, si dzi ƒome, si ŋugbe wodo ɖi la ava, . . . Ale se la zu mía nufiala, si kplɔa mí yia Kristo gbɔe, bene woatso afia na mí to xɔse me.” (Gal. 3:19, 24) Aleke Se la wɔ esiae?
4. (a) Aleke Se ma ‘ɖe vodadawo ɖe goe’? (b) Aleke hãe wòkplɔ nuteƒewɔlawo yi Kristo gbɔe?
4 To agbe ƒe nuwɔna vovovowo ƒe kpɔɖeŋu deblibo ɖoɖo anyi dzi la, eɖe Yudatɔwo fia abe nuvɔ̃wɔlawo ene. Eme va kɔ ƒã be togbɔ be woadze agbagba vevie eye susu nyui anɔ wo si hã la, womate ŋu aɖo eƒe nudidiwo gbɔ o. Le Yudatɔwo ŋudɔ wɔwɔ abe ameƒome madeblibo la ƒe kpɔɖeŋu ene la, Se la ɖe xexeame katã ɖe go fia—mía dometɔ ɖesiaɖe le eme—be míenye nuvɔ̃wɔla siwo dze na Mawu ƒe tohehe. (Rom. 3:19, 20) Eto esia dzi te gbe ɖe ɖela ƒe hiahiã na ameƒomea dzi, eye wòkplɔ nuteƒewɔlawo yi Kristo gbɔe abe Ðela ma ene. Le mɔ ka nu? Eɖee fia be eya koe te ŋu lé Sea me ɖe asi bliboe eye wòva zu amegbetɔ ɖeka hɔ̃ si ŋu nuvɔ̃ mele o. Viɖe si se ɖe afi aɖe koe nɔ lãwo ƒe vɔsa le Sea te la ŋu, gake abe amegbetɔ deblibo ene la, Yesu te ŋu tsɔ eƒe agbe na abe vɔsa si aɖe nuvɔ̃ ɖa ŋutɔŋutɔ ahaʋu agbe mavɔ ƒe mɔ na amesiwo ɖe xɔse fia la ene.—Yoh. 1:29; 3:16; Pet. I, 1:18, 19.
5. Zã ŋɔŋlɔ siwo wona ɖe afisia naɖo nyabiabia siwo wotsɔ kpe ɖe memamã sia ŋu la ŋuti.
5 Le nusiawo si nenya nu la, aleke naɖo biabia siwo gbɔna la ŋue?
Ðe woɖoe be Mose ƒe Sea nabla ameƒomea katã? (Ps. 147:19, 20; Mose II, 31:12, 13)
Ðe Yehowa ɖee fia Israel kpɔ be gbaɖegbe la Se ƒe nubabla la awu nua? (Yer. 31:31-33; Heb. 8:13)
Ðe Se Ewoawo kple kwasiɖa ɖesiaɖe ƒe Sabat ɖuɖu ƒe nudidia yi edzi le esi wote fli ɖe Sea ƒe akpa mamleawo me megbea? (Kol. 2:13, 14, 16; Kor. II, 3:7-11 [abe alesi Mose II, 34:28-30 kɔ emee ene]; Rom. 7:6, 7)
Mɔ ka dzie Yehowa to he Se ƒe nubabla la va nuwuwue? (Kol. 2:13-17; Mat. 5:17, 18; Rom. 10:4)
6. Nukae wòfia ne wogblɔ be Mose ƒe Sea gale dɔ wɔm kokoko?
6 Le esia ta la, nukae wòfia ne ame aɖe gblɔ be Mose ƒe Sea gale dɔ wɔm kokoko? Esia fia be egbe Yesu Kristo dzixɔse la. Nukatae wòfia nenema? Elabena nukpɔsusu ma tɔgbe melɔ̃ ɖe edzi be Yesue nye Sea ƒe emevava, si ɖe mɔ be Mawu nahee ava nuwuwue o. Apostolo Paulo ŋlɔ nya sesẽ siawo na amesiwo tɔa asi akɔ be Kristotɔwoe yewonye, gake gbɔgblɔ be woagalé Sea alo eƒe akpa aɖe me ɖe asi gaflua wo la be: “Mi amesiwo di be, woatso afia na mi to sea me la, woklã mi ɖa tso Kristo gbɔ; amenuveve la sie miege le.”—Gal. 5:4; kpɔ Romatɔwo 10:2-4 hã.
7. (a) Nukae amesiwo gblɔna be Sea ƒe akpa aɖewo gale dɔ wɔm la medze sii keŋkeŋ o? (b) Aleke Kristotɔwo ƒe dɔwɔnawo le vevie, eye ƒomedodo kae le esiawo kple míaƒe agbe tegbee si nye nunana la kpɔkpɔ dome?
7 Amesiwo gblɔna be Sea ƒe akpa aɖewo gale dɔ wɔm kokoko la medze sii keŋkeŋ o be ame ƒe tenɔnɔ dzɔdzɔe le Mawu gbɔ la metso ame ƒe Sea dzi wɔwɔ me o ke boŋ etso Yesu ƒe vɔsa ƒe asixɔxɔ dzixɔxɔse gbɔ. (Gal. 3:11, 12) Wosenɛ le wo ɖokui me be ele be ame natso dzɔdzɔenyenye ƒe afia na eɖokui to dɔ mawo me—nusi manya wɔ na amegbetɔ nuvɔ̃wɔlawo o. Le nyateƒe me la, ele vevie be woawɔ dɔ siwo nye to ɖoɖo Mawu kple Kristo ƒe sedede siwo ku ɖe Kristotɔwo ŋu. (Yak. 2:15-17; Mat. 28:19, 20) Esiawoe nye mɔ siwo dzi míato aɖe lɔlɔ̃ kple xɔse afia; esiawo mawɔmawɔ afia be míaƒe xɔse ku. Gake míate ŋu adze na ɖeɖe o, eɖanye alekee míewɔ dɔ sesi̇̃e o. Yesu Kristo ƒe vɔsa manɔmee la, ɖeɖe tso nuvɔ̃ kple ku me manya wɔ o. Eyata agbe tegbee nye nunana tso Mawu gbɔ to Yesu Kristo dzi, esi nye amenuveve si míedze na o eye menye fexexe ɖe míaƒe dɔwo ta o.—Ef. 2:8, 9; Rom. 3:23, 24; 6:23.
8. Nyametsotso kae ƒe alafa gbãtɔ me dziɖuha la wɔ ku ɖe Mose ƒe Sea ŋudɔ wɔwɔ ɖe Trɔ̃subɔla siwo zu Kristotɔwo ŋu la ŋuti?
8 Esi wotsɔ Mose ƒe Sea ŋudɔ wɔwɔ ɖe Trɔ̃subɔla-zu-Kristotɔwo ŋu ƒe nya la ɖo dziɖuha ŋku me le Yerusalem le ƒe alafa gbãtɔ me la, woƒe nyametsotsoa wɔ ɖeka kple nyateƒenya siawo. Wode dzesie be Yehowa menɔ didim tso Trɔ̃subɔla siwo va zu xɔsetɔwo la si be woawɔ dɔ siwo le ɖekawɔwɔ me kple Mose ƒe Sea hafi wòkɔ gbɔgbɔ kɔkɔe ɖe wo dzi o. Dziɖuha ma ƒe nyametsotsoa tɔ asi sedede aɖewo siwo le ɖekawɔwɔ me kple Sea dzi be wonye ‘nu veviwo,’ gake esiawo nɔ te ɖe Biblia me nuŋlɔɖi siwo do ŋgɔ na Sea la dzi. Eyata menye se le Trɔ̃subɔla-zu-Kristotɔwo dzi be woawɔ ɖe Mose ƒe Sea alo eƒe akpa aɖe dzi o, ke boŋ ɖe woɖo kpe dzidzenu siwo dzi woda asi ɖo do ŋgɔ na Mose la dzi.—Dɔw. 15:28, 29; tsɔe sɔ kple Mose I, 9:3, 4; 34:2-7; 35:2-5.
9. (a) Ðe Mawu gadi tso Yudatɔwo si kokoko be woawɔ ɖe Mose ƒe Sea dzia? (b) Ðoɖo tɔxɛ kae wowɔ na wo le mɔ si nu Kristo ku ɖo la me?
9 Le ƒe 33 M.Ŋ. ƒe Pentekoste megbe la, Mawu megadi tso Yudatɔwo ŋutɔ gɔ̃ hã si be woawɔ ɖe Mose ƒe Sea dzi o. Eyata Yudatɔ siwo ɖe xɔse fia la kpɔ susu tɔxɛ si ta wòle be woakpɔ dzidzɔ. Nukatae? Togbɔ be Trɔ̃subɔlawo hã nye nuvɔ̃wɔlawo esi ta wokuna hã la, Yudatɔwo koe nye amesiwo nɔ Mawu ƒe fiƒode te le esi wonye Se ƒe nubabla la dzi dalawo ta. Gake le mɔ si nu Kristo ku ɖo—be wohee ɖe ati ŋu abe hlɔ̃dola si woƒo fi de ene—ta la, eva xɔ ɖe Yudatɔ mawo siwo axɔ eyama dzi ase la teƒe, eye wòna gbɔdzɔe wo tso Sea dzi dada ƒe tohehe me. (Gal. 3:10-13) To esia dzi la ena tsɔtsɔke si mate ŋu asu wo si le Mose ƒe Sea te o la su wo si.—Dɔw. 13:38, 39.
10. Aleke Sea ɖeɖeɖa va wɔ akpa vevi aɖe le tadedeagu ɖekae mee?
10 Le nyateƒe me la, Se la ɖe Yudatɔwo ɖe vovo tso Trɔ̃subɔlawo gbɔ. Nudidi siwo meku ɖe Trɔ̃subɔlawo ŋu o lae woɖo Yudatɔwo dzi, eye woxe mɔ na Trɔ̃subɔla aʋamatsomatsotɔwo be womagakpɔ gome bliboe kple Yudatɔwo le woƒe tadedeagu me o. (Tsɔe sɔ kple Mose II, 12:48; Dɔwɔwɔwo 10:28.) Gake zi alesi Se la wɔ tameɖoɖo si nɔ eŋu la vɔ eye woɖee ɖa la, fifia Yudatɔwo kple Trɔ̃subɔla aʋamatsomatsotɔwo ate ŋu awɔ ɖeka to Kristo me be woasubɔ Mawu vavã ɖeka kolia la.—Ef. 2:11-18.
Se La Ŋuti Sidzedze Ðea Vi Na Mí
11. Aleke Se la ŋuti sidzedze kpena ɖe mía ŋu be míase Kristo ƒe nufiafiawo gɔmee?
11 Togbɔ be egbea míele Sea te o hã la, eŋuti sidzedze ɖea vi ŋutɔ na mía dometɔ ɖesiaɖe. Le mɔ ka nu? Ðo ŋku edzi be Yuda-nyɔnue dzi Yesu eye wòva nɔ Mose ƒe Sea te. Nanewo siwo wòwɔ la, Sea ƒe nudidiwo ŋuti sidzedze koe ana míase wo gɔme bliboe. (Gal. 4:4; kpɔ Luka 22:7, 8.) Gakpe ɖe eŋu la, amesiwo le Sea te la domee wòwɔ eƒe subɔsubɔdɔ la le. Eyata zi geɖe la, eƒe nufiafia nɔ te ɖe nudzɔdzɔ siwo ku ɖe Sea ŋu la ŋuti.—Tsɔe sɔ kple Mateo 5:23, 24.
12. (a) Kadodo ka dzie Yesu tɔ asie le eƒe agbe kple Mose ƒe Se la dome? (b) Aleke apostolo Paulo fia asi asixɔxɔ si le Sea ŋuti sidzedze me lae? (d) Ne míese eƒe nudidiwo ƒe vevienyenye gɔme la, nukae ado tso eme na mí?
12 Le Yesu ƒe tsitretsitsi megbe la, eɖo ŋku edzi na eƒe nusrɔ̃lawo bena yeƒe agbe abe amegbetɔ ene la nye nusiwo woŋlɔ ɖe Se la kple Nyagblɔɖilawo kple Psalmowo me le ye ŋu la ƒe emevava. (Luka 24:44) Azɔ hã apostolo Paulo ƒo nu le Sea ƒe akpa aɖewo ŋuti be wonye “dziƒonuwo ƒe kpɔɖeŋu ƒe vɔvɔli” eye wògblɔ bena “se la nye nu nyui, siwo le vava ge la, ƒe vɔvɔli.” (Heb. 8:4, 5; 10:1) Nya wɔnuku geɖe siwo kpɔ emevava le Yesu Kristo ƒe nunɔlanyenye me kple le eƒe amegbetɔ ƒe agbe tsɔtsɔ sa vɔe me la le Mose ƒe Sea me. Nusiawo gɔme sese ate ŋu ana ɖoɖo mawo me nakɔ na mí. Gɔmesese deto siwo fia asi ɖoɖo hena subɔsubɔ si adze Yehowa ŋu egbea le eƒe gbɔgbɔ me gbedoxɔ gã me la le nyagblɔɖi ƒe kpɔɖeŋuawo me. Esi míaƒe nusiawo gɔme sese le dzidzim ɖe edzi la, míaƒe ŋudzedze kpɔkpɔ ɖe gbɔgbɔ me habɔbɔ si wosi ami na la ŋu kple akpa si wɔm wòle le Yesu Kristo te ku ɖe míaƒe tadedeagu ŋu la hã adzi ɖe edzi.
13. Nukatae wònye nusi me viɖe le be woade ŋugble le gɔmeɖose nyui siwo dze le Sea me la ŋu?
13 Mose ƒe Sea nye Ŋɔŋlɔ siwo tso Mawu ƒe gbɔgbɔ me eye wo katã nyo na “nufiafia, na mokaka, na ɖɔɖɔɖo” la ƒe akpa aɖe. (Tim. II, 3:16) Ne míeku Sea ƒe gɔmeɖose siwo nɔa anyi ɖaa siwo dzi wotu Sea ɖo la me hede ŋugble le wo ŋu la, ate ŋu akpe ɖe mía ŋu be míatu dzimedidi be míawɔ nusi dzea Mawu ŋu la ɖo. Ne míedze si gbɔgbɔ si Se la fia asii eye míeɖe gbɔgbɔ ma fia le míaƒe agbe me la, aleke gbegbe wòate ŋu aɖe vi enye si!
14. (a) Aleke Yesu wɔ asixɔxɔ si le gbɔgbɔ si Sea ƒe nudidiwo fia asie la gɔme sese me ƒe kpɔɖeŋue? (b) He susu yi gɔmeɖose nyui bubu siwo le Sea me la dzi abe alesi woɖee fia ɖe axa 152 ene. (d) Aleke ŋudzedze kpɔkpɔ ɖe nusiawo ŋu akpe ɖe mía ŋue be míadze Mawu ŋu wu?
14 Yesu wɔ esia ƒe kpɔɖeŋu nyui aɖe le eƒe Todzimawunya la me. Esi wònɔ nu ƒom na amesiwo nɔ Sea te ɣemaɣi la, eɖee fia be le esi teƒe be woaƒo asa na amewuwu ko la, ele be woaɖe dɔmedzoedodo atraɖii ƒe gbɔgbɔ ɖa eye womagatsɔ woƒe aɖewo agblẽ ame bubuwo ŋu o. Mele be woatsɔe be esi yewomewɔ ahasi kpɔ o ko evɔ o, ke mele be woatsɔ dzodzro akpɔ nyɔnue gɔ̃ hã o. Alesi wònye nyateƒe le wo gomee la, nenema kee wòle be míawo hã míazã míaƒe ŋutinuwo katã be woanɔ ɖekawɔwɔ me kple Yehowa ƒe mɔ dzɔdzɔeawo. (Mat. 5:21, 22, 27-30; kpɔ Romatɔwo 13:8-10 hã.) Ne míewɔ esia la, míaɖee afia be míawo hã míese sedede gãtɔ kekeake si le Se la me la gɔme, be: “Lɔ̃ Aƒetɔ [Yehowa], wò Mawu, kple wò dzi blibo kple wò luʋɔ blibo kpakple wò tamesusu blibo.” (Mat. 22:36, 37) Vavãe, esia ate mí ɖe Yehowa ŋu kpuie. Togbɔ be míele Mose ƒe Sea te o hã la, gɔmeɖose siwo dzi wotui ɖo kple nyagblɔɖi ƒe kpɔɖeŋu siwo le eme la ŋuti sidzedze vavã aɖe vi na mí godoo.
Numetoto
● Nukatae amesiwo tea tɔ ɖe edzi be ele be woawɔ ɖe Mose ƒe Sea dzi la le Kristo gbem?
● Aleke Se la ŋuti sidzedze kpena ɖe mía ŋue be míase Yesu ƒe ɖoƒe le Yehowa ƒe tameɖoɖo me la gɔmee?
● Togbɔ be míele Sea te o hã la, nu vevi kawo gɔmee míate ŋu ase le nu sɔsrɔ̃ tso eŋu me?
[Aɖaka si le axa 152]
Mose Ƒe Sea Ƒe Gɔmeɖose Vevi Aɖewo
Agbanɔamedziwo Le Mawu Gbɔ
De ta agu na Yehowa ɖeka ko Mose II, 20:3; 22:20
De bubu eŋkɔ ŋu Mose II, 20:7; Mose III, 24:16
Lɔ̃e eye nasubɔe kple dzi, Mose V, 6:5; 10:12; 30:16
luʋɔ kple ŋusẽ blibo
Vɔ̃ be magasẽ to o, eƒe ŋɔdzi nelé wò Mose V, 5:29; 6:24
Te ɖe eŋu to mɔ si dzi Mose III, 1:1-5; Mose IV,
wòda asi ɖo la ko dzi 16:1-50; Mose V, 12:5-14
Tsɔ wò nu nyuitɔwo nɛ; egbɔe wotso Mose II, 23:19; 34:26
Ele be tadeagulawo nanɔ kɔkɔe le Mose II, 19:10, 11; 30:20
ŋutilã me
Mele be woatutu nu kɔkɔewo ɖe axa Mose II, 20:8-10; 34:21;
dzi le ŋutilãmenudidiwo ta o Mose IV, 15:32-36
Subɔsubɔ Ƒe Nuwɔna Siwo Wotsri
Trɔ̃subɔsubɔ Mose II, 20:4-6; Mose V, 7:25
Xɔsetsakatsaka Mose II, 23:13; 34:12-15;
Gbɔgbɔyɔyɔ, dzosasa, afakaka, Mose II, 22:18; Mose III,
goloɖoɖo, akunyawɔwɔ, adzewɔwɔ 20:27; Mose V, 18:10-12
Srɔ̃ɖeɖe Kple Ƒomegbenɔnɔ
Wotsri ahasiwɔwɔ Mose II, 20:14; Mose III, 20:10
Womaɖe amesi mesubɔa Yehowa o Mose V, 7:1-4
Wotsri ƒometɔ kplikplikpli gbɔ dɔdɔ Mose III, 18:6-16; 20:11
Tsri gbɔdɔdɔ ƒe nutovowɔwɔ Mose III, 18:23; 20:13
De bubu vi nɔdɔme ŋu Mose II, 21:22, 23
Bu dziwòlawo Mose II, 20:12; 21:15, 17;
Fia Yehowa ƒe mɔwo viwòwo Mose V, 6:4-9; 11:18-21
Dɔ Siwo Lɔ Ame Bubuwo Ðe Eme
Bu amegbetɔ ƒe agbe nu kɔkɔe Mose II, 20:13; Mose IV,
35:9-34
Lɔ̃ hawòvi; megalé ame ɖe dɔme o Mose III, 19:17, 18
Bu ame tsitsiwo ŋu Mose III, 19:32
Ðe lɔlɔ̃ ƒe ɖetsɔleme fia amesiwo Mose III, 25:35-37;
da ahe, tsyɔ̃eviwo, ahosiwo Mose V, 15:7-11; 24:19-21
Womasẽ ŋuta le tokunɔwo kple Mose III, 19:14; Mose V,27:18
ŋkunɔwo ŋu o Ði anukware le dɔwɔnyawo me Mose III, 19:35, 36; 25:14
De bubu nunɔamesi ƒe gomewo ŋu Mose II, 20:15; 22:1, 6; 23:4;
Mègabiã ŋu ɖe ame bubuwo ƒe nu ŋu o Mose II, 20:17
Woaɖe nu gbegblẽ dziŋɔ wɔlawo ɖe go Mose III, 5:1; Mose V, 13:6-11
To nyateƒe; megaɖi aʋatsoɖase o Mose II, 20:16; 23:1, 2
Megakpɔ ameŋkume le nɔƒe ta o Mose II, 23:3, 6; Mose III, 19:15