‘Gbɔgbɔ La Ƒe Kutsetsea’ Doa Mawu Ðe Dzi
“Nu si me wodoa Fofonye ɖe dzi le lae nye esi: be miayi edzi anɔ ku geɖe tsem.”—YOH. 15:8.
1, 2. (a) Mɔnukpɔkpɔ kawoe ʋuna ɖi na mí be míade dzi ƒo na ame bubuwo? (b) Nu kae Yehowa na mí si nana ŋutete si le mía si be míasubɔ eyama la ganyona ɖe edzi?
DE ŊUGBLE le nudzɔdzɔ eve siawo ŋu kpɔ: Nɔvinyɔnu Kristotɔ aɖe de dzesii be nɔvinyɔnu ɖetugbui aɖe tsi dzimaɖi vevie le eɖokui me. Ewɔ ɖoɖo be ye kplii yewoayi gbeadzi. Esi wonɔ gbeadzi eye wonɔ dze ɖom la, nɔvinyɔnu ɖetugbuia ɖe nu si nɔ fu ɖe nɛ la gblɔ nɛ. Eyome ɖetugbuia da akpe na Yehowa le gbedodoɖa me gbe ma gbe ɖe ale si nɔvinyɔnu tsitsia tsɔ ɖe le eme nɛ lɔlɔ̃tɔe ta; nu si tututu wòhiã ɣemaɣi koe nye ema wòwɔ nɛ. Le teƒe bubu aɖe la, ɖeko atsu kple asi aɖe trɔ tso dutanyigba aɖe si dzi woyi ɖaɖe gbeƒã le la gbɔ va aƒe koe nye ema. Woyi kplɔ̃ɖoƒe aɖe eye esi wonɔ woƒe nuteƒekpɔkpɔwo gblɔm dzidzɔtɔe la, ɖekakpui aɖe nɔ anyi kpoo nɔ to ɖom. Ƒe aɖewo megbe, esi ɖekakpui ma nɔ dzadzram ɖo be yeayi aɖawɔ gbeƒãɖeɖedɔa le duta la, eɖo ŋku atsu kple asi sia kple nya siwo wogblɔ, siwo ʋãe wòdi be yeazu dutanyanyuigblɔla, la dzi.
2 Ðewohĩ nudzɔdzɔ mawo na nèɖo ŋku ame aɖe si ƒe kpɔɖeŋu wɔ dɔ ɖe dziwò alo ame aɖe si dzi wò agbenɔnɔ wɔ dɔ ɖo la dzi. Le nyateƒe me la, ƒãa hafi dzeɖoɖo ɖeka aɖe kpɔa ŋusẽ ame aɖe ƒe agbe dzi nenema, gake gbe sia gbe la, mɔnukpɔkpɔ geɖewo sua mía si be míade dzi ƒo na ame bubuwo eye míado ŋusẽ wo. Tsɔe be nane li, si ate ŋu akpe ɖe ŋuwò be ŋutete kple nɔnɔme nyui siwo le asiwò la naganyo ɖe edzi, ale be nàgakpe ɖe nɔviwòwo ŋu geɖe wu eye nànye dɔwɔnu nyui aɖe na Mawu. Ðe manyo ŋutɔ oa? Le nyateƒe me la, nu ma tututue Yehowa na mí—eyae nye gbɔgbɔ kɔkɔe la. (Luka 11:13) Esi Mawu ƒe gbɔgbɔa le mɔ fiam mí ta la, ekpena ɖe mía ŋu míetua nɔnɔme nyui aɖewo, siwo nana míaƒe Mawu subɔsubɔ ganyona ɖe edzi le go sia go me, la ɖo. Nunana wɔnuku ka gbegbee nye esi!—Mixlẽ Galatiatɔwo 5:22, 23.
3. (a) Ne míele ‘gbɔgbɔ la ƒe kutsetsea’ tum ɖo la, aleke wòdoa Mawu ɖe dzii? (b) Nyabiase kawo mee míadzro?
3 Nɔnɔme nyui siwo gbɔgbɔ kɔkɔea kpena ɖe mía ŋu míetuna ɖo la nye Yehowa Mawu, Ame si gbɔ gbɔgbɔ ma tso, ƒe nɔnɔmewo. (Kol. 3:9, 10) Yesu gblɔ susu vevitɔ si tae wòle be míaʋli vevie asrɔ̃ Mawu ƒe nɔnɔme ɖo la na eƒe apostolowo be: “Nu si me wodoa Fofonye ɖe dzi le lae nye esi: be miayi edzi anɔ ku geɖe tsem.”a (Yoh. 15:8) Esi míele ‘gbɔgbɔ la ƒe kutsetsea’ tum ɖo la, emetsonuawo dzena ƒãa amewo kpɔna le ale si míeƒoa nu kple ale si míewɔa nui me; eye esia hea kafukafu vanɛ na mía Mawu la. (Mat. 5:16) Mɔ kawo nue gbɔgbɔ la ƒe kutsetsea to vovo na nɔnɔme siwo Satana ƒe xexea ɖena fiana le? Alekee míate ŋu atu gbɔgbɔa ƒe kutsetsea ɖo? Nu ka tae wòate ŋu asesẽ na mí be míawɔ esia? Míaɖo nyabiase siawo ŋu esi míele gbɔgbɔa ƒe kutsetsea ƒe akpa etɔ̃ gbãtɔ siwo nye lɔlɔ̃, dzidzɔ, kple ŋutifafa me dzrom.
Lɔlɔ̃ Si Wotu Ðe Gɔmeɖose Kɔkɔtɔ Dzi
4. Lɔlɔ̃ ka tɔgbie Yesu fia eyomedzelawo be woaɖe afia?
4 Lɔlɔ̃ si tsoa gbɔgbɔ kɔkɔe la me la to vovo tso lɔlɔ̃ si ƒomevi bɔ ɖe xexea me la gbɔ sãsãsã. Le mɔ ka nu? Eyae nye be wotui ɖe gɔmeɖose kɔkɔtɔ dzi. Yesu te gbe ɖe vovototo sia dzi le eƒe Todzimawunyaa me. (Mixlẽ Mateo 5:43-48.) Eɖee fia be nu vɔ̃ wɔlawo kura gɔ̃ hã dina be yewoawɔ nu ɖe amewo ŋu abe ale si wowɔna ɖe yewo ŋu ene. Mebiaa ɖokuitsɔtsɔsavɔ ŋutɔŋutɔ be woaɖe “lɔlɔ̃” sia ƒomevi afia o, gake ve nunye nye hã mave nuwò dzro ko wònye. Ne míedi be ‘míaɖee afia be mía Fofo si le dziƒowo la ƒe viwoe míenye’ la, ele be míato vovo. Le esi míanɔ nu wɔm ɖe amewo ŋu abe ale si wowɔna ɖe mía ŋu ene teƒe la, ele be míanɔ nu wɔm ɖe wo ŋu ahanɔ wo bum abe ale si Yehowa wɔa nu ɖe wo ŋu kpakple ale si wòbua woe ene. Gake ɖe wòanya wɔ be míalɔ̃ míaƒe futɔwo abe ale si Yesu de se enea?
5. Aleke míate ŋu aɖe lɔlɔ̃ afia ame siwo tia mía yome?
5 De ŋugble le Biblia me kpɔɖeŋu ɖeka ŋu kpɔ. Esime Paulo kple Sila nɔ gbeƒã ɖem le Filipi la, wolé wo, woƒo wo vevie, eye wode wo gaxɔ ememetɔ me, eye wode ga woƒe afɔwo ɖe atikpo siwo me woɖe do ɖo la me sesĩe. Le esia wɔwɔ me la, gaxɔdzikpɔlaa hã anya sẽ ŋuta le wo ŋu godoo. Esi ablɔɖe su wo si nukutɔe to anyigbaʋuʋu aɖe dzi la, ɖe wokpɔ dzidzɔ be yewo hã yewoaɖo nu si ŋutsu ma wɔ yewo la teƒe nɛa? Ao. Ale si wotsɔ ɖe le eƒe nyonyo me vevie—ɛ̃, woƒe ɖokuitsɔtsɔsavɔ ƒe lɔlɔ̃—ʋã wo wowɔ nyui na gaxɔdzikpɔlaa, esi wona mɔnukpɔkpɔ eya kple eƒe aƒe bliboa wova zu xɔsetɔwo. (Dɔw. 16:19-34) Le egbeŋkekeawo me la, mía nɔvi geɖewo hã wɔ nu nenema ke, ‘woyraa ame siwo tia wo yome.’—Rom. 12:14.
6. Mɔ kawo nu míate ŋu aɖe ɖokuitsɔtsɔsavɔ ƒe lɔlɔ̃ afia mía nɔviwo le? (Kpɔ aɖaka si le axa 21.)
6 Lɔlɔ̃ si míeɖena fiaa mía nɔvi xɔsetɔwo la gade ŋgɔ wu. “Agba le mía dzi be míatsɔ míaƒe luʋɔ ana ɖe mía nɔviwo ta.” (Mixlẽ 1 Yohanes 3:16-18.) Gake zi geɖe la, míate ŋu aɖe lɔlɔ̃ afia le mɔ siwo le sue wu nu. Le kpɔɖeŋu me, ne míegblɔ nya aɖe alo wɔ nane si ve mía nɔvi aɖe la, míate ŋu aɖe lɔlɔ̃ afia ne míetso le mía ɖokui si yi ɖadzra mía kplii dome ɖo. (Mat. 5:23, 24) Ke ne nɔvi aɖe do dziku na mí ya ɖe? Ðe ‘míelɔ̃na tsɔna kena,’ alo ɖe míedina ɣeaɖewoɣi be míalé mía nɔvia ɖe dɔ mea? (Ps. 86:5) Lɔlɔ̃ si nu sẽ, si tsoa gbɔgbɔ kɔkɔea me la ate ŋu akpe ɖe mía ŋu míatsyɔ nu vodada suesuewo dzi, míalɔ̃ faa atsɔ anɔ ame bubuwo kem abe “ale si Yehowa tsɔ ke [mí] faa la” ene.—Kol. 3:13, 14; 1 Pet. 4:8.
7, 8. (a) Aleke lɔlɔ̃ na amewo do ƒome kple lɔlɔ̃ na Mawu? (b) Aleke míate ŋu awɔ be míaƒe lɔlɔ̃ na Yehowa nade to ɖe edzi? (Kpɔ nɔnɔmetata si le ete.)
7 Aleke míate ŋu atu ɖokuitsɔtsɔsavɔ ƒe lɔlɔ̃ sia ɖo ahaɖee afia mía nɔviwo? Míate ŋu awɔ esia ne míena míaƒe lɔlɔ̃ na Mawu le to dem ɖe edzi. (Ef. 5:1, 2; 1 Yoh. 4:9-11, 20, 21) Míenyia míaƒe dziwo eye míeƒãa lɔlɔ̃ na mía Fofo si le dziƒo la ɖe míaƒe dzi me le ɣeyiɣi siwo míetsɔ bɔa ha kple Yehowa, to Biblia xexlẽ, ŋugbledede, kple gbedodoɖa dzi, la me. Ke hã, ehiã be míaƒle ɣeyiɣia be míate ŋu awɔ eŋu dɔ atsɔ ate ɖe Mawu ŋu.
8 Míate ŋu awɔ eƒe kpɔɖeŋu ale: Tsɔe be gaƒoƒo aɖe koŋ dzi koe nètea ŋu xlẽa Mawu ƒe Nya la, dea ŋugble le eŋu, hedoa gbe ɖa na Yehowa gbe sia gbe. Ðe màkpɔ egbɔ be màɖe mɔ gbeɖe be naneke nagaxɔ ɣeyiɣi ma si nètsɔ bɔa ha kple Yehowa la le asiwò oa? Ele eme baa be ame aɖeke mate ŋu axe mɔ na mí be míagado gbe ɖa na Mawu o, eye mía dometɔ akpa gãtɔ tea ŋu xlẽa Biblia le ɣesiaɣi si wòdi. Ke hã, ahiã be míaɖe afɔ aɖewo atsɔ akpɔ egbɔ be gbe sia gbe ƒe hloloetsotsowo nagaxɔ ɣeyiɣi si míetsɔ bɔa ha kple Mawu la le mía si o. Ðe nèdia ɣeyiɣi geɖe ale si nàte ŋui gbe sia gbe tsɔ tena ɖe Yehowa ŋua?
“Gbɔgbɔ Kɔkɔe Ƒe Dzidzɔ”
9. Nu nyui kae le gbɔgbɔ kɔkɔea ƒe kutsetsea ŋu?
9 Nu nyui aɖe si le gbɔgbɔ la ƒe kutsetsea ŋue nye be enɔa anyi ɖaa, metrɔna o. Míatsɔ dzidzɔ si nye kutsetsea ƒe akpa evelia awɔ ale si enu meyina o la ƒe kpɔɖeŋu. Dzidzɔ le abe ati si tea ŋu tsina le nɔnɔme madeamedziwo gɔ̃ hã me ene. Le anyigbaa dzi godoo la, Mawu subɔlawo dometɔ geɖe tsɔ “gbɔgbɔ kɔkɔe ƒe dzidzɔ xɔ nya la le xaxa geɖewo me.” (1 Tes. 1:6) Bubuwo toa nɔnɔme sesẽwo kple hiãkamewo me. Ke hã, Yehowa doa ŋusẽ wo to eƒe gbɔgbɔa dzi ‘wodoa dzi bliboe, eye wogbɔa dzi ɖi blewu le dzidzɔ me.’ (Kol. 1:11) Nu ka gbɔe dzidzɔ sia tso?
10. Nu ka gbɔe míaƒe dzidzɔ la tsona?
10 To vovo na Satana ƒe xexea ƒe “kesinɔnu siwo dzi womate ŋu aka ɖo o” la, gbɔgbɔmenu xɔasi siwo Yehowa na mí ya nɔa anyi ɖaa. (1 Tim. 6:17; Mat. 6:19, 20) Eʋu etsɔme mavɔ ƒe dzidzɔmɔkpɔkpɔ la ƒe mɔnukpɔkpɔ ɖi na mí. Míekpɔa dzidzɔ be míenye Kristotɔwo ƒe nɔviwo ƒe habɔbɔa me tɔwo. Ƒo wo katã ta la, mía kple Mawu dome ƒomedodoa tae míekpɔa dzidzɔ ɖo. Míesena le mía ɖokui me abe David ene, esi wòdzi ha kafu Yehowa le ɣeyiɣi si me wòzu sisila gɔ̃ hã me hegblɔ be: ‘Elabena wò amenuveve nyo wu agbe; nye nuyiwo akafu wò. Ekema makafu wò le nye agbe me katã, eye mawu nye asiwo dzi le wò ŋkɔ me.’ (Ps. 63: 4, 5) Ne míele nɔnɔme sesẽwo me tom gɔ̃ hã la, kafukafunyawo dona le míaƒe dzi me dzidzɔtɔe na Mawu.
11. Nu ka tae wòle vevie be míasubɔ Yehowa kple dzidzɔ?
11 Apostolo Paulo de dzi ƒo na Kristotɔwo be: “Dzi nedzɔ mi le Aƒetɔ la me ɖaasi. Megale egblɔm ake be: Dzi nedzɔ mi!” (Flp. 4:4) Nu ka tae wòle vevie be Kristotɔwo nanɔ subɔsubɔdɔ wɔm na Yehowa kple dzidzɔ ɖo? Nya si Satana tsɔ ɖe Yehowa ƒe dziɖulanyenye ŋu tae. Satana tso Mawu subɔlawo katã nu be wo dometɔ aɖeke mesubɔa Mawu tso dzi me faa o. (Hiob 1:9-11) Ne wòanye be míesubɔa Yehowa le esi wòbiae tso mía si ko ta dzidzɔ manɔmee la, míaƒe kafukafuvɔsa made blibo o. Eya ta míedzea agbagba be míawɔ ɖe hakpalaa ƒe dzideƒonya si nye, ‘Misubɔ Yehowa kple dzidzɔ, eye mitsɔ aseyetsotso do ɖe eŋkume!’ la dzi. (Ps. 100:2) Ne míesubɔa Mawu tso dzi me faa kple dzidzɔ la, edoa eyama ɖe dzi.
12, 13. Nu kawoe míate ŋu awɔ atsɔ aɖu dziɖeleameƒo ƒe seselelãmewo dzi?
12 Gake ate ŋu adzɔ be Yehowa subɔla dovevienuwo gɔ̃ hã nava to ɣeyiɣi aɖewo siwo me woalé blanui vevie ɣeaɖewoɣi eye wòahiã be woaʋli vevie be nukpɔsusu nyui nakpɔtɔ anɔ wo si la me. (Flp. 2:25-30) Nu kae ate ŋu akpe ɖe mía ŋu le ɣeyiɣi mawo me? Efesotɔwo 5:18, 19 gblɔ be: “Mina gbɔgbɔ la nanɔ mia yɔm fũu, eye mitsɔ psalmowo kple Mawu kafukafu nyawo kpakple gbɔgbɔmehawo ƒo nu na mia nɔewo, miadzi ha, eye miaƒo ha le miaƒe dziwo me na Yehowa.” Aleke míate ŋu awɔ ɖe aɖaŋuɖoɖo sia dzi?
13 Ne dziɖeleameƒo ƒe seselelãmewo xɔ susu me na mí la, míate ŋu aƒo koko na Yehowa eye míadze agbagba ade ŋugble le nu siwo dze na kafukafu la ŋu. (Mixlẽ Filipitɔwo 4:6-9.) Ame aɖewo kpɔe be, ne yewole Fiaɖuƒehawo ƒom hele wo dzim le ve me la, enaa dzi ɖoa yewo ƒo eye wòkpena ɖe yewo ŋu yewotsɔa susu ɖoa nu nyuiwo ŋu. Nɔviŋutsu aɖe si to nɔnɔme sesẽ aɖe si na nu tena ɖe edzi eye dzi ɖena le eƒo ɣeaɖewoɣi me la gblɔ be: “Tsɔ kpe ɖe gbedodoɖa tso dzi blibo me ŋu la, meléa Fiaɖuƒeha aɖewo me nyawo ɖe susu me. Ne mekɔ gbe dzi le kafukafuha vivi siawo dzim na Yehowa alo le wo dzim kple gbe bɔbɔe na ɖokuinye la, enaa nye dzi dzea eme. Gakpe ɖe eŋu la, woɖe agbalẽ si nye Te Ðe Yehowa Ŋu ɖe go ɣemaɣi lɔƒo. Mexlẽe wu enu zi eve le ƒe si kplɔe ɖo me. Enɔ nam abe dɔmi ene eye wòada gbe le nye dzi ŋu. Menya be Yehowa yra ɖe nye agbagbadzedzewo dzi.”
“Ŋutifafa Ƒe Nublanu La”
14. Nu kae ɖe dzesi le ŋutifafa si gbɔgbɔ kɔkɔea nana ŋu?
14 Le míaƒe dukɔwo dome takpekpewo me la, nɔvi Kristotɔ siwo tso dukɔ vovovowo me eye woƒe dekɔnuwo to vovo la sea vivi le hadede tuameɖowo me kple wo nɔewo. Hadede siawo tɔgbi ɖea nu ɖedzesi aɖe fiana le ŋutifafa si le Mawu ƒe amewo dome ŋu—eyae nye ɖekawɔwɔ si le mía dome le xexea me katã. Zi geɖe la, ewɔa nuku na eteƒekpɔlawo ne wokpɔe be ame ƒomevi vovovo siwo woakpɔ mɔ be woalé fu wo nɔewo hafi la ‘dze agbagba vevie wɔ ɖeka le gbɔgbɔ la me le ŋutifafa ƒe nublanu la me.’ (Ef. 4:3) Ðekawɔwɔ sia ɖe dzesi vavã le nu siwo gbegbe dzi wòhiã be mía dometɔ geɖe naɖu la ta.
15, 16. (a) Nukpɔsusu kae nɔ Petro si wòtsɔ tsi, eye aleke esia va zu kuxi sesẽ aɖe nɛ? (b) Aleke Yehowa kpe ɖe Petro ŋu wòtrɔ eƒe susu?
15 Esesẽ ŋutɔ be woana dukɔ vovovo me tɔ siwo ƒe dekɔnuwo to vovo la nawɔ ɖeka. Be woakpe ɖe mía ŋu míase nu siwo gbegbe dzi wòhiã be míaɖu hafi míate ŋu awɔ ɖeka alea gɔme la, mina míadzro nu siwo me apostolo Petro, si nɔ anyi le ƒe alafa gbãtɔ me, to la me. Ale si wòbua Ame siwo menye Yudatɔwo o, siwo nye aʋamatsomatsotɔwo, la dze le eƒe nya siawo me: “Mia ŋutɔwo mienyae nyuie, ale si mele se nu be Yudatɔ nawɔ ɖeka kple dukɔ bubu me tɔ alo ate ɖe eŋu o; ke hã, Mawu ɖee fiam be mele be mayɔ ame aɖeke be ame makɔmakɔ alo ame ƒoɖi o.” (Dɔw. 10:24-29; 11:1-3) Le nukpɔsusu si nɔ amewo si ɣemaɣi nu la, edze ƒãa be susu si nɔ Petro si wòtsɔ tsi ye nye be Sea ƒoe ɖe ye nu be Yudatɔwo ɖeɖe ko wòle be yealɔ̃. Anya susui be esɔ be yeabu Ame siwo menye Yudatɔwo o be wonye yeƒe futɔ siwo wòle be yealé fui.b
16 Wò ya kpɔ ale si gbegbe wòaɖe fu na Petro ŋutɔ be wòage ɖe Kornelio ƒe aƒe me ŋu kpɔ. Ðe ame aɖe si si nukpɔsusu masɔmasɔ nɔ ku ɖe Ame siwo menye Yudatɔwo o ŋu la ate ava ‘wɔ dɔ ɖekae’ kple wo “le ŋutifafa ƒe nublanu la” mea? (Ef. 4:3, 16) Ɛ̃, elabena ŋkeke ʋɛ aɖewo ko do ŋgɔ la, Mawu ƒe gbɔgbɔ ʋu Petro ƒe dzi, hekpe ɖe eŋu be wòaɖɔ eƒe nukpɔsusu ɖo eye wòaɖu eƒe nazãbubua dzi. Yehowa to ŋutega aɖe dzi na eme kɔ nɛ be ale si Mawu bua amewo la menɔa te ɖe woƒe ŋutigbalẽ ƒe amedede alo dukɔ si me tɔwo wonye dzi o. (Dɔw. 10:10-15) Esia tae Petro te ŋu gblɔ na Kornelio be: “Vavãe, mekpɔe dze sii be Mawu mekpɔa ame ŋkume o, ke boŋ le dukɔ sia dukɔ me la, ame si vɔ̃nɛ, eye wòwɔa nu dzɔdzɔe la, eyae dzea eŋu.” (Dɔw. 10:34, 35) Petro trɔ eƒe susu, eye wòwɔ ɖeka kple “nɔviwo ƒe habɔbɔ blibo la katã” vavã.—1 Pet. 2:17.
17. Aleke ɖekawɔwɔ si le Mawu ƒe amewo dome la wɔ nukui?
17 Nu si me Petro to la kpena ɖe mía ŋu míedea asixɔxɔ tɔtrɔ wɔnuku si wɔm Mawu ƒe amewo le egbea la ŋu. (Mixlẽ Yesaya 2:3, 4.) Ame miliɔn geɖe siwo “tso dukɔwo kple towo kple ame ƒomeviwo kpakple gbegbɔgblɔwo katã me” la trɔ woƒe nukpɔsusu wòwɔ ɖeka kple “Mawu ƒe lɔlɔ̃nu nyui dzeameŋu si le blibo la.” (Nyaɖ. 7:9; Rom. 12:2) Tsã la, fuléle, keléle, kple mama si le Satana ƒe xexea me la kpɔ ŋusẽ ɖe ame siawo dometɔ geɖe dzi. Ke hã, to Mawu ƒe Nya la sɔsrɔ̃ kpakple gbɔgbɔ kɔkɔea ƒe kpekpeɖeŋu me la, wosrɔ̃ ale si ‘woati nu siwo naa ŋutifafa nɔa anyi la yome.’ (Rom. 14:19) Ðekawɔwɔ si do tso eme la hea kafukafu vanɛ na Mawu.
18, 19. (a) Aleke mía dometɔ ɖe sia ɖe ate ŋu akpe asi ɖe ŋutifafa kple ɖekawɔwɔ si le hamea me ŋu? (b) Nu ka mee míadzro le nyati si kplɔe ɖo me?
18 Aleke mía dometɔ ɖe sia ɖe ate ŋu akpe asi ɖe ŋutifafa kple ɖekawɔwɔ si le Mawu ƒe amewo dome ŋu? Ame siwo tso duta la le hame geɖewo me egbea. Ðewohĩ wo dometɔ aɖewo ƒe dekɔnuwo to vovo na mía tɔwo alo ɖewohĩ womedoa mía degbea nyuie o. Ðe míetena ɖe ame siawo ŋua? Esia ye Mawu ƒe Nya la bia tso mía si be míawɔ. Esi Paulo nɔ agbalẽ ŋlɔm na Roma hame, si me Yudatɔwo kple Ame siwo menye Yudatɔwo o, siwo va zu xɔsetɔwo, nɔ la, egblɔ be: “Mixɔ mia nɔewo, abe ale si ko Kristo la hã xɔ míi ene, hena Mawu ƒe kafukafu.” (Rom. 15:7) Ðe ame aɖe le miaƒe hamea me si wòahiã be nàganya nyuie wua?
19 Nu bubu kawoe míagate ŋu awɔ be míaɖe mɔ gbɔgbɔ kɔkɔea nanɔ mɔ fiam mí? Míakpɔ nyabiase sia ƒe ŋuɖoɖo ne míele gbɔgbɔa ƒe kutsetsea ƒe akpa mamlɛawo me dzrom le nyati si kplɔe ɖo me.
[Etenuŋɔŋlɔwo]
a Kutsetse si ŋu Yesu ƒo nu tsoe la lɔ ‘gbɔgbɔ la ƒe kutsetsea’ kple ‘nuyiwo ƒe kutsetse’ si Kristotɔwo tsɔna naa Mawu to Fiaɖuƒegbeƒãɖeɖedɔa dzi ɖe eme.—Heb. 13:15.
b Mose ƒe Agbalẽ Etɔ̃lia 19:18 gblɔ be: ‘Mègawɔ wɔɖenui o, eye mègalé dɔmedzoe, si wò dukɔ me viwo do na wò la, ɖi o; ke boŋ nàlɔ̃ hawòvi abe ɖokuiwò ene. Nyee nye Yehowa!’ Nukpɔsusu si nɔ Yuda subɔsubɔhakplɔlawo sie nye be nyagbɔgblɔ “wò dukɔ me viwo” kpakple “hawòvi” ku ɖe Yudatɔwo ɖeɖe ko ŋu. Se la bia tso Israel viwo si be woaɖe wo ɖokuiwo ɖe vovo tso dukɔ bubuwo gbɔ. Ke hã, Sea meda asi ɖe susu si nɔ wo si be, ame ɖe sia ɖe si menye Yudatɔ o la nye yewoƒe futɔ si wòle be yewoalé fui, si nye nukpɔsusu si subɔsubɔhakplɔla siwo nɔ anyi le ƒe alafa gbãtɔ me do ɖe ŋgɔ la dzi o.
Aleke Nàɖo Wo Ŋui?
• Aleke míate ŋu aɖe ɖokuitsɔtsɔsavɔ ƒe lɔlɔ̃ afia mía nɔviwo?
• Nu ka tae wòle vevie be míasubɔ Mawu kple dzidzɔ?
• Aleke míate ŋu akpe asi ɖe ŋutifafa kple ɖekawɔwɔ si le hamea me ŋu?
[Adaka si le axa 21]
“Ame Siawoe Nye Kristotɔ Vavãwo”
Woŋlɔ ɖekakpui Yudatɔ gamenɔla aɖe ƒe nya siwo gbɔna la ɖe agbalẽ si ƒe tanyae nye Between Resistance and Martyrdom—Jehovah’s Witnesses in the Third Reich (Yehowa Ðasefowo—Le Tamanamana Kple Xɔsetaku Dome Le Nazi Dziɖuɖua Te) me, si me wòɖɔ zi gbãtɔ si wòkpɔ Yehowa Ðasefowo ƒe nuwɔna teƒe, esime wokplɔe va Neuengamme fuwɔamegaxɔ me; egblɔ be:
“Esi míetso Dachau eye míenya ge ɖe asaɖa la me ko la, Yudatɔ bubuawo tsɔ nu sia nu si nɔ wo si la ɣla ale be woagava na woƒe ɖe mí o. . . . Hafi woalé mí de [fuwɔamegaxɔ me la], míekpena ɖe mía nɔewo ŋu. Gake fifia, esi míele agbe kple ku dome la, nu si ŋu bum ame sia ame le koe nye be yeakpɔ ye ɖokui ta eye wòŋlɔ ame bubuawo be. Gake de ŋugble le nu si Biblia Nusrɔ̃viwo ya nɔ wɔwɔm ŋu kpɔ. Ɣemaɣi la, enɔ na wo be woawɔ dɔ sesĩe ŋutɔ aɖɔ pɔmpi aɖewo siwo gblẽ la ɖo. Vuvɔ nɔ wɔwɔm ale gbegbe, eye wonɔa tsitre ɖe tsi siwo fa miamiamia la me nɔa dɔ wɔm ŋkeke bliboa. Ame aɖeke mete ŋu se ale si wowɔ do dzi le esia me la gɔme o. Wogblɔ be Yehowa ye doa ŋusẽ yewo. Wohiã na woƒe abolo vevie abe míawo ke ene, elabena dɔ nɔ wo wum. Ke hã, nu kae wowɔ? Woƒo abolo siwo katã nɔ wo si la nu ƒu; woawo ŋutɔwo ɖu eƒe afã, eye wotsɔ afã susɔea na wo nɔvi xɔsetɔ siwo tso Dachau va ɖo teti ye nye ema la. Wodo wòezɔ na wo, eye wogbugbɔ nu na wo. Hafi woaɖu nua la, wodo gbe ɖa. Esi woɖui vɔ la, wo katã ƒe dzi dze eme eye wokpɔ dzidzɔ. Wogblɔ be dɔ meganɔ yewo wum azɔ o. Èkpɔea! Ɣemaɣie megblɔ na ɖokuinye be: Ame siawoe nye Kristotɔ vavãwo.”
[Nɔnɔmetata si le axa 19]
Ðe nèƒlea ɣeyiɣia gbe sia gbe tso dɔwɔna bubuwo me tsɔ tena ɖe Yehowa ŋua?