Sɔhɛwo—Minɔ Te Sesĩe Ðe Abosam Nu

1, 2. (a) Nu ka tae Kristotɔ sɔhɛwo le aʋa si wɔm míele kple gbɔgbɔ vɔ̃wo la dzi ɖum? (Kpɔ nɔnɔmetata si le nyati sia ƒe gɔmedzedze.) (b) Nu kawo me míadzro?

APOSTOLO Paulo tsɔ mí Kristotɔwo sɔ kple asrafowo. Aʋa si wɔm míele la nye gbɔgbɔmetɔ, ke menye ŋutilãmetɔ o. Ke hã, míaƒe futɔawo li ŋutɔŋutɔ. Satana kple gbɔgbɔ vɔ̃wo nye aʋawɔla bibi siwo si nuteƒekpɔkpɔ geɖe su. Ne wotsɔ mí sɔ kpli wo la, adze gbã be míate ŋu awɔ aʋa kpli wo kura o. Sɔhɛ Kristotɔwo koŋue dzena wɔnamanɔŋutɔwo le go sia me. Ðe wòanya wɔ be woaɖu gbɔgbɔmenuwɔwɔ vɔ̃ɖi siwo ƒe ŋusẽ gbɔ amegbetɔwo tɔ ta sãsãsã la dzia? Ɛ̃, woate ŋu aɖu wo dzi, eye wole dzi ɖum hã! Nu ka tae? Elabena ‘woyia edzi sẽa ŋu ɖe edzi le Aƒetɔ la me.’ Esia fia be woxɔa ŋusẽ tso Mawu gbɔ. Gake menye ema ɖeɖe koe o. Wobla aʋakpa. Abe aʋawɔla siwo xɔ hehe nyuie ene la, ‘wodoa aʋawɔnu blibo si tso Mawu gbɔ la.’—Xlẽ Efesotɔwo 6:10-12.

² Ðewohĩ, aʋawɔnu siwo Roma srafowo tsɔ blaa aʋakpa lae nɔ susu me na Paulo esime wòtsɔ Kristotɔwo nɔ sɔsɔm kple asrafowo. (Dɔw. 28:16) Na míakpɔ nu si tae kpɔɖeŋu sia sɔ nyuie. Esi míele eme dzrom la, de dzesi nya siwo sɔhɛ aɖewo gblɔ tso kuxi siwo wodoa goe le gbɔgbɔmeʋawɔnuawo dometɔ ɖe sia ɖe dodo me kple viɖe siwo wokpɔna ŋu.

3, 4. Aleke nyateƒe si le Biblia me la le abe Roma srafowo ƒe alidziblanu ene?

³ Xlẽ Efesotɔwo 6:14. Ga gbadzɛwo nɔa Roma srafowo ƒe alidziblanu ŋu siwo kpɔa woƒe ali ta. Wotrɔ asi le eŋu be wòalé akɔtakpoxɔnua si kpena la ɖe te. Gavi sesẽwo nɔa alidziblanu aɖewo hã ŋu siwo ŋu wotsɔa yi kple adekpui kuna ɖo. Ne asrafoa tsɔ eƒe alidziblanua bla ali dzi sesĩe la, dzi anɔ eƒo ɖe aʋawɔwɔ ŋu.

⁴ Nenema kee nyateƒe siwo míesrɔ̃na tso Mawu ƒe Nyaa me la kpɔa mía ta be aʋatsonufiafiawo nagagblẽ nu le mía ŋu o. (Yoh. 8:31, 32; 1 Yoh. 4:1) Eye zi ale si míelɔ̃ nyateƒe siwo tso Mawu gbɔ la, zi nenemae wòanɔ bɔbɔe na mí be míado míaƒe “akɔtakpoxɔnu” la, si fia be míanɔ agbe ɖe Mawu ƒe dzidzenu dzɔdzɔeawo nu. (Ps. 111:7, 8; 1 Yoh. 5:3) Gakpe ɖe eŋu la, ne míese nyateƒe siwo le Mawu ƒe Nyaa me gɔme nyuie la, dzi anɔ mía ƒo be míaʋli wo ta le tsitretsiɖeŋulawo ŋkume.—1 Pet. 3:15.

 5. Nu ka tae wòle be míato nyateƒe?

⁵ Ne míetsɔ Biblia me nyateƒea bla ali dzi sesĩe le kpɔɖeŋunyagbɔgblɔ nu la, aʋã mí be míanɔ agbe le ɖekawɔwɔ me kple eƒe nufiafiawo eye míato nyateƒe ɣeawokatãɣi. Nu ka tae wòle be míaƒo asa na aʋatsokaka? Nu si tae nye be aʋatsokaka nye Satana ƒe aʋawɔnu siwo wòzãna wòdzea edzi nɛ wu la dometɔ ɖeka. Aʋatsokaka gblẽa nu le aʋatsokalaa kple ame siwo xɔa eƒe alakpanyawo dzi sena la siaa ŋu. (Yoh. 8:44) Eya ta, togbɔ be míede blibo o hã, míewɔa míaƒe ŋutete ɖe sia ɖe be míaƒo asa na aʋatsokaka. (Ef. 4:25) Gake menɔa bɔbɔe ɣesiaɣi o. Nɔvinyɔnu aɖe si xɔ ƒe wuienyi, si ŋkɔe nye Abigail la gblɔ be: “Ɣeaɖewoɣi la, edzena abe nyateƒetoto meɖea vi o ene, vevietɔ ne aʋatsokaka awɔe be nàdo le nɔnɔme sesẽ aɖe me.” Ke nu ka tae wòdzea agbagba be yeato nyateƒe ɣesiaɣi? Egblɔ be: “Ne meto nyateƒe la, dzitsinya nyui nɔa asinye le Yehowa ŋkume. Azɔ hã, dzinyelawo kple xɔ̃nyewo kpɔnɛ be yewoate ŋu aka ɖe dzinye.” Victoria, si xɔ ƒe 23 la gblɔ be: “Ne èto nyateƒe eye nèʋli wò dzixɔsewo ta la, hawòtiwo ate ŋu aɖe fu na wò. Gake viɖe siwo nàkpɔ la lolo wu: Dzi aɖo ƒowò, àse le ɖokuiwò me be wò kple Yehowa dome le kplikplikpli, eye ame siwo lɔ̃a wò nya la ade bubu ŋuwò.” Ðikeke mele eme o be, eɖea vi le mɔ geɖe nu be ‘míatsɔ nyateƒe ƒe alidziblanu la abla míaƒe aliwo dzi’ ɣeawokatãɣi.

6, 7. Nu ka tae wotsɔ dzɔdzɔenyenye sɔ kple akɔtakpoxɔnu?

⁶ Akɔtakpoxɔnu aɖe si Roma srafowo dona le ƒe alafa gbãtɔ me la nye esi wotsɔ gayibɔ gbadzɛgbadzɛ siwo wotsɔ mlɔ wo nɔewo ƒe axadzi la wɔe. Wotrɔ asi le gayibɔ gbadzɛawo ŋu be woatsyɔ asrafoa ƒe akɔta kple ƒodo dzi keŋ ava kpe. Wotsɔa lãgbalẽka blaa wo kpena nyuie le woƒe kpeƒeawo. Gawu sia xea mɔ na asrafoa vie le ale si wòaʋã eɖokui gome, eye ehiã be wòanɔ ŋku lém ɖe ga gbadzɛawo ŋu edziedzi be wole wo nɔƒe nyuie hã. Ke hã, eƒe gawu sia kpɔa eta be yi nagatɔe alo aŋutrɔ naƒo ɖe eƒe dzi alo ŋutinu vevi bubuwo o.

⁷ Kpɔɖeŋu sia kpe ɖe mía ŋu míese ale si Yehowa ƒe dzidzenu dzɔdzɔeawo kpɔa míaƒe kpɔɖeŋudzia ta la gɔme nyuie. (Lod. 4:23) Ale si ko asrafo aɖeke matsɔ akɔtakpoxɔnu si wotsɔ gayibɔ wɔe la aɖɔli esi wowɔ kple ga si menyo de gayibɔ nu o la, míawo hã míadi gbeɖe be míagblẽ Yehowa ƒe dzidzenu le nu si nye nyui ŋu la ɖi ahawɔ nu si sɔ le míawo ŋutɔwo ŋkume o. Míaƒe nunya mede blibo be míate ŋu akpɔ mía ɖokui ta o. (Lod. 3:5, 6) Ke boŋ, ele be míanɔ ŋku lém ɖe “akɔtakpoxɔnu” si Yehowa na la ŋu edziedzi be ele nɔnɔme nyui me be wòakpɔ míaƒe dzi ta hã.

 8. Nu ka tae wònyo be míawɔ Yehowa ƒe nudidi dzɔdzɔeawo dzi?

⁸ Ðe wòwɔna na wò ɣeaɖewoɣi be Yehowa ƒe dzidzenu dzɔdzɔeawo xea mɔ ɖe wò ablɔɖe nu alo wɔnɛ be mètea ŋu wɔa nu si nèdi oa? Daniel, si xɔ ƒe 21 la gblɔ be: “Nufialawo kple nye sukuhatiwo ɖua fewu le ŋunye le esi menɔa agbe ɖe Biblia ƒe dzidzenuwo nu ta. Esia wɔe be dzi megava nɔ ƒonye o eye melé blanui.” Nu kae kpe ɖe eŋu? Egblɔ be: “Ɣeyiɣi aɖe megbe la, mekpɔ ale si gbegbe wòɖea vi ne míenɔ agbe ɖe Yehowa ƒe nudidiwo nu. Nye sukuhati aɖewo va te atike vɔ̃ɖi zazã; bubuwo hã mete ŋu wu sukua nu o. Ale si agbea va nɔ na wo la wɔ nublanui ŋutɔ. Yehowa le mía ta kpɔm vavã.” Madison, si xɔ ƒe 15 la gblɔ be: “Menɔa bɔbɔe nam be mawɔ ɖe Yehowa ƒe nudidiwo dzi ahaƒo asa na nu siwo hanyetiwo buna dzidzɔdonamenuwoe o.” Ke nu kae wòwɔna? Egblɔ be: “Meɖoa ŋku edzi na ɖokuinye be Yehowa ƒe ŋkɔ le ŋunye eye tetekpɔwo le abe aŋutrɔ siwo Satana dana be woatém ene. Ne mete ŋu ɖu tetekpɔ aɖe dzi la, mekpɔa dzidzɔ.”

9-11. (a) Kpɔɖeŋufɔkpa kae Kristotɔwo dona? (b) Nu kae akpe ɖe mía ŋu míaɖe dzi ɖi geɖe wu ne míele gbeƒã ɖem nya nyuia?

⁹ Xlẽ Efesotɔwo 6:15. Roma srafo si medo afɔkpa o la mele dzadzraɖo ɖi na aʋayiyi o. Eƒe afɔkpa nye esi wowɔ kple lãgbalẽ etɔ̃ ƒokpli ale be ŋusẽ nanɔ eŋu wòalé afɔ nɛ nyuie. Ale si wotrɔ asi le eŋu la awɔe be magblẽ kaba o, eye edodo mave afɔ nɛ hã o.

¹⁰ Roma srafowo doa woƒe afɔkpawo tsɔ yia aʋagbedzi, gake kpɔɖeŋufɔkpa si Kristotɔwo dona ya kpena ɖe wo ŋu be woatsɔ ŋutifafagbedeasi ayi na amewo. (Yes. 52:7; Rom. 10:15) Ke hã, ebia dzinɔameƒo be míaɖi ɖase ne mɔnukpɔkpɔa ʋu ɖi na mí. Nɔviŋutsu si ŋkɔe nye Bo, si xɔ ƒe 20 la gblɔ be: “Esime menɔ suku la, mevɔ̃na be maɖi ɖase na nye sukuhatiwo. Ewɔ nam be ŋue nɔ kpeyem. Ne meɖo ŋku ɣemaɣi dzi la, nyemekpɔ nu si tae wòle be ŋu nakpem hafi o. Fifia ya, edzɔa dzi nam be maɖi ɖase na hanyetiwo.”

¹¹ Sɔhɛ geɖe kpɔe be ne yewodzra ɖo nyuie do ŋgɔ ɖe nya nyuia gbɔgblɔ ŋu la, enɔa bɔbɔe na yewo wu be yewoaɖi ɖase. Aleke nàte ŋu adzra ɖo nyuie do ŋgɔ? Julia, si xɔ ƒe 16 la gblɔ be: “Metsɔa míaƒe agbalẽwo dea akplo me yia suku, eye meɖoa to ne nye sukuhatiwo le woƒe susuwo gblɔm alo le nu ƒom tso woƒe dzixɔsewo ŋu. Esia wɔnɛ be metea ŋu dea dzesi nu si matsɔ akpe ɖe wo ŋu. Ne medzra ɖo do ŋgɔ la, metea ŋu hea woƒe susu yia nu si koŋ aɖe vi na wo la dzi.” Makenzie, si xɔ ƒe 23 la gblɔ be: “Ne èbua ame ŋu eye nènye toɖola nyui la, esia ana nàkpɔ nu siwo me tom hawòtiwo le. Mekpɔa egbɔ be mexlẽ nyati siwo katã wota na sɔhɛwo. Esia wɔnɛ be metea ŋu hea hanyetiwo ƒe susu yia nya aɖe si Biblia gblɔ alo nane si le jw.org si aɖe vi na wo la dzi.” Nya mawo ɖee fia be, ne míedzra ɖo ɖe ɖaseɖiɖi ŋu nyuie do ŋgɔ la, ɖeko wòle abe míesa míaƒe “kpɔɖeŋufɔkpaa” ƒe kawo nyuie ene.

12, 13. Satana ƒe “aŋutrɔ bibiawo” dometɔ aɖewoe nye kawo?

¹² Xlẽ Efesotɔwo 6:16. “Akpoxɔnu gã” si Roma srafowo zãna la le dzogoe ene me, eye ekeke ale gbegbe be etsyɔa woƒe abɔtawo va se ɖe woƒe klo gbɔ. Wotsɔnɛ kpɔa wo ɖokuiwo ta be futɔwo ƒe yiwo, akplɔwo kple aŋutrɔwo nagawɔ nu vevi wo o.

¹³ ‘Aŋutrɔ bibi’ siwo Satana ada be woaté wò la dometɔ aɖewoe nye alakpanya siwo wòkakana tso Yehowa ŋu. Edi be nàse le ɖokuiwò me be Yehowa melɔ̃ wò o eye ame aɖeke metsɔ ɖeke le eme na wò o. Nɔvinyɔnu si ŋkɔe nye Ida, si xɔ ƒe 19 la, sena le eɖokui me be yemele ɖeke me o. Egblɔ be: “Mesena le ɖokuinye me enuenu be Yehowa le adzɔge tso gbɔnye eye medi be yeanye Xɔ̃nye o.” Nu kae wòwɔna ne ese le eɖokui me alea? Ida gblɔ be: “Kpekpeawo doa ŋusẽ nye xɔse ale gbegbe. Tsã la, ɖeko menɔa anyi kpoo eye nyemeɖoa nya ŋu o, elabe mesusuna be ame aɖeke madi be yease nye nya o. Gake fifia la, medzrana ɖo ɖe kpekpeawo ŋu eye medzea agbagba be maɖo nya ŋu zi eve alo zi etɔ̃. Menɔa bɔbɔe nam ya o, gake ne meɖo nya ŋu la, nye dzi dzea eme. Eye nɔvi siwo le hamea me la dea dzi ƒo nam ŋutɔ. Ɣesiaɣi si megbɔ tso kpekpeawo la, mesena le ɖokuinye me be Yehowa lɔ̃m.”

14. Nyateƒenya ka dzie Ida ƒe ŋutinyaa he susu yi?

¹⁴ Ida ƒe ŋutinyaa he susu yi nyateƒenya vevi aɖe dzi: Eyae nye be akpoxɔnu si asrafowo zãna la ƒe lolome metrɔna o, gake míaƒe xɔse ƒe akpoxɔnua ya ate ŋu azu sue alo alolo, si fia be ate ŋu agbɔdzɔ alo asẽ ŋu. Gake míawo ŋutɔwo gbɔe esia atso. (Mat. 14:31; 2 Tes. 1:3) Esia na míekpɔe be ele vevie ŋutɔ be míanɔ ŋusẽ dom míaƒe xɔse!

15, 16. Mɔ ka nue míaƒe mɔkpɔkpɔa le abe gakuku ene le?

¹⁵ Xlẽ Efesotɔwo 6:17. Wotrɔ asi le gakuku si Roma srafo afɔzɔlawo ɖɔna la ŋu be futɔwo ƒe aʋawɔnuwo nagalɔ ta, kɔ kple mo na wo o. Wowɔ asiléƒe ɖe gakuku aɖewo ŋu ale be asrafoa nate ŋu alée ɖe asi.

¹⁶ Ale si ko gakuku kpɔa asrafo ƒe ahɔhɔ̃ tae la, nenema kee míaƒe “xɔxɔ ƒe mɔkpɔkpɔ” la kpɔa míaƒe susu, alo míaƒe tamebubuŋutete ta. (1 Tes. 5:8; Lod. 3:21) Mɔkpɔkpɔ kpena ɖe mía ŋu be míaƒe susu nɔa Mawu ƒe ŋugbedodowo ŋu eye edoa ŋusẽ mí hã be dzi nagaɖe le mía ƒo le míaƒe kuxiwo ta o. (Ps. 27:1, 14; Dɔw. 24:15) Gake ne míedi be míaƒe ‘gakukua’ nanye takpɔnu nyui na mí la, ele be míaɖɔe, ke menye be míalée ɖe asi o.

17, 18. (a) Aleke Satana ate ŋu able mía nu be míaɖe míaƒe kpɔɖeŋugakukua le ta? (b) Aleke míate ŋu aɖee afia be Satana ƒe amebeblea meflu mí o?

¹⁷ Aleke Satana ate ŋu able mía nu be míaɖe míaƒe kpɔɖeŋugakukua le ta? Bu ale si wòdze agbagba be yeable Yesu nui ŋu kpɔ. Satana nyae nyuie be Yesu nɔ mɔ kpɔm be yeava ɖu amegbetɔƒomea dzi le etsɔme. Gake ele be Yesu nalala va se ɖe Yehowa ƒe ɣeyiɣi ɖoɖia dzi. Eye hafi ɣemaɣi naɖo la, ele be wòakpe fu ahaku. Eya ta, Satana tsɔ mɔnukpɔkpɔa ɖo Yesu ŋkume be mɔkpɔkpɔ ma nava eme nɛ kaba wu. Satana gblɔ na Yesu be ne ebɔbɔ de ta agu na ye zi ɖeka pɛ ko la, nu mawo katã asu esi enumake. (Luka 4:5-7) Nenema kee Satana nyae be Yehowa do ŋugbe na mí be yeatsɔ nu nyuiwo ayra mí le xexe yeyea me. Gake ele be míalala, eye hafi ɣemaɣi naɖo la, míato nɔnɔme sesẽwo me. Eya ta, Satana tsɔa mɔnukpɔkpɔ siwo ate ŋu ana míase vivi na agbea fifia la ɖoa mía ŋkume tsɔ tea mí kpɔna. Edi be míatsɔ ŋutilãmenuwo didi aɖo nɔƒe gbãtɔ, eye míadi be nu sia nu nasu mía si fifia. Satana ƒonɛ ɖe mía nu be míagatsɔ Fiaɖuƒea aɖo nɔƒe gbãtɔ o.—Mat. 6:31-33.

¹⁸ Kristotɔ sɔhɛ geɖewo meɖe mɔ Satana ƒe amebeblea flu wo o. Le kpɔɖeŋu me, Kiana, si xɔ ƒe 20 la gblɔ be: “Menyae be Mawu Fiaɖuƒea koe ate ŋu aɖe míaƒe kuxiwo katã ɖa.” Aleke mɔkpɔkpɔ nyui sia kpɔ ŋusẽ ɖe eƒe tamesusu kple nuwɔnawo dzi fifia? Egblɔ kpee be: “Paradiso ƒe mɔkpɔkpɔa wɔe be nyemeɖea mɔ ŋutilãmenuwo didi xɔa nɔƒe vevitɔ le nye agbe me o. Nyemedzea agbagba be makpɔ dɔ gã le ŋutete si le asinye ta alo ɖoƒe gã nasu asinye le dɔwɔɖuinyawo me o. Ke boŋ mezãa nye ɣeyiɣi kple ŋusẽ ɖe gbɔgbɔmetaɖodzinuwo gbɔ ɖoɖo ŋu.”

19, 20. Aleke míawɔ abi ɖe Mawu ƒe Nya la ŋu dɔ wɔwɔ me geɖe wu?

¹⁹ Yi si Roma srafo afɔzɔlawo zãna le ɣeyiɣi si me Paulo ŋlɔ eƒe agbalẽa la ƒe didime nye sentimeta 50, eye wowɔe be asrafowo nazãe atsɔ awɔ avu kple woƒe futɔwo ŋkume kple ŋkume. Susu ɖeka aɖe si tae Roma srafowo bi ɖe woƒe yiwo zazã mee nye be, wosrɔ̃a eŋu dɔ wɔwɔ gbe sia gbe ne wole hehe xɔm.

²⁰ Paulo tsɔ Mawu ƒe Nyaa sɔ kple yi si Yehowa na mí. Gake ele be míasrɔ̃ ale si míazãe aɖaŋutɔe atsɔ aʋli míaƒe dzixɔsewo ta, alo atsɔ aɖɔ míawo ŋutɔwo míaƒe nuŋububu ɖo. (2 Kor. 10:4, 5; 2 Tim. 2:15) Aleke nàwɔ abi ɖe edzi le Mawu ƒe Nyaa zazã me? Sebastian, si xɔ ƒe 21 la gblɔ be: “Meŋlɔa mawunyakpukpui ɖeka ɖi ɣesiaɣi si mexlẽ Biblia ƒe ta aɖe. Mele mawunyakpukpui siwo léa dzi nam la nu ƒom ƒu. Esia wɔe be ale si Yehowa bua nuwo ŋui la me gava kɔ nam ɖe edzi.” Daniel, si ŋu nya míegblɔ va yi la gblɔ be: “Ne mele Biblia xlẽm la, medea dzesi mawunyakpukpui siwo mekpɔ be woaɖe vi na ame siwo medoa goe le gbeƒãɖeɖedɔa me. Mekpɔe be amewo lɔ̃na ɖoa to ne wokpɔe be èlɔ̃ Biblia eye nèle wò ŋutete katã wɔm be yeakpe ɖe yewo ŋu.”

21. Nu ka tae mele be míavɔ̃ Satana kple gbɔgbɔ vɔ̃wo o?

²¹ Abe ale si míekpɔe le sɔhɛ siwo ŋu míeƒo nu tsoe le nyati sia me ƒe nyawo me ene la, mehiã be míavɔ̃ Satana kple gbɔgbɔ vɔ̃wo o. Enye nyateƒe be ŋusẽ le wo si, gake womesẽ wu Yehowa o. Eye womanɔ anyi tegbee o. Eteƒe madidi o, le Kristo Ƒe Ƒe Akpe Ðeka Dziɖuɖua me la, woatsɔ wo ade gaxɔ me, womagate ŋu awɔ vɔ̃ aɖeke o, eye emegbe la, woatsrɔ̃ wo. (Nyaɖ. 20:1-3, 7-10) Míenya míaƒe futɔ la, míenya eƒe ayemɔwo, eye míenya eƒe tameɖoɖowo hã. Le Yehowa ƒe kpekpeɖeŋu me la, míate ŋu anɔ te sesĩe ɖe enu!