Mawu Si Ƒe “Nublanuikpɔkpɔ Sɔ Gbɔ” La Subɔm Míele

 1. Ame kae nye nublanuikpɔla? Gblɔ eƒe kpɔɖeŋu.

NUBLANUIKPƆLA nyoa dɔme, sea veve ɖe ame nu, eye eƒe dɔme trɔna ɖe ame ŋu. Esia na míeɖo ŋku Samariatɔ havilɔ̃la si ŋu Yesu ƒo nu tsoe la dzi. Samariatɔa “kpɔ nublanui” na Yudatɔ si dze adzodalawo si me la. Yudatɔ si nu vevi wɔ la ƒe “nu wɔ nublanui nɛ” ale gbegbe be wòwɔ ɖoɖo be woakpɔ edzi. (Luka 10:29-37) Kpɔɖeŋu sia na míekpɔ Yehowa ƒe nɔnɔme nyui aɖe. Eyae nye nublanuikpɔkpɔ. Mawu kpɔa nublanui na mí elabe elɔ̃ mí, eye ekpɔa nublanui na mí gbe sia gbe.

 2. Le go bubu mea, nu kae nublanuikpɔkpɔ bia?

² Le go bubu mea, nublanuikpɔkpɔ bia be womahe to na ame aɖe si dze na tohehe hafi la o. Le go sia mea, Yehowae kpɔa nublanui na mí wu. Psalmowo ŋlɔla aɖe gblɔ be: “Mewɔa nu ɖe mía ŋu ɖe míaƒe nu vɔ̃wo nu o.” (Ps. 103:10) Ke hã, ɣeaɖewoɣia, Yehowa ahe to na ame si wɔ nu vɔ̃ la.

 3. Biabia kawo mee míadzro?

³ Le nyati sia mea, míadzro biabia etɔ̃ siawo me: Nu ka tae Yehowa kpɔa nublanui? Ne wohe to na ame aɖea, ɖe wòfia be wokpɔ nublanui nɛa? Nu kae akpe ɖe mía ŋu be míakpɔ nublanui? Na míakpɔ ale si Mawu ƒe Nyaa ɖo biabia siawo ŋu.

 4. Nu ka tae Yehowa kpɔa nublanui?

⁴ Lɔlɔ̃e ʋãa Yehowa wòkpɔa nublanui. Gbɔgbɔ ʋã apostolo Paulo wògblɔ be: “Mawu ƒe nublanuikpɔkpɔ sɔ gbɔ.” Le afi sia, Paulo nɔ nu ƒom tso amegbetɔ madeblibo siwo Mawu kpɔ nublanui na eye wòna mɔnukpɔkpɔ wo be woava ɖu fia le dziƒo la ŋu. (Ef. 2:4-7) Gake menye woawo koe Yehowa kpɔa nublanui na o. Hakpala David gblɔ be: “Yehowa wɔa nyui na amewo katã, eye wòkpɔa nublanui na eƒe nuwɔwɔwo katã.” (Ps. 145:9) Esi Yehowa lɔ̃ amewo taa, ne susu aɖe li si ta wòakpɔ nublanui la, ewɔnɛ.

 5. Aleke Yesu wɔ srɔ̃ nu tso Fofoa ƒe nublanuikpɔkpɔ ŋu?

⁵ Yesu nya ale si gbegbe Yehowa lɔ̃ amewo, eye wòkpɔa nublanui na ame wu ame bubu ɖe sia ɖe. Enɔ Fofoa gbɔ le dziƒo ƒe akpe geɖe hafi va anyigba dzi. (Lod. 8:30, 31) Yesu kpɔ ale si Fofoa kpɔa nublanui na amegbetɔ siwo nye nuvɔ̃mewo. (Ps. 78:37-42) Eya ta le Yesu ƒe nufiafiawo mea, etea gbe ɖe Fofoa ƒe nɔnɔme vevi sia dzi.

 6. Kpɔɖeŋu kae Yesu wɔ tsɔ ɖe ale si Fofoa kpɔa nublanui la fia?

⁶ Abe ale si míekpɔe le nyati si do ŋgɔ me ene la, Yesu wɔ kpɔɖeŋu aɖe tsɔ ɖe ale si gbegbe lɔlɔ̃ ʋãa Yehowa wòkpɔa nublanui la fia. Le kpɔɖeŋua me la, ɖevia dzo le aƒe me, eye “wògblẽ eƒe nunɔamesiwo dome le afi ma to agbe baɖa nɔnɔ me.” (Luka 15:13) Emegbe, eɖe asi le nuvɔ̃gbe ma ŋu, bɔbɔ eɖokui, eye wòtrɔ gbɔ va aƒe me. Aleke fofoa wɔ nui? Ale si fofoa wɔ nui la dze le nya si Yesu gblɔ me. Yesu gblɔ be: “Esi [ɖevia le] mɔ dzi ʋĩi gbɔna la, fofoa kpɔe, eye eƒe nu wɔ nublanui nɛ, ale wòƒu du yi ɖawɔ atuu nɛ hegbugbɔ nu nɛ lɔlɔ̃tɔe.” Vifofoa medo ŋukpe via o. Ke boŋ ekpɔ nublanui nɛ, tsɔe kee, eye wògaxɔe va eƒe ƒomea me. Ðevia wɔ nu vɔ̃ gã aɖe, gake esi fofoa kpɔ susu si ta wòatsɔe akee la, etsɔe kee. Vifofo nublanuikpɔla si le kpɔɖeŋua mea, le tsitre ɖi na Yehowa. Yesu to kpɔɖeŋu wɔdɔɖeamedzi sia dzi ɖe ale si Fofoa lɔ̃na faa be yeatsɔ ake nu vɔ̃ wɔla siwo trɔ dzi me ŋutɔŋutɔ la.—Luka 15:17-24.

 7. Aleke ale si Yehowa kpɔa nublanui la ɖee fia be eƒe nunya de ŋgɔ?

⁷ Yehowa kpɔa nublanui elabe eƒe nunya de ŋgɔ. Eya ta etsoa nya me le mɔ si aɖe vi na eƒe nuwɔwɔwo nu. Biblia gblɔ be “nunya si tso dziƒo la, . . . nublanuikpɔkpɔ kple kutsetse nyuiwo yɔe fũu.” (Yak. 3:17) Abe dzila lɔ̃ame enea, Yehowa nya be yeƒe nublanuikpɔkpɔ aɖe vi na ye viwo. (Ps. 103:13; Yes. 49:15) Esi Yehowa kpɔa nublanui taa, ena mɔnukpɔkpɔ mí be míava nɔ agbe le etsɔme togbɔ be míede blibo o hã. Esi Yehowa ƒe nunya de ŋgɔ taa, ne ekpɔ susu siwo ta wòakpɔ nublanui la, ewɔnɛ. Ke hã, Yehowa nya ɣeyiɣi si wòakpɔ nublanui kple ɣeyiɣi si makpɔ nublanui o. Esi eƒe nunya de ŋgɔ taa, mekpɔa nublanui ne esia ava nye nu vɔ̃ dzi dede o.

 8. Nu kae wòhiãna be woawɔ ɣeaɖewoɣi, eye nu ka tae?

⁸ Tsɔe be nɔvi aɖe ɖoe koŋ wɔ nu vɔ̃ gã. Nu kae wòle be míawɔ? Gbɔgbɔ ʋã Paulo wògblɔ be, ‘Míadzudzɔ hadede kple ame’ ma. (1 Kor. 5:11) Nu vɔ̃ wɔla matrɔdzimewoe woɖena le hamea me. Wowɔa esia be woakpɔ mía nɔvi wɔnuteƒeawo ta, eye esia fia hã be wowɔ ɖe Yehowa ƒe mɔfiamewo dzi. Ke hã, asesẽ na ame aɖewo be woaxɔe ase be ame ɖeɖe le hamea me nye Mawu ƒe lɔlɔ̃ ɖeɖe fia. Gake nyateƒeea? Na míakpɔe ɖa.

9-10. Le Hebritɔwo 12:5, 6 ƒe nya nua, nu ka tae ameɖeɖelehame nye nublanuikpɔkpɔ? Gblɔ eƒe kpɔɖeŋu.

⁹ Ne woɖe gbeƒã le hamea me be ame aɖe si míenya eye míelɔ̃ la “meganye Yehowa Ðasefo o” la, etena ɖe mía dzi vevie. Ate ŋu anɔ wɔwɔm na mí be ɖe wòhiã be woaɖe amea le hamea me hã. Ne woɖe ame aɖe le hamea mea, ɖe wòfia be wokpɔ nublanui nɛa? Ɛ̃. Ne womehe to na ame o la, ema boŋ fia be womelɔ̃e o. (Lod. 13:24) Ne woɖe nu vɔ̃ wɔla matrɔdzime le hamea mea, ɖe wòakpe ɖe eŋu wòawɔ tɔtrɔa? Ɛ̃. Nɔvi geɖe siwo wɔ nu vɔ̃ gãwo, siwo woɖe le hamea me la, gblɔ be, ekpe ɖe yewo ŋu yewonyɔ le yewo ɖokuiwo me, wɔ tɔtrɔ siwo hiã, eye yewotrɔ va Yehowa gbɔ.—Xlẽ Hebritɔwo 12:5, 6.

¹⁰ Bu kpɔɖeŋu sia ŋu kpɔ. Alẽkplɔla aɖe de dzesii be yeƒe alẽwo dometɔ ɖeka dze dɔ, eye ekpɔe be ehiã be yeaɖee ɖe aga hafi akpɔ egbɔ. Ke hã, alẽwo dina be yewoanɔ yewo nɔewo ŋu. Eya ta woate ŋu atsi dzi ne woɖe wo dometɔ aɖe ɖe aga. Ðe esia fia be alẽkplɔlaa le tame sẽm le alẽa ŋu, esi wòɖee ɖe aga be yeakpɔ egbɔ taa? Kura o. Elabe enyae be ne ele etɔwo domea, akaka dɔlélea na wo. Eya ta ne eɖee ɖe vovoa, akpɔ alẽ mamlɛawo ta.—Tsɔe sɔ kple 3 Mose 13:3, 4.

11. (a) Mɔ kawo nue míate ŋu atsɔ ame si woɖe le haa mea, asɔ kple alẽ si dze dɔ? (b) Nu kae ame siwo woɖe le haa me ate ŋu awɔ, eye kpekpeɖeŋu kae hamemetsitsiwo ate ŋu ana wo?

¹¹ Míate ŋu atsɔ nɔvi si woɖe le haa me la, asɔ kple alẽ ma si dze dɔ la. Edze dɔ le gbɔgbɔ me. (Yak. 5:14) Ne dɔxɔleameŋu le ame aɖe ŋu la, ate ŋu abae na ame bubuwo. Nenema kee ne ame aɖe dze dɔ le gbɔgbɔ mea, ate ŋu akpɔ ŋusẽ gbegblẽ ɖe ame bubuwo dzi. Eya ta ɣeaɖewoɣia, ahiã be woaɖe ame si dze dɔ le gbɔgbɔ mea, le hamea me. Tohehe ma, nye mɔ si dzi Yehowa tona ɖenɛ fiana hamea me tɔ siwo le nuteƒe wɔm la be yelɔ̃ wo. Eye esia kpena ɖe nu vɔ̃ wɔlaa hã ŋu be wòatrɔ dzi me. Ne woɖe ame aɖe le haa mea, ate ŋu ade kpekpeawo be wòaxɔ mɔfiamewo tso Biblia me be wòado ŋusẽ eƒe xɔse. Ate ŋu axɔ Biblia srɔ̃gbalẽwo, eye wòakpɔ JW Nyakakadɔwɔƒea ƒe wɔnawo. Eye ne hamemetsitsiwo kpɔ be ele tɔtrɔ siwo hiã wɔmaa, tso ɣeyiɣi yi ɣeyiɣia, woate ŋu aɖo aɖaŋu aɖewo nɛ be woakpe ɖe eŋu wòagasẽ le gbɔgbɔ me, ale be woagaxɔe ɖe haa me.b

12. Nu kae nublanuikpɔkpɔ kple lɔlɔ̃ bia be hamemetsitsiwo nawɔ na nu vɔ̃ wɔla matrɔdzime?

¹² Ele vevie be míaɖo ŋku edzi be nu vɔ̃ wɔla matrɔdzimewo koe woɖena le hamea me. Hamemetsitsiwo nya be ŋkubiãnyae nya sia nye, eya ta womebunɛ fefenyae o. Wonya be Yehowa ‘hea to na amewo ale si dze.’ (Yer. 30:11) Hamemetsitsiwo lɔ̃ wo nɔviwo, eya ta womadi be yewoawɔ naneke si agblẽ wo kple Yehowa dome o. Gake ɣeaɖewoɣia, nublanuikpɔkpɔ kple lɔlɔ̃ bia be woaɖe nu vɔ̃ wɔlaa ɖa le hamea me va se ɖe esime wòtrɔ dzi me.

13. Nu ka tae wòhiã be woaɖe nɔvi aɖe le Korinto hamea me?

¹³ Bu ale si apostolo Paulo wɔ nu ɖe nu vɔ̃ wɔla matrɔdzime aɖe si nɔ anyi le ƒe alafa gbãtɔ me la ŋu kpɔ. Nɔvi ma si nɔ Korinto la, xɔ fofoa srɔ̃. Busunya kae nye esi! Le go siawo tɔgbi me la, Yehowa de se na Israel-viwo le blema be: “Ŋutsu si dɔ fofoa srɔ̃ gbɔ la, edo ŋukpe fofoa. Ele be woawu wo ame evea siaa.” (3 Mose 20:11) Nyateƒeae nye be Paulo mate ŋu agblɔ be woawu ŋutsua o. Gake egblɔ be woaɖe nɔvi ma le Korinto hamea me. Ŋutsua ƒe ahasigbenɔnɔa va nɔ ŋusẽ kpɔm ɖe hamea me tɔ aɖewo dzi, eye nuwɔna ma megakpea ŋu na wo o!—1 Kor. 5:1, 2, 13.

14. Aleke Paulo kpɔ nublanui na ŋutsu aɖe si woɖe le Korinto hamea me, eye nu ka tae? (2 Korintotɔwo 2:5-8, 11)

¹⁴ Le ɣeyiɣi aɖe megbea, Paulo see be ŋutsua wɔ tɔtrɔ siwo hiã. Etrɔ dzi me ŋutɔŋutɔ. Togbɔ be ŋutsua ƒe nuwɔnaa he vlododo va hamea dzi hã, Paulo gblɔ na hamemetsitsiwo be yemedi be yeƒe ‘nyawo nu nasẽ akpa o.’ Egblɔ na hamemetsitsiawo be: “Mitsɔe kee faa, eye mifa akɔ nɛ.” De dzesi susu si ta Paulo gblɔ be woatsɔ akee. Egblɔ be: “Ale be nuxaxa akpa nagamii o.” Paulo se veve ɖe ŋutsu si trɔ dzi me la nu. Paulo medi be nu si ŋutsua wɔ va yi la nana wòanɔ nu xam akpa o, eya ta ena mɔfiame be woatsɔe akee.—Xlẽ 2 Korintotɔwo 2:5-8, 11.

15. Aleke hamemetsitsiwo atɔ afɔ to gake agakpɔ nublanui ne ehiã?

¹⁵ Hamemetsitsiwo hã srɔ̃a Yehowa eye wokpɔa nublanui. Ne ehiã be woatɔ afɔ to la, wotɔa afɔ to, gake ne susu aɖe li si ta woakpɔ nublanui la, wokpɔa nublanui. Ne womewɔe nenema o la, ke meganye nublanuikpɔkpɔ o, eva zu nu vɔ̃ dzi dede. Gake hamemetsitsiwo koe wòle be woakpɔ nublanuia?

16. Le Lododowo 21:13 ƒe nya nua, aleke Yehowa awɔ nu ɖe ame siwo mekpɔa nublanui o la ŋu?

¹⁶ Mí Kristotɔwo katã míedi be míasrɔ̃ Yehowa ƒe nublanuikpɔkpɔ. Nu ka tae? Susu ɖekae nye be Yehowa maɖo to ame siwo mekpɔa nublanui o. (Xlẽ Lododowo 21:13.) Mía dometɔ ɖe sia ɖe di be Yehowa nase míaƒe gbedodoɖawo, eya ta mímedi be míanye ame siwo mekpɔa nublanui o. Eya ta ne mía nɔviwo le nɔnɔme sesẽwo me tom la, ele be míanɔ klalo ɣesiaɣi be míaɖo to woƒe “ɣlidodo.” Nenema kee míedina be míawɔ ɖe Biblia ƒe aɖaŋuɖoɖo sia dzi. Eyae nye be: “Ame si mekpɔa nublanui na ame o la, womakpɔ nublanui nɛ le ʋɔnudɔdrɔ̃ me o.” (Yak. 2:13) Ne míeɖoa ŋku edzi be ele be woakpɔ nublanui na mí la, awɔe be míawo hã míakpɔ nublanui na amewo. Vevietɔ, ele be míakpɔ nublanui na nu vɔ̃ wɔla aɖe si trɔ dzi me eye wogaxɔe ɖe hamea me.

17. Aleke Fia David kpɔ nublanui tso dzi me?

¹⁷ Ame siwo ƒe kpɔɖeŋuwo le Biblia me la ate ŋu akpe ɖe mía ŋu míakpɔ nublanui eye míaƒe nya me nagasẽ akpa o. Le kpɔɖeŋu me, bu Fia David ŋu kpɔ. Ekpɔ nublanui na amewo tso dzi me zi geɖe. Togbɔ be Saul di be yeawui hã, David kpɔ nublanui na Saul, si nye fia si Mawu tia la, eye mewɔ nuvevii o.—1 Sam. 24:9-12, 18, 19.

18-19. Go eve kawo mee David mekpɔ nublanui le o?

¹⁸ Ke hã, David mekpɔ nublanui na ame ɣesiaɣi o. Le kpɔɖeŋu me, esime Nabal, si ƒe nya me sẽ, da gbe ɖe David kple eƒe amewo gbɔ eye wògbe be yemana nuɖuɖu wo la, David ƒe dzi ho, eye wòɖoe be yeawu Nabal kple ŋutsu ɖe sia ɖe si le eƒe me. Ke hã, Nabal srɔ̃ Abigail, wɔ nu kpata si wɔe be David mekɔ ʋu ɖi o.—1 Sam. 25:9-22, 32-35.

¹⁹ Ɣebubuɣia, nyagblɔɖila Natan va gblɔ kesinɔtɔ aɖe si fi ame dahe aɖe ƒe alẽ ɖeka ŋu nya na David. David ƒe dzi gaho, eye wògblɔ be: “Zi ale si Yehowa le agbe la, ŋutsu si wɔ nu sia la dze ku!” (2 Sam. 12:1-6) David nya Mose ƒe Sea nyuie. Sea gblɔ be ne ame aɖe fi alẽ ɖeka la, ele be wòaɖo eteƒe zi gbɔ zi ene. (2 Mose 22:1) Gake David ya gblɔ be woawu ŋutsua? Mekpɔ nublanui kura o. Kpɔɖeŋu aɖe koe Natan wɔ tsɔ ʋu go nu vɔ̃ gã siwo David ŋutɔ wɔ. Ale si Yehowa kpɔ nublanui na David la to vovo kura na ale si David ya ɖoe be yeatu nu kple ame si fi alẽa le Natan ƒe kpɔɖeŋua me!—2 Sam. 12:7-13.

20. Nu kae míate ŋu asrɔ̃ tso David ƒe kpɔɖeŋua me?

²⁰ De dzesii be esi David do dzikua, eɖoe be yeawu Nabal kple ŋutsu siwo katã le eƒe aƒe me. Eye dzikua kee wɔe be wògblɔ be woawu ŋutsu si le Natan ƒe kpɔɖeŋua me. Le nudzɔdzɔ evelia mea, ate ŋu anɔ wɔwɔm na mí be aleke David, si sea veve ɖe ame nu la, gbe be yemakpɔ nublanui na ame o? Na míakpɔ nu siwo gbɔ wòanya tso ɖa. Ɣemaɣia, David ƒe dzitsinya nɔ fu ɖem nɛ. Ne ame aɖe megbɔa dzi ɖi o, eye wòtsɔa dzitsitsi drɔ̃a ʋɔnu ame bubuwo la, efia be eya kple Yehowa dome le gbegblẽm. Esia tae Yesu xlɔ̃ nu eyomedzelawo vevie be: “Midzudzɔ ʋɔnudɔdrɔ̃, ne woagadrɔ̃ ʋɔnu mi o; elabena ale si miedrɔ̃a ʋɔnui la, nenema kee woadrɔ̃ ʋɔnu miawo hã.” (Mat. 7:1, 2) Eya ta migana míaƒe nya me nasẽ o, ke boŋ míasrɔ̃ Mawu eye míana míaƒe “nublanuikpɔkpɔ” nasɔ gbɔ.

21-22. Mɔ ŋutɔŋutɔ kawo dzie míate ŋu ato akpɔ nublanui na amewo?

²¹ Menye ale si ame sena le eɖokui me koe nye nublanuikpɔkpɔ o. Le nyateƒe me la, nublanuikpɔkpɔ fia be míawɔ nu ŋutɔŋutɔ aɖewo atsɔ akpe ɖe amewo ŋu. Eya ta anyo be mí katã míalé ŋku ɖe míaƒe ƒomea, hamea, kple nutoa me ŋu akpɔe ɖa be nu kae míate ŋu awɔ atsɔ akpe ɖe amewo ŋu hã. Le nyateƒe me la, míate ŋu awɔ nu geɖe atsɔ afia be míekpɔ nublanui na wo. Ðe wòahiã be míafa akɔ na ame aɖea? Ðe míate ŋu ana kpekpeɖeŋu ŋutɔŋutɔ ame aɖe, ɖewohĩ ana nuɖuɖui, alo awɔ nu bubu aɖe nɛa? Ðe wòhiã be míanye ame aɖe si wogaxɔ ɖe hamea me xɔlɔ̃, eye míafa akɔ nɛa? Ðe míate ŋu agblɔ Biblia me nya nyuia atsɔ afa akɔ na amewoa? Esiae nye mɔ siwo dzi míate ŋu ato aɖee afia be míekpɔ nublanui na amewo la dometɔ ɖeka.—Hiob 29:12, 13; Rom. 10:14, 15; Yak. 1:27.

²² Ne míele ŋudzɔ la, míade dzesi mɔ geɖe siwo dzi míate ŋu ato akpɔ nublanui na amewo. Eye ne míekpɔ nublanui na amewo la, míana mía Fofo si le dziƒo, si ƒe “nublanuikpɔkpɔ sɔ gbɔ” la, nakpɔ dzidzɔ!