Dzilawo Kple Ðeviwo: Mitsɔ Mawu Ðo Nɔƒe Gbãtɔ!
“Vɔ̃ Mawu, eye nalé eƒe seawo me ɖe asi.”—NYAGBLƆLA 12:13.
1. Vɔvɔ̃ kae wòle be dzilawo kple ɖeviwo natu ɖo, eye nukae atso eme na wo?
NYAGBLƆÐI aɖe si ku ɖe Yesu Kristo ŋu gblɔ be “Yehowa vɔvɔ̃ ƒe nu anyo eŋu.” (Yesaya 11:3) Bubu deto kple dzodzo nyanyanya ƒe vɔvɔ̃ na Mawu, vɔvɔ̃ be yeava wɔ nusi madze Mawu ŋu o le esi wòlɔ̃e ta koŋ ye eƒe vɔvɔ̃ la nye. Ehiã be dzilawo kple ɖeviwo nasrɔ̃ Mawu vɔvɔ̃ sia si ɖi Kristo tɔ, si ana woawo hã nakpɔ dzidzɔ abe Yesu ene. Ele be woada Mawu ɖe nɔƒe gbãtɔ le woƒe agbe me to wɔwɔ ɖe eƒe sededewo dzi me. Biblia-ŋlɔla aɖe gblɔ be ‘esiae nye amegbetɔ ƒe agbanɔamedzi.’—Nyagblɔla 12:13.
2. Se kae nye vevitɔ le Sea me, eye amekawo koŋ ye wodee na?
2 Dzilawo koŋ ye wode se vevitɔ si nɔ Sea me, si nye be ‘míalɔ̃ Yehowa kple míaƒe dzi, luʋɔ, kple ŋusẽ blibo’ la na. Esia dze le nya siwo gakplɔe ɖo le Sea me la me be: “Ku [Yehowa lɔlɔ̃ ŋu nya siawo] ɖe to me na viwòwo, eye naƒo nu le wo ŋu, ne èbɔbɔ nɔ aƒewò me, alo nèle mɔ dzi, ne èmlɔ anyi, alo nèfɔ.” (Mose V, 6:4-7; Marko 12:28-30) Woto esia me de se na dzilawo be gbã la, woawo ŋutɔ nalɔ̃ Mawu to edada ɖe nɔƒe gbãtɔ kple efiafia wo viwo be woawo hã nawɔe nenema me.
Kristotɔwo ƒe Agbanɔamedzie
3. Aleke Yesu ɖe alesi ɖetsɔtsɔ le eme na ɖeviwo le vevie fiae?
3 Yesu ɖe alesi wòle be woabu ɖevi suewo gɔ̃ hã ŋu la fia. Ɣeaɖeɣi esi Yesu ƒe anyigba dzi subɔsubɔdɔa yina ɖe eƒe nuwuwu la, amewo va nɔ vidzĩwo tsɔm vɛ nɛ. Esi nusrɔ̃lawo susui be Yesu xaxa akpa eye mele be woaɖe fu nɛ o ta la, wodze agbagba be yewoaxe mɔ na ameawo. Gake Yesu ka mo na eƒe nusrɔ̃lawo be: “Mina ɖeviawo nava gbɔnye, eye migaxe mɔ na wo o.” Yesu ‘lé ɖeviwo ɖe akɔnu’ gɔ̃ hã tsɔ fia alesi wòle vevie be woabu ɖeviwo ŋui le mɔ ʋãme aɖe nu.—Luka 18:15-17; Marko 10:13-16.
4. Amekawoe wode se na be ‘woawɔ dukɔwo katã me nɔlawo nusrɔ̃lawoe,’ eye nukae esia wɔwɔ abia tso wo si?
4 Yesu na eme kɔ hã be agba le ye yomedzelawo dzi be woafia nu ame bubuwo tsɔ kpe ɖe woawo ŋutɔ wo viwo ŋu. Le Yesu ƒe ku kple tsitretsitsi megbe la, “eɖe eɖokui fia nɔvi, siwo wu alafa atɔ̃ la zi ɖeka”—siwo dome dzila aɖewo hã nɔ. (Korintotɔwo I, 15:6) Edze abe anye Galilea-to aɖe dzi afisi eƒe apostolo 11 la hã nɔ ye nusia dzɔ le ene. Afimae Yesu xlɔ̃ nu wo katã le be: “Miheyi ɖawɔ dukɔwo katã ne woanye nusrɔ̃lawo, . . . miafia wo bena, woawɔ nusiwo katã meɖo na mi la.” (Mateo 28:16-20) Kristotɔ aɖeke mate ŋu agbe wɔwɔ ɖe se sia dzi wòasɔ o! Be vifofowo kple vidadawo nawɔ ɖe edzi la, ebia be woakpɔ wo viwo gbɔ eye woagakpɔ gome le dutoƒo gbeƒãɖeɖe kple nufiafia dɔa hã me.
5. (a) Nukae fia be ne menye apostoloawo katãe o hã la, wo dometɔ akpa gãtɔ ɖe srɔ̃ eye vi anɔ wo si? (b) Nuxlɔ̃amenya kae wòle be ƒomewo ƒe tawo nabu nu vevie?
5 Enyo be míanyae be ehiã na apostoloawo gɔ̃ hã be woada asɔ le woƒe ƒomegbanɔamedziwo kple gbeƒãɖeɖedɔa kple Mawu ƒe alẽha la nyinyi ƒe agbanɔamedzia tsɔtsɔ me. (Yohanes 21:1-3, 15-17; Dɔwɔwɔwo 1:8) Nusitae nye be ne menye wo katãe o hã la, wo dometɔ akpa gãtɔ ɖe srɔ̃. Eyata apostolo Paulo ɖe nu me be: “Alo ɖe míekpɔ ŋusẽ bena, míakplɔ nɔvinyɔnu, si anye mía srɔ̃ la, anɔ nugbe yim, abe alesi apostolo bubuawo kple Aƒetɔ la nɔviwo kpakple Kefa hã wɔna ene oa?” (Korintotɔwo I, 9:5; Mateo 8:14) Vi hã anɔ apostoloawo dometɔ aɖewo si. Ŋutinyaŋlɔla gbãtɔwo, abe Eusebius ene, gblɔ be vi nɔ Petro si. Ehiã be Kristotɔ dzila gbãtɔwo katã nawɔ ɖe Ŋɔŋlɔawo me nuxlɔ̃ame sia dzi: “Ne ame aɖe melé be na ye ŋutɔ tɔwo o, eye vevietɔ na ye ŋutɔ ƒe aƒemetɔwo o la, egbe xɔse la, eye wòvɔ̃ɖi wu dzimaxɔsetɔ.”—Timoteo I, 5:8.
Agbanɔamedzi Gbãtɔ
6. (a) Dɔ gã kae dze ŋgɔ Kristotɔ hamemegã siwo si ƒome le? (b) Nukae nye Kristotɔ siwo nye vifofowo ƒe agbanɔamedzi vevitɔ?
6 Kristotɔ hamemegã siwo si ƒome le egbea la le nɔnɔme si ɖi apostoloawo tɔ me. Ele be woada asɔ le woƒe agbanɔamedzi si nye be woakpɔ woƒe ƒomewo ƒe gbɔgbɔ me kple ŋutilã me nuhiahiãwo gbɔ kpakple dutoƒogbeƒãɖeɖedɔa kple Mawu ƒe alẽha la nyinyi ƒe agbanɔamedzia tsɔtsɔ me. Dɔ kae wòle be nexɔ nɔƒe gbãtɔ? March 15, 1964 ƒe Eŋlisigbe me Gbetakpɔxɔ gblɔ be: “[Vifofo la] ƒe agbanɔamedzi gbãtɔ ku ɖe eƒe ƒomea ŋu, eye le nyateƒe me la, mate ŋu asubɔ ne mekpɔ agbanɔamedzi ma gbɔ o.”
7. Aleke Kristotɔ siwo nye vifofowo awɔ ada Mawu ɖe nɔƒe gbãtɔ?
7 Eyata ele be vifofowo nada Mawu ɖe nɔƒe gbãtɔ to wɔwɔ ɖe se si gblɔ be ‘woanɔ wo viwo nyim le Yehowa ƒe hehe kple nuxɔxlɔ̃ me’ dzi me. (Efesotɔwo 6:4) Womate ŋu atutu agbanɔamedzi ma ada ɖe ame bubu dzi o, togbɔ be dɔ anɔ fofo la dzi be wòakpɔ dɔwo dzi le Kristo-hamea me hã. Aleke vifofowo awɔ akpɔ woƒe agbanɔamedziwo gbɔ—akpɔ woƒe ƒomea me tɔwo ƒe nuhiahiãwo gbɔ le ŋutilã, gbɔgbɔ, kple seselelãme gome—eye le ɣeyiɣi ma ke me la, woagaxɔ ŋgɔ akpɔ hamea dzi?
Kpekpeɖeŋu si Hiã la Nana
8. Aleke hamemegã srɔ̃ ate ŋu akpe ɖe eŋui?
8 Edze ƒã be aɖe vi na hamemegã siwo si ƒome le ne wokpe ɖe wo ŋu. Gbetakpɔxɔ si me míeyɔ nya tsoe va yi la gblɔ be Kristotɔ srɔ̃nyɔnu ate ŋu akpe ɖe srɔ̃aŋutsua ŋu. Egblɔ be: “Ate ŋu ana wòasɔ nɛ eye wòanɔ bɔbɔe nɛ alesi wòate ŋui be wòadzra ɖo ɖe eƒe dɔdasi vovovoawo ŋu, eye wòakpe ɖe eŋu be magblẽ eƒe ɣeyiɣi xɔasi me o to ɖoɖowɔɖi nyui wɔwɔ le aƒea me, nuɖaɖa ɖe game dzi, kple dzadzraɖo be woadze mɔ ayi kpekpeawo ɖe game dzi me. . . . Le ŋutsua ƒe mɔfiafia te la, Kristotɔ srɔ̃nyɔnu ate ŋu awɔ nu geɖe atsɔ ahe ɖeviawoe le mɔ si dzi woato be woadze Yehowa ŋu me.” (Lododowo 22:6) Nyateƒee, ɖe wowɔ srɔ̃nyɔnua be wòanye “kpeɖeŋutɔ,” eye nunya anɔ eme na srɔ̃aŋutsua be wòalɔ̃ wòakpe ɖe ye ŋu. (Mose I, 2:18) Eƒe kpekpeɖeŋu ate ŋu ana be eƒe ƒomea kple hamea me gbanɔamedziwo gbɔ nanya kpɔ nɛ nyuie wu.
9. Tesalonika-hamea me tɔ kawoe wode dzi ƒo na be woakpe ɖe hamevi bubuwo ŋu?
9 Gake menye Kristotɔ hamemegãwo srɔ̃wo ɖeɖekoe ate ŋu akpɔ gome le dɔ siwo ana kpekpeɖeŋu dzikpɔla si wòle na be ‘wòanyi Mawu ƒe alẽha la’ eye wòagakpɔ eya ŋutɔ ƒe aƒe dzi la me o. (Petro I, 5:2) Ame bubu kawo hãe ate ŋu akpe ɖe eŋu? Apostolo Paulo xlɔ̃ nu nɔvi siwo nɔ Tesalonika be woade bubu ‘amesiwo xɔa ŋgɔ’ le wo dome ŋu. Gake esi Paulo ganɔ nu ƒom na nɔvi siawo ke—vevietɔ amesiwo mexɔa ŋgɔ o koŋ—la, eŋlɔ be: “Míele nu xlɔ̃m mi, nɔviwo: Migbe nya na nu baɖa wɔlawo, mifa akɔ na dzikatsoƒoetɔwo, mixɔ na gbɔdzɔgbɔdzɔtɔwo, migbɔ dzi ɖi na amewo katã.”—Tesalonikatɔwo I, 5:12-14.
10. Ŋusẽ nyui kae nɔviwo katã ƒe kpekpeɖeŋu si me lɔlɔ̃ le akpɔ ɖe hamea dzi?
10 Aleke gbegbe wònyoe nye si ne lɔlɔ̃ si ʋãa ame be woafa akɔ na dzikatsoƒoetɔwo, akpe ɖe gbɔdzɔgbɔdzɔtɔwo ŋu, eye woagbɔ dzi ɖi na amewo katã la le nɔvi siwo le hamea me la me! Tesalonika nɔvi siwo xɔ Biblia me nyateƒea yeyee togbɔ be wokpe fu geɖe hã la wɔ ɖe Paulo ƒe nuxlɔ̃ame sia dzi. (Dɔwɔwɔwo 17:1-9; Tesalonikatɔwo I, 1:6; 2:14; 5:11) Bu dɔ nyui si woƒe dɔwɔwɔ aduadu wɔ le ŋusẽdodo hame bliboa kple wo nu ƒoƒo ƒu ɖekae me la ŋu kpɔ! Nenema ke egbea ne nɔviwo faa akɔ na wo nɔewo, xlɔ̃a nu wo nɔewo hekpena ɖe wo nɔewo ŋu la, enaa alẽkpɔkplɔdɔ ƒe agbanɔamedzi siwo le hamemegãwo dzi, amesiwo zi geɖe ƒome nɔa wo si be woakpɔ wo dzi, la nya wɔna na wo bɔbɔe.
11. (a) Nukatae susu le eme be míagblɔ be wobu nyɔnuwo hã de nya “nɔviwo” me? (b) Kpekpeɖeŋu kae Kristotɔ nyɔnu siwo tsi le gbɔgbɔ me ate ŋu ana ɖetugbiviwo egbea?
11 Ðe nyɔnuwo nɔ ‘nɔvi’ siwo apostolo Paulo nɔ nya la gblɔm na domea? Ẽ, wonɔe, elabena nyɔnu geɖe zu xɔsetɔwo. (Dɔwɔwɔwo 17:1, 4; Petro I, 2:17; 5:9) Kpekpeɖeŋu ka tɔgbee nyɔnu mawo ate ŋu ana? Ðetugbiwo nɔ hamea me, amesiwo wòsesẽ na be woaɖu woƒe ‘gbɔdɔdɔ ƒe nudzodzrowo’ dzi alo amesiwo ‘ƒo dzi ɖe le.’ (Timoteo I, 5:11-13) Kuxi siawo tɔgbe le nyɔnu aɖewo hã ŋu egbea. Nusi anɔ wo hiãm wu koe nye amesi ase nya na wo alo amesi ase veve ɖe wo ti. Zi geɖe la, Kristotɔ nyɔnu si tsi le gbɔgbɔ mee nye amesi ate ŋu ana kpekpeɖeŋu sia nyuie wu. Le kpɔɖeŋu me, ate ŋu aƒo nu kple nyɔnu bubu tso eƒe kuxi si madi be amesiame nase o la ŋu, esi gbɔ manya kpɔ na Kristotɔ ŋutsu o. Esi Paulo nɔ gbe tem ɖe kpekpeɖeŋu sia tɔgbe nana dzi la, eŋlɔ be: “Nyɔnu tsitsiwo . . . [nanye] nu nyui fialawo, bene woaxlɔ̃ nu ɖetugbiwo, ne woalɔ̃ wo srɔ̃wo kple wo viwo, woanye ɖokuidziɖulawo, ame dzadzɛwo, aƒe me dɔwɔlawo, dɔmenyotɔwo, eye woabɔbɔ wo ɖokui na woa ŋutɔ srɔ̃wo, bena woagagblɔ busunya ɖe mawunya la ŋuti o.”—Tito 2:3-5.
12. Amekawo ƒe mɔfiafia dzie wòle be hamea me tɔ ɖesiaɖe nazɔ ɖo?
12 Yayra ka gbegbee nye si nɔvinyɔnu siwo bɔbɔa wo ɖokui nye le hamea me ne wokpea asi ɖe wo srɔ̃wo kple hamemegãwo ŋu! (Timoteo I, 2:11, 12; Hebritɔwo 13:17) Eɖea vi, vevietɔ na hamemegã siwo dzi ƒomegbanɔamedziwo le, ne amesiame kpe asi ɖe eŋu be woakpe ɖe wo nɔewo ŋu le lɔlɔ̃ me kple ne amesiame bɔbɔa eɖokui ɖe alẽkplɔla siwo woɖo la te.—Petro I, 5:1, 2.
Dzilawo, Nukae Mietsɔna Ðoa Nɔƒe Gbãtɔ?
13. Aleke vifofo geɖe doa kpo nu le woƒe ƒomewo mee?
13 Ƒe aɖewoe nye sia la, modzakaɖela aɖe gblɔ be: “Mekpɔa ŋutsu siwo nu dze edzi na wonɔa dɔwɔha siwo me ame alafa geɖe le dzi kpɔm; wonya alesi woakpɔ nya sia nya gbɔe, alesi woahe toe kple alesi woaɖo eteƒe na amee le dɔwɔnyawo me. Gake dɔ gãtɔ si dzi kpɔm wole ye nye woƒe ƒomea eye eya gloa wo.” Nuka gbɔe wòtso? Ðe menye esi wotsɔ woƒe dɔ kple nu bubu siwo dzɔa dzi na wo ɖo nɔƒe gbãtɔ eye wogbe wɔwɔ ɖe Mawu ƒe nuxlɔ̃ame dzi tae oa? Eƒe Nya la gblɔ be: “Nya, siwo megblɔ na wò egbe la, . . . ku wo ɖe to me na viwòwo.” Eye ele be woanɔ esia wɔwɔ dzi gbesiagbe. Ehiã be dzilawo naʋu asi le woƒe ɣeyiɣi dzi faa—eye vevietɔ le woƒe lɔlɔ̃ kple ɖetsɔleme deto dzi.—Mose V, 6:6-9.
14. (a) Aleke wòle be dzilawo nakpɔ wo viwo dzii? (b) Nuka wɔwɔe ɖeviwo hehe nyuitɔ bia?
14 Biblia ɖo ŋku edzi na mí be domenyinue ɖeviwo nye tso Yehowa gbɔ. (Psalmo 127:3) Ðe nèléa be na viwòwo abe Mawu ƒe nunɔamesi ene, abe nunana si wotsɔ de asiwò enea? Adzɔ dzi na viwò ne èkɔe ɖe akɔnu, tsɔ fia alesi nèlɔ̃e hetsɔa ɖe le eme nɛ. (Marko 10:16) Gake be ‘nàmlã vi ɖe mɔ si dzi wòato nu’ la, menye asikpakpla kɔ nɛ alo nugbugbɔgbugbɔ nɛ koe hiã o. Be nunya si ana ɖevia mage ɖe agbemefɔkuwo me o nasu esi la, ehiã amehehe si me lɔlɔ̃ le hã. Dzila ɖenɛ fiana be yelɔ̃ ye vi vavã ne ‘etsona ɖe tohehe nɛ ŋu bla.’—Lododowo 13:1, 24; 22:6.
15. Nukae fia alesi dzilawo ƒe amehehe le vevie?
15 Nya si sukuɖaŋuɖola aɖe gblɔ le ɖevi siwo vaa eƒe dɔwɔƒe ŋu la fia alesi gbegbe dzilawo ƒe wo viwo hehe le vevie: “Woƒe nu wɔ nublanui, nu tena ɖe wo dzi, eye wonyea kpekpeɖeŋumanɔsitɔwo. Avi dzi ko wonɔna ne wole alesi tututu nuwo le gblɔm. Wo dometɔ geɖe—geɖe wu alesi nàsusui—te wo ɖokui wuwu kpɔ, menye esi wole dzidzɔ si wu gbɔgblɔ me tae o; esi dzi mele wo dzɔm kurakura o, wometsɔa ɖeke le eme na wo o, eye nuteɖeamedzi wu dzi na wo elabena ɖevi sue mawo ‘le wo ɖokui si’ eye nuwo wu tsɔtsɔ na wo tae.” Egblɔ kpee be: “Edoa ŋɔdzi na ɖevi be wòase le eɖokui me be wogblẽ nuwo ɖe ye si me.” Nyateƒee, ɖeviwo adi be yewoasi le tohehe nu, gake le nyateƒe me la, wokpɔa ŋudzedze ɖe wo dzilawo ƒe mɔfiame kple mɔxeɖenuwo ŋu. Edzɔa dzi na wo be yewo dzilawo tsɔ ɖe le eme na yewo ale gbegbe be wodea se na yewo. Ƒewuivi aɖe si ƒe dzilawo de se nɛ la gblɔ be: “Enye agba gã aɖe si do le dzinye.”
16. (a) Nukae dzɔna ɖe ɖevi aɖewo siwo wohe le Kristotɔwo ƒe aƒeme la dzi? (b) Nukatae vi ƒe godzedze mefia kokoko be menye dzilawoe mehee nyuie o?
16 Gake abe vi nudomegblẽla si le Yesu ƒe kpɔɖeŋua me ene la, ɖevi aɖewo gbea wo dzilawo ƒe mɔfiame eye wodzea go togbɔ be wo dzilawo lɔ̃ wo eye wohe wo nyuie hã. (Luka 15:11-16) Gake ema ɖeɖe mafia be dzilawo mewɔ dɔ si wode wo si be woahe wo viwo nyuie, abe alesi Lododowo 22:6 gblɔe ene la o. Nya wònye wogblɔ gbadzaa esi wogblɔ be ‘woamlã ɖevi ɖe mɔ si wòato la nu eye mate ɖa le edzi o.’ Nublanuitɔe la, ɖevi aɖewo ‘mebua dzilawo ɖe naneke me o.’—Lododowo 30:17.
17. Nukae anye akɔfafa na ɖevi dzegowo ƒe dzilawo?
17 Vifofo aɖe si ƒe viŋutsu dze go la xa nu be: “Mewɔ ɖesiaɖe be maɖo eƒe dzi gbɔ do kpoe. Nyemeganya nusi mawɔ nɛ o elabena meto mɔ vovovo ŋutɔ nu. Ðeke medze edzi o.” Enye míaƒe mɔkpɔkpɔ be le ɣeyiɣi aɖe megbe la, ɖevi dzego mawo aɖo ŋku hehe si me lɔlɔ̃ le si wotsɔ he woe la dzi eye woatrɔ agbɔ abe vi nudomegblẽla la ene. Gake nya la gakpɔtɔ li kokoko be ɖevi aɖewo dzea aglã eye wowɔa nu baɖabaɖa siwo vea dzi na wo dzilawo vevie. Dzilawo ate ŋu akpɔ akɔfafa tso enyanya me be nufiala gãtɔ kekeake si nɔ anyigba dzi kpɔ gɔ̃ hã kpɔ be Yuda Iskariot, amesi nye yeƒe nusrɔ̃vi ɣeyiɣi didi aɖe la, fia ye yomemɔ. Eye ɖikekemanɔmee la, Yehowa ŋutɔ se veve ŋutɔ be ye ŋutɔ yeƒe gbɔgbɔmevi geɖe gbe yeƒe nuxlɔ̃ame eye wodze aglã togbɔ be menye Ye gbɔe wòtso o hã.—Luka 22:47, 48; Nyaɖeɖefia 12:9.
Ðeviwo—Ameka Ŋue Miadze?
18. Aleke ɖeviwo awɔ aɖee fia be yewoɖoa Mawu nɔƒe gbãtɔ?
18 Yehowa xlɔ̃ nu mi ɖeviwo be: “Miɖo to mia dzilawo le Aƒetɔ la me.” (Efesotɔwo 6:1) Ðeviwo wɔa nusia to Mawu dada ɖe nɔƒe gbãtɔ me. Migazu vi tsibomewo o! Mawu ƒe Nya la gblɔ be: “Bometsila [ye] doa vlo fofoa ƒe amehehe.” Eye mele be nàtsɔ dada abui be nuwo ate ŋu adze edzi na ye hehe maxɔmaxɔe o. Enye nyateƒe be “dzidzime [aɖe li], si buna be, yedza, gake mele eƒe ɖiƒoƒo kpɔm o.” (Lododowo 15:5; 30:12) Eyata se Mawu ƒe mɔfiame la—‘ɖo to’ Mawu ƒe sededewo kple dziwòlawo ƒe amehehe, ‘dzra wo ɖo,’ ‘mègaŋlɔ wo be o,’ ‘wò susu nenɔ wo ŋu,’ ‘wɔ wo dzi,’ eye ‘mègaɖe asi le wo ŋu o.’—Lododowo 1:8; 2:1; 3:1; 4:1; 6:20.
19. (a) Susu vevi kawo tae wòle be ɖeviwo naɖo to Yehowa ɖo? (b) Aleke ɖeviwo awɔ aɖee fia be yewodaa akpe na Mawu?
19 Nu nyui geɖewo li si ta wòle be nàɖo to Yehowa ɖo. Elɔ̃ wò, eye wò takpɔkpɔ kple alesi nàkpɔ dzidzɔ le agbe me tae wòde eƒe sewo, siwo me se si ku ɖe alesi ɖeviwo abu wo dzilawo ŋu hã le la ɖo. (Yesaya 48:17) Etsɔ Via hã na ɖe tawò bene wòaɖe wò tso nuvɔ̃ kple ku me eye nàkpɔ agbe mavɔ. (Yohanes 3:16) Ðe nèdaa akpe ɖe nusiawo taa? Mawu le dziƒo le kpɔwòm eye wòle wò dzi me dzrom kpɔ be yeakpɔ be èlɔ̃ ye le nyateƒe me eye nèkpɔa ŋudzedze ɖe yeƒe nunanawo ŋu hã. (Psalmo 14:2) Satana hã da ŋku ɖi, eye wòle alɔme ɖem le Mawu ŋu be màɖo to Eyama o. Ne ègbe toɖoɖo Mawu la, àna Satana nakpɔ dzidzɔ eye Yehowa ‘nase veve.’ (Psalmo 78:40, 41) Yehowa le nu xlɔ̃m wò be: “Vinye, dze nunya, be nado dzidzɔ na nye dzi [to toɖoɖom me], ne mate ŋu aɖo nya ŋu na [amesi] le alɔme ɖem le ŋunye.” (Lododowo 27:11) Ẽ, biabia lae nye, Ameka ŋue nàdze, Satana ŋu loo alo Yehowa ŋue?
20. Aleke ɖetugbi aɖe wɔna dzi nɔa eƒo wòtsɔ subɔa Yehowa ne ne nane do vɔvɔ̃ nɛ?
20 Mele bɔbɔe be nàwɔ Mawu ƒe lɔlɔ̃nu le Satana kple eƒe xexeame ƒe nyaƒoɖeamenuwo me o. Ate ŋu ado vɔvɔ̃ na ame. Ðetugbivi aɖe gblɔ be: “Vɔvɔ̃ si aɖo ame la le abe alesi vuvɔ anɔ wɔwòm ene. Àte ŋu awɔ nane le eŋu.” Eɖe eme be: “Ne vuvɔ le ame wɔm la, wodoa vuvɔmewu. Ne egale ame wɔm kokoko la, wogadoa bubu ɖe edzi. Eye wonɔa edodo ɖe edzi dzi vaseɖe esime womegasea vuvɔa o. Eyata gbedodoɖa na Yehowa ne vɔvɔ̃ ɖo wò la le abe vuvɔmewu dodo ne vuvɔ lé wò ene. Ne megale vɔvɔ̃m le gbedodoɖa ɖeka megbe la, megadonɛ ɖa ake, eye megadonɛ ɖa, gadonɛ ɖa, kakaka vaseɖe esime vɔvɔ̃a dona le menye. Eye nusia wɔa dɔ. Eɖeam tso afɔku me!”
21. Aleke Yehowa aɖo eteƒe na mí ne le nyateƒe me míedzea agbagba danɛ ɖe nɔƒe gbãtɔ le míaƒe agbe me?
21 Ne le nyateƒe me, míedzea agbagba be míada Mawu ɖe nɔƒe gbãtɔ le míaƒe agbe me la, Yehowa alé mí ɖe te. Ado ŋusẽ mí, eye ana mawudɔlawo nakpe ɖe mía ŋu ne ehiã, abe alesi wòkpe ɖe Via ŋui ene. (Mateo 18:10; Luka 22:43) Mi dzilawo kple ɖeviwo katã, milé dzi ɖe ƒo. Vɔvɔ̃ si ɖi Kristo tɔ nenɔ mia me, eye esia ana dzi nadzɔ mi. (Yesaya 11:3) Ẽ, “vɔ̃ Mawu, eye nalé eƒe seawo me ɖe asi; elabena esia nye amegbetɔwo katã tɔ.”—Nyagblɔla 12:13.
Àte Ŋu Aɖo Wo Ŋua?
◻ Agbanɔamedzi kawo tsɔtsɔ mee wòhiã le be Yesu yomedzela gbãtɔwo nada asɔ le?
◻ Agba kae le Kristotɔ dzilawo dzi?
◻ Kpekpeɖeŋu kae li na Kristotɔ hamemegã siwo si ƒome le la?
◻ Dɔ vevi kae nɔvinyɔnuwo ate ŋu awɔ le hamea me?
◻ Aɖaŋuɖoɖo kple mɔfiame kae wòhiã be ɖeviwo nase?
[Nɔnɔmetata si le axa 15]
Zi geɖe la, Kristotɔ nyɔnu tsitsiwo ate ŋu ana kpekpeɖeŋu si ɖetugbiwo hiã la wo
[Nɔnɔmetata si le axa 17]
Akɔfafa kae dzila siwo viwo dze go la ate ŋu akpɔ tso Ŋɔŋlɔawo me?