Gamaliel—Efia Nu Saul si tso Tarso

AMEHA la zi ɖoɖoe klenee. Ɣeyiɣi kpui aɖe do ŋgɔ la, wowu apostolo Paulo kloe. Wogayɔnɛ hã be Saul si tso Tarso, amesi Roma-srafowo xɔ ɖe agbe eye fifia egadze ŋgɔ amehawo le atrakpui si te ɖe Yerusalem-gbedoxɔa ŋu la dzi.

Esi Paulo wɔ asi na wo be woazi ɖoɖoe vɔ la, eƒo nu na wo le Hebrigbe me be: “Ŋutsuwo, nɔviwo kple fofowo, miɖo to alesi mele ɖokuinye nu ɖe ge azɔ la na mi. . . . Nye la Yudatɔ menye, wodzim le Tarso le Kilikia; gake la du sia me wonyim le, eye Gamaliel ƒe afɔ nu wofia num le pɛpɛpɛ; le mía fofowo ƒe se la nu la ŋuʋãla ɖe Mawu ŋu menye, sigbe alesi mi katã miele egbe sia ene.”—Dɔwɔwɔwo 22:1-3.

Esi Paulo ƒe agbe ɖo afɔku me la, nukata wòdze eƒe ɖokuinuɖenyaa gɔme be Gamaliel ye fia nu ye? Amekae nye Gamaliel, eye nukae wòbia be woanye eƒe nusrɔ̃vi? Ðe hehe si Saul xɔ la kpɔ ŋusẽ ɖe edzi esi wòva zu Kristotɔ apostolo Paulo vɔ megbea?

Amekae Nye Gamaliel?

Gamaliel nye Farisitɔ xɔŋkɔ aɖe. Tɔgbuia enye Hillel Tsitsitɔ, amesi ɖo Farisitɔwo ƒe Yuda-subɔsubɔ ƒe suku kɔkɔ eveawo dometɔ ɖeka.a Wobu Hillel ƒe nufiafiamɔnu be enyo wu eƒe evelia Shammai tɔ. Le Yerusalem ƒe gbedoxɔa tsɔtsrɔ̃ le ƒe 70 M.Ŋ. vɔ megbe la, woda asi ɖe Bet Hillel (Hillel ƒe Aƒe) dzi wu Bet Shammai (Shammai ƒe Aƒe). Hillel ƒe Aƒe va zu afisi Yuda-subɔsubɔ ƒe nufiafiawo tsona, elabena kɔmama bubu ɖesiaɖe bu le gbedoxɔa tsɔtsrɔ̃ me. Bet Hillel ƒe nyametsotsowo dzie wotu Yudatɔwo ƒe se si le Mishnah la me ɖo zi geɖe eye eyae va zu Talmud la ƒe gɔmeɖokpe, eye edze ƒã be akpa si Gamaliel wɔe nye nu vevitɔ si na wòkpɔ ŋusẽ.

Wode bubu Gamaliel ŋu ale gbegbe be eyae nye ame gbãtɔ si woyɔ be rabban, si nye dzesideŋkɔ si kɔkɔ wu rabi. Le nyateƒe me la, Gamaliel va zu amesi ŋu wodea bubui vevie ale gbegbe be Mishnah la gblɔ tso eŋu be: “Esi Rabban Gamaliel si nye tsitsitɔ ku la, Torah ƒe ŋutikɔkɔe bu, eye eƒe dzadzɛnyenye kple kɔkɔenyenye [le nya la ŋutɔ nu, “memamã”] la bu.”—Sotah 9:15.

Gamaliel Fia Nui—Le Mɔ Ka Nu?

Esime apostolo Paulo gblɔ na amehawo le Yerusalem be ‘wofia nu ye le Gamaliel ƒe afɔ nu’ la, nukae wòwɔnɛ? Nukae wòbia be woanye Gamaliel ƒe nusrɔ̃vi?

Le hehexɔxɔ sia ŋu la, Nufialagã Dov Zlotnick si le Yudatɔwo ƒe Subɔsubɔ me Mawunyaŋutinunya ƒe Hehexɔƒe si le Amerika ŋlɔ bena: “Se si wogblɔ kple nu ƒe nyateƒenyenye, si fia eƒe nuŋutɔŋutɔnyenye, nɔ te keŋkeŋ kloe ɖe nufiafia kple nusrɔ̃vi dome ƒomedodo dzi: alesi nufiala la aɖɔ ŋu ɖo le sea fiafia me kple alesi gbegbe nusrɔ̃via aɖo toe le esɔsrɔ̃ me. . . . Eyata wobiana tsoa nusrɔ̃viwo si be woanɔ nunyalagã ƒe afɔnu. . . . ‘eye woatsɔ tsikɔwuame ano woƒe nyawoe.’”—Avot 1:4, the Mishnah.

Emil Schürer na numekɔkɔ le alesi ƒe alafa gbãtɔ me rabiwo ƒe nufialawo fiaa nui ŋu le eƒe agbalẽ si nye A History of the Jewish People in the Time of Jesus Christ me. Eŋlɔ bena: “Rabi siwo xɔ ŋkɔ wu ƒoa sɔhɛ gbogbo aɖewo siwo di be yewoaxɔ hehe la nu ƒu ɖe wo ɖokui gbɔ, kple susu be yewoana woanya ‘se si wogblɔ kple nu ko’ la ƒe akpa vovovoawo kple eŋu nya gbogboawo. ... Hehexɔxɔa ku ɖe ŋkuɖoɖonudzi ƒe dodokpɔ gbogbo aɖe si yia edzi ŋu. ... Nufiala la biaa senya geɖe eƒe nusrɔ̃viawo be woatso nya me eye woaɖo eŋu alo eya ŋutɔ naɖo eŋu. Mɔɖeɖe li hã be nusrɔ̃viawo nabia nya nufiala la.”

Le rabiwo gome la, nusi le ŋgɔ na nusrɔ̃viawo bia nu geɖe wu sukunuwuwu ƒe kafukafu xɔxɔ ko. Woxlɔ̃a nu amesiwo le hehe xɔm le nufiala siawo te be: “Amesiame si aŋlɔ nu ɖeka be le nusiwo wòsrɔ̃ dome la—Ŋɔŋlɔa bunɛ be enye amesi le ku kple agbe dome.” (Avot 3:8) Wotsɔa kafukafu gãtɔ naa sukuvi si le abe “vudo si ŋuti woxe nyuie, si me tsi gege toŋ ɖeka hã meɖuɖuna le o.” (Avot 2:8) Hehe sia tɔgbee Paulo, si ƒe Hebrigbe me ŋkɔ ɣemaɣie nye Saul si tso Tarso, xɔ tso Gamaliel gbɔ.

Gɔmesese si le Gamaliel ƒe Nufiafiawo Ŋu

Le ɖekawɔwɔ me kple Farisitɔwo ƒe nufiafia la, Gamaliel do se si wogblɔ kple nu dzixɔxɔse ɖe ŋgɔ. Ede vevienyenye rabiwo ƒe kɔnyinyiwo ŋu wu Ŋɔŋlɔ si tso gbɔgbɔ me. (Mateo 15:3-9) Mishnah la yɔ Gamaliel ƒe nyawo gblɔ be: “Di nufiala [rabi] na ɖokuiwò be nàvo tso ɖikekewo me, elabena mele be nàna nuwo ƒe ewolia to nususukpɔ me o.” (Avot 1:16) Esia fia be ne Hebri Ŋɔŋlɔawo mena numekɔkɔ tsitotsito tso nuwɔna aɖe ŋu o la, mele be ame nazã eya ŋutɔ ƒe susu alo anɔ te ɖe eƒe dzitsinya dzi awɔ nyametsotso o. Ke boŋ ele be wòadi rabi si dze ne wòawɔ nyametsotsoa nɛ. Le Gamaliel ƒe nya nu la, mɔ sia ko dzie woato aƒo asa na nuvɔ̃medzedze.—Tsɔe sɔ kple Romatɔwo 14:1-12

Gake wonya Gamaliel nyuie be enye amesi ɖea mɔ ɖe nu ŋu eye wòsea nu gɔme na ame le eƒe subɔsubɔ me afiatsotsowo me. Le kpɔɖeŋu me, ebu nyɔnuwo ŋu esime wòtso afia be “yeaɖe mɔ na nyɔnu be wòaɖe srɔ̃ bubu nenye be ame ɖeka ko ɖi ɖase tso eŋu [be srɔ̃aŋutsu ku].” (Yevamot 16:7, the Mishnah) Hekpe ɖe eŋu la, be wòanye takpɔkpɔ na nyɔnuwo be wo srɔ̃wo nagagbe wo o la, Gamaliel ɖo mɔxenu geɖe ɖe srɔ̃gbegbalẽ nana ŋu.

Gamaliel ɖe nugɔmesese sia hã fia le eƒe nuwɔwɔ ɖe Yesu Kristo yomedzela gbãtɔawo ŋu me. Dɔwɔwɔwo ƒe agbalẽa ka nya ta be esi Yudatɔwo ƒe kplɔla bubuwo di be yewoawu Yesu ƒe apostolo siwo wolé le gbeƒãɖeɖe ta la, “farisitɔ aɖe, si ŋkɔ nye Gamaliel, sefiala, si dukɔ la katã buna la, tsi tre le ʋɔnudrɔ̃lawo me; eye wòde se be, woakplɔ amesiawo ado goe ʋee. Eye wògblɔ na wo bena: Israel-ŋutsuwo, mikpɔ mia ɖokui dzi nyuie le nusi wɔ ge miala ɖe ame siawo ŋuti la ŋuti. ... Eye azɔ la mele egblɔm na mi bena: Mite ɖa le amesiawo gbɔ, eye miɖe asi le wo ŋu; elabena ne tameɖoɖo alo dɔ sia tso amewo gbɔ la, ekema ava gblẽ; ... bena womagakpɔ mi abe amesiwo le tsitre tsim ɖe Mawu ŋuti ene o.” Wose Gamaliel ƒe aɖaŋuɖoɖoa, eye woɖe asi le apostoloawo ŋu.—Dɔwɔwɔwo 5:34-40.

Nukae Wòfia na Paulo?

Rabiwo ƒe nufiala gãtɔ kekeake siwo nɔ anyi kpɔ le ƒe alafa gbãtɔ M.Ŋ. me la dometɔ ɖekae na hehe Paulo hefia nui. Ðikeke mele eme o be esi apostoloa yɔ Gamaliel ƒe ŋkɔe na be ameha siwo nɔ Yerusalem la gaɖo to eƒe nuƒoa geɖe wu. Gake eƒo nu na wo tso Nufiala aɖe si lolo kura wu Gamaliel la ŋu—Yesu, Mesia la. Fifia Paulo nɔ nu ƒom na amehawo abe Yesu ƒe nusrɔ̃vi ene, ke menye abe Gamaliel ƒe nusrɔ̃vi ene o.—Dɔwɔwɔwo 22:4-21.

Ðe hehe si Paulo xɔ tso Gamaliel gbɔ la kpɔ ŋusẽ ɖe eƒe nufiafia abe Kristotɔ ene dzia? Anɔ eme nenema, hehe kpaɖii si Paulo xɔ tso Ŋɔŋlɔawo kple Yudatɔwo ƒe sea me la kpe ɖe eŋu esi wònye Kristotɔ nufiala. Gake Paulo ƒe agbalẽ siwo tso gbɔgbɔ me siwo le Biblia me la ɖee fia kɔte be egbe gɔmesese si le Gamaliel ƒe Farisitɔwo ƒe dzixɔsea ŋu. Paulo he ehati Yudatɔwo kple ame bubuwo katã ƒe susu yi Yesu Kristo dzi, ke menye rabiwo ƒe Yuda-subɔsubɔ alo amegbetɔwo ƒe kɔnyinyiwo dzi o.—Romatɔwo 10:1-4.

Ne ɖe Paulo yi edzi nye Gamaliel ƒe nusrɔ̃vi la, anye ne ezu bubume gã aɖe. Ame bubu siwo xɔ hehe le Gamaliel gbɔ la zu amesiwo kpe asi ɖe Yuda-subɔsubɔa ƒe kelili ŋu. Le kpɔɖeŋu me, Gamaliel ƒe vi Simeon, ɖewohĩ amesi nye Paulo ƒe nusrɔ̃hati, wɔ akpa vevi aɖe le Yudatɔwo ƒe aglãdzedze ɖe Roma ŋu me. Le gbedoxɔa tsɔtsrɔ̃ vɔ megbe la, Gamaliel ƒe tɔgbuiyɔvi Gamaliel II gbugbɔ ɖo Sanhedrin ƒe ŋusẽa anyi eye wòna wòʋu va nɔ Yavneh. Gamaliel II ƒe tɔgbuiyɔvi Judah Ha-Nasi ye nye amesi ƒo Mishnah la nu ƒu, esi va zu Yudatɔwo ƒe gɔmeɖoanyikpe vaseɖe egbe.

Esi Saul si tso Tarso nye Gamaliel ƒe nusrɔ̃vi ta la, anya xɔ ŋkɔ le Yuda-subɔsubɔ me. Gake Paulo ŋlɔ tso dɔ sia ŋu be: “Nusiwo nye viɖe nam la, nu mawo ke mebu nu búbu le Kristo ŋuti. Ẽ, fifi gɔ̃ mebu wo katã nu búbu le Kristo Yesu, nye Aƒetɔ nyanya, si ƒo wo katã ta la ŋuti, amesi ta meɖe asi le nusiawo katã ŋuti ɖo, eye mebu wo aɖukpo dzi nuwoe, bena nye asi nasu Kristo dzi.”—Filipitɔwo 3:7, 8.

Esi Paulo gbe eƒe dɔ abe Farisitɔ ene eye wòva zu Yesu Kristo yomedzela la, enɔ eƒe nufiala tsãtɔa ƒe aɖaŋuɖoɖo dzi wɔm ŋutɔŋutɔ be wòakpɔ eɖokui ta be maganye ‘amesi le tsitre tsim ɖe Mawu ŋuti’ o. Esi Paulo dzudzɔ Yesu ƒe nusrɔ̃lawo yome titi la, edzudzɔ tsitretsitsi ɖe Mawu ŋu. Ke esi wòva zu Kristo ƒe hadɔwɔla boŋ la, eva zu “Mawu ƒe hadɔwɔlawo” dometɔ ɖeka.—Korintotɔwo I, 3:9.

Yehowa ƒe Ðasefowo veviedonulawo yi edzi le Kristotɔnyenye vavãtɔ ƒe gbedasia kakam le míaƒe ŋkekea me. Abe Paulo ene la, wo dometɔ geɖe wɔ tɔtrɔ gãwo le woƒe agbenɔnɔ me. Wo dometɔ aɖewo ɖe asi le dɔwɔɖui si me wokpɔa ga geɖe le gɔ̃ hã ŋu ale be woate ŋu akpɔ gome geɖe wu le Fiaɖuƒegbeƒãɖeɖedɔa me, dɔ si ‘tso Mawu gbɔ’ vavã. (Dɔwɔwɔwo 5:39) Enye dzidzɔ na wo ŋutɔ be yewodze Paulo ƒe kpɔɖeŋu yome, ke menye eƒe nufiala tsãtɔ, Gamaliel, yome o!

[Etenuŋɔŋlɔ]

[Nɔnɔmetata si le axa 28]

Esi Saul si tso Tarso zu apostolo Paulo la, eɖe gbeƒã nyanyuia na dukɔwo katã